ᤏᤜᤣᤔᤩᤠᤜ 13 - LIFOTNTᤏᤜᤣᤔᤩᤠᤜᤖᤧ ᤁᤢᤏᤢᤵᤔᤥ ᤋᤥ᤺ᤴᤍᤢᤒᤠ 1 ᤔᤥᤛᤠᤖᤧ ᤁᤢᤛᤠᤵᤐᤴᤏᤡᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤔᤧᤄᤧᤵᤛᤢᤖ ᤔᤧᤏᤡᤖᤢᤸᤗᤧ ᤂᤧᤱᤜᤠ᤹ᤖᤧ ᤀᤰᤋᤱᤒᤠ ᤐᤠᤴ ᤛᤠᤵᤋᤧᤀᤠᤱ ᤐᤳᤇᤧᤒᤠ ᤔᤧᤄᤥᤛᤢ. ᤀᤶᤔᤥᤏᤡ ᤏᤢ ᤔᤥᤀᤠᤒᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤑᤢᤳᤇᤡᤱᤔᤠ ᤔᤧᤏᤢ᤹ᤏᤧᤴ॥ 2 ᤔᤡᤛᤪ ᤗᤠᤈᤣ᤹ᤗᤠᤶᤒᤠ ᤀᤡᤛᤪᤠᤀᤡᤗᤡᤜᤠ᤹ ᤔᤧᤗ᤺ᤴᤍᤧᤀᤠᤱ ᤗᤠᤶᤍᤡ᤺ᤰᤁᤥ ᤔᤧᤓᤧᤖᤧᤸᤗᤧ ᤀᤶᤔᤥᤏᤡ ᤏᤢ ᤔᤥᤀᤠᤒᤡᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤌᤣᤀᤠᤱ ᤆᤠᤔᤠ ᤌᤢᤱᤔᤠ ᤔᤧᤶᤒᤡᤖᤢᤴᤛᤡᤴ. ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤡᤜᤠ᤹ ᤔᤠᤱᤍᤣ ᤛᤠᤰᤔᤢᤖᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤒᤠᤗᤠᤶᤔᤡᤴ ᤏᤠᤶᤕᤠᤰ ᤔᤧᤒᤡᤖᤢᤀᤠᤱ ᤘᤕᤧ॥ ᤁᤖ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤛᤠᤰᤔᤢᤖᤠ ᤔᤠᤱᤍᤣᤴ ᤜᤠᤱᤘᤠ ᤔᤠᤱᤘᤠ ᤐᤥ᤺ᤰᤂᤧᤖ ᤆᤥᤃᤢ ᤀᤠᤒᤡᤖᤧᤀᤠᤱ ᤘᤕᤧ॥ 3 ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥᤒᤠ ᤁᤴ ᤆᤥ᤺ᤰᤌᤡᤶᤔᤡᤴ ᤔᤧᤄᤧᤵᤛᤢᤀᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤘᤣ᤹ ᤗᤠᤈᤣ᤹ᤒᤠ ᤌᤠ᤺ᤰᤁᤥᤗᤠᤶ ᤁᤧᤍᤠᤒᤠ ᤁᤧᤖᤧᤰ ᤁᤧᤒ᤺ᤶᤒᤠ ᤛᤢᤘᤠᤱᤜᤠ᤹ ᤀᤠᤒᤠᤅᤣ ᤛᤱᤈᤢᤶᤓᤥᤀᤥᤏᤢ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖᤥ॥ ᤏᤜᤣᤔᤩᤠᤜ᤺ᤸᤗᤧ ᤋᤥ᤺ᤴᤍᤢᤒᤠ ᤁᤢᤕᤠ᤺ᤶᤒᤰᤜᤠ᤹ 4 ᤜᤧᤰᤁᤣ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤩᤠᤛᤡᤒᤧᤴ ᤔᤠᤱᤜᤡᤶᤔᤥᤒᤠ ᤁᤢᤈᤠ ᤕᤢᤱᤔᤠᤍᤧᤴᤜᤠ᤹ ᤀᤥᤃᤧᤔᤧᤵᤐᤠ ᤔᤧᤈᤥᤃᤢᤀᤠᤱ ᤘᤕᤧ॥ ᤂᤢᤏᤧ᤹ ᤋᤥᤒᤡᤕᤠ᤺ᤴᤏᤢ ᤛᤠ᤹ᤖᤡᤰ ᤏᤢᤖᤡᤰ ᤋᤅᤧᤀᤠᤱ ᤘᤕᤧ॥ 5 ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤕᤶᤒᤠ ᤁᤢᤈᤠ ᤕᤢᤱᤔᤠᤍᤧᤴᤎᤡᤰ ᤀᤥᤃᤠᤵ ᤆᤥ᤺ᤰᤔᤠᤖᤧ ᤗᤠᤃᤡ ᤋᤥᤒᤡᤕᤠᤴ ᤐᤡᤖᤢ॥ ᤋᤃᤡ ᤔᤠᤱᤜᤡᤶᤔᤥ ᤋᤠ᤺ᤵᤔᤏᤠᤒᤠ ᤁᤢᤈᤠ ᤛᤡᤍᤢᤱᤈᤓᤠ. ᤛᤢᤰᤐᤠ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤐᤡᤔᤏᤠᤛᤡᤒᤠ ᤛᤠᤔᤠᤜᤠ᤹. ᤌᤡᤒᤥᤱ ᤗᤰᤜᤠ᤹ ᤜᤧᤰᤁᤩᤠᤱ ᤗᤧᤒᤡᤜᤠ᤹. ᤛᤠᤶᤃᤧᤗᤥᤒᤠᤜᤠ᤹ ᤏᤢ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ ᤐᤡᤔᤏᤠᤛᤡᤒᤠ ᤁᤢᤈᤠ ᤌᤡᤒᤥᤱ ᤗᤰᤜᤠ᤹. ᤆᤧᤸᤗᤧᤰᤛᤣ᤹ ᤌᤡ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤌᤣᤕᤠᤘᤕᤠᤜᤠ᤹ ᤕᤢᤱᤔᤠᤖᤰ ᤂᤧᤴ ᤕᤠᤰᤑᤠᤱᤅᤡᤴ ᤀᤥᤃᤠᤵ ᤐᤥ᤺ᤰᤂᤧᤀᤠᤱ ᤘᤕᤧ॥ 6 ᤜᤧᤰᤁᤣ ᤐᤥ᤺ᤰᤂᤧᤸᤗᤧ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥ ᤜᤥ᤺ᤵᤋᤠᤱ. ᤌᤣᤀᤠᤱᤓᤧᤸᤗᤧ ᤀᤷᤋᤠᤛᤠᤛ᤻ᤋ ᤜᤠᤱᤅᤡᤸᤗᤧ ᤜᤠᤱ ᤆᤥᤃᤢᤒᤠ ᤛᤢᤶᤒᤥᤱᤅᤠᤱ ᤏᤧᤳᤇᤡ ᤋᤱᤒᤣᤀᤥ ᤀᤠᤱᤃᤠ᤹ ᤒᤣᤒᤡᤗᤥᤏ ᤐᤣᤃᤠᤱᤅᤠᤱ ᤘᤕᤠᤱ॥ ᤁᤢᤓᤠ ᤕᤧᤶ ᤀᤣᤃᤠᤱ ᤀᤠᤱᤃᤠ᤹ ᤕᤖᤢᤛᤗᤧᤔ ᤏᤢ᤺ᤱᤔᤠ ᤐᤣᤗᤡ ᤑᤠᤰᤋᤢᤱ. 7 ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤏᤢ᤺ᤰᤂᤠᤱ॥ ᤜᤧᤰᤁᤣ᤺ᤸᤗᤧ ᤀᤣᤗᤩᤠᤛᤡᤒᤖᤧ ᤋᤥᤒᤡᤕᤠᤴ ᤔᤠᤱᤜᤡᤶᤔᤥᤒᤠ ᤕᤠᤰᤑᤠᤱᤅᤡᤴ ᤐᤡᤖᤢᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤏᤡᤛᤢᤱ॥ 8 ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥᤃᤧᤀᤠᤱ ᤁᤢᤈᤠ ᤕᤢᤱᤔᤠᤍᤧᤴᤏᤥᤗᤠᤶ ᤋᤥᤒᤡᤕᤠ᤺ᤸᤗᤧ ᤁᤢᤛᤠᤔᤠᤜᤠ᤹ ᤁᤧᤖᤧᤰ ᤗᤠᤵᤑᤢᤛᤢᤱ ᤐᤡᤖᤢᤱ॥ 9 ᤀᤠᤱᤃᤠ᤹ ᤔᤠᤱᤜᤡᤶᤔᤥᤒᤠ ᤕᤠᤰᤑᤠᤱᤜᤠ᤹ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤆᤥ᤺ᤰᤔᤠ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤜᤢᤰᤘᤠ ᤕᤢᤱᤔᤠ ᤐᤥᤃᤢᤃᤧᤴ ᤁᤢᤈᤠ. ᤛᤢᤰᤐᤠᤜᤠ᤹ ᤏᤢ ᤛᤠᤔᤠᤜᤠ᤹ ᤛᤡᤵᤐᤧᤳ ᤏᤧᤵᤐᤧᤳ ᤕᤢᤱᤔᤠ ᤐᤠᤱᤄᤢᤱᤛᤡᤱᤗᤥ॥ 10 ᤔᤠᤱᤜᤡᤶᤔᤥ ᤛᤠᤶᤃᤧᤗᤥᤒᤠᤜᤠ᤹ ᤏᤢ ᤘᤣ᤹ ᤗᤧᤒᤡᤜᤠ᤹ᤖᤧ ᤂᤥᤔᤠ ᤁᤧᤒᤥᤱᤒᤠ ᤜᤢᤰᤘᤠ ᤁᤢᤈᤠᤜᤠ᤹ ᤔᤏᤠᤜᤠ᤹ᤖᤧ ᤐᤡᤔᤠ ᤔᤧᤗᤧᤖᤢᤛᤡᤀᤠᤱ ᤘᤕᤧᤒᤠᤴ ᤏᤡᤛᤢᤱ॥ ᤂᤧᤸᤗᤧᤆᤥᤃᤢᤸᤗᤧ ᤔᤠᤱᤜᤡᤶᤔᤥᤒᤠ ᤂᤢᤴᤇᤡ᤹ ᤕᤠ᤺ᤶᤒᤰᤜᤠ᤹ ᤔᤧᤗᤧᤖᤢᤀᤠᤱ ᤀᤠᤒᤠᤅᤣ ᤂᤢᤏᤡ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤔᤧᤏᤢ᤺ᤰᤂᤧ ᤔᤧᤒᤣᤀᤠᤱ ᤔᤧᤘᤠ᤹ ᤁᤧᤗ᤹ᤒᤠᤀᤠᤱ ᤂᤧᤵᤛᤢᤱ॥ 11 ᤔᤠᤱᤜᤡᤶᤔᤥ ᤏᤡᤱᤘᤠ᤹ ᤐᤡᤔᤠ ᤔᤧᤗᤧᤖᤢᤒᤠᤸᤗᤧ ᤆᤥᤃᤢᤸᤗᤧ ᤛᤢᤜᤠᤱᤕᤢᤰᤐᤠᤜᤠ᤹ ᤀᤰᤂᤣᤗ᤹ᤖᤡᤰ ᤑᤧ᤺ᤰᤋᤢᤱᤛᤡᤱ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤴ ᤌᤣᤀᤠᤱ ᤁᤢᤏᤠᤔᤧᤴᤇᤠ᤹ ᤐᤥ᤺ᤰᤂᤧᤒᤠᤒᤣ᥅” ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱᤅᤠᤱ ᤕᤠᤶᤔᤥ ᤀᤠᤒᤠᤅᤣ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤑᤳᤇᤢᤱᤛᤡᤱ॥ 12 ᤜᤧᤰᤁᤩᤠᤱ ᤕᤠᤶᤔᤥ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤠᤱᤜᤡᤶᤔᤥᤒᤠ ᤁᤢᤈᤠ ᤕᤢᤱᤔᤠᤍᤧᤴᤏᤥ ᤐᤥᤃᤢᤃᤧᤴ ᤁᤢᤈᤠ. ᤆᤧᤸᤗᤧᤰᤛᤣ᤹ ᤌᤡ ᤜᤧᤰᤁᤩᤠᤱ ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣᤸᤗᤧ ᤌᤡᤒᤥᤱᤗᤰ ᤋᤠ᤺ᤵᤔᤠ ᤔᤧᤜᤣ᤺ᤰᤋᤢ॥ 13 ᤁᤢᤈᤠ ᤕᤢᤱᤔᤠᤍᤧᤴᤏᤡᤴ ᤁᤶᤒᤪᤠᤱ ᤔᤧᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤛᤠᤶᤒᤠ ᤛᤣᤗᤣᤔᤩᤠᤜᤴ. ᤛᤠᤶᤕᤥᤌᤡᤶᤛᤠᤶᤒᤠ ᤛᤠᤍᤥᤁᤧᤴ ᤜᤧᤰᤁᤩᤠᤱ ᤗᤧᤒᤡ ᤐᤍᤠᤕᤠᤜᤴ ᤀᤠᤱᤃᤠ᤹ ᤗᤰᤐᤧᤴ ᤐᤡᤖᤢᤱᤛᤡᤱ॥ ᤈᤰᤁᤢᤖᤧᤸᤗᤧ ᤁᤢᤛ᤻ᤛᤠ ᤜᤧᤰᤁᤩᤠᤱ ᤔᤳᤋᤏᤩᤠᤜᤖᤧ ᤁᤢᤶᤔᤧᤴᤇᤠ᤹ ᤜᤠᤏᤠᤏᤧᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤑᤥᤛᤠᤱ ᤑᤠ᤹ᤒᤠᤱ ᤛᤣ᤺ᤰᤕᤢᤰ ᤆᤥᤃᤢᤱᤅᤠᤱ ᤘᤕᤧ॥ ᤁᤴ ᤔᤏᤠᤜᤠ᤹ᤖᤧ ᤏᤛᤠ᤺ᤴᤛᤠᤒᤠ ᤔᤧᤒᤥᤱᤅᤠᤱ ᤀᤠᤒᤠᤅᤣ ᤂᤢᤏᤡ᤹ ᤑᤠ᤹ᤒᤠᤱᤜᤠ᤹ ᤗᤢᤶᤔᤥ ᤆᤢᤶᤍᤣᤱᤜᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤋᤢᤛᤡ ᤁᤧᤗ᤹ᤒᤠ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤕᤠᤱ॥ 14 ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤔᤠᤱᤜᤡᤶᤔᤡᤴ ᤏᤢ ᤂᤧᤵᤔᤥ ᤆᤰᤔᤧᤸᤗ᤹ᤀᤣ ᤀᤠᤱᤃᤠ᤹ ᤆᤥᤃᤢᤱᤒᤠ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ᤛᤥᤀᤥ ᤁᤳᤋᤧ᤹ᤀᤥ॥ 15 ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤕᤜᤢᤍᤠᤒᤠ ᤁᤢᤓᤠ ᤔᤏᤠᤜᤠ᤹ᤖᤧ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤆᤧᤸᤗᤧᤰᤛᤣ᤹ ᤔᤧᤀᤣ᤺ᤵᤛᤢᤖ ᤔᤧᤕᤠᤃᤧᤒᤠ ᤏᤡᤛᤢᤱ॥ ᤘᤣ᤹ ᤔᤏᤠᤜᤠ᤹ᤖᤧ ᤐᤥᤃᤢᤃᤧᤴ ᤁᤢᤈᤠ. ᤆᤧᤸᤗᤧᤰᤛᤣ᤹ ᤌᤡ. ᤆᤧᤸᤗᤧᤰᤛᤣ᤹. ᤐ᤺ᤳᤇᤣ᤹ ᤏᤢ ᤘᤣ᤹ ᤐᤠ᤺ᤴᤜᤠ᤹ᤖᤧ ᤁᤰᤜᤠ᤹ ᤀᤍᤱᤜᤠ᤹ ᤔᤧᤃᤢ᤺ᤳᤋᤢᤛᤡᤀᤠᤱ ᤕᤖᤢᤛᤗᤧ᤺ᤶᤔᤥ ᤔᤧᤍᤣ᤹ᤖᤢᤖ ᤔᤧᤒᤳᤇᤧᤒᤠ ᤏᤡᤛᤢᤱ॥ ᤀᤠᤱᤃᤠ᤹ ᤂᤧᤱᤜᤠ᤹ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤌᤣᤀᤠᤱ ᤁᤢᤈᤠ ᤛᤱᤔᤠ ᤔᤧᤏᤢ᤹ᤏᤧᤴ ᤑᤠ᤹ᤀᤠᤱ ᤛᤠᤶᤍᤡᤱ ᤐᤡᤖᤢᤱᤛᤡᤱ॥ 16 ᤕᤖᤢᤛᤗᤧ᤺ᤶᤔᤥ ᤁᤧᤕᤢᤱᤒᤠ ᤋᤢᤖᤥᤛᤒᤠ ᤔᤏᤠᤜᤠ᤹ᤖᤧᤀᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤅᤠ ᤏᤢ ᤘᤣ᤹ ᤁᤧᤖᤧᤰ ᤐᤖᤡᤰᤐᤠ ᤆᤡᤃᤰᤘᤠᤜᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ᤀᤥ ᤛᤱᤛᤧ ᤔᤧᤍᤠᤖᤢ॥ 17 ᤀᤠᤱᤃᤠ᤹ ᤕᤜᤢᤍᤠᤒᤠ ᤛᤢᤓᤠᤜᤠ᤹ ᤑᤧ᤺ᤰᤋᤢᤱᤛᤡᤱᤅᤠᤱ ᤔᤧᤳᤋᤢᤱᤛᤡᤱ. “ᤌᤣᤀᤠᤱ ᤂᤡᤏᤡ᤹ ᤋᤠᤰᤁᤧᤓᤧ᤹ᤒᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤀᤠᤛᤢᤳᤌᤥ ᤁᤧᤈᤥᤃᤢᤶᤒᤠᤒᤣ᥅ 18 ᤀᤠᤶᤓᤠ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤛᤢᤎᤧᤒᤠ ᤋᤠᤰᤌᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ᤀᤥ ᤏᤢ ᤁᤴ ᤕᤧᤰᤕᤰᤁᤥ ᤋᤢᤰᤂᤣ ᤋᤠᤖᤢᤒᤠ ᤔᤣ᤺ᤶᤒᤡ᥅ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤀᤠᤛᤢᤳᤌᤥ ᤁᤧᤈᤥᤃᤢᤶᤔᤠᤱ ᤀᤠᤖᤛᤠᤱ ᤕᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰ ᤁᤧᤓᤥ᤺ᤰᤂᤢᤶᤗ ᤁᤧᤒᤳᤇᤡᤖᤥ॥” 19 ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤜᤣ᤺ᤰᤛᤡᤱᤒᤠ ᤕᤢ᤺ᤴᤇᤡᤰ ᤐᤥᤱᤏᤢᤔᤧ᤺ᤴᤏᤣ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤛᤢᤒᤧᤶᤔᤧ᤹ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤂᤧᤴ ᤔᤧᤜᤴᤍᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ॥ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤆᤡᤃᤰᤘᤠᤏᤢ ᤕᤧᤰᤕᤰ ᤛᤡᤃᤠᤱ ᤜᤠ᤺ᤳᤋᤠᤱ ᤗᤠ᤺ᤵᤔᤠ ᤔᤧᤄᤥᤏᤧᤸᤗ ᤑᤠ᤹ᤀᤠᤱ ᤀᤥᤔᤧᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤢᤓᤠ ᤀᤠᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤗᤠᤶᤎᤣ᤺ᤵ ᤜᤧᤱᤃᤠᤳᤋᤡ ᤕᤧᤵᤔᤠ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ॥ 20 ᤌᤡᤰᤗᤧᤱ ᤏᤡᤗᤧᤱ ᤐᤖᤡᤰ ᤐᤖᤡᤰᤐᤠ ᤆᤡᤃᤰᤘᤠ ᤁᤧᤛᤱᤒᤠ ᤗᤧᤱᤜᤱᤒᤠᤜᤠ᤹ ᤕᤧᤰᤕᤰ ᤗᤢᤱᤎᤠᤰ ᤗᤠ᤺ᤰᤁᤠᤳ ᤗᤧᤵᤔᤠᤱᤅᤣ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤸᤗᤧ ᤁᤢᤀᤠᤴᤇᤧᤶᤒᤠ ᤛᤧᤴᤍᤡᤰ ᤔᤧᤀᤡᤵᤛᤧ॥ 21 ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ ᤐᤠᤴ ᤔᤧᤳᤋᤢᤱᤛᤡᤱ. “ᤂᤡᤏᤡ᤹ ᤌᤣᤀᤠᤱ ᤜᤧᤰᤁᤣᤗ᤹ᤖᤡᤰ ᤗᤠ᤺ᤰᤁᤠᤳ ᤁᤧᤏᤧᤛ᤻ᤛᤡᤒᤠᤒᤣ᥅ ᤕᤠᤶᤔᤥ ᤜᤧᤰᤁᤣ ᤁᤧᤈᤥᤃᤢᤶᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤁᤧᤛᤠᤰᤐᤠ ᤛᤠᤶᤒᤠᤴ ᤁᤢ᤺ᤳᤏᤡᤱ॥” ᤂᤧᤴᤏᤠᤱᤎᤥ ᤂᤧᤱᤜᤠ᤹ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤋᤠᤔᤠ ᤔᤧᤏᤠ᤹ᤖᤧ॥ 22 ᤀᤠᤱᤃᤠ᤹ ᤗᤧᤒᤡᤜᤠ᤹ ᤀᤠᤒᤠᤅᤣ ᤛᤢᤳᤌᤥ ᤐᤥᤱᤔᤠ. ᤐᤣ᤺ᤰᤔᤠᤀᤠᤱ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤁᤥᤔᤠ ᤏᤢ ᤏᤠ᤺ᤶᤛᤡᤱᤔᤠ ᤕᤧᤴᤏᤡᤴ ᤛᤣᤛᤣ ᤁᤵᤔᤠ ᤌᤡᤶᤔᤡᤴ ᤏᤢᤖᤡᤰᤁᤠᤱ ᤏᤠ᤺ᤵᤔᤠ ᤀᤡᤱᤈᤠᤱ ᤐᤡᤖᤢᤱᤛᤡᤱ॥ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤀᤠᤗᤠᤃᤡ ᤁᤴ ᤏᤡᤱᤘᤠ᤹ᤛᤥᤀᤥ ᤁᤳᤋᤧ᤹ᤀᤥ ᤜᤧᤰᤁᤩᤠᤱ ᤂᤧᤏᤧ᤹ ᤐᤕᤶ ᤕᤶᤒᤠ ᤁᤧᤔᤡ᤺ᤶᤈᤡ᤺ᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ॥ 23 ᤂᤧᤴ ᤕᤧᤶᤔᤥᤀᤠᤱ ᤕᤖᤡᤰ ᤕᤜᤢᤍᤠᤒᤠ ᤕᤧᤶᤒᤡᤳᤇᤠᤜᤠ᤹ᤖᤧ ᤀᤛ᤻ᤍᤥᤍ. ᤀᤶᤔᤥᤏ ᤏᤢ ᤔᤥᤀᤠᤒᤒᤠ ᤔᤧᤴᤇᤢᤔᤠᤜᤠ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤔᤧᤳᤋᤢᤛᤡᤀᤠᤱ ᤔᤧᤘᤕᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ 24 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤁᤢᤓᤪᤧ᤺ᤱ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤀᤛ᤻ᤍᤥᤍᤒᤠ ᤀᤡᤃᤪ ᤘᤣ᤹ ᤐᤠ᤺ᤴᤍᤠᤱ ᤔᤧᤒᤠᤖᤧ ᤁᤖ ᤕᤜᤢᤍᤡ ᤐᤠ᤺ᤴᤍᤠᤱᤅᤡᤴ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ॥ 25 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤴ ᤔᤏᤠᤜᤠ᤹ ᤑᤧ᤺ᤰᤋᤢᤱᤛᤡᤱ. ᤛᤠᤰᤔᤢᤖᤠ ᤔᤠᤱᤍᤣ ᤔᤧᤳᤋᤢᤱᤛᤡᤱ. ᤜᤡᤵᤋᤢᤱᤛᤡᤱᤅᤠᤱ ᤂᤢᤏᤡ᤹ ᤌᤠ᤺ᤰᤑᤔᤠᤜᤠ᤹ ᤀᤢ᤺ᤰᤂᤢᤱ ᤐᤡᤖᤢᤱᤛᤡᤱ॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤛᤠᤜᤠ᤹ᤖᤧ ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ ᤔᤣ᤺ᤰᤂᤡᤶ ᤔᤧᤴᤈᤥᤃᤢᤸᤗ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤱᤛᤡᤱ॥ 26 ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. “ᤘᤣ᤹ ᤛᤢᤘᤠᤱᤛᤔᤠ ᤔᤧᤴᤇᤢᤔᤠ᤹ᤜᤠ᤹ᤖᤧ ᤛᤥᤗᤥᤔᤏ ᤜᤠᤱᤅᤡᤴ ᤗᤠᤕᤥ ᤆᤥ᤺ᤰᤔᤠ ᤔᤧᤒᤠᤱᤄᤢᤀᤠᤱ ᤘᤕᤧ॥ ᤂᤢᤏᤧ᤹ ᤘᤣ᤹ ᤁᤧᤖᤧᤰ ᤗᤠᤈᤣ᤹ᤒᤠ ᤜᤠᤱᤜᤠ᤹ᤏᤢ᤺ᤸᤗᤧᤀᤠᤱ ᤁᤢᤔᤡᤱ ᤁᤧᤀᤡᤱᤒᤠ ᤆᤥᤃᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤘᤕᤧ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗ ᤛᤶᤎᤠᤱ ᤂᤢᤏᤧ᤹ ᤜᤠᤱ ᤆᤥᤃᤢ॥ ᤁᤖᤛᤠᤱ ᤘᤣ᤹ ᤛᤢᤘᤠᤱᤛᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤧ᤹ ᤗᤠᤕᤥ ᤆᤥ᤺ᤰᤔᤠ ᤔᤧᤒᤠᤱᤄᤢ॥ 27 ᤀᤠᤸᤗ ᤌᤣ ᤀᤠᤏᤡ᤹ᤀᤠᤱ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤢᤔᤠᤜᤠ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤵᤔᤠᤛᤡᤀᤠᤱ ᤀᤠᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤑᤣ᤺ᤶᤔᤠᤒᤡ᥅” 28 ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤩᤠᤛᤡᤒᤖᤧ ᤁᤢᤛ᤻ᤛᤠ ᤕᤥᤕᤠᤍᤠ᤺ᤸᤗᤧ ᤁᤢᤛ᤻ᤛᤠᤎᤡᤰᤗᤧ ᤒᤣᤌ-ᤜᤥᤖᤥᤏ ᤁᤧᤕᤢᤱᤒᤠ ᤛᤴᤒᤗᤋᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤘᤕᤧ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤥᤕᤠᤍᤠᤴ ᤕᤖᤢᤛᤗᤧ᤺ᤶᤔᤡᤴ ᤗᤧᤵᤔᤠ ᤐᤠᤱᤄᤢᤱ॥ 29 ᤀᤠᤏᤡᤱᤘᤠ᤹ᤑᤢᤔᤠᤱᤅᤣ᥄ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤡᤱᤛᤥ ᤕᤢᤰᤏᤠ ᤁᤧᤈᤡ᤺ᤶᤒᤠᤜᤠ᤹ ᤜᤧᤰᤁᤩᤠᤱ ᤗᤧᤒᤡ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤔᤠᤱᤜᤧᤰ ᤁᤧᤓᤣ᤺ᤶᤒᤠ ᤔᤏᤠᤜᤠ᤹ ᤏᤡᤱᤘᤠ᤹ ᤀᤡ᤺ᤳᤋᤧᤛᤧ᤹ᤀᤥ᥄ 30 ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤗᤠᤶ ᤛᤢᤳᤌᤥ ᤆᤥᤃᤢᤱᤛᤡᤱ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤡ᤹ ᤕᤠ᤺ᤶᤒᤰᤁᤥ ᤑᤳᤇᤢᤱᤛᤡᤱ॥ 31 ᤋᤠ᤺ᤵᤔᤠ ᤁᤧᤒᤥᤱᤒᤠ ᤕᤧᤶᤔᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤸᤗᤧ ᤆᤠᤜᤠᤒ᤻ ᤁᤧᤈᤥ᤺ᤰᤐᤠ ᤛᤡᤱᤅᤡᤴ ᤋᤠ᤺ᤵᤔᤠ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤢᤶᤒᤠ ᤐᤥᤃᤢᤃᤧᤴ ᤁᤢᤈᤠ ᤏᤢ ᤛᤡᤱᤛᤣ᤹ᤜᤠ᤹ ᤋᤠ᤺ᤵᤔᤠᤖᤧ ᤗᤠᤃᤡᤀᤠᤱ ᤋᤱᤃᤠᤶ ᤆᤥᤃᤢᤱ ᤐᤡᤖᤢᤱᤛᤡᤱ॥ ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤠᤱᤅᤧ᤹ᤀᤠᤱ ᤀᤠᤗᤠᤃᤡ ᤏᤢᤒᤠ ᤆᤥᤃᤧ᤹ᤀᤥ᥄ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.