ᤔᤷᤁᤢᤛ 5 - LIFOTNT

ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤔᤏᤠᤴ ᤘᤣ᤺ᤳ

¹ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥ ᤔᤧᤃᤧᤖᤧ॥

² ᤕᤧᤛᤢᤴ ᤂ᤺ᤱᤒᤣᤀᤥᤏᤢ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤀᤡ᤺ᤵᤐᤢᤱᤍᤧᤴᤏᤥᤗᤠᤶ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ॥

³ ᤂᤧᤴ ᤔᤏᤠᤴ ᤀᤡ᤺ᤵᤐᤢᤱᤍᤧᤴᤜᤠ᤹ᤀᤥ ᤘᤕᤧᤃᤳᤋᤧ॥ ᤜᤠ᤺ᤳᤗᤧᤀᤠᤱ ᤂᤧᤴ ᤑᤧᤴᤌᤰᤁᤪᤱᤅᤡᤸᤗᤧᤀᤠᤱ ᤀᤡᤄᤣ᤺ᤱᤔᤠ ᤔᤧᤛᤢᤰᤋᤢᤴ.

⁴ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤖᤡᤰᤗᤧᤱ ᤁᤢᤜᤢᤰ ᤁᤢᤗᤠᤱᤅᤥ ᤀᤡᤔᤧᤄᤣ᤺ᤰᤂᤢ ᤔᤧᤓᤳᤇᤢ ᤔᤧᤒᤡᤖᤢᤒᤠ ᤑᤧᤴᤌᤰᤁᤪᤱᤜᤠ᤹ ᤏᤢ ᤑᤧᤴᤜᤢᤰᤐᤠ᤺ᤱᤃᤡᤜᤠ᤹ ᤑᤢ᤹ᤖᤢᤀᤠᤱ ᤘᤕᤧᤖᤥ॥ ᤀᤠᤳᤋᤡᤸᤗᤧᤀᤠᤱ ᤂᤧᤴ ᤔᤏᤠᤴ ᤕᤢᤰᤁᤥ ᤁᤵᤔᤠ ᤔᤧᤛᤢᤰᤋᤢᤴᤗᤥ॥

⁵ ᤂᤧᤴ ᤀᤡ᤺ᤵᤐᤢᤱᤍᤧᤴᤏᤥ ᤏᤢ ᤁᤥ᤺ᤰᤔᤠ ᤑᤠᤱᤈᤱᤄᤠ᤺ᤳᤋᤡᤖᤰ ᤛᤧᤴᤍᤡᤰ ᤗᤧᤴᤍᤡᤰ ᤀ᤺ᤰᤋᤧᤖ ᤑᤡ᤺ᤰᤋᤧᤖ ᤗᤢᤱᤅᤡᤸᤗᤧ ᤂᤧ᤺ᤴᤇᤡᤱᤗ ᤘᤕᤧᤃᤳᤋᤧᤖᤥ॥

⁶ ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢᤴ ᤔᤠ᤺ᤱᤄᤠᤗᤠᤶᤔᤣ ᤏᤡᤛᤢᤀᤠᤱ ᤗᤥ᤺ᤰᤋᤧᤖ ᤑᤧᤖᤧᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤢᤖ ᤁᤢᤗᤠᤱᤈᤰᤁᤥ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗᤥ॥

⁷ ᤂᤧᤸᤗᤧ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤕᤧᤛᤢᤴ ᤔᤧᤳᤋᤢ. “ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤧᤛᤢᤀᤣ. ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤐᤣᤗᤡ ᤑᤠᤰᤏᤧ᤹ᤖᤥ॥”

⁸ (ᤌᤣᤀᤠᤱᤓᤧᤸᤗᤧ ᤋᤃᤡ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤏᤧ᤹ ᤂᤧᤴ ᤔᤏᤠᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤔᤧᤳᤋᤢᤀᤠᤱ ᤘᤕᤧᤖᤥ॥)

⁹ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤁᤧᤔᤡᤱ ᤌᤧᤔᤠᤒᤣ᥅” ᤜᤧᤰᤁᤩᤠᤱ ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤔᤡᤱ ᤋᤢᤖᤠᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤀᤥ ᤀᤠᤏᤡᤃᤣ ᤕᤖᤡᤰ ᤕᤠᤃᤡᤃᤧ॥”

¹⁰ ᤜᤧᤰᤁᤩᤠᤱ ᤂᤧᤸᤗᤧ ᤕᤧᤛᤢᤴ ᤀᤧᤳᤗᤧᤱ ᤀᤧᤳᤗᤧᤱ ᤐᤣᤗᤡ ᤑᤠᤰᤋᤢ. “ᤁᤴ ᤌᤢᤶᤔᤥᤗᤠᤶ ᤀᤠᤏᤡᤃᤣ ᤀᤠᤶᤒᤠᤱᤄᤧᤴᤏᤧ᤹ᤀᤥ॥”

¹¹ ᤀᤠᤸᤗ ᤂᤧᤴ ᤁᤥ᤺ᤰᤔᤠᤀᤥ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥

¹² ᤜᤧᤰᤁᤩᤠᤱ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤕᤧᤛᤢᤴ ᤐᤣᤗᤡ ᤔᤧᤓᤠᤰᤋᤢ. “ᤀᤠᤏᤡᤃᤣ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ᤀᤥ॥ ᤀᤠᤏᤡᤃᤣ ᤂᤧᤱᤜᤠ᤹ᤀᤥ ᤗᤠ᤺ᤛᤡᤃᤧ᤹॥”

¹³ ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤂᤧᤱᤜᤠ᤹ ᤗᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ ᤑᤧᤴᤛᤠᤶᤜᤠ᤹ ᤂᤧᤴ ᤔᤏᤠᤀᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤑᤠᤰᤜᤠ᤹ᤀᤥ ᤔᤧᤗᤠᤛᤧ॥ ᤂᤧᤴ ᤜᤧᤴᤇᤡᤱ ᤏᤧᤳᤇᤡ ᤕᤠᤖᤡᤰ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥

¹⁴ ᤂᤧᤵᤔᤥ ᤑᤠᤰ ᤁᤧᤃᤶᤒᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤐᤠᤱᤈᤢᤶᤔᤥ ᤏᤢ ᤂᤧᤴ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤴ ᤐᤠ᤺ᤴᤏᤡᤴ ᤔᤧᤛᤧᤛᤢ॥ ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤣ᤺ᤴᤏᤧ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤀᤥᤔᤧᤳᤇᤧ

^15-16 ᤕᤧᤛᤢᤴ ᤘᤕᤧᤒᤠ ᤋᤧᤴᤏᤥ ᤔᤧᤍᤩᤧᤖᤥ॥ ᤂᤧᤵᤔᤥ ᤂᤧᤱᤜᤠ᤹ᤖᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤴ ᤘᤣ᤺ᤳᤋᤧᤀᤠᤱ ᤏᤢᤖᤡᤰᤁᤠᤱ ᤋᤣᤳ ᤆᤠᤰᤂᤢᤀᤠᤱ ᤕᤢᤅᤧᤒᤠ ᤔᤧᤏᤡᤛᤢ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤏᤢ ᤑᤠᤰᤜᤠ᤹ ᤌᤣ ᤔᤧᤒᤥ᤺ᤰᤂᤧ ᤑᤠ᤹ᤀᤠᤱ ᤁᤧᤏᤡᤒᤠ ᤔᤏᤠᤜᤠ᤹ᤖᤧ ᤔᤧᤈᤧᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧ॥

¹⁷ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤀᤠᤏᤡᤃᤣ ᤌᤢᤶᤔᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤖᤥ॥

¹⁸ ᤕᤧᤛᤢᤴ ᤂ᤺ᤱᤒᤣᤀᤥ ᤗᤠᤛᤧᤖ ᤐᤳᤇᤧᤸᤗᤧ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤴ ᤕᤧᤛᤢᤖᤧ ᤁᤢᤒᤣᤛᤠᤱ ᤋᤩᤧᤀᤠᤱ. ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ॥

¹⁹ ᤁᤖ ᤕᤧᤛᤢᤖᤧ ᤔᤧᤍᤧᤴᤍᤧᤴᤗ ᤀᤰᤂᤣ ᤔᤧᤳᤋᤢ. “ᤂᤧᤏᤧ᤹ ᤏᤢ᤺ᤰᤂᤧ ᤐᤣᤃᤧ᤹ᤀᤠᤱ ᤁᤧᤜᤡᤶᤛᤕᤱ ᤏᤢ ᤁᤧᤒᤠᤱᤓᤣ᤹ᤛᤠᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤗᤠᤃᤡ ᤆᤥᤃᤢᤒᤠ ᤕᤶᤒᤠ ᤕᤠ᤺ᤶᤒᤰᤁᤡᤴ ᤏᤢ ᤗᤢᤱᤔᤠ᤹ ᤁᤧᤍᤢᤰᤋᤧᤒᤠ ᤐᤠ᤺ᤴᤏᤡᤴ ᤆᤧᤰᤋᤧᤛᤧ᤹ᤀᤥ॥”

²⁰ ᤜᤧᤰᤁᤩᤠᤱ ᤂᤧᤴ ᤔᤏᤠᤴᤏᤠᤱ ᤂᤧᤵᤔᤥᤗᤠᤶ ᤏᤢ᤺ᤰᤂᤧ ᤐᤣᤀᤠᤱ ᤌᤡᤒᤥᤱ ᤐᤠᤱᤈᤢᤶᤔᤡᤸᤗᤧᤴ ᤌᤢᤶᤔᤥ ᤂᤠᤖᤠᤰ ᤕᤧᤛᤢᤖᤧ ᤆᤥᤃᤢᤒᤠ ᤕᤶᤒᤠ ᤐᤠ᤺ᤴᤏᤡᤴ ᤀᤡᤱᤓᤴ ᤛᤧᤛᤢᤖᤥ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

ᤁᤧᤛᤡᤔᤠ ᤆᤢᤰᤔᤧᤴ ᤏᤢ ᤁᤧᤍᤢᤰᤔᤠ ᤔᤧᤴᤇᤢᤔᤠᤴ

²¹ ᤕᤧᤛᤢᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤏᤢ᤺ᤰᤂᤧ ᤐᤣᤀᤠᤱ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤖᤡᤰ ᤔᤏᤠᤜᤠ᤹ ᤁᤢᤃᤒᤪᤡᤱ ᤔᤧᤈᤢᤵᤛᤧᤖᤥ॥

²² ᤐᤠᤱᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤗᤠᤶᤗᤥᤒᤠ ᤕᤠᤀᤡᤖᤛ ᤔᤧᤵᤔᤏᤠᤒᤠ ᤔᤏᤠᤴ ᤋᤩᤧ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ

²³ ᤀᤰᤂᤣᤗ᤹ᤖᤡᤰ ᤐᤣᤗᤡ ᤑᤠᤰᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ ᤆᤢᤰᤔᤧᤴ ᤛᤡᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤖᤥ॥ ᤂᤧᤴ ᤘᤣ᤺ᤳᤋᤠᤱ ᤜᤡᤱᤗ ᤑᤠ᤹ᤀᤠᤱ ᤂᤧᤏᤧ᤹ ᤑᤧᤖᤧ᤹ᤀᤠᤱ ᤁᤧᤜᤢᤰᤁᤡᤴ ᤁᤢᤛᤶᤍᤠᤱ ᤏᤧᤛ᤻ᤛᤧ ᤐᤡᤖᤧ᤹ᤀᤥ॥”

²⁴ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤴᤏᤢ ᤌᤠᤛᤡᤱ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤡᤓᤡ᤺ᤳ ᤔᤧᤓᤡ᤺ᤳᤋᤢᤖ ᤔᤧᤍᤡᤶᤍᤢᤖᤥ॥

²⁵ ᤂᤧᤵᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤔᤠᤰᤂᤡ᤹ ᤘᤕᤢ᤺ᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥

²⁶ ᤂᤢᤏᤧ᤹ ᤕᤖᤡᤰ ᤛᤡᤍᤠ᤹ᤛᤠᤶᤒᤠᤜᤠ᤹ᤖᤥ ᤛᤡᤍᤠ᤹ ᤔᤧᤳᤇᤡᤱᤛᤧ ᤐᤣᤀᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤔᤠ᤺ᤴᤍᤢᤛᤠᤱ. ᤂᤧᤴ ᤘᤣ᤺ᤵᤔᤠᤸᤗᤧ ᤁᤢᤗᤧᤰᤘᤠ ᤂᤧᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤢᤃᤧᤒᤣᤀᤠᤱ ᤘᤕᤧᤖᤥ॥

²⁷ ᤂᤧᤸᤗᤧ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤂᤧᤵᤛᤢᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱᤗᤠᤶ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢᤛᤢᤖᤥ॥

^28-29 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤣ᤺ᤳᤋᤡᤴᤗᤰ ᤛᤢᤛᤢᤱᤛᤠᤱ ᤀᤡᤱᤃᤠ᤹ ᤘᤣ᤺ᤳᤋᤠ ᤗ᤹ᤖᤡᤰ ᤁᤢᤏᤡᤱᤘᤠ᤹ᤀᤥ ᤀᤡ᤺ᤳᤇᤡᤱ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤣ᤺ᤳᤋᤡᤴ ᤛᤢᤛᤢᤏᤢᤔᤧ᤺ᤴᤏᤣ ᤁᤢᤎᤰᤁᤥ ᤔᤠᤰᤂᤡ᤹ ᤘᤕᤢ᤺ᤔᤠᤴ ᤆᤡᤒᤧᤀᤠᤱ ᤆᤠᤱᤈᤠᤱ ᤗ᤹ᤖᤧᤒᤠ ᤏᤡᤱᤘᤠ᤹ ᤂᤥᤛᤢᤖᤥ॥

³⁰ ᤂᤡᤔᤥ ᤕᤧᤛᤢᤖᤧ ᤁᤢᤎᤰᤁᤥᤏᤢ ᤔᤢᤰᤛᤠᤶ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤜᤠ᤺ᤳᤗᤧ ᤀᤡᤱᤃᤠ᤹ ᤀᤠᤍᤣ᤺ᤳᤋᤡᤴ ᤛᤢᤛᤢᤒᤣ᥅”

³¹ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤰᤂᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤁᤧᤶᤈᤴᤗ ᤁᤧᤶᤓᤡ᤺ᤳᤗ ᤔᤧᤒᤳ. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤜᤠ᤺ᤳᤗᤧ ᤛᤢᤛᤠᤱᤒᤣ ᤑᤠ᤹ᤀᤠᤱ ᤁᤧᤒᤠ᤺ᤳᤋᤢᤒᤠᤒᤣ᥅”

³² ᤁᤖ ᤕᤧᤛᤢᤖᤧ ᤂᤢᤏᤧ᤹ ᤁᤧᤛᤢᤔᤧᤴ ᤀᤥᤔᤧᤳᤇᤧ ᤂᤡᤖᤡ ᤀᤥᤔᤕᤧ॥

³³ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡᤋᤢᤀᤠᤱ ᤁᤢᤃᤡᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ ᤕᤧᤛᤢᤴ ᤁᤧᤖᤧᤰ ᤐᤠ᤺ᤴᤏᤡᤴ ᤆᤧᤰᤋᤢ॥

³⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢ. “ᤔᤠᤔᤢᤀᤣ. ᤏᤛᤠᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤘᤣ᤺ᤳᤋᤧᤖᤥ॥ ᤂᤧᤏᤧ᤹ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ. ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ᥄”

³⁵ ᤕᤧᤛᤢᤴ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤗᤠᤶᤗᤥᤒᤠ ᤕᤠᤀᤡᤖᤛᤖᤧ ᤁᤢᤜᤡᤶᤔᤥᤗᤠᤶ ᤀᤡᤱᤛᤠᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤛ᤻ᤛᤠ᤺ᤱᤃ ᤛᤩᤧᤖᤥ॥ ᤀᤠᤸᤗ ᤛᤡᤰᤛᤠᤶᤒᤧᤴ ᤌᤣᤀᤠᤱ ᤋᤢᤰᤂᤣ ᤆᤠ᤺ᤵᤔᤠᤒᤣ᥅”

³⁶ ᤁᤖ ᤕᤧᤛᤢᤖᤧ ᤂᤧᤴ ᤂᤧᤶᤂᤧᤶᤔᤠᤱ ᤔᤧᤴᤗᤠᤵᤐᤣ ᤕᤠᤀᤡᤖᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤏᤛᤠ᤺ᤴᤗᤰ ᤆᤥᤃᤧ᤹ᤀᤥ॥”

³⁷ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴᤗᤰ ᤂᤢᤏᤧ᤹ᤏᤢ ᤐᤣ᤺ᤰᤔᤠ ᤐᤠᤱᤄᤢᤛᤡ॥

³⁸ ᤂᤧᤱᤜᤠ᤹ ᤕᤠᤀᤡᤖᤛᤖᤧ ᤁᤢᤜᤡᤶᤔᤥ ᤔᤧᤃᤧᤖᤧᤸᤗᤧ ᤔᤏᤠᤜᤠ᤹ ᤜᤕᤱ ᤁᤡᤸᤗᤡᤱ ᤏᤢ ᤔᤧᤖᤡᤱ ᤌᤰᤏᤢ ᤔᤧᤜᤠᤒᤧᤖ ᤔᤧᤕᤠᤃᤧᤒᤠ ᤕᤧᤛᤢᤖᤧ ᤏᤡᤛᤢᤛᤡ॥

³⁹ ᤜᤧᤰᤁᤩᤠᤱ ᤂᤢᤏᤧ᤹ ᤜᤡᤶᤛᤡᤃᤠᤱ ᤗᤠᤛᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤌᤣᤀᤠᤱ ᤜᤕᤱ ᤁᤡᤸᤗᤡᤱ ᤏᤢ ᤔᤧᤖᤡᤱ ᤌᤰᤏᤢ ᤁᤧᤜᤠᤒᤡᤒᤠᤒᤣ᥅ ᤆᤢᤰᤔᤧᤱᤃ ᤔᤧᤴᤇᤡᤀᤣ ᤘᤠ᤹. ᤀᤡᤵᤛᤧᤀᤠᤱᤗᤰ ᤏᤧ᤹॥”

⁴⁰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤀᤣ᤺ᤳᤋᤢ. ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠ᤺ᤰᤁᤠᤳ ᤗ᤺ᤳᤋᤢᤛᤡᤀᤠᤱ ᤆᤢᤰᤔᤧᤸᤗᤧ ᤁᤢᤶᤒᤠ ᤁᤢᤶᤔᤠ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤁᤧᤘᤠ᤹ᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤆᤢᤰᤔᤧᤴ ᤏᤧᤛ᤻ᤛᤧᤒᤠ ᤋᤧᤴᤏᤥ ᤋᤣ᤹ᤖᤢᤛᤡ॥

⁴¹ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤸᤗᤧ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ “ᤋᤗᤡᤋᤠ ᤁᤢᤔᤡ” ᤔᤧᤳᤋᤢ. ᤂᤧᤸᤗᤧ ᤁᤢᤒᤣ᤺ᤱᤃ “ᤆᤢᤰᤔᤣ. ᤐᤥᤃᤧ᤹ᤀᤥ᥄” ᤐᤥᤱᤗᤥ॥

⁴² ᤂᤡᤔᤥ ᤂᤧᤴ ᤆᤢᤰᤔᤧᤴ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤗᤠᤱᤄᤣᤃᤧ॥ (ᤂᤧᤴ ᤋᤱᤒᤣ ᤌᤡᤰ-ᤏᤧᤳ (᥇᥈) ᤁᤧᤖᤧᤀᤠᤱ ᤘᤕᤧ॥) ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ॥

⁴³ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤏᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤧᤴ ᤌᤧᤔᤠᤀᤡ ᤆᤠᤔᤠ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥