ᤏᤜᤣᤔᤩᤠᤜ 6 - LIFOTNT

ᤏᤜᤣᤔᤩᤠᤜᤴ ᤆᤧ᤹ᤕᤠ ᤀᤡᤱᤍᤥ ᤔᤧᤔᤧᤳᤋᤢ

¹ ᤗᤢᤱᤎᤠᤰᤁᤡᤴ ᤀᤠᤏᤡᤃᤣ ᤕᤠᤶᤔᤥ ᤛᤧᤳᤋᤢᤶᤒᤧ ᤛᤢᤖᤢᤶᤒᤧ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤱᤜᤠ᤹ ᤜᤢ᤹ᤖᤢᤶᤒᤧ ᤛᤢᤖᤢᤶᤒᤧ ᤁᤧᤗ᤹ᤒᤠ ᤀᤡᤱᤄᤱᤅᤡᤴ ᤛᤴᤒᤗᤋ. ᤋᤥᤒᤡᤕᤠ. ᤀᤖᤒᤡ ᤃᤣᤛᤣᤔ ᤏᤢ ᤀᤠᤏᤡᤃᤣ ᤘᤣ᤹ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤀᤥ ᤁᤧᤖᤧ॥ ᤀᤠᤸᤗ ᤗᤠᤶᤎᤣ᤺ᤵᤐᤠᤜᤠ᤹ᤀᤥ ᤁᤢᤛᤢᤵᤔᤠᤜᤠ᤹ᤖᤰ ᤔᤧᤶᤓᤴᤏᤣ ᤘᤕᤧ॥

² ᤛᤴᤒᤗᤋ ᤏᤢ ᤃᤣᤛᤣᤔᤖᤧ ᤀᤥᤏᤥ ᤔᤧᤵᤔᤏᤠᤒᤠ ᤛᤣ᤺ᤱᤄᤠ ᤏᤧᤏᤧᤒᤠᤍᤧᤴᤏᤥ ᤗᤳᤇᤠ ᤐᤠᤱᤓᤣ᤹ᤀᤥ ᤂᤢᤴᤇᤡ᤹ᤏᤢ ᤋᤢᤶᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤡᤱᤄᤱ ᤔᤧᤜᤠᤰᤋᤠᤱ॥ ᤁᤖ ᤂᤢᤴᤇᤡ᤹ ᤀᤠᤱᤃᤠ᤹ ᤁᤧᤛᤠᤰᤐᤥ ᤌᤠᤔᤠ ᤗᤳᤇᤠ ᤗᤠᤶ ᤀᤥᤔᤧᤳᤋᤧᤛᤢᤀᤠᤱ ᤘᤕᤧᤛᤡ॥

³ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤰᤋᤱᤒᤠ ᤏᤢᤃᤵ ᤐᤡᤖᤢᤱᤛᤡᤱᤅᤠᤱ ᤀᤡᤱᤄᤱ ᤜᤠᤰᤋᤢᤱᤛᤡᤱ. “ᤀᤠᤸᤗᤥ ᤀᤠᤱᤃᤠ᤹ ᤔᤧᤴᤈᤥ᤺ᤰᤁᤣ ᤔᤧᤶᤒᤥᤱᤔᤏᤠᤒᤠ ᤕᤠ᤺ᤶᤒᤰ ᤁᤳᤋᤢᤱ ᤂᤧᤴ ᤕᤠ᤺ᤶᤒᤰᤁᤡᤴ ᤗᤧᤵᤔᤠᤀᤠᤱ ᤀᤠᤱᤃᤠ᤹ ᤂᤧᤵᤔᤥ ᤕᤢᤔᤠ ᤔᤧᤛᤢᤰᤁᤠᤴ॥ ᤂᤡᤴᤇᤡ᤹ ᤋᤢᤶᤛᤧ ᤕᤢᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤵᤔᤥᤒᤠ ᤀᤠᤕᤠ᤺ᤶᤒᤰᤁᤡᤴ ᤌᤣᤀᤠᤱ ᤗᤧᤖᤢᤱᤒᤠᤒᤣ᥅”

⁴ ᤗᤡᤛᤡᤗᤧᤱ ᤌᤠᤖᤡᤰ ᤂᤢᤴᤇᤡ᤹ ᤀᤠᤱᤃᤠ᤹ ᤀᤰᤋᤱᤒᤠ ᤀᤡᤱᤄᤱ ᤔᤧᤜᤠᤰᤋᤠᤱ. ᤜᤧᤰᤁᤩᤠᤱ ᤗᤡᤛᤡᤗᤧᤱ ᤌᤠᤖᤡᤰᤁᤣ ᤀᤠᤱᤃᤠ᤹ ᤂᤧᤱᤜᤠ᤹ ᤜᤧᤰᤋᤱᤒᤠᤀᤣ ᤏᤢᤃᤵ ᤐᤡᤖᤢᤱᤛᤡᤱ॥

⁵ ᤜᤧᤰᤁᤩᤠᤱ ᤛᤴᤒᤗᤋᤖᤧ ᤀᤠᤱᤃᤠ᤹ ᤗᤳᤇᤠ ᤛᤧᤘᤠᤖᤥᤒᤠᤗᤠᤶ ᤅᤠᤛᤡᤃᤣᤰᤐᤠ ᤀᤡᤱᤄᤱ ᤜᤠᤰᤋᤠᤱ॥ ᤁᤴ ᤀᤡᤱᤄᤱᤅᤡᤴ ᤗᤳᤇᤠ ᤔᤧᤶᤓᤠᤰᤁᤣᤒᤠ ᤛᤰᤀᤡᤱᤄᤱ ᤘᤕᤧ॥

⁶ ᤂᤧᤵᤔᤥ ᤀᤰᤋᤱᤒᤠ ᤛᤠᤵᤋᤧᤀᤠᤱ ᤐᤳᤇᤧ— “ᤃᤣᤛᤣᤔᤖᤧ ᤀᤠᤱᤃᤠ᤹ ᤔᤧᤳᤋᤠᤱᤅᤠᤱ ᤘᤠ᤹. ᤂᤧᤏᤧ᤹ ᤐᤡᤑᤩᤢᤱ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤀᤠᤱ ᤁᤧᤘᤠ᤹ ᤁᤧᤗ᤹ᤒᤠ ᤜᤕᤱ ᤁᤡᤸᤗᤡᤱᤅᤡᤴ ᤜᤡᤶᤒᤣᤛᤠᤱᤒᤠ ᤗᤠᤈᤣ᤹ ᤁᤧᤖᤧᤰ ᤛᤧᤖᤧᤀᤠᤱ ᤘᤠ᤹ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤕᤜᤢᤍᤡᤜᤠ᤹ᤖᤧ ᤗᤢᤱᤎᤠᤰᤁᤡᤴ ᤕᤠᤶᤔᤥ ᤁᤢᤛᤱ ᤁᤧᤈᤥᤃᤢᤶᤔᤠᤱ ᤁᤧᤛᤧᤳᤋᤢᤶᤗ ᤁᤧᤕᤠᤃᤡᤔᤢ॥ ᤂᤧᤏᤧ᤹ ᤀᤠᤒᤠᤅᤣ ᤜᤠᤱ ᤐᤥᤱᤔᤠ ᤏᤡᤱᤘᤠ᤹ ᤁᤧᤈᤥᤃᤢᤀᤠᤱ ᤁᤧᤘᤠ᤹ᤔᤢ॥

⁷ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤁᤧᤕᤢᤰᤂᤢᤛᤡᤀᤠᤱ ᤘᤠ᤹. ‘ᤕᤜᤢᤍᤠᤀᤥ ᤜᤠᤱᤎᤡᤰ ᤘᤠ᤹॥’ ᤐᤕᤶ ᤜᤠᤱᤅᤡᤸᤗᤧ ᤁᤴ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤂᤧᤵᤛᤢ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤴᤇᤡ᤹ ᤏᤧᤵᤔᤠᤱ ᤋᤢᤶᤛᤡᤀᤠᤱ ᤜᤠᤖᤠ ᤁᤴ ᤐᤠ᤺ᤴᤜᤠ᤹ ᤆᤧᤱᤛᤢ ᤐᤠ᤺ᤳᤇᤢ॥”

⁸ ᤀᤠᤱᤃᤠ᤹ ᤂᤢᤏᤧ᤹ ᤏᤢᤃᤵ ᤐᤡᤖᤢᤱ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠ ᤔᤣ᤺ᤴ. ᤁᤴ ᤂᤧᤏᤧ᤹ ᤁᤧᤈᤥᤃᤢᤀᤠᤱ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤗᤥ॥”

⁹ ᤀᤠᤏᤡᤃᤣ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤢ᤺ᤵᤔᤠᤏᤢ᤺ᤸᤗᤧ ᤋᤃᤡ ᤗᤧᤖᤢᤶᤒᤧᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤕᤠᤵᤔᤡ ᤕᤱᤔᤠᤛᤧᤵᤔᤠ ᤔᤧᤃᤥᤳᤋᤡᤃᤧᤖ ᤔᤧᤘᤕᤧ॥ ᤁᤖ ᤀᤠᤱᤃᤠ᤹ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤔᤢᤰᤛᤠᤶ ᤐᤡᤖᤠᤱᤅᤧ᤹ᤀᤥ॥”

¹⁰ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤔᤜᤣᤋᤒᤣᤗᤖᤧ ᤁᤢᤶᤔᤧᤴᤇᤠ᤹ ᤍᤗᤠᤕᤠᤜᤖᤧ ᤁᤢᤛ᤻ᤛᤠ ᤛᤔᤠᤕᤠᤜᤖᤧ ᤁᤢᤍᤢᤶᤛᤧ ᤁᤢᤜᤡᤶᤔᤥ ᤐᤣᤃᤠᤱ॥ ᤜᤡᤶᤔᤥᤗᤠᤶ ᤂᤧᤴ ᤗ᤺ᤶᤔᤠ ᤔᤧᤴᤇᤢᤰᤔᤏᤠᤒᤠ ᤆᤥᤃᤧ॥ ᤂᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤠᤴᤇᤡ᤹ ᤏᤧᤵᤔᤠᤱ ᤔᤠᤱᤜᤡᤶᤔᤥ ᤐᤡᤳᤇᤡ ᤜᤧᤰᤁᤩᤠᤱ ᤗᤠᤶᤎᤣ᤺ᤳᤜᤠ᤹ ᤛᤢᤵᤛᤢᤀᤠᤱ ᤆᤡᤱᤏᤧᤳᤇᤡ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤧᤳᤇᤧ ᤂᤧᤱᤜᤠ᤹ ᤔᤧᤍᤠᤖ ᤔᤧᤒᤳ॥ ᤛᤧᤴᤍᤡᤰ ᤂᤧᤱᤜᤠ᤹ ᤂᤧᤏᤧ᤹ ᤁᤧᤛᤧᤳᤇᤧ ᤔᤧᤃᤧᤳ ᤔᤧᤍᤠᤖᤥ॥”

¹¹ ᤁᤖ ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤱᤃᤠ᤹ ᤁᤧᤄᤧᤳᤇᤡᤱᤒᤠ ᤏᤢ ᤁᤧᤈᤡᤱᤛᤡᤱᤒᤠ ᤔᤏᤠᤀᤠ ᤔᤣ᤺ᤴ॥ ᤌᤣ ᤀᤠᤱᤃᤠ᤹ ᤔᤠᤱᤜᤡᤶᤔᤥ ᤆᤡᤱᤛᤡᤱᤅᤠᤀᤠᤱ ᤀᤠᤒᤠᤅᤣ ᤀᤠᤜᤡᤱᤔᤴᤏᤡᤴ ᤛᤧ᤺ᤵᤋᤢᤱ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤡ᥅ ᤀᤠᤱᤃᤠ᤹ ᤜᤧᤰᤁᤣ ᤔᤧᤈᤥᤰᤁᤠᤴ॥”

¹² ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤔᤠᤕᤠᤜ᤺ᤴᤏᤢ ᤐᤠᤖᤧᤒᤠ ᤔᤧ᤺ᤴᤗᤳᤇ ᤁᤖ ᤋᤥᤒᤡᤕᤠᤴ ᤏᤢ ᤛᤴᤒᤗᤋᤖᤧ ᤛᤫᤠ᤺ᤳ ᤕᤠᤱ ᤐᤡᤖᤧᤳᤇᤢᤀᤠᤱ ᤂᤢᤏᤧ᤹ ᤜᤧᤰᤁᤣ ᤐᤠ᤺ᤵᤔᤠ ᤐᤠᤱᤄᤧᤳᤇᤢᤀᤠᤱ ᤘᤕᤧ ᤁᤧᤗ᤹ᤒᤠᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ॥

¹³ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤈᤠ᤺ᤳᤌᤡ ᤋᤣᤔᤠᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤧᤳᤇᤢ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤱᤔᤠ ᤛᤧᤵᤔᤠᤀᤠᤱ ᤗᤠᤕᤥ ᤆᤥ᤺ᤰᤐᤠᤱᤔᤠ ᤑᤠ᤹ᤀᤠᤱ ᤛᤔᤠᤕᤠᤜ᤺ᤸᤗᤧ ᤛᤫᤠ᤺ᤳ ᤕᤠᤱ ᤋᤠ᤺ᤰᤋᤢᤀᤠᤱ ᤘᤕᤧ॥

¹⁴ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤋᤥᤒᤡᤕᤠ ᤏᤢ ᤛᤴᤒᤗᤋᤖᤧ ᤆᤥᤃᤧᤳᤇᤢᤒᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ॥ ᤀᤠᤱᤃᤠ᤹ ᤕᤱᤔᤠ ᤛᤧᤵᤔᤠᤀᤠᤱ ᤕᤠᤵᤔᤡ ᤂᤢᤶᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤔᤠ ᤏᤥᤀᤍᤡᤕᤠ ᤔᤡᤱ ᤁᤧᤘᤠ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠᤴ ᤏᤢ ᤘᤣ᤹ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤛᤧ᤹ᤀᤥ॥

ᤕᤠ᤺ᤶᤒᤰᤁᤡᤴ ᤆᤢ᤺ᤳ

¹⁵ ᤅᤠᤒᤥᤱᤅᤠᤱ ᤏᤧᤳᤇᤡ ᤕᤧᤴ ᤌᤠᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤏᤠ ᤜᤧᤰᤁᤩᤠᤱ ᤀᤣᤗᤢᤗ ᤔᤧᤵᤔᤏᤠᤒᤠ ᤗᤠ᤺ᤸᤗᤧ ᤏᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤗᤢᤱᤎᤠᤰ ᤛᤧᤵᤔᤠ ᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤆᤢᤖᤧ॥

¹⁶ ᤁᤴ ᤐᤠ᤺ᤴᤏᤡᤴ ᤀᤠᤏᤡᤃᤣ ᤏᤡᤱᤔᤡᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤣ᤺ᤸᤗᤧ ᤂᤡᤖᤡᤒᤠ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤃᤡᤛᤧᤀᤠᤱ ᤂᤢᤏᤡ᤹ ᤛᤠ᤹ᤀᤡᤕᤃᤧ. ᤌᤣᤀᤠᤱᤓᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠ᤹ᤖᤡᤃᤧᤀᤠᤱ ᤆᤥ᤺ᤰᤔᤠ ᤛᤢᤖᤢᤶᤒᤧᤒᤠ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ॥

¹⁷ ᤂᤧᤴ ᤕᤧᤶᤔᤥ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤋᤥᤒᤡᤕᤠᤴ ᤕᤖᤡᤰ ᤛᤰᤀᤡᤱᤄᤱᤜᤠ᤹ ᤔᤧᤜᤠᤰᤋᤢᤖ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤂᤢᤏᤧ᤹ᤗᤠᤶᤒᤠ ᤏᤢᤃᤵᤐᤠᤱ ᤔᤧᤄᤥᤛᤢᤖ ᤔᤧᤘᤕᤧ॥

¹⁸ ᤕᤜᤢᤍᤠᤒᤠ ᤕᤖᤡᤰ ᤔᤏᤠᤜᤠ᤹ ᤔᤠᤱᤔᤧᤜᤧᤰᤛᤡᤱᤅᤠᤱ ᤋᤥᤒᤡᤕᤠ ᤗᤧᤵᤔᤠᤱ ᤔᤧᤒᤳᤇᤧ॥ ᤌᤣᤀᤠᤱᤓᤧᤸᤗᤧ ᤋᤥᤒᤡᤕᤠᤴ ᤀᤠᤖᤠ᤺ᤸᤗᤧ ᤁᤢᤛ᤻ᤛᤠ ᤛᤁᤏᤩᤠᤜ᤺ᤸᤗᤧ ᤁᤢᤶᤒᤠᤱᤗᤢᤔᤡ᤹ ᤘᤕᤧ॥ ᤋᤥᤒᤡᤕᤠ᤺ᤸᤗᤧ ᤁᤢᤛ᤻ᤛᤠ ᤕᤣᤜᤥᤜᤠᤏᤠᤏᤖᤧ ᤃ ᤒᤣᤖᤣᤁᤩᤠᤜ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤔᤛᤢᤸᤗᤠᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤎᤡᤰ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ॥

¹⁹ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤔᤧᤍᤩᤧᤀᤠᤱ ᤋᤥᤒᤡᤕᤠᤖᤧ ᤆᤥᤃᤢᤒᤠ ᤏᤢᤒᤠ ᤕᤠ᤺ᤶᤒᤰᤜᤠ᤹ ᤔᤧᤈᤧᤰᤋᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤠᤱ ᤔᤧᤒᤰᤂᤢᤀᤠᤱ ᤂᤢᤏᤧ᤹ᤀᤥ ᤛᤖᤰ ᤔᤧᤃᤧᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤕᤱᤔᤠ ᤛᤧᤖᤠᤱᤗ ᤛᤰᤀᤡᤱᤄᤱᤜᤠ᤹ ᤜᤠᤰᤋᤠᤱᤗᤥ॥