ᤂᤠᤜᤢᤴ 10 - LIFOTNTᤛᤥᤗᤥᤔᤏᤖᤧ ᤁᤢᤄᤠᤜᤢᤴᤜᤠ᤹ 1 ᤛᤥᤗᤥᤔᤏᤖᤧ ᤛᤠᤵᤋᤢᤒᤠ ᤂᤠᤜᤢᤴᤜᤠ᤹ ᤁᤴᤜᤠ᤹ᤖᤥ— ᤛᤡᤰᤁᤢᤶᤛᤠᤒᤠ ᤛᤠ᤺ᤸᤗᤧ ᤁᤢᤶᤒᤠᤖᤧ ᤁᤢᤏᤡᤱᤘᤠ᤹ ᤋᤠᤛᤢᤖᤥ. ᤁᤖ ᤀᤍᤱ ᤛᤠ᤺ᤸᤗᤧ ᤁᤢᤶᤔᤠ ᤋᤢᤰᤂᤣ ᤆᤠ᤺ᤳᤋᤢᤖᤥ॥ 2 ᤔᤧᤴᤘᤠ᤹ᤔᤏᤠᤗᤠᤶ ᤌᤰᤔᤏᤠᤒᤠ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤁᤢᤔᤧᤸᤗᤢᤱ ᤌᤧᤔᤠᤀᤠᤱ ᤔᤧᤒᤥᤱᤏᤧᤸᤗᤥ. ᤁᤖ ᤛᤠᤶᤕᤥᤒᤠ ᤐᤠ᤺ᤴᤏᤡᤸᤗᤧ ᤛᤡᤔᤠᤗᤠᤶ ᤋᤠᤱᤀᤠᤛᤧ᤺ᤵᤗᤥ॥ 3 ᤕᤜᤘᤣ ᤍᤠᤱᤒᤧᤸᤗᤧ ᤛᤠᤶᤕᤥᤒᤠ ᤔᤏᤠᤜᤠ᤹ ᤛᤠᤰᤔᤧᤴᤈᤠ ᤔᤧᤈᤥᤃᤢᤴᤛᤡᤸᤗᤥ. ᤁᤖ ᤂᤢᤏᤧ᤹ ᤋᤠᤰᤁᤧᤓᤧᤒᤧᤸᤗᤧ ᤆᤠᤱᤃᤥ ᤌᤢᤅᤢᤱᤃᤥ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤒᤠᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢᤖᤥ॥ 4 ᤗᤧᤶᤛᤢᤘᤠᤒᤠ ᤜᤢᤰᤜᤠ᤹ᤖᤧ ᤔᤏᤠᤴ ᤕᤠᤱᤃᤧᤛᤠ᤹ᤒᤠ ᤆᤥᤃᤢᤖᤥ. ᤁᤖ ᤕᤠ᤺ᤶᤒᤢᤍᤡᤰᤐᤠ ᤜᤢᤰᤜᤠ᤹ᤖᤧ ᤕᤠᤱᤛᤠᤁᤢᤴᤎᤣ ᤌᤃᤢᤖᤥ॥ 5 ᤆᤠᤛᤢᤶᤔᤠ ᤕᤧᤶᤔᤥ ᤆᤠᤃᤧᤛᤢᤶᤒᤠ ᤛᤠ᤺ᤱᤃ ᤛᤡᤰᤁᤢᤶᤛᤠᤒᤠᤖᤥ. ᤁᤖ ᤂᤧᤴ ᤕᤧᤶᤔᤥ ᤁᤧᤀᤡᤶᤒᤠ ᤛᤠ᤺ᤱᤃ ᤆᤠ᤺ᤳᤌᤡ ᤁᤧᤍᤣᤒᤠᤖᤥ॥ 6 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤛᤶᤎᤠᤱ ᤔᤢ᤹ᤀᤡᤛᤠᤶᤒᤠ ᤋᤡᤆ᤺ᤴ ᤕᤢᤱᤛᤡᤱᤗᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤶᤒᤪᤠᤀᤥ ᤔᤏᤠ ᤛᤧᤵᤔᤠᤴ ᤆᤡᤱᤛᤡᤱᤅᤠᤱ ᤕᤢᤱᤗᤥ॥ 7 ᤛᤠᤶᤕᤥᤒᤠ ᤔᤏᤠᤴ ᤏᤡᤱᤘᤠ᤹ ᤀᤡ᤺ᤵᤔᤠᤃ ᤔᤢ᤹ᤀᤡᤛᤠᤶ ᤐᤥᤱᤗᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤁᤢᤔᤡᤱᤅᤡᤴᤃ ᤘᤖᤧᤱᤗᤧᤱ ᤔᤠᤒᤣ᤺ᤰᤗᤥ॥ 8 ᤛᤡᤰᤗᤢᤶᤔᤥ ᤛᤡᤰᤁᤢᤶᤏᤡᤒᤠ ᤁᤧᤒᤥᤱᤒᤧᤸᤗᤧ ᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤋᤧᤴᤗᤥ. ᤁᤖ ᤁᤢᤶᤒᤪᤠ ᤁᤧᤗᤠ᤺ᤱᤒᤠ ᤀᤍᤱᤅᤡᤴ ᤂᤠᤵᤐᤢᤌᤩ᤺ᤱ ᤔᤧᤰᤗᤥ॥ 9 ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤏᤠᤴ ᤔᤧᤱᤃᤡᤀᤣ ᤗᤠᤱᤄᤣ᤺ᤰᤗᤥ. ᤁᤖ ᤐᤧᤷᤃᤧᤰ ᤘᤷᤃᤧᤰ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤴ ᤔᤧᤍᤧᤶᤛᤢᤖᤥ॥ 10 ᤑᤧᤴᤏᤡᤱᤘᤠ᤺ᤸᤗᤧ ᤁᤢᤔᤡᤰ ᤆᤡᤄᤡᤶ ᤁᤧᤔᤧᤵᤐᤧᤸᤗᤧ ᤏᤡᤱᤘᤠ᤹ ᤋᤢᤰᤂᤣ ᤋᤠᤖᤢᤖᤥ. ᤜᤧᤰᤁᤩᤠᤱ ᤁᤢᤶᤒᤪᤠ ᤁᤧᤗᤠ᤺ᤱᤒᤠ ᤀᤍᤱᤅᤡᤸᤗᤧ ᤔᤧᤰᤔᤠᤛᤡᤔᤠ ᤋᤠᤖᤢᤖᤥ॥ 11 ᤛᤠᤶᤕᤥᤏᤡᤒᤧᤸᤗᤧ ᤁᤢᤶᤒᤪᤠᤴ ᤜᤡᤱᤔᤴᤗᤧ ᤁᤢᤒᤢᤴᤗᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤔᤏᤠᤛᤧᤵᤔᤠ ᤐᤠ᤺ᤴᤏᤡᤴ ᤆᤡᤰᤂᤢᤖᤥ॥ 12 ᤆᤡ᤺ᤳᤇᤡᤱᤔᤠ ᤐᤠ᤺ᤴᤏᤡᤸᤗᤧ ᤂᤧᤔᤠ᤹ ᤑᤥ᤺ᤰᤂᤢᤖᤥ ᤁᤖ ᤗᤢᤱᤔᤠ᤹ ᤋᤢᤰᤛᤡᤱᤔᤧᤸᤗᤧ ᤁᤠᤰ ᤑᤧᤴᤕᤠ᤺ᤶᤒᤰᤜᤠ᤹ ᤋᤧᤵᤋᤢᤖᤥ॥ 13 ᤛᤡᤱᤛᤡᤱ ᤕᤧᤰᤕᤧᤰᤐᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤐᤠ᤺ᤴᤜᤠ᤹ ᤂᤥᤍᤧᤳᤗᤥ. ᤁᤖ ᤋᤰᤁᤠ᤺ᤳᤋᤡᤱᤃ ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤧᤸᤗᤧ ᤁᤢᤗᤠᤃᤡᤖᤥ॥ 14 ᤛᤡᤰᤁᤢᤶᤏᤡᤒᤠ ᤔᤏᤠ᤺ᤸᤗᤧ ᤏᤧᤜᤡᤏᤡᤱᤘᤠ᤹ ᤛᤢᤵᤛᤢᤖᤥ. ᤁᤖ ᤀᤍᤱᤅᤡᤸᤗᤧ ᤁᤢᤶᤒᤪᤠ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤔᤧᤴ ᤋᤠᤖᤢᤖᤥ॥ 15 ᤕᤠᤱᤛᤠᤁᤢᤴᤎᤣᤛᤠᤒᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣ᤺ᤴᤏᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤒᤪᤡᤱ ᤛᤧ᤺ᤵᤔᤏᤠᤒᤠ ᤜᤠᤱᤕᤰᤗᤥ. ᤁᤖ ᤕᤠᤱᤛᤠ᤹ᤔᤠᤸᤗᤧ ᤕᤠᤱᤃᤧᤛᤠ᤹ᤒᤠᤴ ᤔᤧᤰᤂᤢᤖᤥ॥ 16 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤎᤢᤶᤄᤥᤴ ᤜᤡᤱᤔᤴᤗᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤂᤥᤛᤢᤖᤥ॥ 17 ᤀᤠᤳᤋᤡᤸᤗᤧ ᤜᤧᤴᤌᤡᤶᤔᤡᤴ ᤀᤡ᤺ᤳᤋᤢ ᤏᤠ᤺ᤳᤋᤢ᤹. ᤂᤧᤸᤗᤧ ᤜᤡᤱᤔᤴᤗᤧ ᤗᤠᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤁᤖ ᤋᤥ᤺ᤶᤔᤠᤖᤧ ᤗᤠᤃᤡ ᤑᤧ᤺ᤰᤔᤏᤠᤒᤠ ᤐᤠ᤺ᤴᤏᤡᤴ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠ᤹ᤔᤏᤠᤒᤠ ᤔᤏᤠ᤺ᤸᤗᤧ ᤘᤣ᤹ᤜᤠ᤹ᤀᤠᤱ ᤜᤢᤛᤢᤛᤡ ᤐᤰᤛᤢᤛᤡᤖᤥ॥ 18 ᤀᤠᤳᤋᤡᤸᤗᤧ ᤂᤢᤏᤧ᤹ᤀᤥ ᤆᤡ᤺ᤳᤇᤡᤱᤔᤠᤴ ᤆᤡᤰᤂᤢ ᤁᤳᤋᤢ᤹. ᤂᤧᤸᤗᤧ ᤁᤢᤶᤒᤪᤠᤴ ᤀᤡᤱᤗᤧᤰᤐᤠ ᤆᤥᤰᤗᤥ. ᤜᤧᤰᤁᤩᤠᤱ ᤜᤠ᤺ᤳᤗᤧ ᤜᤏᤧᤒᤠ ᤐᤠ᤺ᤴᤜᤠ᤹ ᤛᤧᤛᤢ᤹. ᤂᤧᤴ ᤀᤍᤱᤗᤥ॥ 19 ᤕᤖᤡᤰ ᤐᤠᤴ ᤐᤠ᤺ᤵᤔᤧᤸᤗᤧ. ᤕᤖᤡᤰ ᤗᤠᤕᤥ ᤐᤥᤱᤗᤥ. ᤁᤖ ᤜᤠ᤺ᤳᤗᤧ ᤁᤢᤸᤛᤥ᤺ᤳᤋᤧᤴ ᤛᤧ᤺ᤵᤋᤢ᤹. ᤂᤧᤴ ᤂᤠᤛᤡᤱ ᤁᤧᤏᤡ᤺ᤵᤐᤠᤖᤥ॥ 20 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤸᤛᤥ᤺ᤳᤋᤧᤴ ᤀᤡᤛᤣ᤺ᤱᤒᤠ ᤕᤢᤵᤐᤠᤖᤥ. ᤁᤖ ᤋᤠᤰᤁᤧᤓᤧ᤹ᤒᤧᤸᤗᤧ ᤁᤢᤏᤡᤱᤘᤠᤴ ᤜᤏᤧᤒᤠ ᤆᤥᤰᤗᤥ॥ 21 ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤒᤠ᤺ᤴᤏᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤀᤣ᤺ᤵᤋᤢᤖ ᤕᤠ᤺ᤴᤍᤢᤛᤡᤖᤥ. ᤁᤖ ᤏᤧᤜᤡᤏᤡᤱᤘᤠ᤹ ᤜᤥ᤺ᤵᤔᤠᤖᤧᤀᤣ ᤀᤍᤱᤜᤠ᤹ ᤔᤧᤔᤧᤰᤗᤥ॥ 22 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤠᤱᤘᤠ ᤁᤢᤔᤢ᤹ᤀᤡ᤺ᤸᤗᤧ ᤕᤠᤱᤛᤠᤁᤢᤴᤎᤣ ᤋᤠᤖᤢᤖᤥ. ᤜᤧᤰᤁᤩᤠᤱ ᤕᤠ᤺ᤶᤒᤢᤎᤡᤰᤁᤡᤸᤗᤧ ᤕᤠᤱᤛᤠᤁᤢᤴᤎᤣᤒᤠ ᤁᤧᤴᤈᤥ᤺ᤰᤏᤧᤸᤗᤥ॥ 23 ᤕᤠᤰᤋᤢᤰᤐᤠ ᤀᤍᤱᤅᤡᤴ ᤋᤠᤵᤑᤧ᤺ᤶᤒᤠ ᤕᤧᤵᤗᤧᤰᤁᤥ ᤛ᤺ᤳᤗᤥ. ᤁᤖ ᤂᤠᤛᤡᤱᤃᤧᤏᤡ᤺ᤵᤐᤠ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤴ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤥ ᤕᤧᤕᤧ ᤗ᤹ᤖᤥ॥ 24 ᤋᤠᤰᤁᤧᤓᤧ᤹ᤒᤠ ᤔᤏᤠ᤺ᤸᤗᤧ ᤁᤡᤖᤢᤒᤠ ᤐᤠ᤺ᤴᤏᤡᤴᤏᤣ ᤁᤢᤛᤶᤎᤠᤱ ᤀᤡᤍᤠᤖᤥ. ᤁᤖ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤂᤥᤔᤠ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴᤏᤣ ᤂᤥᤛᤢᤖᤥ॥ 25 ᤛᤢᤖᤡᤳ ᤁᤣᤈᤱᤅᤡᤴ ᤀᤡᤰᤛᤡᤱᤅᤠᤱ ᤋᤠ᤺ᤸᤗᤧ ᤋᤠᤰᤁᤧᤓᤧ᤹ᤒᤠᤜᤠ᤹ ᤔᤧᤴᤍᤠᤱᤏᤧᤴᤗᤥ. ᤁᤖ ᤛᤠᤶᤕᤥᤒᤠ ᤔᤏᤠᤴ ᤁᤢᤏᤢᤵᤔᤥ ᤌᤠᤖᤡᤰ ᤌᤎᤵ ᤔᤧᤸᤗ᤹ᤀᤣ ᤘᤠ᤹ᤖᤥ॥ 26 ᤁᤧᤛᤢ᤺ᤵᤐᤠᤸᤗᤧ ᤜᤠᤒᤥ᤹ᤒᤠᤴ ᤕᤠᤛᤢᤒᤠ ᤏᤢ ᤔᤡ᤺ᤰᤂᤢᤸᤗᤧ ᤔᤡᤰᤁᤡᤴ ᤗᤧᤛᤢᤒᤠ ᤜᤧᤰᤁᤣ ᤗᤧᤶᤛᤢᤘᤠᤒᤠ ᤔᤏᤠᤴ ᤂᤢᤏᤧ᤹ ᤁᤧᤒᤠᤱᤒᤧᤸᤗᤧ ᤁᤢᤗᤠᤃᤡ ᤜᤧᤰᤋᤱᤒᤠᤀᤣ ᤐᤥᤱᤗᤥ॥ 27 ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤧᤸᤗᤧ ᤜᤡᤱᤔᤴᤗᤧ ᤌᤠ᤺ᤰᤁᤧᤴ ᤐᤥᤖᤥ. ᤁᤖ ᤁᤢ᤹ᤀᤡᤃᤧᤓᤧᤶᤒᤧᤸᤗᤧ ᤁᤢᤎᤠ᤺ᤰᤁᤧᤴ ᤋᤠᤱᤒᤠ ᤂᤰᤐᤣ᤺ᤰᤗᤥ॥ 28 ᤛᤠᤶᤕᤥᤏᤡᤒᤧᤸᤗᤧ ᤏᤡᤱᤛᤠᤱ ᤆᤥᤃᤢᤒᤠ ᤐᤠ᤺ᤴᤏᤡᤸᤗᤧ ᤁᤢᤏᤡᤱᤘᤠ᤹ ᤛ᤺ᤳᤗ ᤆᤥᤃᤢᤖᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤆᤥᤃᤢᤒᤠ ᤏᤡᤱᤛᤠᤱᤜᤠ᤹ ᤜᤏᤧᤒᤠ ᤐᤥᤱᤗᤥ॥ 29 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶᤔᤡᤴ ᤀᤠᤵᤋᤡᤰᤔᤧ᤺ᤴᤏᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤛᤧ᤺ᤵᤛᤡᤱᤔᤠᤍᤧᤴᤗᤥ. ᤁᤖ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤧᤰᤔᤠ ᤛᤡᤔᤠᤖᤥ॥ 30 ᤛᤠᤶᤕᤥᤒᤠ ᤔᤏᤠᤴ ᤀᤠᤓᤧᤸᤗᤧᤀᤠᤱ ᤔᤧᤴᤀᤠ᤺ᤰᤂᤢᤴᤗᤥ. ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤧᤘᤠ᤹ᤏᤧᤴᤗᤥ॥ 31 ᤛᤠᤶᤕᤥᤏᤡᤒᤧᤸᤗᤧ ᤁᤢᤶᤒᤪᤠᤀᤥᤗᤠᤶ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤒᤠ ᤐᤠᤴ ᤗ᤺ᤴᤗᤥ. ᤁᤖ ᤑᤧᤰᤁᤧᤗᤠ᤹ᤒᤠ ᤐᤠᤴ ᤁᤧᤒᤠ᤺ᤵᤐᤠ ᤗᤧᤛᤥ᤺ᤵᤐᤠᤴ ᤔᤧᤄᤰᤋᤢᤖᤥ॥ 32 ᤛᤠᤶᤕᤥᤏᤡᤒᤧᤸᤗᤧ ᤁᤢᤶᤒᤪᤠᤛᤣ᤹ᤀᤡᤸᤗᤧ ᤛᤢᤍᤠ᤺ᤰᤔᤠ ᤁᤧᤗᤠ᤹ᤒᤠ ᤐᤠᤴ ᤗᤧᤛᤢᤖᤥ. ᤁᤖ ᤋᤠᤰᤁᤧᤓᤧᤒᤧᤸᤗᤧ ᤁᤢᤶᤒᤪᤠ᤺ᤸᤗᤧ ᤐᤧᤷᤃᤧᤰ ᤘᤷᤃᤧᤰᤐᤠ ᤐᤠ᤺ᤴᤗᤰ ᤐᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.