ᤔᤡᤁᤠ 7 - LIFOTNTᤀᤡᤛᤪᤠᤀᤡᤗᤖᤧ ᤁᤢᤒᤡᤷᤒᤣ᤺ᤶᤒᤠ ᤕᤠ᤺ᤶᤒᤰ 1 ᤀᤠᤱᤃᤠ᤹ᤃ ᤁᤧᤛᤠᤰᤐᤠ ᤋᤢᤰᤂᤣ ᤋᤢᤔᤢᤱᤅᤠᤱ ᤘᤠ᤹ᤖᤥ᥄ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤁᤢᤈᤠ᤹ ᤔᤧᤍᤢᤒᤢᤀᤠᤱ ᤀᤣᤃᤠᤱ ᤀᤠᤱᤃᤠ᤹ ᤛᤡᤗᤠ ᤁᤧᤃᤥ᤺ᤵᤐᤠ ᤜᤧᤰᤋᤱᤒᤠ ᤆᤥ᤺ᤰᤁᤠᤖᤥ. ᤁᤢᤈᤠ᤹ᤜᤠ᤹ ᤔᤧᤛᤢᤵᤛᤢ ᤔᤧᤛᤢᤖᤢᤀᤠᤱ ᤀᤣᤃᤠᤱ ᤆᤧᤸᤗᤧᤰᤛᤣ᤹ᤀᤡᤸᤗᤧ ᤁᤒᤈᤠᤀᤣ ᤔᤧᤒᤳᤏᤧᤴᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤖᤠ᤹ ᤁᤧᤎᤠᤱᤒᤠ ᤋᤃᤡ ᤁᤧᤍᤢᤶᤒᤠ ᤐ᤺ᤳᤇᤣᤸᤗᤧ ᤁᤢᤗᤡᤱᤛᤶ ᤔᤧᤒᤳᤏᤧᤴᤗᤥ॥ 2 ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤗᤠᤈᤣ᤹ᤗᤠᤶ ᤔᤧᤔᤧᤃᤧᤀᤠᤱ ᤔᤧᤘᤠ᤹ᤖᤥ. ᤁᤢᤍᤥ᤺ᤵᤔᤠ ᤔᤏᤠ ᤜᤠ᤺ᤳᤋᤠᤱ ᤕᤠ᤺ᤰᤋᤧᤀᤠᤱ ᤔᤧᤘᤠ᤹ᤏᤧᤴᤗᤥ॥ ᤔᤏᤠ ᤛᤧᤵᤔᤠᤛᤡᤖᤧ ᤗᤠᤃᤡ ᤁᤧᤖᤧᤰᤗᤧ ᤔᤧᤛᤢᤃᤢᤛᤡᤀᤠᤱ ᤔᤧᤕᤢᤱᤗᤥ. ᤁᤧᤖᤧᤰᤗᤧ ᤆᤧᤴ ᤔᤧᤃᤧᤛᤢᤀᤠᤱ ᤑᤢ᤹ᤏᤢᤛᤠ᤹ᤜᤠ᤹ ᤔᤧᤛᤧᤖᤢᤛᤡᤖᤥ॥ 3 ᤏᤧᤵᤔᤠᤱ ᤜᤢᤰᤜᤠ᤹ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤗᤧᤒᤠ ᤆᤥᤰᤗᤥ. ᤕᤢᤰᤛᤠᤒᤠᤜᤠ᤹ᤖᤧ ᤔᤡᤰᤋᤥ᤺ᤰᤜᤠ᤹ ᤔᤧᤏᤠ᤺ᤰᤋᤢᤖᤥ ᤜᤧᤰᤁᤩᤠᤱ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤖᤧ ᤕᤠᤱ ᤆᤠᤔᤠ ᤔᤧᤏᤠ᤺ᤰᤋᤢᤖᤥ॥ ᤀᤠᤕᤢᤰᤕᤢᤰᤐᤠᤜᤠ᤹ᤖᤧ ᤆᤩᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹ ᤜᤠᤒᤠ ᤂᤧᤴᤏᤣ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤱᤈᤠᤱ ᤔᤧᤈᤥᤃᤢᤖᤥ. ᤂᤧᤱᤜᤠ᤹ ᤁᤧᤖᤧᤰ ᤔᤧᤍᤱᤛᤡᤱᤅᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥ 4 ᤂᤧᤱᤜᤠ᤹ᤀᤥᤒᤠ ᤁᤠᤰᤏᤢ᤺ᤸᤗᤧ ᤏᤢᤒᤧᤴ ᤀᤠᤗᤰᤗᤰᤐᤠ ᤋᤡᤱᤃᤪᤣᤰ ᤜᤧᤰᤋᤱᤒᤠ ᤆᤥᤰᤗᤥ. ᤁᤧᤖᤧᤰᤏᤢ᤺ᤸᤗᤧ ᤁᤢᤍᤥ᤺ᤵᤔᤧᤴ ᤋᤡᤱᤃᤪᤣᤰ ᤐᤢᤱ ᤁᤢᤀᤡᤛᤡᤰ ᤁᤧᤀᤠ᤺ᤵᤐᤠ ᤆᤥᤰᤗᤥ॥ ᤀᤡᤰᤁᤧᤃᤥᤒᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤔᤧᤳᤋᤡᤒᤠ ᤂᤢᤶᤍᤡᤱ ᤕᤧᤴᤏᤡᤴ ᤁᤧᤖᤧᤖᤥ ᤀᤠᤸᤗ ᤂᤡᤏᤡ᤹ ᤜᤠᤒ᤻ ᤗᤧᤰᤔᤠ ᤕᤧᤶ ᤐᤥ᤺ᤰᤂᤧᤖᤥ॥ 5 ᤜᤡᤶᤒᤣᤛᤠᤱᤒᤧᤴ ᤏᤛᤠᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤋᤣ᤺ᤱᤒᤠ ᤆᤢᤶᤔᤡᤴᤏᤠᤱ ᤏᤠᤔᤧᤛᤠ᤹ᤖᤧᤶᤔᤡᤴᤏᤧ᤹ᤀᤥ॥ ᤂᤡᤏᤡ᤹ ᤛᤥᤖᤡᤰ ᤁᤧᤜᤧᤵᤔᤠᤛᤡᤀᤠᤱ ᤁᤧᤏᤧᤛ᤻ᤛᤡᤒᤠ ᤔᤣ᤺ᤳᤜᤠ᤹ᤏᤢᤀᤠᤱ ᤕᤧᤰᤕᤧᤰᤁᤠᤱ ᤐᤠᤖᤧᤶᤔᤧ᤹ᤀᤥ॥ 6 ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤶᤒᤠ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤖᤥ. ᤔᤧᤴᤇᤢᤔᤠᤛᤠᤴ ᤁᤢᤶᤔᤠᤖᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤐᤠᤱᤗᤡᤔᤧᤴ ᤏᤢ᤺ᤵᤔᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤗᤥ. ᤏᤡᤱᤔᤡᤜᤠ᤹ᤃ ᤀᤠᤒᤠᤅᤣ ᤜᤡᤶᤔᤥᤒᤠ ᤔᤏᤠᤜᤠ᤹ ᤔᤧᤒᤥᤱᤗᤥ॥ ᤕᤜᤘᤣ ᤍᤠᤱᤒᤠᤗᤠᤶ ᤛᤧᤴᤗᤵ 7 ᤁᤖ ᤀᤠᤱᤃᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤶ ᤀᤥᤔᤧᤳᤋᤢᤱᤗᤥ. ᤀᤠᤱᤃᤠ᤹ ᤋᤠᤱᤃᤧᤛᤧ᤺ᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤠᤱᤄᤢᤱᤗᤥ. ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤣᤗᤡᤴ ᤂᤧᤵᤛᤢᤖᤥ॥ 8 ᤀᤠᤏᤡᤱᤔᤡᤛᤣ. ᤕᤠᤵᤔᤡ ᤁᤢᤏᤠᤔᤧᤴᤇᤠ᤹ ᤀᤠᤶᤔᤧᤳᤋᤧᤴᤏᤧ᤹ᤀᤥ ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤘᤠ᤹ ᤔᤧᤍᤠᤛᤧᤶᤔᤡᤴᤏᤧ᤹ᤀᤥ᥄ ᤀᤠᤱᤃᤠ᤹ ᤆᤥ᤺ᤴᤏᤠᤛᤠᤱ ᤕᤠᤶᤔᤥ ᤐᤥ᤺ᤰᤁᤠᤖᤥ॥ ᤀᤠᤸᤗᤥ ᤀᤠᤱᤃᤠ᤹ ᤂᤠᤔᤠᤰᤔᤥ ᤘᤠ᤹ᤀᤠᤛᤠᤱ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ ᤀᤠᤀᤥ᤺ᤳᤋᤡ ᤐᤥᤱᤗᤥ॥ 9 ᤂᤢᤏᤧ᤹ ᤀᤠᤱᤃᤠ᤹ ᤗᤧᤵᤔᤠᤱ ᤂᤠᤛᤧᤴ ᤔᤧᤗᤥ᤺ᤴᤍᤢᤴᤗ ᤌᤠᤖᤡᤰ. ᤜᤧᤰᤁᤩᤠᤱ ᤀᤠᤄᤥᤔᤠ ᤕᤢᤰᤁᤡᤴ ᤏᤡ᤺ᤴᤎᤥ ᤔᤧᤈᤥᤃᤢᤴᤗ ᤌᤠᤖᤡᤰ. ᤀᤠᤱᤃᤠ᤹ ᤂᤢᤏᤧ᤹ ᤁᤢᤛᤠᤰᤁᤧᤴᤏᤡᤴ ᤌᤖᤢᤱᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤖᤥ॥ ᤂᤢᤏᤧ᤹ ᤀᤠᤱᤃᤠ᤹ ᤗ᤺ᤳᤋᤠᤀᤠᤱ ᤀᤥ᤺ᤳᤋᤡᤀᤥ ᤋᤠ᤺ᤳᤋᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ ᤁᤢᤛᤠᤶᤕᤥᤏᤡᤔᤠᤴ ᤏᤡᤛᤢᤱᤗᤥ॥ 10 “ᤕᤜᤘᤣ ᤍᤠᤱᤒᤠ ᤂᤧᤏᤧ᤹ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤳᤋᤥ ᤘᤠ᤹ᤒᤣ᥅” ᤕᤠᤵᤔᤡ ᤁᤧᤔᤧᤵᤐᤠ ᤀᤠᤏᤡᤱᤔᤡᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤖᤥ ᤂᤧᤒᤩᤠᤱ ᤂᤧᤱᤜᤠ᤹ ᤛᤠ᤹ᤖᤡᤰ ᤛᤡᤖᤡᤱᤔᤔᤥ ᤔᤧᤎᤠᤖᤥ॥ ᤂᤧᤴ ᤏᤡᤱᤔᤡᤜᤠ᤹ᤖᤧ ᤋᤃᤡ ᤀᤠᤱᤃᤠ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤠᤱᤗᤥ ᤂᤧᤱᤜᤠ᤹ ᤔᤧᤈᤥ᤺ᤶᤒᤧᤴ ᤀᤠᤔᤡᤰᤁᤡᤸᤗᤧᤀᤣ ᤏᤡᤛᤢᤖᤥ. ᤀᤠᤸᤗᤥᤛᤠᤱ ᤂᤧᤱᤜᤠ᤹ ᤔᤠᤖᤠᤶᤔᤥᤒᤠ ᤗᤧ᤺ᤰᤘᤠ ᤜᤧᤰᤁᤣ ᤗᤠᤱᤅᤡᤸᤗᤧ ᤆᤡᤍᤥ᤹ ᤆᤡᤍᤥ᤹ ᤔᤧᤍᤥ᤹ᤖᤢᤛᤡᤖᤥ॥ 11 ᤂᤡᤏᤡ᤹ ᤗᤢᤱᤎᤠᤰᤜᤠ᤹ ᤛᤧᤵᤔᤠ ᤕᤧᤴ ᤋᤠᤖᤥ. ᤂᤡᤏᤡ᤹ ᤀᤡ᤺ᤴᤍᤥᤜᤠ᤹ ᤔᤠ᤺ᤱᤄᤠ ᤌᤠᤖᤡᤰ ᤑᤥᤔᤠ ᤕᤧᤴ ᤋᤠᤖᤥ॥ 12 ᤂᤧᤴ ᤕᤧᤴᤏᤥ ᤀᤛ᤻ᤛᤢᤖᤗᤠᤶ ᤏᤢ ᤔᤡᤛᤪᤒᤠ ᤕᤧᤰᤕᤰᤜᤠ᤹ᤗᤠᤶ. ᤜᤧᤰᤁᤩᤠᤱ ᤔᤡᤛᤪᤀᤠᤱ ᤁᤳᤏᤠ ᤕᤢᤑᤪᤣᤋᤡᤛ ᤘᤜ᤺ᤱ ᤌᤠᤖᤡᤰᤐᤠ ᤘᤖ᤺ᤱᤅᤠᤱ ᤁᤳᤏᤠ ᤏᤢ ᤘᤖ᤺ᤱ ᤌᤠᤖᤡᤰᤐᤠ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱᤗᤠᤶ ᤌᤧᤃᤢ ᤔᤠᤱᤘᤠ ᤌᤠᤖᤡᤰᤐᤠ ᤔᤏᤠᤜᤠ᤹ ᤂᤡᤏᤡ᤹ᤀᤥ ᤔᤧᤏᤢ᤺ᤱ ᤔᤧᤍᤠᤖᤥ॥ 13 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤈᤣᤴ ᤔᤧᤕᤢᤰᤋᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤔᤢᤖᤧ᤺ᤰ ᤂᤧᤖᤧ᤺ᤰ ᤐᤥᤱᤗᤥ॥ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤗᤢᤱᤔᤠ᤹ ᤋᤢᤰᤋᤢ 14 ᤕᤜᤘᤣ ᤍᤠᤱᤒᤠᤀᤣ. ᤂᤧᤏᤧ᤹ ᤁᤧᤗᤰᤂᤥᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤋᤰᤁᤠ᤺ᤳᤏᤢ ᤁᤳᤋᤧᤛᤧ᤹ᤀᤥ॥ ᤀᤠᤏᤡᤃᤣ ᤁᤒᤪᤡᤱ ᤐᤡᤛᤠᤱ ᤆᤠᤖᤠᤶᤔᤠᤍᤧᤴᤜᤠ᤹ ᤏᤧᤖᤥ. ᤁᤖ ᤋᤠᤶᤓᤢᤱᤅᤥ ᤀᤠᤏᤡᤃᤣ ᤛᤧᤖᤡᤃᤧᤀᤠᤱ ᤕᤢᤅᤡᤃᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤒᤠᤛᤠᤏ ᤏᤢ ᤃᤡᤗᤠᤍᤀᤥ ᤀᤠᤍᤣ᤹ᤖᤧ᤹ᤀᤥ. ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣ ᤋᤃᤡ ᤜᤧᤰᤁᤣ ᤀᤠᤏᤡᤃᤣ ᤆᤠᤖᤠᤶᤔᤠᤍᤧᤴᤜᤠ᤹ ᤂᤥᤛᤢᤶᤒᤧᤖᤖᤥ॥ 15 “ᤔᤡᤛᤪᤗᤠᤶ ᤁᤧᤗ᤺ᤴᤍᤡ ᤁᤧᤓᤧᤖᤡᤒᤠ ᤕᤧᤴᤜᤠ᤹ ᤜᤧᤰᤁᤣ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤀᤥ᤺ᤴᤎᤠᤰᤏᤡᤱᤗᤥ॥” 16 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡᤛᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤛᤠᤶᤜᤠ᤹ ᤂᤰᤐᤧᤳ ᤔᤧᤏᤠᤵᤋᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤀᤠᤵᤑᤣᤰ ᤜᤢᤰᤁᤡᤸᤗᤧ ᤔᤧᤍᤧᤵᤋᤢᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤰᤂᤥ᤹ᤒᤠᤴ ᤏᤠ ᤔᤧᤱᤄᤧᤶᤔᤏᤠ ᤐᤥᤱᤗᤥ॥ 17 ᤂᤧᤱᤜᤠ᤹ᤖᤧ ᤀᤛᤣ᤺ᤰ ᤁᤢᤀᤡᤛᤡᤰ. ᤂᤠᤶᤒᤠᤱᤅᤥ ᤁᤧᤀᤢ᤺ᤱᤛᤡᤱᤒᤠ ᤌᤰᤛᤠ ᤁᤢᤀᤡᤛᤡᤰ ᤂᤠᤶᤜᤡ᤺ᤰᤁᤡᤴ ᤔᤧᤗᤠᤃᤢᤖᤥ॥ ᤂᤧᤱᤜᤠ᤹ ᤂᤢᤴᤇᤡ᤹ ᤕᤠᤰᤏᤠᤍᤧᤴᤜᤠ᤹ᤀᤥᤗᤠᤶ ᤐᤃᤡ ᤔᤧᤃᤡᤖ ᤌᤧᤃᤰᤁᤰᤏᤠ ᤔᤧᤕᤱᤗ ᤔᤧᤗ᤺ᤴᤗᤥ. ᤕᤜᤘᤣ ᤍᤠᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤕᤱᤔᤠ ᤔᤧᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤧᤶᤃᤡᤖᤡᤖᤥ॥ 18 ᤂᤧᤏᤧ᤹ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤜᤠᤳ ᤘᤠᤀᤠᤱᤒᤣ᥅ ᤂᤧᤏᤧ᤹ᤃ ᤗᤠᤕᤥ ᤗᤠᤛᤥ᤺ᤳᤜᤠ᤹ ᤗᤧᤵᤔᤡ ᤁᤧᤈᤥᤃᤢᤖᤥ. ᤜᤧᤰᤁᤩᤠᤱ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤗᤧᤵᤔᤡ ᤁᤧᤒᤡᤖᤢᤛᤡᤖᤥ॥ ᤂᤧᤏᤧ᤹ ᤛᤍᤠᤍᤡᤱ ᤌᤠᤖᤡᤰ ᤁᤧᤛᤡᤰ ᤔᤧᤒᤥ᤺ᤰᤏᤧᤴᤗᤥ. ᤁᤖ ᤀᤠᤏᤡᤃᤣ ᤗᤢᤱᤔᤠ᤹ ᤋᤢᤰᤔᤠᤖᤧ ᤗᤠᤃᤡ ᤁᤧᤏᤡᤱᤘᤠ᤹ ᤋᤠᤖᤥ॥ 19 ᤂᤧᤏᤧ᤹ ᤕᤠᤶᤔᤥ ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤗᤥ. ᤂᤧᤏᤧ᤹ ᤀᤠᤏᤡᤃᤣ ᤗᤠᤕᤥᤜᤠ᤹ ᤁᤧᤗᤠᤱᤅᤡᤸᤗᤧ ᤁᤧᤍᤥ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤏᤡᤃᤣ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤅᤥ ᤗᤠᤵᤁᤧᤓᤢᤛᤢ ᤁᤧᤃᤣ᤺ᤳᤋᤢᤖᤥ॥ 20 ᤂᤧᤏᤧ᤹ ᤕᤠᤁᤢᤒᤧᤴᤏᤢ ᤛᤧᤰᤂᤠᤒᤠᤀᤣ ᤁᤧᤈᤥ᤺ᤰᤗᤥ ᤜᤧᤰᤁᤩᤠᤱ ᤀᤢᤴᤇᤥᤴ ᤂᤧᤏᤧ᤹ ᤔᤠᤱᤜᤧᤰ ᤁᤧᤈᤥᤃᤢᤀᤠᤱ ᤀᤠᤏᤡᤃᤣ ᤐᤠᤎᤧᤒᤠᤜᤠ᤹ᤏᤢ ᤔᤠᤱᤜᤢᤵ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤒᤪᤠᤜᤠᤔᤧᤴ ᤗᤢᤱᤔᤠ᤹ ᤁᤧᤍᤢᤰᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.