ᤔᤷᤁᤢᤛ 3 - LIFOTNT

ᤕᤧᤛᤢᤖᤧ ᤏᤠ᤺ᤶᤛᤡᤱ ᤕᤧᤴᤏᤥ ᤘᤣ᤺ᤴᤍᤢᤒᤠ

¹ ᤕᤧᤛᤢᤴ ᤕᤠᤶᤔᤥ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤐᤣ॥ ᤂᤧᤵᤔᤥ ᤗᤳᤇᤠ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤎᤡᤰ ᤘᤕᤧ॥

² ᤏᤠ᤺ᤶᤛᤡᤱ ᤕᤧᤴᤏᤥ ᤂᤧᤴ ᤔᤏᤠᤴ ᤕᤧᤛᤢᤖᤧ ᤘᤣ᤺ᤴᤍᤢ᤹ᤏᤧ ᤑᤠ᤹ᤃᤪ ᤂᤢᤏᤧ᤹ ᤑᤥᤋᤩᤠ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤕᤧᤛᤢᤴ ᤔᤧᤛᤢᤃᤢᤖ ᤔᤧᤘᤕᤧ॥

³ ᤕᤧᤛᤢᤖᤧ ᤂᤧᤴ ᤁᤢᤜᤢᤰ ᤁᤧᤜᤣᤒᤠ ᤔᤏᤠᤴ ᤔᤧᤳᤋᤢ. “ᤑᤧᤖᤧ᤹ᤀᤠᤱ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤕᤧᤒᤧ᤹॥”

⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤏᤠ᤺ᤶᤛᤡᤱ ᤕᤧᤴᤏᤥ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤁᤥ. ᤀᤠᤳᤋᤡᤴ ᤆᤥ᤺ᤰᤔᤠ ᤏᤢᤒᤠᤒᤣ᥅ ᤜᤡᤱᤔᤴ ᤋᤠᤱᤛᤧ᤺ᤵᤔᤠᤒᤡ ᤔᤧᤱᤔᤠᤒᤡ᥅” ᤁᤖ ᤂᤧᤴ ᤔᤏᤠᤜᤠ᤹ ᤔᤧᤶᤒᤠ᤺ᤳᤋᤣ ᤛᤫᤠ᤺ᤳ ᤔᤧᤕᤢᤅᤧᤖᤥ॥

⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤆᤡ᤺ᤵᤔᤠᤴ ᤏᤡᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤢᤃᤧᤀᤠᤱ ᤛᤠ᤹ᤖᤡᤰ ᤁᤢᤛᤡᤰ ᤐᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤖᤥ॥

⁶ ᤜᤧᤰᤁᤩᤠᤱ ᤑᤖᤡᤛᤡᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤜᤧᤖᤥᤍ ᤜᤠᤱᤅᤡᤸᤗᤧ ᤁᤢᤔᤏᤠᤜᤠ᤹ᤏᤢ ᤕᤧᤛᤢᤴ ᤀᤠᤰᤂᤣᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴᤔᤧᤍᤱᤄᤢᤖᤥ॥

ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤴ ᤔᤧᤍᤡᤶᤍᤢ᤹

⁷ ᤜᤧᤰᤁᤩᤠᤱ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤐᤣ᤺ᤸᤗᤧ ᤂᤧᤵᤔᤥ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥

⁸ ᤂᤢᤏᤧ᤹ ᤆᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤔᤧᤄᤧᤵᤛᤢᤀᤠᤱ ᤕᤖᤡᤰ ᤔᤏᤠᤜᤠ᤹ ᤕᤜᤢᤍᤡᤕᤠ. ᤕᤖᤢᤛᤗᤧᤔ. ᤀᤡᤍᤢᤔᤡᤕᤠ. ᤕᤷᤍᤏ ᤏᤠᤎᤠ᤺ᤶᤒᤡᤒᤠ ᤗᤠᤈᤣ᤹ᤀᤥᤏᤢ. ᤜᤧᤰᤁᤩᤠᤱ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤗᤠᤶ ᤁᤢᤀᤥᤔᤧᤳᤇᤧ ᤔᤧᤍᤩᤧᤖᤥ॥

⁹ ᤜᤧᤰᤁᤩᤠᤱ ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤴᤗᤠ᤺ᤰᤋᤢᤴᤗ ᤔᤧᤴᤍᤥ᤹ᤖᤢᤴᤗ ᤑᤠ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂ᤺ᤱᤒᤣᤎᤡᤰ ᤁᤢᤗᤠᤃᤡ ᤕᤠᤖᤡᤵ ᤆᤥ᤺ᤰᤔᤠ ᤐᤠᤱᤄᤢᤛᤡ॥

¹⁰ ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ ᤏᤢᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤛᤢᤛᤧ ᤔᤏᤠᤜᤠ᤹ ᤔᤧᤈᤴᤇᤡᤱᤗ ᤔᤧᤒᤥᤖᤧ ᤔᤧᤎᤠᤅᤧ॥

¹¹ ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ᤖᤧ ᤕᤠᤱᤄᤢᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤸᤗᤧ ᤂᤧᤱᤜᤠ᤹ ᤔᤧᤎᤠᤶᤛᤡᤱᤗ ᤔᤧᤓᤡ᤺ᤰᤋᤧᤖ ᤀᤰᤂᤣᤗ᤹ᤖᤡᤰ ᤔᤧᤒᤠᤖᤧ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤛᤠᤏᤧᤖᤥ᥄”

¹² ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡ॥

ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤛᤣᤃᤢᤛᤡ᤹

¹³ ᤜᤧᤰᤁᤩᤠᤱ ᤕᤧᤛᤢᤴ ᤁᤥ᤺ᤰᤔᤠᤀᤥ ᤐᤣᤖ ᤐᤳᤇᤧᤸᤗᤧ ᤁᤢᤏᤡᤱᤘᤠ᤹ᤒᤠᤸᤗᤧ ᤆᤛᤡᤒᤠ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤱᤜᤠ᤹ᤀᤠᤱ ᤂᤢᤏᤧ᤹ᤏᤢᤀᤣ ᤔᤧᤒᤣᤖᤥ॥

¹⁴ ᤜᤧᤰᤁᤩᤠᤱ ᤂᤢᤏᤧ᤹ᤏᤢ ᤔᤧᤘᤠ᤹ᤖ ᤜᤧᤰᤁᤩᤠᤱ ᤛᤢᤏᤠᤀᤡᤱ ᤔᤧᤛᤧᤛᤢᤖ ᤑᤠ᤹ᤀᤠᤱ ᤌᤡᤰ-ᤏᤧᤳ (᥇᥈) ᤜᤢ᤹ᤛᤠᤶᤒᤠᤜᤠ᤹ ᤛᤣᤃᤢᤛᤡᤀᤠᤱ ᤂᤧᤱᤜᤠ᤹ ᤛᤣ᤺ᤰᤕᤢᤰᤔᤡᤒᤠ ᤑᤠ᤹ᤀᤠᤱ ᤔᤧᤳᤋᤢᤛᤡᤖᤥ॥

¹⁵ ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤛᤠᤶ ᤏᤠ᤺ᤵᤔᤠ ᤗ᤺ᤵᤔᤠ ᤕᤢᤰ ᤐᤡᤖᤢᤛᤡ॥

¹⁶ ᤕᤧᤛᤢᤖᤧ ᤛᤣᤃᤢᤛᤡᤒᤠ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤁᤴᤗᤥ—ᤛᤡᤔᤥᤏ (ᤂᤢᤏᤧ᤹ ᤐᤋᤪᤢᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢ).

¹⁷ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠ (ᤕᤧᤛᤢᤖᤧ ᤂᤧᤱᤜᤠ᤹ ᤒᤥᤀᤏᤖᤃᤧᤛ ᤗ᤹ᤖᤡᤰ ᤔᤡᤱ ᤘᤠ᤺ᤳᤋᤢᤛᤡ. ᤂᤧᤸᤗᤧ ᤁᤢᤒᤣᤀᤡᤱᤃ “ᤋᤠᤱᤛᤠᤰ ᤁᤧᤗᤥᤱᤒᤠᤸᤗᤧ ᤁᤢᤛ᤻ᤛᤠᤜᤠ᤹” ᤐᤥᤱᤗᤥ).

¹⁸ ᤜᤧᤰᤁᤩᤠᤱ ᤀᤠᤴᤍᤪᤡᤕᤠᤛ. ᤑᤡᤗᤡᤐ. ᤒᤠᤖᤌᤥᤗᤥᤔᤠᤀᤡ. ᤔᤳᤋᤡ. ᤌᤥᤔᤠ. ᤀᤸᤑᤠᤕᤛᤖᤧ ᤁᤢᤛ᤻ᤛᤠ ᤕᤠᤁᤢᤒ. ᤌᤧᤍᤡᤕᤛ. ᤛᤡᤔᤥᤏ (ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠ).

¹⁹ ᤜᤧᤰᤁᤩᤠᤱ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋᤡᤴ (ᤋᤠ᤺ᤴᤍᤡ ᤂᤧᤸᤗᤧ ᤕᤧᤛᤢᤴ ᤀᤡᤱᤗᤧᤰᤋᤢ)॥

ᤕᤧᤛᤢᤴ ᤏᤢ ᤔᤠᤑᤧᤴᤛᤠᤶᤔᤡᤴ

²⁰ ᤜᤧᤰᤁᤩᤠᤱ ᤕᤧᤛᤢᤴ ᤜᤡᤶᤔᤥ ᤗᤠᤛᤧᤀᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤆᤠᤈᤠᤔᤠ ᤕᤧᤶᤔᤡᤴᤏᤣ ᤔᤧᤱᤄᤥᤛᤢᤴᤗᤥ॥

²¹ ᤁᤢᤓᤠ ᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ. “ᤔᤧ᤺ᤶᤒᤧ. ᤀᤠᤀᤡᤴ ᤂᤢᤏᤧ᤹ᤃ ᤏᤠᤰᤂᤧᤒᤣ ᤒᤡ ᤌᤣᤏᤡᤒᤣ᥅” ᤜᤧᤰᤁᤣ᤺ᤸᤗᤧ ᤁᤢᤜᤡᤶᤛᤕᤱᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤀᤢ᤺ᤵᤔᤠ ᤋᤣ᤹ᤔᤠ ᤑᤠ᤹ᤀᤠᤱ ᤔᤧᤍᤩᤧᤖᤥ॥

²² ᤕᤖᤢᤛᤗᤧᤔᤗᤠᤶ ᤁᤧᤍᤠᤒᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤢᤏᤧ᤹ᤃ ᤒᤠᤗᤈᤡᤒᤢᤗ ᤔᤠᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤘᤠ᤹॥ ᤂᤢᤏᤧ᤹ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ᤹ ᤗ᤺ᤳᤋᤢᤛᤡ᤹ᤖᤥ॥”

²³ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤀᤠᤰᤂᤣᤗ᤹ᤖᤡᤰ ᤔᤠᤑᤧᤴᤛᤠᤶᤔᤡᤴ ᤀᤠᤒᤠᤅᤣ ᤏᤠ᤺ᤳᤇᤡᤱᤒᤣ᥅

²⁴ ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤠᤱᤈᤢᤶᤔᤡᤸᤗᤧ ᤔᤧᤎᤖᤢᤴᤗᤥ॥

²⁵ ᤜᤧᤰᤁᤩᤠᤱ ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤜᤡᤶᤛᤕᤱᤅᤡᤸᤗᤧ ᤔᤧᤎᤖᤢᤴᤗᤥ॥

²⁶ ᤔᤠᤑᤧᤴᤛᤠᤶᤔᤡᤴᤏᤠᤱ ᤀᤠᤒᤠᤅᤣ ᤋᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤂᤧᤸᤗᤧᤀᤠᤱ ᤔᤧᤎᤖᤢᤴᤏᤠᤱ ᤏᤢᤵᤗᤥ॥

²⁷ ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠᤴ ᤀᤡᤄᤣ᤺ᤱᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥

²⁸ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤔᤠᤱ ᤆᤧ᤹ᤕᤠᤐᤠᤴ ᤏᤢ ᤔᤧᤈᤥᤃᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧᤴ ᤗᤧᤵᤔᤡ ᤂᤥᤔᤠ ᤔᤧᤛᤢᤰᤋᤢᤖᤥ.

²⁹ ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤗᤧᤵᤔᤡ ᤔᤧᤱᤄᤥᤛᤢᤴᤗᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤗᤧᤵᤔᤡ ᤔᤧᤶᤒᤥᤱᤔᤏᤠᤒᤠ ᤗᤠᤕᤥᤖᤥ॥”

³⁰ (ᤕᤧᤛᤢᤖᤧ ᤑᤧᤴᤛᤠᤶᤔᤡᤴ ᤁᤳᤋᤢ ᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤕᤧᤒᤠᤸᤗᤧ ᤆᤥᤃᤢᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤒᤠᤖᤥ॥)

ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ

³¹ ᤕᤠᤱᤛᤡ ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤂᤢᤏᤧ᤹ ᤘᤕᤧᤒᤠ ᤜᤡᤶᤔᤥ ᤔᤧᤍᤩᤧᤀᤠᤱ ᤗᤠ᤺ᤰᤁᤠᤳ ᤁᤢᤀᤢ᤺ᤳᤇᤧ ᤔᤏᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥

³² ᤜᤧᤰᤁᤩᤠᤱ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤗᤠ᤺ᤰᤁᤠᤳ ᤔᤧᤍᤩᤧᤀᤠᤱ ᤂᤧᤏᤧ᤹ ᤁᤧᤶᤜᤠᤱᤗ ᤔᤧᤕᤧᤵᤗᤥ॥”

³³ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅”

³⁴ ᤂᤢᤏᤧ᤹ ᤂᤧᤵᤔᤥ ᤁᤢᤃᤒᤪᤡᤱ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖ ᤕᤠᤶᤔᤥ ᤐᤠ᤺ᤳᤋᤢ. “ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥

³⁵ ᤀᤠᤳᤋᤡᤴᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹ ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”