ᤂᤠᤏᤡ᤺ᤳ 6 - LIFOTNTᤏᤠᤈᤡᤖᤡᤜᤠ᤹ᤖᤧ ᤗᤠᤃᤡ ᤌᤡᤶᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤁᤢᤓᤠ ᤕᤧᤶᤒᤡᤳᤇᤠᤜᤠ᤹ ᤀᤡᤃᤪ ᤔᤧᤴᤇᤢᤔᤠᤜᤠ᤹ᤖᤧ ᤆᤥ᤺ᤰᤔᤠᤀᤣ ᤁᤧᤒᤥᤱᤒᤠ ᤔᤠᤱᤜᤢᤵ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤠ᤺ᤳᤗᤠ᤺ᤳ ᤐᤥᤱᤔᤠ ᤑᤠ᤹ᤀᤠᤱ ᤏᤠᤈᤡᤖᤡ ᤆᤥ᤺ᤰᤛᤡᤱᤔᤠ ᤔᤠᤱᤜᤢᤵ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢᤏᤧᤓᤃᤪ. 3 ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤏᤢ ᤌᤡᤗᤠᤶ ᤂᤧᤱᤜᤠ᤹ ᤗᤠ᤺ᤳᤗᤠ᤺ᤳ ᤔᤧᤒᤥᤱᤗ॥ ᤂᤧᤱᤜᤠ᤹ᤖᤧ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤏᤢ ᤁᤧᤛᤢ᤺ᤵᤐᤠ ᤌᤡ ᤔᤧᤴᤎᤢᤅᤢᤴᤗ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣᤸᤗᤧ ᤁᤢᤘᤠ ᤀᤡᤃᤪ ᤁᤢᤖᤣ᤺ᤳᤗᤠ ᤁᤡᤃᤪ ᤏᤠᤶᤓᤧᤵᤔᤏᤠᤒᤠ ᤆᤧᤸᤗᤧᤰᤛᤣ᤹ᤜᤠ᤹ ᤔᤧᤴᤈᤏᤧᤴᤗ॥ 4 ᤏᤠᤈᤡᤖᤡ ᤔᤧᤒᤥᤱᤅᤠᤱ ᤔᤧᤘᤠ᤹ᤖ ᤌᤠᤖᤡᤰ ᤂᤧᤴᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤗᤡ᤺ᤶᤒᤠᤴ ᤀᤡᤃᤪ ᤁᤢᤜᤥᤖᤡᤰᤐᤠᤴ ᤔᤧᤴᤈᤏᤧᤸᤗ॥ 5 “‘ᤂᤧᤴ ᤗᤠ᤺ᤳᤗᤠ᤺ᤳ ᤐᤥᤱᤔᤠ ᤔᤠᤱᤜᤢᤵ ᤔᤧᤈᤥᤃᤢᤒᤠ ᤁᤧᤖᤧᤰ ᤕᤧᤴᤜᤠ᤹ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤔᤧᤴᤏ᤺ᤰᤂᤢᤴᤗ॥ ᤀᤠᤓᤧᤸᤗᤧ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤂᤧᤱᤜᤠ᤹ ᤗᤠ᤺ᤳᤗᤠ᤺ᤳ ᤔᤧᤈᤥ᤺ᤰᤛᤡᤱ᤹. ᤂᤧᤴ ᤕᤧᤶᤔᤡᤴ ᤔᤧᤱᤃᤧᤳᤋᤣ ᤌᤧᤶᤒᤠ ᤂᤧᤱᤜᤠ᤹ ᤛᤢᤳᤌᤥ ᤔᤧᤒᤥᤱᤅᤠᤱ ᤔᤧᤕᤢᤱᤗ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤁᤣ᤺ᤶᤒᤠ ᤔᤧᤜᤡᤱᤄᤢᤖ॥ 6 “‘ᤀᤠᤓᤧᤸᤗᤧ ᤌᤠᤖᤡᤰ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤗᤠ᤺ᤳᤗᤠ᤺ᤳ ᤔᤧᤒᤥᤱᤅᤠᤱ ᤔᤧᤕᤢᤱ. ᤂᤧᤶᤔᤩᤠᤰ ᤕᤧᤴ ᤌᤠᤖᤡᤰᤁᤣ ᤂᤧᤱᤜᤠ᤹ ᤆᤣ᤺ᤸᤗᤧ ᤁᤢᤒᤣᤛᤠᤱ ᤔᤧᤶᤒᤣ᤺ᤰᤏᤧᤸᤗ॥ 7 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤏᤢᤍᤡᤱ ᤐᤠ ᤀᤡᤃᤪ ᤔᤠᤏᤢᤍᤡᤱ ᤔᤠ. ᤁᤡᤃᤪ ᤂᤢᤴᤇᤡ᤹ ᤑᤢ᤹ᤏᤢᤛᤠ᤹ ᤀᤡᤃᤪ ᤏᤧ᤹ᤏᤢᤛᤠ᤹ ᤔᤧᤛ᤻ᤛᤡᤛᤠᤱ ᤂᤧᤱᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤀᤠᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤅᤡᤴᤗ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤣ᤺ᤰ ᤔᤧᤛᤧᤴᤇᤡᤱᤒᤠ ᤔᤡᤰᤛᤣ᤺ᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤐᤳ॥ 8 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣ᤺ᤰ ᤛᤧᤴᤇᤡᤱᤔᤠ ᤁᤧᤖᤧᤰ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤔᤧᤒᤥᤱ᤹॥ 9 “‘ᤜᤰᤆᤄᤳ ᤁᤢᤓᤠ ᤔᤏᤠᤎᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤛᤠᤱ ᤛᤡᤀᤠᤱ ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢᤒᤠ ᤂᤢᤴᤇᤡ᤹ ᤌᤧᤃᤣ᤺ᤰᤀᤡ᤺ᤴ ᤀᤠᤛᤢᤳᤌᤥ ᤐᤥᤱᤏᤧᤓᤃᤪ. ᤛᤢᤳᤌᤥ ᤐᤥᤱᤔᤠ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤔᤧᤏ᤺ᤰᤂᤢᤖ॥ 10 ᤜᤧᤰᤁᤩᤠᤱ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤏᤧᤳᤇᤡ ᤛᤠᤵᤐᤧᤳᤋᤪᤢ᤺ᤰᤔᤠ ᤀᤡᤃᤪ ᤐᤧᤷᤘᤠᤈᤩᤠ᤺ᤰ ᤏᤧᤳᤇᤡ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥᤒᤠ ᤗᤠ᤺ᤵᤔᤠᤍᤧᤴᤏᤥ ᤏᤡᤱᤘᤠ᤹ᤑᤢᤛᤠᤶᤒᤠᤀᤥ ᤔᤧᤍᤠᤖᤢᤖ॥ 11 ᤆᤣ᤺ᤸᤗᤧ ᤁᤢᤒᤣᤛᤠᤱ ᤔᤧᤒᤥ᤺ᤰᤂᤧᤀᤠᤱ ᤂᤧᤱᤜᤠ᤹ ᤀᤠᤛᤢᤳᤌᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤗᤳᤇᤠ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ. ᤘᤣ᤹ᤀᤡᤴ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤆᤥᤃᤢᤀᤠᤱ ᤋᤥ᤺ᤴᤍᤢᤖ॥ ᤜᤧᤰᤁᤩᤠᤱ ᤜᤠᤒᤠ ᤂᤧᤸᤗᤧ ᤕᤠ᤺ᤴᤍᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤛᤣᤛᤣᤒᤠ ᤔᤧᤈᤥᤃᤢᤖ॥ 12 ᤂᤧᤱᤜᤠ᤹ ᤀᤣ᤺ᤰ ᤔᤧᤛᤧᤴᤇᤡᤱᤅᤠᤱ ᤔᤧᤘᤕᤧᤒᤠ ᤕᤧᤶᤔᤥ ᤀᤠᤛᤢᤳᤌᤥ ᤔᤧᤒᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ. ᤂᤧᤴ ᤋᤃᤡᤒᤠ ᤕᤧᤴᤜᤠ᤹ ᤏᤡ᤺ᤵᤔᤠ ᤔᤧᤒᤥᤱᤏᤧᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤁᤧᤖᤧᤰ ᤁᤧᤵᤔᤠᤖᤧ ᤗᤠᤃᤡ ᤏᤠᤈᤡᤖᤡ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤀᤥ ᤂᤧᤱᤜᤠ᤹ ᤕᤠᤶᤔᤥ ᤔᤧᤍᤥ᤺ᤴᤇᤡᤱᤗ ᤐᤥᤱ᤹. ᤜᤧᤰᤁᤩᤠᤱ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤋᤱᤒᤣᤎᤡᤰ ᤁᤧᤃᤧᤵᤐᤠ ᤗᤳᤇᤠ ᤌᤢ᤺ᤶᤒᤠ ᤔᤧᤍᤠᤖᤢᤖ॥ 13 “‘ᤂᤢᤴᤇᤡ᤹ ᤀᤣ᤺ᤰ ᤔᤧᤛᤧᤴᤇᤡᤱᤒᤠ ᤕᤧᤶᤔᤡᤴ ᤁᤧᤵᤔᤠ ᤆᤢ᤺ᤳᤋᤠᤱ ᤀᤣᤃᤠᤱ ᤏᤠᤈᤡᤖᤡᤜᤠ᤹ᤖᤧ ᤗᤠᤃᤡ ᤌᤡᤶ ᤀᤠᤶᤓᤠ ᤁᤴᤗᤥ॥ ᤂᤧᤱᤜᤠ᤹ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤋᤠ᤺ᤵᤔᤠᤛᤡ ᤐᤥᤱ᤹॥ 14 ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤗᤠᤃᤡ ᤁᤴ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠᤛᤡ ᤐᤥᤱ᤹—ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤱᤒᤣᤎᤡᤰ ᤁᤧᤃᤧᤵᤐᤠ ᤔᤧᤱᤃᤠ᤺ᤶᤔᤏᤠᤒᤠ ᤗᤳᤇᤠ ᤁᤢᤶᤒᤠᤒᤠ ᤔᤧᤸᤗᤢᤰᤛᤠ᤺ᤳ. ᤌᤡᤶ ᤁᤢᤀᤡᤛᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤱᤒᤣᤎᤡᤰ ᤁᤧᤃᤧᤵᤔᤠ ᤔᤧᤱᤃᤠ᤺ᤶᤏᤠ ᤗᤳᤇᤠ ᤁᤢᤶᤔᤠᤔᤠ ᤔᤧᤸᤗᤢᤰᤛᤠ᤺ᤳ. ᤜᤧᤰᤁᤩᤠᤱ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤔᤧᤱᤃᤠ᤺ᤶᤔᤏᤠᤒᤠ ᤗᤳᤇᤠ ᤌᤢ᤺ᤶᤒᤠ. 15 ᤐᤰᤘᤠᤎᤡᤰ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ—ᤏᤡ᤺ᤱᤃᤣ᤹ ᤛ᤹ᤔᤏᤠᤒᤠ ᤆᤢᤴᤈᤢᤶᤒᤠ ᤑᤣ᤹ᤖᤢᤶᤔᤡᤸᤗᤧᤴ ᤁᤧᤎᤢᤱᤒᤠ ᤆᤠᤖ᤺ᤵᤐᤠ ᤏᤢ ᤏᤡ᤺ᤱᤃᤣ᤹ ᤜᤢ᤺ᤵᤔᤏᤠᤒᤠ ᤐᤠ᤹ᤒᤠ᤺ᤶᤒᤠ ᤂᤖᤧ᤺ᤱ—ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰᤐᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠ॥ 16 “‘ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠ ᤛᤡᤍᤢᤱᤈᤓᤠ ᤏᤢ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢᤖ॥ 17 ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤁᤢᤀᤡᤛᤡᤰ ᤐᤰᤘᤠᤀᤥ ᤁᤧᤕᤠᤰᤐᤠ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤔᤏᤠᤒᤠ ᤂᤖᤧ᤺ᤱᤅᤡᤴ ᤏᤢ ᤌᤢ᤺ᤶᤒᤠ᤺ᤴ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤥ᤺ᤴᤍᤢᤖ. ᤜᤧᤰᤁᤩᤠᤱ ᤂᤧᤴᤏᤢ ᤛᤥᤛᤥᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤏᤢ ᤆᤧᤸᤗᤧᤰᤛᤣ᤹ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤴ ᤋᤥ᤺ᤴᤍᤢᤖ॥ 18 “‘ᤂᤧᤒᤩᤠᤱ ᤂᤧᤴ ᤏᤠᤈᤡᤖᤡᤜᤠ᤹ᤖᤧ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶ ᤗᤠ᤺ᤵᤔᤠᤍᤧᤴᤏᤥ ᤂᤢᤴᤇᤡ᤹ ᤔᤧᤍᤥᤴᤍᤢᤒᤠ ᤌᤧᤃᤣ᤺ᤰᤀᤡ᤺ᤴ ᤔᤧᤏ᤺ᤰᤂᤢᤖ. ᤜᤧᤰᤁᤩᤠᤱ ᤂᤧᤴ ᤌᤧᤃᤣ᤺ᤰᤀᤡ᤺ᤴ ᤔᤧᤍᤣ᤹ᤖᤢᤀᤠᤱ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤛᤡᤃᤠᤱᤒᤠ ᤔᤡᤀᤥ ᤔᤧᤃᤣ᤺ᤳᤋᤢᤖ॥ 19 “‘ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢᤒᤠ ᤂᤢᤴᤇᤡ᤹ ᤌᤧᤃᤣ᤺ᤰᤀᤡ᤺ᤴ ᤔᤧᤏ᤺ᤰᤂᤢ ᤔᤧᤛᤢᤖᤢᤀᤠᤱ ᤀᤣᤃᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤔᤧᤎᤧᤴᤍᤢᤒᤠ ᤔᤧᤸᤗᤢᤰᤁᤡᤸᤗᤧ ᤁᤢᤓᤰᤋᤠᤱᤅᤡᤴ. ᤐᤰᤘᤠᤀᤥ ᤁᤧᤕᤠᤰᤐᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤆᤠᤖ᤺ᤵᤐᤠ ᤌᤡᤰ ᤏᤢ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱᤅᤡᤴ ᤕᤠᤱᤛᤡᤱᤅᤠᤱ ᤂᤧᤴ ᤏᤠᤈᤡᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤁᤣ᤺ᤳᤋᤢ ᤐᤡᤖᤢᤛᤡᤖ॥ 20 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤂᤧᤴ ᤌᤠ᤺ᤱ ᤐᤱᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤌᤠ᤺ᤱ ᤐᤰᤂᤢᤖ॥ ᤁᤴᤜᤠ᤹ ᤏᤢ ᤌᤠ᤺ᤱ ᤐᤱᤔᤏᤠᤒᤠ ᤛᤠ ᤛᤱᤒᤵᤔᤠᤴ ᤜᤧᤰᤁᤩᤠᤱ ᤋᤥ᤺ᤶᤔᤏᤠᤒᤠ ᤁᤢᤗᤠᤱᤓᤧᤸᤗᤧᤰᤔᤠᤴ ᤏᤡᤱᤘᤠ᤹ᤑᤢᤛᤠᤶᤒᤧᤸᤗᤧ ᤁᤢᤗᤠᤃᤡ ᤛᤣᤛᤣᤒᤠ ᤁᤢᤄᤥᤔᤠ ᤗᤰ ᤐᤥᤱ᤹॥ ᤂᤧᤴ ᤀᤣᤃᤠᤱ ᤂᤧᤴ ᤏᤠᤈᤡᤖᤡᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤛᤣᤈᤱᤘᤠᤴ ᤔᤧᤎᤢᤅᤢᤸᤗᤧ ᤏᤢ᤹॥ 21 “‘ᤏᤠᤈᤡᤖᤡᤜᤠ᤹ᤖᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤔᤠᤱᤜᤢᤵᤐᤡᤸᤗᤧ ᤗᤠᤃᤡ ᤌᤡᤶ ᤀᤠᤶᤓᤠ ᤁᤴᤗᤥ॥ ᤂᤧᤱᤜᤠ᤹ ᤀᤠᤵᤑᤣᤰ ᤔᤧᤍᤥ᤺ᤴᤇᤡᤱᤒᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠᤴ ᤜᤠᤒᤠ ᤁᤴᤗᤥ॥ ᤂᤧᤱᤜᤠ᤹ᤖᤧ ᤔᤧᤛᤢᤰᤋᤢᤏᤧᤓᤃᤪ ᤁᤢᤕᤥ᤹ᤒᤠ ᤛᤡᤍᤢᤱᤈᤓᤠᤜᤠ᤹ᤀᤠᤱ ᤋᤠ᤺ᤵᤔᤠ ᤔᤧᤛᤢᤰᤋᤢ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤔᤠᤱᤜᤢᤵᤐᤡᤴ ᤏᤠᤈᤡᤖᤡ ᤌᤡᤶ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤁᤧᤖᤧᤰ ᤀᤡ᤺ᤵᤔᤠ ᤏᤠ᤺ᤵᤔᤠ ᤐᤥᤱᤗᤥ॥’” ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤌᤠᤔᤠ ᤁᤧᤒᤥᤱᤒᤠ ᤔᤢ᤹ᤀᤡᤛᤠᤶ 22 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 23 “ᤜᤠᤖᤢᤏᤧᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤔᤧᤳᤋᤧᤛᤧ᤹. ‘ᤀᤡᤛᤪᤠᤀᤡᤗᤡᤜᤠ᤹ ᤂᤡᤏᤡ᤹ ᤔᤢ᤹ᤀᤡᤛᤠᤶ ᤁᤧᤒᤡᤖᤢᤶᤛᤢᤶᤔᤡᤸᤗᤧ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹ᤀᤥ— 24 “‘ᤕᤜᤘᤣ ᤍᤠᤱᤒᤧᤸᤗᤧ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖᤡᤖᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤋᤠᤵᤌᤣᤰ ᤕᤠᤶᤎᤣᤰ ᤁᤧᤃᤳᤋᤡᤖᤖᤥ॥ 25 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤈᤡᤳᤗᤡ ᤏᤠᤖᤠᤴ ᤂᤡᤏᤡ᤹ ᤛᤶᤎᤠᤱ ᤀᤥ᤺ᤳᤗᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤖᤖᤥ॥ 26 ᤕᤜᤘᤣ ᤍᤠᤱᤒᤠᤸᤗᤧ ᤁᤢᤈᤡᤳᤗᤡ ᤏᤠᤖᤠᤴ ᤂᤡᤏᤡ᤹ ᤛᤶᤎᤠᤱ ᤜᤡᤛᤢᤖᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤹ᤔᤠ ᤋᤠᤔᤠ ᤛᤏᤠᤖᤢᤱ ᤁᤧᤒᤡᤖᤡᤖᤖᤥ॥’” 27 “ᤁᤶᤓᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ᤀᤥ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤘᤠ᤹ᤖ ᤔᤧᤕᤠ᤺ᤴᤍᤢ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.