ᤂᤠᤜᤢᤴ 11 - LIFOTNT1 ᤔᤧᤱᤃᤧᤵᤔᤏᤠᤒᤠ ᤁᤢᤎᤠᤱᤔᤧᤴ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤛᤡᤰᤁᤧᤗᤧ᤺ᤱᤗᤥ. ᤁᤖ ᤁᤧᤃᤧᤵᤐᤠ ᤁᤢᤛᤡ᤺ᤰᤔᤧᤴ ᤂᤢᤏᤧ᤹ ᤁᤢᤛᤡᤖᤠ᤹ ᤌᤠᤱᤗᤥ॥ 2 ᤀᤠᤱᤍᤡᤱ ᤗ᤹ᤔᤠ ᤋᤠ᤺ᤸᤗᤧ ᤁᤢᤏᤠᤔᤧᤴᤇᤠ᤹ ᤐᤥᤱᤔᤠᤀᤠᤱ ᤋᤠᤖᤥ. ᤁᤖ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶ ᤗ᤹ᤔᤧᤸᤗᤧ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤋᤠᤖᤢᤖᤥ॥ 3 ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤕᤠ᤺ᤶᤒᤰ ᤆᤥ᤺ᤰᤔᤧᤴᤏᤣ ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤠᤶ ᤀᤥᤛᤣ᤺ᤴᤎᤠᤱ ᤁᤧᤈᤥ᤺ᤰᤐᤠ ᤗᤠᤶᤗᤥ. ᤁᤖ ᤏᤡᤱᤘᤠ᤹ᤀᤡᤖᤧ ᤔᤧᤄᤥᤵᤋᤢᤶᤒᤠᤜᤠ᤹ ᤂᤢᤴᤇᤡ᤹ᤀᤣ ᤀᤡᤱᤗᤧᤰᤁᤡᤸᤗᤧ ᤔᤧᤔᤧᤰᤗᤥ॥ 4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤐᤥ᤺ᤰᤔᤠ ᤕᤧᤴᤏᤥ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤌᤣᤀᤠᤱ ᤁᤢᤔᤧᤸᤗᤢᤱ ᤜᤥᤵᤗᤥ. ᤁᤖ ᤛᤠᤶᤕᤥᤏᤡᤔᤠ ᤕᤠ᤺ᤶᤒᤰᤁᤡᤸᤗᤧ ᤛᤡᤔᤠᤗᤠᤶ ᤀᤠᤛᤧ᤺ᤵᤗᤥ॥ 5 ᤀᤠᤵᤋᤡᤰ ᤔᤧ᤺ᤴᤏᤣᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤁᤢᤍᤥ᤺ᤵᤔᤠ ᤆᤥᤃᤢ ᤐᤡᤖᤢᤛᤡᤖᤥ. ᤁᤖ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤕᤥᤕᤥᤰ ᤌᤠᤛᤢᤛᤡᤖᤥ॥ 6 ᤁᤢᤍᤥ᤺ᤵᤔᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ ᤁᤖ ᤏᤡᤱᤘᤠ᤹ᤀᤡᤖᤧ ᤔᤧᤄᤥ᤺ᤵᤋᤢᤴᤛᤡᤴᤒᤠᤜᤠ᤹ ᤆᤠᤱᤃᤥ ᤌᤢᤅᤢᤱᤃᤥ ᤁᤧᤗ᤹ᤒᤠ ᤏᤡᤱᤘᤠ᤹ᤸᤗᤧ ᤆᤥᤃᤢᤸᤗᤧ ᤀᤡᤈᤥᤀᤥ ᤔᤧᤎᤠᤖᤥ॥ 7 ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤛᤡ᤺ᤸᤗᤧ ᤂᤧᤸᤗᤧ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤏᤠᤱ ᤂᤧᤴᤏᤢᤀᤣ ᤔᤧᤰᤗᤥ॥ ᤂᤢᤏᤧ᤹ ᤁᤢᤔᤢᤰᤛᤠᤶᤔᤥ ᤂᤧᤸᤗᤧ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤏᤧ ᤌᤣᤏᤠᤎᤣᤒᤠ ᤐᤥᤱᤗᤥ॥ 8 ᤛᤠᤶᤕᤥᤒᤠ ᤔᤏᤠᤴ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠᤗᤠᤶ ᤋᤠᤱᤛᤧ᤺ᤵᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤘᤠ ᤁᤢ᤹ᤀᤡᤃᤧᤓᤧᤶᤒᤠᤸᤗᤧ ᤁᤢᤛᤶᤎᤠᤱᤅᤣ ᤂᤧᤴ ᤀᤡᤍᤠᤖᤥ॥ 9 ᤏᤡᤱᤘᤠ᤹ᤑᤢᤔᤠᤱ ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤧᤸᤗᤧ ᤀᤠᤵᤑᤣᤰ ᤁᤢᤶᤒᤪᤠ᤺ᤸᤗᤧ ᤂᤢᤏᤧ᤹ ᤁᤢᤜᤡᤶᤒᤣᤛᤠᤱᤒᤧᤴ ᤑᤧᤳᤗᤠ᤺ᤴᤍᤢᤖᤥ. ᤁᤖ ᤏᤧᤜᤡᤏᤡᤱᤘᤠ᤺ᤸᤗᤧ ᤛᤠᤶᤕᤥᤏᤡᤒᤧᤴ ᤛᤧ᤺ᤵᤛᤡᤱᤔᤠ ᤂᤥᤖᤥ॥ 10 ᤛᤠᤶᤕᤥᤏᤡᤒᤧᤸᤗᤧ ᤏᤢ᤹ᤍᤠ᤺ᤸᤗᤧ ᤕᤧᤰᤕᤰᤁᤡᤴᤏᤣ ᤛ᤺ᤳᤗᤥ. ᤁᤢ᤹ᤀᤡᤃᤧᤓᤧᤶᤒᤠᤴ ᤔᤧᤰᤁᤡᤸᤗᤧ ᤛᤥᤛᤥᤳᤗᤖᤠᤱ ᤐᤥᤱᤗᤥ॥ 11 ᤛᤠᤶᤕᤥᤏᤡᤒᤧᤸᤗᤧ ᤁᤢᤜᤠᤱᤘᤠ ᤁᤢᤔᤢ᤹ᤀᤡ᤺ᤸᤗᤧ ᤕᤧᤰᤕᤰᤁᤧᤴ ᤌᤥᤒᤥ ᤐᤥᤱᤗᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤂᤧᤴ ᤑᤢᤳᤇᤡᤱᤈᤩᤠᤱ ᤐᤥᤱᤗᤥ॥ 12 ᤁᤢᤏᤧᤜᤡ ᤁᤧᤜᤥᤵᤐᤠ ᤔᤏᤠ᤺ᤸᤗᤧ ᤁᤢᤜᤡᤶᤒᤣᤛᤠᤱᤒᤧᤴ ᤆᤧᤰᤂᤢᤖᤥ. ᤁᤖ ᤁᤧᤀᤡᤳᤇᤡᤱᤒᤠ ᤔᤏᤠ᤺ᤸᤗᤧ ᤁᤢᤸᤛᤥ᤺ᤵᤐᤠᤴ ᤔᤧᤗᤠ᤺ᤰᤂᤢᤴᤗᤥ॥ 13 ᤆᤠᤀᤣᤱ ᤁᤧᤒᤱᤒᤧᤸᤗᤧ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ᤀᤥ ᤀᤡᤱᤀᤠᤗᤧᤰᤗᤥ. ᤁᤖ ᤏᤛᤠ᤺ᤴᤛᤠᤒᤠ ᤔᤏᤠ᤺ᤸᤗᤧ ᤐᤠ᤺ᤴᤜᤠ᤹ ᤛᤫᤠ᤺ᤳ ᤁᤳᤋᤢ ᤔᤧᤒᤠ᤺ᤳᤋᤢᤴᤗᤥ॥ 14 ᤛᤡᤰᤁᤢᤶ ᤏᤡᤱᤘᤠ᤹ ᤁᤧᤃᤵᤐᤠ ᤗᤠᤶᤗᤥᤒᤠ ᤜᤥ᤺ᤵᤔᤠᤖᤧ ᤗᤠᤈᤣᤴ ᤛᤠᤱᤃᤧᤱᤗᤥ. ᤁᤖ ᤕᤖᤡᤰ ᤛᤢᤈᤠᤍᤠᤱᤒᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤛᤧᤰᤂᤠᤀᤣ ᤌᤱᤃᤧᤏᤠ᤺ᤶᤒᤠ ᤀᤠᤒᤥᤱᤗᤥ॥ 15 ᤀᤣᤕᤠᤱᤒᤠ ᤔᤏᤠ᤺ᤸᤗᤧ ᤁᤢᤛᤡᤱᤏᤠᤳᤋᤥ ᤋᤥ᤺ᤴᤍᤡ ᤁᤧᤕᤢᤱᤛᤡᤱᤒᤠ ᤔᤏᤠ᤺ᤸᤗᤧ ᤛᤧᤰᤂᤠᤀᤣ ᤂᤢᤏᤧ᤹ ᤁᤢᤜᤠᤴᤋᤡ ᤐᤥᤱᤗᤥ. ᤁᤖ ᤘᤣ᤹ᤀᤡᤸᤗᤧ ᤁᤢᤒᤠ᤺ᤴᤏᤥ ᤜᤢᤰᤁᤣ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ ᤕᤠᤵᤔᤡᤴ ᤋᤠᤱᤗᤥ॥ 16 ᤔᤏᤠ ᤗᤢᤱᤔᤠ᤹ ᤁᤧᤍᤢᤰᤔᤠ ᤔᤧᤴᤇᤢᤔᤠ᤺ᤸᤗᤧ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢᤖᤥ. ᤁᤖ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤠ ᤔᤏᤠᤜᤠ᤹ᤖᤧ ᤕᤠᤱᤛᤠᤁᤢᤴᤎᤣᤖᤰ ᤔᤧᤎᤃᤢᤖᤥ॥ 17 ᤔᤏᤠ ᤗᤢᤱᤔᤠ᤹ ᤁᤧᤍᤢᤰᤐᤠ ᤕᤠᤵᤔᤡ᤺ᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤏᤢᤒᤠ ᤐᤥᤱᤗᤥ. ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤧᤸᤗᤧ ᤁᤢᤛᤶᤎᤠᤱ ᤀᤠᤵᤑᤣᤰ ᤔᤧᤰᤔᤠ ᤋᤠᤖᤢᤖᤥ॥ 18 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤢᤀᤡᤱᤗᤧᤰᤁᤡᤸᤗᤧ ᤁᤢᤗᤧᤰᤘᤠ ᤂᤥᤛᤢᤖᤥ. ᤁᤖ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤧᤸᤗᤧ ᤛᤧᤰᤂᤠᤒᤠ ᤌᤢᤶᤄᤥ ᤂᤥᤛᤢᤖᤥ॥ 19 ᤁᤢᤈᤧᤰᤐᤠ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤜᤡᤱᤔᤴ ᤂᤥᤛᤢᤖᤥ. ᤁᤖ ᤋᤠᤵᤑᤧ᤺ᤶᤒᤠ ᤗᤧᤵᤔᤠᤱ ᤁᤧᤗᤠ᤺ᤵᤐᤠ ᤔᤏᤠᤴ ᤛᤡᤔᤠᤀᤥ ᤌᤠᤖᤥ॥ 20 ᤑᤧᤴᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰᤔᤧᤗᤧ᤺ᤱᤗᤥ. ᤁᤖ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤕᤧᤵᤗᤧᤰ ᤁᤧᤃᤵᤐᤠᤜᤠ᤹ᤏᤢ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤖᤥ॥ 21 ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ—ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤂᤢᤶᤍᤡᤱ ᤔᤧᤱᤄᤥᤀᤣ ᤂᤧᤳᤇᤡᤱᤔᤠ ᤔᤧᤱᤄᤥᤏᤧᤴᤗᤥ. ᤁᤖ ᤛᤠᤶᤕᤥᤒᤠᤜᤠ᤹ᤖᤧ ᤛᤧ᤺ᤵᤛᤡᤱᤔᤠ ᤔᤧᤄᤥᤛᤢᤖᤥ॥ 22 ᤑᤠᤰᤁᤡᤸᤗᤧ ᤁᤢᤴᤓᤢ᤺ᤵᤔᤥ ᤛᤠᤶᤔᤩᤠᤱ ᤔᤢᤴᤍᤪᤡ᤺ᤴ ᤌᤣᤏᤠᤎᤣᤖᤥ ᤂᤠᤛᤡᤱᤏᤡ᤺ᤵᤔᤠ ᤏᤡᤱᤘᤠ᤹ ᤔᤧᤱᤃᤵᤏᤠᤔᤠ ᤔᤧᤴᤇᤢᤔᤠᤴᤏᤠᤱ ᤜᤧᤰᤋᤱᤔᤠᤀᤣᤖᤥ॥ 23 ᤛᤠᤶᤕᤥᤏᤡᤒᤧᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠᤴ ᤁᤢᤏᤢᤵᤔᤥ ᤏᤢᤒᤠᤖᤰ ᤐᤥᤱᤗᤥ. ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴᤗᤧ ᤁᤢᤏᤢᤵᤔᤧᤴ ᤛᤡᤰᤐᤥ᤺ᤰᤔᤠᤖᤰ ᤐᤥᤱᤗᤥ॥ 24 ᤁᤢᤓᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤜᤴᤍᤢᤀᤠᤱ ᤕᤠᤱ ᤀᤠᤶᤒᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤖᤛᤠᤱ ᤕᤖᤡᤰ ᤔᤧᤄᤥᤛᤢᤖᤥ. ᤘᤣ᤹ᤜᤠ᤹ᤖᤧ ᤐᤡᤔᤠ ᤀᤠᤶᤛᤢᤰᤐᤠᤴᤏᤠᤱ ᤕᤠᤵᤔᤡ ᤀᤠᤔᤧᤶᤒᤡᤏᤧᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤱᤃᤧᤛᤠ᤹ᤒᤠ ᤔᤧᤒᤥᤱᤗᤥ॥ 25 ᤁᤢᤏᤡᤱᤘᤠ᤹ ᤕᤶᤒᤠ ᤔᤏᤠᤴ ᤁᤧᤏᤢ᤹ᤒᤠ ᤁᤧᤍᤠᤒᤠ ᤐᤥᤱᤗᤥ. ᤘᤣ᤹ᤜᤠ᤹ ᤆᤫᤠ᤺ᤳ ᤁᤧᤒᤡᤒᤠ ᤔᤏᤠᤴ ᤂᤢᤏᤧ᤹ᤀᤠᤱ ᤆᤫᤠ᤺ᤳ ᤔᤧᤒᤡᤖᤢᤖᤥ॥ 26 ᤁᤢᤈᤠ ᤁᤧᤈᤡᤱᤒᤠᤀᤠᤱ ᤆᤠᤎᤠ᤺ᤱ ᤁᤧᤎᤡᤶᤒᤧᤴ ᤔᤏᤠᤜᤠ᤹ᤖᤧ ᤛᤠᤱᤃᤪᤠ ᤔᤧᤔᤧᤳᤋᤢ᤹ ᤔᤠᤱᤔᤧᤍᤣᤛᤢᤖᤥ. ᤁᤖ ᤁᤢᤏᤡᤱᤘᤠ᤹ ᤁᤧᤜᤶᤒᤠᤀᤠᤱ ᤁᤢᤈᤠ ᤁᤧᤛᤱᤒᤠ ᤔᤏᤠᤴ ᤔᤏᤠᤜᤠ᤹ᤖᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤔᤡᤸᤗᤧ ᤔᤧᤒᤡᤖᤢᤖᤥ॥ 27 ᤀᤠᤳᤋᤡᤸᤗᤧ ᤏᤢᤒᤠ ᤐᤠ᤺ᤴᤏᤡᤴ ᤁᤥ᤺ᤳᤋᤢ᤹. ᤂᤧᤸᤗᤧ ᤏᤢᤖᤡᤰ ᤔᤧᤵᤔᤠ ᤐᤠ᤺ᤴᤏᤡᤴ ᤂᤥᤛᤢᤖᤥ. ᤁᤖ ᤀᤠᤳᤋᤡᤸᤗᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤜᤰᤛᤢ᤹ ᤂᤧᤸᤗᤧ ᤁᤢᤛᤶᤎᤠᤱ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴᤏᤣ ᤀᤡᤍᤠᤖᤥ॥ 28 ᤀᤠᤳᤋᤡᤸᤗᤧ ᤀᤠᤒᤠᤅᤣ ᤁᤢᤕᤠᤱᤛᤠᤁᤢᤴᤎᤣᤀᤥ ᤏᤡᤱᤘᤠ᤹ ᤕᤢᤰᤂᤢ᤹. ᤂᤧᤱᤃ ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤔᤢᤰᤁᤧᤎᤠᤒᤠ ᤛᤡᤱᤓᤧᤰᤘᤠ ᤜᤧᤰᤋᤱᤒᤠᤖᤥ. ᤁᤖ ᤛᤠᤶᤕᤥᤒᤠᤱᤃ ᤛᤖᤣ᤺ᤰᤕᤠ᤺ᤵᤐᤠ ᤛᤡᤱᤓᤧᤰᤘᤠ ᤜᤧᤰᤁᤣ ᤆᤡᤏ᤹ᤏ᤹ ᤗ᤹ᤖᤡᤰ ᤁᤢᤈ᤺ᤰ ᤗ᤺ᤴᤎᤠᤱᤗᤥ॥ 29 ᤀᤠᤵᤑᤣᤰ ᤁᤢᤜᤡᤶᤛᤕᤱᤅᤥ ᤋᤢᤰᤂᤣ ᤗᤠᤰᤂᤣ ᤁᤧᤍᤠ᤺ᤵᤐᤠ ᤔᤏᤠ᤺ᤸᤗᤧ ᤁᤢᤏᤢᤵᤔᤥ ᤌᤣᤀᤠᤱ ᤔᤧᤄᤥᤛᤢᤴᤗᤥ. ᤀᤍᤱ ᤔᤏᤠᤴ ᤛᤡᤰᤁᤢᤶᤛᤠᤒᤧᤸᤗᤧ ᤁᤢᤛᤧᤘᤠᤖᤥᤒᤠ ᤐᤥᤱᤗᤥ॥ 30 ᤛᤠᤶᤕᤥᤏᤡᤔᤠᤸᤗᤧ ᤁᤢᤈᤠ᤹ᤀᤡᤱᤃ ᤜᤡᤱᤔᤴᤗᤧ ᤛᤡᤱᤒᤢᤱᤗᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤔᤏᤠᤜᤠ᤹ ᤛᤧ᤺ᤵᤛᤡᤱᤔᤥ ᤋᤠᤖᤢᤛᤡ᤹. ᤂᤧᤱᤃ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤛᤠᤒᤠᤖᤥ॥ 31 ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤂᤢᤴᤇᤡ᤹ ᤔᤧᤈᤥᤃᤢᤒᤠᤸᤗᤧ ᤁᤢᤗᤧᤰᤘᤠ ᤔᤧᤄᤥᤛᤢᤏᤧᤓᤃᤪ. ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧᤃ ᤀᤠᤸᤗᤛᤠᤱ ᤀᤠᤰᤂᤩᤠᤖᤡᤰ ᤕᤖᤡᤰ ᤔᤧᤄᤥᤛᤢᤒᤡᤗᤠᤖᤥ᥄ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.