ᤏᤜᤣᤔᤩᤠᤜ 4 - LIFOTNT

ᤕᤠ᤺ᤶᤒᤰ ᤔᤧᤀᤳᤋᤢ

¹ ᤗᤢᤱᤎᤠᤰᤁᤡᤴ ᤀᤠᤏᤡᤃᤣ ᤆᤥ᤺ᤰᤔᤠ ᤜᤣ᤺ᤰᤋᤢᤶᤒᤧᤒᤠ ᤛᤴᤒᤗᤋᤖᤧ ᤂᤧᤵᤛᤢᤀᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧ ᤜᤧᤰᤁᤩᤠᤱ ᤕᤜᤢᤍᤡᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤜᤣ᤺ᤰᤋᤢᤛᤡ॥

² ᤂᤢᤏᤧ᤹ ᤁᤢᤴᤍᤣᤱ ᤁᤢᤴᤈᤢᤶᤜᤠ᤹ ᤏᤢ ᤛᤠᤔᤖᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤐᤠ᤺ᤳᤋᤢ. “ᤁᤴ ᤁᤢᤛᤰᤔᤠ ᤔᤧᤴᤕᤠᤰᤔᤏᤠᤒᤠ ᤕᤜᤢᤍᤡᤜᤠ᤹ᤖᤧ ᤌᤣ ᤔᤧᤈᤥᤃᤢᤒᤠᤒᤣ᥅ ᤂᤧᤱᤜᤠ᤹ᤖᤧ ᤕᤧᤰᤕᤰᤁᤡᤴ ᤕᤠᤶᤔᤥ ᤔᤧᤈᤥᤃᤢᤒᤠᤒᤡ᥅ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤌᤡᤰᤕᤠ᤺ᤴᤗᤧ ᤆᤥ᤺ᤰᤔᤠ ᤔᤧᤛᤢᤖᤢᤒᤡ᥅ ᤂᤧᤴ ᤔᤡᤃᤧᤍᤡᤰᤐᤠ ᤏᤢ ᤁᤧᤗᤢᤶᤛᤡᤱᤒᤠ ᤋᤠᤶᤈᤡ᤹ ᤂᤠᤶᤜᤡ᤺ᤰᤁᤥᤗᤠᤶᤒᤠ ᤂᤧᤱᤜᤠ᤹ᤖᤧ ᤕᤧᤰᤕᤰ ᤆᤥ᤺ᤰᤔᤠ ᤗᤢᤱᤅᤡᤴ ᤗ᤺ᤳᤋᤢᤶᤒᤧ ᤗ᤹ᤖᤡᤰ ᤔᤧᤒᤠ᤺ᤳᤋᤢᤒᤡ᥅”

³ ᤂᤢᤏᤧ᤹ ᤁᤢᤒᤣᤛᤠᤱ ᤁᤧᤕᤧᤵᤐᤠ ᤀᤶᤔᤥᤏᤡ ᤋᤥᤒᤡᤕᤠ᤺ᤸᤗᤧ ᤐᤠ᤺ᤳᤋᤢ. “ᤏᤠ᤹ᤖᤠᤱᤛᤩᤠᤱ. ᤂᤧᤱᤜᤠ᤹ᤖᤧ ᤔᤧᤛᤧᤳᤋᤢᤒᤠ ᤗᤢᤱᤎᤠᤰᤁᤡᤴ ᤛᤩᤠᤗᤎᤡᤰᤗᤧ ᤁᤠ᤺ᤰᤋᤢᤛᤠᤱ ᤌᤢᤵᤗᤥ॥”

⁴ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤵᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤧᤃᤣᤰ ᤛᤶᤎᤠᤱᤅᤣ ᤆᤢᤰᤗ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤴ ᤔᤧᤏᤠᤵᤋᤢᤛᤡᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤐᤢᤱᤗᤠᤎᤠᤒᤠ ᤐᤥᤱᤔᤠᤀᤠᤱ ᤐᤣ᤺ᤰᤔᤠ ᤐᤥᤱᤗ॥

⁵ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤁᤡᤴ ᤔᤧᤈᤡᤰᤂᤧᤴᤏᤧ᤹ ᤀᤡᤃᤪ ᤂᤢᤴᤇᤡ᤹ ᤗᤠᤕᤥᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤧᤴᤏᤧ᤹ᤀᤥ ᤌᤣᤀᤠᤱᤓᤧᤸᤗᤧ ᤗᤢᤱᤎᤠᤰ ᤁᤧᤛᤧᤵᤐᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤆᤠ᤺ᤳᤌᤡ ᤔᤧᤍᤣᤛᤢ ᤔᤧᤒᤡᤖᤢᤛᤡᤀᤠᤱ ᤘᤠ᤹॥”

⁶ ᤜᤧᤰᤁᤣᤛᤠᤱ ᤗᤢᤱᤎᤠᤰᤜᤠ᤹ ᤀᤠᤏᤡᤃᤣ ᤆᤰᤔᤧᤸᤗ᤹ᤀᤣ ᤛᤧᤳᤋᤢᤶᤒᤧ ᤜᤧᤰᤁᤩᤠᤱ ᤜᤠᤖᤠᤀᤣ ᤂᤧᤸᤗᤧ ᤁᤢᤓᤪᤧ᤺ᤱ ᤌᤠᤖᤡᤰ ᤁᤣ᤺ᤶᤒᤠ ᤑᤥ᤺ᤰᤂᤢᤶᤒᤧ॥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠ᤹ᤖᤡᤰ ᤂᤢᤏᤡ᤹ ᤛᤡᤰᤛᤔᤧᤀᤠᤱ ᤘᤕᤧ॥

⁷ ᤁᤖ ᤛᤴᤒᤗᤋ. ᤋᤥᤒᤡᤕᤠ. ᤀᤖᤒ ᤋᤣ᤺ᤱᤃᤵᤐᤥᤒᤠ ᤔᤏᤠᤜᤠ᤹. ᤀᤶᤔᤥᤏ ᤋᤧᤱᤃᤵᤐᤥᤒᤠ ᤔᤏᤠᤜᤠ᤹ ᤏᤢ ᤀᤛ᤻ᤍᤥᤍ ᤋᤧᤱᤃᤵᤐᤥᤒᤠ ᤔᤏᤠᤜᤠ᤹ᤖᤧ ᤕᤖᤢᤛᤗᤧᤔᤒᤠ ᤗᤢᤱᤎᤠᤰᤜᤠ᤹ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤋᤃᤡ ᤐᤥᤖ ᤐᤳ ᤜᤧᤰᤁᤩᤠᤱ ᤜᤠᤷᤃᤠ᤺ᤱᤃᤠ᤺ᤱᤒᤠᤜᤠ᤹ ᤔᤧᤗᤢᤵᤋᤢᤖ ᤔᤧᤒᤳ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤠ᤹ᤖᤡᤰ ᤂᤢᤴᤇᤡ᤹ ᤕᤠ᤺ᤰᤗᤧ᤹ᤖᤧ॥

⁸ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤋᤠᤔᤠᤀᤠᤱ ᤕᤖᤢᤛᤗᤧᤔᤀᤥ ᤌᤱ ᤆᤥ᤺ᤰᤔᤠ ᤂᤧᤒᤩᤠᤱ ᤜᤕᤱ ᤁᤡᤸᤗᤡᤱ ᤆᤥ᤺ᤰᤔᤠ ᤆᤧᤶᤑᤴ ᤔᤧᤈᤥᤃᤢ॥

⁹ ᤁᤖ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤶᤒᤧ ᤜᤧᤰᤁᤩᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤕᤧᤰᤕᤰᤁᤡᤴ ᤁᤶᤒᤪᤠᤱ ᤔᤧᤵᤐᤠᤱᤔᤏᤠᤛᤡᤖᤥ॥

¹⁰ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ. “ᤁᤰ ᤁᤧᤃᤢᤒᤠᤜᤠ᤹ ᤔᤧᤴᤎᤢᤶᤔᤏᤠᤒᤠ ᤔᤧᤒᤥᤱᤗ ᤔᤧᤒᤳᤗᤥ. ᤜᤧᤰᤁᤩᤠᤱ ᤛᤠᤵᤆᤣ᤺ᤰᤜᤠ᤹ ᤕᤖᤡᤰ ᤏᤧᤖᤥ. ᤀᤠᤏᤡ᤹ ᤀᤠᤵᤑᤣᤰ ᤗᤢᤱᤎᤠᤰᤁᤡᤴ ᤛᤧᤵᤔᤠ ᤀᤠᤴᤇᤢᤰᤋᤢᤶᤔᤡᤸᤗᤥ॥”

¹¹ ᤀᤠᤏᤡᤃᤣ ᤏᤡᤱᤔᤡᤜᤠ᤹ᤖᤧᤀᤠᤱ ᤔᤧᤒᤠ᤺ᤳᤋᤢ. “ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤂᤥᤔᤠᤏᤢ ᤋᤃᤡᤀᤣ ᤀᤡᤃᤪ ᤏᤡᤔᤠᤏᤢ ᤋᤃᤡᤀᤣ ᤀᤠᤏᤡᤃᤣ ᤂᤧᤱᤜᤠ᤹ ᤑᤳᤋᤢᤶᤛᤡᤒᤧᤀᤠᤱ ᤂᤧᤱᤜᤠ᤹ ᤛᤧᤖᤢᤶᤛᤡᤶᤒᤧ ᤜᤧᤰᤁᤩᤠᤱ ᤁᤴ ᤕᤠ᤺ᤶᤒᤰᤁᤡᤴᤏᤠᤱ ᤆᤥ᤺ᤰᤔᤠ ᤔᤧᤓᤠ᤺ᤰᤋᤢᤶᤛᤡᤶᤒᤧᤴ॥”

¹² ᤁᤖ ᤏᤡᤱᤔᤡᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤕᤜᤢᤍᤡᤜᤠ᤹ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤕᤧᤳᤗᤧᤱ ᤕᤧᤳᤗᤧᤱ ᤁᤧᤖᤧᤰ ᤐᤡᤛᤠᤱᤗᤠᤶ ᤑᤵᤔᤠᤛᤡᤀᤠᤱ ᤌᤱ ᤆᤥ᤺ᤰᤔᤠ ᤆᤧᤶᤑᤴ ᤔᤧᤈᤥᤃᤢᤖ ᤔᤧᤕᤠᤰ ᤔᤧᤔᤧᤳᤋᤡᤃᤧ॥

¹³ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤏᤠᤜᤠ᤹ ᤋᤠᤓᤣ. ᤗᤠ᤺ᤰ ᤏᤢ ᤗᤡ ᤋᤥᤱ ᤜᤣᤔᤠᤀᤠᤱ ᤀᤠᤒᤠᤅᤣ ᤌᤠ᤺ᤰ ᤁᤢᤀᤡᤛᤡᤰ ᤗᤢᤱᤎᤠᤰ ᤛᤧᤵᤔᤠ ᤔᤧᤴᤈᤢ᤺ᤳᤋᤣᤒᤠ ᤋᤧᤴᤜᤠ᤹ᤀᤥ ᤀᤡᤰ ᤁᤧᤃᤥᤒᤠᤜᤠ᤹ ᤕᤧᤵᤛᤢᤱᤛᤡᤱ॥

¹⁴ ᤀᤠᤱᤃᤠ᤹ ᤁᤧᤖᤧᤰ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤕᤧᤶᤛᤡᤱᤅᤠᤱᤅᤠᤱ ᤗᤠᤶᤗᤥᤒᤠᤜᤠ᤹. ᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱ. “ᤂᤧᤱᤜᤠ᤹ᤏᤢ ᤔᤧᤃᤡᤛᤧᤶᤔᤡᤴᤏᤧ᤹॥ ᤐᤕᤶ ᤕᤶᤒᤠ ᤁᤡᤵᤔᤠ ᤁᤧᤄᤢᤒᤠ ᤕᤜᤘᤣ ᤍᤠᤱᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹॥ ᤜᤧᤰᤁᤩᤠᤱ ᤀᤠᤒᤠᤅᤣ ᤑᤢ᤹ᤏᤢᤛᤠ᤹. ᤔᤣ᤺ᤳ ᤛᤠ ᤏᤢ ᤜᤡᤶᤎᤠ᤺ᤱᤗᤧ ᤗᤠᤃᤡ ᤌᤱ ᤌᤰᤋᤧᤶᤔᤧ᤹॥”

¹⁵ ᤀᤠᤏᤡᤃᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤡᤱᤘᤠ᤹ ᤂᤥᤛᤢᤶᤒᤧ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤏᤡᤱᤔᤡᤜᤠ᤹ᤖᤧ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤏᤡᤱᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤆᤧᤶᤑᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤆᤥᤃᤢ ᤐᤡᤖᤢᤛᤡ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ॥ ᤂᤧᤒᤩᤠᤱ ᤕᤠᤶᤔᤥ ᤀᤠᤏᤡᤃᤣ ᤁᤧᤖᤧᤰ ᤗᤢᤱᤎᤠᤰ ᤛᤧᤵᤔᤠ ᤕᤠ᤺ᤶᤒᤰᤁᤥ ᤑᤴᤏᤠᤛᤡᤃᤧ॥

¹⁶ ᤂᤧᤴ ᤀᤣᤃᤠᤱ ᤁᤢᤓᤪᤧ᤺ᤱ ᤕᤠᤖᤡᤰ ᤀᤠᤔᤏᤠᤜᤠ᤹ᤖᤧ ᤕᤠ᤺ᤶᤒᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤁᤢᤓᤪᤧ᤺ᤱᤗᤧᤃ ᤛᤧ᤺ᤵᤆᤠᤱ ᤔᤧᤈᤠᤰᤛᤡᤱᤅᤠᤱ ᤗᤠ᤺ᤰ. ᤂᤥ ᤜᤧᤰᤁᤩᤠᤱ ᤋᤥᤱ ᤗᤡ ᤔᤧᤕᤠᤱᤛᤡᤱᤅᤠᤱ ᤀᤥᤔᤧᤔᤧᤳᤋᤢᤛᤡ॥ ᤀᤠᤏᤡᤃᤣ ᤕᤜᤢᤍᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤢᤴᤇᤡ᤹ ᤀᤣᤃᤠᤱ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤁᤶᤒᤪᤠᤱ ᤔᤧᤔᤧᤳᤋᤢᤛᤡ॥

¹⁷ ᤗᤢᤱᤎᤠᤰ ᤁᤧᤛᤧᤵᤐᤠᤜᤠ᤹ᤖᤧᤀᤠᤱ ᤌᤡᤰ ᤜᤢᤰᤁᤡᤸᤗᤧ ᤕᤠ᤺ᤶᤒᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤘᤣ᤹ ᤜᤢᤰᤁᤡᤸᤗᤧ ᤑᤧᤈᤢᤶᤓᤧᤕᤠ ᤔᤧᤕᤠᤱᤛᤡᤱ॥

¹⁸ ᤜᤧᤰᤁᤩᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤏᤠᤜᤠ᤹ ᤋᤠᤓᤣ ᤔᤧᤜᤣ᤹ᤛᤡᤱᤅᤠᤱ ᤕᤠ᤺ᤶᤒᤰ ᤔᤧᤈᤥᤃᤧ॥ ᤌᤢᤳᤋᤢᤖᤡ᤺ᤵᤐᤠ ᤁᤧᤔᤢ᤺ᤵᤐᤠ ᤔᤏᤠ᤺ᤴᤏᤠᤱ ᤀᤠᤱᤃᤠ᤹ᤏᤢ ᤛᤥᤖᤡᤰᤁᤣ ᤘᤕᤧ॥

¹⁹ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹. ᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤧᤖᤧᤰ ᤔᤏᤠᤜᤠ᤹ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ. “ᤕᤠ᤺ᤶᤒᤰᤁᤡᤴ ᤕᤶᤒᤠ ᤏᤢ ᤔᤠ᤺ᤱᤄᤠ ᤌᤠᤖᤡᤰ ᤐᤥᤖᤧᤒᤣᤀᤠᤱ ᤏᤧ᤹᤺ ᤜᤧᤰᤁᤩᤠᤱ ᤗᤢᤱᤎᤠᤰ ᤛᤶᤎᤠᤱ ᤀᤠᤏᤡ᤹ ᤔᤠ᤺ᤱᤄᤠ ᤔᤠ᤺ᤱᤄᤠ ᤀᤠᤘᤠ᤹॥

²⁰ ᤜᤧᤰᤁᤣ᤺ᤸᤗᤧ ᤌᤢᤳᤋᤢᤖᤡ᤺ᤵᤐᤠ ᤀᤡᤰᤗᤠᤴ ᤂᤡᤏᤡ᤹ ᤀᤠᤳᤋᤡ ᤔᤢᤰᤐᤠ ᤁᤧᤄᤧᤵᤛᤢᤶ. ᤁᤧᤖᤧᤰ ᤐᤡᤛᤠᤱᤗᤠᤶ ᤀᤠᤱᤃᤠ᤹ ᤘᤠ᤹ᤀᤠᤒᤠ ᤋᤧᤴᤏᤥ ᤆᤢᤵᤛᤧᤶᤔᤧ᤹॥ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤗᤠᤃᤡ ᤌᤱ ᤆᤥᤰ॥”

²¹ ᤀᤰᤂᤣᤗ᤹ᤖᤡᤰ ᤌᤡᤰᤕᤠ᤺ᤴᤎᤰ ᤋᤠᤏᤠᤶ ᤏᤠᤶ ᤁᤧᤖᤧᤀᤠᤱᤎᤥ ᤛᤧᤴᤍᤡᤰ ᤂᤣᤛᤣ ᤂᤣ᤺ᤶᤛᤡᤰ ᤔᤧᤴᤗᤡᤱᤅᤣ ᤌᤠᤖᤡᤰ ᤀᤠᤏᤡᤃᤣ ᤁᤢᤓᤪᤧ᤺ᤱ ᤔᤏᤠᤜᤠ᤹ᤖᤧ ᤗᤢᤱᤎᤠᤰᤁᤥ ᤕᤠ᤺ᤶᤒᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤁᤢᤓᤪᤧ᤺ᤱ ᤔᤏᤠᤜᤠ᤹ ᤗᤠ᤺ᤰ ᤔᤧᤕᤠᤱᤛᤡᤱᤅᤠᤱ ᤂᤧᤱᤜᤠ᤹ ᤔᤧᤃᤥᤛᤢᤛᤡ॥

²² ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤔᤏᤠᤜᤠ᤹ ᤀᤰᤂᤣᤀᤠᤱ ᤔᤧᤳᤋᤢᤱᤛᤡᤱ. “ᤛᤧᤴᤍᤡᤰ ᤀᤠᤏᤡᤃᤣ ᤁᤶᤒᤪᤠᤱ ᤔᤧᤵᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤗᤧᤴᤍᤡᤰ ᤗᤢᤱᤎᤠᤰ ᤛᤧᤵᤔᤠᤖᤧ ᤗᤠᤃᤡ ᤁᤧᤖᤧᤰ ᤔᤏᤠᤜᤠ᤹ ᤜᤧᤰᤁᤩᤠᤱ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤓᤠ᤹ᤒᤠᤜᤠ᤹ ᤕᤖᤢᤛᤗᤧ᤺ᤶᤔᤥᤀᤣ ᤀᤡᤶᤔᤠ ᤕᤠ᤺ᤰᤔᤠ ᤐᤥᤱ॥”

²³ ᤀᤠᤱᤃᤠ᤹. ᤀᤠᤴᤍᤣᤱ ᤀᤠᤴᤈᤢᤶ. ᤀᤠᤛᤧᤘᤠᤖᤥᤒᤠ ᤏᤢ ᤀᤠᤱᤃᤠ᤹ᤏᤢ ᤁᤧᤘᤠ᤹ᤒᤠ ᤕᤠᤵᤔᤡ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧᤀᤠᤱ ᤆᤠᤰᤂᤢᤶᤒᤧᤒᤠ ᤆᤠᤱᤍᤣ᤺ᤳᤜᤠ᤹ ᤛᤧᤴᤍᤡᤰ ᤔᤧᤓᤧᤴᤍᤢᤶᤒᤧᤴ॥ ᤆᤫᤠ᤺ᤳ ᤌᤢᤱᤛᤧ ᤐᤣ᤺ᤰᤔᤏᤠᤛᤠᤱ ᤁᤧᤖᤧᤰᤗᤧ ᤜᤢᤰᤁᤥ ᤑᤧᤈᤠᤓᤧᤕᤢᤶᤜᤠ᤹ ᤁᤳᤋᤢᤶᤒᤧᤖᤥ॥