ᤂᤠᤏᤡ᤺ᤳ 34 - LIFOTNTᤁᤏᤠᤏ ᤗᤠᤈᤣ᤹ᤒᤠ ᤀᤡ᤺ᤴᤍᤥᤜᤠ᤹ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤂᤧᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤔᤧᤳᤋᤧᤛᤧ᤹—‘ᤀᤠᤸᤗ ᤂᤡᤏᤡ᤹ ᤁᤏᤠᤏ ᤗᤠᤈᤣ᤹ᤀᤥ ᤁᤧᤗᤠᤛᤡᤸᤗᤧ ᤕᤠᤱᤛᤠᤁᤢᤴᤎᤣ ᤜᤧᤰᤁᤣ ᤂᤡᤏᤡ᤹ ᤐᤡᤏᤡᤱᤒᤠ ᤗᤠᤈᤣ᤹ᤀᤥᤒᤠ ᤀᤡ᤺ᤴᤍᤥᤴ ᤀᤰᤋᤱᤒᤠ ᤆᤥᤰᤗᤥ— 3 “‘ᤗᤠᤱᤃᤧᤳ ᤗᤧᤵᤔᤠᤱᤒᤠ ᤀᤡ᤺ᤴᤍᤥᤴ ᤛᤡᤏᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤀᤣᤍᤥᤔᤖᤧ ᤁᤢᤀᤡ᤺ᤴᤍᤥ᤺ᤴᤏᤢ ᤛᤥᤛᤥᤖᤡᤰ ᤐᤣᤰ॥ ᤂᤡᤏᤡ᤹ ᤗᤠᤱᤃᤧᤳ ᤗᤧᤵᤔᤠᤱ ᤀᤡ᤺ᤴᤍᤥᤴ ᤁᤢᤛᤡᤘᤧᤳ ᤘᤖ᤺ᤱᤅᤡᤸᤗᤧ ᤕᤥ ᤁᤢᤏᤢᤵᤔᤥᤗᤠᤶ ᤏᤠᤱᤃᤧᤴ ᤐᤡᤛᤠᤱᤗᤠᤶ ᤜᤣ᤺ᤰᤛᤡᤱ᤹॥ 4 ᤂᤧᤴ ᤗᤠᤱᤃᤧᤳ ᤗᤧᤵᤔᤠᤱᤗᤠᤶ ᤀᤁᤪᤒ᤻ᤒᤡᤔᤒᤠ ᤁᤢᤓᤥᤛᤠᤱ ᤗ᤺ᤴᤏᤠᤱ ᤈᤡᤏ ᤌᤠᤖᤡᤰ ᤏᤢ ᤁᤠᤍᤣᤛ-ᤒᤷᤏᤣᤒᤠ ᤗᤠᤱᤃᤧᤳ ᤐᤡᤛᤠᤱ ᤁᤧᤳᤗ॥ ᤂᤧᤵᤔᤥᤗᤠᤶ ᤜᤛᤖ-ᤀᤍ᤻ᤍᤖ ᤐᤥᤱᤗ ᤀᤈ᤻ᤔᤥᤏ ᤌᤠᤖᤡᤰ ᤁᤧᤳᤗ॥ 5 ᤂᤧᤒᤩᤠᤱ ᤀᤡ᤺ᤴᤍᤥᤴ ᤀᤈ᤻ᤔᤥᤏᤗᤠᤶ ᤀᤡᤀᤠᤱ ᤔᤡᤛᤪᤒᤠ ᤂᤸᤛᤠᤀᤥ ᤁᤧᤳᤋᤠᤱ ᤗᤢᤶᤒᤠ ᤘᤖ᤺ᤱ ᤏᤢᤵᤗ॥ 6 “‘ᤏᤠᤶᤎᤠ ᤐᤡᤛᤠᤱᤒᤠ ᤀᤡ᤺ᤴᤍᤥ᤺ᤴᤃ ᤋᤢᤱᤃᤥᤍᤡᤱ ᤘᤖ᤺ᤱ ᤏᤢ ᤂᤧᤸᤗᤧ ᤁᤢᤕᤠᤀᤣ ᤁᤢᤕᤠ ᤐᤥᤱᤗ॥ ᤂᤡᤏᤡ᤹ ᤏᤠᤶᤎᤠ ᤐᤡᤛᤠᤱᤒᤠ ᤀᤡ᤺ᤴᤍᤥᤴ ᤜᤠᤒᤠ ᤁᤴ ᤐᤥᤱ᤹॥ 7 “‘ᤂᤡᤏᤡ᤹ ᤌᤥ ᤌᤠᤱᤃᤧᤴ ᤗᤧᤵᤔᤠᤱᤒᤠ ᤀᤡ᤺ᤴᤍᤥᤴ ᤜᤠᤒᤠ ᤁᤴ ᤐᤥᤱᤗ—ᤘᤖ᤺ᤱᤅᤠᤱᤎᤥ ᤜᤥᤖ ᤁᤥ᤺ᤰᤔᤠ ᤑᤠᤱᤈᤱ ᤌᤠᤖᤡᤰ ᤂᤡᤏᤡ᤹ ᤀᤡ᤺ᤴᤍᤥ ᤕᤢᤰᤂᤧᤶᤔᤧ᤹. 8 ᤜᤧᤰᤁᤩᤠᤱ ᤜᤥᤖ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤗᤧᤒᤥ-ᤜᤔᤠᤋ ᤌᤠᤖᤡᤰ ᤀᤡ᤺ᤴᤍᤥ ᤕᤢᤰᤂᤧᤶᤔᤧ᤹॥ ᤂᤧᤒᤩᤠᤱ ᤀᤡ᤺ᤴᤍᤥᤴ ᤛᤍᤠᤍ ᤐᤥᤱᤅᤠᤱ 9 ᤛᤡᤐᤪᤥᤏ ᤌᤠᤖᤡᤰ ᤁᤧᤳᤗ॥ ᤂᤧᤸᤗᤧ ᤁᤢᤏᤢᤵᤔᤠᤴ ᤆᤠᤀᤣ ᤜᤛᤖ-ᤀᤣᤏᤠᤏᤧᤴ ᤐᤥᤱᤗ॥ ᤂᤡᤏᤡ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤀᤡ᤺ᤴᤍᤥᤴ ᤀᤠᤶᤓᤠ ᤁᤴ ᤐᤥᤱ᤹॥ 10 “‘ᤂᤡᤏᤡ᤹ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤀᤡ᤺ᤴᤍᤥ᤺ᤴᤃ ᤜᤛᤖ-ᤀᤣᤏᤠᤏᤗᤠᤶ ᤛᤐᤠᤔ ᤌᤠᤖᤡᤰ ᤕᤢᤰᤂᤧᤶᤔᤧ᤹॥ 11 ᤜᤧᤰᤁᤩᤠᤱ ᤂᤧᤴ ᤀᤡ᤺ᤴᤍᤥᤴ ᤛᤐᤠᤔᤗᤠᤶ ᤕᤥ ᤌᤠᤛᤡᤱᤅᤠᤱ ᤀᤣᤣᤏᤒᤠ ᤏᤠᤱᤃᤧᤴ ᤗᤧᤵᤔᤠᤱ ᤖᤡᤒ᤻ᤗᤠ ᤌᤠᤖᤡᤰ ᤁᤧᤳᤗ॥ ᤂᤧᤴ ᤀᤡ᤺ᤴᤍᤥᤴ ᤕᤠᤶᤔᤥ ᤕᤥ ᤌᤠᤀᤠᤱ ᤃᤠᤗᤡᤗ ᤘᤖ᤺ᤱᤅᤡᤸᤗᤧ ᤁᤢᤕᤠᤁᤢᤕᤠᤒᤠ ᤕᤠᤰᤁᤣ᤺ᤰᤁᤣ᤺ᤰᤐᤠ ᤋᤧᤴᤜᤠ᤹ᤗᤠᤶ ᤏᤠᤱᤃᤧᤴ ᤐᤡᤛᤠᤱ ᤁᤧᤳᤗ॥ 12 ᤂᤧᤒᤩᤠᤱ ᤂᤧᤴ ᤀᤡ᤺ᤴᤍᤥᤴ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤣ ᤁᤢᤕᤠ ᤐᤥᤱᤅᤠᤱ ᤁᤢᤛᤡᤘᤧᤳ ᤘᤖ᤺ᤱ ᤘᤖ᤺ᤱᤅᤥ ᤗ᤺ᤴᤗ॥ “‘ᤁᤧᤖᤧᤰ ᤐᤡᤛᤠᤱᤒᤠ ᤀᤡ᤺ᤴᤍᤥᤜᤠ᤹ ᤛᤥᤛᤥᤖᤡᤰ ᤂᤡᤏᤡ᤹ ᤗᤠᤈᤣᤴ ᤜᤠᤒᤠ ᤁᤴᤗᤥ॥’” 13 ᤔᤥᤛᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤰᤂᤣ ᤔᤧᤳᤋᤢᤛᤡᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤀᤠᤱ ᤑᤠᤱᤛᤡᤀᤠᤱ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤕᤢᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤠᤈᤣᤴ ᤜᤠᤒᤠ ᤁᤴᤗᤥ. 14 ᤌᤣᤀᤠᤱᤓᤧᤸᤗᤧ ᤖᤢᤒᤣᤏ ᤏᤢ ᤃᤠᤍᤖᤧ ᤂᤢᤴᤇᤡ᤹ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤛᤕᤱᤜᤠ᤹ ᤜᤧᤰᤁᤩᤠᤱ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤱ ᤁᤢᤎᤠ᤺ᤰᤁᤥᤒᤠ ᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤔᤠ ᤗᤰᤁᤡᤴ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤏᤧᤖᤥ॥ 15 ᤂᤧᤴ ᤏᤧᤳᤇᤡᤀᤠᤱ ᤁᤢᤓᤪᤧ᤺ᤱ ᤌᤠ᤺ᤰᤜᤠ᤹ᤖᤧ ᤕᤖᤡᤜᤥ ᤁᤢᤍᤥ᤺ᤵᤔᤠ ᤕᤷᤍᤏ ᤘᤜ᤺ᤱᤅᤡᤸᤗᤧ ᤏᤠᤱᤃᤧᤴ ᤗᤧᤵᤔᤠᤱ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤕᤢᤰᤁᤡᤴ ᤔᤧᤄᤥᤛᤢ ᤔᤧᤛᤢᤖᤢᤀᤠᤱ ᤏᤧᤖᤥ॥” 16 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 17 “ᤕᤢᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤗᤠᤈᤣ᤹ ᤁᤧᤓ᤺ᤱᤒᤠ ᤁᤧᤒᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤜᤠᤒᤠ ᤁᤴᤜᤠ᤹ᤖᤥ—ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ ᤏᤢ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ॥ 18 ᤕᤢᤰᤗᤧ ᤗᤠᤃᤡ ᤏᤢ ᤗᤠᤈᤣᤴ ᤑ᤺ᤱᤔᤠᤖᤧ ᤗᤠᤃᤡ ᤂᤡᤏᤡ᤹ ᤌᤠ᤺ᤰᤌᤰᤔᤠ ᤗᤳᤇᤠ ᤗᤳᤇᤠ ᤗᤠᤶᤗᤥᤒᤠ ᤛᤣᤃᤧᤶᤛᤡᤶᤔᤧ᤹॥ 19 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤁᤴ ᤐᤖᤡᤰᤐᤠ ᤘᤠ᤹ᤖᤥ— “ᤕᤜᤢᤍᤠᤖᤧ ᤁᤢᤎᤠ᤺ᤰᤁᤥᤗᤠᤶ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒ. 20 ᤛᤡᤔᤡᤕᤥᤏᤖᤧ ᤁᤢᤎᤠ᤺ᤰᤁᤥᤗᤠᤶ ᤀᤶᤔᤡᤜᤢᤍᤖᤧ ᤁᤢᤛ᤻ᤛᤠ ᤛᤣᤔᤢᤀᤣᤗ. 21 ᤒᤣᤏᤩᤠᤔᤡᤏᤖᤧ ᤁᤢᤎᤠ᤺ᤰᤁᤥᤗᤠᤶ ᤁᤡᤛᤗᤥᤏᤖᤧ ᤁᤢᤛ᤻ᤛᤠ ᤀᤣᤗᤡᤍᤠᤍ. 22 ᤍᤠᤏᤖᤧ ᤁᤢᤎᤠᤰ ᤗᤠᤶᤗᤥᤒᤠᤗᤠᤶ ᤕᤥᤃᤗᤡᤖᤧ ᤁᤢᤛ᤻ᤛᤠ ᤒᤢᤰᤁᤡ. 23 ᤕᤥᤛᤣᤑᤖᤧ ᤁᤢᤛ᤻ᤛᤠ ᤔᤏᤛ᤻ᤛᤣᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤀᤣᤐᤥᤍᤖᤧ ᤁᤢᤛ᤻ᤛᤠ ᤜᤴᤏᤡᤀᤣᤗ. 24 ᤕᤥᤛᤣᤑᤖᤧ ᤁᤢᤛ᤻ᤛᤠ ᤀᤣᤑᤪᤠᤀᤡᤔᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤛᤡᤵᤋᤠᤏᤖᤧ ᤁᤢᤛ᤻ᤛᤠ ᤁᤔᤢᤀᤣᤗ. 25 ᤈᤒᤗᤢᤏᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤐᤷᤏᤠᤁᤖᤧ ᤁᤢᤛ᤻ᤛᤠ ᤀᤣᤗᤡᤈᤠᤐᤠᤏ. 26 ᤀᤡᤛ᤻ᤛᤠᤂᤠᤖᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤀᤈᤠᤏᤖᤧ ᤁᤢᤛ᤻ᤛᤠ ᤐᤸᤋᤡᤀᤣᤗ. 27 ᤀᤠᤛᤣᤖᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤛᤗᤥᤔᤡᤖᤧ ᤁᤢᤛ᤻ᤛᤠ ᤀᤜᤡᤜᤢᤍ. 28 ᤏᤵᤋᤠᤗᤡᤖᤧ ᤁᤢᤎᤠ᤺ᤰ ᤗᤠᤶᤗᤥᤒᤠᤗᤠᤶ ᤀᤶᤔᤡᤜᤢᤍᤖᤧ ᤁᤢᤛ᤻ᤛᤠ ᤐᤍᤜᤣᤗ॥” 29 ᤁᤏᤠᤏ ᤗᤠᤈᤣ᤹ᤀᤥ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤂᤥᤔᤠ ᤗᤰᤜᤠ᤹ ᤜᤠᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤕᤢᤰᤋᤡᤱ ᤆᤥᤃᤢᤛᤡᤒᤠ ᤔᤏᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.