ᤂᤠᤏᤡ᤺ᤳ 36 - LIFOTNT

ᤔᤧᤴᤇᤢᤔᤠᤛᤠᤜᤠ᤹ᤖᤧ ᤗᤰᤂᤥᤔᤠ

¹ ᤕᤥᤛᤣᤑᤖᤧ ᤁᤢᤈᤰᤔᤧᤴᤇᤠ᤹. ᤔᤏᤛ᤻ᤛᤣᤖᤧ ᤁᤢᤶᤔᤧᤴᤇᤠ᤹. ᤔᤠᤁᤡᤖᤖᤧ ᤁᤢᤛ᤻ᤛᤠ ᤃᤡᤗᤠᤍᤖᤧ ᤁᤢᤎᤠ᤺ᤰᤁᤥᤒᤠ ᤗᤠᤶᤗᤥᤒᤠᤜᤠ᤹ ᤔᤧᤍᤩᤧ. ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤀᤡᤛᤪᤠᤀᤡᤗᤡ ᤗᤠᤶᤗᤥᤒᤠᤜᤠ᤹ ᤂᤢᤴᤇᤡ᤹ ᤜᤡᤶᤛᤕᤱᤒᤠ ᤁᤢᤎᤧᤃᤣ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤧᤕᤧᤶᤛᤡᤱᤅᤠᤱ ᤔᤧᤔᤧᤳᤋᤢᤛᤡ.

² “ᤋ᤹ᤕᤠ᤺ᤴᤛᤥᤴ ᤁᤧᤔᤠᤀᤠᤱ ᤗᤠᤈᤣᤴ ᤀᤡᤛᤪᤠᤀᤡᤗᤡᤜᤠ᤹ ᤜᤢᤰᤛᤢᤵᤔᤠᤛᤡ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠ ᤀᤡᤱᤈᤠᤱ ᤁᤧᤒᤡᤖᤧᤀᤠᤱ ᤘᤕᤧ. ᤜᤧᤰᤁᤩᤠᤱ ᤀᤠᤏᤡᤃᤣ ᤏᤢᤛᤠ᤹ ᤛᤗᤥᤑᤠᤍᤖᤧ ᤁᤢᤕᤢᤰᤁᤡᤴ ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤁᤧᤒᤡᤖᤢᤛᤡᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤍᤠᤱᤒᤠ ᤀᤡᤱᤈᤠᤱ ᤁᤧᤒᤡᤖᤧᤀᤠᤱ ᤘᤕᤧ॥

³ ᤀᤠᤸᤗ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤘᤣ᤹ ᤌᤠ᤺ᤰᤁᤥᤒᤠ ᤕᤧᤶᤒᤡᤳᤇᤠᤜᤠ᤹ᤏᤢ ᤂᤧᤱᤜᤠ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤈᤥᤰᤏᤧᤓᤃᤪ. ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤡᤴ ᤘᤣ᤹ ᤌᤠ᤺ᤰᤁᤥᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤕᤥ᤹ᤛᤡᤱ᤹॥ ᤁᤶᤓᤗ᤹ᤖᤡᤰ ᤀᤠᤏᤡ᤹ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣᤴ ᤔᤠᤀᤠᤱ ᤐᤣᤰ॥

⁴ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤔᤥ ᤁᤢᤛᤱ ᤐᤥᤱᤔᤠ ᤋᤱᤒᤣ᤺ᤴ ᤋᤠ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ᤺ᤴᤏᤠᤱ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤈᤥᤃᤧᤀᤠᤱ ᤔᤧᤒᤣᤒᤠ ᤌᤠ᤺ᤰᤁᤥᤒᤠ ᤕᤠᤱᤛᤠᤁᤢᤴᤎᤣᤀᤥ ᤕᤥ᤹ᤛᤡᤱ᤹॥ ᤁᤶᤓᤗ᤹ᤖᤡᤰ ᤀᤠᤏᤡᤃᤣ ᤐᤠᤎᤧᤒᤠ ᤌᤠ᤺ᤰᤁᤥᤒᤠ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤔᤠᤛᤢᤶᤒᤧ᤹॥”

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ—“ᤕᤥᤛᤣᤑᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤍᤥ᤺ᤵᤔᤠᤀᤣ ᤆᤥᤰ॥

⁶ ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤀᤡᤱᤈᤠᤱᤅᤡᤴ ᤕᤠᤵᤔᤡ ᤐᤡᤖᤧᤀᤠᤱ ᤘᤠ᤹—‘ᤀᤠᤵᤑᤣᤰ ᤂᤢᤴᤇᤡ᤹ ᤐᤠᤗᤧᤵᤔᤠᤱᤒᤠ ᤌᤠ᤺ᤰᤁᤥᤒᤠ ᤜᤡᤶᤛᤕᤱᤅᤡᤴ ᤜᤠ᤺ᤳᤗᤧ ᤁᤢᤛᤡᤖᤠ᤹ᤌᤠᤱ. ᤂᤧᤴᤏᤢᤖᤰ ᤂᤧᤱᤜᤠ᤹ᤖᤧ ᤔᤣ᤺ᤰᤂᤡᤶ ᤔᤧᤈᤥᤃᤢᤖ॥’

⁷ ᤀᤰᤂᤣ ᤆᤥ᤺ᤰᤔᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤐᤠᤗᤠᤶᤒᤠᤒᤠ ᤀᤠᤳᤋᤡᤴ ᤕᤠᤱᤛᤠᤁᤢᤴᤎᤣ᤺ᤴᤏᤠᤱ ᤗᤳᤇᤠ ᤌᤠ᤺ᤰᤁᤥᤗᤠᤶ ᤘᤣ᤹ᤛᤔᤠ ᤌᤠ᤺ᤰᤁᤥ ᤐᤣ᤺ᤰᤔᤠ ᤔᤧᤄᤥᤏᤧᤴ॥ ᤀᤡᤛᤪᤠᤀᤡᤗᤡ ᤌᤠ᤺ᤰᤌᤰᤔᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣᤴ ᤀᤠᤵᤑᤣᤰ ᤌᤠ᤺ᤰᤁᤥᤀᤣ ᤆᤢᤰᤗ॥

⁸ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤁᤥᤒᤠ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ ᤁᤧᤄᤥᤔᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠ᤺ᤸᤗᤧ ᤂᤢᤏᤧ᤹ ᤁᤢᤶᤒᤠ ᤐᤡᤛᤠᤱᤒᤠ ᤌᤠ᤺ᤰᤁᤥ ᤔᤣ᤺ᤰᤂᤡᤶ ᤆᤥᤃᤢᤖ. ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣ ᤗᤰᤁᤡᤴ ᤔᤧᤄᤥᤛᤢᤖ॥

⁹ ᤐᤠᤗᤠᤶᤒᤠᤒᤠ ᤀᤠᤳᤋᤡᤴ ᤕᤠᤱᤛᤠᤁᤢᤴᤎᤣ᤺ᤴᤏᤠᤱ ᤗᤳᤇᤠ ᤌᤠ᤺ᤰᤁᤥᤗᤠᤶ ᤘᤣ᤹ᤛᤔᤠ ᤌᤠ᤺ᤰᤁᤥ ᤔᤧᤴᤈᤳᤋᤢᤴᤗ. ᤁᤖ ᤀᤠᤳᤋᤡᤴ ᤀᤡᤛᤪᤠᤀᤡᤗᤡ᤺ᤸᤗᤧᤛᤠᤱ ᤀᤠᤵᤑᤣᤰ ᤐᤠᤎᤧᤒᤠ ᤌᤠ᤺ᤰᤁᤥᤒᤠ ᤐᤠᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣᤴ ᤁᤳᤋᤢᤖ॥”

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣᤀᤣ ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤈᤥᤃᤢ॥

¹¹ ᤛᤗᤥᤑᤠᤍᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤔᤜᤗᤠ. ᤋᤡᤷᤛᤠ. ᤜᤥᤃ᤻ᤗᤠ. ᤔᤡᤸᤁᤠ ᤏᤢ ᤏᤥᤀᤠᤜᤖᤧ ᤀᤠᤵᤑᤣᤰ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ᤏᤢ ᤔᤣ᤺ᤰᤂᤡᤶ ᤔᤧᤈᤥᤃᤢ॥

¹² ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤕᤥᤛᤣᤑᤖᤧ ᤁᤢᤛ᤻ᤛᤠ ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤏᤡ᤹ ᤌᤠ᤺ᤰᤜᤠ᤹ᤀᤥᤒᤠ ᤜᤡᤶᤛᤕᤱᤅᤥᤀᤣ ᤐᤥ᤺ᤰᤂᤧ॥

¹³ ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤴᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤀᤡᤱᤈᤠᤱ ᤏᤢ ᤌᤡᤶᤜᤠ᤹ ᤀᤠᤶᤓᤠ ᤁᤴᤜᤠ᤹ᤖᤥ॥