ᤔᤷᤁᤢᤛ 4 - LIFOTNT

ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹

¹ ᤕᤠᤱᤛᤡ ᤕᤠᤶᤔᤥ ᤕᤧᤛᤢᤖᤧ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤖᤥ॥ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥

² ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤜᤢ᤹ᤖᤢᤛᤡ—

³ “ᤂᤧᤵᤛᤧᤶᤔᤧ᤹ᤀᤥ᥄ ᤗᤳᤇᤠ ᤕᤠ᤺ᤴᤁᤧᤔᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥

⁴ ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈᤔᤧᤍᤣ᤺ᤛᤢᤖᤥ॥

^5-6 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧ᤺ᤖᤧᤸᤗᤧ ᤏᤠᤶᤔᤡᤸᤗᤧ ᤕᤧᤶᤍᤢᤀᤠᤱ ᤁᤠᤰ ᤜᤣᤖᤧᤒᤣᤖᤥ॥

⁷ ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢᤍᤣ᤺ᤛᤢᤀᤠᤱ ᤁᤢᤈᤠ᤹ ᤌᤥ᤺ᤰᤔᤠ ᤔᤧᤛᤢᤰᤋᤧᤴᤗᤥ॥

⁸ ᤘᤣ᤹ ᤕᤠ᤹ᤖᤡ᤺ᤶᤒᤧᤴ ᤏᤢᤒᤠ ᤂᤠᤶᤔᤥ ᤆᤢᤰᤋᤧ॥ ᤜᤧᤰᤁᤩᤠᤱ ᤗᤡᤅᤧᤀᤠᤱ ᤂᤧᤱᤜᤠ᤹ᤖᤧ ᤛᤢᤶᤒᤥᤱ ᤗᤧᤱ (᥉᥆). ᤋᤢᤰᤐᤥᤱ ᤗᤧᤱ (᥌᥆) ᤜᤧᤰᤁᤩᤠᤱ ᤁᤡᤵᤌᤡᤰᤗᤧᤱ (᥇᥆᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥”

⁹ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”

¹⁰ ᤜᤧᤰᤁᤩᤠᤱ ᤕᤧᤛᤢᤴ ᤀᤧᤰᤗᤣ᤺ᤰ ᤘᤕᤧᤸᤗᤧ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤏᤢ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧ “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ᥅” ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢ॥

¹¹ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹. ᤁᤖ ᤘᤣ᤹ ᤔᤏᤠᤜᤠ᤹ᤖᤧᤃ ᤂᤧᤍᤠ᤹ᤀᤥᤖᤰ ᤂᤧᤶᤔᤠ ᤔᤧᤄᤥᤛᤢ᤹ᤖᤥ॥

¹² ᤂᤧᤸᤗᤧᤆᤥᤃᤢᤸᤗᤧ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “‘ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢ. ᤀᤧᤳᤗᤧᤱ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡᤛᤢᤴ॥ ᤂᤧᤱᤜᤠ᤹ᤖᤧ ᤀᤧᤳᤗᤧᤱ ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ॥ ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤜᤠ᤹ᤃ ᤗᤠᤕᤥᤗᤠᤶ ᤔᤧᤏᤢ᤺ᤱ ᤔᤧᤍᤠᤀᤠᤱ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥ᤺ᤛᤢ᤹ᤒᤠᤖᤥ॥’”

ᤕᤧᤛᤢᤖᤧ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤜᤴᤍᤢᤐᤡᤖᤢᤛᤡ᤹

¹³ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤂᤧᤍᤠ᤹ᤀᤡᤴᤏᤣ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤏᤧ ᤑᤠ᤹ᤃᤪ. ᤘᤣ᤹ ᤂᤧᤍᤠ᤹ᤜᤠ᤹ ᤀᤠᤰᤂᤣᤗ᤹ᤖᤡᤰ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤠᤒᤣ᥅

¹⁴ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤛᤧᤛᤢᤖᤥ॥

¹⁵ ᤁᤢᤓᤠ ᤔᤏᤠᤜᤠ᤹ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤏᤢᤔᤧ᤺ᤴᤏᤣ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤳᤋᤢ ᤋᤣ᤹ᤖᤢᤖᤥ॥

¹⁶ ᤘᤣ᤹ ᤔᤏᤠᤜᤠ᤹ ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤐᤠ᤺ᤴᤈᤠᤰ ᤔᤧᤄᤧᤵᤛᤢᤸᤗᤧ ᤔᤧᤛ᤺ᤳᤗ ᤔᤧᤄᤧᤵᤛᤢ᤹.

¹⁷ ᤁᤖ ᤋᤠᤱᤒᤠ ᤁᤢᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤱᤜᤠ᤹ ᤛᤵᤑᤠᤖᤰ ᤔᤧᤒᤳᤗᤥ. ᤁᤖ ᤐᤠ᤺ᤴᤈᤠᤰᤁᤡᤴ ᤏᤛᤠᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤛᤠᤰᤐᤠ ᤐᤠᤴ ᤏᤢ ᤋᤢᤰᤂᤣᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤔᤧᤗᤧᤖᤢ ᤔᤧᤍᤣ᤺ᤛᤢ᤹ᤖᤥ॥

¹⁸ ᤘᤣ᤹ᤜᤠ᤹ ᤋᤡᤱᤃᤪᤣᤰᤐᤠ ᤗᤠᤀᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥

¹⁹ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰ ᤂᤧᤶᤔᤠᤃ ᤔᤧᤄᤧᤵᤛᤢ᤹. ᤁᤖ ᤁᤴ ᤜᤡᤱᤔᤴᤏᤥ ᤌᤣ᤺ᤴ ᤆᤠᤔᤠ ᤌᤢᤱᤔᤠ. ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥᤱᤔᤠ ᤜᤧᤰᤋᤱᤒᤠ ᤘᤣ᤹ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣᤛᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤶᤔᤥ ᤁᤢᤈᤠ᤹ ᤔᤧᤶᤓᤳᤇᤢᤴᤗᤥ॥

²⁰ ᤁᤖ ᤘᤣ᤹ ᤔᤏᤠᤜᤠ᤹ ᤏᤢᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤀᤥ ᤔᤧᤍᤠ᤺ᤰᤋᤢ. ᤜᤧᤰᤁᤩᤠᤱ ᤛᤢᤶᤒᤥᤱ (᥉᥆) ᤗᤧᤱ. ᤋᤢᤰᤐᤥᤱ (᥌᥆) ᤗᤧᤱ ᤜᤧᤰᤁᤩᤠᤱ ᤁᤡᤵᤌᤡᤰ (᥇᥆᥆) ᤗᤧᤱ ᤌᤠᤖᤡᤰ ᤁᤢᤈᤠ᤹ ᤔᤧᤓᤳᤇᤢᤖᤥ॥”

ᤆᤶᤈᤶᤒᤠ ᤍᤧᤴᤏᤥ ᤛᤣᤔᤡᤴ

²¹ ᤀᤠᤸᤗ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤣᤔᤡᤴ ᤏᤧᤳᤏᤠ ᤛᤡᤃᤠᤱ ᤁᤧᤕᤢᤰᤂᤢᤶᤒᤡ᥅ ᤀᤡ ᤏᤀᤡᤔᤠᤸᤗᤧ ᤁᤧᤛᤢ᤺ᤵᤋᤢᤶ ᤁᤧᤕᤢᤰᤂᤢᤶᤒᤡ᥅ ᤜᤠ᤺ᤳᤗᤧᤀᤠᤱ ᤜᤧᤰᤁᤣᤃ ᤔᤧᤈᤥᤃᤢᤴᤗᤥ. ᤁᤖ ᤛᤣᤔᤡᤴ ᤆᤶᤈᤶᤒᤠ ᤋᤧᤴᤏᤥ ᤌᤥ ᤕᤢᤰᤂᤢ᤹ᤖᤥ॥

²² ᤜᤧᤰᤁᤣ᤺ᤸᤗᤧ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤁᤧᤖᤧᤰᤗᤧ ᤔᤧᤏᤡᤛᤢ. ᤜᤧᤰᤁᤩᤠᤱ ᤆᤡᤱᤏᤠᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤐᤥᤱᤗᤥ॥”

²³ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ॥”

²⁴ ᤂᤢᤏᤧ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤛᤡᤱᤛᤡᤱᤅᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤀᤠᤰᤋᤱᤒᤠ ᤁᤢᤛᤡ᤺ᤰᤔᤠᤸᤗᤧ ᤁᤧᤛᤡ᤺ᤰᤋᤢᤶᤛᤡᤶ. ᤀᤠᤶᤓᤠ ᤂᤧᤴ ᤁᤢᤛᤡ᤺ᤰᤔᤠᤸᤗᤧ ᤂᤡᤏᤡ᤹ᤀᤠᤱ ᤁᤧᤶᤛᤡ᤺ᤰᤋᤡ᤹. ᤂᤧᤴᤏᤢ᤺ᤸᤗᤧ ᤕᤖᤡᤰᤁᤠᤱ ᤂᤡᤏᤡ᤹ ᤁᤧᤶᤛᤡ᤺ᤰᤋᤡ ᤁᤧᤶᤒᤡᤖᤡ᤹ᤖᤥ॥

²⁵ ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥᤛᤢ᤹. ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥”

ᤁᤧᤗᤡᤱᤒᤠ ᤕᤠ᤹ᤖᤡ᤺ᤶᤒᤠ ᤂᤧᤍᤠ᤹

²⁶ ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤀᤰᤋᤱᤒᤠ ᤆᤥᤰ—ᤔᤏᤠᤎᤡᤰᤗᤧ ᤕᤠ᤹ᤖᤡ᤺ᤶᤒᤠᤴ ᤀᤡᤰᤋᤠᤵᤐᤥ ᤗᤧᤵᤋᤢ᤹.

²⁷ ᤜᤧᤰᤁᤩᤠᤱ ᤕᤧᤶ ᤗᤧᤰᤗ ᤐᤣ᤺ᤰᤁᤡᤸᤗᤧ. ᤂᤢᤏᤧ᤹ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤀᤠᤰᤂᤣᤗ᤹ᤖᤡᤰ ᤗᤡᤱ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤇᤠᤱ ᤂᤧᤴ ᤕᤠ᤹ᤖᤡ᤺ᤶᤒᤠᤴ ᤗᤡᤱᤗᤥ॥

²⁸ ᤂᤠᤶᤒᤣ᤺ᤰᤔᤠᤸᤗᤧ ᤀᤠᤒᤠᤅᤣ ᤐᤥᤃᤢᤃᤧᤴ ᤁᤢᤈᤠᤴ ᤗᤡᤱᤗ ᤕᤠ᤺ᤴᤍᤢ᤹. ᤂᤠᤶᤒᤣ᤺ᤰᤔᤠᤸᤗᤧᤀᤣ ᤁᤢᤈᤠ᤹ ᤌᤥ᤺ᤰᤗ ᤕᤠ᤺ᤴᤍᤢ᤹. ᤋᤃᤡ ᤁᤢᤏ᤺ᤰ ᤌᤠᤱ ᤜᤧᤰᤁᤩᤠᤱ ᤐᤥᤀᤠᤱ ᤁᤢᤈᤠ᤹ ᤌᤥᤰ॥

²⁹ ᤐᤥᤃᤢᤃᤧᤴ ᤁᤢᤈᤠᤴ ᤋᤢᤶᤔᤠᤱ ᤂᤧᤴ ᤔᤏᤠᤴ ᤁᤠᤳᤆᤩᤠᤴ ᤕᤠᤱᤛᤡᤱᤅᤠᤱ ᤆᤠ ᤛᤢᤶᤛᤧ ᤀᤡᤰᤋᤠᤵᤐᤥ ᤗᤠ᤺ᤳ. ᤌᤣᤀᤠᤱᤓᤧᤸᤗᤧ ᤆᤠᤛᤢᤶᤔᤠ ᤕᤧᤶᤔᤡᤴ ᤋᤩᤧᤖᤥ॥”

ᤏᤢᤎᤡ ᤕᤠ᤹ᤖᤡ᤺ᤶᤒᤠ ᤂᤧᤍᤠ᤹

³⁰ ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤌᤣ᤺ᤴᤏᤢ ᤋᤱᤔᤠᤒᤣ᥅ ᤀᤠᤰᤂᤣᤗ᤹ᤖᤡᤰ ᤁᤢᤒᤡ ᤐᤡᤔᤠᤀᤠᤱ ᤐᤥᤎᤰ ᤆᤥ᤺ᤰᤔᤠᤒᤣ᥅

³¹ ᤁᤱᤃ ᤂᤠᤶᤔᤥ ᤗᤧᤵᤔᤏᤠᤒᤠ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡᤰ ᤆᤥᤰᤗᤥ॥ ᤀᤡᤰᤛᤠ ᤂᤠᤶᤒᤣ᤺ᤰᤁᤥᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤀᤥ ᤂᤧᤴ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠᤱ

³² ᤀᤡᤰᤋᤠᤵᤐᤥ ᤘᤣ᤹ ᤏᤢᤎᤡᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤐᤥᤱᤅᤠᤱ ᤁᤢᤒᤥᤖᤠᤰᤜᤠ᤹ᤀᤥ ᤐᤢᤜᤠ᤹ᤖᤧᤀᤠᤱ ᤜᤠᤵ ᤔᤧᤈᤥᤃᤢᤖᤥ॥”

³³ ᤕᤧᤛᤢᤖᤧ ᤀᤰᤋᤱᤒᤠ ᤂᤧᤍᤠ᤹ᤀᤥ ᤔᤏᤠᤜᤠ᤹ᤖᤧ ᤐᤠ᤺ᤴᤈᤠᤰ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤖ ᤌᤠᤖᤡᤰ ᤜᤢ᤹ᤖᤢᤛᤡ॥

³⁴ ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ. ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤀᤣ᤺ᤰ ᤔᤧᤘᤕᤧᤸᤗᤧ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤜᤴᤍᤢ ᤐᤡᤖᤢᤛᤡᤖᤥ॥

ᤕᤧᤛᤢᤖᤧ ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢ᤹

³⁵ ᤂᤧᤴ ᤛᤧᤴᤍᤡᤰ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤣᤃᤡ॥”

³⁶ ᤜᤧᤰᤁᤣᤗ᤹ᤖᤡᤰ ᤕᤖᤡᤰ ᤔᤏᤠᤜᤠ᤹ᤏᤢ ᤔᤧᤛᤧᤴᤍᤧᤀᤠᤱ ᤂᤢᤏᤧ᤹ ᤒᤠ ᤂᤧᤴ ᤂ᤺ᤱᤒᤣᤀᤥᤏᤢ ᤏᤠᤜᤠᤱᤍᤠᤱ ᤔᤧᤍᤣ᤹ᤖᤢᤖᤥ॥ ᤂᤧᤵᤔᤥ ᤘᤣ᤹ ᤂ᤺ᤱᤒᤣᤜᤠ᤹ᤀᤠᤱ ᤔᤧᤏᤧᤛ᤻ᤛᤧᤖᤥ॥

³⁷ ᤜᤰᤆᤄᤳ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤂᤠ ᤂ᤺ᤱᤒᤣᤀᤡᤴᤏᤣ ᤋᤡᤶᤛᤧᤖᤥ॥

³⁸ ᤕᤧᤛᤢᤴ ᤂ᤺ᤱᤒᤣᤸᤗᤧ ᤁᤢᤀᤣ᤺ᤰ ᤗᤧᤵᤔᤠᤱ ᤋᤠᤰᤂᤥ᤺ᤱᤎᤡᤰ ᤁᤥ᤺ᤰᤛᤡᤱᤅᤠᤱ ᤀᤡᤵᤛᤧᤀᤠᤱ ᤏᤧᤛ᤻ᤛᤧ॥ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡᤃᤣ ᤜᤢᤶᤔᤠ ᤛᤡᤔᤠ ᤀᤡᤋᤡᤃᤧᤖᤥ᥄ ᤌᤣᤀᤠᤱ ᤛᤫᤠ᤺ᤳ ᤁᤧᤏᤧᤒᤠᤒᤣ᥅”

³⁹ ᤕᤧᤛᤢᤴ ᤐᤥᤃᤧᤀᤠᤱ ᤛᤢᤖᤡᤳ ᤁᤣᤈᤱᤅᤡᤴ “ᤔᤧᤴᤜᤢᤀᤧ᤹” ᤔᤧᤳᤋᤢᤀᤠᤱ ᤑᤧ᤺ᤰᤋᤢ. ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴ “ᤆᤡᤈᤡ ᤕᤧᤶᤕᤧᤶ ᤗ᤹ᤖᤧ᤹” ᤔᤧᤳᤋᤢ. ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤀᤠᤱ. ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤖᤥ॥

⁴⁰ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤗᤠᤵᤋᤢᤛᤡ. “ᤌᤣᤀᤠᤱ ᤂᤡᤏᤡ᤹ ᤁᤧᤃᤡ᤺ᤛᤡ ᤁᤧᤛᤩᤧ᤹ᤀᤡᤒᤠ᥅ ᤀᤠᤸᤗᤛᤠᤱ ᤕᤠᤵᤔᤡ ᤏᤛᤠᤴ ᤁᤧᤴᤈᤥᤃᤡᤴᤒᤡ᥅”

⁴¹ ᤁᤖ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤒᤠᤒᤣ᥅ ᤁᤴ ᤔᤏᤠ᤺ᤱᤃ ᤜᤠ᤺ᤵᤐᤣ᥅”