ᤔᤷᤁᤢᤛ 15 - LIFOTNT

ᤐᤡᤗᤠᤋᤛᤖᤧ ᤁᤢᤍᤃᤡ ᤕᤧᤛᤢ

¹ ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧᤛᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹. ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤁᤠᤰ ᤕᤰᤆᤢᤶᤓᤥᤒᤠ ᤔᤏᤠᤜᤠ᤹ ᤆᤢᤶᤗᤢᤱ ᤔᤧᤈᤥᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤀᤡᤔᤧᤄᤣ᤺ᤰᤂᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤣ᤹ᤖᤢᤖᤥ॥

² ᤐᤡᤗᤠᤋᤛᤖᤧ ᤕᤧᤛᤢᤴ ᤀᤰᤂᤣ ᤔᤧᤳᤋᤢᤖ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”

³ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤕᤖᤡᤰ ᤐᤠ᤺ᤴᤏᤥ ᤀᤠᤵᤋᤡᤰ ᤔᤧᤃᤢ᤺ᤳᤋᤢ॥

⁴ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢ. “ᤀᤥᤔᤧᤳᤋᤧ᤹. ᤁᤶᤔᤩᤠᤰ ᤕᤖᤡᤰ ᤀᤠᤵᤋᤡᤰ ᤁᤧᤶᤃᤢ᤺ᤳᤋᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤌᤣᤀᤠᤱ ᤁᤧᤶᤒᤠ᤺ᤳᤏᤧᤴᤒᤠᤒᤣ᥅”

⁵ ᤁᤖ ᤕᤧᤛᤢᤖᤧ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴᤏᤡᤸᤗᤧ ᤐᤡᤗᤠᤋᤛᤖᤧ ᤁᤢᤏᤡᤱᤘᤠ᤹ ᤔᤕᤧᤖᤥ॥

⁶ ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤗᤳᤇᤠ ᤛᤠᤰᤐᤠ ᤁᤧᤎᤠᤒᤠ ᤔᤏᤠᤴ ᤔᤏᤠᤜᤠ᤹ᤖᤧ ᤗᤧᤖᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤗᤧᤵᤔᤠ ᤌᤡᤶ ᤁᤳᤋᤢᤖᤥ॥

⁷ ᤂᤧᤴ ᤕᤧᤶᤔᤥ ᤒᤖᤒ᤻ᤒᤠᤛ ᤔᤧᤵᤔᤏᤠᤒᤠ ᤛᤠᤰᤐᤠ ᤁᤧᤎᤠ᤺ᤒᤠᤎᤡᤰ ᤘᤕᤧ॥ ᤂᤧᤸᤗᤧ ᤜᤠᤱᤒᤡᤑᤩᤢᤱ ᤐᤥ᤺ᤰᤂᤧᤸᤗᤧ ᤜᤕᤱ ᤋᤧᤱᤎᤱᤅᤥ ᤘᤣ᤹ ᤔᤏᤠᤜᤠ᤹ᤏᤢ ᤋᤱᤛᤡᤱᤅᤠᤱ ᤕᤖᤡᤰ ᤔᤏᤠᤜᤠ᤹ ᤛᤧᤖᤢᤛᤡᤀᤠᤱ ᤘᤕᤧ॥

⁸ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤐᤡᤗᤠᤋᤛᤖᤥ ᤔᤧᤍᤩᤧᤀᤠᤱ ᤛᤍᤠᤍᤡᤱ ᤁᤧᤈᤥᤃᤢᤒᤠ ᤜᤧᤰᤁᤣ ᤆᤥᤃᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ॥

⁹ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤕᤜᤢᤍᤡ ᤜᤠᤱᤅᤡᤴ ᤗᤧᤖᤢᤱ ᤐᤡᤏᤡᤱᤒᤡ᥅”

¹⁰ ᤌᤣᤀᤠᤱᤓᤧᤸᤗᤧ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤏᤠᤔᤧᤜᤧᤳᤋᤢᤀᤠᤱ ᤂᤢᤏᤧ᤹ᤀᤥ ᤜᤢᤰᤔᤧᤛᤢᤵᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥

¹¹ ᤁᤖ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤏᤠᤜᤠ᤹ ᤕᤧᤛᤢᤖᤧ ᤁᤢᤗᤧᤰᤘᤠᤀᤥ ᤒᤖᤒ᤻ᤒᤠᤛᤧᤴᤏᤣ ᤗᤧᤖᤧ ᤀᤠᤒᤡᤖᤧ᤹ᤀᤥ ᤑᤠ᤹ᤀᤠᤱ ᤔᤧᤜᤢᤛᤢᤛᤡᤀᤠᤱ ᤔᤧᤘᤕᤧᤖᤥ॥

¹² ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤕᤜᤢᤍᤡ ᤜᤠᤱ ᤁᤧᤔᤧᤳᤋᤢᤶᤒᤠ ᤔᤏᤠᤴ ᤀᤡᤱᤃᤠ᤹ ᤌᤣ ᤔᤧᤳᤋᤢᤱᤒᤠᤒᤣ᥅”

¹³ ᤁᤖ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠᤀᤣ ᤐᤥᤱ॥”

¹⁴ ᤐᤡᤗᤠᤋᤛᤖᤧ ᤕᤠᤶᤔᤥ ᤔᤧᤳᤋᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅” ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹᥄”

¹⁵ ᤐᤡᤗᤠᤋᤛᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤋᤠᤔᤠ ᤐᤡᤔᤠᤛᤡ ᤑᤠ᤹ᤀᤠᤱ ᤒᤖᤒ᤻ᤒᤠᤛᤧᤴ ᤗᤧᤖᤢ ᤐᤡᤖᤢᤛᤡ. ᤁᤖ ᤕᤧᤛᤢᤴ ᤋᤧ᤺ᤶᤓᤢᤰ ᤕᤠᤰᤐᤠᤱᤄᤢᤛᤡᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤑᤠ᤹ᤀᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤢᤰᤛᤢᤵᤋᤢᤛᤡᤖᤥ॥

¹⁶ ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢᤴ ᤂᤢᤏᤡ᤹ ᤋᤢᤖᤠᤕᤰᤁᤥ ᤔᤧᤍᤣ᤹ᤖᤢᤀᤠᤱ ᤂᤧᤵᤔᤥ ᤋᤢᤖᤠᤒᤠ ᤁᤠᤰ ᤌᤰᤛᤢᤒᤠᤜᤠ᤹ ᤁᤢᤄᤡᤖᤡ ᤔᤧᤈᤢᤵᤛᤧ॥

¹⁷ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤡᤴ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤐᤖᤠᤴᤗᤠ ᤜᤠᤱᤍᤣ᤺ᤳᤋᤡᤴ ᤔᤧᤈᤠᤰᤋᤢ. ᤋᤡᤱᤃᤪᤣᤰ ᤋᤡᤆ᤺ ᤔᤧᤓᤕᤢᤀᤠᤱ ᤔᤧᤄᤢ᤺ᤰᤋᤢ.

¹⁸ ᤜᤧᤰᤁᤩᤠᤱ ᤂᤢᤏᤧ᤹ “ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄” ᤔᤧᤔᤧᤳᤋᤢᤖ ᤛᤧᤘᤠ ᤔᤧᤔᤧᤳᤋᤢ॥

¹⁹ ᤜᤧᤰᤁᤩᤠᤱ ᤀᤧᤳᤗᤧᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤎᤣᤃᤣ᤺ᤰᤐᤧᤴ ᤔᤧᤄᤠᤰᤂᤢᤖ. ᤌᤩᤠ᤺ᤳ ᤔᤧᤎᤥ᤺ᤰᤂᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤃᤡ ᤔᤧᤒᤣᤀᤠᤱ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤗ ᤛᤧᤘᤠ ᤔᤧᤔᤧᤳᤋᤢᤖᤥ॥

²⁰ ᤀᤰᤂᤣᤗ᤹ᤖᤡᤰ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤔᤧᤛᤢᤖᤢᤀᤠᤱ ᤂᤧᤴ ᤐᤖᤠᤴᤗᤠ ᤋᤣ᤺ᤳᤋᤡᤴ ᤔᤧᤓᤧᤴᤍᤢᤀᤠᤱ ᤁᤢᤍᤣ᤺ᤳᤋᤡᤴ ᤔᤧᤈᤠᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤔᤧᤍᤣ᤹ᤖᤢᤖᤥ॥

ᤕᤧᤛᤢᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ

²¹ ᤂᤧᤴ ᤕᤧᤶᤔᤥ ᤀᤗᤧᤰᤈᤧᤴᤍᤖ ᤏᤢ ᤖᤢᤑᤛᤖᤧ ᤂᤢᤴᤇᤡ᤹ ᤐᤠ ᤛᤡᤔᤥᤏ ᤔᤧᤵᤔᤏᤠᤒᤠ ᤛᤠᤀᤡᤖᤣᤏᤡ ᤕᤧᤰᤕᤰᤁᤥ ᤁᤧᤕᤢᤱᤒᤧᤴ ᤐᤠᤱᤓᤣ᤹ᤗᤠᤶ ᤑᤧᤖᤧᤖ ᤐᤳᤇᤧᤒᤠ ᤌᤰᤛᤢᤒᤠᤜᤠ᤹ᤖᤧ ᤔᤧᤍᤢᤔᤢᤀᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤛᤠᤰᤁᤧᤸᤗᤧᤰ ᤐᤱᤔᤠ ᤔᤧᤒᤠᤱᤄᤢ॥

²² ᤂᤧᤱᤜᤠ᤹ᤖᤧ ᤃᤗᤃᤌᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤍᤣ᤹ᤖᤢ (ᤃᤗᤃᤌᤠ ᤑᤠ᤹ᤀᤡᤱᤃ ᤔᤡᤰᤂᤥ᤺ᤰᤐᤠ ᤐᤥᤱᤗᤥ)॥

²³ ᤜᤧᤰᤁᤩᤠᤱ ᤔᤢᤷᤖ ᤔᤧᤵᤔᤏᤠᤒᤠ ᤛᤡᤍᤠ᤹ ᤑᤢᤵᤔᤏᤠᤒᤠ ᤆᤧᤰᤗᤧᤰᤛᤣ᤹ ᤌᤡᤴ ᤔᤧᤎᤢᤱᤄᤢ. ᤁᤖ ᤕᤧᤛᤢᤖᤧ ᤔᤧᤎᤢᤅᤢᤴ॥

²⁴ ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥᤴᤍᤢ. ᤜᤧᤰᤁᤩᤠᤱ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤖᤥ॥

²⁵ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤸᤗᤧ ᤋᤠᤏᤠᤶᤒᤠ ᤁᤢᤔᤢᤰ ᤑᤠᤱᤛᤡ (᥏) ᤔᤢᤰᤋᤧᤀᤠᤱ ᤘᤕᤧᤖᤥ॥

²⁶ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣᤰ ᤛᤶᤍᤠᤱ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤗ᤹ᤖᤡᤰ ᤀᤠᤵᤋᤡᤰ ᤛᤰᤁᤡᤴ ᤔᤧᤛᤠᤵᤋᤢᤀᤠᤱ ᤔᤧᤓᤳᤇᤢ॥

^27-28 ᤂᤢᤏᤧ᤹ᤏᤢᤀᤣ ᤁᤢᤓᤧᤴᤇᤠᤱ ᤏᤢ ᤁᤢᤈᤢᤵᤛᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤑᤠ᤺ᤴᤍᤠᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤔᤧᤓᤥ᤺ᤴᤍᤢᤛᤡᤖᤥ॥ ((ᤀᤰᤂᤣᤗ᤹ᤖᤡᤰ “ᤂᤢᤏᤧ᤹ ᤗᤠᤕᤥᤒᤠᤜᤠ᤹ᤏᤢ ᤛᤥᤖᤡᤰ ᤔᤧᤈᤥᤃᤢ” ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤐᤠ᤺ᤴᤏᤡᤴ ᤁᤧᤖᤧᤖᤥ॥))

²⁹ ᤂᤧᤵᤔᤥᤗᤠᤶ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤌᤧᤃᤣ᤺ᤰᤐᤧᤴ ᤔᤧᤜᤡᤰᤂᤢᤖ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. “ᤂᤧᤏᤧ᤹ᤃ ᤔᤠᤱᤜᤡᤶᤔᤡᤴ ᤁᤧᤕ᤺ᤒᤠᤀᤠᤱ ᤛᤢᤶᤕᤧᤴᤏᤥ ᤁᤧᤈᤥ᤺ᤰᤐᤣ.

³⁰ ᤂᤧᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤩᤧ᤹ᤀᤠᤱ ᤀᤠᤒᤠᤅᤣ ᤛᤧ᤺ᤵᤛᤡᤱᤅᤧ᤹॥”

³¹ ᤜᤧᤰᤁᤣᤗ᤹ᤖᤡᤰᤁᤣ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤘᤣ᤹ ᤔᤏᤠᤜᤠ᤹ᤃ ᤋᤠᤱᤛᤧ᤺ᤵᤋᤢᤛᤡ. ᤁᤖ ᤂᤢᤏᤧ᤹ ᤀᤠᤒᤠᤅᤣᤃ ᤛᤧ᤺ᤵᤛᤡᤱᤔᤠ ᤔᤧᤛᤢᤰᤛᤡᤱᤅᤡᤴᤗᤥ॥

³² ᤂᤢᤏᤧ᤹ ᤛᤧᤰᤂᤠᤀᤣ ᤀᤡᤛᤪᤠᤀᤡᤗᤛᤔᤠ ᤜᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ ᤑᤠ᤹ᤃᤪ. ᤜᤠᤖᤠ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱᤏᤢ ᤕᤥ ᤌᤠ᤺ᤖ. ᤜᤧᤰᤁᤩᤠᤱ ᤂᤧᤴ ᤏᤡᤛᤢᤶᤒᤧᤀᤠᤱ ᤏᤛᤠᤴ ᤆᤥᤃᤢᤶᤒᤧ᤹ᤖᤥ॥” ᤂᤢᤏᤧ᤹ᤏᤢᤀᤣ ᤔᤧᤓᤥ᤺ᤴᤍᤢᤛᤡᤒᤠ ᤂᤧᤴ ᤑᤠ᤺ᤴᤍᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤖᤧᤳᤇᤢᤖᤥ॥

³³ ᤜᤧᤰᤁᤩᤠᤱ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳᤋᤠᤱᤎᤥ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥

³⁴ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤖ ᤐᤳᤇᤧᤸᤗᤧ ᤕᤧᤛᤢᤴ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤀᤣᤗᤥᤀᤡ. ᤀᤣᤗᤥᤀᤡ. ᤗᤠᤔᤠ ᤛᤒᤂᤌᤠᤏᤡ᥅” ᤂᤧᤴ ᤑᤠ᤹ᤀᤡᤱᤃ “ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣᤀᤠᤱ ᤁᤧᤗᤧᤖᤠᤱ ᤁᤧᤍᤣᤛᤠᤱᤒᤣ᥅” ᤐᤥᤱᤗᤥ॥

³⁵ ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤀᤢ᤺ᤳᤋᤢᤖ ᤐᤳᤗᤥ॥”

³⁶ ᤂᤧᤱᤜᤠ᤹ᤀᤥ ᤗᤳᤇᤠ ᤔᤏᤠᤎᤡᤰ ᤂᤡᤔᤥ ᤗᤥ᤺ᤰᤋᤧᤖ ᤐᤣᤀᤠᤱ ᤂᤡᤃᤠᤰᤔᤠ᤺ᤴ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡᤀᤥ ᤏᤡ᤺ᤵᤛᤢ ᤜᤧᤰᤁᤩᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤥ ᤑᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤡ᤺ᤳᤋᤢ ᤌᤢᤅᤢᤖ ᤑᤠ᤹ᤀᤠᤱ ᤁᤢᤔᤢᤖᤠᤀᤥ ᤌᤢᤵᤋᤢ ᤐᤡᤖᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤗᤢ ᤀᤥᤔᤧᤳᤋᤢᤶ ᤛᤠ᤹ᤖᤢᤶ᥄ ᤀᤣᤗᤡᤕᤠᤴ ᤕᤢᤀᤠᤱ ᤂᤢᤏᤧ᤹ ᤌᤠᤛᤢ᤹ ᤒᤡ ᤔᤣ᤺ᤶᤒᤡ᥅”

³⁷ ᤜᤧᤰᤁᤩᤠᤱ ᤕᤧᤛᤢᤴ ᤕᤠᤶᤔᤥ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤀᤠᤱ ᤁᤢᤛᤰᤔᤠ ᤐᤣᤖᤥ॥

³⁸ ᤂᤡᤔᤥ ᤔᤠᤱᤜᤡᤶᤔᤥᤒᤠ ᤑᤥ᤺ᤴᤍᤠᤴ ᤌᤥ ᤏᤢ ᤕᤥ ᤌᤠᤖᤡᤰ ᤂᤧᤸᤗᤧᤰ ᤋᤧ᤺ᤰᤂᤧ॥

³⁹ ᤕᤧᤛᤢᤴ ᤔᤧᤓᤥ᤺ᤴᤍᤢᤒᤠ ᤛᤡᤗᤠᤶᤛᤠᤰᤔᤠ ᤛᤡᤱ ᤋᤃᤡ ᤁᤧᤕᤧᤵᤐᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤛᤩᤧᤒᤠᤴ ᤀᤥᤔᤧᤳᤋᤢᤖ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤀᤣ ᤘᤕᤧᤖᤧᤳᤇ॥”

⁴⁰ ᤂᤧᤵᤔᤥ ᤔᤠ᤺ᤱᤄᤠᤗᤠᤶ ᤁᤢᤓᤠ ᤔᤧᤴᤇᤢᤔᤠᤜᤠ᤹ ᤀᤥᤔᤀᤡ ᤔᤧᤕᤧᤒᤧ॥ ᤂᤧᤱᤜᤠ᤹ᤀᤥ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤆᤢᤰᤐᤠ ᤕᤠᤁᤢᤒ ᤏᤢ ᤕᤢᤛᤢᤑᤖᤧ ᤂᤢᤴᤇᤡ᤹ ᤔᤠ ᤔᤖᤡᤕᤔ ᤏᤢ ᤛᤠᤗᤥᤔᤡᤛᤡ ᤔᤧᤘᤕᤧᤖᤥ॥

⁴¹ ᤕᤧᤛᤢᤴ ᤃᤠᤗᤡᤗᤀᤥ ᤘᤕᤧᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤔᤧᤍᤡ᤺ᤰᤋᤢᤖ ᤁᤢᤓᤠ᤹ ᤔᤧᤒᤡᤖᤢᤖ ᤔᤧᤘᤕᤧ॥ ᤂᤧᤵᤔᤥ ᤕᤖᤢᤛᤗᤧᤔ ᤌᤠᤖᤡᤰ ᤕᤧᤛᤢᤴ ᤏᤢ ᤁᤧᤍᤠᤒᤠ ᤘᤣ᤹ ᤔᤧᤴᤇᤢᤔᤠᤜᤠ᤹ᤀᤠᤱ ᤕᤖᤡᤰ ᤔᤧᤘᤕᤧᤖᤥ॥

ᤕᤧᤛᤢᤴ ᤔᤧᤜᤢᤶᤛᤢ᤹

^42-43 ᤀᤠᤸᤗ ᤕᤢ᤺ᤴᤇᤡᤰ ᤐᤥ᤺ᤰᤂᤧᤸᤗᤧ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑᤧᤴ ᤂᤧᤵᤔᤥ ᤋᤩᤧ॥ ᤂᤢᤏᤧ᤹ ᤕᤜᤢᤍᤡ ᤕᤧᤈᤢᤶᤓᤥᤖᤧ ᤔᤡᤱᤛᤥ ᤀᤡᤱᤎᤠᤱᤛᤠᤒᤠ ᤐᤠᤛᤡᤱᤐᤠᤍᤠᤱᤗᤠ ᤏᤢ ᤏᤡᤱᤘᤠ᤹ᤑᤢᤜᤠᤱᤈᤢᤶ ᤁᤧᤜᤠᤱᤒᤠᤀᤠᤱ ᤁᤧᤘᤠ᤹ᤒᤠ ᤘᤕᤧᤖᤥ॥ ᤂᤧᤴ ᤕᤠᤖᤡᤵ ᤆᤥ᤺ᤰᤔᤠ ᤕᤧᤶ ᤘᤕᤧ (ᤏᤠ᤺ᤶᤛᤡᤱ ᤕᤧᤴᤏᤡᤴ ᤁᤢᤍᤠ᤺ᤴᤍᤡᤰᤔᤠ ᤘᤕᤧ)॥ ᤜᤧᤰᤁᤣ᤺ᤸᤗᤧ ᤂᤧᤴ ᤀᤠ᤺ᤴᤇᤡᤱᤅᤠᤱ ᤐᤡᤗᤠᤋᤛᤖᤥ ᤐᤣ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢᤖᤥ॥

⁴⁴ ᤐᤡᤗᤠᤋᤛᤖᤧ ᤕᤧᤛᤢᤴ ᤀᤠᤴᤍᤣ᤺ᤴᤇᤠ ᤛᤩᤧᤒᤠ ᤂᤧᤵᤛᤢᤀᤠᤱ ᤁᤢᤏᤡᤱᤘᤠ᤹ ᤔᤕᤧ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤌᤰᤋᤢᤶᤒᤠᤴ ᤀᤢ᤺ᤳᤋᤢᤀᤠᤱ ᤕᤧᤛᤢᤴ ᤀᤠᤴᤍᤣ᤺ᤴᤇᤠ ᤛᤩᤧᤒᤠᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢ॥

⁴⁵ ᤂᤧᤸᤗᤧ ᤌᤰᤋᤢᤶᤒᤧᤸᤗᤥᤗᤠᤶ ᤕᤧᤛᤢᤴ ᤀᤠᤴᤍᤣ᤺ᤴᤇᤠ ᤛᤩᤧᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤕᤢᤛᤢᤑᤧᤴ ᤕᤧᤛᤢᤖᤧ ᤁᤢᤎᤰᤁᤡᤴ ᤋᤣ᤹ᤔᤠ ᤐᤠᤱᤄᤢᤖᤥ॥

⁴⁶ ᤜᤧᤰᤁᤣ᤺ᤸᤗᤧ ᤕᤢᤛᤢᤑᤖᤧ ᤏᤢᤒᤠ ᤆᤣ ᤋᤣ᤺ᤳᤋᤡᤴ ᤀᤡᤅᤢ. ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤏᤢ ᤌᤠᤛᤢᤀᤠᤱ ᤂᤧᤴ ᤋᤣ᤺ᤳᤋᤡᤸᤗᤧ ᤁᤡᤳᤋᤢᤀᤠᤱ ᤗᤢᤱᤅᤥ ᤂᤥ᤺ᤶᤔᤏᤠᤒᤠ ᤀᤡ᤺ᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤜᤧᤰᤁᤩᤠᤱ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤢᤱᤅᤡᤴ ᤀᤡᤛᤢᤎᤖᤥ॥

⁴⁷ ᤔᤖᤡᤕᤔ ᤔᤃ᤻ᤍᤗᤡᤏᤡ ᤏᤢ ᤕᤢᤛᤢᤑᤖᤧ ᤁᤢᤶᤔᤠ ᤔᤖᤡᤕᤔᤖᤧ ᤕᤧᤛᤢᤖᤧ ᤁᤢᤎᤰᤁᤡᤴ ᤔᤧᤏᤧᤛ᤻ᤛᤢᤒᤠ ᤋᤧᤴᤏᤡᤴ ᤔᤡᤰᤛᤣᤴ ᤔᤧᤳᤋᤧᤳᤇᤢᤖᤥ॥