ᤏᤜᤣᤔᤩᤠᤜ 9 - LIFOTNT

ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥᤗᤠᤶ ᤔᤧᤏᤢ᤺ᤱ

¹ ᤜᤠᤒᤠ ᤂᤧᤴ ᤗᤠ᤺ᤸᤗᤧ ᤏᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤀᤡᤛᤪᤠᤀᤡᤗᤡᤜᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤔᤧᤎᤩᤧᤀᤠᤱ ᤛᤠᤃᤡ ᤋᤣᤳ ᤔᤧᤈᤠᤰᤛᤡᤱ ᤜᤧᤰᤁᤩᤠᤱ ᤀᤠᤒᤠᤅᤣ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤂᤠᤶᤜᤡ᤺ᤰ ᤔᤧᤈᤢ᤺ᤳᤇᤡᤱᤗ ᤆᤠᤏᤧᤳᤋᤥ ᤕᤢᤱᤔᤠ ᤑᤠ᤹ᤀᤠᤱ ᤔᤧᤈᤢᤵᤛᤧ॥

² ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤗᤠᤶᤒᤠ ᤀᤣ᤺ᤰ ᤔᤧᤛᤧᤴᤇᤡᤱᤗ ᤔᤧᤘᤕᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤕᤧᤶᤛᤡᤱᤅᤠᤱ ᤀᤠᤒᤠᤅᤣ ᤔᤧᤈᤥᤃᤢᤒᤠ ᤏᤢ ᤂᤢᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤗᤠᤶ ᤔᤧᤜᤡᤴᤍᤧ॥

³ ᤂᤧᤱᤜᤠ᤹ ᤀᤠᤒᤠᤅᤣ ᤔᤧᤕᤧᤒᤧᤒᤠᤍᤧᤴᤏᤥ ᤔᤧᤕᤧᤶᤛᤡᤱ ᤜᤧᤰᤁᤩᤠᤱ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤏᤡᤴ ᤔᤧᤏᤡᤖᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤀᤠᤒᤠᤅᤣ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤖ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤆᤰᤔᤧᤸᤗ᤹ᤀᤣ ᤛᤠᤒᤴ ᤔᤧᤓᤴᤇᤡᤱᤅᤠᤱ ᤛᤧᤘᤠ ᤔᤧᤔᤧᤳᤋᤢᤀᤠᤱ ᤔᤧᤒᤳᤇᤧ॥

⁴ ᤀᤢᤘᤠ ᤆᤥ᤺ᤰᤔᤠᤍᤧᤴ ᤏᤠᤜᤠᤱᤛᤣ᤺ᤰᤁᤥ ᤁᤧᤕᤧᤵᤐᤠ ᤗᤧᤒᤡᤜᤠ᤹—ᤕᤣᤛᤢᤀᤠ. ᤒᤠᤏᤡ. ᤁᤠᤍᤔᤡᤀᤣᤗ. ᤛᤒᤏᤩᤠᤜ. ᤒᤢᤴᤏᤡ. ᤛᤖᤣᤒᤡᤕᤠᤜ. ᤒᤠᤏᤡ ᤏᤢ ᤁᤏᤠᤏᤡᤜᤠ᤹ ᤔᤧᤕᤧᤶᤛᤡᤱᤅᤠᤱ ᤕᤶᤒᤠ ᤀᤡᤰᤗᤠᤀᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤔᤧᤓᤠᤰᤋᤢ॥

⁵ ᤕᤣᤛᤢᤀ. ᤁᤠᤍᤔᤡᤀᤣᤗ. ᤒᤠᤏᤡ. ᤜᤛᤒᤏᤩᤠᤜ. ᤛᤖᤣᤒᤡᤕᤠᤜ. ᤜᤥᤍᤡᤕᤠᤜ. ᤛᤒᤏᤩᤠᤜ ᤜᤧᤰᤁᤩᤠᤱ ᤐᤋᤜᤡᤕᤠᤜ ᤗᤧᤒᤡᤜᤠ᤹ᤖᤧ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡᤖᤥ— “ᤕᤧᤒᤧᤶᤔᤧ᤹ᤀᤠᤱ ᤂᤡᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄ ᤛᤍᤠᤍᤡᤱᤗᤧ ᤗᤠᤃᤡ ᤂᤢᤏᤧ᤹ ᤁᤢᤏᤠᤖᤠ ᤑᤥᤛᤧᤶᤔᤧ᤹᥄ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤏᤠᤖᤠᤑᤥᤔᤠ ᤕᤠ᤺ᤶᤒᤰᤁᤡᤸᤗᤧ ᤂᤢᤏᤧ᤹ ᤐᤕᤶ ᤕᤶᤒᤠ ᤆᤥ᤺ᤰᤐᤠᤴ ᤗᤠ᤹ᤖᤢ ᤂᤧᤶᤍᤢᤒᤠᤃ ᤔᤣ᤺ᤴᤗᤥ. ᤜᤧᤰᤁᤣᤛᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤀᤡᤛ᤻ᤛᤣ᤺ᤱᤒᤠ ᤁᤢᤔᤡᤱᤅᤡᤴ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤥ॥”

ᤗᤠᤕᤥᤗᤠᤶ ᤏᤡᤱᤘᤠ᤹ᤗᤥᤔᤠ ᤐᤣᤗᤡ

⁶ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥᤃᤢᤖᤥ— “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ᤖᤰ ᤕᤜᤘᤣ ᤍᤠᤱᤒᤠ ᤁᤧᤘᤠ᤹ᤖᤥ. ᤂᤧᤏᤧ᤹ ᤂᤣᤛᤣ-ᤂᤣ᤺ᤶᤛᤡᤰᤐᤠᤜᤠ᤹. ᤋᤠᤱᤛᤠᤰᤐᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤁᤧᤈᤥᤃᤢᤖᤥ॥ ᤂᤧᤏᤧ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ. ᤘᤖ᤺ᤱᤜᤠ᤹ ᤏᤢ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤖᤧᤰ ᤁᤧᤈᤥᤃᤢᤛᤡᤖᤥ. ᤂᤧᤱᤜᤠ᤹ ᤁᤧᤖᤧᤰ ᤂᤧᤏᤧ᤹ ᤜᤡᤱᤔᤴ ᤁᤧᤒᤡᤖᤢᤛᤡᤖᤥ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤢᤰᤛᤠᤶᤜᤠ᤹ ᤀ᤺ᤰᤂᤢᤶ ᤔᤧᤒᤳᤋᤠᤱ ᤂᤧᤏᤧ᤹ ᤛᤧᤘᤠ ᤁᤧᤶᤔᤧᤳᤗᤥ॥

⁷ ᤂᤧᤏᤧ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ᥄ ᤂᤧᤏᤧ᤹ ᤀᤒᤪᤠᤶᤔᤡᤴ ᤁᤧᤛᤣᤃᤢᤀᤠᤱ ᤁᤸᤍᤡᤜᤠ᤹ᤖᤧ ᤂᤢᤏᤡ᤹ ᤀᤢᤖ ᤗᤠᤈᤣ᤹ᤗᤠᤶᤒᤠ ᤁᤧᤗ᤺ᤳᤋᤢᤀᤠᤱ ᤁᤧᤓᤧᤳᤋᤢᤖᤥ. ᤜᤧᤰᤁᤩᤠᤱ ᤁᤢᤔᤡᤱᤅᤡᤴ ᤁᤧᤗᤧᤰᤛᤢᤀᤠᤱ ᤂᤢᤏᤧ᤹ ᤀᤒᤪᤠᤜᤠᤔ ᤔᤡᤱ ᤁᤧᤘᤠ᤺ᤳᤋᤢᤖᤥ॥

⁸ ᤂᤢᤏᤧ᤹ ᤂᤧᤏᤧ᤹ᤏᤢ ᤀᤠᤒᤠᤅᤣ ᤏᤛᤠ᤺ᤴᤛᤠᤒᤠ ᤐᤥ᤺ᤰᤂᤧᤒᤠ ᤁᤧᤄᤥᤛᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤂᤢᤏᤧ᤹ᤏᤢ ᤗᤳᤇᤠ ᤔᤠᤱᤜᤢᤵ ᤌᤡᤰ ᤁᤧᤈᤥᤃᤢᤖᤥ॥ ᤂᤢᤏᤧ᤹ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤔᤧᤕᤢᤰᤋᤢᤖ ᤑᤠ᤹ᤀᤠᤱ ᤂᤧᤏᤧ᤹ ᤁᤏᤠᤏᤡ. ᤜᤡᤳᤋᤡ. ᤀᤣᤔᤥᤖᤡ. ᤐᤖᤡᤈ᤻ᤈᤡ. ᤕᤒᤢᤛᤡ ᤏᤢ ᤃᤡᤷᤃᤠᤛᤡᤜᤠ᤹ ᤔᤧᤕᤢᤅᤧᤒᤠ ᤗᤠᤈᤣᤴ ᤐᤡᤔᤠ ᤔᤠᤱᤜᤢᤵ ᤁᤧᤈᤥᤃᤢᤖᤥ. ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤁᤧᤖᤧᤰ ᤁᤧᤃᤧᤳᤋᤢᤖᤥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠᤶᤕᤥᤒᤠ ᤁᤧᤈᤥ᤺ᤰᤗᤥ॥

⁹ “ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤀᤥ ᤀᤠᤰᤋᤱᤒᤠ ᤋᤢᤰᤂᤣᤴ ᤔᤧᤍᤢᤔᤢᤀᤠᤱ ᤔᤧᤘᤕᤧ. ᤂᤧᤏᤧ᤹ ᤂᤧᤴ ᤁᤧᤏᤡᤛᤢᤀᤠᤱ ᤁᤧᤘᤕᤧᤖᤥ. ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤘᤠᤖ᤺ᤱᤅᤥ ᤂᤧᤱᤜᤠ᤹ᤖᤧ ᤀᤠᤓᤠ᤹ᤖᤧ᤹ ᤑᤠ᤹ᤀᤠᤱ ᤔᤧᤈᤥᤃᤢᤒᤠ ᤐᤣᤗᤡᤃᤧᤴ ᤋᤢᤘᤠᤴ ᤂᤧᤏᤧ᤹ ᤁᤧᤄᤧᤵᤛᤢᤖᤥ॥

¹⁰ ᤔᤡᤛᤪ ᤗᤠᤈᤣ᤹ᤒᤠ ᤑᤠᤖᤥ ᤜᤠᤱᤅᤡᤴ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ. ᤜᤧᤰᤁᤩᤠᤱ ᤁᤢᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤂᤧᤏᤧ᤹ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖᤥ ᤌᤣᤀᤠᤱᤓᤧᤸᤗᤧ ᤔᤡᤛᤪᤡᤜᤠ᤹ ᤀᤠᤱᤍᤡᤱ ᤔᤧᤗ᤹ᤖᤧᤖ ᤁᤧᤔᤏᤠᤜᤠ᤹ ᤔᤧᤄᤢᤶᤛᤢᤛᤡᤀᤠᤱ ᤔᤧᤘᤕᤧᤖᤥ. ᤂᤧᤏᤧ᤹ ᤂᤧᤴ ᤁᤧᤏᤡᤛᤢᤀᤠᤱ ᤁᤧᤘᤕᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤀᤠᤒᤠᤅᤣ ᤔᤡᤱᤛᤥ ᤀᤡᤱᤎᤠᤱ ᤁᤧᤄᤥᤛᤢᤖᤥ. ᤂᤧᤴ ᤀᤠᤀᤡᤴ ᤌᤠᤖᤡᤰ ᤀᤠᤶᤓᤠ ᤘᤠ᤹ᤖᤥ॥

¹¹ ᤂᤧᤏᤧ᤹ ᤘᤖ᤺ᤱᤅᤡᤴ ᤁᤢᤗᤢᤶᤔᤥ ᤂᤢᤴᤇᤡ᤹ ᤋᤃᤡ ᤜᤷᤃᤧ᤹ ᤁᤧᤓ᤺ᤰᤂᤢᤖᤥ ᤜᤧᤰᤁᤩᤠᤱ ᤁᤧᤔᤏᤠᤜᤠ᤹ ᤛᤧᤱᤛᤧᤱᤒᤠ ᤂᤠᤶᤒᤠᤱᤅᤥᤗᤠᤶ ᤏᤠᤎᤠ᤺ᤶᤒᤡ ᤁᤧᤍᤣ᤹ᤖᤢᤛᤡᤖᤥ॥ ᤁᤧᤔᤏᤠᤜᤠ᤹ ᤁᤧᤏᤠ᤺ᤵᤐᤠ ᤁᤧᤓᤧᤵᤐᤠᤜᤠ᤹ ᤃ ᤂᤧᤏᤧ᤹ ᤁᤢᤍᤡᤶᤒᤣ ᤁᤣ᤺ᤶᤒᤠ ᤆᤫᤠ᤺ᤳᤋᤥ ᤁᤧᤏᤡ᤺ᤵᤛᤢ ᤁᤧᤜᤢᤶᤛᤢᤛᤡᤖᤥ. ᤁᤧᤃᤢᤱᤒᤠ ᤆᤫᤠ᤺ᤳᤋᤥ ᤗᤢᤱᤅᤡᤴ ᤜᤢᤶᤗᤠ᤺ᤵᤐᤠ ᤁᤢᤀᤡᤛᤡᤰ. ᤁᤧᤍᤡᤶᤒᤠ ᤆᤫᤠ᤺ᤳᤋᤥ ᤂᤧᤱᤜᤠ᤹ ᤔᤧᤏᤡᤒᤧᤀᤠᤱ ᤔᤧᤛᤩᤧᤖᤥ॥

¹² ᤂᤧᤏᤧ᤹ ᤂᤧᤱᤜᤠ᤹ ᤗᤧᤴᤍᤡᤰ ᤂᤠ᤹ᤔᤡ᤺ᤵᤐᤠ ᤛᤡᤳᤗᤠᤱᤅᤡᤸᤗᤧ ᤜᤧᤰᤁᤩᤠᤱ ᤛᤧᤴᤍᤡᤰ ᤔᤡ ᤛᤡᤳᤗᤠᤱᤅᤡᤸᤗᤧ ᤗᤠᤶ ᤀᤥᤛᤣ᤺ᤴᤃᤧᤎᤠᤰᤋᤢᤛᤡᤀᤠᤱ ᤗᤠᤶᤃᤧᤗᤥᤛᤢᤛᤡᤖᤥ॥

¹³ “ᤛᤡᤏᤤ ᤁᤥ᤺ᤰᤔᤠᤀᤥ ᤂᤧᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤁᤧᤎᤠᤛᤡᤱ ᤁᤧᤕᤧᤖᤥ. ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤏᤠᤜᤠ᤹ᤏᤢ ᤋᤠ᤹ᤃᤧᤈᤧᤰᤂᤧᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤢᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤏᤢ ᤁᤧᤗᤠ᤹ᤒᤠ ᤏᤡᤛᤠᤶ ᤁᤧᤒᤡᤖᤢᤛᤡᤖᤥ॥

¹⁴ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠ ᤔᤥᤛᤠᤗᤠᤶᤒᤠ ᤂᤧᤱᤜᤠ᤹ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤛᤣᤛᤣ ᤁᤵᤔᤠ ᤁᤧᤜᤢ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤁᤧᤔᤏᤠᤜᤠ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱ ᤏᤢ ᤏᤡᤛᤠᤶᤜᤠ᤹ ᤁᤧᤒᤡᤖᤢᤛᤡᤖᤥ॥

¹⁵ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤂᤖᤧ᤺ᤱ ᤆᤠᤔᤠ ᤁᤧᤒᤡᤖᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤘᤠᤔᤡ᤺ᤰᤋᤧᤸᤗᤧ ᤐᤕᤶ ᤕᤶᤒᤠ ᤗᤢᤱᤅᤥᤏᤢ ᤆᤫᤠ᤺ᤳ ᤌᤢᤱᤔᤠ ᤁᤧᤒᤡᤖᤢᤛᤡᤖᤥ॥ ᤀᤠᤳᤋᤡᤴ ᤗᤠᤈᤣᤴ ᤂᤧᤱᤜᤠ᤹ ᤐᤡᤔᤠᤛᤡ ᤔᤠᤱᤜᤢᤵ ᤁᤧᤈᤥᤃᤢᤀᤠᤱ ᤘᤕᤧ. ᤂᤧᤴ ᤗᤠᤈᤣᤴ ᤕᤢᤰᤔᤠ ᤀᤡᤱᤈᤠᤱ ᤂᤧᤏᤧ᤹ ᤁᤧᤒᤡᤖᤢᤛᤡᤖᤥ॥

¹⁶ “ᤁᤖ ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ ᤀᤠᤱᤃᤠ᤹ᤀᤣ᤺ᤰ ᤁᤧᤗ᤹ᤒᤠ ᤏᤢ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤖᤥ. ᤜᤧᤰᤁᤩᤠᤱ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤏᤠ᤹ᤖᤢᤖᤥ॥

¹⁷ ᤂᤧᤱᤜᤠ᤹ᤖᤧ ᤁᤧᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤔᤧᤏᤡᤛᤢᤖ ᤁᤧᤈᤥᤃᤢᤒᤠ ᤁᤧᤖᤧᤰ ᤁᤧᤕᤠ᤺ᤶᤒᤰᤜᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤕᤠ᤺ᤶᤒᤰᤜᤠ᤹ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤖᤥ॥ ᤂᤧᤱᤜᤠ᤹ ᤀᤠᤒᤠᤅᤣ ᤀᤠᤱᤍᤡᤱ ᤔᤧᤗ᤹ᤖᤧᤀᤠᤱ ᤕᤠᤶᤔᤥ ᤔᤡᤛᤪ ᤗᤠᤈᤣ᤹ᤀᤥ ᤕᤥᤰ ᤐᤥᤱᤛᤧ ᤏᤢ᤺ᤱᤔᤠ ᤐᤣ᤺ᤰᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤗᤠᤶᤗᤥᤒᤠᤎᤡᤰ ᤔᤧᤛᤣᤃᤢᤖᤥ॥ ᤁᤖ ᤂᤧᤏᤧ᤹ ᤗᤧᤵᤔᤡ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤏᤢ ᤏᤢᤖᤡᤰ ᤀᤠᤔᤧᤵᤔᤧᤵᤐᤠ ᤜᤧᤰᤁᤩᤠᤱ ᤜᤠᤖᤠ ᤁᤢᤛᤡᤰ ᤔᤧᤶᤒᤥ᤺ᤰᤔᤏᤠᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ. ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤗᤥ. ᤂᤧᤱᤜᤠ᤹ ᤁᤧᤴᤏᤠ᤹ᤖᤢᤴᤛᤡᤴᤗᤥ॥

¹⁸ ᤂᤧᤱᤜᤠ᤹ᤖᤧ ᤗᤳᤇᤠ ᤐᤡᤳᤛᤠᤳ ᤏᤠᤘᤠᤀᤡᤳᤗᤠᤎᤡᤰ ᤔᤧᤎᤃᤢᤖᤥ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤁᤧᤗ᤺ᤵᤐᤠ ᤁᤧᤓᤧᤵᤐᤠ ᤔᤠᤱᤅᤡᤴ ᤜᤠᤒᤠ ᤁᤴᤗᤥ ᤔᤧᤔᤧᤳᤋᤢᤛᤡᤀᤠᤱ ᤂᤧᤴᤏᤡᤴ ᤛᤧᤘᤠ ᤔᤧᤔᤧᤳᤋᤢᤖᤥ॥ ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤁᤧᤈᤠ᤺ᤳᤌᤡ ᤔᤧᤍᤣᤛᤢ᥄

¹⁹ “ᤜᤧᤰᤁᤣᤛᤠᤱ ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥᤛᤠ ᤗᤠᤵᤁᤧᤶᤓᤢᤛᤢᤴᤛᤡᤴᤗᤥ. ᤂᤧᤱᤜᤠ᤹ ᤗᤠᤶ ᤀᤥᤛᤣ᤺ᤴᤃᤧᤎᤠᤰᤐᤠ ᤗᤧᤴᤍᤡᤰ ᤂᤠ᤹ᤔᤡ᤺ᤵᤐᤠ ᤛᤡᤳᤗᤠᤱᤅᤡᤴ ᤏᤢ ᤛᤧᤴᤍᤡᤰ ᤁᤧᤀᤥ᤺ᤵᤐᤠ ᤔᤡ᤺ᤸᤗᤧ ᤛᤡᤳᤗᤠᤱᤅᤡᤴ ᤂᤧᤏᤧ᤹ ᤁᤧᤱᤄᤧᤳᤋᤢᤴ ᤁᤧᤴᤍᤣᤛᤢᤸᤗᤥ॥

²⁰ ᤛᤍᤠᤍᤡᤱᤒᤠ ᤏᤢᤒᤠ ᤁᤧᤕᤠᤶᤛᤠᤶᤗᤠᤶ ᤂᤧᤱᤜᤠ᤹ ᤏᤡᤛᤠᤶ ᤁᤧᤒᤡᤖᤢᤛᤡᤖᤥ. ᤆᤠᤔᤠᤖᤧ ᤗᤠᤃᤡ ᤔᤴᤏ ᤏᤢ ᤌᤢᤱᤔᤠᤖᤧᤗᤠᤃᤡ ᤆᤫᤠ᤺ᤳ ᤁᤧᤒᤡᤖᤢᤛᤡᤖᤥ॥

²¹ ᤗᤡᤒᤥᤱ ᤋᤱᤒᤣ ᤌᤠᤖᤡᤰ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤏᤥ ᤁᤶᤒᤪᤠᤱ ᤁᤧᤔᤧᤳᤋᤢᤛᤡᤖᤥ. ᤂᤧᤱᤜᤠ᤹ ᤆᤠᤜᤠᤒ᤻ ᤔᤧᤈᤥᤃᤧᤒᤠ ᤐᤠ᤺ᤴᤜᤠ᤹ ᤆᤰᤔᤧᤴᤗ᤹ᤀᤣ ᤁᤧᤒᤡᤖᤢᤛᤡᤀᤠᤱ ᤁᤧᤒᤳᤇᤧᤖᤥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤠᤱᤍᤣ᤺ᤳᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤍᤧ᤺ᤰᤂᤧᤴᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤱᤜᤠ᤹ ᤔᤧᤜᤔᤧᤸᤗᤥ॥

²² “ᤂᤧᤏᤧ᤹ ᤂᤧᤱᤜᤠ᤹ ᤀᤣᤕᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹. ᤜᤠᤱᤈᤢᤶᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡ᤺ᤴᤍᤥᤜᤠ᤹ᤖᤧ ᤁᤢᤒᤣᤛᤠᤱᤒᤠ ᤗᤠᤈᤣ᤹ᤜᤠ᤹ᤀᤠᤱ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤒᤡᤖᤢᤛᤡᤖᤥ॥ ᤛᤡᤜᤥᤏ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ ᤜᤣᤛ᤻ᤒᤥᤏᤧᤴ ᤜᤧᤰᤁᤩᤠᤱ ᤀᤥᤃ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ ᤒᤠᤛᤠᤏᤧᤴ ᤂᤧᤱᤜᤠ᤹ᤖᤧ ᤔᤧᤏᤠ᤺ᤴᤍᤢᤖᤥ॥

²³ ᤂᤧᤏᤧ᤹ ᤂᤧᤱᤜᤠ᤹ ᤋᤠᤱᤛᤠᤰᤐᤥᤒᤠ ᤂᤣᤛᤣᤒᤠᤜᤠ᤹ ᤁᤢᤀᤡᤛᤡ᤺ᤰᤁᤣ ᤏᤡ᤺ᤳᤔᤧᤴᤍᤧᤳ ᤔᤢ᤹ᤀᤡᤍᤠᤱᤛᤠ ᤁᤧᤒᤡᤖᤢᤛᤡᤖᤥ. ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤏᤡᤱ ᤑᤠ᤹ᤀᤠᤱ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤗᤠᤈᤣᤴ ᤂᤧᤱᤜᤠ᤹ᤖᤧ ᤔᤧᤏᤠ᤺ᤴᤍᤢᤀᤠᤱ ᤂᤧᤵᤔᤥ ᤔᤧᤕᤢᤅᤧᤖᤥ॥

²⁴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ ᤂᤧᤵᤔᤥ ᤔᤧᤗᤠᤛᤧᤀᤠᤱ ᤁᤏᤠᤏ ᤗᤠᤈᤣᤴ ᤔᤧᤏᤠ᤺ᤴᤍᤢᤖᤥ. ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤂᤧᤵᤔᤥᤒᤠ ᤔᤏᤠᤜᤠ᤹ ᤌᤱ ᤔᤧᤏᤠ᤺ᤴᤍᤢᤛᤡᤖ ᤁᤧᤕᤠ᤺ᤴᤍᤢᤛᤡᤖᤥ॥ ᤂᤧᤏᤧ᤹ ᤁᤧᤔᤏᤠ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤏᤡᤱᤘᤠ᤹ ᤁᤢᤀᤡᤛᤡᤰ ᤆᤥ᤺ᤰᤔᤠᤖᤧ ᤗᤠᤃᤡ. ᤁᤏᤠᤏᤒᤠ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹. ᤁᤧᤔᤏᤠᤜᤠ᤹ ᤜᤢᤰᤁᤧᤛᤢᤵᤋᤢᤛᤡᤖᤥ॥

²⁵ ᤁᤧᤔᤏᤠᤜᤠ᤹ᤖᤧ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤁᤒᤢᤒᤠ ᤕᤧᤰᤕᤰᤜᤠ᤹. ᤆᤠ ᤁᤧᤏᤢ᤹ᤒᤠ ᤂᤠᤶᤒᤣ᤺ᤰᤔᤠᤴ ᤏᤢ ᤕᤠᤱᤛᤠᤁᤢᤴᤎᤣᤖᤧ ᤛᤎᤧᤰ ᤁᤧᤍᤡᤶᤒᤠ ᤜᤡᤶᤜᤠ᤹. ᤔᤧᤍᤕᤢᤀᤠᤱ ᤁᤧᤏᤧᤒᤠ ᤘᤒᤠᤰ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤢ ᤘᤣ᤹ ᤛᤡᤱᤛᤣ᤹ ᤐᤢᤱᤜᤠ᤹ᤖᤧ ᤁᤢᤗᤧ᤺ᤶ ᤁᤧᤍᤡᤶᤒᤠ ᤛᤡᤱᤛᤣ᤹ ᤀᤡᤰᤋᤠᤵᤜᤠ᤹. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤂᤢᤏᤡ᤹ ᤜᤢᤰᤁᤥ ᤔᤧᤎᤠᤛᤢᤖᤥ॥ ᤂᤠᤄᤠ ᤔᤧᤈᤀᤠᤱ ᤂᤧᤱᤜᤠ᤹ ᤔᤧᤔᤧ᤹ᤖᤧᤖᤥ. ᤂᤧᤏᤧ᤹ ᤁᤧᤖᤧᤰ ᤐᤠ᤺ᤴᤏᤥ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤕᤧᤕᤧ ᤔᤧᤗ᤹ᤖᤧᤖᤥ॥

²⁶ “ᤁᤖ ᤁᤧᤔᤏᤠᤜᤠ᤹ᤖᤧ ᤐᤡᤑᤩᤢᤱ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠ ᤔᤧᤴᤏᤠ᤺ᤵᤔᤏᤠ ᤔᤧᤒᤥ᤺ᤰᤂᤧᤖᤥ. ᤂᤧᤏᤧ᤹ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤗᤠᤶᤒᤠ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤖᤠᤴ ᤔᤧᤜᤡᤛᤢᤖᤥ॥ ᤂᤧᤏᤧ᤹ ᤗᤧᤵᤔᤠᤱ ᤏᤢ᤺ᤱᤔᤠ ᤑᤠ᤹ᤀᤠᤱ ᤐᤠᤴ ᤁᤧᤔᤧᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤛᤧᤖᤢᤛᤡᤖᤥ. ᤕᤧᤳᤗᤧᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤈᤠ᤺ᤳᤌᤡ ᤔᤧᤍᤣᤛᤢᤖᤥ॥

²⁷ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡᤖ ᤁᤧᤕᤠ᤺ᤴᤍᤢᤛᤡᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤂᤧᤱᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤖ ᤁᤧᤈᤥᤃᤢᤖᤥ॥ ᤂᤧᤱᤜᤠ᤹ ᤕᤧᤳᤋᤢᤰᤂᤣ ᤔᤧᤈᤩᤧᤒᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤐᤣᤗᤡᤃᤧᤴ ᤋᤢᤘᤠ ᤁᤧᤶᤈᤥᤃᤧᤖᤥ. ᤛᤠᤱᤃᤪᤠᤶᤐᤣᤍᤠᤱᤗᤠᤶᤒᤠ ᤂᤧᤏᤧ᤹ ᤏᤢᤃᤵ ᤁᤧᤒᤡᤖᤢᤛᤡᤖᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤗᤥ ᤂᤧᤱᤜᤠ᤹ ᤏᤡᤱᤔᤡᤜᤠ᤹ᤗᤠᤶᤒᤠ ᤋᤠᤱᤛᤧ᤺ᤵᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤋᤠᤱᤀᤠᤛᤧ᤺ᤵᤛᤧ᤺ᤵᤐᤠ ᤗᤠᤶᤗᤥᤒᤠᤜᤠ᤹ ᤁᤧᤒᤠᤱᤄᤢᤛᤡᤖᤥ॥

²⁸ “ᤛᤏᤠᤖᤢᤱ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤏᤡᤔᤥ ᤗᤠᤕᤥ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤕᤠᤶᤔᤥ ᤂᤧᤱᤜᤠ᤹ ᤂᤢᤏᤡ᤹ ᤏᤡᤱᤔᤡᤜᤠ᤹ᤖᤧ ᤔᤧᤏᤠ᤺ᤴᤍᤢᤛᤡᤀᤠᤱ ᤕᤢᤰᤁᤥ ᤔᤧᤃᤳᤋᤢᤛᤡᤖ ᤁᤧᤈᤥᤃᤢᤖᤥ॥ ᤁᤖ ᤂᤧᤱᤜᤠ᤹ ᤕᤠᤶᤔᤥ ᤗᤠᤕᤥ ᤆᤥ᤺ᤰᤔᤠ ᤔᤧᤜᤡᤴᤍᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤜᤠᤒᤧ ᤔᤧᤓᤡ᤺ᤰᤋᤧᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤧᤏᤧ᤹ ᤁᤧᤄᤧᤵᤛᤢᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤛᤠ᤹ᤖᤡᤰ ᤕᤠᤵᤔᤡ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤕᤧᤳᤗᤧᤱ ᤕᤧᤳᤗᤧᤱ ᤋᤠᤱᤃᤧᤛᤧ᤺ᤵᤋᤢᤛᤡᤖᤥ॥

²⁹ ᤂᤧᤏᤧ᤹ ᤁᤧᤏᤡᤛᤠᤶᤔᤡᤴ ᤀᤡ᤺ᤳᤋᤧᤶᤔᤧ᤹ ᤏᤠ᤺ᤳᤋᤧᤶᤔᤧ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤛᤠᤶᤍᤡᤱ ᤁᤧᤒᤡᤖᤢᤛᤡᤖᤥ. ᤁᤖ ᤀᤠᤱᤍᤡᤱ ᤔᤧᤗ᤹ᤖᤧᤀᤠᤱ ᤂᤧᤱᤜᤠ᤹ᤖᤧ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤗᤠᤵᤔᤧᤓᤢᤛᤢᤖᤥ॥ ᤂᤧᤏᤧ᤹ ᤁᤧᤄᤠᤛᤧᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤴᤏᤣ ᤜᤡᤱᤔᤴᤗᤧ ᤗᤠᤶ ᤂᤥᤔᤠᤖᤥ॥ ᤁᤖ ᤂᤧᤱᤜᤠ᤹ ᤀᤠᤎᤡᤱᤃᤠᤏᤡ ᤏᤢ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤂᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤸᤗᤥ॥

³⁰ ᤕᤖᤡᤰ ᤋᤱᤒᤣ ᤌᤠᤖᤡᤰ ᤂᤧᤏᤧ᤹ ᤂᤧᤱᤜᤠ᤹ ᤏᤠᤛᤡ ᤁᤧᤎ᤺ᤳᤋᤢᤛᤡᤀᤠᤱ ᤛᤠᤶᤍᤡᤱ ᤁᤧᤒᤡᤖᤢᤛᤡᤖᤥ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤁᤧᤕᤠᤶᤛᤠᤶᤔᤡᤸᤗᤧ ᤂᤧᤱᤜᤠ᤹ ᤛᤠᤶᤍᤡᤱ ᤁᤧᤒᤡᤖᤢᤛᤡᤖᤥ. ᤁᤖ ᤁᤧᤔᤏᤠᤜᤠ᤹ ᤀᤠᤒᤠᤅᤣ ᤏᤠᤎᤧᤰᤁᤪᤧᤱ ᤔᤧᤈᤥᤰᤛᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡᤖ ᤁᤧᤕᤠ᤺ᤴᤍᤢᤛᤡᤖᤥ॥

³¹ ᤂᤧᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤂᤧᤱᤜᤠ᤹ ᤁᤧᤴᤏᤠ᤹ᤖᤢᤴᤛᤡᤴ. ᤁᤧᤶᤔᤧᤰᤂᤢᤴᤛᤡᤸᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤠᤵᤔᤡ ᤗᤢᤱᤔᤠ᤹ ᤀᤠᤍᤢᤰᤋᤢᤰᤐᤠ ᤏᤢ ᤁᤧᤏᤢ᤹ᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ᥄

³² “ᤂᤧᤏᤧ᤹ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ᥄ ᤂᤧᤏᤧ᤹ᤃ ᤐᤕᤶ ᤕᤶᤒᤠ. ᤁᤡᤵᤔᤠ ᤁᤧᤄᤢᤒᤠ ᤏᤢ ᤔᤢᤰᤁᤧᤃᤢᤒᤠ ᤏᤡᤱᤘᤠ᤹ᤑᤢᤔᤠᤱᤏᤧᤖᤥ᥄ ᤂᤧᤏᤧ᤹ ᤔᤠᤱᤜᤢᤵ ᤁᤧᤈᤥᤃᤢᤒᤠᤴ ᤀᤠᤒᤠᤅᤣ ᤁᤧᤃᤧᤳᤋᤢᤖᤥ. ᤀᤛ᤻ᤛᤢᤖᤒᤠ ᤜᤠᤱᤜᤠ᤹ᤖᤧ ᤀᤠᤏᤡᤃᤣ ᤕᤠᤵᤔᤡ ᤂᤢᤶᤔᤠ ᤔᤧᤜᤣ᤺ᤰᤋᤡᤃᤧᤒᤠ ᤕᤧᤶᤔᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤀᤠᤏᤡᤃᤣ ᤛᤠ᤹ᤖᤡᤰ ᤋᤢᤰᤂᤣ ᤆᤩᤧ᤹ᤀᤡᤃᤧᤀᤠᤱ ᤘᤠ᤹ᤖᤥ᥄ ᤀᤠᤏᤡᤃᤣ ᤜᤠᤱᤜᤠ᤹. ᤗᤠᤶᤗᤥᤒᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤐᤠᤎᤧᤒᤠᤜᤠ᤹ ᤏᤢ ᤀᤠᤏᤡᤃᤣ ᤁᤧᤖᤧᤰ ᤁᤧᤔᤏᤠᤜᤠ᤹ᤖᤧ ᤋᤢᤰᤂᤣ ᤋᤢᤔᤢᤶᤒᤧᤀᤠᤱ ᤘᤠ᤹ᤖᤥ. ᤀᤠᤏᤡᤃᤣ ᤛᤠ᤹ᤖᤡᤰ ᤋᤢᤰᤂᤣ ᤆᤠᤔᤏᤠᤀᤠᤱ ᤘᤠ᤹. ᤂᤧᤏᤧ᤹ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ᥄

³³ ᤂᤧᤏᤧ᤹ ᤀᤠᤏᤡᤃᤣ ᤕᤠᤵᤔᤡ ᤂᤢᤶᤍᤡᤱ ᤁᤧᤒᤡᤖᤧᤀᤠᤱ ᤁᤧᤘᤠ᤹ᤒᤠ ᤐᤠᤴ ᤁᤧᤈᤥᤃᤢᤖᤥ. ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤛᤠᤱ ᤂᤧᤏᤧ᤹ ᤏᤛᤠ᤺ᤴᤛᤠᤒᤠᤀᤣ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ᤖᤥ॥

³⁴ ᤀᤠᤏᤡᤃᤣ ᤜᤠᤱ. ᤗᤠᤶᤗᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ. ᤜᤧᤰᤁᤩᤠᤱ ᤐᤠᤎᤧᤒᤠᤜᤠ᤹ᤖᤧᤀᤠᤱ ᤁᤧᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤸᤗᤥ. ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤜᤧᤰᤁᤩᤠᤱ ᤁᤧᤛᤠᤶᤍᤡᤱᤜᤠ᤹ ᤔᤧᤱᤄᤧᤵᤛᤢᤴᤗᤥ॥

³⁵ ᤂᤧᤱᤜᤠ᤹ ᤂᤢᤏᤡ᤹ ᤜᤠᤱᤈᤢᤶᤔᤥ ᤔᤧᤘᤕᤧᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤏᤢ᤹ᤒᤠ ᤁᤧᤈᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤁᤧᤒᤡᤖᤢᤛᤡᤒᤠ ᤑᤧᤓᤧᤒᤠ. ᤆᤠᤃᤧᤏᤢ᤹ᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤕᤢᤅᤧᤖᤥ. ᤁᤖ ᤗᤠᤕᤥ ᤆᤥ᤺ᤰᤔᤠ ᤔᤧᤸᤗᤧᤖᤢᤴ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤧᤘᤠ ᤔᤧᤴᤈᤥᤃᤢᤸᤗᤥ॥

³⁶ “ᤀᤥᤔᤧᤳᤋᤧ᤹ᤀᤥ ᤀᤠᤸᤗᤥ. ᤀᤠᤏᤡᤃᤣ ᤕᤥᤰ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ. ᤂᤧᤏᤧ᤹ ᤀᤠᤏᤡᤃᤣ ᤌᤠ᤺ᤰᤌᤧᤒᤠᤜᤠ᤹ ᤁᤧᤒᤡᤖᤢᤛᤡᤒᤠ ᤗᤠᤈᤣ᤹. ᤀᤠᤏᤡᤃᤣ ᤁᤢᤈᤠ ᤁᤧᤒᤡᤒᤠ ᤁᤴ ᤆᤠᤃᤧᤏᤢ᤹ᤒᤠ ᤏᤢᤒᤠ ᤂᤠᤶᤔᤥ ᤀᤠᤏᤡᤃᤣ ᤕᤥᤰ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧᤖᤥ॥

³⁷ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧᤸᤗᤧ ᤀᤠᤏᤡᤃᤣ ᤛᤶᤎᤠᤱ ᤕᤢᤰ ᤆᤥ᤺ᤰᤔᤠ ᤁᤧᤒᤠᤱᤄᤢᤛᤡᤒᤠ ᤜᤠᤱᤜᤠ᤹ᤀᤥ. ᤀᤠᤏᤡᤃᤣ ᤗᤠᤈᤣ᤹ᤀᤥ ᤁᤧᤎᤥ᤺ᤰᤐᤠ ᤁᤧᤖᤧᤰ ᤁᤢᤈᤠᤜᤠ᤹ ᤐᤣ᤺ᤰᤗᤥ॥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤏᤡᤱᤘᤠ᤹ ᤜᤧᤰᤁᤣ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤌᤰᤛᤠᤜᤠ᤹ᤀᤥ ᤂᤢᤏᤡ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤕᤶᤒᤠ ᤕᤧᤳᤋᤢᤰᤂᤣᤀᤥ ᤀᤠᤏᤡᤃᤣ ᤌᤩᤧ᤹ᤀᤡᤃᤧᤀᤠᤱ ᤕᤠᤃᤡᤃᤧᤖᤥ᥄”

³⁸ “ᤁᤴ ᤁᤧᤖᤧᤰ ᤐᤥ᤺ᤰᤂᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡᤃᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤇᤡᤱᤔᤏᤠᤀᤠᤱ ᤁᤴ ᤛᤠᤵᤗᤠᤴ ᤛᤠᤵᤔᤏᤠ ᤜᤧᤰᤁᤩᤠᤱ ᤀᤠᤏᤡᤃᤣ ᤗᤠᤶᤗᤥᤒᤠ. ᤗᤧᤒᤡ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤁᤵᤔᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤖᤥ॥”