ᤂᤠᤏᤡ᤺ᤳ 32 - LIFOTNTᤕᤷᤍᤏ ᤏᤠᤱᤃᤧᤴ ᤐᤡᤛᤠᤱᤒᤠ ᤌᤠ᤺ᤰᤜᤠ᤹ ( ᤛᤠᤶᤕᤥ ᤀᤡᤱ ᥉:᥇᥈-᥈᥈ ) 1 ᤖᤢᤒᤣᤏ ᤏᤢ ᤃᤠᤍᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤢᤏᤡ᤹ ᤕᤖᤡᤰ ᤁᤢᤗᤢᤵ ᤁᤢᤗᤢᤵ ᤐᤡᤳᤌᤰᤛᤠᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤕᤠᤈᤣᤖ ᤏᤢ ᤃᤡᤗᤠᤍ ᤗᤠᤈᤣᤴ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤗᤧ ᤗᤠᤃᤡ ᤏᤢᤒᤠ ᤁᤧᤒᤥᤱᤒᤠ ᤔᤧᤏᤡᤛᤢ॥ 2 ᤁᤸᤗᤧᤆᤥᤃᤢᤸᤗᤧ ᤃᤠᤍ ᤏᤢ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠ ᤔᤥᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ ᤜᤧᤰᤁᤩᤠᤱ ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤀᤥ ᤔᤧᤍᤩᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. 3 “ᤀᤋᤠᤖᤥᤋ. ᤍᤡᤒᤥᤏ. ᤕᤠᤈᤣᤖ. ᤏᤡᤔᤪᤠ. ᤜᤣᤛ᤻ᤒᤥᤏ. ᤀᤣᤗᤠᤗᤧ. ᤛᤒᤠᤔ. ᤏᤣᤒᤥ ᤏᤢ ᤒᤀᤥᤏ— 4 ᤂᤧᤴ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤏᤠ᤺ᤴᤍᤢᤀᤠᤱ ᤏᤧᤛ᤻ᤛᤧ. ᤁᤴ ᤗᤠᤈᤣ᤹ᤜᤠ᤹ ᤐᤡᤳᤌᤰᤛᤠ ᤆᤠᤖᤠᤶᤔᤠᤍᤧᤴᤗᤧ ᤗᤠᤃᤡ ᤏᤢᤒᤠ ᤆᤥᤰ॥ ᤀᤠᤏᤡᤃᤣ ᤐᤡᤳ ᤌᤰᤛᤠᤀᤠᤱ ᤁᤳᤋᤢᤶᤛᤡᤶᤒᤧ॥ 5 ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤡᤏᤧᤓᤃᤪ ᤁᤴ ᤗᤠᤈᤣᤴ ᤀᤠᤏᤡᤃᤣ ᤕᤢᤰᤁᤥ ᤀᤠᤒᤡᤖᤧ᤹॥ ᤕᤷᤍᤏ ᤏᤠᤎᤠ᤺ᤶᤒᤡᤃ ᤀᤠᤏᤡᤃᤣ ᤀᤠᤴᤍᤣ᤹ᤖᤧᤴᤏᤧ᤹॥” 6 ᤔᤥᤛᤠ᤺ᤸᤗᤧ ᤃᤠᤍ ᤏᤢ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤑᤢ᤹ᤏᤢᤛᤠ᤹ᤜᤠ᤹ ᤏᤠ ᤋᤧᤴᤎᤱᤅᤥ ᤔᤧᤒᤣ᤺ᤰᤁᤡᤸᤗᤧ ᤂᤡᤏᤡ᤹ ᤆᤠᤀᤣ ᤏᤡᤱᤘᤠ᤹ ᤕᤠ᤺ᤴᤍᤡᤰ ᤋᤠᤀᤠᤱ ᤜᤠᤒᤠ ᤁᤧᤕᤢᤅᤡᤒᤡ᥅ 7 ᤕᤜᤘᤣ ᤍᤠᤱᤒᤧᤸᤗᤧ ᤐᤡᤖᤢᤛᤡᤒᤠ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤀᤥ ᤐᤣ᤺ᤰᤔᤠ ᤁᤧᤀᤡ᤺ᤵᤐᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤌᤣᤀᤠᤱ ᤐᤱᤗ ᤁᤧᤕᤠ᤺ᤴᤍᤢᤶ ᤁᤧᤒᤡᤖᤢᤶᤛᤡᤶᤒᤠᤒᤣ᥅ 8 ᤁᤠᤍᤣᤛ-ᤒᤷᤏᤣᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤛᤢᤎᤧᤒᤠ ᤌᤠ᤺ᤰᤌᤧᤒᤠᤜᤠ᤹ ᤁᤴ ᤗᤠᤈᤣᤴ ᤌᤥ᤺ᤶᤛᤧ ᤐᤠᤱᤄᤢᤱᤛᤡᤱᤅᤡᤸᤗᤧ ᤂᤡᤏᤡ᤹ ᤛᤢᤎᤧᤒᤠ ᤌᤠ᤺ᤰᤌᤧᤒᤠᤜᤠ᤹ ᤜᤠᤒᤠ ᤀᤰᤂᤣᤀᤣ ᤔᤧᤈᤥᤃᤢᤀᤠᤱ ᤔᤧᤘᤕᤧ॥ 9 ᤀᤠᤸᤗ ᤂᤧᤱᤜᤠ᤹ ᤀᤣᤛ᤻ᤁᤥᤗᤒᤠ ᤏᤧᤏᤧᤒᤠᤍᤧᤴᤏᤥ ᤔᤧᤒᤣᤀᤠᤱ ᤁᤴ ᤗᤠᤈᤣᤴ ᤔᤧᤏᤡᤛᤢ. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤶᤒᤣ᤺ᤰᤏᤧᤴᤗ ᤑᤠ᤹ᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤐᤅᤧᤖ ᤔᤧᤕᤠ᤺ᤴᤍᤢ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ 10 ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤜᤠᤱᤃᤧᤴ ᤛᤡᤰᤆᤠ ᤗᤥᤖᤧ. ᤜᤧᤰᤁᤩᤠᤱ ᤀᤰᤂᤣ ᤐᤠ᤺ᤳᤋᤢᤀᤠᤱ ᤔᤠᤱᤜᤧᤰᤛᤡᤱᤅᤠᤱ ᤘᤕᤧ— 11 ‘ᤀᤠᤱᤃᤠ᤹ ᤀᤒᤪᤠᤜᤠᤔ. ᤀᤡᤛᤜᤠᤁ ᤜᤧᤰᤁᤩᤠᤱ ᤕᤠᤁᤢᤒᤧᤴᤏᤢ ᤔᤠᤱᤜᤧᤰᤛᤡᤱᤅᤠᤀᤠᤱ ᤔᤠᤱᤜᤢᤵ ᤆᤥᤃᤢᤱᤒᤠ ᤗᤠᤈᤣ᤹ᤀᤥ ᤔᤡᤛᤪᤗᤠᤶ ᤁᤧᤓᤧᤶᤒᤠ ᤏᤡᤒᤥᤱ ᤋᤱᤒᤣ ᤏᤢ ᤂᤧᤴᤏᤢ᤺ᤸᤗᤧ ᤌᤥᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤢᤗᤡᤱᤍᤥ ᤁᤧᤖᤧᤖ ᤀᤠᤱᤃᤠ᤹ ᤔᤧᤴᤍᤡᤶᤍᤠᤱᤅᤡᤴ॥ 12 ᤁᤏᤈ᤻ᤈᤡ ᤕᤐᤢᤴᤏᤣᤖᤧ ᤁᤢᤛ᤻ᤛᤠ ᤁᤠᤗᤣᤒ ᤏᤢ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤗᤰ ᤗᤠ᤺ᤵᤔᤠ ᤂᤥᤛᤡ. ᤌᤣᤀᤠᤱᤓᤧᤸᤗᤧ ᤁᤴ ᤏᤧᤵᤑᤢᤖᤧᤃ ᤁᤢᤗᤡᤱᤍᤥ ᤁᤧᤖᤧᤖ ᤕᤜᤘᤣ ᤍᤠᤱᤒᤧᤴ ᤋᤡᤶᤍᤧᤛᤢ॥’ 13 ᤀᤡᤛᤪᤠᤀᤡᤗᤡᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤛᤠᤀᤥ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤌᤠ᤺ᤰᤁᤥᤒᤠᤜᤠ᤹ ᤁᤧᤖᤧᤰ ᤔᤧᤴᤇᤧᤏᤧᤸᤗ ᤌᤠᤖᤡᤰ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤂᤢᤏᤧ᤹ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤏᤠ ᤏᤢ ᤁᤳᤏᤠ ᤋᤠᤰᤁᤴᤍᤢ ᤁᤳᤋᤢᤛᤡ॥ 14 “ᤗᤠᤕᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤴᤍᤠᤱᤛᤠᤕᤥᤒᤥᤖᤠᤛᤣ᥄ ᤕᤜᤘᤣ ᤍᤠᤱᤒᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤠᤰᤁᤧᤴᤏᤡᤴ ᤀᤠᤸᤗᤛᤠᤱ ᤕᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤗᤧᤵᤔᤠᤱ ᤑᤥᤱᤔᤠᤖᤧ ᤗᤠᤃᤡ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤧᤴᤏᤥ ᤁᤧᤒᤥᤃᤡᤀᤠᤱ ᤁᤧᤘᤕᤡ᤹॥ 15 ᤂᤡᤏᤡ᤹ ᤂᤢᤏᤧ᤹ ᤋᤡᤶᤔᤠ ᤁᤧᤴᤍᤧᤴᤍᤡᤴᤏᤧᤓᤃᤪ. ᤂᤢᤏᤧ᤹ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤕᤠᤶᤔᤥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤀᤣ ᤐᤈᤣ᤺ᤰ ᤐᤰᤌᤛᤡ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤰᤔᤠᤛᤡᤔᤧᤴ ᤂᤡᤏᤡ᤹ᤀᤣ ᤁᤧᤈᤥᤃᤢᤶᤒᤠ ᤐᤥᤱ᤹॥” 16 ᤂᤧᤒᤩᤠᤱ ᤂᤧᤱᤜᤠ᤹ ᤔᤥᤛᤠ᤺ᤸᤗᤧ ᤁᤢᤒᤣᤛᤠᤱ ᤔᤧᤍᤩᤧᤀᤠᤱ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤔᤧᤸᤗᤢᤰᤂᤖ ᤏᤢ ᤀᤠᤏᤡᤃᤣ ᤔᤣ᤺ᤳᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁ᤹ᤕᤥ ᤕᤧᤰᤕᤰᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧ. 17 ᤁᤖ ᤀᤠᤏᤡᤃᤣ ᤀᤠᤵᤑᤣᤰ ᤆᤠᤀᤣ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤋᤧᤴᤏᤥ ᤔᤧᤱᤃᤧᤳᤇᤣ ᤌᤠᤖᤡᤰ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤠᤵᤛᤡᤱᤔᤠᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤌᤠᤛᤡᤱᤔᤠ ᤕᤠᤖᤡᤵ ᤘᤕᤡᤃᤧ॥ ᤁᤴ ᤕᤧᤶᤔᤥ ᤁᤴ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤀᤠᤏᤡᤃᤣ ᤔᤧ᤺ᤳᤛᤠᤜᤠ᤹ ᤌᤧᤔᤠᤀᤠᤱ ᤔᤧᤶᤔᤧᤳᤇᤣ ᤂᤧᤴ ᤕᤧᤰᤕᤰᤜᤠ᤹ᤀᤥᤒᤠ ᤗᤢᤱᤎᤠᤰᤁᤥ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤒᤥᤱᤅᤠᤱ ᤔᤧᤕᤠᤰ॥ 18 ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥᤒᤠ ᤗᤰᤜᤠ᤹ ᤔᤧᤱᤄᤥᤛᤢᤴᤗ ᤌᤠᤖᤡᤰ ᤜᤡᤶᤔᤥ ᤀᤠᤏᤡᤃᤣ ᤔᤧᤏᤢ᤺ᤰᤂᤡᤃᤧᤴ᤹॥ 19 ᤕᤷᤍᤏ ᤏᤠᤎᤠ᤺ᤶᤒᤡ ᤏᤢ ᤂᤧᤴᤏᤢ᤺ᤸᤗᤧᤀᤠᤱ ᤏᤠ ᤂᤧᤱᤜᤠ᤹ᤗᤠᤶ ᤀᤠᤏᤡᤃᤣ ᤂᤥᤔᤠ ᤗᤰ ᤔᤧᤈᤥᤃᤢᤶᤒᤧᤴ᤹. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤕᤢᤰᤁᤥᤒᤠ ᤂᤥᤔᤠ ᤗᤰᤁᤡᤴ ᤕᤷᤍᤏ ᤁᤳᤏᤠᤜᤠᤱᤍᤠᤱᤅᤣ ᤆᤢᤰᤋᤧᤀᤠᤱ ᤏᤧᤖᤥ॥” 20 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤗ ᤐᤥᤱ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤡᤏᤡ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤏᤢ ᤌᤱᤅᤥ ᤁᤧᤒᤣᤃᤡ᤹. 21 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ ᤏᤠ᤺ᤳᤋᤢᤍᤣᤛᤢᤛᤡᤀᤠᤱ ᤔᤧᤏᤠ᤺ᤴᤍᤢᤛᤡᤴᤗ ᤌᤠᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤡᤏᤡ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤏᤢ ᤕᤷᤍᤏ ᤏᤠᤎᤠ᤺ᤶᤒᤡ ᤁᤧᤒᤣᤃᤡ᤹. 22 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤴ ᤗᤠᤈᤣᤴ ᤜᤢᤰᤁᤥ ᤌᤠᤏᤧᤓᤃᤪ ᤂᤡᤏᤡ᤹ ᤏᤢ᤺ᤱᤔᤠ ᤑᤧᤶᤔᤠ ᤁᤧᤛᤢᤰᤋᤡ᤹॥ ᤂᤧᤶᤒᤩᤠᤱ ᤕᤜᤘᤣ ᤍᤠᤱᤒᤠᤴ ᤏᤢ ᤀᤡᤛᤪᤠᤀᤡᤗ ᤗᤧᤵᤔᤠᤱ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤄᤥᤛᤢᤶ᤹॥ ᤂᤧᤒᤩᤠᤱ ᤁᤴ ᤗᤠᤈᤣᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤡᤏᤡ᤹ ᤕᤢᤰᤁᤥ ᤌᤠᤖᤥ॥ 23 “ᤁᤖ ᤂᤡᤏᤡ᤹ ᤀᤰᤂᤣ ᤁᤧᤴᤈᤥᤃᤢᤶᤔᤡᤴᤏᤧᤓᤃᤪ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤡᤏᤡ᤹ ᤗᤠᤕᤥ ᤁᤧᤈᤥᤃᤢᤶ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤕᤥᤸᤗᤧ ᤛᤧᤰᤂᤠᤀᤣ ᤂᤡᤏᤡ᤹ ᤁᤧᤍᤧᤶᤛᤡ᤹॥ 24 ᤂᤡᤏᤡ᤹ ᤔᤣ᤺ᤳᤜᤠ᤹ ᤏᤢ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤕᤧᤰᤕᤰᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤖᤧ ᤗᤠᤃᤡ ᤂᤖᤜᤠ᤹ ᤆᤥᤃᤧᤶᤔᤧ᤹. ᤁᤖ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤔᤠᤱᤜᤢᤵᤜᤠ᤹ᤀᤠᤱ ᤁᤧᤳᤋᤧᤶᤔᤧ᤹॥” 25 ᤂᤧᤒᤩᤠᤱ ᤃᤠᤍ ᤏᤢ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤠᤖᤧ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤀᤠᤏᤡᤃᤣ ᤆᤥᤃᤢᤶᤒᤧ॥ 26 ᤀᤠᤏᤡᤃᤣ ᤀᤅᤧ᤺ᤰᤘᤠ ᤛᤠᤜᤠ᤹. ᤔᤣ᤺ᤳᤜᤠ᤹. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤏᤢ ᤐᤡᤳᤔᤠ ᤐᤡᤳᤜᤠ᤹ ᤁᤧᤖᤧᤰ ᤀᤠᤶᤓᤠ ᤁᤴ ᤃᤡᤗᤠᤍᤒᤠ ᤕᤧᤰᤕᤰᤁᤥᤀᤣ ᤔᤧᤕᤠ᤺ᤰ॥ 27 ᤁᤖ ᤀᤠᤍᤠᤱᤒᤠᤖᤧ ᤁᤧᤛᤧᤘᤠᤖᤥᤒᤠᤜᤠ᤹ ᤂᤧᤏᤧ᤹ ᤁᤧᤀᤡᤱᤈᤠᤱ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤠᤏᤡᤃᤣ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤏᤢ ᤏᤠᤎᤠ᤺ᤶᤒᤡ ᤐᤣᤃᤡᤃᤧ᤹॥” 28 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ. ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢᤴ ᤏᤢ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰ ᤜᤡᤶᤛᤕᤱᤒᤠ ᤗᤠᤶᤗᤥᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ॥ 29 ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤃᤠᤍ ᤏᤢ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤂᤡᤏᤡ᤹ᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤌᤱᤅᤥ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤔᤧᤕᤠᤱᤛᤡᤱᤅᤠᤱ ᤕᤷᤍᤏ ᤏᤠᤎᤠ᤺ᤶᤒᤡ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤗᤠᤈᤣᤴ ᤂᤡᤏᤡ᤹ ᤜᤢᤰᤁᤥ ᤌᤠᤏᤧᤓᤃᤪ. ᤃᤡᤗᤠᤍ ᤗᤠᤈᤣᤴ ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤥ ᤐᤡᤖᤧᤶᤛᤡᤶᤔᤧ᤹॥ 30 ᤁᤖ ᤂᤧᤱᤜᤠ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤕᤠᤱᤛᤡᤱᤔᤠᤀᤠᤱ ᤂᤡᤏᤡ᤹ᤏᤢ ᤛᤥᤖᤡᤰ ᤕᤷᤍᤏ ᤏᤠᤎᤠ᤺ᤶᤒᤡ ᤐᤣ᤺ᤰᤔᤠ ᤔᤧᤴᤍᤧᤴᤏᤧᤴᤏᤧᤓᤃᤪ. ᤂᤧᤱᤜᤠ᤹ᤖᤧ ᤂᤡᤏᤡ᤹ᤏᤢ ᤛᤥᤖᤡᤰ ᤁᤏᤠᤏ ᤗᤠᤈᤣ᤹ᤀᤥᤀᤣ ᤕᤢᤰᤁᤥᤒᤠ ᤂᤥᤔᤠ ᤗᤰᤁᤡᤴ ᤔᤧᤄᤥᤛᤢ᤹॥” 31 ᤃᤠᤍ ᤖ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡᤃᤣ ᤌᤧᤔᤠ ᤆᤥᤃᤧᤶᤔᤧ᤹ ᤔᤧᤳᤋᤡᤃᤧᤀᤠᤱ ᤘᤠ᤹ ᤀᤠᤏᤡᤃᤣ ᤜᤠᤒᤠ ᤂᤧᤴ ᤆᤥᤃᤢᤶᤒᤧ॥ 32 ᤀᤠᤏᤡᤃᤣ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤜᤣ᤹ᤀᤠᤛᤡᤃᤧᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤠᤎᤠ᤺ᤶᤒᤡ ᤁᤏᤠᤏ ᤗᤠᤈᤣ᤹ᤀᤥ ᤐᤣᤃᤡᤃᤧ᤹. ᤁᤖ ᤀᤠᤏᤡᤃᤣ ᤕᤢᤰᤁᤥᤒᤠ ᤂᤥᤔᤠ ᤗᤰᤁᤡᤴ ᤕᤷᤍᤏ ᤁᤳᤏᤠᤜᤠᤱᤍᤠᤱᤅᤣ ᤆᤢᤰᤗ॥” 33 ᤂᤧᤒᤩᤠᤱ ᤃᤠᤍ ᤏᤢ ᤖᤢᤒᤣᤏᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠ ᤜᤧᤰᤁᤩᤠᤱ ᤕᤥᤛᤣᤑᤖᤧ ᤁᤢᤛ᤻ᤛᤠ ᤔᤏᤛ᤻ᤛᤣᤖᤧ ᤁᤢᤓᤪᤧ᤺ᤰ ᤁᤢᤎᤠ᤺ᤰᤜᤠ᤹ ᤀᤣᤔᤥᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤛᤡᤜᤥᤏᤖᤧ ᤁᤢᤜᤠᤱᤈᤢᤶᤔᤡᤴ ᤏᤢ ᤒᤠᤛᤠᤏᤒᤠ ᤜᤠᤱ ᤀᤥᤃᤖᤧ ᤁᤢᤜᤠᤱᤈᤢᤶᤔᤡᤴ. ᤂᤢᤴᤇᤡ᤹ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ᤀᤠᤱ ᤂᤰᤐᤧᤳ ᤔᤥᤛᤠ᤺ᤸᤗᤧ ᤐᤡᤖᤢᤛᤡ॥ 34 ᤂᤧᤒᤩᤠᤱ ᤃᤠᤍᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤍᤡᤒᤥᤏ. ᤀᤋᤠᤖᤥᤋ. ᤀᤖᤥᤀᤣᤖ. 35 ᤀᤋᤪᤥᤋ-ᤛᤥᤐᤠᤏ. ᤕᤠᤈᤣᤖ. ᤕᤥᤃᤒᤜᤠ. 36 ᤒᤣᤌ-ᤏᤡᤔᤪᤠ ᤏᤢ ᤒᤣᤌ-ᤜᤠᤖᤠᤏᤧᤴ—ᤁᤴᤜᤠ᤹ ᤗᤢᤱᤎᤠᤰᤁᤡᤸᤗᤧ ᤁᤒᤢᤒᤠ ᤕᤣᤰᤕᤣᤰᤜᤠ᤹ ᤔᤧᤈᤥᤃᤢ. ᤂᤧᤒᤩᤠᤱ ᤔᤧᤸᤗᤢᤰ ᤔᤧ᤺ᤴᤍᤠ ᤛᤠᤰᤔᤠ ᤂᤖᤜᤠ᤹ ᤔᤧᤈᤥᤃᤢ॥ 37 ᤖᤢᤒᤣᤏᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤜᤣᤛ᤻ᤒᤥᤏ. ᤀᤣᤗᤠᤗᤧ. ᤁᤡᤷᤕᤠᤋᤤᤔ. 38 ᤏᤣᤒᤥ. ᤒᤠᤗ-ᤔᤥᤏ (ᤁᤴ ᤋᤧᤴᤜᤠ᤹ᤖᤧ ᤁᤢᤔᤡᤱ ᤗᤧᤰᤂᤧᤀᤠᤱ ᤏᤧᤖᤥ) ᤏᤢ ᤛᤡᤒ᤻ᤔᤠ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤔᤡᤱ ᤔᤧᤕᤢᤰᤂᤢ॥ 39 ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤔᤠᤁᤡᤖᤧ ᤁᤢᤎᤠ᤺ᤰᤜᤠ᤹ ᤃᤡᤗᤠᤍ ᤗᤠᤈᤣ᤹ᤀᤥ ᤔᤧᤒᤣ. ᤜᤧᤰᤁᤩᤠᤱ ᤂᤧᤴ ᤜᤢᤰᤁᤠᤵ ᤆᤥᤃᤢᤀᤠᤱ ᤂᤧᤵᤔᤥ ᤁᤧᤕᤢᤱᤒᤠ ᤀᤣᤔᤥᤖᤡᤜᤠ᤹ ᤔᤧᤏᤠ᤺ᤳᤋᤢᤔᤧᤍᤣᤛᤢᤛᤡ॥ 40 ᤁᤸᤗᤧᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤔᤏᤛ᤻ᤛᤣᤖᤧ ᤁᤢᤛ᤻ᤛᤠ ᤔᤠᤁᤡᤖᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ ᤃᤡᤗᤠᤍ ᤗᤠᤈᤣᤴ ᤐᤡᤖᤢᤍᤣᤛᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ ᤜᤠᤒᤠ ᤂᤧᤵᤔᤥ ᤔᤧᤕᤢᤅᤧ॥ 41 ᤔᤏᤛ᤻ᤛᤣᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤕᤠᤀᤡᤖᤧᤴ ᤐᤣᤀᤠᤱ ᤂᤧᤵᤔᤥᤒᤠ ᤐᤠᤱᤈᤢᤶᤜᤠ᤹ ᤜᤢᤰᤁᤠᤵ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤐᤠᤱᤈᤢᤶᤜᤠ᤹ᤖᤧ ᤁᤢᤔᤡᤱ ᤜᤒ᤻ᤒᤠᤋ-ᤕᤠᤀᤡᤖ ᤕᤢᤰᤂᤢ॥ 42 ᤜᤧᤰᤁᤩᤠᤱ ᤏᤥᤒᤜ᤺ᤴ ᤐᤣᤀᤠᤱ ᤁᤣᤏᤠᤋ ᤏᤢ ᤂᤧᤵᤔᤥᤒᤠ ᤐᤠᤱᤈᤢᤶᤜᤠ᤹ ᤜᤢᤰᤁᤠᤵ ᤆᤥᤃᤢ. ᤂᤧᤒᤩᤠᤱ ᤀᤠᤵᤑᤣᤰ ᤁᤢᤔᤡᤱᤅᤥᤗᤠᤶ ᤂᤧᤱᤜᤠ᤹ ᤁᤧᤖᤧᤰ ᤏᤥᤒᤜ ᤔᤡᤱ ᤘᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.