ᤏᤜᤣᤔᤩᤠᤜ 5 - LIFOTNT

ᤏᤜᤣᤔᤩᤠᤜᤖᤧ ᤕᤠᤱᤃᤧᤛᤠ᤹ᤒᤠᤜᤠ᤹ ᤑᤠ᤹ᤖᤢᤛᤡ

¹ ᤁᤢᤓᤠ ᤕᤧᤶ ᤀᤣᤃᤠᤱ ᤕᤧᤶᤒᤡᤳᤇᤠ ᤏᤢ ᤂᤢᤏᤡ᤹ ᤔᤣ᤺ᤳᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ ᤛᤠ᤹ᤖᤡᤰ ᤆᤧ᤹ᤕᤠ ᤀᤡᤱᤍᤥ ᤔᤧᤵᤔᤠ ᤔᤧᤜᤣ᤺ᤰᤋᤢᤛᤡ॥

² ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤜᤧᤰᤁᤩᤠᤱ ᤀᤠᤏᤡᤃᤣ ᤛᤠᤜᤠ᤹ ᤕᤖᤡᤰ ᤘᤕᤡᤃᤧ. ᤀᤠᤏᤡᤃᤣ ᤜᤡᤱᤔᤠᤖᤧ ᤗᤠᤃᤡ ᤐᤥᤃᤢᤃᤧᤴ ᤁᤢᤈᤠ ᤆᤠᤜᤠᤒ᤻ ᤆᤥᤃᤡᤃᤧ॥”

³ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤛᤠᤰᤗᤠᤶᤒᤠ ᤜᤡᤱᤔᤠᤖᤧ ᤗᤠᤃᤡ ᤐᤥᤃᤢᤃᤧᤴ ᤁᤢᤈᤠ ᤕᤠᤱᤄᤥᤳᤇᤧ ᤀᤠᤏᤡᤃᤣ ᤀᤠᤒᤠᤅᤣ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤜᤡᤶᤎᤠ᤺ᤱᤜᤠ᤹ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤕᤠᤱᤅᤥ ᤋᤣᤔᤏᤠᤀᤠᤱ ᤏᤧ᤹᤺॥”

⁴ ᤘᤣ᤹ᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤣ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤖᤧ ᤗᤠᤃᤡ ᤜᤠᤱᤅᤡᤴ ᤜᤢᤱᤔᤠ ᤁᤧᤒᤥᤱᤒᤠ ᤀᤣ᤺ᤱᤕᤠᤱᤅᤡᤴ ᤜᤢᤱᤔᤠ ᤀᤠᤏᤡᤃᤣ ᤛᤡᤱᤏᤠᤳ ᤁᤥ᤺ᤵᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥

⁵ ᤘᤣ᤹ ᤕᤜᤢᤍᤡᤜᤠ᤹ ᤜᤧᤰᤁᤣ ᤀᤠᤏᤡᤃᤧᤀᤠᤱ ᤕᤜᤢᤍᤡ ᤌᤠ᤺ᤰᤛᤡᤃᤧ॥ ᤀᤠᤏᤡᤃᤣ ᤛᤠᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤠᤜᤠ᤹ ᤁᤢᤀᤡᤛᤡᤰ ᤏᤢᤒᤠ ᤏᤢ ᤗᤢᤱᤔᤠ᤹ ᤁᤧᤍᤢᤰᤐᤠ ᤔᤧᤈᤥᤰ ᤜᤧᤰᤁᤣᤛᤠᤱ ᤀᤠᤏᤡᤃᤣ ᤀᤠᤒᤠᤅᤣ ᤛᤠᤜᤠ᤹ ᤕᤥ᤺ᤰᤐᤠ ᤕᤥ᤺ᤰᤔᤠ ᤆᤥ᤺ᤰᤔᤠᤛᤡᤀᤠᤱ ᤛᤱᤔᤠᤛᤡ ᤐᤥ᤺ᤰᤂᤧᤀᤠᤱ ᤘᤠ᤹॥ ᤁᤖ ᤁᤢᤓᤠ ᤀᤠᤏᤡᤃᤣ ᤔᤧᤴᤇᤢᤔᤠ ᤛᤠᤜᤠ᤹ ᤋᤃᤡᤀᤣ ᤕᤥ᤺ᤃ᤻ᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ ᤀᤠᤏᤡᤃᤣ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤏᤢ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤔᤧᤏᤠᤵᤋᤡ ᤔᤧᤍᤣ᤹ᤖᤡᤃᤧᤀᤠᤱ ᤀᤠᤏᤡᤃᤣ ᤌᤣᤀᤠᤱ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤐᤥ᤺ᤰᤂᤡᤃᤧᤀᤠᤱ ᤘᤕᤡᤃᤧ॥”

⁶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤰᤋᤱᤒᤠ ᤗᤢᤱᤜᤠ᤺ᤵᤔᤠ ᤐᤠ᤺ᤴᤜᤠ᤹ ᤂᤧᤵᤛᤢᤱᤅᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥᤃᤧ॥

⁷ ᤀᤠᤱᤃᤠ᤹ ᤂᤧᤱᤜᤠ᤹ ᤑᤠ᤹ᤔᤠᤛᤡ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤑᤧ᤺ᤰᤋᤢᤱᤛᤡᤱᤅᤠᤱ ᤔᤧᤳᤋᤢᤱᤛᤡᤱ. “ᤂᤡᤏᤡ᤹ ᤀᤠᤒᤠᤅᤣ ᤑᤢ᤹ᤏᤢᤛᤠ᤹ᤜᤠ᤹ ᤋᤢᤰᤂᤣ ᤁᤧᤈᤠ᤺ᤳᤋᤢᤶᤛᤡᤶᤔᤠᤱ ᤁᤧᤘᤕᤡ॥ ᤁᤴ ᤁᤧᤛᤠᤰᤐᤠ ᤕᤠ᤺ᤶᤒᤰᤁᤡᤴ ᤋᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤆᤢᤶᤗᤢᤱᤅᤥ ᤁᤧᤖᤧᤰ ᤛᤢᤵᤛᤢᤱᤛᤡᤱ॥”

⁸ ᤜᤧᤰᤁᤩᤠᤱ ᤔᤧᤳᤋᤢᤱᤛᤡᤱ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤛᤱᤄᤢᤛᤡᤒᤠ ᤀᤠᤏᤡ᤹ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤏᤡᤃᤧᤃ ᤌᤧ᤹ᤖᤢᤶᤛᤡᤶᤒᤧᤀᤠᤱ ᤗᤧᤖᤢᤶᤛᤡᤶᤒᤧᤖ ᤘᤕᤡᤃᤧ॥ ᤁᤖ ᤀᤠᤸᤗ ᤌᤧ᤹ᤔᤏᤠᤛᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤏᤧ ᤂᤡᤏᤡ᤹ᤃ ᤘᤣ᤹ ᤕᤜᤢᤍᤡᤜᤠ᤹ᤀᤥ ᤁᤧᤛᤱᤄᤢᤶᤛᤡᤶᤗᤧᤳᤇ॥” ᤗᤠᤶᤗᤥᤒᤠᤜᤠ᤹ᤖᤧ ᤏᤢᤃᤵ ᤐᤡᤔᤠ ᤔᤧᤴᤇᤢᤰᤋᤠᤱᤅᤡᤴᤏᤠᤱ ᤛᤫᤠ᤺ᤳ ᤔᤧᤕᤢᤅᤧ॥

⁹ ᤀᤠᤱᤃᤠ᤹ ᤕᤠᤶᤔᤥ ᤔᤧᤳᤋᤢᤱᤛᤡᤱ. “ᤁᤴ ᤂᤡᤏᤡ᤹ ᤕᤠ᤺ᤶᤒᤰᤁᤡᤴ ᤋᤠᤵᤑᤧ᤺ᤶᤒᤠ ᤐᤥ᤺ᤰᤂᤧ॥ ᤀᤠᤸᤗ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤶᤔᤧ᤹ᤀᤠᤱ ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ ᤂᤧᤴ ᤆᤥᤃᤧᤶᤔᤧ᤹॥ ᤜᤧᤰᤁᤩᤠᤱᤏᤧ ᤀᤠᤏᤡ᤹ ᤏᤡᤱᤔᤡ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤀᤠᤏᤡ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤀᤠᤔᤧᤱᤄᤥᤏᤧᤴ॥

¹⁰ ᤀᤠᤱᤃᤠ᤹ ᤏᤢ ᤀᤠᤴᤍᤣᤱ ᤀᤠᤴᤈᤢᤶ ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤜᤠ᤹ᤖᤧᤀᤠᤱ ᤁᤢᤈᤠ ᤏᤢ ᤕᤠᤱᤛᤠᤁᤢᤴᤎᤣ ᤛᤡᤱᤏᤠᤳ ᤂᤧᤱᤜᤠ᤹ ᤐᤡᤔᤏᤠᤛᤡᤀᤠᤱ ᤐᤳ॥ ᤀᤠᤸᤗ ᤀᤠᤏᤡ᤹ ᤂᤧᤴ ᤛᤡᤱᤏᤠᤳᤋᤡᤸᤗᤧ ᤁᤢᤛ᤻ᤛᤠ ᤑᤥᤱᤔᤠ ᤗᤧᤖᤢᤶ॥

¹¹ ᤂᤡᤏᤡ᤹ ᤁᤧᤍᤣ᤹ᤖᤢᤶᤒᤠ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤡᤰᤋᤠᤵᤜᤠ᤹. ᤆᤧᤸᤗᤧᤰᤛᤣ᤹ ᤏᤢ ᤐᤧ᤺ᤱᤘᤠ ᤗᤡ᤺ᤳᤇᤣ ᤀᤡᤰᤋᤠᤵᤜᤠ᤹ ᤂᤢᤏᤡ᤹ ᤜᤡᤶᤜᤠ᤹ ᤏᤢ᤺ᤰᤋᤧᤶ ᤐᤡᤖᤧᤶᤛᤡᤶᤔᤧ᤹. ᤜᤧᤰᤁᤩᤠᤱ ᤂᤧᤱᤗᤠᤶ ᤁᤧᤓᤥᤰᤂᤢᤶᤒᤠ ᤕᤠᤱᤛᤠᤁᤢᤴᤎᤣ. ᤐᤥᤃᤢᤃᤧᤴ ᤁᤢᤈᤠ. ᤛᤣᤈ᤺ᤱᤘᤠ. ᤆᤤᤋᤢᤏ ᤏᤡ᤺ᤱᤃᤣ᤹ᤜᤠ᤹ ᤁᤧᤖᤧᤰ ᤏᤢ᤺ᤰᤋᤧᤶ ᤐᤡᤖᤧᤶᤛᤡᤶᤔᤧ᤹॥”

¹² ᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤀᤠᤏᤡᤃᤣ ᤆᤥᤃᤢᤶᤒᤧ॥ ᤀᤠᤏᤡᤃᤣ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ᤺ᤰᤋᤢᤶ ᤐᤡᤖᤢᤶᤛᤡᤶᤒᤧ ᤜᤧᤰᤁᤩᤠᤱ ᤛᤡᤱᤏᤠᤳᤜᤠ᤹ ᤕᤠᤱᤏᤠ ᤔᤧᤓᤥᤰᤂᤢᤶᤛᤡᤒᤧᤴ॥” ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤢ᤺ᤳᤋᤢᤱᤛᤡᤱ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤒᤠᤅᤣ ᤔᤧᤈᤥᤃᤢᤒᤠ ᤔᤠᤱᤜᤢᤵ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤱᤛᤡᤱ॥

¹³ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤓ᤹ᤀᤡᤴ ᤑᤠ᤺ᤰᤂᤢᤱᤅᤠᤱ ᤛᤠᤰᤂᤢᤱ॥ “ᤂᤡᤏᤡ᤹ ᤀᤠᤒᤠᤅᤣ ᤔᤠᤱᤃᤧᤜᤧᤰᤁᤠᤛᤡᤒᤠᤴ ᤁᤧᤱᤃᤧᤳᤋᤢᤶᤔᤡᤴᤏᤧᤓᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤁᤧᤛᤠᤰᤂᤡᤖᤥ.” ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤜᤡᤶᤎᤠ᤺ᤱ. ᤂᤡᤏᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤖᤧᤰ ᤁᤧᤏᤠᤵᤋᤡ ᤜᤧᤰᤁᤩᤠᤱ ᤂᤡᤏᤡ᤹ ᤜᤢᤰᤁᤡᤴ ᤁᤢᤄᤠᤗᤧᤶ ᤁᤧᤈᤥᤃᤡ ᤁᤧᤒᤡᤖᤡᤖᤥ॥” ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰᤗᤧ “ᤀᤠᤔᤡᤴ” ᤔᤧᤒᤠ᤺ᤳᤋᤢ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ॥ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤖᤧ ᤀᤠᤒᤠᤅᤣ ᤔᤠᤱᤜᤧᤰᤛᤡᤱᤒᤠ ᤁᤢᤀᤡᤛᤡᤰ ᤔᤧᤈᤥᤃᤢᤖᤥ॥

ᤏᤜᤣᤔᤩᤠᤜ᤺ᤸᤗᤧ ᤌᤣᤀᤠᤱ ᤂᤥᤔᤠ ᤏᤡᤱᤘᤠ᤹ ᤔᤧᤴᤈᤥ᤺ᤰᤁᤣᤒᤠ ᤁᤢᤕᤠ᤺ᤶᤒᤰ

¹⁴ ᤀᤷᤋᤠᤛᤠᤛ᤻ᤋ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱ ᤋᤱᤒᤣᤀᤠᤱᤎᤥ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣ ᤌᤠᤖᤡᤰ ᤀᤠᤱᤃᤠ᤹ ᤕᤜᤢᤍᤠ ᤗᤠᤈᤣ᤹ᤒᤠ ᤋᤢᤶ ᤜᤠᤱᤕᤢᤰᤐᤠ ᤘᤕᤠᤱ॥ ᤁᤴ ᤌᤡᤰᤏᤧᤳ ᤋᤱᤒᤣ ᤌᤠᤖᤡᤰ ᤀᤠᤱᤃᤠ᤹ ᤏᤢ ᤀᤠᤶᤓᤢ᤹ ᤀᤠᤴᤛᤠ᤹ᤛᤡᤖᤧ ᤋᤢᤶ ᤜᤠᤱᤕᤢᤰᤐᤠᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤁᤢᤈᤠᤴ ᤔᤧᤍᤠ᤺ᤰᤋᤢᤶᤒᤧᤴ॥

¹⁵ ᤀᤠᤱᤃᤠ᤹ᤏᤢ᤺ᤸᤗᤧ ᤋᤃᤡᤒᤠ ᤁᤧᤖᤧᤰ ᤋᤢᤶ ᤜᤠᤱᤕᤢᤰᤐᤠᤜᤠ᤹ ᤔᤏᤠᤜᤠ᤹ᤖᤧ ᤗᤠᤃᤡ ᤛᤠ᤹ᤖᤡᤰ ᤁᤧᤗᤡ᤺ᤵᤐᤠ ᤁᤰ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤁᤢᤈᤠ ᤔᤧᤍᤠ᤺ᤰᤋᤢ ᤂᤧᤴᤏᤢ᤺ᤸᤗᤧ ᤘᤣ᤹ ᤗᤡᤒᤥᤱ ᤕᤠᤱᤀᤡᤳᤇᤡ᤹ᤀᤠᤱ ᤔᤧᤍᤠ᤺ᤰᤋᤢ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤧᤘᤠᤖᤥᤒᤠᤜᤠ᤹ᤖᤧᤀᤠᤱ ᤔᤏᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡᤀᤠᤱ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ॥ ᤁᤖ ᤀᤠᤱᤃᤠ᤹ ᤜᤧᤰᤁᤣ ᤔᤧᤴᤈᤥ᤺ᤰᤐᤠᤴ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤱ॥

¹⁶ ᤀᤠᤱᤃᤠ᤹ ᤀᤠᤒᤠᤅᤣ ᤁᤧᤖᤧᤰ ᤀᤠᤔᤢᤰᤛᤠᤶᤔᤡᤴ ᤗᤢᤱᤎᤠᤰ ᤆᤠ᤺ᤱᤘᤠ ᤔᤧᤵᤔᤠᤀᤥ ᤁᤣ᤺ᤳᤋᤢᤱ. ᤀᤠᤱᤃᤠ᤹ ᤀᤠᤕᤢᤰᤁᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤗᤢᤱᤎᤠᤰ ᤛᤧᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ॥ ᤀᤠᤏᤡᤃᤣ ᤕᤥ᤹ᤒᤠ ᤛᤡᤱᤒᤢᤱ ᤔᤧᤶᤔᤧᤳᤇᤡᤱᤔᤏᤠ॥

¹⁷ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤀᤠᤱᤃᤠ᤹ ᤀᤠᤍ᤺ᤰ ᤆᤠᤔᤠᤍᤧᤴᤏᤥ ᤁᤡᤵᤌᤡᤰᤁᤠᤱ ᤅᤠᤒᤥᤱ ᤕᤜᤢᤍᤡᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ ᤋ᤺ᤰ ᤐᤡᤖᤢᤱᤛᤡᤱ॥ ᤂᤧᤴᤏᤢ᤺ᤸᤗᤧ ᤘᤣ᤹ ᤀᤠᤱᤃᤠ᤹ ᤀᤠᤍᤢᤶᤛᤧ ᤁᤧᤍᤠᤒᤠ ᤁᤢᤕᤠ ᤂᤡᤖᤡ ᤁᤧᤕᤢᤱᤒᤠ ᤔᤏᤠ ᤛᤢᤘᤠᤱᤜᤠ᤹ᤖᤧᤀᤠᤱ ᤀᤠᤱᤃᤠ᤹ᤏᤢᤀᤣ ᤌᤡᤰᤕᤠ᤺ᤴᤎᤰ ᤔᤧᤈ ᤔᤧᤎᤢᤅᤢ॥

¹⁸ ᤌᤡᤰᤕᤠ᤺ᤴᤎᤰ ᤛᤠ ᤆᤠᤔᤠᤖᤧ ᤗᤠᤃᤡ ᤗᤳᤇᤠ ᤐᤡᤳ ᤌᤡᤰ. ᤆᤠᤗᤢᤵᤔᤏᤠᤛᤡᤒᤠ ᤘᤖᤢᤵᤗᤢᤵᤐᤠ ᤋᤢᤰᤛᤡ ᤔᤧᤸᤗᤢᤰᤜᤠ᤹ ᤜᤧᤰᤁᤩᤠᤱ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤘᤠᤜᤠ᤹ ᤔᤧᤛᤢᤵᤛᤢᤛᤡ॥ ᤌᤡᤒᤥᤱ ᤕᤧᤴ ᤌᤰᤔᤠ ᤐᤖᤡᤰ ᤐᤖᤡᤰᤐᤠ ᤁᤢᤈᤠᤃᤧᤏᤢ᤹ᤒᤠ ᤛᤣᤈᤱᤘᤠᤴ ᤘᤧᤳᤋᤧᤛᤖᤧ ᤔᤧᤛᤢᤵᤛᤢ॥ ᤁᤖ ᤋᤢᤶ ᤛᤢᤜᤠᤱᤕᤢᤰᤐᤠᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤁᤢᤈᤠ ᤀᤠᤱᤃᤠ᤹ ᤔᤧᤴᤍᤠ᤺ᤰᤐᤠᤴ॥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤁᤴ ᤕᤖᤡᤰ ᤁᤧᤗᤡ᤺ᤵᤐᤠ ᤁᤰ ᤘᤕᤧ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤕᤠᤱ॥

¹⁹ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤐᤣᤗᤡ ᤑᤠᤰᤏᤧᤖᤥ ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ᤖᤧ ᤗᤠᤃᤡ ᤆᤥᤃᤢᤱᤒᤠ ᤁᤧᤖᤧᤰ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤀᤠᤏᤢ᤹ᤔᤠ ᤀᤠᤍᤠᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤛᤥᤀᤥ ᤁᤳᤋᤧ᤹ᤀᤥ᥄