ᤂᤠᤏᤡ᤺ᤳ 31 - LIFOTNTᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤎᤩᤠᤏᤡᤜᤠ᤹ ᤔᤧᤏᤠ᤺ᤴᤍᤢᤛᤡ 1 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 2 “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤡᤎᤩᤠᤏᤡᤜᤠ᤹ᤀᤥ ᤂᤧᤏᤧ᤹ ᤁᤢᤗᤧᤰᤘᤠ ᤏᤢ᤺ᤰᤋᤧ᤹॥ ᤂᤧᤴ ᤀᤣᤃᤠᤱ ᤂᤧᤏᤧ᤹ ᤁᤧᤛᤡᤀᤠᤱ ᤀᤠᤒᤠᤅᤣ ᤁᤧᤛᤢᤎᤧᤒᤠ ᤁᤧᤍᤠᤰᤌᤧᤒᤠᤜᤠ᤹ᤏᤢ ᤛᤥᤖᤡᤰ ᤐᤥᤱᤛᤧ ᤁᤧᤒᤣ᤺ᤰ॥” 3 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤔᤡᤎᤩᤠᤏᤡᤜᤠ᤹ᤏᤢ ᤋᤧᤴᤎᤱ ᤆᤥ᤺ᤰᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤢᤴᤇᤡ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠᤖᤧ ᤗᤠᤃᤡ ᤂᤡᤏᤡ᤹ ᤔᤏᤠᤜᤠ᤹ᤀᤥᤗᤠᤶ ᤁᤢᤓᤠ ᤔᤏᤠᤜᤠ᤹ ᤕᤠᤖᤡᤵ ᤆᤥᤃᤧᤶᤛᤡᤶᤔᤧ᤹॥ 4 ᤀᤡᤛᤪᤠᤀᤡᤗᤒᤠ ᤌᤠ᤺ᤰᤌᤰᤔᤠ ᥇.᥆᥆᥆ ᤌᤡᤰᤌᤡᤰ ᤔᤏᤠᤜᤠ᤹ ᤌᤱᤅᤥ ᤂᤡᤏᤡ᤹ ᤐᤠᤱᤄᤠᤶᤛᤡᤶᤔᤧ᤹॥” 5 ᤁᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤡ ᤌᤠ᤺ᤰᤌᤰᤔᤠ ᤋᤧᤴᤎᤱᤗᤧ ᤗᤠᤃᤡ ᥇.᥆᥆᥆ ᤌᤡᤰᤌᤡᤰ ᤔᤏᤠᤜᤠ᤹ ᤔᤧᤓᤢᤰᤂᤢᤛᤡ ᤜᤧᤰᤁᤩᤠᤱ ᥇᥈.᥆᥆᥆ ᤌᤰᤛᤢᤒᤠᤜᤠ᤹ ᤔᤧᤗ᤺ᤳᤋᤢᤛᤡ॥ 6 ᤔᤥᤛᤠ᤺ᤸᤗᤧ ᤁᤧᤖᤧᤰ ᤌᤠ᤺ᤰᤜᤠ᤹ᤀᤥᤗᤠᤶ ᤌᤠ᤺ᤰᤌᤰᤔᤠ ᥇.᥆᥆᥆ ᤌᤡᤰᤌᤡᤰ ᤌᤱᤅᤥ ᤐᤠᤱᤄᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤸᤗᤧ ᤁᤢᤛ᤻ᤛᤠ ᤐᤡᤏᤜᤠᤛᤧᤴ ᤛᤣᤛᤣᤍᤧᤴᤏᤥᤒᤠ ᤛᤠᤔᤠᤐᤢᤔᤠᤜᤠ᤹ ᤏᤢ ᤌᤱ ᤔᤡᤰᤛᤣ᤺ᤴ ᤔᤢ᤺ᤵᤏᤠᤒᤠ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤜᤢᤰᤔᤧᤛᤢᤵᤋᤢᤀᤠᤱ ᤔᤧᤒᤠᤱᤄᤢᤔᤧᤍᤣᤛᤢ॥ 7 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤔᤡᤎᤩᤠᤏᤡᤜᤠ᤹ᤏᤢ ᤋᤧᤴᤎᤱ ᤔᤧᤈᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤕᤧᤶᤒᤡᤳᤇᤠ ᤔᤏᤠᤜᤠ᤹ ᤔᤧᤛᤧᤖᤢᤛᤡ॥ 8 ᤁᤧᤛᤡᤒᤠᤜᤠ᤹ᤀᤥ ᤔᤡᤎᤩᤠᤏᤒᤠ ᤀᤣᤒᤡ. ᤖᤣᤁᤣᤔ. ᤛᤢᤖ. ᤜᤢᤖ ᤏᤢ ᤖᤣᤒᤠ ᤅᤠᤛᤡ ᤜᤠᤱᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤧᤴᤏᤠᤱ ᤋᤠᤓᤣ᤺ᤸᤗᤧ ᤔᤧᤛᤧᤖᤢ॥ 9 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤡᤎᤩᤠᤏᤡ ᤕᤧᤶᤒᤡᤳᤇᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤏᤢ ᤔᤧᤴᤇᤢᤔᤠ ᤕᤧᤶᤒᤡᤳᤇᤠ ᤜᤡᤴᤈᤠ᤹ᤒᤡᤳᤇᤠ᤹ᤀᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤐᤡᤳᤜᤠ᤹. ᤔᤧᤸᤗᤢᤰᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤍᤣ᤹ᤖᤢ ᤔᤧᤒᤡᤖᤢᤛᤡ॥ 10 ᤂᤧᤱᤜᤠ᤹ ᤔᤧᤕᤢᤅᤧᤒᤠ ᤁᤧᤖᤧᤰ ᤕᤧᤰᤕᤰᤜᤠ᤹ ᤏᤢ ᤛᤠ᤺ᤱᤃᤠᤜᤡᤶᤜᤠ᤹ᤀᤠᤱ ᤔᤡᤔᤧᤎᤡᤰᤂᤢ ᤔᤧᤒᤡᤖᤢᤛᤡ॥ 11 ᤂᤧᤱᤜᤠ᤹ᤖᤧ ᤜᤢᤰᤁᤠᤵ ᤔᤧᤈᤥᤃᤢᤛᤡᤒᤠ ᤁᤧᤖᤧᤰ. ᤌᤰᤛᤠᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣ ᤆᤡᤃᤰᤘᤠᤜᤠ᤹ᤃ ᤔᤧᤍᤣ᤹ᤖᤢᤀᤠᤱ ᤔᤧᤒᤣ॥ 12 ᤜᤧᤰᤁᤩᤠᤱ ᤕᤖᤡᤜᤥ ᤁᤢᤍᤥ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤥᤀᤠᤒᤒᤠ ᤏᤧᤏᤧᤒᤠᤍᤧᤴᤏᤥᤒᤠ ᤛᤠ᤺ᤱᤃᤠᤜᤡᤶᤔᤥ ᤔᤥᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤏᤢ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤋᤃᤡ ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹. ᤌᤰᤛᤠᤜᤠ᤹ ᤏᤢ ᤕᤠᤱᤛᤠᤁᤢᤴᤎᤣ ᤆᤡᤃᤰᤘᤠᤜᤠ᤹ ᤔᤧᤍᤣ᤹ᤖᤢ॥ 13 ᤔᤥᤛᤠ. ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ ᤏᤢ ᤛᤱᤈᤢᤶᤓᤥᤀᤥᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤛᤧ ᤛᤠ᤺ᤱᤃᤠᤜᤡᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ॥ 14 ᤌᤱᤅᤥᤗᤠᤶ ᤁᤧᤏᤢ᤺ᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤇᤡᤱ ᤏᤢ ᤁᤡᤵ ᤌᤡᤰᤁᤠᤱ ᤌᤥᤒᤠ ᤌᤰᤐᤣᤒᤠ ᤜᤧᤰᤁᤩᤠᤱ ᤌᤰᤔᤥᤒᤠᤜᤠ᤹ᤏᤢ ᤔᤥᤛᤠᤴ ᤁᤢᤕᤠ᤺ᤰᤗᤧ᤹ᤖᤧ॥ 15 ᤔᤥᤛᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤌᤣ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ ᤂᤡᤏᤡ᤹ ᤁᤢᤜᤡᤱᤘᤧᤳ ᤁᤧᤗᤧᤖᤢᤶᤛᤡᤶᤒᤡ᥅ 16 ᤀᤥᤔᤧᤳᤋᤧᤶᤔᤧ᤹. ᤒᤠᤗᤠᤔᤧᤸᤗᤧ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤐᤥᤖᤀᤥ ᤜᤠᤒᤠ ᤁᤴᤜᤠ᤹ᤖᤧᤀᤣ ᤀᤡᤛᤪᤠᤀᤡᤗᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡᤀᤠᤱ ᤘᤕᤧ॥ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤔᤡᤱᤍᤣ᤹ᤀᤠᤱ ᤐᤥᤃᤧᤀᤠᤱ ᤘᤕᤧ॥ 17 ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤀᤥ ᤕᤧᤶᤒᤡᤳᤇᤠ ᤀᤅᤧ᤺ᤰᤘᤠᤜᤠ᤹ ᤏᤢ ᤕᤧᤶᤒᤡᤳᤇᤠᤏᤢ ᤛᤥᤖᤡᤰ ᤁᤧᤏᤧᤔᤠ ᤁᤧᤛᤢ᤺ᤵᤔᤠ ᤔᤧᤴᤇᤢᤔᤠᤜᤠ᤹ ᤛᤧᤖᤧᤶᤛᤡᤶᤔᤧ᤹॥ 18 ᤁᤖ ᤁᤢᤔᤣ᤺ᤰᤂᤡᤶ ᤔᤧᤶᤒᤥᤱᤅᤣ ᤁᤧᤘᤠ᤹ᤔᤠ ᤔᤧᤴᤇ᤻ᤕᤠᤜᤠ᤹ ᤆᤠᤀᤣ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤢᤜᤡᤱᤘᤧᤳ ᤁᤳᤋᤧᤶᤛᤡᤶᤔᤧ᤹॥ 19 “ᤂᤡᤏᤡ᤹ᤀᤥ ᤀᤠᤳᤋᤡᤴᤜᤠ᤹ᤖᤧ ᤁᤢᤓᤠ ᤔᤏᤠ ᤁᤧᤛᤧᤖᤢᤶᤛᤡᤶᤔᤠᤱ ᤘᤠ᤹ ᤀᤡᤃᤪ ᤆᤣ ᤁᤧᤛᤢᤛᤢᤶᤔᤠᤱ ᤘᤠ᤹. ᤂᤧᤱᤜᤠ᤹ ᤁᤧᤖᤧᤰ ᤛᤠ᤺ᤱᤃᤠᤜᤡᤶᤗᤠᤶ ᤗᤠ᤺ᤰᤁᤠᤳ ᤏᤢᤛᤡ ᤕᤧᤴ ᤌᤠᤖᤡᤰ ᤕᤢᤱᤔᤠ ᤐᤥᤱ᤹॥ ᤛᤢᤶᤛᤡᤃᤣᤰᤐᤠ ᤏᤢ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤀᤠᤵᤑᤣᤰ ᤏᤢ ᤁᤧᤍᤧᤶᤛᤢᤶ ᤁᤧᤍᤠᤖᤢᤶᤛᤡᤶᤒᤠᤜᤠ᤹ᤀᤠᤱ ᤛᤢᤳᤌᤥ ᤆᤥᤃᤧᤶᤛᤡᤶᤔᤧ᤹॥ 20 ᤁᤧᤖᤧᤰ ᤆᤠᤱᤜᤠ᤹ ᤏᤢ ᤛᤡᤜᤥ᤹ᤒᤠᤜᤠ᤹. ᤔᤧ᤺ᤴᤍᤠ ᤔᤢᤖᤡᤰ ᤏᤢ ᤛᤡᤱᤅᤡᤸᤗᤧᤴ ᤁᤧᤖᤧᤰ ᤆᤡᤃᤰᤘᤠ ᤛᤠᤔᤠᤜᤠ᤹ ᤂᤡᤏᤡ᤹ ᤛᤢᤳᤌᤥ ᤆᤥ᤺ᤰᤔᤠᤛᤡ ᤐᤥᤱ᤹॥” 21 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤸᤗᤧ ᤌᤱᤅᤥ ᤁᤧᤒᤣ᤺ᤰᤐᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤔᤥᤛᤠᤴ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤠ᤹— 22 ᤛᤠᤶᤔᤩᤠᤱ. ᤕᤢᤵᤐᤠ. ᤁᤠᤛᤠ. ᤑᤧᤴᤈᤣ᤹. ᤋᤡᤴ ᤏᤢ ᤗᤡᤕᤥᤗᤡᤵ. 23 ᤜᤧᤰᤁᤩᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤔᤧᤶᤒᤥᤱᤔᤏᤠᤒᤠ ᤁᤧᤖᤧᤰ ᤛᤠᤔᤠᤜᤠ᤹ ᤔᤡᤀᤥ ᤁᤣ᤺ᤳᤋᤧᤶᤔᤧ᤹ᤀᤠᤱ ᤛᤢᤳᤌᤥ ᤆᤥᤃᤧᤶᤛᤡᤶᤔᤧ᤹॥ ᤂᤧᤴᤏᤢ᤺ᤸᤗᤧ ᤘᤣ᤹ ᤂᤧᤱᤜᤠ᤹ ᤁᤧᤖᤧᤰ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤔᤠ ᤆᤫᤠ᤺ᤳᤋᤥ ᤁᤣ᤺ᤵᤔᤠᤛᤡᤀᤠᤱ ᤛᤢᤳᤌᤥ ᤆᤥ᤺ᤰᤔᤠᤛᤡ ᤐᤥᤱ᤹॥ ᤂᤧᤒᤩᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤆᤡᤃᤰᤘᤠᤜᤠ᤹ ᤆᤠᤀᤣ ᤀᤠᤶᤓᤠ ᤂᤧᤴ ᤆᤫᤠ᤺ᤳᤋᤥ ᤁᤣ᤺ᤵᤔᤠᤛᤡᤀᤠᤱ ᤛᤢᤳᤌᤥ ᤆᤥ᤺ᤰᤔᤠᤛᤡ ᤐᤥᤱ᤹॥ 24 ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤆᤠᤱᤜᤠ᤹ ᤘᤠᤜᤵᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤢᤳᤌᤥ ᤁᤧᤒᤥ᤺ᤰᤂᤡ᤹॥ ᤂᤧᤴ ᤀᤣᤃᤠᤱ ᤂᤡᤏᤡ᤹ ᤛᤠ᤺ᤱᤃᤠᤜᤡᤶᤔᤥ ᤁᤧᤍᤩᤧ᤹ᤀᤡᤸᤗᤧ ᤐᤥᤱᤗᤥ॥” ᤌᤱᤅᤥ ᤔᤧᤏᤠᤵᤋᤢᤛᤡᤒᤠ ᤆᤡᤃᤰᤘᤠ ᤛᤠᤔᤠᤜᤠ᤹ ᤔᤧᤓ᤺ᤰᤂᤢ 25 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. 26 “ᤔᤧᤍᤧᤶᤛᤢ ᤔᤧᤍᤠᤖᤢᤛᤡᤒᤠ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤂᤧᤏᤧ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖ ᤜᤧᤰᤁᤩᤠᤱ ᤛᤱᤈᤢᤶᤓᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤏᤡᤖᤧᤶᤛᤡᤶᤛᤧ᤹॥ 27 ᤌᤱᤅᤥ ᤁᤧᤒᤣ᤺ᤰᤐᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤢ ᤘᤣ᤹ ᤁᤧᤖᤧᤰ ᤛᤱᤈᤢᤶᤓᤥ᤺ᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤴ ᤆᤡᤃᤰᤘᤠ ᤛᤠᤔᤠᤜᤠ᤹ ᤁᤢᤗᤰ ᤏᤧᤳᤇᤡ ᤆᤥᤃᤧᤶᤔᤧ᤹ᤀᤠᤱ ᤑ᤺ᤰᤂᤧᤶᤔᤧ᤹॥ 28 ᤌᤱᤅᤥ ᤁᤧᤒᤣ᤺ᤰᤐᤠ ᤌᤰᤛᤢᤒᤠᤜᤠ᤹ᤗᤠᤶ ᤔᤏᤠᤜᤠ᤹. ᤁᤢᤶᤔᤠᤔᤠ ᤁᤢᤶᤒᤠᤒᤠ ᤐᤡᤳᤜᤠ᤹. ᤀᤍᤱ. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥᤗᤠᤶ ᤁᤡᤵ ᤅᤠᤛᤡ ᤌᤰᤔᤠ ᤗᤳᤇᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤣ᤺ᤱ ᤜᤢᤅᤧᤶᤔᤧ᤹॥ 29 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤪᤧ᤺ᤱ ᤗᤰᤁᤥᤗᤠᤶ ᤁᤶᤓᤩᤠᤖᤡᤰ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤜᤢᤰᤘᤠ ᤁᤢᤛᤡᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤐᤡᤖᤧᤶᤔᤧ᤹॥ 30 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤪᤧ᤺ᤱ ᤗᤰᤁᤥᤗᤠᤶ ᤔᤏᤠᤜᤠ᤹. ᤁᤢᤶᤔᤠᤔᤠ ᤁᤢᤶᤒᤠᤒᤠ ᤐᤡᤳᤜᤠ᤹. ᤀᤍᤱ. ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤀᤡᤃᤪ ᤘᤣ᤹ ᤌᤰᤛᤠᤜᤠ᤹ᤗᤠᤶ ᤅᤠᤒᤥᤱ ᤌᤰᤔᤠ ᤗᤳᤇᤠ ᤕᤠᤱᤅᤠᤛᤡᤶᤔᤧ᤹ᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴᤏᤡᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ ᤐᤡᤖᤧᤶᤛᤡᤶᤔᤧ᤹॥” 31 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤀᤡᤱᤈᤠᤱ ᤐᤡᤖᤢᤒᤠ ᤜᤧᤰᤁᤣ ᤔᤥᤛᤠᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤆᤥᤃᤧᤇᤢ॥ 32 ᤌᤱᤃᤧᤎᤰᤐᤠ ᤌᤰᤛᤢᤒᤠᤜᤠ᤹ᤖᤧ ᤜᤢᤰᤁᤥ ᤔᤧᤎᤠᤛᤢᤒᤠ ᤁᤧᤏᤶᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤜᤠᤒᤠ ᤁᤴᤜᤠ᤹ ᤘᤕᤧᤖᤥ—ᤔᤧᤸᤗᤢᤰ ᤏᤢ ᤔᤧ᤺ᤴᤍᤠ ᥌.᥍᥋.᥆᥆᥆ 33 ᤁᤢᤶᤔᤠᤔᤠ ᤏᤢ ᤁᤢᤶᤒᤠᤒᤠ ᤐᤡᤳ ᥍᥈.᥆᥆᥆ 34 ᤀᤍᤱ ᥌᥇.᥆᥆᥆ 35 ᤜᤧᤰᤁᤩᤠᤱ ᤕᤧᤶᤒᤡᤳᤇᤠᤏᤢ ᤛᤥᤖᤡᤰ ᤔᤧᤴᤀᤡᤶᤔᤣ ᤁᤧᤘᤠ᤹ᤔᤠ ᤔᤧᤴᤇᤢᤔᤠᤜᤠ᤹ ᤁᤧᤖᤧᤰᤗᤧ ᥉᥈.᥆᥆᥆॥ 36 ᤂᤧᤴᤗᤠᤶ ᤌᤱᤅᤥ ᤁᤧᤒᤣ᤺ᤰᤐᤠ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤁᤥ ᤁᤧᤎᤠᤒᤠ ᤁᤢᤓᤪᤧ᤺ᤱ ᤗᤰᤁᤡᤴ ᤜᤠᤒᤠ ᤁᤴ ᤘᤕᤧᤖᤥ— ᥉.᥉᥍.᥋᥆᥆ ᤔᤧᤸᤗᤢᤰ. 37 ᤂᤧᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤣ᤺ᤱ ᥌᥍᥋ ᤔᤧᤸᤗᤢᤰ ᤔᤧᤘᤕᤧ. 38 ᥉᥌.᥆᥆᥆ ᤁᤢᤶᤔᤠᤔᤠ ᤏᤢ ᤁᤢᤶᤒᤠᤒᤠ ᤐᤡᤳ. ᤂᤧᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤣ᤺ᤱ ᥍᥈ ᤔᤧᤘᤕᤧ. 39 ᥉᥆.᥋᥆᥆ ᤀᤍᤱᤜᤠ᤹. ᤂᤧᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤣ᤺ᤱ ᥌᥇ ᤔᤧᤘᤕᤧ. 40 ᥇᥌.᥆᥆᥆ ᤔᤧᤴᤇᤢᤔᤠᤜᤠ᤹. ᤂᤧᤱᤜᤠ᤹ᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤣ᤺ᤱ ᥉᥈ ᤔᤧᤘᤕᤧ॥ 41 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤜᤢᤰᤘᤠ ᤀᤣ᤺ᤱᤅᤡᤴ ᤔᤥᤛᤠ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤧᤴ ᤐᤡᤖᤢ॥ 42 ᤌᤱᤅᤥ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤗᤠᤶ ᤔᤥᤛᤠ᤺ᤸᤗᤧ ᤑ᤺ᤰᤂᤢᤒᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤪᤧ᤺ᤱ ᤛᤱᤈᤢᤶᤓᤥ ᤗᤰᤁᤡᤴ ᤁᤴ ᤘᤕᤧ— 43 ᥉.᥉᥍.᥋᥆᥆ ᤔᤧᤸᤗᤢᤰ. 44 ᥉᥌.᥆᥆᥆ ᤁᤢᤶᤔᤠᤔᤠ ᤏᤢ ᤁᤢᤶᤒᤠᤒᤠ ᤐᤡᤳ. 45 ᥉᥆.᥋᥆᥆᥆ ᤀᤍᤱ. 46 ᥇᥌.᥆᥆᥆ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹॥ 47 ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤢᤓᤪᤧ᤺ᤱ ᤗᤰᤁᤥᤗᤠᤶ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤢᤀᤡᤛᤡᤰ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ᤗᤠᤶ ᤅᤠᤒᤥᤱ ᤌᤰᤔᤠ ᤗᤳᤇᤠ ᤕᤠᤱᤛᤡᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣ ᤕᤢᤱᤍᤧᤴ ᤀᤥᤔᤧᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ ᤐᤡᤖᤢᤛᤡ॥ 48 ᤂᤧᤒᤩᤠᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤇᤡᤱ ᤏᤢ ᤁᤡᤵ ᤌᤡᤰᤁᤠᤱ ᤌᤥᤒᤠ ᤌᤰᤐᤣᤒᤠ ᤏᤢ ᤌᤰᤔᤥᤒᤠᤜᤠ᤹ ᤜᤧᤰᤁᤩᤠᤱ ᤁᤡᤵ ᤌᤡᤰᤐᤠ ᤌᤰᤐᤣᤒᤠᤜᤠ᤹ ᤔᤥᤛᤠᤀᤥ ᤔᤧᤍᤩᤧ॥ 49 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤥᤛᤠᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤕᤢᤰᤁᤥ ᤁᤧᤘᤠ᤹ᤒᤠ ᤌᤰᤛᤢᤒᤠᤜᤠ᤹ ᤀᤠᤏᤡᤃᤣ ᤏᤡᤖᤢᤶᤛᤡᤶᤒᤧᤀᤠᤱ ᤘᤠ᤹॥ ᤀᤠᤏᤡᤃᤣ ᤗᤳᤇᤠ ᤔᤏᤠᤀᤠᤱ ᤔᤧᤴᤇᤢ᤺ᤴᤏᤧᤴ॥ 50 ᤁᤸᤗᤧᤆᤥᤃᤢᤸᤗᤧ ᤀᤠᤏᤡᤃᤣ ᤁᤧᤖᤧᤰᤗᤧ ᤂᤥᤛᤢᤶᤒᤧᤒᤠ ᤛᤠᤶᤔᤩᤠᤱ ᤗᤠᤱᤒᤠ᤺ᤱᤃᤡ. ᤜᤢᤰᤐᤠ᤺ᤱᤃᤡ. ᤛᤫᤠᤃᤣᤵ. ᤁᤢᤴᤍᤢᤸᤗᤥ ᤏᤢ ᤛᤡᤰᤁᤪᤡᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤠᤀᤠᤱ ᤀᤠᤏᤡᤃᤣ ᤗᤠᤕᤥᤸᤗᤧ ᤗᤠᤃᤡ ᤗᤧᤵᤔᤡ ᤏᤠ᤺ᤰᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤀᤠᤏᤡᤃᤣ ᤋᤠᤖᤢᤶᤒᤧᤀᤠᤱ ᤘᤠ᤹॥” 51 ᤔᤥᤛᤠᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤂᤧᤴ ᤔᤏᤠᤜᤠ᤹ᤗᤠᤶ ᤂᤧᤴ ᤁᤧᤖᤧᤰ ᤛᤠᤶᤔᤩᤠᤱ ᤛᤠᤔᤠᤜᤠ᤹ ᤋᤠ᤺ᤰᤋᤧᤛᤢ॥ 52 ᤜᤧᤴᤇᤡᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠ ᤏᤢ ᤁᤡᤵ ᤌᤡᤰ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤐᤣᤒᤠᤜᤠ᤹ᤗᤠᤶ ᤔᤥᤛᤠᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤋᤠ᤺ᤰᤋᤧᤛᤢᤀᤠᤱ ᤕᤜᤘᤣ ᤍᤠᤱᤒᤠᤀᤥ ᤜᤢᤰᤘᤠ ᤜᤧᤰᤁᤣ ᤋᤥ᤺ᤴᤍᤧᤛᤢᤒᤠ ᤛᤠᤶᤔᤩᤠᤱᤅᤡᤴ ᥇᥌.᥍᥋᥆ ᤛᤣᤁᤣᤗ ᤕᤥᤖᤧ॥ 53 ᤌᤱᤅᤥ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ ᤁᤧᤖᤧᤰᤗᤧ ᤌᤱᤅᤥ ᤔᤧᤏᤠᤵᤋᤢᤛᤡᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤵᤑᤣᤰ ᤀᤠᤵᤑᤣᤰᤁᤣ ᤔᤧᤍᤣ᤹ᤖᤢᤀᤠᤱ ᤘᤕᤧ॥ 54 ᤂᤧᤒᤩᤠᤱ ᤔᤥᤛᤠᤴ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤠᤈᤠᤖᤖᤧ ᤜᤧᤴᤇᤡᤱ ᤏᤢ ᤁᤡᤵ ᤌᤡᤰ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤔᤥᤒᤠᤜᤠ᤹ ᤜᤧᤰᤁᤩᤠᤱ ᤌᤰᤐᤣᤒᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤛᤠᤶᤔᤩᤠᤱᤜᤠ᤹ ᤕᤠᤱᤏᤧᤇᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤛᤥᤰ ᤐᤥᤱᤗ ᤑᤠ᤹ᤀᤠᤱ ᤋᤢᤶᤔᤠᤍᤧᤴ ᤛᤠ᤺ᤱᤃᤠᤜᤡᤶᤔᤥ ᤋᤠᤖᤧᤇᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.