ᤏᤜᤣᤔᤩᤠᤜ 8 - LIFOTNT

ᤀᤧᤈᤪᤠ ᤏᤢ ᤛᤠᤶᤕᤥᤌᤡᤶ ᤀᤡᤱᤈᤠᤱ

¹ ᤏᤢᤛᤡ ᤗᤠ ᤋᤥ᤹ᤖᤢᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤠᤒᤠᤅᤣ ᤂᤢᤏᤡ᤹ ᤕᤧᤰᤕᤰᤜᤠ᤹ᤀᤥ ᤕᤢᤱᤔᤠ ᤔᤧᤜᤣ᤺ᤰᤋᤧᤀᤠᤱ ᤘᤕᤧ॥ ᤂᤧᤱᤜᤠ᤹ ᤁᤧᤖᤧᤰ ᤕᤖᤢᤛᤗᤧ᤺ᤶᤔᤥ ᤆᤫᤠ᤺ᤳ ᤗᤠᤶᤎᤣ᤺ᤵᤐᤠᤸᤗᤧ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤈᤢᤵᤛᤧ॥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤸᤗᤧ ᤁᤢᤜᤢᤰᤗᤠᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤛᤠᤵᤐᤴᤏᤡᤴ ᤛᤠᤶᤕᤥᤌᤡᤶᤛᤠᤶᤒᤠ ᤀᤧᤈᤪᤠᤴ ᤂᤧᤱᤜᤠ᤹ᤖᤧ ᤋᤠ᤺ᤵᤔᤠ ᤔᤧᤒᤠᤱᤄᤢ॥

² ᤁᤸᤗᤧᤆᤥᤃᤢᤸᤗᤧ ᤏᤢᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤁᤧᤈᤢᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤔᤧᤴᤇᤢᤔᤠ ᤕᤧᤶᤒᤡᤳᤇᤠ᤹ ᤏᤢ ᤂᤧᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤐᤠ ᤜᤡᤴᤈᤠ᤹ᤒᤡᤳᤇᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠ᤺ᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐᤴᤏᤡᤴ ᤋᤠᤖᤢ॥

³ ᤂᤧᤵᤔᤥ ᤗᤰᤂᤢᤶᤔᤥᤒᤠ ᤆᤫᤠ᤺ᤳ ᤗᤠᤶᤎᤣ᤺ᤵ ᤐᤣᤛᤠᤱ ᤋᤠᤏᤠᤶ ᤏᤠᤶ ᤁᤧᤖᤧᤀᤠᤱᤎᤥ ᤗᤧᤴᤈᤥ ᤌᤠᤖᤡᤰ ᤔᤧᤴᤇᤢᤔᤠ ᤕᤧᤶᤒᤡᤳᤇᤠ ᤏᤢ ᤂᤧᤴ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤐᤠᤜᤠ᤹ ᤀᤧᤈᤪᤠ᤺ᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡᤖᤢᤐᤡᤖᤢᤛᤡ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤔᤧᤄᤧᤵᤛᤢ॥

⁴ ᤂᤧᤸᤗᤧ ᤗᤠᤃᤡ ᤂᤧᤵᤔᤥ ᤗᤳᤇᤠ ᤛᤡᤱᤅᤡᤸᤗᤧᤴ ᤀᤢᤘᤠ ᤆᤥ᤺ᤰᤔᤠᤍᤧᤴᤎᤡᤰ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ ᤜᤧᤰᤁᤩᤠᤱ ᤀᤧᤈᤪᤠᤴ ᤂᤧᤴ ᤛᤡᤱᤅᤡᤸᤗᤧᤴ ᤀᤢᤘᤠ ᤆᤥ᤺ᤰᤔᤠᤍᤧᤴ ᤛᤶᤎᤠᤱ ᤕᤧᤶᤛᤡᤱ॥ ᤂᤢᤏᤧ᤹ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤔᤳᤋᤡᤋᤩᤠᤜ. ᤛᤣᤔᤠ. ᤀᤏᤠᤕᤠᤜ. ᤀᤢᤖᤡᤕᤠᤜ. ᤜᤡᤸᤁᤡᤕᤠᤜ. ᤔᤠᤛᤣᤕᤠᤜ ᤏᤢ ᤁᤢᤓᤧᤴᤇᤠᤱ ᤗᤧᤵᤔᤠᤱ ᤐᤍᤠᤕᤠᤜ. ᤔᤡᤛᤠᤀᤣᤗ. ᤔᤸᤁᤡᤕᤠᤜ. ᤜᤠᤛᤢᤔ. ᤜᤛᤒᤍᤠᤏᤠ. ᤈᤁᤖᤡᤕᤠ ᤏᤢ ᤔᤛᤢᤸᤗᤠᤔᤛᤡ ᤔᤧᤕᤧᤒᤧ॥

⁵ ᤀᤧᤈᤪᤠᤴ ᤀᤢᤘᤠ ᤆᤥ᤺ᤰᤔᤠᤍᤧᤴᤏᤥ ᤕᤧᤒᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤀᤍᤰᤋᤰ ᤗ᤹ᤖᤡᤰ ᤀᤥᤔᤧᤔᤧᤳᤋᤢᤀᤠᤱ ᤔᤧᤒᤳᤇᤧ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤆᤠᤱᤈᤠᤱᤒᤠᤍᤧᤴᤏᤥ ᤕᤧᤒᤧ॥ ᤂᤢᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤛᤠᤵᤐ᤺ᤴᤏᤧᤴ ᤜᤴᤍᤢᤏᤢᤔᤧ᤺ᤴᤏᤣ ᤔᤏᤠᤜᤠ᤹ ᤔᤧᤒᤥᤃᤧᤀᤠᤱ ᤔᤧᤕᤧᤶᤛᤡᤱ॥

⁶ ᤀᤧᤈᤪᤠ᤺ᤸᤗᤧ ᤕᤜᤘᤣ ᤍᤠᤱᤒᤠ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤢ. ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤡᤴ ᤌᤠ᤺ᤱ ᤔᤧᤓᤥᤰᤂᤢᤀᤠᤱ “ᤀᤠᤔᤡᤴ ᤀᤠᤔᤡᤴ” ᤔᤧᤒᤠ᤺ᤳᤋᤢ॥ ᤂᤧᤱᤜᤠ᤹ ᤂᤠᤶᤒᤠᤱᤅᤥ ᤌᤠᤖᤡᤰ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤘᤠ ᤔᤧᤔᤧᤳᤋᤢ॥

⁷ ᤕᤣᤛᤢᤀᤠ. ᤒᤠᤏᤡ. ᤛᤖᤣᤒᤡᤕᤠᤜ. ᤕᤠᤔᤡᤏ. ᤀᤰᤁᤢᤒ. ᤛᤒ᤻ᤒᤋᤤ. ᤜᤥᤍᤡᤕᤠᤜ. ᤔᤠᤛᤣᤕᤠᤜ. ᤁᤗᤡᤋᤠ. ᤀᤈᤷᤕᤠᤜ. ᤕᤥᤈᤠᤒᤠᤍ. ᤜᤠᤏᤠᤏ ᤜᤧᤰᤁᤩᤠᤱ ᤐᤗᤕᤠᤜ ᤔᤡᤱ ᤁᤧᤘᤠ᤺ᤵᤐᤠ ᤗᤧᤒᤡᤜᤠ᤹ᤖᤧ ᤂᤧᤱᤜᤠ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤁᤢᤒᤣᤴ ᤔᤧᤜᤴᤍᤢ ᤔᤧᤒᤡᤖᤢᤛᤡ॥

⁸ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤢᤖᤡᤰ ᤔᤧᤏᤡᤖᤢᤀᤠᤱ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤁᤢᤒᤣ ᤔᤧᤜᤴᤍᤢ ᤔᤧᤒᤡᤖᤢᤛᤡ॥

⁹ ᤜᤧᤰᤁᤩᤠᤱ ᤜᤠᤱᤕᤢᤰᤐᤠ ᤏᤜᤣᤔᤩᤠᤜ. ᤛᤠᤶᤕᤥᤌᤡᤶᤛᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠ ᤏᤢ ᤏᤡᤛᤠᤶ ᤁᤧᤜᤢ᤹ᤒᤠᤖ ᤁᤧᤒᤵᤐᤠ ᤗᤧᤒᤡᤜᤠ᤹ᤖᤧ ᤂᤧᤱᤜᤠ᤹ ᤁᤧᤖᤧᤰ ᤔᤧᤔᤧᤳᤋᤢᤛᤡ. “ᤀᤠᤀᤡᤴᤒᤠ ᤕᤧᤴᤏᤡᤴ ᤀᤠᤏᤡ᤹ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤛᤣᤛᤣ ᤆᤥᤰ॥ ᤀᤠᤀᤡᤴ ᤂᤡᤏᤡ᤹ ᤜᤠ᤺ᤵᤔᤠ ᤑᤡ᤺ᤰᤔᤠ ᤔᤧᤏᤢ᤹ᤏᤧᤴ॥” ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤐᤠ᤺ᤴᤈᤠ᤺ᤰᤁᤡᤴ ᤔᤧᤄᤧᤵᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤧᤜᤠᤒᤧᤖ ᤔᤧᤕᤧᤒᤧ॥

¹⁰ ᤂᤧᤒᤩᤠᤱ ᤏᤜᤣᤔᤩᤠᤜ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗ ᤂᤡᤏᤡ᤹ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤛᤠᤓ᤺ᤱᤈᤠ ᤛᤧᤛᤧᤶᤔᤧ᤹ᤀᤠᤱ ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠ ᤆᤧᤶᤔᤧ ᤌᤢᤅᤧᤶᤔᤧ᤹॥ ᤁᤢᤈᤠ ᤔᤧᤱᤃᤵᤔᤏᤠᤒᤠᤜᤠ᤹ ᤂᤢᤴᤇᤡ᤹ ᤋ᤺ᤰ ᤗᤰ ᤜᤠᤰᤋᤠᤶᤛᤡᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤠᤀᤡᤴᤒᤠ ᤕᤧᤴᤏᤡᤴ ᤛᤣᤛᤣᤒᤠ ᤆᤥᤰ॥ ᤂᤧᤸᤗᤧᤆᤥᤃᤢᤸᤗᤧ ᤔᤧᤖᤡᤱ ᤔᤧᤎᤰᤋᤧᤶᤔᤡᤴᤏᤧ᤹ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤧᤛ᤺ᤳᤋᤡᤖ ᤁᤧᤕᤠ᤺ᤴᤍᤡᤒᤠ ᤐᤠ᤺ᤴᤏᤡᤸᤗᤧ ᤂᤡᤏᤡ᤹ ᤁᤧᤎᤢᤶᤒᤠ ᤁᤧᤒᤥᤰᤂᤡᤖᤥ॥”

¹¹ ᤗᤧᤒᤡᤜᤠ᤹ᤖᤧ ᤂᤧᤱᤜᤠ᤹ ᤆᤡᤈᤡ ᤕᤧᤶᤕᤧᤶ ᤔᤧᤈᤥᤃᤢᤛᤡᤀᤠᤱ ᤔᤧᤔᤧᤳᤋᤢᤛᤡ. “ᤛᤫᤠ᤺ᤳ ᤕᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤀᤠᤀᤡᤴᤒᤠ ᤕᤧᤴᤏᤡᤴ ᤛᤣᤛᤣ ᤆᤥᤰ॥ ᤂᤡᤏᤡ᤹ ᤔᤧᤜᤠᤒᤧᤶᤔᤡᤴᤏᤧ᤹॥”

¹² ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤆᤠᤛᤧ ᤌᤢᤱᤛᤧ. ᤘᤣ᤹ᤜᤠ᤹ ᤁᤢᤈᤠ ᤗᤰ ᤜᤠᤰᤛᤧ. ᤜᤧᤰᤁᤩᤠᤱ ᤕᤶᤒᤠ ᤛᤥᤛᤥᤳᤗᤖᤠᤱ ᤆᤥ᤺ᤰᤛᤧ ᤔᤧᤒᤣ. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤔᤧᤏᤡᤖᤢᤀᤠᤱ ᤂᤧᤶᤔᤧᤒᤠᤱᤄᤢᤛᤡᤒᤠ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ॥

¹³ ᤁᤢᤍᤠ᤺ᤴᤍᤡᤰᤛᤔᤠ ᤌᤠ᤺ᤰᤌᤠ᤺ᤰᤁᤥᤒᤠ ᤋᤢᤶᤓᤠᤰᤐᤠᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤏᤡᤛᤠᤶ ᤏᤡ᤺ᤵᤔᤠᤖᤧ ᤗᤠᤃᤡ ᤛᤠᤶᤕᤥᤌᤡᤶᤛᤠᤶᤒᤠ ᤀᤧᤈᤪᤠᤀᤥ ᤔᤧᤒᤣ॥

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤗᤠᤶᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱ ᤐᤡᤖᤢᤛᤡᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢ. ᤏᤢᤛᤡᤃᤣᤰᤐᤠ ᤗᤠᤀᤥ ᤁᤧᤍᤠᤒᤠ ᤋᤱᤏᤠᤶᤔᤥ ᤁᤢᤓᤠ ᤕᤧᤴᤗᤧ ᤗᤠᤃᤡ ᤀᤡᤛᤪᤠᤀᤡᤗᤡᤜᤠ᤹ ᤛᤠ᤺ᤱᤃᤠᤜᤡᤶ ᤕᤢᤱᤔᤠ ᤁᤧᤒᤥᤱᤒᤠ ᤘᤕᤧ॥

¹⁵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤕᤧᤰᤕᤰᤜᤠ᤹ᤀᤥ ᤏᤢ ᤕᤖᤢᤛᤗᤧ᤺ᤶᤔᤥ ᤁᤴ ᤐᤠ᤺ᤴᤏᤡᤴ ᤀᤢᤘᤠ ᤆᤥ᤺ᤰᤔᤠ ᤐᤥᤱ ᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ—“ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢᤀᤥ ᤐᤣᤃᤧᤶᤔᤧ᤹ ᤜᤧᤰᤁᤩᤠᤱ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤢ ᤋᤠᤶᤓᤢᤱ ᤐᤧ᤺ᤱᤘᤠᤗᤡ᤺ᤳᤇᤣᤸᤗᤧ ᤁᤢᤒᤥᤖᤠᤰᤜᤠ᤹. ᤆᤠ᤺ᤶᤔᤠᤛᤡᤱ ᤂᤧᤒᤩᤠᤱ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤥᤖᤠᤰᤜᤠ᤹ ᤏᤢ ᤘᤣ᤹ ᤛᤡᤱᤒᤥᤖᤠ᤺ᤰᤜᤠ᤹ ᤛᤠ᤺ᤱᤃᤠᤜᤡᤶ ᤆᤥ᤺ᤰᤔᤠᤖᤧ ᤗᤠᤃᤡ ᤋᤠᤖᤧᤶᤔᤧ᤹॥”

¹⁶ ᤜᤧᤰᤁᤣ᤺ᤸᤗᤧ ᤔᤏᤠᤜᤠ᤹ ᤔᤧᤒᤣᤀᤠᤱ ᤛᤡᤱᤒᤥᤖᤠ᤺ᤰᤜᤠ᤹ ᤔᤧᤍᤠᤖᤢ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤀᤠᤒᤠᤅᤣ ᤜᤡᤶᤔᤥᤒᤠ ᤗᤡᤱᤄᤠᤶᤒᤢ ᤏᤢ ᤗᤰᤂᤢᤶᤔᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤗᤰᤂᤢᤶᤜᤠ᤹ᤀᤥ. ᤂᤧᤒᤩᤠᤱ ᤆᤫᤠ᤺ᤳ ᤗᤠᤶᤎᤣᤳ ᤁᤢᤒᤣᤛᤠᤱᤒᤠ ᤗᤰᤂᤢᤶᤔᤥ ᤏᤢ ᤀᤣᤑᤪᤠᤀᤡᤔ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱᤒᤠ ᤗᤰᤂᤢᤶᤜᤠ᤹ᤀᤥ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤗᤠᤃᤡ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢ॥

¹⁷ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤛᤠ᤺ᤱᤃᤠᤜᤡᤶ ᤔᤧᤈᤥᤃᤢᤀᤠᤱ ᤔᤧᤕᤢᤅᤧ॥ ᤏᤢᤏᤖᤧ ᤁᤢᤛ᤻ᤛᤠ ᤕᤜᤥᤛᤢ᤺ᤸᤗᤧ ᤁᤢᤕᤧᤶᤔᤠᤱᤎᤥ ᤂᤧᤴ ᤕᤧᤴ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤴ ᤋᤱᤏᤠᤶᤔᤡᤴ ᤀᤰᤂᤣᤗ᤹ᤖᤡᤰ ᤔᤧᤴᤍᤥᤀᤣ ᤔᤧᤘᤕᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰᤛᤔᤧᤀᤠᤱ ᤔᤧᤛ᤺ᤳᤋᤧᤀᤠᤱ ᤔᤧᤘᤕᤧ॥

¹⁸ ᤌᤡᤰᤛᤡᤃᤣᤰᤐᤠ ᤕᤧᤴᤏᤠᤱᤎᤥ ᤁᤢᤏᤢᤵᤔᤠ ᤕᤧᤴ ᤌᤠᤖᤡᤰ ᤌᤡᤰᤕᤠ᤺ᤴᤎᤰ ᤀᤧᤈᤪᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤏᤡᤖᤢ॥ ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤛᤛᤠᤱᤛᤪᤥᤳ ᤔᤧᤈᤥᤃᤢ॥ ᤜᤧᤰᤁᤩᤠᤱ ᤕᤧᤳᤇᤡᤃᤣᤰᤐᤠ ᤕᤧᤴᤏᤥ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤁᤢᤏᤢᤵᤔᤠ ᤆᤢᤶᤗᤢᤱ ᤔᤧᤈᤥᤃᤢᤖᤥ॥