ᤏᤜᤣᤔᤩᤠᤜ 2 - LIFOTNT

ᤏᤜᤣᤔᤩᤠᤜᤴ ᤕᤖᤢᤛᤗᤧ᤺ᤶᤔᤥ ᤐᤣᤰ

¹ ᤀᤷᤋᤠᤛᤠᤛ᤻ᤋ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤏᤡᤒᤥᤱ ᤋᤱᤒᤣ ᤁᤧᤖᤧᤸᤗᤧ ᤏᤡᤛᤠᤏ ᤗᤠᤀᤥ ᤌᤡᤰᤕᤠᤴ ᤛᤠᤓ᤺ᤱᤈᤠᤀᤥ ᤕᤢᤅᤧᤒᤠ ᤕᤧᤶᤔᤥ ᤀᤠᤱᤃᤠ᤹ ᤛᤣᤈᤱᤘᤠᤴ ᤂᤢᤏᤧ᤹ ᤁᤢᤍᤃᤡ ᤋᤥ᤺ᤴᤍᤢᤱ॥ ᤂᤢᤏᤧ᤹ ᤁᤢᤍᤃᤡ ᤀᤠᤵᤑᤠᤸᤗᤧᤀᤠᤱ ᤀᤠᤱᤃᤠ᤹ ᤀᤠᤏᤠ ᤔᤧᤶᤔᤠᤰᤁᤣ ᤘᤕᤧ॥

² ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤠᤱ. “ᤂᤧᤏᤧ᤹ ᤁᤧᤕᤠᤶ ᤋᤢᤰᤐᤠᤃ ᤏᤡᤔᤧᤍᤧᤳᤏᤧᤴ ᤜᤧᤰᤁᤣᤛᤠᤱ ᤌᤣᤀᤠᤱ ᤁᤧᤏᤠᤔᤠᤰᤐᤠᤒᤣ᥅ ᤂᤧᤏᤧ᤹ ᤛᤧᤰᤂᤠᤛᤠᤱ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤁᤧᤎᤩᤧᤀᤠᤱ ᤁᤧᤘᤠ᤹॥” ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤕᤱᤔᤠ ᤁᤧᤖᤧᤀᤠᤱ

³ ᤀᤰᤂᤣᤗ᤹ᤖᤡᤰ ᤏᤢᤃᤵ ᤐᤡᤖᤢᤱ. “ᤜᤠᤱᤅᤡᤸᤗᤧ ᤁᤢᤎᤠ᤺ᤰ ᤆᤠ᤹ᤖᤖᤥ. ᤀᤠᤱᤃᤠ᤹ ᤀᤠᤎᤠ᤺ᤰᤜᤠ᤹ ᤔᤧᤗᤢᤵᤋᤢᤛᤡᤒᤠ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧ᤹᤺ ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤕᤶᤒᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤀᤠᤱ ᤏᤧ᤹᤺ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤀᤠᤰᤂᤣᤀᤠᤱ ᤁᤢᤏᤠᤃᤧᤔᤠᤰᤐᤠ ᤔᤧᤎᤠ᤺ᤵᤐᤠᤴᤒᤣ᥅”

⁴ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤠᤱ. “ᤂᤧᤏᤧ᤹ ᤌᤣ ᤏᤡᤱᤘᤠ᤹ ᤁᤧᤈᤥᤃᤢᤒᤣ᥅” ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤢᤱ

⁵ ᤜᤧᤰᤁᤩᤠᤱ ᤜᤠᤱᤅᤡᤴ ᤔᤧᤳᤋᤢᤱ. “ᤜᤠᤱᤅᤡᤴ ᤀᤠᤱᤃᤠ᤹ᤏᤢ ᤁᤧᤏᤡᤱᤘᤠ᤹ ᤋᤩᤧᤀᤠᤱ ᤁᤧᤛᤧᤘᤠᤖᤥᤒᤠᤸᤗᤧ ᤁᤢᤒᤣᤗᤡᤴ ᤁᤧᤄᤧᤵᤛᤢᤏᤧᤓᤃᤪ ᤀᤠᤱᤃᤠ᤹ ᤕᤜᤢᤍᤠ ᤗᤠᤈᤣ᤹ᤀᤥ ᤐᤣ᤺ᤰᤔᤠ ᤑᤠ᤺ᤰᤋᤠᤱᤅᤧ᤹ᤀᤥ. ᤂᤧᤵᤔᤥ ᤀᤠᤱᤃᤠ᤹ ᤀᤠᤎᤠ᤺ᤰᤜᤠ᤹ ᤔᤧᤗᤢᤵᤋᤢᤛᤡᤀᤠᤱ ᤁᤧᤏᤧᤒᤠ ᤕᤧᤰᤕᤰᤁᤡᤴ ᤕᤠᤶᤔᤥ ᤁᤢᤛᤱ ᤆᤥ᤺ᤰᤔᤠ ᤂᤥᤛᤢᤱᤗᤖᤥ॥”

⁶ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤒᤣᤗᤡᤴ ᤂᤧᤵᤛᤢ॥ ᤜᤠᤱᤔᤠ᤺ᤴᤏᤠᤱ ᤂᤢᤏᤧ᤹ᤏᤢ ᤘᤕᤧ॥ ᤜᤠᤱᤅᤡᤸᤗᤧ ᤛᤣ᤺ᤴᤍᤥᤛᤠᤱ. “ᤂᤧᤏᤧ᤹ ᤀᤠᤰᤂᤧᤴ ᤕᤧᤴᤗᤧ ᤗᤠᤃᤡ ᤁᤧᤒᤣ᤺ᤰᤐᤠ ᤜᤧᤰᤁᤩᤠᤱ ᤀᤠᤓᤧᤸᤗᤧ ᤌᤠᤖᤡᤰᤗᤧ ᤁᤧᤏᤢ᤺ᤱ᥅” ᤀᤠᤱᤃᤠ᤹ ᤁᤶᤓ ᤌᤠᤖᤡᤰᤗᤧ ᤏᤢ᤺ᤱᤅᤠ ᤑᤠ᤹ᤀᤠᤱ ᤜᤠᤱᤅᤡᤴ ᤁᤧᤖᤧᤰ ᤆᤧᤰᤋᤢᤱ॥

⁷ ᤂᤧᤴ ᤀᤣᤃᤠᤱ ᤀᤠᤱᤃᤠ᤹ ᤕᤜᤢᤍᤠ ᤗᤠᤈᤣ᤹ ᤌᤠᤖᤡᤰ ᤐᤣ᤺ᤰᤔᤠ ᤂᤥᤛᤢᤱᤗ ᤑᤠ᤹ᤀᤠᤱ ᤕᤢᤑᤪᤣᤋᤡᤛ ᤘᤜ᤺ᤱ ᤏᤠᤎᤠ᤺ᤶᤒᤡ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥᤒᤠ ᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤅᤥ ᤛᤠᤵᤔᤏᤠᤒᤠ ᤀᤡᤱᤈᤠᤱ ᤛᤰᤜᤠ᤹ ᤜᤠᤱᤅᤡᤴ ᤏᤠ᤺ᤰᤋᤢᤱ॥

⁸ ᤔᤠᤱᤜᤡᤶᤔᤡᤴ ᤁᤶᤒᤪᤠᤱ ᤔᤧᤵᤔᤠᤖᤧ ᤗᤠᤃᤡ ᤔᤧᤈᤥᤃᤢᤒᤠ ᤆᤱᤜᤡᤶᤔᤥᤒᤠ ᤗᤠᤶᤎᤣᤳ ᤜᤧᤰᤁᤩᤠᤱ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤆᤥ᤺ᤰᤔᤠ. ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤛᤧᤵᤔᤠ ᤏᤢ ᤀᤠᤱᤃᤠ᤹ ᤀᤠᤕᤢᤱᤔᤠ ᤜᤡᤶᤔᤡᤴ ᤆᤥ᤺ᤰᤔᤠᤖᤧ ᤗᤠᤃᤡ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤛᤡᤱᤜᤠ᤹ ᤐᤡᤀᤠᤖ ᤑᤠ᤹ᤀᤠᤱ ᤜᤠᤱᤅᤡᤸᤗᤧ ᤁᤧᤍᤠᤶᤓᤢᤱ ᤗᤰᤁᤥᤒᤠ ᤛᤢᤜᤠᤱᤕᤢᤰᤐᤠ ᤀᤠᤛᤠᤐᤧᤴ ᤀᤡᤱᤈᤠᤱ-ᤛᤰ ᤌᤡᤰ ᤛᤠᤵᤋᤠᤱ ᤐᤡᤖᤠᤱᤅᤧ᤹॥ ᤀᤠᤱᤃᤠ᤹ ᤏᤠ᤺ᤰᤋᤢᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤸᤗᤧ ᤐᤡᤖᤠᤱ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ᤏᤢ ᤘᤕᤧ॥

⁹ ᤜᤠᤱᤅᤡᤸᤗᤧ ᤀᤠᤱᤃᤠ᤹ᤏᤢ ᤛᤥᤖᤡᤰ ᤐᤣ᤺ᤰᤔᤠᤖᤧ ᤗᤠᤃᤡ ᤁᤢᤓᤠ ᤀᤴ ᤁᤧᤗᤥᤱᤒᤠ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ ᤀᤠᤱᤃᤠ᤹ᤀᤥ ᤐᤠᤱᤄᤢᤛᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤢᤑᤪᤣᤋᤡᤛ ᤏᤠᤎᤠ᤺ᤶᤒᤡ ᤏᤠᤶᤎᤠ ᤐᤡᤛᤠᤱᤒᤠ ᤋᤧᤱᤃᤵᤐᤥ ᤁᤧᤖᤠᤱ॥ ᤜᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤛᤰᤜᤠ᤹ ᤀᤠᤱᤃᤠ᤹ ᤂᤧᤴ ᤋᤧᤱᤃᤵᤐᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤐᤡᤖᤢᤱᤛᤡᤱ॥

¹⁰ ᤁᤖ ᤒᤣᤌ-ᤜᤥᤖᤥᤏ ᤕᤧᤰᤕᤰᤁᤥ ᤁᤧᤕᤢᤱᤒᤠ ᤛᤴᤒᤗᤋ ᤏᤢ ᤀᤶᤔᤥᤏ ᤋᤧᤱᤃᤵᤐᤥᤒᤠ ᤋᤥᤒᤡᤕᤠ ᤔᤡᤱ ᤁᤧᤘᤠ᤺ᤵᤐᤠ ᤛᤢᤜᤠᤱᤕᤢᤰᤐᤠ ᤏᤧᤳᤇᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤢᤖᤡᤰ ᤔᤧᤳᤇᤧ ᤁᤢᤓᤠ ᤔᤏᤠᤎᤡᤰ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤐᤠᤴ ᤂᤧᤵᤛᤧᤛᤢᤀᤠᤱ ᤂᤢᤴᤇᤡ᤹ ᤛᤠ᤹ᤖᤡᤰ ᤕᤠ᤺ᤰᤗᤧ᤹ᤖᤧ॥

¹¹ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥ ᤁᤧᤖᤠᤱᤅᤠᤱ ᤂᤧᤵᤔᤥ ᤛᤢᤶᤕᤧᤴ ᤌᤠᤖᤡᤰ ᤘᤕᤠᤱ॥

¹² ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤥ ᤌᤣ ᤆᤥ᤺ᤰᤛᤧ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤜᤠ᤺ᤳᤋᤠᤱ ᤌᤣᤀᤠᤱ ᤔᤧᤶᤔᤧᤳᤇᤡᤱᤒᤠ॥ ᤂᤧᤒᤩᤠᤱ ᤛᤧᤳᤗᤢᤶᤓᤰᤋᤧᤸᤗᤧ ᤁᤢᤓᤠ ᤔᤏᤠᤜᤠ᤹ ᤆᤢᤶ ᤋᤣ᤹ᤖᤢᤱᤛᤡᤱᤅᤠᤱ ᤀᤠᤱᤃᤠ᤹ ᤗᤠ᤺ᤰᤁᤠᤳ ᤗ᤺ᤴᤍᤠᤱ॥ ᤀᤠᤱᤃᤠ᤹ ᤕᤢᤰᤋᤢᤱᤒᤠ ᤗᤳᤇᤠ ᤀᤍᤱᤎᤡᤰᤗᤰ ᤘᤕᤧ ᤘᤣ᤹ ᤌᤰᤛᤠ ᤀᤠᤏᤡᤃᤣ ᤔᤧᤃᤳᤋᤢᤶᤒᤧᤴ॥

¹³ ᤏᤠᤶᤎᤠ ᤗᤧᤵᤔᤠᤱᤒᤠ ᤏᤧᤏᤧᤒᤠᤀᤥᤒᤠ ᤕᤶᤒᤠ ᤗᤠᤶᤎᤠ᤺ᤵᤐᤥᤗᤠᤶ ᤀᤠᤱᤃᤠ᤹ ᤛᤧᤴᤍᤡᤰ ᤕᤧᤰᤕᤰᤗᤠᤶᤒᤠ ᤗ᤺ᤴᤍᤠᤱ॥ ᤕᤥᤜᤠᤱ ᤗᤧᤵᤔᤠᤱ ᤀᤠᤈᤠᤈᤠᤒᤠ ᤔᤧᤵᤔᤏᤠᤒᤠ ᤘᤠᤒᤢᤴᤏᤡᤴ ᤗᤧᤰᤋᤢᤱᤅᤠᤱ ᤀᤠᤱᤃᤠ᤹ ᤋᤠᤶ ᤗᤠᤵᤑᤣᤔᤠ ᤕᤶᤒᤠ ᤗᤠᤶᤎᤠ᤺ᤳ ᤌᤠᤖᤡᤰ ᤐᤣᤃᤠᤱ॥ ᤗᤠᤶᤔᤥ ᤀᤠᤱᤃᤠ᤹ ᤕᤧᤰᤕᤰᤁᤥᤒᤠ ᤁᤧᤗᤢ᤺ᤶᤒᤠ ᤗᤢᤱᤎᤠᤰ ᤏᤢ ᤔᤡ᤺ᤸᤗᤧ ᤔᤡᤎᤡᤰᤂᤢᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤀᤥᤔᤧᤳᤋᤢᤱᤅᤠᤱ ᤀᤰᤂᤣ ᤛᤠ᤹ᤖᤢᤱ॥

¹⁴ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤏᤠᤱᤃᤧᤴ ᤐᤡᤛᤠᤱ ᤗᤧᤵᤔᤠᤱᤒᤠ ᤘᤎᤠ᤺ᤶ ᤗᤠᤶᤎᤣᤳ ᤏᤢ ᤜᤠᤱ-ᤘᤖᤰ ᤌᤠᤖᤡᤰ ᤁᤧᤖᤠᤱ॥ ᤂᤧᤵᤔᤥ ᤀᤠᤱᤃᤠ᤹ ᤕᤢᤰᤋᤢᤱᤒᤠ ᤀᤍᤱᤅᤡᤸᤗᤧ ᤗᤠᤱᤄᤣ᤺ᤰᤔᤠ ᤐᤣ᤺ᤰᤔᤠ ᤗᤠᤶ ᤔᤧᤄᤥᤛᤢᤴ॥

¹⁵ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤛᤱᤔᤠᤱ ᤁᤡᤍᤪᤥᤏᤒᤠ ᤏᤧᤏᤧᤒᤠᤍᤧᤴᤏᤥ ᤐᤣᤃᤠᤱᤅᤠᤱ ᤗᤢᤱᤎᤠᤰᤜᤠ᤹ ᤀᤥᤔᤧᤳᤋᤢᤱᤗ ᤀᤠᤒᤠᤅᤣ ᤋᤃᤡ ᤐᤣᤃᤠᤱ॥ ᤂᤧᤴ ᤀᤣᤃᤠᤱ ᤜᤠᤒᤠ ᤂᤧᤴ ᤗᤠᤶ ᤐᤥ᤺ᤰᤂᤠᤱᤅᤠᤱ ᤀᤠᤱᤃᤠ᤹ ᤏᤢ᤺ᤰᤂᤠᤱ ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤏᤥᤒᤠ ᤋᤠ᤺ᤰᤜᤴᤗᤠᤶᤒᤠ ᤕᤧᤰᤕᤰᤁᤥ ᤗᤠᤛᤠᤱ॥

¹⁶ ᤀᤠᤱᤃᤠ᤹ ᤀᤠᤳᤋᤠᤴ ᤐᤣᤃᤠᤱ ᤜᤧᤰᤁᤩᤠᤱ ᤌᤣ ᤆᤥᤃᤢᤱ. ᤕᤧᤰᤕᤰᤁᤥᤒᤠ ᤀᤠᤳᤋᤡᤴ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤱᤄᤥᤛᤢᤴ॥ ᤀᤠᤱᤃᤠ᤹ ᤀᤠᤸᤗᤥ ᤌᤠᤖᤡᤰ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤗᤠᤶᤗᤥᤒᤠᤜᤠ᤹. ᤛᤢᤜᤠᤱᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤋᤠ᤺ᤴᤍᤡ ᤁᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤳᤋᤡᤴᤜᤠ᤹ᤀᤠᤱ ᤌᤣᤀᤠᤱ ᤔᤧᤶᤔᤧᤳᤇᤡᤱᤅᤣ ᤘᤕᤠᤱ॥

¹⁷ ᤜᤧᤰᤁᤣ᤺ᤸᤗᤧ ᤁᤢᤏᤢᤵᤔᤥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. “ᤀᤥᤔᤧᤳᤋᤧᤶᤔᤧ᤹. ᤀᤠᤏᤡ᤹ ᤀᤠᤰᤋᤱᤒᤠ ᤋᤢᤰᤂᤣᤀᤥ ᤀᤠᤘᤠ᤹. ᤕᤖᤢᤛᤗᤧ᤺ᤶᤔᤡᤴ ᤗᤢ᤺ᤴᤍᤧᤀᤠᤱ ᤏᤧ᤹᤺. ᤂᤧ᤹ᤕᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧ᤹᤺॥ ᤀᤠᤸᤗ. ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤜᤠ᤹ ᤕᤠᤶᤔᤥ ᤛᤧᤳᤋᤢᤶᤔᤠᤱ ᤁᤢᤛᤱ ᤆᤥᤃᤢᤶ ᤜᤧᤰᤁᤩᤠᤱ ᤀᤠᤏᤡ᤹ ᤏᤠᤎᤠᤔᤠ ᤔᤧᤒᤥᤱᤏᤧᤸᤗ॥”

¹⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤑᤠ᤹ᤖᤠᤱ. ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤀᤠᤱᤃᤠ᤹ ᤌᤣ ᤔᤧᤳᤋᤠᤱᤅᤠᤱ ᤘᤕᤧ ᤁᤧᤗ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ॥ ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤒᤡᤖᤠᤱ. “ᤀᤠᤏᤡ᤹ ᤕᤠᤶᤔᤥ ᤕᤧᤰᤕᤰ ᤏᤢ ᤗᤢᤱᤎᤠᤰᤜᤠ᤹ ᤛᤧᤵᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤜᤣ᤺ᤰᤋᤢᤶ॥” ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ॥

¹⁹ ᤁᤖ ᤒᤣᤌ-ᤜᤥᤖᤥᤏᤒᤠ ᤛᤴᤒᤗᤋ. ᤀᤶᤔᤥᤏᤒᤠ ᤋᤥᤒᤡᤕᤠ ᤏᤢ ᤃᤣᤛᤣᤔ ᤔᤡᤱ ᤁᤧᤘᤠ᤺ᤵᤐᤠ ᤀᤖᤒᤡᤎᤡᤰᤗᤧ ᤀᤠᤏᤡᤃᤣ ᤌᤣ ᤆᤥ᤺ᤰᤔᤠ ᤀᤡ᤺ᤳᤋᤢᤶᤒᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤔᤧᤄᤧᤵᤛᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤡᤃᤧᤀᤠᤱ ᤔᤧᤒᤠ᤺ᤳᤋᤢ. “ᤂᤡᤏᤡ᤹ ᤌᤣ ᤆᤥ᤺ᤰᤔᤠ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᥅ ᤌᤣ ᤂᤡᤏᤡ᤹ ᤜᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤁᤧᤈᤥᤃᤢᤶᤒᤠᤒᤡ᥅”

²⁰ ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱᤛᤡᤱ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡᤃᤣ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤆᤥᤃᤡᤃᤧ॥ ᤀᤠᤏᤡᤃᤣ ᤂᤢᤏᤧ᤹ ᤁᤢᤛᤧᤘᤠᤖᤥᤒᤠᤛᤡᤃᤧ ᤜᤧᤰᤁᤩᤠᤱ ᤕᤧᤰᤕᤰ ᤏᤢ ᤗᤢᤱᤎᤠᤰᤁᤡᤴ ᤛᤧᤵᤔᤠ ᤕᤠ᤺ᤶᤒᤰᤁᤡᤴ ᤆᤥᤃᤢᤶᤒᤧ॥ ᤁᤖ ᤕᤖᤢᤛᤗᤧ᤺ᤶᤔᤥᤒᤠ ᤛᤠᤵᤔᤢ᤺ᤴᤎᤢᤶᤔᤥ ᤂᤡᤏᤡ᤹ ᤗᤰ ᤏᤢ ᤕᤢᤰ ᤌᤣᤀᤠᤱ ᤜᤥᤵᤗᤥ॥”