ᤏᤜᤣᤔᤩᤠᤜ 1 - LIFOTNT

ᤏᤜᤣᤔᤩᤠᤜ᤺ᤸᤗᤧ ᤆᤥᤃᤢᤒᤠ ᤋᤢᤘᤠ

¹ ᤁᤴ ᤜᤁᤗᤩᤠᤜᤖᤧ ᤁᤢᤛ᤻ᤛᤠ ᤏᤜᤣᤔᤩᤠᤜ᤺ᤸᤗᤧ ᤆᤥᤃᤢ ᤐᤠ᤺ᤳᤋᤢᤒᤠ ᤕᤠ᤺ᤶᤒᤰᤗᤥ॥ ᤀᤷᤋᤠᤛᤠᤛ᤻ᤋᤧᤴ ᤑᤠᤖᤛ ᤗᤠᤈᤣ᤹ᤒᤠ ᤜᤠᤱ ᤘᤕᤧᤸᤗᤧ ᤂᤢᤏᤧ᤹ ᤜᤠᤱ ᤆᤥᤃᤢᤒᤠ ᤏᤡᤒᤥᤱ ᤋᤱᤒᤣᤀᤥ ᤁᤡᤛᤗᤣᤒ ᤔᤧᤵᤔᤏᤠᤒᤠ ᤗᤠᤀᤥ ᤀᤠᤱᤃᤠ᤹ ᤏᤜᤣᤔᤩᤠᤜᤴ ᤑᤠᤖᤛ ᤗᤠᤈᤣ᤹ᤒᤠ ᤜᤠᤱᤐᤠᤱᤓᤣ᤹ ᤛᤢᤛᤏᤀᤥ ᤘᤕᤠᤱ॥

² ᤜᤠᤒᤠ ᤂᤧᤴ ᤕᤧᤶᤔᤥ ᤜᤏᤠᤏᤡ ᤔᤡᤱ ᤁᤧᤘᤠ᤺ᤵᤐᤠ ᤀᤠᤱᤃᤠ᤹ ᤀᤠᤴᤛᤠ᤹ᤎᤡᤰ ᤁᤢᤓᤠ ᤔᤏᤠᤜᤠ᤹ᤏᤢ ᤕᤜᤢᤍᤠᤗᤠᤶᤒᤠ ᤁᤧᤖᤧᤓᤧᤖᤧ॥ ᤀᤠᤱᤃᤠ᤹ ᤂᤧᤱᤜᤠ᤹ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤢ ᤒᤣᤒᤡᤗᤥᤏᤒᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤒᤣ᤺ᤰᤐᤠ ᤀᤠᤒᤠᤅᤣ ᤕᤜᤢᤍᤡ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤛᤧ᤺ᤴᤗᤠᤵᤋᤢᤱᤛᤡᤱ॥

³ ᤂᤧᤴ ᤐᤢᤱᤗᤠᤜᤡᤶᤗᤠᤶᤒᤠ ᤁᤧᤜᤡᤱᤒᤠᤀᤠᤱ ᤕᤜᤢᤍᤠ ᤋᤧᤱᤃᤵᤐᤥ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤕᤜᤢᤍᤡᤜᤠ᤹ ᤐᤕᤶ ᤕᤶᤒᤠ ᤛᤡᤖᤡᤱᤔᤔᤥ ᤔᤧᤎᤩᤧᤀᤠᤱ ᤔᤧᤕᤠᤰ॥ ᤕᤖᤢᤛᤗᤧ᤺ᤶᤒᤠ ᤗᤢᤱᤎᤠᤰᤜᤠ᤹ ᤗᤢ᤺ᤴᤍᤧᤀᤠᤱ ᤏᤧ᤹᤺ ᤜᤧᤰᤁᤩᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠ ᤕᤧᤴᤏᤠᤱᤎᤥ ᤀᤠᤀᤡᤴ ᤌᤠᤖᤡᤰ ᤂᤧ᤹ᤕᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ ᤔᤧᤴᤈᤥ᤺ᤰᤁᤣ ᤏᤧᤖᤥ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤔᤧᤳᤋᤠᤱ॥

⁴ ᤁᤴ ᤀᤡᤱᤄᤱᤅᤡᤴ ᤂᤧᤵᤛᤢᤱᤅᤠᤱ ᤀᤠᤱᤃᤠ᤹ ᤂᤠᤶᤔᤥ ᤐᤧᤷᤈᤢ ᤕᤢᤱᤛᤡᤱᤅᤠᤀᤠᤱ ᤜᤠᤒᤠᤱ॥ ᤀᤠᤱᤃᤠ᤹ ᤕᤖᤡᤰ ᤕᤧᤴ ᤌᤠᤖᤡᤰ ᤔᤧᤖᤡᤱ ᤌᤰᤋᤠᤱ ᤜᤧᤰᤁᤩᤠᤱ ᤌᤣᤀᤠᤱ ᤔᤧᤴᤈᤠᤒᤠ ᤔᤧᤴᤎᤢᤱᤒᤠ॥ ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢᤱ.

⁵ “ᤛᤠᤱᤃᤪᤠᤶᤐᤣᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤐᤕᤶ ᤕᤶᤒᤠ ᤏᤢ ᤁᤡᤵᤔᤠᤃᤧᤄᤢᤒᤠ ᤁᤧᤈᤥ᤺ᤰᤗᤥ॥ ᤂᤧᤏᤧ᤹ ᤁᤧᤀᤡᤱᤈᤠᤱᤅᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤜᤧᤰᤁᤩᤠᤱ ᤂᤧᤏᤧ᤹ ᤔᤡ᤺ᤶ ᤁᤧᤔᤧᤵᤐᤠᤜᤠ᤹ᤏᤢ ᤁᤧᤈᤥᤃᤢᤒᤠ ᤁᤧᤖᤧᤰ ᤔᤠᤱᤜᤢᤵᤜᤠ᤹ ᤀᤠᤒᤠᤅᤣ ᤏᤛᤠ᤺ᤴᤛᤠᤒᤠ ᤁᤧᤒᤥᤰᤂᤧᤀᤠᤱ ᤁᤧᤃᤧᤳᤋᤢᤖᤥ॥

⁶ ᤀᤡᤛᤪᤠᤀᤡᤗᤒᤠ ᤁᤧᤔᤏᤠ. ᤂᤧᤏᤧ᤹ ᤁᤧᤛᤣᤘᤠᤖᤥᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤛᤧᤴᤍᤡᤰ ᤗᤧᤴᤍᤡᤰ ᤆᤥᤃᤢᤱᤒᤠ ᤀᤠᤒᤣᤗᤡᤴ ᤂᤧᤵᤛᤧ᤹ᤀᤠᤱ ᤀᤥᤔᤧᤳᤋᤠᤱᤅᤧ᤹ᤀᤥ॥ ᤀᤠᤏᤡᤃᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤗᤠᤕᤥ ᤆᤥ᤺ᤰᤔᤏᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠ᤺ᤵᤔᤠ ᤋᤧᤴᤏᤠᤖᤥ॥ ᤀᤠᤱᤃᤠ᤹ ᤀᤠᤎᤠ᤺ᤰᤌᤧᤒᤠᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢ. ᤀᤠᤱᤃᤠ᤹ᤀᤠᤱ ᤗᤠᤕᤥ ᤆᤥᤃᤢᤱᤗᤥ॥

⁷ ᤀᤠᤏᤡᤃᤣ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤶᤒᤧᤀᤠᤱ ᤘᤕᤡᤃᤧ॥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤒᤠᤅᤣ ᤁᤧᤛᤧᤘᤠᤖᤥᤒᤠ ᤔᤥᤛᤠᤗᤠᤶᤒᤠ ᤀᤠᤏᤡᤃᤣ ᤕᤠᤵᤔᤡ ᤁᤧᤒᤡᤖᤧᤒᤠ ᤛᤠᤶᤕᤥ ᤛᤠᤰᤌᤡᤶᤜᤠ᤹ ᤀᤠᤏᤡᤃᤣ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤘᤕᤡᤃᤧᤖᤥ॥

⁸ “ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣᤗ᤹ᤖᤡᤰ ᤔᤥᤛᤠᤴ ᤁᤧᤒᤡᤖᤢᤒᤠ ᤁᤧᤒᤠ᤺ᤴᤈᤠ᤺ᤰᤁᤡᤴ ᤏᤡᤱᤘᤠ᤹ ᤀᤡ᤺ᤳᤋᤧ᤹ᤀᤥ. ‘ᤂᤡᤏᤡ᤹ ᤏᤛᤠᤴ ᤁᤧᤗᤧᤱᤒᤠ ᤁᤧᤒᤥᤰᤂᤡᤏᤧᤓᤃᤪ ᤀᤠᤱᤃᤠ᤹ ᤂᤡᤏᤡ᤹ ᤘᤣ᤹ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤛᤧᤏᤡᤱᤍᤣᤏᤡᤱᤗᤥ॥

⁹ ᤁᤖ ᤂᤡᤏᤡ᤹ ᤀᤠᤱᤃᤠ᤹ ᤗᤧᤵᤛᤠᤱ ᤁᤧᤏᤢ᤺ᤰᤂᤡ ᤁᤧᤍᤩᤧ᤹ᤕᤡᤀᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤴᤍᤡᤏᤧᤓᤃᤪ ᤀᤠᤱᤃᤠ᤹ ᤛᤣᤃᤢᤱᤒᤠ ᤛᤣᤛᤣ ᤔᤠᤱᤛᤧᤘᤠ ᤔᤧᤈᤥ᤺ᤰᤁᤠᤒᤠᤍᤧᤴᤏᤥ ᤂᤡᤏᤡ᤹ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤛᤢᤰᤐᤥ ᤌᤠᤖᤡᤰ ᤂᤡᤏᤡ᤹ ᤁᤧᤛᤧᤖᤡᤀᤠᤱ ᤁᤧᤘᤕᤡᤛᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ॥’

¹⁰ “ᤁᤴᤜᤠ᤹ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤛᤡᤖᤥ. ᤂᤧᤏᤧ᤹ ᤀᤠᤒᤠᤅᤣ ᤁᤧᤔᤏᤠᤛᤡᤖᤥ॥ ᤂᤧᤏᤧ᤹ ᤀᤠᤒᤠᤅᤣ ᤐᤕᤶ ᤕᤶᤒᤠ ᤁᤧᤎᤢᤶᤔᤧᤴ ᤏᤢ ᤁᤧᤔᤢᤰᤛᤠᤶᤔᤡᤸᤗᤧ ᤁᤴᤜᤠ᤹ ᤁᤧᤎᤧ᤹ᤖᤢᤛᤡᤀᤠᤱ ᤁᤧᤘᤠ᤹॥

¹¹ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤆᤥᤃᤢᤱᤒᤠ ᤋᤢᤘᤠᤴ ᤂᤧᤵᤛᤧ᤹ᤀᤥ॥ ᤂᤧᤏᤧ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤂᤧᤏᤧ᤹ ᤁᤧᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤐᤣᤗᤡᤀᤥ ᤏᤡᤱᤘᤠ᤹ ᤐᤡᤖᤧ᤹ᤀᤥ॥ ᤀᤠᤱᤃᤠ᤹ ᤀᤠᤀᤡᤴ ᤁᤢᤗᤡᤱᤍᤥ ᤁᤧᤳᤋᤠᤱᤅᤧ᤹ᤀᤥ ᤜᤧᤰᤁᤩᤠᤱ ᤜᤠᤱᤅᤡᤴ ᤀᤠᤱᤃᤠ᤹ ᤗᤢᤱᤔᤠ᤹ ᤋᤢᤰᤁᤠᤖ ᤕᤠ᤺ᤴᤍᤧ᤹ᤀᤥ॥” ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤜᤠᤱᤅᤡᤸᤗᤧ ᤁᤢᤛᤣ᤹ᤈ᤺ᤱᤘᤠ ᤁᤧᤍᤥᤶᤒᤠ ᤗᤳᤌᤡᤰ ᤛᤢᤜᤠᤱᤕᤢᤰᤐᤠ ᤘᤕᤠᤱᤗᤥ॥