ᤏᤜᤢᤔ 2 - LIFOTNT

ᤏᤡᤏᤒᤣᤴ ᤂᤠᤵᤐᤢᤌᤩ᤺ᤱ ᤐᤥᤱ᤹

¹ ᤏᤡᤏᤒᤣᤀᤣ. ᤂᤧᤏᤧ᤹ ᤁᤧᤏᤡᤱᤔᤡ ᤌᤡᤰ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤋᤃᤡ ᤑᤧᤴᤗ ᤐᤳᤗᤥ॥ ᤂᤧᤏᤧ᤹ ᤁᤧᤈᤱᤜᤡᤶᤜᤠ᤹ ᤁᤶᤒᤪᤠᤱ ᤔᤧᤳᤋᤧ᤹ᤀᤥ. ᤗᤠᤶᤔᤡᤴ ᤏᤢᤖᤡᤰ ᤀᤥᤔᤧᤳᤋᤧ᤹. ᤑ᤹ᤀᤡ ᤕᤢᤵᤛᤡᤱᤅᤧ᤹ᤀᤥ. ᤁᤧᤎᤢᤶᤔᤡᤴ ᤗ᤺ᤳᤋᤧ᤹ᤀᤠᤱ ᤁᤧᤎᤢᤶᤒᤠ ᤆᤥ᤺ᤰᤛᤡᤱᤅᤧ᤹ᤀᤥ॥

² ᤂᤠᤵᤐᤢᤌᤩ᤺ᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤕᤠᤁᤢᤒ ᤏᤢ ᤀᤡᤛᤪᤠᤀᤡᤗᤖᤧ ᤂᤢᤴᤇᤡ᤹ ᤆᤧᤸᤗᤧᤰᤛᤣ᤹ ᤐᤥᤖᤠ᤺ᤰᤜᤠ᤹ ᤔᤧᤗᤧᤴᤍᤢᤀᤠᤱ ᤏᤧᤛᤠᤱ. ᤂᤠᤵᤐᤢᤌᤩ᤺ᤱ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤀᤠᤱ ᤏᤧᤛᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤁᤢᤒᤖᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤏᤢ᤺ᤰᤋᤢᤖᤥ. ᤀᤡᤛᤪᤠᤀᤡᤗᤖᤧ ᤁᤢᤜᤠᤱᤘᤠ ᤁᤢᤔᤠᤱᤘᤠᤴ ᤋᤃᤡᤒᤠ ᤁᤢᤀᤡᤛᤡᤰ ᤐᤥᤱᤗᤥ॥

³ ᤏᤡᤱᤔᤡ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤥᤜᤠ᤹ ᤜᤧ᤺ᤳ ᤗ᤹ᤖᤥ. ᤌᤰᤗᤡᤜᤠᤱᤜᤠ᤹ᤖᤧ ᤜᤧ᤺ᤰᤁᤱᤃᤱᤒᤠ ᤆᤠᤱ ᤔᤧᤈᤠᤰᤂᤢᤖᤥ॥ ᤂᤧᤱᤜᤠ᤹ ᤕᤠᤖᤡᤵ ᤔᤧᤈᤥᤃᤢᤛᤡᤒᤠ ᤕᤧᤴᤏᤥ ᤀᤴᤗᤠᤎᤠᤜᤠ᤹ᤀᤥ ᤁᤧᤒᤵᤐᤠ ᤏᤡᤱᤄᤱᤅᤡᤴ ᤋᤡᤸᤗᤧᤰ ᤋᤡᤸᤗᤧᤰ ᤗᤧᤰᤗᤥ ᤀᤠ᤺ᤱᤛᤡᤱ ᤗᤠ᤺ᤰᤜᤠ᤹ ᤛᤧᤸᤗᤧᤱ ᤛᤧᤸᤗᤧᤱ ᤗ᤹ᤖᤥ॥

⁴ ᤀᤴᤗᤠᤎᤠᤜᤠ᤹ ᤔᤠᤖᤠᤶᤜᤠ᤹ᤀᤥ ᤛᤠ᤹ᤖᤡᤰ ᤆᤠᤳᤗ ᤔᤧᤗᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤗᤰᤂᤢᤶᤜᤠ᤹ᤀᤥ ᤂᤧᤱᤜᤠ᤹ ᤀᤣᤃᤠᤱ ᤋᤃᤠᤱ ᤏᤢ᤺ᤱᤗ ᤆᤠ᤹ᤖᤡᤰ ᤗᤥ᤺ᤰᤗᤥ॥ ᤂᤧᤱᤜᤠ᤹ ᤁᤧᤍᤡ᤺ᤵᤐᤠ ᤛᤧᤴᤎᤥ᤹ ᤜᤧᤰᤋᤱᤒᤠ ᤏᤡᤍᤧᤸᤗᤥ. ᤂᤧᤱᤜᤠ᤹ ᤛᤠ᤺ᤶᤓᤣ ᤗᤧᤰᤐᤠ ᤁᤢᤛᤡᤱ ᤔᤧᤛᤢ᤺ᤰᤗ ᤔᤧᤗᤥ᤺ᤰᤗᤥ॥

⁵ ᤂᤧᤸᤗᤧ ᤛᤣᤃᤢᤛᤡᤒᤠ ᤌᤰᤛᤢᤒᤠᤜᤠ᤹ ᤀᤢ᤺ᤳᤋᤢᤛᤡᤖᤥ. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤶᤔᤥ ᤔᤧᤍᤥ᤺ᤰᤗᤥ॥ ᤔᤧᤓᤳᤇᤡᤱᤗ ᤔᤧᤗᤧ᤺ᤱᤗ ᤕᤧᤰᤕᤰᤁᤥᤒᤠ ᤗᤢᤱᤎᤠᤰ ᤗᤧᤵᤔᤠᤱ ᤔᤧᤗᤥ᤺ᤰᤗᤥ. ᤂᤧᤵᤔᤥ ᤂᤢᤴᤇᤡ᤹ ᤋᤠᤱᤛᤧ᤺ᤵᤛᤡᤱᤔᤠ ᤂᤥ᤺ᤴ ᤕᤠᤖᤡᤵ ᤔᤧᤈᤥᤃᤢᤖᤥ॥

⁶ ᤁᤖ ᤘᤜ᤺ᤱᤅᤥᤒᤠ ᤘᤠᤎᤣ᤺ᤰᤔᤠᤜᤠ᤹ ᤔᤧᤜᤛᤢᤖᤥ. ᤜᤧᤰᤁᤩᤠᤱ ᤜᤠᤱᤜᤡᤶᤔᤡᤴ ᤗᤢ᤺ᤴᤏᤠᤱ ᤌᤢᤵᤗᤥ॥

⁷ ᤏᤡᤏᤒᤣᤴ ᤋᤧᤶᤔᤠᤍᤣ᤹ᤔᤠ ᤀᤡᤱᤈᤠᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤂᤧᤸᤗᤧ ᤁᤢᤕᤥ᤺ᤃ᤻ᤔᤠᤜᤠ᤹ ᤛᤠᤵᤐᤧᤳᤋᤪᤢᤰᤔᤠ ᤜᤧᤰᤁᤣ ᤂᤢᤴᤇᤡ᤹ ᤛᤱᤒᤵᤔᤧᤴ ᤔᤧᤜᤡᤵᤋᤢᤖ ᤔᤧᤖᤡᤱ ᤔᤧᤎᤰᤗᤥ॥

⁸ ᤏᤡᤏᤒᤣᤒᤠ ᤔᤏᤠᤜᤠ᤹ᤃ ᤘᤖᤰᤁᤥᤒᤠ ᤆᤫᤠ᤺ᤳᤋᤡᤴ ᤜᤒᤣ᤺ᤰᤐᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ. “ᤛᤵᤑᤠᤖᤥ᥄ ᤛᤵᤑᤠᤖᤥ. ᤔᤧᤄᤧᤳᤋᤠᤛᤡᤶᤔᤡᤴᤏᤧ᤹᥄” ᤗ᤹ᤖᤡᤰ ᤂᤧᤸᤗᤧ ᤔᤧᤳᤋᤢᤛᤡᤖᤥ. ᤁᤖ ᤀᤠᤳᤋᤡᤴᤏᤠᤱ ᤀᤣᤃᤠᤱ ᤔᤧᤜᤡᤛᤡᤱᤅᤡᤴᤗᤥ॥

⁹ ᤕᤢᤵᤐᤠ ᤏᤠᤵᤋᤠᤶᤛᤡᤶᤔᤧ᤹᥄ ᤛᤠᤶᤔᤩᤠᤱ ᤏᤠᤵᤋᤠᤶᤛᤡᤶᤔᤧ᤹ᤀᤥ᥄ ᤂᤧᤸᤗᤧ ᤁᤧᤖᤧᤰ ᤁᤢᤕᤠᤱᤓᤢᤜᤠ᤹ᤀᤥ ᤗᤠᤶᤒᤠᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤆᤥᤰᤗᤥ॥

¹⁰ ᤏᤡᤏᤒᤣ ᤕᤧᤰᤕᤰᤁᤡᤴ ᤔᤧᤏᤠᤵᤋᤢᤀᤠᤱ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤔᤧᤈᤥᤃᤢᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤥ ᤛᤰᤔᤠ ᤐᤢ᤹ᤖᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤢᤱᤒᤥᤜᤠ᤹ ᤌᤧᤃᤰᤁᤰᤏᤠ ᤕᤱᤗᤥ॥ ᤜᤧᤰᤁᤩᤠᤱ ᤁᤧᤖᤧᤰ ᤏᤠᤛᤡᤱᤃᤧᤴ ᤌᤰᤗᤠᤀᤥ ᤋᤢᤰᤔᤠ ᤕᤠᤰᤗᤥ. ᤁᤧᤖᤧᤰ ᤆᤡᤳᤗᤡ ᤏᤠᤖᤠᤜᤠ᤹ ᤛᤀᤶᤕᤠ᤺ᤵᤐᤠ ᤐᤥᤱᤗᤥ॥

¹¹ ᤂᤢᤴᤇᤡ᤹ ᤆᤢᤈᤢᤰᤛᤠ ᤛᤠᤜᤠ᤹ ᤆᤠᤈᤠ᤺ᤵᤔᤠᤛᤡᤍᤧᤴ ᤂᤡᤖᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤂᤠ᤺ᤴ ᤀᤠᤳᤋᤠᤴ ᤏᤧᤒᤣ᥅ ᤂᤧᤵᤔᤥ ᤂᤡᤖᤡᤱᤒᤠ. ᤌᤧᤖᤡᤱᤔᤠ ᤏᤢ ᤂᤡᤖᤡᤱᤒᤠ ᤆᤩᤠ᤺ᤰᤜᤠ᤹ᤀᤠᤱ ᤁᤡᤔᤠᤀᤣ ᤔᤧᤱᤃᤡᤀᤣ ᤗᤠᤱᤔᤧᤄᤣᤃᤧᤀᤠᤱ ᤔᤧᤘᤕᤧᤖᤥ॥

¹² ᤌᤧᤖᤡᤱᤒᤧᤸᤗᤧ ᤁᤢᤛ᤻ᤛᤠᤜᤠ᤹ᤖᤧ ᤗᤠᤃᤡ ᤂᤢᤴᤇᤡ᤹ ᤕᤥᤒᤠ ᤛᤠᤏᤠ᤺ᤳᤜᤠ᤹ ᤁᤢᤛᤢᤰᤛᤢᤰ ᤛᤧᤖᤢᤛᤡᤀᤠᤱ ᤘᤕᤧᤖᤥ. ᤜᤧᤰᤁᤩᤠᤱ ᤌᤧᤖᤡᤱᤒᤧᤸᤗᤧ ᤌᤧᤖᤡᤱᤔᤧᤸᤗᤧ ᤁᤢᤗᤠᤃᤡ ᤌᤰᤛᤠᤜᤠ᤹ ᤑᤢᤕᤢᤛᤡ ᤛᤧᤖᤢᤛᤡᤀᤠᤱ ᤘᤕᤧᤖᤥ. ᤂᤧᤸᤗᤧ ᤁᤢᤄᤠᤜᤠ᤹ ᤛᤧᤖᤢᤛᤡᤀᤠᤱ ᤋᤠᤖᤢᤛᤡᤒᤠ ᤌᤰᤛᤠᤜᤠ᤹ᤖᤧ ᤜᤧᤰᤁᤩᤠᤱ ᤗᤢᤱᤑᤢᤰᤁᤥᤜᤠ᤹ ᤛᤠᤏᤠ᤺ᤳᤜᤠ᤹ᤖᤧ ᤌᤡᤶᤛᤢᤀᤠᤱ ᤏᤧᤛ᤻ᤛᤧᤖᤥ॥

¹³ ᤔᤢᤰᤛᤠᤶᤛᤠᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ. “ᤂᤧᤵᤛᤧ᤹ᤀᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠᤖᤥ॥ ᤁᤧᤀᤴᤗᤠᤜᤠ᤹ ᤔᤡ᤺ᤰᤂᤥ᤹ ᤛᤢ᤺ᤱᤃᤢ ᤛᤢ᤺ᤱᤃᤢ ᤔᤡᤎᤡᤰᤂᤢᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤁᤧᤘᤧᤶᤒᤠ ᤁᤧᤛ᤻ᤛᤠ ᤂᤡᤖᤡᤱᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤖᤥ॥ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤗᤠᤈᤣ᤹ᤀᤥ ᤛᤠ ᤁᤧᤴᤏᤠ᤺ᤳᤏᤧᤸᤗᤥ. ᤂᤶᤓᤩᤠᤱ ᤂᤧᤏᤧ᤹ ᤁᤧᤀᤡᤱᤄᤱᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤀᤠᤸᤗᤀᤠᤱᤎᤥ ᤕᤠᤶᤔᤥ ᤂᤧᤶᤔᤧᤍᤧᤳᤏᤧᤴᤗᤥ॥”