ᤏᤜᤢᤔ 1 - LIFOTNT

¹ ᤀᤣᤸᤁᤥᤛᤡ ᤏᤜᤢᤔᤖᤧ ᤏᤡᤏᤒᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤑᤥᤀᤥ ᤏᤡᤛᤢᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴᤏᤡᤴ ᤜᤠᤒᤠ ᤁᤴᤗᤥ॥

ᤏᤡᤏᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ

² ᤕᤜᤘᤣ ᤍᤠᤱᤒᤧᤱᤃ ᤁᤢᤏᤠᤃᤧᤜᤧᤶᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤁᤢᤗᤧᤰᤘᤠ ᤁᤧᤏᤢ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢ ᤐᤡᤖᤢᤛᤡᤖᤥ ᤂᤢᤏᤧ᤹ ᤁᤢᤛᤠᤰᤁᤧᤴ ᤀᤡᤛᤣ᤺ᤱᤒᤠ ᤆᤥᤰᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤔᤡᤜᤠ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤀᤵᤐᤠᤜᤠ᤹ᤀᤥ ᤁᤢᤛᤠᤰᤁᤧᤴᤏᤡᤴ ᤌᤠᤛᤢᤖᤥ॥

³ ᤕᤜᤘᤣ ᤍᤠᤱᤒᤧᤴ ᤁᤢᤛᤡᤰ ᤐᤥ᤺ᤰᤔᤠ ᤏᤠᤛᤡ ᤁᤧᤎ᤺ᤵᤐᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤋᤡᤰᤛᤠᤒᤧᤴ ᤂᤢᤶᤍᤡᤱ ᤔᤧᤶᤒᤡᤀᤣ ᤔᤧᤗᤧᤖᤢᤴᤗᤥ॥ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤏᤢ ᤁᤣᤈᤱᤅᤥ ᤂᤢᤏᤧ᤹ ᤁᤢᤗᤠᤶ ᤏᤧᤖᤥ. ᤂᤶᤓᤩᤠᤱ ᤂᤠ᤹ᤔᤡ᤺ᤵᤐᤠᤜᤠ᤹ᤃ ᤁᤢᤗᤠᤱᤜᤠ᤹ᤀᤥᤒᤠ ᤂᤠᤶᤜᤡ᤺ᤰᤗᤥ॥

⁴ ᤂᤢᤏᤧ᤹ ᤘᤖ᤺ᤱᤅᤡᤴ ᤑᤧ᤺ᤰᤋᤢᤸᤗᤧ ᤆᤵᤐᤪᤧᤰ ᤆᤵᤗᤥ. ᤂᤢᤏᤧ᤹ ᤁᤧᤖᤧᤰ ᤘᤜ᤺ᤱᤜᤠ᤹ ᤆᤵᤗ ᤕᤠ᤺ᤴᤍᤢᤖᤥ॥ ᤒᤠᤛᤠᤏ ᤏᤢ ᤁᤠᤷᤔᤣᤗᤒᤠ ᤌᤧᤃᤢᤜᤠ᤹ ᤀᤡᤖᤧᤶᤗᤥ. ᤜᤧᤰᤁᤩᤠᤱ ᤗᤧᤒᤠᤏᤠᤏᤒᤠ ᤑᤢᤱᤜᤠ᤹ ᤀᤡᤛᤢ᤹ᤀᤠᤱ ᤔᤠᤒᤣ᤺ᤰᤗᤥ॥

⁵ ᤂᤢᤏᤧ᤹ ᤁᤢᤍᤃᤡ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤕᤱᤗᤥ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ ᤕᤥ᤺ᤶᤒᤣ᤺ᤰᤗᤥ॥ ᤂᤢᤏᤧ᤹ ᤋᤠ᤺ᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤢᤖᤢᤵᤗᤢᤵᤏᤠ ᤕᤱᤗᤥ. ᤕᤥ᤹ᤒᤠᤴ ᤏᤢ ᤂᤧᤵᤔᤥ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤆᤡᤖᤡᤶᤗᤡᤶᤏᤠ ᤔᤧᤕᤱᤗᤥ॥

⁶ ᤂᤢᤏᤧ᤹ ᤁᤢᤕᤠ᤺ᤰᤗᤧ᤹ᤀᤡᤸᤗᤧ ᤜᤠᤳ ᤕᤧᤵᤔᤠ ᤛᤢᤰᤁᤠᤱᤒᤣ᥅ ᤂᤢᤏᤧ᤹ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤡᤰᤁᤧᤴ ᤜᤠ᤺ᤳᤗᤧ ᤌᤶᤔᤠ ᤛᤢᤰᤋᤢᤒᤣ᥅ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤔᤡᤎᤢᤱ ᤔᤡᤖᤠ᤺ᤰ ᤜᤧᤰᤁᤣ ᤌᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤗᤥ॥

⁷ ᤕᤜᤘᤣ ᤍᤠᤱᤒᤧᤴ ᤁᤧᤏᤢ᤹ᤒᤠ ᤆᤥᤰᤗᤥ. ᤕᤧᤳᤋᤢᤰᤂᤣ ᤆᤠᤔᤠ ᤕᤧᤶᤔᤥ ᤂᤢᤏᤧ᤹ᤀᤣ ᤀᤡ᤺ᤶᤛᤡᤱᤔᤠᤍᤧᤴᤗᤥ. ᤂᤢᤏᤧ᤹ᤀᤥ ᤁᤧᤄᤧ᤺ᤶᤛᤡᤱᤒᤠᤜᤠ᤹ ᤂᤢᤏᤧ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ॥

⁸ ᤁᤖ ᤂᤢᤏᤧ᤹ ᤁᤧᤃᤢᤱᤒᤠ ᤆᤫᤠ᤺ᤳᤋᤡᤸᤗᤧ ᤏᤡᤏᤒᤣᤴ ᤔᤧᤰᤂᤢᤖᤥ. ᤂᤢᤏᤧ᤹ ᤁᤢᤏᤡᤱᤔᤡᤜᤠ᤹ ᤂᤠᤃᤧᤔᤠᤰᤐᤠᤍᤧᤴᤏᤥ ᤏᤠ᤺ᤳᤋᤢᤍᤣᤛᤢᤛᤡᤖᤥ॥

⁹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤀᤠᤰᤋᤱᤒᤠ ᤆᤧᤶᤓᤴ ᤔᤧᤈᤥᤃᤢᤛᤠᤱ ᤂᤢᤏᤧ᤹ ᤂᤧᤱᤜᤠ᤹ ᤘᤖᤧᤱᤗᤧᤱ ᤕᤢᤔᤪᤧᤰ ᤔᤧᤰᤂᤢᤛᤡᤖᤥ. ᤜᤧᤰᤁᤩᤠᤱ ᤏᤡᤗᤧᤱ ᤋᤢᤰᤂᤣ ᤗᤠᤰᤂᤣ ᤔᤧᤍᤠᤏᤧᤴᤗᤥ॥

¹⁰ ᤂᤧᤱᤜᤠ᤹ ᤋᤡᤱᤃᤪᤣᤰ ᤗᤠᤜᤠ᤹ᤀᤥ ᤔᤧᤜᤶᤗᤥ. ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤕᤢᤛᤡᤀᤠᤱ ᤔᤢᤍᤱ ᤔᤧᤗ᤹ᤖᤥ. ᤂᤧᤱᤜᤠ᤹ ᤁᤧᤜᤣᤒᤠ ᤕᤠᤴ ᤜᤧᤰᤁᤣ ᤌᤩ᤺ᤱ ᤔᤧᤒᤥᤱᤗᤥ॥

¹¹ ᤏᤡᤏᤒᤣᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ᤗᤠᤶ ᤆᤧᤶᤓᤴ ᤁᤧᤈᤥ᤺ᤰᤐᤠ ᤏᤢ ᤋᤠᤵᤑᤧ᤺ᤶᤒᤠ ᤛᤢᤈᤠ ᤁᤧᤒᤡᤒᤠ ᤗᤳᤇᤠ ᤔᤏᤠ ᤗ᤺ᤴᤍᤧᤀᤠᤱ ᤘᤠ᤹ᤖᤥ॥

¹² ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤂᤧᤱᤜᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤢᤰᤁᤧᤃᤢᤒᤠ ᤔᤧᤈᤥᤰᤗᤥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤔᤧᤔᤧᤰᤂᤢᤛᤡᤀᤠᤱ ᤔᤧᤏᤢᤵᤗᤥ॥ ᤕᤜᤢᤍᤠᤀᤣ. ᤀᤠᤱᤃᤠ᤹ ᤋᤢᤰᤂᤣ ᤆᤠ᤺ᤳᤏᤧᤀᤠᤱ ᤘᤠ᤹ᤖᤥ. ᤁᤖ ᤀᤠᤱᤃᤠ᤹ ᤀᤠᤸᤗᤀᤠᤱᤎᤥ ᤕᤠᤶᤔᤥ ᤋᤢᤰᤂᤣ ᤔᤧᤈᤠ᤺ᤳᤏᤧᤴᤗᤥ॥

¹³ ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤧ᤺ᤵᤛᤡᤱᤅᤡᤴ ᤂᤧᤏᤧ᤹ ᤁᤧᤓᤰᤋᤠᤱᤅᤥᤗᤠᤶ ᤀᤠᤱᤃᤠ᤹ ᤀᤧᤰᤂᤢᤱ ᤐᤡᤏᤧᤖᤥ. ᤜᤧᤰᤁᤩᤠᤱ ᤂᤧᤴ ᤀᤡᤄᤣ᤺ᤱᤜᤠ᤹ ᤛᤩᤠᤰ ᤛᤩᤠᤰ ᤑᤢ᤹ᤖᤢᤱᤗᤥ॥”

¹⁴ ᤏᤡᤏᤒᤣᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤀᤰᤋᤱᤒᤠ ᤗᤳᤇᤠ ᤀᤡᤱᤈᤠᤱ ᤁᤧᤒᤡᤖᤧᤀᤠᤱ ᤘᤠ᤹ᤖᤥ— “ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤁᤧᤔᤡᤱ ᤋᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤳᤋᤡᤴᤏᤠᤱ ᤁᤧᤔᤢ᤹ᤀᤡᤍᤠᤱᤛᤠ ᤔᤧᤴᤘᤠ᤹ᤏᤧᤴᤗᤥ॥ ᤂᤧᤏᤧ᤹ ᤁᤧᤔᤠᤱᤜᤠ᤹ ᤔᤧᤕᤢᤱᤒᤠ ᤔᤠᤱᤜᤡᤶᤔᤥ ᤂᤥ᤺ᤶᤔᤏᤠᤒᤠ ᤗᤰᤔᤏᤠᤒᤠ ᤏᤢ ᤕᤥ᤺ᤶᤔᤏᤠᤀᤠᤱ ᤆᤥ᤺ᤰᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤀᤠᤱᤃᤠ᤹ ᤌᤩ᤺ᤱ ᤔᤧᤰᤂᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤀᤡᤐᤢᤱᤅᤡᤴ ᤕᤠᤖᤡᤵ ᤆᤥᤃᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤢ᤹ᤀᤡᤃᤧᤓᤧᤶᤒᤠ ᤁᤧᤈᤥ᤺ᤰᤗᤥ॥”

¹⁵ ᤀᤥᤔᤧᤳᤋᤧᤶᤔᤧ᤹. ᤛᤢᤏᤠᤀᤡᤱ ᤁᤧᤍᤠ᤺ᤵᤐᤠ ᤏᤢ ᤏᤢ᤹ᤔᤠᤍᤠᤔᤠ ᤀᤡᤱᤄᤱ ᤀᤢᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤑᤧᤴᤗ ᤐᤳᤗᤥ॥ ᤕᤜᤢᤍᤠᤀᤣ. ᤂᤧᤏᤧ᤹ ᤁᤧᤍᤱᤏᤠᤶᤜᤠ᤹ ᤋᤥᤛᤧ᤹ᤀᤥ ᤂᤧᤏᤧ᤹ ᤔᤠᤱᤜᤧᤰ ᤁᤧᤈᤥᤃᤢᤒᤠ ᤐᤠ᤺ᤴᤜᤠ᤹ ᤁᤧᤳᤋᤧ᤹ᤀᤥ॥ ᤀᤠᤸᤗᤀᤠᤱᤎᤥ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤧᤏᤧ᤹ ᤁᤧᤔᤧᤶᤓᤳᤏᤧᤴᤗᤥ. ᤂᤧᤱᤜᤠ᤹ ᤘᤖᤧᤱᤗᤧᤱ ᤕᤢᤔᤪᤧᤰ ᤔᤧᤔᤧᤰᤗᤥ॥