ᤏᤜᤢᤔ 3 - LIFOTNT

ᤏᤡᤏᤒᤣᤴ ᤆᤡ᤺ᤳᤋᤧ ᤛᤩᤧ

¹ ᤔᤠᤰᤂᤡ᤹ ᤀᤡᤛᤣ᤺ᤱᤒᤠ ᤕᤧᤰᤕᤰᤁᤡᤴ ᤆᤡ᤺ᤳᤋᤧᤛᤩᤧᤖᤥ᥄ ᤂᤧᤱᤃ ᤀᤡᤱᤗᤧᤰ ᤏᤢ ᤔᤧᤏᤠᤵᤋᤢᤛᤡᤒᤠ ᤕᤠᤱᤛᤠᤁᤢᤴᤎᤣᤜᤠ᤹ᤖᤧ ᤋᤡᤶᤛᤧᤀᤠᤱ ᤏᤧᤖᤥ. ᤂᤧᤵᤔᤥ ᤔᤏᤠ ᤋᤢᤰᤂᤣ ᤆᤠ᤺ᤵᤔᤠ ᤕᤠ᤺ᤶᤒᤰᤁᤡᤴ ᤀᤠᤓᤧᤸᤗᤧᤀᤠᤱ ᤔᤧᤏᤢᤵᤏᤧᤸᤗᤥ॥

² ᤋᤧ᤺ᤶᤓᤢᤰᤜᤠ᤹ ᤗᤠᤀᤡᤰᤐᤠ ᤀᤡᤰᤗᤠᤴ. ᤁᤠᤵᤗᤥ᤺ᤰᤜᤠ᤹ ᤂᤱᤛᤡᤱᤒᤠ ᤀᤡᤰᤗᤠᤴ. ᤀᤴᤜᤠ᤹ ᤁᤢᤍᤢᤱᤍᤢᤱ ᤔᤧᤗ᤹ᤒᤠ ᤀᤡᤰᤗᤠᤴ. ᤀᤴᤗᤠᤎᤠᤜᤠ᤹ ᤔᤧᤄᤱᤛᤡᤱ ᤔᤧᤒᤢ᤺ᤴᤇᤡᤱᤗ ᤔᤧᤗᤥ᤺ᤰᤐᤠ ᤀᤡᤰᤗᤠᤴ ᤂᤧᤵᤛᤧᤶᤔᤧ᤹ᤀᤥ॥

³ ᤀᤴᤃᤧᤕᤢᤰᤐᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤓᤳᤋᤢᤛᤡᤖᤥ. ᤋᤠᤓᤣᤜᤠ᤹ ᤛᤧᤸᤗᤧᤱ ᤛᤧᤸᤗᤧᤱ ᤗᤧᤰᤗᤥ. ᤜᤧᤰᤁᤩᤠᤱ ᤗᤠ᤺ᤰᤜᤠ᤹ ᤋᤡᤸᤗᤧᤰ ᤋᤡᤸᤗᤧᤰ ᤗ᤹ᤖᤥ॥ ᤔᤧᤛᤧᤖᤢᤛᤡᤒᤠ ᤆᤣᤜᤠ᤹ ᤁᤢᤎᤠ᤺ᤰ ᤁᤢᤎᤠ᤺ᤰ ᤔᤧᤛᤧᤳᤇᤡᤱᤗᤥ. ᤏᤡ᤺ᤵᤔᤧᤴᤍᤧᤳᤋᤣ ᤆᤣᤜᤠ᤹ ᤔᤧᤏᤧᤖᤥ. ᤆᤣᤜᤠ᤹ ᤛᤶᤎᤠᤱ ᤔᤏᤠᤜᤠ᤹ ᤔᤧᤍᤥ᤺ᤰᤗ ᤔᤧᤈᤥ᤺ᤴᤗ ᤗᤠᤱᤔᤧᤄᤣ᤺ᤰᤗᤥ᥄

⁴ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤳᤇᤠ ᤁᤧᤳᤏᤡᤔᤠ. ᤁᤡᤳᤆᤠᤰ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤍᤠᤱᤔᤧᤸᤗᤧ ᤔᤧᤴᤏᤢ᤺ᤶᤔᤏᤠ ᤁᤢᤕᤠᤶᤒᤥ᤺ᤵᤔᤧᤸᤗᤧ ᤆᤥᤃᤢᤸᤗᤧ ᤐᤥ᤺ᤰᤂᤧᤖᤥ. ᤂᤢᤏᤧ᤹ ᤁᤢᤕᤠᤶᤒᤥ᤺ᤵᤔᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤜᤧᤰᤁᤩᤠᤱ ᤁᤢᤃᤡᤳᤆᤠᤰ ᤆᤥ᤺ᤰᤔᤠ ᤕᤠ᤺ᤶᤒᤰᤗᤠᤶ ᤂᤧᤸᤗᤧ ᤔᤏᤠᤜᤠ᤹ ᤕᤥᤰ ᤆᤥᤃᤢᤛᤡᤀᤠᤱ ᤘᤕᤧᤖᤥ॥

⁵ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤠᤖᤠᤀᤥ ᤌᤠᤖᤡᤰ ᤁᤧᤛᤡᤶᤔᤡᤴ ᤛᤡᤴᤍᤢᤱᤗᤥ. ᤁᤧᤗᤧᤰᤆᤠᤒᤧᤎᤡ᤺ᤰᤁᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤠᤎᤠᤰᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤁᤧᤛᤡᤖᤡᤱᤔᤔᤠᤴ ᤜᤠᤱᤈᤢᤶᤜᤠ᤹ ᤀᤥ᤺ᤴᤎᤠᤰᤋᤢᤱᤛᤡᤱᤗᤥ॥

⁶ ᤀᤠᤱᤃᤠ᤹ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤐᤠ᤺ᤴᤜᤠ᤹ᤖᤧ ᤗᤧᤵᤏᤧᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤋᤠᤵᤑᤧ᤺ᤸᤗᤡᤰ ᤔᤧᤳᤏᤧᤖᤥ. ᤜᤧᤰᤁᤩᤠᤱ ᤔᤏᤠᤖᤧ ᤂᤢᤴᤇᤡ᤹ ᤀᤣ᤺ᤵᤔᤠ ᤆᤠᤜᤠᤰ ᤆᤥ᤺ᤰᤏᤧᤖᤥ॥

⁷ ᤂᤧᤏᤧ᤹ ᤁᤧᤏᤡᤒᤠᤜᤠ᤹ ᤁᤧᤖᤧᤰ ᤂᤧᤏᤧ᤹ᤗᤠᤶᤒᤠ ᤔᤧᤄᤧᤳᤇᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤏᤡᤏᤒᤣ᤺ᤱᤃ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤂᤧᤸᤗᤧ ᤁᤢᤗᤠᤃᤡ ᤜᤠᤳ ᤔᤧᤖᤡᤱ ᤌᤰᤐᤠᤒᤣ᥅’ ᤂᤧᤏᤧ᤹ ᤛᤏᤠᤖᤢᤱ ᤁᤧᤒᤡᤒᤠ ᤔᤏᤠ ᤀᤠᤱᤃᤠ᤹ ᤀᤠᤳᤋᤡ ᤂᤥᤔᤠᤒᤣ᥅”

⁸ ᤌᤣ ᤂᤧᤏᤧ᤹ ᤏᤡᤗ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤏᤥ ᤕᤧᤰᤕᤰᤁᤡᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤏᤢᤒᤠ ᤁᤧᤈᤥ᤺ᤰᤐᤡ᥅ ᤂᤧᤸᤗᤧ ᤁᤢᤛᤧ᤺ᤵᤔᤠ ᤁᤶᤒᤪᤠᤱ ᤆᤫᤠ᤺ᤳ ᤏᤧᤛ᤻ᤛᤧᤖᤥ. ᤂᤧᤸᤗᤧ ᤁᤢᤎᤣ᤺ᤰᤔᤠ ᤜᤠᤱᤕᤰ ᤘᤜ᤺ᤱ ᤏᤧᤛ᤻ᤛᤧᤖᤥ ᤜᤧᤰᤁᤩᤠᤱ ᤗᤢᤱᤎᤠᤰᤁᤡᤱᤃ ᤆᤫᤠ᤺ᤳ ᤏᤧᤛ᤻ᤛᤧᤖᤥ॥

⁹ ᤁᤢᤛ ᤏᤢ ᤔᤡᤛᤪ ᤗᤠᤈᤣᤴ ᤂᤧᤸᤗᤧ ᤕᤶᤒᤠ ᤁᤢᤔᤢᤰᤛᤠᤶ ᤏᤧᤛ᤻ᤛᤧᤖᤥ. ᤜᤧᤰᤁᤩᤠᤱ ᤐᤢᤋ ᤏᤢ ᤗᤡᤒᤩᤠᤴ ᤂᤧᤸᤗᤧ ᤁᤢᤴᤍᤣ᤺ᤱᤒᤠ ᤗᤠᤈᤣ᤹ ᤏᤧᤛ᤻ᤛᤧᤖᤥ॥

¹⁰ ᤜᤧᤰᤁᤣᤛᤠᤱ ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤖᤥ॥ ᤂᤧᤸᤗᤧ ᤆᤢᤈᤢᤰᤛᤠ ᤁᤢᤛ᤻ᤛᤠᤜᤠ᤹ᤀᤠᤱ ᤁᤧᤖᤧᤰ ᤔᤠᤖᤠᤶᤜᤠ᤹ᤀᤥ ᤔᤧᤎᤠᤵᤛᤢ ᤔᤧᤛᤩᤧᤖᤢᤛᤡᤖᤥ॥ ᤔᤡᤛᤪᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤛᤧᤘᤠᤖᤥᤒᤠ ᤜᤧᤰᤁᤣ ᤋᤣ᤹ᤔᤠᤛᤡᤖᤧ ᤗᤠᤃᤡ ᤌᤰᤛᤢᤒᤠᤜᤠ᤹ᤖᤧ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤕᤶᤒᤠ ᤁᤢᤔᤏᤠᤜᤠ᤹ ᤌᤰᤁᤪᤱᤅᤡᤸᤗᤧ ᤀᤡᤔᤧᤄᤣ᤺ᤰᤂᤢᤛᤡᤖᤥ॥

¹¹ ᤂᤧᤏᤧ᤹ ᤏᤡᤏᤒᤣ᤺ᤴᤏᤠᤱ. ᤌᤡᤔᤛᤠᤱ ᤁᤧᤒᤥᤱᤗᤥ. ᤂᤧᤏᤧ᤹ ᤁᤧᤒᤣ᤺ᤰᤁᤠᤱ ᤁᤧᤈᤡᤱᤛᤡᤱᤅᤠᤱ ᤁᤧᤕᤢᤱᤗᤥ. ᤜᤧᤰᤁᤩᤠᤱ ᤏᤡᤱᤔᤡᤗᤠᤶ ᤂᤧᤳᤇᤡᤱᤔᤠᤖᤧ ᤗᤠᤃᤡ ᤀᤡ᤺ᤶᤛᤡᤱᤔᤠᤍᤧᤴ ᤁᤧᤃᤥ᤺ᤳᤋᤢᤖᤥ॥

¹² ᤂᤧᤏᤧ᤹ ᤁᤧᤖᤧᤰ ᤁᤧᤜᤠᤱᤕᤰᤜᤠ᤹ ᤐ᤺ᤳᤇᤣ᤺ᤸᤗᤧ ᤁᤢᤒᤢᤱᤅᤥ ᤋᤃᤡ ᤁᤧᤍᤢᤶᤒᤠ ᤁᤢᤈᤠ᤹ ᤁᤢᤀᤡᤛᤡᤰ ᤗ᤹ᤖᤥ. ᤁᤢᤒᤢᤱᤜᤠ᤹ ᤕᤱᤔᤧᤸᤗᤧ ᤁᤧᤈᤠᤒᤧᤸᤗᤧ ᤁᤢᤶᤒᤪᤠᤀᤥ ᤐ᤺ᤳᤇᤣᤸᤗᤧ ᤁᤢᤈᤠ᤹ᤜᤠ᤹ ᤗᤢ᤺ᤰᤌᤠᤖᤥ॥

¹³ ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ ᤀᤥᤔᤧᤳᤋᤧᤛᤧ᤹ᤀᤥ. ᤂᤧᤱᤜᤠ᤹ ᤁᤧᤖᤧᤰ ᤔᤧᤴᤇᤢᤔᤠᤖᤰ ᤔᤧᤘᤠ᤹ᤖᤥ॥ ᤂᤧᤏᤧ᤹ ᤁᤧᤗᤠᤈᤣ᤹ᤀᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤃ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ᤖᤧ ᤗᤠᤃᤡ ᤜᤱᤒᤧᤳ ᤐᤳᤗᤥ. ᤂᤧᤸᤗᤧ ᤁᤢᤀᤧᤵᤔᤠᤜᤠ᤹ᤃ ᤔᤡ᤺ᤸᤗᤧ ᤌᤩ᤺ᤱ ᤆᤥᤃᤢᤀᤠᤱ ᤐᤳᤗᤥ॥

¹⁴ ᤏᤡᤱᤔᤡᤜᤠ᤹ᤖᤧ ᤁᤡᤷᤃᤵ ᤁᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤆᤫᤠ᤺ᤳᤋᤡᤴ ᤌᤡᤶᤛᤧ ᤕᤢᤰᤂᤧ᤹ᤀᤥ॥ ᤆᤱᤜᤡᤶᤜᤠ᤹ ᤌᤎᤵ ᤔᤧᤸᤗ᤹ᤔᤏᤠᤒᤠ ᤆᤥᤃᤧ᤹ᤀᤥ. ᤕᤠ᤺ᤶᤒᤰ ᤆᤥᤃᤧ᤹. ᤗᤠᤱᤅᤡᤸᤗᤧ ᤂᤠᤶᤗᤧᤰᤘᤠᤴ ᤛ᤹ᤖᤧᤀᤥ. ᤂᤠᤶᤗᤧᤰ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤠ᤺ᤱᤘᤠ ᤔᤧᤳᤋᤧ᤹ᤀᤥ᥄

¹⁵ ᤀᤠᤶᤓᤠ ᤂᤧᤵᤔᤥ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤗᤥ. ᤋᤠᤓᤣ᤺ᤸᤗᤧ ᤂᤧᤏᤧ᤹ ᤆᤠᤰᤗᤧ ᤆᤠᤰᤗᤧ ᤁᤧᤈᤧᤵᤗᤥ ᤜᤧᤰᤁᤩᤠᤱ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤁᤢᤈᤠᤴ ᤔᤧᤈᤒᤠ ᤜᤧᤰᤁᤣ ᤂᤧᤏᤧ᤹ ᤔᤢᤖᤧᤰ ᤂᤠᤖᤧᤰ ᤂᤠᤵᤐᤢᤌᤩ᤺ᤱ ᤁᤧᤶᤈᤥ᤺ᤰᤗᤥ॥ ᤐᤩᤠ᤺ᤳᤜᤠ᤹ ᤜᤧᤰᤁᤣ ᤂᤧᤏᤧ᤹ ᤏᤡ᤺ᤳᤔᤧᤴᤍᤧᤳ ᤕᤖᤡᤰ ᤐᤥ᤺ᤰᤂᤧ᤹ᤀᤥ. ᤂᤧᤏᤧ᤹ ᤏᤡ᤺ᤱᤄᤢᤰᤘᤠᤜᤠ᤹ ᤜᤧᤰᤁᤣ ᤕᤖᤡᤰ ᤐᤥᤖᤧ᤹ᤀᤥ॥

¹⁶ ᤋᤠᤱᤛᤠᤱᤒᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ᤏᤢ᤺ᤸᤗᤧ ᤕᤖᤡᤰ ᤁᤧᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ ᤁᤧᤓᤥᤛᤢᤛᤡᤀᤠᤱ ᤁᤧᤘᤠ᤹ᤖᤥ. ᤁᤖ ᤏᤡ᤺ᤱᤄᤢᤰᤘᤠᤜᤠ᤹ᤖᤧ ᤜᤧᤰᤁᤣ ᤂᤧᤱᤜᤠ᤹ᤖᤧ ᤗᤠᤈᤣᤴ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ ᤔᤧᤒᤣ ᤔᤧᤒᤣ᤺ᤰᤗᤥ॥

¹⁷ ᤂᤧᤏᤧ᤹ ᤁᤧᤃᤶᤒᤪᤠᤱᤒᤠᤜᤠ᤹ ᤏᤡ᤺ᤱᤄᤢᤰᤘᤠ ᤕᤠᤖᤡᤰ ᤔᤧᤘᤠ᤹ᤖᤥ. ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤃ ᤏᤡ᤺ᤱᤄᤢᤰᤘᤠ ᤐᤴᤈᤩᤠᤱᤔᤠ ᤁᤢᤀᤡᤛᤡᤰ ᤔᤧᤘᤠ᤹ᤖᤥ. ᤂᤧᤱᤜᤠ᤹ᤃ ᤆᤢᤱᤛᤡ᤺ᤰᤔᤠ ᤕᤧᤶᤔᤥ ᤗᤢᤱᤎᤠᤰᤜᤠ᤹ᤀᤥ ᤔᤧᤒᤳᤗᤥ. ᤁᤖ ᤏᤠᤶᤛᤧ᤺ᤰᤁᤡᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤔᤧᤒᤧ ᤔᤧᤒᤣ᤺ᤰᤗᤥ. ᤂᤧᤱᤜᤠ᤹ ᤀᤠᤳᤋᤡ ᤔᤧᤒᤣ᤺ᤰ. ᤜᤠ᤺ᤳᤗᤧᤀᤠᤱ ᤔᤧᤏᤡᤛᤢᤴᤗᤥ॥

¹⁸ ᤀᤛ᤻ᤛᤢᤖᤒᤠ ᤜᤠᤱᤅᤣ. ᤂᤧᤏᤧ᤹ ᤁᤧᤔᤧᤸᤗᤢᤰᤁᤶᤒᤠᤜᤠ᤹ ᤔᤢᤖᤢᤰ ᤂᤠᤖᤢᤰ ᤔᤧᤀᤡᤵᤛᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤛᤩᤧᤖᤥ॥ ᤂᤧᤏᤧ᤹ ᤁᤧᤔᤏᤠᤜᤠ᤹ᤃ ᤁᤥ᤺ᤰᤔᤠᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤓᤢᤱᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥

¹⁹ ᤂᤧᤏᤧ᤹ ᤁᤧᤕᤠᤱᤄᤣ᤺ᤰᤁᤡᤴ ᤌᤣ᤺ᤸᤗᤧᤀᤠᤱ ᤔᤧᤘᤣ᤺ᤴᤍᤢᤴᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤃᤠ᤺ᤴᤍᤧᤒᤠᤴ ᤀᤠᤛᤡᤛᤡᤒᤠ ᤆᤥᤰᤗᤥ॥ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤁᤧᤄᤧᤶᤒᤠᤜᤠ᤹ ᤔᤧᤛ᤺ᤳᤗᤥ ᤂᤧᤏᤧ᤹ ᤁᤧᤈᤥ᤺ᤴᤍᤧᤒᤠᤀᤥ ᤂᤧᤱᤜᤠ᤹ᤖᤧ ᤜᤡᤵᤗᤠ ᤔᤧᤜᤡᤵᤋᤢᤖᤥ. ᤌᤣᤀᤠᤱᤓᤧᤸᤗᤧ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤂᤧᤏᤧ᤹ ᤁᤧᤃᤢ᤹ᤀᤡᤓᤧᤶᤔᤧᤴ ᤜᤠ᤺ᤳᤗᤧ ᤋᤢᤔᤢᤒᤠ ᤜᤥ᤺ᤵᤐᤠᤱᤒᤣ᥅