ᤏᤜᤣᤔᤩᤠᤜ 12 - LIFOTNTᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤗᤧᤒᤡᤜᤠ᤹ 1 ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤖᤢᤒᤠᤒᤣᤗ ᤜᤧᤰᤁᤩᤠᤱ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤣᤛᤢᤀᤠ᤺ᤴᤏᤢ ᤛᤥᤖᤡᤰ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤗᤧᤒᤡᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ— ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹— ᤛᤖᤠᤕᤠᤜ. ᤕᤷᤔᤡᤕᤠ. ᤀᤧᤈᤪᤠ. 2 ᤀᤔᤷᤕᤠᤜ ᤔᤸᤗᤢᤁ. ᤜᤳᤋᤢᤛ. 3 ᤛᤁᤏᤩᤠᤜ. ᤖᤣᤜᤢᤔ. ᤔᤖᤣᤔᤥᤋ. 4 ᤀᤡᤍ᤻ᤍᤥ. ᤃᤡᤴᤏᤋᤥᤏ. ᤀᤒᤡᤕᤠ. 5 ᤔᤡᤕᤠᤔᤡᤏ. ᤔᤍᤠᤜᤠ. ᤒᤡᤸᤃᤠ. 6 ᤛᤔᤠᤕᤠᤜ. ᤕᤥᤕᤠᤖᤡᤒ. ᤕᤍᤠᤕᤠᤜ. 7 ᤛᤸᤗᤢ. ᤀᤔᤥᤁ. ᤜᤡᤸᤁᤡᤕᤠᤜ ᤜᤧᤰᤁᤩᤠᤱ ᤕᤍᤠᤕᤠᤜ॥ ᤕᤣᤛᤢᤀᤖᤧ ᤁᤢᤒᤠ᤺ᤸᤗᤠᤀᤥ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤓᤠ᤹ᤒᤠ ᤗᤠᤶᤗᤥᤒᤠ ᤁᤴᤜᤠ᤹ ᤔᤧᤘᤕᤧ॥ 8 ᤗᤧᤒᤡᤜᤠ᤹— ᤕᤣᤛᤢᤀᤠ. ᤒᤡᤴᤏᤢᤀᤡ. ᤁᤠᤍᤔᤡᤀᤣᤗ. ᤛᤖᤣᤒᤡᤕᤠᤜ. ᤕᤜᤢᤍᤠ. ᤔᤳᤋᤏᤩᤠᤜ ᤏᤢ ᤂᤢᤏᤧ᤹ ᤁᤢᤓᤠ᤹ᤁᤢᤒᤠᤱᤜᤠ᤹ᤖᤧ ᤏᤥᤃᤧᤴ ᤋᤥ᤺ᤶᤔᤠ ᤛᤧᤘᤠᤛᤠᤶᤗᤥ ᤛᤠᤶᤔᤧᤵᤔᤠ ᤗᤰᤐᤧᤴ ᤔᤧᤄᤥᤛᤢᤀᤠᤱ ᤔᤧᤘᤕᤧ॥ 9 ᤂᤧᤱᤜᤠ᤹ ᤁᤧᤓᤠ᤹ᤒᤠ ᤒᤰᤒᤢᤁᤩᤠᤜ. ᤀᤢᤴᤏᤡᤴ ᤏᤢ ᤘᤣ᤹ ᤗᤧᤒᤡᤜᤠ᤹ᤖᤧ ᤐᤠ᤺ᤸᤗᤥᤒᤠ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖᤥ॥ 10 ᤕᤣᤛᤢᤀᤠᤴ ᤕᤥᤕᤠᤁᤡᤔᤖᤧ ᤁᤢᤶᤒᤠ. ᤕᤥᤕᤠᤁᤡᤔᤧᤴ ᤀᤣᤗᤩᤠᤛᤡᤒᤖᤧ ᤁᤢᤶᤒᤠ. ᤀᤣᤗᤩᤠᤛᤡᤒᤧᤴ ᤕᤥᤕᤠᤍᤠᤖᤧ ᤁᤢᤶᤒᤠ. 11 ᤕᤥᤕᤠᤍᤠᤴ ᤈᤥᤏᤠᤌᤏᤖᤧ ᤁᤢᤶᤒᤠ ᤜᤧᤰᤁᤩᤠᤱ ᤈᤥᤏᤠᤌᤏᤧᤴ ᤕᤍ᤻ᤍᤢᤀᤖᤧ ᤁᤢᤶᤒᤠ ᤘᤕᤧᤖᤥ॥ 12 ᤕᤥᤕᤠᤁᤡᤔᤧᤴ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤘᤕᤧᤸᤗᤧ ᤁᤴᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤶᤛᤕᤱᤒᤠ ᤛᤢᤓᤠ ᤔᤧᤘᤕᤧᤖᤥ— ᤏᤡᤱᤘᤠ᤹ᤑᤢᤛᤠᤶᤒᤠ ᤗᤠᤶᤗᤥᤒᤠᤜᤠ᤹— ᤌᤠ᤺ᤰ ᤔᤖᤠᤕᤠᤜ— ᤛᤖᤠᤕᤠᤜ ᤜᤏᤏᤩᤠᤜ— ᤕᤷᤔᤡᤕᤠ 13 ᤔᤛᤢᤸᤗᤠᤔ— ᤀᤧᤈᤪᤠ ᤕᤣᤜᤥᤜᤠᤏᤠᤏ— ᤀᤔᤷᤕᤠᤜ 14 ᤈᤥᤏᤠᤌᤏ— ᤔᤸᤗᤢᤁ ᤕᤥᤛᤣᤑᤛ— ᤁᤏᤩᤠᤜ 15 ᤀᤍᤏᤠ— ᤜᤠᤖᤡᤔ ᤜᤸᤁᤤ— ᤔᤖᤣᤔᤥᤋ 16 ᤈᤁᤖᤡᤕᤠ— ᤀᤡᤍ᤻ᤍᤥ ᤔᤛᤢᤸᤗᤠᤔ— ᤃᤡᤴᤏᤋᤥᤏ 17 ᤈᤡᤁᤪᤡ— ᤀᤒᤡᤕᤠ ᤔᤡᤏᤩᤠᤔᤡᤏ ᤏᤢ ᤔᤥᤍᤠᤜᤠ— ᤐᤡᤸᤋᤤ 18 ᤛᤶᤔᤢᤀ— ᤒᤡᤸᤃᤠ ᤕᤜᤥᤏᤠᤋᤠᤏ— ᤛᤔᤠᤕᤠᤜ 19 ᤔᤳᤋᤏᤤ— ᤕᤥᤕᤠᤖᤡᤒ ᤀᤢᤈ᤻ᤈᤡ— ᤕᤍᤠᤕᤠ 20 ᤁᤸᤗᤤ— ᤛᤸᤗᤢ ᤀᤣᤒᤣᤖ— ᤀᤔᤥᤁ 21 ᤜᤛᤒᤩᤠᤜ— ᤜᤡᤸᤁᤡᤕᤠᤜ ᤏᤋᤏᤣᤗ— ᤕᤍᤠᤕᤠᤜ 22 ᤀᤣᤗᤩᤠᤛᤡᤒ. ᤕᤥᤕᤠᤍᤠ. ᤕᤥᤜᤠᤏᤠᤏ ᤏᤢ ᤕᤣᤍ᤻ᤍᤢᤀ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤡᤱᤔᤴᤏᤥ ᤗᤧᤒᤡ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤡᤶᤛᤕᤱᤒᤠ ᤛᤢᤓᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤛᤪᤠ ᤔᤧᤕᤢᤰᤂᤢ ᤔᤧᤒᤡᤖᤢᤛᤡᤀᤠᤱ ᤔᤧᤘᤕᤧ॥ ᤑᤠᤖᤛ ᤗᤠᤈᤣ᤹ᤀᤥ ᤐᤕᤶ ᤜᤠᤱ ᤍᤠᤖᤠ᤺ᤸᤗᤧ ᤜᤠᤱ ᤆᤥᤃᤢᤒᤠ ᤕᤧᤶᤔᤥᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤛᤪᤠᤴ ᤔᤧᤛᤠᤵᤋᤢ ᤔᤧᤛᤢᤖᤢᤀᤠᤱ ᤏᤧᤛ᤻ᤛᤧ॥ 23 ᤗᤧᤒᤡ ᤜᤡᤶᤛᤕᤱᤒᤠ ᤛᤢᤓᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤀᤣᤗᤩᤠᤛᤡᤒᤖᤧ ᤁᤢᤶᤔᤧᤴᤇᤠ᤹ ᤕᤥᤜᤠᤏᤠᤏᤖᤧ ᤁᤢᤕᤧᤶ ᤌᤠᤖᤡᤰᤗᤰ ᤛᤠᤵᤔᤢ᤺ᤴᤎᤢᤶᤔᤥ ᤔᤧᤛᤠᤵᤋᤢᤀᤠᤱ ᤘᤕᤧᤖᤥ॥ 24 ᤗᤧᤒᤡᤜᤠ᤹ ᤁᤢᤗᤢᤵ ᤁᤢᤗᤢᤵ ᤔᤧᤜᤠᤛᤡᤱᤅᤠᤱ ᤔᤧᤘᤕᤧ॥ ᤂᤧᤴ ᤗᤢᤵᤐᤥᤒᤠ ᤗᤠᤶᤗᤥᤒᤠᤜᤠ᤹ ᤜᤛᤒᤩᤠᤜ. ᤛᤖᤣᤒᤡᤕᤠᤜ ᤜᤧᤰᤁᤩᤠᤱ ᤁᤠᤍᤔᤡᤀᤣᤗᤖᤧ ᤁᤢᤛ᤻ᤛᤠ ᤕᤣᤛᤢᤀᤠ ᤔᤧᤘᤕᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤐᤡᤖᤢᤛᤡᤒᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤕᤧᤶᤎᤡᤰᤗᤧ ᤐᤠ᤺ᤸᤗᤥᤒᤠ ᤔᤧᤈᤩᤧᤖ ᤏᤧᤵᤑᤢ ᤗᤢᤵᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥᤛᤢ ᤜᤧᤰᤁᤩᤠᤱ ᤏᤢᤃᤧᤴ ᤔᤧᤒᤡᤖᤢ॥ 25 ᤔᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱᤒᤠ ᤕᤢᤱᤔᤠᤍᤧᤴᤜᤠ᤹ᤀᤥ ᤁᤧᤃᤥᤒᤠ ᤔᤳᤋᤏᤩᤠᤜ. ᤒᤰᤒᤢᤁᤩᤠᤜ. ᤀᤥᤒᤍᤡᤕᤠ. ᤔᤛᤢᤸᤗᤠᤔ. ᤋᤸᤔᤥᤏ ᤜᤧᤰᤁᤩᤠᤱ ᤀᤰᤁᤢᤒᤖᤧ ᤗᤠᤶᤎᤣ᤺ᤳᤜᤠ᤹ ᤁᤥᤔᤠ ᤁᤧᤒᤥᤱᤒᤠ ᤘᤕᤧ॥ 26 ᤕᤣᤛᤢᤀᤖᤧ ᤁᤢᤛ᤻ᤛᤠ ᤏᤢ ᤕᤜᤥᤛᤠᤍᤠᤁᤖᤧ ᤁᤢᤶᤔᤧᤴᤇᤠ᤹ ᤕᤥᤕᤠᤁᤡᤔᤖᤧ ᤁᤢᤕᤧᤶᤔᤥ ᤁᤴ ᤔᤏᤠᤜᤠ᤹ ᤜᤧᤰᤁᤣᤗ᤹ᤖᤡᤰ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤢᤛᤡᤀᤠᤱ ᤘᤕᤧ॥ ᤂᤧᤴ ᤕᤧᤶᤔᤥ ᤋᤢᤶ ᤜᤠᤱᤕᤢᤰᤐᤠ ᤏᤜᤣᤔᤩᤠᤜᤴ ᤏᤢ ᤛᤠᤶᤕᤥᤌᤡᤶᤛᤠᤶᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠᤴ ᤘᤕᤧᤛᤡᤖᤥ॥ ᤏᤜᤣᤔᤩᤠᤜ᤺ᤸᤗᤧ ᤗᤢᤱᤎᤠᤰᤁᤡᤴ ᤋᤥ᤺ᤴᤍᤢ 27 ᤕᤖᤢᤛᤗᤧ᤺ᤶᤒᤠ ᤗᤢᤱᤎᤠᤰᤁᤡᤴ ᤔᤧᤍᤥᤴᤍᤢᤒᤠ ᤕᤧᤶᤔᤥ ᤋᤢ᤺ᤱᤃᤣᤜᤠ᤹ ᤏᤢ ᤂᤡᤳᤆᤡᤱ ᤂᤡᤳᤆᤡᤱ ᤁᤧᤗ᤹ᤒᤠ ᤔᤢᤰᤗᤠᤜᤠ᤹ ᤔᤧᤔᤢᤰᤂᤢ ᤜᤧᤰᤁᤩᤠᤱ ᤛᤡᤰᤛᤔᤧᤖ ᤏᤢᤃᤧᤴ ᤋᤥ᤺ᤶᤔᤠ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤵᤔᤠᤖᤧ ᤗᤠᤃᤡ ᤘᤣ᤹ ᤘᤣ᤹ ᤋᤧᤴᤏᤥ ᤁᤧᤕᤢᤱᤒᤠ ᤗᤧᤒᤡᤜᤠ᤹ ᤂᤧᤱᤜᤠ᤹ ᤔᤧᤕᤢᤅᤧᤒᤠᤍᤧᤴᤏᤥᤗᤠᤶ ᤕᤖᤢᤛᤗᤧ᤺ᤶᤔᤥ ᤔᤧᤛᤢᤵᤛᤢ ᤔᤧᤍᤠᤖᤢᤛᤡ॥ 28 ᤗᤧᤒᤡ ᤛᤠᤶᤃᤧᤗᤥᤒᤠ ᤜᤡᤶᤛᤕᤱᤜᤠ᤹. ᤕᤖᤢᤛᤗᤧ᤺ᤶᤒᤠ ᤌᤢᤶᤔᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤕᤢᤅᤧᤒᤠ ᤏᤋᤥᤐᤠ ᤐᤠᤱᤓᤣ᤹ ᤁᤧᤖᤧᤰ ᤐᤡᤛᤠᤱᤒᤠ ᤋᤧᤴᤏᤥᤗᤠᤶ. 29 ᤒᤣᤌ-ᤃᤡᤗᤃᤠᤗ ᤜᤧᤰᤁᤩᤠᤱ ᤃᤣᤒᤠ ᤀᤈ᤻ᤔᤠᤘᤣᤋᤗᤠᤶᤒᤠ ᤔᤧᤍᤠᤖᤢᤛᤡ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤕᤖᤢᤛᤗᤧᤔ ᤂᤡᤖᤡᤒᤠᤍᤧᤴᤏᤥ ᤀᤠᤒᤠᤅᤣ ᤗᤠᤃᤡ ᤐᤠᤱᤓᤣ᤹ᤜᤠ᤹ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥ 30 ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ ᤀᤠᤒᤠᤅᤣ ᤂᤢᤏᤡ᤹ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤔᤧᤒᤥ᤺ᤰᤂᤧ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹. ᤗᤠᤶᤎᤣ᤺ᤵᤜᤠ᤹ ᤏᤢ ᤗᤢᤱᤎᤠᤰᤁᤡᤴ ᤛᤢᤳᤌᤥ ᤔᤧᤈᤥᤃᤢ॥ 31 ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤜᤣᤔᤩᤠᤜ᤺ᤸᤗᤧ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤴ ᤗᤡᤱᤒᤠᤱᤄᤢᤱᤛᤡᤱ॥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢᤃᤧᤴ ᤁᤧᤒᤡᤒᤠ ᤛᤠᤶᤃᤧᤗᤥᤒᤠ ᤏᤧᤳᤇᤡ ᤕᤶᤒᤕᤶᤒᤠ ᤔᤏᤠᤗᤢᤵ ᤆᤥᤃᤢᤱᤛᤡᤱ॥ ᤗᤳᤇᤠ ᤔᤏᤠᤗᤢᤵ ᤗᤢᤱᤎᤠᤰᤁᤡᤸᤗᤧ ᤆᤢᤵᤛᤠᤱ ᤗᤧᤵᤔᤠᤱᤒᤠ ᤋᤠᤶ ᤗᤠᤵᤑᤢᤔᤠ ᤗᤠᤶᤎᤣ᤺ᤵᤐᤠ ᤗᤧᤵᤔᤠᤱ ᤔᤧᤒᤣ॥ 32 ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤜᤥᤛᤕᤠᤜᤴ ᤏᤢ ᤁᤢᤓᤪᤧ᤺ᤱ ᤕᤠᤖᤡᤰ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ ᤔᤧᤘᤕᤧ॥ 33-35 ᤂᤧᤴ ᤀᤣᤃᤠᤱ ᤌᤢᤳᤋᤢᤖᤡ᤺ᤵᤐᤠ ᤔᤧᤔᤢᤰᤂᤢᤖ ᤀᤈᤷᤕᤠᤜ. ᤀᤧᤈᤪᤠ. ᤔᤛᤢᤸᤗᤠᤔ. ᤕᤜᤢᤍᤠ. ᤒᤣᤏᤩᤠᤔᤡᤏ. ᤛᤔᤠᤕᤠᤜ ᤏᤢ ᤕᤷᤔᤡᤕᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤎᤠᤛᤡᤱ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤈᤥᤏᤠᤌᤏᤧᤸᤗᤧ ᤁᤢᤛ᤻ᤛᤠ ᤏᤢ ᤛᤔᤠᤕᤠᤜᤖᤧ ᤁᤢᤶᤔᤧᤴᤇᤠ᤹ ᤈᤁᤖᤡᤕᤠᤴ ᤌᤠᤛᤡᤱ॥ (ᤂᤢᤏᤧ᤹ ᤁᤢᤎᤠ᤺ᤰᤜᤠ᤹ᤀᤥ ᤀᤠᤛᤠᤐ ᤛᤢᤘᤠᤱᤒᤠ ᤔᤳᤋᤏᤩᤠᤜ. ᤔᤡᤁᤠᤕᤠ ᤏᤢ ᤈᤰᤁᤢᤖ ᤔᤧᤘᤕᤧ)॥ 36 ᤂᤢᤏᤧ᤹ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤁᤢᤎᤠ᤺ᤰᤁᤥᤒᤠ ᤘᤣ᤹ᤜᤠ᤹—ᤛᤔᤠᤕᤠᤜ. ᤀᤈᤪᤣᤗ. ᤔᤡᤗᤗᤤ. ᤃᤡᤗᤗᤤ. ᤔᤠᤀᤤ. ᤏᤋᤏᤣᤗ. ᤕᤜᤢᤍᤠ. ᤜᤏᤠᤏᤡᤴ ᤏᤢ ᤁᤢᤴᤈᤢᤶᤜᤠ᤹ ᤔᤧᤎᤠᤛᤡᤱ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤢᤰᤗᤠᤜᤠ᤹ ᤔᤧᤕᤠᤱᤛᤡᤱᤅᤠᤱ ᤔᤧᤘᤕᤧ॥ ᤛᤠᤶᤕᤥᤌᤡᤶᤛᤠᤶᤒᤠ ᤀᤧᤈᤪᤠᤴ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠ ᤘᤕᤧ॥ 37 ᤘᤎᤠ᤺ᤶ ᤗᤠᤶᤎᤣ᤺ᤵᤐᤥ ᤔᤧᤃᤧᤖᤧᤀᤠᤱ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤕᤧᤰᤕᤰ ᤐᤣ᤺ᤰᤔᤠ ᤌᤠᤶᤔᤠᤱ ᤗᤢᤱᤎᤠᤰᤁᤡᤴ ᤏᤠᤜᤠᤱᤛᤣ᤺ᤰᤁᤥᤗᤠᤶ ᤔᤧᤗᤡᤅᤢ ᤜᤧᤰᤁᤩᤠᤱ ᤂᤧᤱᤜᤠ᤹ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤜᤠᤱᤜᤡᤶᤔᤡᤴ ᤔᤧᤃᤠ᤺ᤰᤋᤢᤀᤠᤱ ᤔᤧᤒᤣ॥ ᤂᤧᤵᤔᤥᤗᤠᤶ ᤔᤧᤏᤢ᤺ᤰᤂᤧᤀᤠᤱ ᤕᤧᤰᤕᤰᤁᤡᤸᤗᤧ ᤏᤠᤱᤃᤧᤴ ᤗᤧᤵᤔᤠᤱ ᤂᤧᤱᤜᤠ᤹ ᤆᤫᤠ᤺ᤳ ᤗᤠᤶᤎᤣ᤺ᤵᤐᤥ ᤌᤠᤖᤡᤰ ᤔᤧᤒᤣ॥ 38 ᤘᤣ᤹ᤛᤔᤠ ᤔᤏᤠᤗᤢᤵᤜᤠ᤹ ᤏᤢᤃᤧᤴᤛᤠᤒᤠ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖ ᤗᤢᤱᤎᤠᤰᤁᤡᤸᤗᤧ ᤁᤢᤛᤶᤎᤠᤱ ᤑᤧᤴᤇᤠᤱ ᤗᤧᤵᤔᤠᤱ ᤔᤧᤎᤠᤛᤡᤱ॥ ᤀᤠᤱᤃᤠ᤹ ᤁᤢᤓᤪᤧ᤺ᤱ ᤔᤏᤠᤜᤠ᤹ ᤋᤣ᤹ᤖᤢᤱᤛᤡᤱᤅᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤀᤣᤃᤠᤱ ᤌᤠᤛᤡᤱᤅᤠᤱ॥ ᤔᤡᤜᤠ᤺ᤳᤗᤢᤱ ᤔᤡ᤺ᤰᤂᤥ᤹ ᤗ᤺ᤶᤔᤠᤍᤧᤴᤏᤡᤴ ᤁᤠ᤺ᤰᤔᤏᤠᤀᤠᤱ ᤀᤠᤏᤡᤃᤣ ᤁᤢᤓᤧᤖᤧ ᤕᤶᤒᤠ ᤁᤧᤒᤵᤐᤠ ᤗᤢᤱᤎᤠᤰᤁᤥ ᤁᤧᤵᤔᤏᤠ॥ 39 ᤂᤧᤵᤔᤥᤗᤠᤶ ᤀᤣᤑᤪᤠᤀᤡᤔᤡ ᤗᤠᤶᤎᤣᤳ. ᤕᤣᤛᤏᤠ ᤗᤠᤶᤎᤣᤳ. ᤅᤠ ᤗᤠᤶᤎᤣᤳ ᤜᤧᤰᤁᤩᤠᤱ ᤜᤏᤏᤣᤗᤖᤧ ᤁᤢᤈᤱᤜᤡᤶ ᤏᤢ ᤁᤡᤵᤌᤡᤰ ᤆᤱᤜᤡᤶ ᤐᤥᤱᤔᤏᤠᤖ ᤔᤧᤸᤗᤢᤰ ᤗᤠᤶᤎᤣ᤺ᤵᤐᤥ ᤁᤧᤵᤔᤏᤠ ᤜᤧᤰᤁᤩᤠᤱ ᤃᤠᤖᤍᤒᤠ ᤗᤠᤶᤎᤣ᤺ᤵᤐᤥ ᤌᤠᤖᤡᤰ ᤐᤣ᤺ᤰᤔᤏᤠᤀᤠᤱ ᤀᤠᤏᤡᤃᤣ ᤏᤠ᤺ᤶᤛᤡᤱᤔᤏᤠ॥ 40 ᤏᤢᤃᤧᤴ ᤁᤧᤒᤡᤒᤠ ᤂᤧᤴ ᤏᤧᤵᤔᤠᤱ ᤔᤏᤠᤗᤢᤵᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤒᤣᤛᤠᤱ ᤕᤢᤱᤔᤠᤍᤧᤴᤏᤥ ᤔᤧᤕᤢᤱᤛᤡᤱ॥ ᤀᤠᤱᤃᤠ᤹ᤀᤠᤱ ᤁᤢᤓᤪᤧ᤺ᤱ ᤛᤢᤜᤠᤱᤕᤢᤰᤐᤠᤜᤠ᤹ᤏᤢ ᤕᤢᤱᤛᤡᤱᤅᤠᤱ॥ 41 ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠ ᤀᤣᤗᤩᤠᤁᤡᤔ. ᤔᤠᤛᤣᤕᤠᤜ. ᤔᤡᤏᤩᤠᤔᤡᤏ. ᤔᤡᤁᤠᤕᤠ. ᤀᤣᤗᤩᤥᤀᤣᤏᤤ. ᤈᤁᤖᤡᤕᤠ ᤏᤢ ᤜᤏᤏᤩᤠᤜᤜᤠ᤹ ᤔᤧᤘᤕᤧ॥ ᤂᤧᤱᤜᤠ᤹ ᤌᤢᤳᤋᤢᤖᤡ᤺ᤵᤐᤠ ᤔᤢ᤺ᤳᤏᤢ ᤗᤠᤱᤔᤧᤄᤣᤃᤧᤀᤠᤱ ᤔᤧᤘᤕᤧ॥ 42 ᤜᤧᤰᤁᤩᤠᤱ ᤔᤠᤛᤣᤕᤠᤜ. ᤛᤔᤠᤕᤠᤜ. ᤀᤣᤗᤠᤈᤠᤖ. ᤀᤢᤈ᤻ᤈᤡ. ᤕᤣᤜᤥᤜᤠᤏᤠᤏ. ᤔᤸᤁᤡᤕᤠᤜ. ᤀᤣᤗᤠᤔ ᤂᤧᤒᤩᤠᤱ ᤀᤣᤛᤣᤖᤧᤴ ᤘᤕᤧ॥ ᤕᤡᤈᤪᤜᤡᤕᤠᤜᤖᤧ ᤁᤢᤗᤠᤶᤗᤥᤔᤥ ᤛᤠᤶᤃᤧᤗᤥᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤛᤠᤶᤔᤧᤗᤥᤖᤧᤖᤥ॥ 43 ᤂᤧᤴ ᤕᤧᤴᤏᤥ ᤂᤧᤱᤜᤠ᤹ᤖᤧ ᤕᤖᤡᤰ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ ᤔᤏᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤆᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤋᤩᤧᤖ ᤆᤥᤃᤢᤛᤡᤀᤠᤱ ᤘᤕᤧ॥ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ ᤐᤡᤳᤇᤠ᤹ᤜᤠ᤹ᤖᤧᤀᤠᤱ ᤛ᤺ᤵᤔᤠ ᤛᤛᤠᤱᤛᤪᤥᤳ ᤔᤧᤈᤥᤃᤢ॥ ᤂᤧᤱᤜᤠ᤹ ᤔᤧᤛ᤺ᤳᤋᤧᤒᤠ ᤀᤡᤰᤗᤠᤴ ᤕᤖᤡᤰ ᤔᤠ᤺ᤱᤄᤠ ᤌᤠᤖᤡᤰ ᤂᤧᤶᤍᤧᤳᤋᤧᤖᤥ॥ ᤔᤠᤱᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤔᤠᤖᤧ ᤗᤠᤃᤡ ᤜᤡᤔᤠ ᤋᤱᤔᤠ 44 ᤂᤧᤴ ᤕᤧᤶᤔᤥ ᤔᤠᤱᤜᤡᤶᤔᤥ ᤋᤥ᤺ᤶᤔᤏᤠᤒᤠ ᤕᤢᤱᤔᤠᤍᤧᤴᤜᤠ᤹ᤀᤥ ᤀᤥᤔᤧᤵᤔᤠ ᤜᤧᤰᤁᤩᤠᤱ ᤕᤧᤰᤕᤰ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤗᤠᤶ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤏᤡᤱᤘᤠ᤹ᤑᤢᤛᤠᤶᤒᤠ ᤏᤢ ᤗᤧᤒᤡᤜᤠ᤹ᤖᤧ ᤂᤥᤔᤠ ᤁᤧᤒᤥᤱᤒᤠ ᤁᤢᤈᤠ ᤏᤢ ᤌᤡᤒᤥᤱᤗᤰ ᤑᤢᤱᤔᤠ ᤕᤠ᤺ᤶᤒᤰᤗᤧ ᤗᤠᤃᤡ ᤔᤏᤠᤜᤠ᤹ ᤔᤢᤖᤠ ᤔᤧᤔᤧᤳᤋᤢᤛᤡᤀᤠᤱ ᤘᤕᤧ॥ ᤌᤣᤀᤠᤱᤓᤧᤸᤗᤧ ᤕᤜᤢᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠ ᤜᤧᤰᤁᤩᤠᤱ ᤗᤧᤒᤡᤜᤠ᤹ᤏᤢ ᤂᤢᤏᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤘᤕᤧ॥ 45 ᤍᤠᤀᤢᤍ ᤜᤠᤱᤅᤡᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠ ᤛᤥᤗᤥᤔᤏᤖᤧ ᤕᤢᤰᤂᤧᤇᤢᤒᤠ ᤌᤡᤶᤒᤣ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤏᤢ ᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤛᤠᤰᤌᤡᤶᤜᤠ᤹ ᤔᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰᤁᤣ ᤛᤠᤶᤃᤧᤗᤥᤒᤠᤜᤠ᤹ ᤏᤢ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹ᤖᤧᤀᤠᤱ ᤕᤠ᤺ᤶᤒᤰ ᤔᤧᤈᤥᤃᤢ॥ 46 ᤌᤣᤀᤠᤱᤓᤧᤸᤗᤧ ᤀᤢᤴᤇᤣ᤺ᤴᤇᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤕᤧᤶᤔᤠᤱᤎᤥ ᤜᤧᤰᤁᤩᤠᤱ ᤂᤧᤴᤏᤢ᤺ᤸᤗᤧ ᤋᤃᤡ ᤀᤠᤛᤠᤐᤖᤧ ᤁᤢᤕᤧᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤑᤥᤔᤠ ᤏᤢ ᤏᤢᤃᤧᤴ ᤐᤡᤔᤠᤖᤧ ᤗᤠᤃᤡ ᤛᤧᤘᤠᤛᤠᤶᤗᤥ ᤛᤠᤶᤃᤧᤔᤧᤵᤐᤠ ᤗᤠᤶᤗᤥᤒᤠᤜᤠ᤹ ᤔᤧᤘᤕᤧ॥ 47 ᤂᤧᤸᤗᤧᤆᤥᤃᤢᤸᤗᤧ ᤕᤖᤢᤒᤠᤒᤣᤗ ᤏᤢ ᤏᤜᤣᤔᤩᤠᤜ᤺ᤸᤗᤧ ᤂᤢᤴᤇᤡ᤹ ᤕᤧᤶᤔᤥ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤶᤃᤧᤗᤥᤒᤠᤜᤠ᤹ ᤏᤢ ᤗᤠᤶᤃᤧᤃᤥᤒᤠᤜᤠ᤹ᤖᤣ ᤂᤢᤏᤡ᤹ ᤆᤠᤔᤠᤖᤧ ᤗᤠᤃᤡ ᤌᤡᤰᤕᤠ᤺ᤴᤎᤰ ᤆᤠᤜᤠ ᤁᤧᤈᤥ᤺ᤰᤐᤠ ᤁᤢᤈᤠᤜᤠ᤹ ᤔᤧᤒᤡᤖᤢᤛᤡ॥ ᤂᤧᤱᤜᤠ᤹ᤖᤧ ᤗᤧᤒᤡᤜᤠ᤹ᤀᤠᤱ ᤆᤠᤜᤠ ᤁᤧᤈᤥ᤺ᤰᤐᤠ ᤗᤰ ᤔᤧᤒᤡᤖᤢᤛᤡ ᤜᤧᤰᤁᤩᤠᤱ ᤂᤧᤴᤗᤠᤶᤒᤠ ᤗᤧᤒᤡᤜᤠ᤹ᤖᤧ ᤜᤠᤖᤢᤏᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤆᤠᤜᤠ ᤁᤧᤈᤥ᤺ᤰᤐᤠ ᤗᤰ ᤔᤧᤒᤡᤖᤢᤛᤡᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.