ᤔᤷᤁᤢᤛ 9 - LIFOTNT

¹ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤔᤢᤰᤛᤠᤶᤏᤢ ᤕᤢ᤺ᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”

ᤕᤧᤛᤢᤖᤧ ᤁᤢᤎᤰᤁᤡᤴ ᤗᤧᤱᤛᤡᤱ

² ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤕᤢᤜᤢᤴᤏᤠᤴ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥ ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣᤰ ᤗᤧᤱᤛᤡᤱᤗ ᤐᤣᤀᤠᤱ

³ ᤁᤢᤍᤣ᤺ᤳᤜᤠ᤹ ᤔᤡᤰᤁᤡᤴ ᤆᤧᤔᤢᤖ ᤌᤠᤖᤡᤰ ᤑᤢᤳᤋᤪᤡ᤺ᤱᤃᤩᤠ᤺ᤵᤐᤠ ᤐᤥ᤺ᤰᤂᤧ. ᤂᤧᤶᤔᤩᤠᤰ ᤛᤠ᤹ᤖᤡᤰ ᤑ ᤗ᤹ᤖ ᤌᤠᤖᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠ᤺ᤳᤗᤧᤀᤠᤱ ᤆᤠᤱᤅᤡᤴ ᤘᤠᤜᤵᤔᤠ ᤔᤧᤛᤢᤰᤋᤢᤴᤗᤥ॥

⁴ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤏᤢ ᤔᤥᤛᤠᤴ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢᤴ ᤏᤢ ᤋᤠ᤹ᤈᤧᤰᤂᤧᤳᤇᤡᤖᤥ॥

⁵ ᤐᤋᤪᤢᤛᤖᤧ ᤕᤧᤛᤢᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢᤒᤠ ᤐᤥᤱᤗᤥ॥ ᤀᤠᤏᤡᤃᤣ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧᤒᤡ᥅ ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰᤌᤡᤰ ᤆᤥᤃᤢᤶᤒᤧᤖᤥ᥄”

⁶ ᤐᤋᤪᤢᤛᤖᤧ ᤌᤣ ᤐᤠ᤺ᤵᤔᤠᤒᤣ ᤑᤠ᤹ᤀᤠᤱ ᤁᤢᤏᤡᤱᤘᤠ᤹ᤀᤡᤸᤗᤧ ᤌᤣᤀᤠᤱ ᤔᤧᤎᤠᤵᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧᤖᤥ॥

⁷ ᤜᤧᤰᤁᤩᤠᤱ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”

⁸ ᤂᤧᤱᤜᤠ᤹ ᤂᤡᤖᤡ ᤀᤥᤔᤧᤔ᤺ᤕᤧᤸᤗᤧ ᤕᤧᤛᤢᤴ ᤗᤰ ᤘᤕᤧ. ᤘᤣ᤹ ᤜᤠ᤺ᤳᤋᤠᤱ ᤔᤧᤜᤥ᤺ᤵᤋᤧᤖᤥ॥

⁹ ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤁᤧᤏᤡᤛᤢᤶᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤜᤠ᤺ᤳᤋᤠᤱ ᤔᤧᤈᤧᤰᤋᤧᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤖᤥ॥

¹⁰ ᤂᤧᤱᤜᤠ᤹ᤖᤧᤀᤠᤱ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤗᤢᤶᤔᤥᤀᤣ ᤔᤧᤕᤢᤰᤂᤢ॥ ᤂᤧᤱᤜᤠ᤹ ᤁᤴ ᤛᤡᤔᤧᤴᤗᤠᤶ ᤜᤡᤱᤔᤠ ᤑᤠ᤹ᤀᤡᤴ ᤌᤧᤔᤠᤏᤧᤒᤣ ᤑᤠ᤹ᤀᤠᤱ ᤐᤠᤴ ᤔᤧᤎᤰᤋᤧᤖᤥ॥

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢ᤺ᤔᤠᤀᤣ ᤐᤥᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”

¹² ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥ ᤀᤠᤰᤂᤣᤗ᤹ᤖᤡᤰ ᤔᤧᤴᤇᤠᤶᤛᤠᤴ ᤋᤢᤰᤂᤣ ᤆᤠᤔᤠᤀᤣ ᤐᤥᤱ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ᤖᤧ ᤔᤧᤏᤠ᤹ᤖᤢ ᤁᤧᤗ᤹ᤒᤠ ᤛᤠᤵᤋᤧᤀᤠᤱ ᤔᤧᤒᤳᤏᤧᤴᤒᤡ᥅

¹³ ᤁᤖ ᤀᤣᤗᤡᤕᤠᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤢᤕᤠ᤺ᤶᤒᤣᤀᤥ ᤛᤠᤵᤋᤧᤀᤠᤱ ᤐᤵᤐᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥”

ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤆᤢᤰᤐᤧᤴ

¹⁴ ᤜᤧᤰᤁᤩᤠᤱ ᤂᤧᤱᤜᤠ᤹ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧ॥ ᤂᤧᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤐᤠ᤺ᤴᤎᤰᤏᤢ ᤔᤧᤕᤠᤃᤧ॥

¹⁵ ᤕᤧᤛᤢᤴ ᤕᤧᤒᤠ ᤔᤧᤏᤡᤛᤢᤀᤠᤱ ᤂᤧᤵᤔᤥ ᤁᤧᤘᤠ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤛᤠ᤹ᤖᤡᤰ ᤜᤠ᤺ᤵᤔᤧᤗᤧᤰᤋᤧᤀᤠᤱ ᤔᤧᤗᤥ᤺ᤰᤋᤧᤖ ᤕᤧᤛᤢᤴ ᤛᤧᤘᤠ ᤔᤧᤔᤧᤳᤋᤢᤖᤥ॥

¹⁶ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤧᤱᤜᤠ᤹ᤏᤢ ᤌᤧᤔᤠ ᤐᤠᤴ ᤁᤧᤎᤰᤋᤡᤒᤠᤒᤣ᥅”

¹⁷ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤐᤠ᤺ᤳᤋᤢ. “ᤛᤡᤰᤛᤠᤶᤒᤣ. ᤀᤠᤛ᤻ᤛᤠᤴ ᤁᤵᤔᤥ ᤋᤠᤖᤢᤱᤅᤠᤱ ᤘᤠ᤹ᤀᤠ. ᤌᤣᤀᤠᤱᤓᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤋᤖᤢᤀᤠᤱ ᤁᤢᤒᤠ᤺ᤴᤏᤠᤱ ᤔᤕᤧᤒᤣᤀᤠᤱ ᤘᤠ᤹ᤖᤥ॥

¹⁸ ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤸᤗᤧ ᤂᤧᤴ ᤂᤠᤶᤔᤥ ᤌᤠᤶᤛᤡᤱᤅᤠᤱ ᤁᤢᤎᤩᤠᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤏᤠᤱ ᤁᤢᤜᤠᤒᤥ᤹ᤒᤠᤴ ᤀᤡᤛᤡᤰᤂᤢ᤹. ᤜᤧᤰᤁᤩᤠᤱ ᤂᤠᤰᤋᤢ᤹ᤖᤥ॥ ᤁᤧᤜᤢ᤹ᤛᤠᤶᤒᤠᤜᤠ᤹ ‘ᤂᤧᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹’ ᤔᤧᤳᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”

¹⁹ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤛᤠᤴ ᤁᤧᤜᤥ᤺ᤵᤐᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤖ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”

²⁰ ᤂᤧᤴ ᤆᤢᤰᤐᤧᤴ ᤕᤧᤛᤢᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤑᤧᤴᤛᤠᤶᤔᤡᤸᤗᤧ ᤕᤧᤛᤢᤴ ᤏᤡᤛᤢᤀᤠᤱ ᤂᤧᤴ ᤆᤢᤰᤐᤧᤴ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤁᤢᤎᤩᤠᤳᤋᤡᤴ ᤑᤢᤈᤢ᤺ᤰ-ᤑᤢᤈᤢ᤺ᤰ ᤗ᤺ᤴᤍᤧᤖ ᤜᤥ᤺ᤳᤇᤡᤱᤔᤠ ᤜᤣ᤺ᤰᤋᤧᤖᤥ॥

²¹ ᤕᤧᤛᤢᤖᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠᤴ ᤛᤣ᤺ᤴᤍᤥᤛᤢ. “ᤁᤴ ᤆᤢᤰᤐᤧᤴ ᤀᤠᤵᤑᤠᤸᤗᤧᤀᤠᤱᤎᤥ ᤀᤰᤂᤣ ᤐᤥ᤺ᤰᤂᤧᤒᤠᤒᤣ᥅” ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤁᤴ ᤀᤅᤧ᤺ᤰᤘᤠ ᤘᤕᤧᤀᤠᤱᤎᤥᤀᤣ ᤀᤰᤂᤣ ᤐᤥ᤺ᤰᤂᤧᤒᤠᤖᤥ॥

²² ᤁᤴ ᤑᤧᤴᤛᤠᤶᤔᤡᤸᤗᤧ ᤕᤖᤡᤰᤗᤧᤱ ᤛᤧᤵᤔᤠ ᤁᤥ᤺ᤳᤋᤢᤸᤗᤧ ᤆᤢᤰᤐᤧᤴ ᤔᤡᤀᤥ ᤏᤢ ᤆᤫᤠ᤺ᤳᤋᤥ ᤛᤧᤵᤔᤠ ᤑᤠ᤹ᤀᤠᤱ ᤗᤠᤵᤑᤢᤛᤢ ᤕᤠᤰᤋᤢᤖᤥ॥ ᤀᤠᤍᤠᤱᤒᤣ. ᤗᤢᤱᤔᤠ᤹ ᤀᤠᤍᤢᤰᤋᤧ᤹ᤀᤥ. ᤁᤧᤛᤢᤰᤋᤢᤏᤧ ᤑᤠ᤹ᤃᤪ ᤀᤠᤓᤠ᤹ᤖᤧ᤹ᤀᤥ॥”

²³ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “‘ᤁᤧᤛᤢᤰᤋᤢᤏᤧ ᤑᤠ᤹ᤃᤪ’ ᤑᤠ᤹ᤀᤠᤱ ᤌᤣᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅ ᤏᤛᤠᤴ ᤁᤧᤈᤥ᤺ᤰᤐᤠᤸᤗᤧ ᤁᤢᤗᤠᤃᤡᤃ ᤌᤣᤛᤠᤱ ᤐᤥᤱᤔᤠ ᤛᤢᤰᤗᤥ॥”

²⁴ ᤜᤧᤰᤁᤣ᤺ᤸᤗᤧ ᤂᤧᤴ ᤆᤢᤰᤐᤧᤸᤗᤧ ᤁᤢᤶᤒᤠᤖᤧ ᤂᤡᤔᤥ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤛᤠᤴ ᤆᤥᤃᤢᤱ. ᤁᤖ ᤀᤠᤸᤗᤛᤠᤱ ᤕᤖᤡᤰ ᤏᤛᤠᤴ ᤆᤥ᤺ᤰᤔᤠ ᤑᤠ᤹ᤖᤠᤱᤅᤧ᤹ᤀᤥ᥄”

²⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤕᤖᤡᤰ ᤔᤏᤠᤜᤠ᤹ ᤂᤧᤵᤔᤥ ᤔᤧᤗᤥ᤺ᤰᤋᤧᤖ ᤔᤧᤓᤧᤖᤧᤒᤠ ᤏᤡᤛᤢᤛᤡᤀᤠᤱ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢ. “ᤏᤠᤎᤠᤰᤐᤠ ᤏᤢ ᤁᤢᤒᤠᤴ ᤔᤧᤴᤗ᤺ᤶᤏᤠᤒᤠ ᤑᤧᤴᤛᤠᤶᤔᤣ. ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ᤀᤠᤱ ᤀᤠᤵᤑᤠᤸᤗᤧᤀᤠᤱ ᤕᤠᤶᤔᤥ ᤔᤧᤗᤠᤛᤧᤴᤏᤧ᤹᥄”

²⁶ ᤂᤧᤴ ᤑᤧᤴᤛᤠᤶᤔᤡᤴ ᤑᤡ᤺ᤰᤋᤧᤖ ᤂᤧᤴ ᤛᤠ᤹ᤖᤡᤰ ᤌᤠᤵᤛᤢᤎᤀᤠᤱ ᤗ᤺ᤴᤍᤧ ᤐᤣᤖᤥ॥ ᤂᤧᤴ ᤆᤢᤰᤐᤧᤴ ᤂᤠᤰᤋᤢᤀᤠᤱ ᤁᤧᤛᤡᤒᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤣ᤺ᤸᤗᤧ ᤁᤢᤓᤠᤖᤧᤃ ᤂᤧᤱᤃ ᤛᤩᤧ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤖᤥ॥

²⁷ ᤁᤖ ᤕᤧᤛᤢᤖᤧ ᤂᤧᤸᤗᤧ ᤁᤢᤜᤢᤰᤁᤥᤗᤠᤶ ᤋᤧᤶᤛᤢᤖ ᤑᤥ᤺ᤰᤂᤢᤀᤠᤱ ᤕᤧᤵᤛᤢ. ᤜᤧᤰᤁᤩᤠᤱ ᤂᤧᤴ ᤕᤧᤶᤛᤡᤱᤗᤥ॥

²⁸ ᤕᤧᤛᤢᤴ ᤜᤡᤶᤔᤥ ᤗᤠᤛᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤣ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”

²⁹ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤀᤰᤋᤱᤒᤠᤱᤃ ᤋᤢᤘᤠ᤺ᤸᤗᤧᤖᤰ ᤏᤠ᤺ᤵᤔᤠ ᤗ᤺ᤵᤔᤠ ᤛᤢᤰᤋᤧᤳᤗᤥ॥”

ᤕᤧᤛᤢᤖᤧ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

³⁰ ᤜᤧᤰᤁᤩᤠᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤋᤧᤴᤏᤡᤴ ᤐᤰᤔᤧᤎ᤺ᤀᤠᤱ ᤃᤠᤗᤡᤗ ᤔᤧᤗᤛ᤻ᤛᤢᤖ ᤔᤧᤒᤣ॥ ᤂᤢᤏᤡ᤹ ᤀᤠᤳᤋᤥ ᤔᤧᤘᤠ᤹ ᤑᤠ᤹ᤀᤠᤱ ᤘᤣ᤹ᤜᤠ᤹ᤖᤧ ᤏᤡᤱᤘᤠ᤹ ᤔᤧᤱᤄᤥᤛᤢᤴᤗ ᤁᤧᤗ᤹ᤒᤠ ᤕᤧᤛᤢᤖᤧ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤕᤧᤖᤥ.

³¹ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤜᤢ᤹ᤖᤢᤛᤡᤖ ᤘᤕᤧ॥ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠᤴ ᤀᤡᤱᤔᤧᤗᤧᤰᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤗᤥ॥”

³² ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤔᤠᤀᤠᤱ ᤔᤧᤃᤡᤛᤧᤖᤥ॥

ᤕᤶᤗᤠᤒᤠ ᤜᤠ᤺ᤳ᥅

³³ ᤂᤧᤱᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧᤀᤠᤱ ᤂᤧᤵᤔᤥᤒᤠ ᤜᤡᤶᤔᤥ ᤔᤧᤘᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤴᤍᤣᤴ ᤗᤠᤶᤔᤥ ᤂᤡᤏᤡ᤹ ᤌᤧᤔᤠ᤺ᤴ ᤐᤠᤴ ᤁᤧᤎᤰᤋᤡᤖ ᤁᤧᤘᤕᤡᤒᤠᤒᤣ᥅”

³⁴ ᤁᤖ ᤂᤧᤱᤜᤠ᤹ ᤔᤧᤶᤒᤠᤖᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠ᤺ᤴᤔᤧᤎᤰᤋᤧᤀᤠᤱ ᤔᤧᤘᤕᤧᤖᤥ॥

³⁵ ᤕᤧᤛᤢᤴ ᤕᤢᤱᤛᤡᤱᤅᤠᤱ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤋᤃᤡ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤐᤥᤱᤔᤠᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤛᤧᤘᤠᤖᤥᤒᤠ ᤐᤥᤱᤔᤠ ᤐᤥᤱᤗᤥ॥”

³⁶ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤵᤔᤥ ᤜᤡᤴᤈᤠ᤹ᤎᤡᤰ ᤂᤢᤏᤡ᤹ ᤗᤢᤶᤔᤥ ᤕᤧᤵᤛᤢ. ᤜᤧᤰᤁᤩᤠᤱ ᤁᤢᤓᤰᤋᤢᤱᤅᤥ ᤕᤢᤰᤂᤢᤖ ᤔᤧᤳᤋᤢᤛᤡ.

³⁷ “ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤶᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤶᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤱᤍᤠ᤺ᤰᤋᤢ᤹॥”

³⁸ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰᤐᤠ ᤕᤢᤜᤢᤴᤏᤠ ᤔᤧᤵᤔᤏᤠᤒᤠᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤣ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡᤛᤢᤶᤒᤧ॥ ᤜᤧᤰᤁᤩᤠᤱ ᤀᤠᤏᤡᤃᤣ ᤂᤧᤴ ‘ᤜᤧᤰᤁᤣ ᤔᤧᤈᤥᤃᤧᤴᤏᤧ᤹’ ᤔᤧᤳᤋᤢᤶᤒᤧ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡ᤹ᤏᤢ ᤛᤥᤖᤡᤰ ᤗᤠᤱᤔᤧᤄᤣ᤺ᤰᤏᤧᤴᤗᤥ॥”

³⁹ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤔᤡᤱᤅᤥ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥᤃᤢ᤹. ᤂᤧᤴ ᤀᤠᤍᤰᤗᤧᤱᤘᤠᤀᤥ ᤜᤠᤖᤠ ᤔᤧᤒᤥ᤺ᤰᤏᤧᤴᤗᤥ॥

⁴⁰ ᤀᤠᤳᤋᤡᤴ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤜᤥᤵ. ᤂᤧᤴ ᤀᤠᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥

⁴¹ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤔᤏᤠ ᤑᤠ᤹ᤀᤠᤱ ᤑᤱᤏᤠᤎᤡᤰ ᤆᤫᤠ᤺ᤳ ᤁᤧᤒᤡᤖᤡ᤹. ᤂᤧᤸᤗᤧ ᤛᤧᤰᤂᤠᤛᤠᤱ ᤌᤢᤶᤄᤥᤴ ᤂᤥᤛᤢ᤹ᤀᤣᤖᤥ॥”

ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤴ ᤛᤠᤶᤍᤡᤱ

⁴² “ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥ᤺ᤰᤐᤠ ᤆᤢᤰᤛᤠ ᤜᤡᤴᤈᤠ᤹ᤎᤡᤰ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤑᤥ᤺ᤶᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢᤒᤠ ᤐᤥᤱᤗᤥ॥

⁴³ ᤂᤧᤏᤧ᤹ ᤁᤧᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣᤛᤧ᤹ᤀᤥ॥ ᤏᤧᤳᤇᤡ ᤜᤢᤰᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤜᤢᤰᤌᤡᤰ ᤔᤣ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥

⁴⁴ (ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥)

⁴⁵ ᤁᤧᤗᤠᤱᤅᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧᤍᤣᤛᤧ᤹॥ ᤏᤧᤳᤇᤡ ᤗᤠᤱᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤗᤠᤱᤎᤡᤰ ᤔᤣ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥

⁴⁶ (ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥)

⁴⁷ ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤕᤃᤧᤗ᤺ᤳᤋᤧ᤹॥ ᤏᤧᤳᤇᤡ ᤔᤡᤰᤁᤡᤴᤏᤢ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧᤃ ᤔᤡᤰᤌᤡᤰᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤏᤢᤒᤠᤖᤥ॥

⁴⁸ ᤂᤧᤔᤠᤕᤱᤛᤱᤅᤥᤃ ᤑᤣ᤹ᤒᤠᤳ ᤏᤢ ᤔᤡᤴ ᤔᤧᤛᤡᤏᤧᤴᤗᤥ॥

⁴⁹ ᤕᤢᤶᤔᤡᤸᤗᤧ ᤛᤡᤍᤢᤱᤈᤓᤠᤴ ᤛᤢᤳᤌᤥ ᤆᤥᤃᤢᤒᤠ ᤜᤧᤰᤁᤣᤀᤣ ᤔᤡ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤛᤢᤳᤌᤥ ᤆᤥᤃᤢᤛᤡ᤹ᤖᤥ॥

⁵⁰ ᤕᤢᤶᤔᤡᤴ ᤏᤢᤒᤠ ᤆᤥᤰ. ᤁᤖ ᤕᤢᤶᤔᤡᤸᤗᤧ ᤁᤢᤗᤡᤶᤔᤧᤴ ᤔᤠ᤺ᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤂᤧᤴ ᤁᤧᤗᤡᤶᤒᤠ ᤁᤧᤈᤥᤃᤢᤶᤒᤣ᥅ ᤂᤡᤏᤡ᤹ ᤜᤡᤱᤔᤴᤏᤥ ᤕᤢᤶᤔᤡᤴ ᤁᤳᤋᤧᤶᤔᤧ᤹ᤀᤠᤱ ᤁᤧᤖᤧᤰᤏᤢ ᤛᤏᤠᤖᤢᤱᤅᤥ ᤘᤕᤧᤶᤔᤧ᤹ᤀᤥ॥”