ᤔᤷᤁᤢᤛ 10 - LIFOTNT

ᤔᤣ᤺ᤳ ᤏᤠ᤹ᤔᤠ

¹ ᤕᤧᤛᤢᤖᤧ ᤂᤧᤴ ᤋᤧᤴᤏᤡᤴ ᤗᤧᤖᤢᤀᤠᤱ ᤕᤷᤍᤏ ᤕᤱᤄᤱᤅᤡᤸᤗᤧ ᤏᤠᤎᤠ᤺ᤶᤒᤡᤒᤠ ᤕᤜᤢᤍᤡᤕᤠ ᤌᤢᤶᤔᤥ ᤐᤣ॥ ᤂᤧᤵᤔᤥᤀᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤕᤧᤵᤗᤧᤰ ᤁᤢᤀᤡᤛᤡᤰ ᤂᤧᤴ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡ॥

² ᤂᤧᤵᤔᤥ ᤁᤢᤓᤠ ᤑᤖᤡᤛᤡᤜᤠ᤹ ᤔᤧᤍᤩᤧᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤛᤠ᤹ᤔᤠ ᤑᤠ᤹ᤀᤠᤱ ᤐᤠᤴ ᤔᤧᤃᤧᤛᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤐᤡᤖᤢᤒᤡ ᤔᤣ᤺ᤶᤒᤡ᥅”

³ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤱᤏᤠ ᤛᤣ᤺ᤴᤍᤥᤛᤢᤛᤡ. “ᤔᤥᤛᤠᤖᤧ ᤂᤡᤏᤡ᤹ ᤀᤠᤰᤋᤱᤒᤠ ᤀᤡᤱᤈᤠᤱ ᤁᤧᤒᤡᤖᤡᤀᤠᤱ ᤁᤧᤘᤕᤡ᤹ᤒᤣ᥅”

⁴ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤔᤥᤛᤠ᤺ᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤀᤡᤱᤃᤠ᤹ ᤏᤠ᤹ᤏᤧᤒᤠᤖᤥ ᤑᤠ᤹ᤀᤠᤱ ᤛᤠᤵᤗᤠ ᤛᤠᤵᤋᤢᤀᤠᤱ ᤐᤠᤱᤔᤠᤍᤣᤔᤠ ᤛᤢᤰᤋᤢ᤹ ᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳᤗᤥ॥”

⁵ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤱᤃ ᤂᤡᤏᤡ᤹ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤣᤗ᤹ᤖᤡᤰ ᤔᤥᤛᤠᤖᤧ ᤂᤧᤴ ᤛᤠᤶᤕᤥᤌᤡᤶᤔᤡᤴ ᤁᤧᤛᤠᤵᤋᤡ ᤁᤧᤒᤡᤖᤡᤒᤠᤖᤥ॥

⁶ ᤁᤖ ᤁᤢᤜᤣ᤺ᤰᤛᤡᤱᤔᤥᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤢᤸᤗᤧ ‘ᤕᤧᤶᤒᤡᤳᤇᤠ᤹ ᤏᤢ ᤔᤧᤴᤇᤢᤔᤠ᤹ ᤆᤥᤃᤢᤛᤡᤖᤥ॥’

^7-8 ‘ᤂᤧᤸᤗᤧᤆᤥᤃᤢᤸᤗᤧ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤶᤒᤠ ᤏᤢ ᤁᤢᤶᤔᤠᤛᤡ ᤗᤧᤖᤢᤛᤡᤀᤠᤱ ᤁᤢᤔᤣ᤺ᤳᤋᤡᤴᤏᤢ ᤋᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤌᤰ ᤐᤥᤱᤛᤡᤖᤥ॥ ᤀᤠᤸᤗ ᤂᤧᤱᤜᤠ᤹ᤃ ᤏᤧᤵᤑᤢᤛᤡ ᤔᤣ᤺ᤴ. ᤁᤖ ᤗᤳᤇᤠ ᤌᤰᤛᤡᤖᤥ॥’

⁹ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤌᤰ ᤆᤥᤃᤢᤛᤡᤒᤠᤜᤠ᤹ ᤔᤧᤴᤇᤠᤶ ᤕᤠᤵᤔᤡᤖᤧ ᤛᤧᤶᤔᤠᤛᤡ ᤔᤧᤏᤢ᤹ᤏᤧᤴᤗᤥ॥”

¹⁰ ᤜᤧᤰᤁᤩᤠᤱ ᤕᤠᤱᤛᤡ ᤂᤧᤱᤜᤠ᤹ ᤜᤡᤶᤔᤥ ᤔᤧᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤁᤴ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ ᤑᤠ᤹ᤀᤠᤱ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢᤖᤥ॥

¹¹ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤴ ᤕᤧᤶᤒᤡᤳᤇᤠ᤹ᤀᤡᤸᤗᤧ ᤁᤢᤔᤣ᤺ᤳᤋᤡᤴ ᤏᤠ᤹ᤖᤢᤀᤠᤱ ᤘᤣ᤹ᤛᤔᤠ ᤔᤧᤴᤇᤢᤔᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧ ᤋᤃᤡᤛᤔᤠ ᤁᤢᤔᤣ᤺ᤳᤋᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤣ᤹ ᤔᤧᤴᤇᤢᤔᤠ᤹ᤀᤡᤴᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥

¹² ᤜᤧᤰᤁᤩᤠᤱ ᤀᤠᤳᤋᤡᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤕᤧᤶᤒᤠ᤹ᤀᤡᤴ ᤏᤠ᤹ᤖᤢᤀᤠᤱ ᤘᤣ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤔᤣ᤺ᤰᤂᤡᤶ ᤆᤥᤃᤢ᤹. ᤂᤧᤸᤗᤧᤀᤠᤱ ᤋᤃᤡᤛᤔᤠ ᤁᤢᤕᤧᤶᤒᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤘᤣ᤹ ᤕᤧᤶᤒᤡᤳᤇᤠ᤹ᤀᤡᤴᤏᤢ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ᤹ᤖᤥ॥”

ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ ᤕᤧᤛᤢ

¹³ ᤜᤧᤰᤁᤩᤠᤱ ᤕᤧᤛᤢᤖᤧ ᤜᤢᤰ ᤏᤧᤛ᤻ᤛᤢᤀᤠᤱ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤍᤠᤖᤢᤛᤡ॥ ᤁᤖ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤁᤧᤍᤠ᤺ᤵᤐᤠᤜᤠ᤹ ᤔᤧᤓᤧ᤺ᤰᤋᤢᤛᤡ॥

¹⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤏᤡᤛᤢᤀᤠᤱ ᤁᤢᤕᤠ᤺ᤰᤗᤧ᤹ᤖᤧᤖ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤠᤖᤠ᤹ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤀᤡᤱᤃᤠ᤹ᤀᤥ ᤋᤠᤔᤠ ᤑᤠ᤺ᤰᤋᤧᤶᤛᤡᤶᤔᤧ᤹ᤀᤥ. ᤂᤧᤱᤜᤠ᤹ ᤔᤧᤛᤠᤰᤋᤧᤶᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤱᤃ ᤁᤴ ᤜᤡᤴᤈᤠ᤹ᤒᤡᤳᤇᤠ ᤜᤧᤰᤋᤱᤒᤠᤜᤠ᤹ᤖᤧᤴᤏᤣᤖᤥ॥

¹⁵ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤜᤠ᤺ᤳᤗᤧ ᤜᤡᤴᤈᤠ᤹ ᤜᤧᤰᤁᤣ ᤁᤢᤍᤥ᤺ᤵᤔᤠ ᤏᤡᤱᤘᤠ᤹ᤀᤡᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤔᤧᤍᤠ᤺ᤰᤋᤢᤴ. ᤂᤧᤴ ᤂᤧᤵᤔᤥ ᤗᤠ᤺ᤵᤔᤠ ᤔᤧᤄᤥᤏᤧᤴᤗᤥ॥”

¹⁶ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤢᤓᤰᤋᤢᤱᤅᤥ ᤕᤢᤰᤂᤢᤛᤡᤀᤠᤱ ᤂᤢᤏᤡ᤹ ᤛᤶᤍᤠᤱ ᤜᤢᤰ ᤏᤧᤛ᤻ᤛᤢᤖ ᤔᤢ᤹ᤀᤡᤛᤠᤶ ᤐᤡᤖᤢᤛᤡᤖᤥ॥

ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ

¹⁷ ᤜᤧᤰᤁᤩᤠᤱ ᤕᤧᤛᤢᤴ ᤗᤠᤶᤍᤡ᤺ᤰᤁᤥ ᤐᤣᤖ ᤐᤳᤇᤧᤸᤗᤧ ᤔᤏᤠᤎᤡᤰ ᤗᤥ᤺ᤰᤋᤧ ᤑᤧᤖᤧᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤔᤧᤳᤋᤢ. “ᤁᤧᤏᤢ᤹ᤒᤠ ᤛᤡᤰᤛᤠᤶᤒᤠᤀᤣ. ᤀᤠᤰᤋᤱᤒᤠ ᤏᤢᤒᤠ ᤕᤠ᤺ᤶᤒᤰ ᤆᤥᤃᤢᤱᤅᤡᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢᤱᤒᤣ᥅”

¹⁸ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤌᤣᤀᤠᤱ ᤀᤡᤱᤃᤠ᤹ ᤁᤧᤏᤢ᤹ᤒᤠ ᤁᤧᤔᤧᤳᤋᤠᤒᤣ᥅ ᤁᤧᤏᤢ᤹ᤒᤠᤃ ᤏᤡᤱᤘᤠ᤹ᤑᤢᤔᤠᤱᤅᤡᤴᤗᤰ ᤘᤠ᤹ᤖᤥ॥

¹⁹ ᤂᤧᤏᤧ᤹ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤗᤧᤛ᤻ᤛᤢ᤹—ᤔᤏᤠᤛᤧᤵᤔᤠ ᤔᤧᤏᤢ᤹ᤏᤧᤴ. ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤂᤢ᤺ᤶᤔᤠ ᤔᤧᤏᤢ᤹ᤏᤧᤴ. ᤀᤡᤱᤗᤧᤰ ᤐᤠ᤺ᤵᤔᤠ ᤔᤧᤏᤢ᤹ᤏᤧᤴ. ᤔᤏᤠᤜᤠ᤹ ᤂᤢᤶᤔᤠᤛᤡ ᤔᤧᤏᤢ᤹ᤏᤧᤴ. ᤜᤧᤰᤁᤩᤠᤱ ᤐᤠ-ᤔᤠ ᤀᤡᤱᤎᤠᤱ ᤐᤡᤔᤠᤛᤡᤀᤣ ᤐᤥᤱ॥”

²⁰ ᤂᤧᤴ ᤔᤏᤠ᤺ᤸᤗᤧ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤁᤴ ᤁᤧᤖᤧᤰ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ᤃ ᤀᤡᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥᤀᤣ ᤀᤡ᤺ᤳᤋᤢᤱ ᤏᤠ᤺ᤳᤋᤢᤱᤗ ᤘᤠ᤹ᤀᤠᤖᤥ॥”

²¹ ᤕᤧᤛᤢᤖᤧ ᤂᤧᤴ ᤔᤏᤠᤴ ᤀᤥᤔᤧᤳᤋᤢᤀᤠᤱ ᤗᤢᤱᤔᤠ᤹ ᤋᤢᤰᤋᤢᤖ ᤔᤧᤳᤋᤢ. “ᤀᤠᤸᤗᤛᤠᤱ ᤂᤧᤏᤧ᤹ ᤕᤠ᤺ᤶᤒᤰᤌᤡᤰ ᤆᤥ᤺ᤰᤔᤠ ᤁᤧᤃᤳᤋᤢ᤹ᤖᤥ॥ ᤐᤣᤃᤧ᤹ᤀᤠᤱ ᤁᤧᤃᤳᤋᤢᤒᤠᤴ ᤁᤧᤖᤧᤰ ᤛᤱᤄᤧᤍᤣᤛᤧ᤹ ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡᤖᤧᤛᤧ᤹ᤀᤥ॥ ᤜᤧᤰᤁᤣᤗ᤹ᤖᤡᤰ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤠᤱᤛᤠᤁᤢᤴᤎᤣ ᤁᤧᤄᤥᤛᤢ᤹ᤖᤥ॥ ᤜᤧᤰᤁᤩᤠᤱ ᤑᤧᤖᤧ᤹ᤀᤠᤱ ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥”

²² ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤁᤢᤏᤠ᤺ᤴ ᤁᤡ᤺ᤴᤍᤢᤀᤠᤱ ᤁᤢᤏᤡᤱᤘᤠ᤹ ᤋᤢᤃᤧᤖ ᤂᤧᤵᤔᤥᤗᤠᤶ ᤐᤣ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤕᤖᤡᤰ ᤕᤠᤱᤛᤠᤁᤢᤴᤎᤣ ᤁᤳᤋᤢᤖᤥ॥

²³ ᤕᤧᤛᤢᤖᤧ ᤂᤡᤖᤡ ᤀᤥᤔᤕᤧᤖ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹ᤃ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤠ᤹ᤖᤡᤰ ᤛᤠᤰᤗᤥ᥄”

²⁴ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤁᤖ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤆᤢᤰᤐᤠᤛᤣ. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤛᤧᤰᤂᤠᤀᤣ ᤛᤠᤰᤗᤥ॥

²⁵ ᤕᤠᤱᤛᤠᤁᤢᤴᤎᤣᤛᤠᤒᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠ᤺ᤵᤔᤠᤏᤢ᤺ᤸᤗᤧ ᤀᤢᤔᤣ᤺ᤴ ᤛᤶᤔᤣ᤺ᤳᤋᤡᤸᤗᤧ ᤁᤢᤜᤱᤅᤥ ᤗᤠ᤺ᤵᤔᤠ ᤀᤢᤛᤢᤖᤢ ᤐᤥᤱᤗᤥ॥”

²⁶ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. “ᤜᤧᤰᤁᤣ᤺ᤸᤗᤧ ᤜᤠᤳ ᤋᤠᤱᤛᤧ᤺ᤵᤔᤠ ᤛᤢᤰᤐᤠᤒᤣ᥅”

²⁷ ᤕᤧᤛᤢᤖᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡᤖ ᤔᤧᤳᤋᤢᤛᤡ. “ᤂᤧᤵᤛᤧᤶᤔᤧ᤹. ᤔᤧᤴᤇᤠᤶ ᤕᤠᤵᤔᤡᤖᤧ ᤗᤠᤃᤡᤃ ᤁᤴ ᤛᤢᤰᤔᤧᤴᤍᤧᤵᤔᤏᤠ ᤆᤥ᤺ᤰᤛᤠᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡᤃ ᤔᤧᤛᤠᤰᤏᤧᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤢ᤹ᤖᤥ॥”

²⁸ ᤜᤧᤰᤁᤩᤠᤱ ᤐᤋᤪᤢᤛᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤁᤧᤖᤧᤰ ᤐᤠ᤺ᤴᤜᤠ᤹ ᤗᤧᤖᤢᤶᤒᤧ. ᤜᤧᤰᤁᤩᤠᤱ ᤂᤧᤏᤧ᤹ ᤋᤡᤶᤔᤠᤛᤡᤃᤧᤀᤠᤱ ᤘᤕᤡᤃᤧᤖᤥ॥”

²⁹ ᤜᤧᤰᤁᤩᤠᤱ ᤕᤧᤛᤢᤖᤧ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤠᤳᤋᤡᤸᤗᤧ ᤀᤠᤗᤠᤃᤡ ᤏᤢ ᤛᤢᤏᤠᤀᤡᤱᤗᤧ ᤗᤠᤃᤡ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤏᤧ᤹ᤏᤢᤛᤠ᤹ᤜᤠ᤹. ᤑᤢ᤹ᤏᤢᤛᤠ᤹ᤜᤠ᤹. ᤐᤠᤔᤠᤜᤠ᤹. ᤀᤡᤃᤪ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤗᤧᤖᤢᤛᤡᤀᤠᤱ ᤘᤠ᤹.

³⁰ ᤂᤧᤸᤗᤧ ᤛᤧᤰᤂᤠᤀᤣ ᤁᤴ ᤕᤧᤶᤔᤥ ᤔᤏᤠᤗᤠᤶᤒᤠ ᤋᤢᤰᤂᤣ ᤆᤠᤔᤠᤏᤢ ᤛᤥᤛᤥᤖᤡᤰ ᤜᤡᤶᤎᤠ᤺ᤱᤜᤠ᤹. ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤜᤠ᤹. ᤑᤢ᤹ᤏᤢᤛᤠ᤹. ᤏᤧ᤹ᤏᤢᤛᤠ᤹. ᤔᤠᤜᤠ᤹ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤁᤡᤵᤌᤡᤰ (᥇᥆᥆) ᤗᤧᤱᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤥᤛᤢ᤹ᤖᤥ॥ ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤶᤔᤥ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢ᤹ᤖᤥ॥

³¹ ᤁᤖ ᤀᤠᤸᤗᤥ ᤋᤃᤡ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤀᤣᤃᤠᤱ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤀᤠᤸᤗᤥ ᤀᤣᤃᤠᤱ ᤁᤧᤘᤠ᤹ᤒᤠ ᤕᤖᤡᤰ ᤔᤏᤠᤜᤠ᤹ ᤋᤃᤠᤱ ᤔᤧᤒᤥᤱᤗᤥ॥”

ᤕᤧᤛᤢᤖᤧ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤠᤶᤔᤥ ᤐᤠ᤺ᤳᤋᤢ᤹

³² ᤂᤧᤱᤜᤠ᤹ ᤕᤖᤢᤛᤗᤧᤔ ᤌᤥ ᤔᤧᤒᤣ᤺ᤸᤗᤧ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ᤺ᤸᤗᤧ ᤋᤃᤠᤱ ᤐᤳᤇᤧ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ. ᤜᤧᤰᤁᤩᤠᤱ ᤀᤣᤃᤠᤱ ᤁᤧᤍᤡᤶᤒᤠᤜᤠ᤹ᤀᤠᤱ ᤔᤧᤃᤡᤛᤧᤖᤥ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤌᤡᤰ-ᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤛᤡᤀᤠᤱ ᤀᤠᤸᤗ ᤐᤥᤱᤔᤠ ᤀᤡ᤺ᤳᤋᤧᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ.

³³ “ᤀᤠᤸᤗ ᤀᤠᤏᤡ᤹ ᤕᤖᤢᤛᤗᤧᤔ ᤀᤠᤃᤧᤳ ᤜᤧᤰᤁᤩᤠᤱ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤴᤇᤠᤶᤛᤠᤴ ᤀᤡᤱᤔᤧᤗᤧᤰᤋᤢᤀᤠᤱ ᤜᤢᤰᤔᤧᤛᤢᤵᤋᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤔᤧᤒᤡᤖᤢ᤹ᤖᤥ॥

³⁴ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. ᤌᤩᤠ᤺ᤳ ᤔᤧᤎᤥ᤺ᤰᤋᤢ᤹. ᤔᤧᤜᤡᤵᤋᤢ᤹. ᤋᤧ᤺ᤶᤓᤢᤰ ᤔᤧᤒᤡᤖᤢ᤹. ᤜᤧᤰᤁᤩᤠᤱ ᤔᤧᤛᤧᤖᤢ᤹ᤖᤥ॥ ᤁᤖ ᤂᤢᤏᤧ᤹ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤗᤥ॥”

ᤕᤠᤁᤢᤒ ᤏᤢ ᤕᤢᤜᤢᤴᤏᤠ᤺ᤸᤗᤧ ᤂᤢᤴᤇᤡ᤹ ᤐᤣᤗᤡ

³⁵ ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤛ᤻ᤛᤠ ᤕᤠᤁᤢᤒ ᤏᤢ ᤕᤢᤜᤢᤴᤏᤠ᤺ᤸᤗᤧ ᤕᤧᤛᤢᤴ ᤔᤧᤳᤋᤧᤇᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤴᤇᤡᤃᤣ ᤐᤠ᤺ᤳᤇᤢᤃᤧᤒᤠ ᤐᤠ᤺ᤴᤏᤡᤴ ᤀᤠᤴᤇᤡᤃᤣ ᤗᤠᤃᤡ ᤆᤥᤃᤧ᤹ᤀᤥ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤇᤢᤃᤧ᤹ᤖᤥ॥”

³⁶ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤡᤴᤇᤡ᤹ ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤳᤇᤡᤱᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤈᤥ᤺ᤰᤛᤢᤒᤣ᥅”

³⁷ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤂᤧᤏᤧ᤹ ᤔᤡᤔᤡᤍᤡᤱᤃᤧᤴ ᤁᤧᤜᤠᤱᤈᤢᤶᤔᤥ ᤁᤧᤕᤢᤱᤅᤡᤸᤗᤧ. ᤁᤧᤈᤢᤵᤛᤠᤱ ᤏᤢ ᤁᤧᤓᤧᤴᤇᤠᤱ ᤗᤧᤵᤔᤠᤱ ᤀᤠᤴᤇᤡᤃᤣ ᤕᤢᤱᤔᤠ ᤕᤠᤵᤔᤡ ᤐᤠᤱᤄᤧ᤹ᤀᤥ॥”

³⁸ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤌᤣ᤺ᤴ ᤁᤧᤏᤠ᤺ᤰᤛᤢᤖ ᤁᤧᤒᤳᤇᤡ᤹ ᤂᤧᤴ ᤁᤢᤛᤡᤱ ᤁᤧᤴᤏᤡ᤺ᤳᤇᤢᤴ॥ ᤀᤡᤱᤃᤠ᤹ ᤌᤢᤅᤢᤱᤒᤠ ᤋᤢᤰᤂᤣᤘᤠ ᤂᤥᤷᤕᤠᤀᤥ ᤌᤢᤱᤔᤠ ᤁᤧᤛᤢᤰᤛᤢᤒᤡ᥅ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤥᤱᤅᤠᤒᤠ ᤒᤵᤋᤡᤛ᤻ᤔᤠᤴ ᤂᤡᤴᤇᤡ᤹ ᤐᤥᤱᤔᤠ ᤁᤧᤛᤢᤰᤛᤢᤒᤡ᥅”

³⁹ ᤂᤧᤱᤜᤠ᤹ᤖᤧ ᤏᤥᤃᤵ ᤐᤡᤖᤧᤳᤇᤢ. “ᤛᤢᤰᤛᤢᤃᤧ᤹॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤛᤧᤰᤂᤠᤀᤣ ᤀᤡᤱᤃᤠ᤹ ᤌᤢᤅᤢᤱᤒᤠ ᤂᤥᤷᤕᤠᤀᤥ ᤁᤧᤎᤢᤱᤛᤢ᤹ᤀᤠᤱ ᤀᤡᤱᤃᤠ᤹ ᤐᤥᤱᤅᤠᤒᤠ ᤒᤵᤋᤡᤛ᤻ᤔᤠᤴᤏᤠᤱ ᤂᤡᤴᤇᤡ᤹ ᤁᤧᤒᤥᤱᤛᤡ᤹.

⁴⁰ ᤁᤖᤛᤠᤱ ᤀᤠᤓᤧᤴᤇᤠᤱ ᤏᤢ ᤀᤠᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤔᤠ ᤁᤧᤛᤢᤰᤛᤡ᤹ ᤐᤠ᤺ᤵᤔᤠ ᤕᤢᤰ ᤔᤧᤃᤳᤋᤠᤴᤗᤥ॥ ᤂᤧᤴ ᤋᤧᤴᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴᤜᤠ᤹ ᤐᤡᤔᤠᤛᤡ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹. ᤒᤠ ᤂᤧᤱᤜᤠ᤹ᤖᤰ ᤕᤢᤱᤔᤠ ᤔᤧᤄᤥᤖᤥ॥”

⁴¹ ᤜᤧᤰᤁᤩᤠᤱ ᤘᤣ᤹ ᤌᤡᤒᤥᤱ (᥇᥆) ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤀᤠᤱ ᤕᤠᤁᤢᤒ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤴᤏᤢ ᤂᤢᤴᤇᤡ᤹ ᤛᤡᤰ ᤐᤥᤃᤧᤖᤥ॥

⁴² ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤁᤠᤰ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤜᤠ᤹ᤖᤧᤃ ᤔᤏᤠᤜᤠ᤹ ᤐᤠ᤺ᤵᤐᤠ᤺ᤳ ᤔᤧᤔᤧᤳᤋᤢᤛᤡᤒᤠ ᤜᤧᤰᤁᤩᤠᤱ ᤂᤢᤏᤡ᤹ ᤛᤢᤜᤠᤱᤕᤢᤰᤐᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤑᤥᤛᤠᤱᤒᤠᤜᤠ᤹ ᤔᤧᤕᤢᤰᤋᤢᤛᤡᤒᤠᤃ ᤂᤡᤏᤡ᤹ ᤁᤧᤏᤡᤛᤢᤶᤔᤠᤱ ᤁᤧᤘᤕᤡ᤹ᤖᤥ॥

⁴³ ᤁᤖ ᤂᤡᤏᤡ᤹ ᤗᤢᤶᤔᤥᤃ ᤜᤧᤰᤁᤣ ᤐᤥᤱᤔᤠ ᤔᤧᤏᤢ᤹ᤏᤧᤴᤗᤥ॥ ᤂᤡᤏᤡ᤹ ᤗᤢᤶᤔᤥᤃ ᤀᤠᤳᤋᤡᤸᤗᤧ ᤗᤠᤶᤗᤥᤒᤠ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤜᤠᤖᤠ᤹ ᤂᤡᤏᤡ᤹ ᤛᤧᤘᤠᤖᤥᤒᤠ ᤐᤥᤱᤗᤖᤥ॥

⁴⁴ ᤜᤧᤰᤁᤩᤠᤱ ᤜᤠ᤺ᤳᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤠᤱ ᤐᤥᤱᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤕᤥᤰ ᤐᤥᤱᤗᤖᤥ॥

⁴⁵ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤛᤧᤘᤠ ᤔᤧᤒᤡᤀᤠᤖ ᤑᤠ᤹ᤀᤠᤱ ᤔᤣ᤺ᤴ. ᤁᤖ ᤛᤧᤘᤠ ᤐᤡᤛᤧ ᤋᤩᤠᤱᤒᤠᤖᤥ॥ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤗᤠᤶ ᤌᤧ᤹ᤔᤠᤛᤡᤀᤠᤱ ᤋᤠᤱᤛᤧ᤺ᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤃᤠ᤹ ᤀᤠᤜᤡᤱᤔᤴᤏᤡᤴ ᤐᤡᤛᤧ ᤋᤩᤠᤱᤒᤠᤖᤥ॥”

ᤕᤧᤛᤢᤖᤧ ᤒᤷᤋᤡᤔᤠᤀᤡ ᤔᤡᤰᤑ᤺ᤶᤒᤧᤴ ᤘᤣ᤺ᤴᤍᤢ᤹

⁴⁶ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤧᤖᤡᤜᤥ ᤕᤧᤰᤕᤰᤁᤥ ᤔᤧᤍᤩᤧ॥ ᤕᤠᤱᤛᤡ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤡᤰ ᤔᤏᤠᤜᤠ᤹ᤏᤢ ᤕᤧᤰᤕᤰᤗᤠᤶ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤋᤡᤔᤤᤖᤧ ᤁᤢᤛ᤻ᤛᤠ ᤒᤷᤋᤡᤔᤠᤀᤡ ᤔᤧᤵᤔᤏᤠᤒᤠ ᤆᤠᤃᤧᤏᤠ᤺ᤰᤐᤠ ᤔᤡᤰᤑ᤺ᤶᤒᤧᤴ ᤗᤠᤶᤔᤡᤸᤗᤧ ᤁᤢᤕᤠᤀᤥ ᤕᤢᤅᤧᤖᤥ॥

⁴⁷ ᤏᤠᤛᤖᤋᤒᤠ ᤕᤧᤛᤢᤴ ᤐᤣ᤺ᤰᤗ ᤐᤳ ᤁᤧᤗ᤹ᤒᤠ ᤂᤧᤸᤗᤧ ᤂᤧᤵᤛᤢᤀᤠᤱ ᤀ᤺ᤰᤔᤠ ᤜᤣ᤺ᤰᤋᤧ. “ᤍᤠᤀᤢᤍᤖᤧ ᤁᤢᤛ᤻ᤛᤠ ᤕᤧᤛᤢᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄”

⁴⁸ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤛᤫᤠ᤺ᤳ ᤕᤢᤅᤧ᤹ ᤑᤠ᤹ᤀᤠᤱ ᤔᤧᤓᤧ᤺ᤰᤋᤢ॥ ᤁᤖ ᤂᤧᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤀ᤺ᤰᤋᤧ. “ᤍᤠᤀᤢᤍᤖᤧ ᤁᤢᤛ᤻ᤛᤠᤀᤣ. ᤀᤡᤱᤃᤠ᤹ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄”

⁴⁹ ᤕᤧᤛᤢᤖᤧ ᤂᤧᤴ ᤀ᤺ᤰᤋᤧᤒᤠ ᤂᤧᤵᤛᤢᤸᤗᤧ ᤕᤧᤶᤛᤡᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤂᤧᤴ ᤔᤡᤰᤑ᤺ᤶᤒᤧᤴ ᤔᤧᤔᤧᤳᤋᤢ. “ᤜᤦ. ᤛ᤺ᤳᤋᤧ᤹ᤀᤥ᥄ ᤛᤡᤰᤛᤠᤶᤒᤧᤸᤗᤧ ᤁᤧᤀᤢ᤺ᤳᤋᤧᤀᤠᤱ ᤘᤠ᤹ᤖᤥ॥ ᤂᤧᤏᤧ᤹ ᤐᤥᤃᤧ᤹᥄”

⁵⁰ ᤂᤧᤸᤗᤧ ᤁᤢᤛᤢᤱᤄᤣᤰᤘᤠᤴ ᤌᤡᤰᤗᤧᤵᤔᤠᤱ ᤗᤠᤵᤑᤢᤛᤢᤀᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤧᤛᤢᤖᤥ ᤐᤣ॥

⁵¹ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤀᤡᤱᤃᤠ᤹ ᤌᤧᤔᤠ ᤆᤥᤃᤢᤱ ᤐᤡᤏᤧᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤣ᥅” ᤂᤧᤸᤗᤧ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤏᤡᤔᤠ ᤁᤧᤛᤢᤰᤐᤠ ᤐᤥᤱᤅᤠᤖ॥”

⁵² ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤣᤃᤧ᤹᥄ ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤏᤡᤔᤠ ᤁᤧᤛᤢᤰᤐᤠ ᤁᤧᤈᤥᤃᤧᤀᤠᤱ ᤁᤧᤘᤠ᤹ᤖᤥ॥” ᤂᤡᤔᤥ ᤂᤧᤴ ᤏᤡᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤀᤠᤱ ᤛ᤺ᤳᤋᤧᤖ ᤕᤧᤛᤢᤖᤧ ᤁᤢᤀᤣᤃᤠᤱ ᤁᤢᤀᤣᤃᤠᤱ ᤌᤠᤛᤡᤱᤗᤥ॥