ᤔᤡᤁᤠ 6 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤛᤠᤶᤍᤡᤱ ᤐᤡᤖᤢ

¹ ᤕᤜᤘᤣ ᤍᤠᤱᤒᤧᤸᤗᤧ ᤌᤣ ᤐᤠ᤺ᤳᤋᤢ᤹. ᤂᤧᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤥ— “ᤂᤧᤏᤧ᤹ ᤀᤡᤛᤪᤠᤀᤡᤗᤧᤴ ᤐᤥᤃᤧ᤹ᤀᤠᤱ ᤕᤧᤒᤧ᤹ᤀᤥ. ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤋᤃᤡ ᤂᤧᤏᤧ᤹ ᤁᤧᤗᤢᤱᤜᤠᤴ ᤐᤠ᤺ᤴᤜᤠ᤹ ᤋᤥ᤺ᤴᤍᤧ᤹ᤀᤥ. ᤜᤧᤰᤁᤩᤠᤱ ᤁᤧᤒᤠ᤺ᤳᤋᤢᤒᤠᤴ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤂᤧᤵᤛᤢᤖᤖᤥ॥

² “ᤁᤥ᤺ᤰᤔᤠ ᤑᤠᤱᤈᤱᤛᤣ. ᤂᤠᤶᤒᤣ᤺ᤰᤔᤧᤸᤗᤧ ᤏᤢᤵᤔᤧᤴᤍᤡᤱ ᤁᤢᤒᤢᤱᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤠᤵᤋᤡ᤺ᤰᤁᤡᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤗᤢᤱᤜᤠᤴ ᤐᤠ᤺ᤴᤜᤠ᤹ ᤁᤳᤋᤢᤖᤥ. ᤂᤢᤏᤧ᤹ ᤀᤡᤛᤪᤠᤀᤡᤗᤧᤴ ᤀᤠᤵᤋᤡᤰ ᤐᤠᤴ ᤌᤡᤰᤋᤢᤖ ᤐᤳᤗᤥ॥

³ “ᤀᤠᤔᤏᤠᤛᤣ. ᤀᤠᤱᤃᤠ᤹ ᤂᤡᤏᤡ᤹ ᤌᤣ ᤔᤧᤳᤏᤡᤱᤒᤣ᥅ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤰ ᤁᤢ᤺ᤳᤏᤡᤱᤅᤠᤱ ᤘᤠ᤹ᤒᤣ᥅ ᤀᤠᤱᤃᤠ᤹ ᤕᤠᤵᤔᤡ ᤏᤢᤃᤵ ᤀᤠᤒᤡᤖᤧᤶᤔᤧ᤹ᤀᤥ॥

⁴ ᤀᤠᤱᤃᤠ᤹ᤃ ᤔᤡᤛᤪ ᤗᤠᤈᤣ᤹ᤗᤠᤶ ᤗ᤺ᤳᤏᤡᤱ ᤌᤠᤰᤏᤡᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤔᤧᤸᤗᤢᤱ ᤜᤢᤅᤢᤱᤅᤠᤱ ᤕᤥᤰ ᤗᤠᤈᤣ᤹ᤗᤠᤶ ᤂᤡᤏᤡ᤹ ᤌᤧ᤹ᤏᤡᤱᤗᤥ॥ ᤂᤡᤏᤡ᤹ ᤗᤠᤶᤗᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤔᤥᤛᤠᤴ. ᤜᤠᤖᤢᤏᤧᤴ ᤏᤢ ᤔᤡᤖᤡᤕᤶᤔᤡᤴᤏᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤐᤠᤱᤄᤢᤱᤛᤡᤱᤗᤥ॥

⁵ ᤀᤠᤱᤃᤠ᤹ ᤀᤠᤔᤏᤠᤛᤣ. ᤔᤥᤀᤠᤒᤒᤠ ᤒᤠᤗᤠᤁ ᤜᤠᤱᤅᤡᤸᤗᤧ ᤌᤧᤔᤠ ᤛᤢᤈᤠᤐᤠᤴ ᤐᤠ᤺ᤳᤋᤢᤱᤀᤠᤱ ᤘᤕᤧᤒᤣ᥅ ᤜᤧᤰᤁᤩᤠᤱ ᤒᤀᤥᤖᤖᤧ ᤁᤢᤛ᤻ᤛᤠ ᤒᤠᤗᤠᤔᤖᤧ ᤂᤢᤏᤧ᤹ ᤌᤣ ᤏᤢᤃᤵ ᤐᤡᤖᤢᤒᤣ᥅ ᤂᤧᤴ ᤐᤠ᤺ᤴᤏᤡᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ ᤛᤡᤳᤋᤡᤔᤗᤠᤶ ᤃᤡᤗᤃᤠᤗ ᤌᤠᤖᤡᤰ ᤗᤠᤶᤍᤡᤰ ᤁᤧᤈᤥᤃᤡᤒᤠᤴ ᤂᤡᤏᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖᤧᤶᤔᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗᤖᤥ॥”

⁶ ᤌᤧᤔᤠᤴ ᤋᤣ᤹ᤖᤢᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤐᤣ᤺ᤰᤁᤠᤒᤣ᥅ ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤱᤃᤠ᤹ ᤀᤠᤰᤂᤣᤗ᤹ᤖᤡᤰ ᤛᤠᤶᤒᤥᤴᤏᤠᤱ ᤛᤧᤘᤠ ᤔᤧᤳᤋᤢᤱᤒᤣ᥅ ᤌᤣ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤐᤡᤳᤛᤠᤳᤜᤠ᤹ ᤋᤠᤖᤢᤱᤛᤡᤱᤅᤠᤱ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤛᤓᤠ ᤋᤥ᤺ᤴᤇᤧ ᤂᤢᤏᤧ᤹ ᤁᤢᤍᤃᤡ ᤋᤠᤀᤠᤒᤡ᥅

⁷ ᤌᤣ ᤜᤧᤴᤇᤡᤱ ᤜᤧᤴᤇᤡᤱ ᤔᤧᤸᤗᤢᤰᤜᤠ᤹ ᤏᤢ ᤌᤡᤒᤥᤱ ᤜᤧᤴᤇᤡᤱ ᤏᤡ᤺ᤱᤃᤣ᤹ ᤘᤜ᤺ᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤴ ᤁᤢᤏᤡᤱᤘᤠ᤹ ᤋᤠᤀᤠᤱᤒᤡ᥅ ᤀᤠᤱᤃᤠ᤹ ᤀᤠᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤀᤠᤛ᤻ᤛᤠ ᤋᤢᤶᤒᤧᤴ ᤀᤠᤕᤠᤶᤛᤠᤶᤔᤥᤒᤠ ᤗᤠᤕᤥᤸᤗᤧ ᤗᤠᤃᤡ ᤀᤠᤎᤰᤁᤥᤏᤢ ᤁᤧᤗ᤺ᤶᤒᤠ ᤛᤠᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤱᤒᤡ᥅

⁸ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤳᤋᤡᤴ ᤐᤠ᤺ᤴᤏᤡᤴ ᤏᤢᤒᤠ ᤆᤥᤰ. ᤂᤢᤏᤧ᤹ ᤂᤧᤴ ᤂᤧᤏᤧ᤹ ᤀᤥᤛᤣ᤺ᤴᤃᤧᤎᤠᤰᤋᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ᤗᤠᤶ ᤌᤧᤔᤠ ᤂᤥᤔᤠ ᤏᤡᤱᤘᤠ᤹ ᤆᤥᤃᤢ᥅ ᤂᤧᤏᤧ᤹ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤧ᤹. ᤁᤶᤓᤪᤰ ᤏᤡᤱᤘᤠ᤹ ᤆᤥᤃᤢ᤹ ᤜᤧᤰᤁᤩᤠᤱ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤛᤧ᤹ᤀᤥ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏ᤺ᤶᤏ᤺ᤶᤔᤠᤱ ᤘᤕᤧ᤹ᤀᤥ॥

ᤀᤡᤛᤪᤠᤀᤡᤗᤖᤧ ᤁᤢᤀᤠᤵᤋᤡᤰ ᤏᤢ ᤂᤢᤶᤍᤡᤱ

⁹ ᤕᤜᤘᤣ ᤍᤠᤱᤒᤧᤴᤏᤢ ᤁᤡᤔᤠᤃ ᤛᤡᤰᤁᤢᤶ ᤏᤡᤱᤘᤠ᤹ ᤐᤠ᤺ᤴᤗᤥ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡᤖᤥ— “ᤕᤧᤰᤕᤰᤁᤥ ᤁᤧᤈᤢᤶᤒᤠ ᤔᤏᤠᤛᤣ. ᤂᤡᤏᤡ᤹ ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ.

¹⁰ ᤁᤢ᤹ᤀᤡᤃᤧᤓᤧᤶᤒᤠ ᤜᤡᤶᤛᤕᤱᤛᤣ. ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤗᤠᤶ ᤁᤧᤎᤃᤢᤶᤒᤠ ᤕᤠᤱᤛᤠᤁᤢᤴᤎᤣᤜᤠ᤹ ᤏᤢ ᤔᤧᤱᤃᤧᤵᤔᤏᤠᤒᤠ ᤂᤡᤏᤡ᤹ ᤁᤧᤃᤳᤋᤢᤶᤒᤠ ᤁᤢᤎᤠᤱᤔᤠᤜᤠ᤹ ᤁᤢᤛᤡ᤺ᤰᤔᤠᤜᤠ᤹ ᤌᤣ ᤀᤠᤱᤃᤠ᤹ ᤏᤡᤱᤘᤠ᤹ ᤑᤣ᤺ᤳᤇᤢᤱᤒᤠᤒᤡ᥅

¹¹ ᤔᤧᤱᤃᤧᤵᤔᤏᤠ ᤐᤠᤛᤠᤱᤃᤠ ᤀᤡᤃᤪ ᤀᤡᤱᤗᤧᤰᤐᤠ ᤁᤢᤎᤠᤱᤔᤠ ᤁᤢᤛᤡ᤺ᤰᤔᤠ ᤁᤧᤃᤵᤐᤠ ᤔᤏᤠᤴ ᤌᤣ ᤁᤢᤍᤥ᤺ᤵᤔᤠ ᤗᤣ᤺ᤳᤋᤢᤱᤒᤡ᥅

¹² ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤔᤏᤠᤜᤠ᤹ ᤂᤠᤷᤔᤧᤴᤍᤰ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤈᤥᤰᤗᤥ. ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤡᤱᤗᤧᤰᤐᤠ ᤐᤠᤴ ᤔᤧᤒᤠ᤺ᤳᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤴᤘᤠ᤹ᤔᤏᤠ ᤐᤠᤴ ᤔᤧᤒᤠ᤺ᤳᤋᤢᤖᤥ॥

¹³ “ᤁᤸᤗᤧᤆᤥᤃᤢᤸᤗᤧ. ᤁᤧᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤧᤱᤔᤠ ᤜᤣ᤺ᤰᤏᤧᤀᤠᤱ ᤘᤠ᤹ᤖᤥ॥

¹⁴ ᤂᤧᤏᤧ᤹ ᤆᤠᤔᤠᤃ ᤁᤧᤈᤖᤥ. ᤁᤖ ᤁᤧᤛᤡᤰ ᤔᤧᤀᤣ᤺ᤵᤋᤢᤴᤗᤥ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤁᤧᤛᤠᤵᤐᤥ᤺ᤰᤁᤧᤴ ᤔᤧᤄᤠᤏᤧᤴᤗᤥ॥ ᤕᤠᤱᤛᤠᤁᤢᤴᤎᤣᤴ ᤕᤠᤱᤃ ᤁᤧᤄᤥ᤺ᤳᤋᤢ᤹ ᤁᤖ ᤁᤧᤴᤍᤠᤱᤄᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤍᤠᤱᤄᤢ ᤁᤧᤃᤳᤋᤢᤒᤠᤴ ᤀᤠᤱᤃᤠ᤹ ᤋᤠᤓᤣ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤱ ᤐᤡᤏᤧᤖᤥ॥

¹⁵ ᤂᤧᤏᤧ᤹ ᤐᤥᤃᤢᤃᤧᤴ ᤁᤢᤈᤠ ᤗᤣ᤺ᤵᤔᤠᤃ ᤁᤧᤗᤣ᤺ᤳᤋᤢᤖᤥ ᤁᤖ ᤂᤧᤸᤗᤧ ᤁᤢᤈᤠ᤹ᤀᤡᤴ ᤁᤧᤴᤇᤢᤵᤛᤢᤴᤗᤥ. ᤂᤧᤏᤧ᤹ ᤆᤤᤋᤢᤏ ᤏᤡ᤺ᤱᤃᤣ᤹ ᤕᤢᤔᤠᤃ ᤁᤧᤕᤢᤛᤢᤖᤥ ᤁᤖ ᤁᤧᤎᤰᤁᤥ ᤜᤢ᤺ᤳᤇᤡᤱᤔᤠ ᤁᤧᤱᤄᤥᤛᤢᤴᤗᤥ. ᤂᤧᤏᤧ᤹ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤃ ᤁᤧᤀᤣ᤺ᤵᤛᤢᤖᤥ ᤁᤖ ᤆᤧᤸᤗᤧᤰᤛᤣ᤹ ᤌᤡᤴ ᤌᤢᤱᤔᤠ ᤁᤧᤱᤄᤥᤛᤢᤴᤗᤥ॥

¹⁶ ᤂᤧᤏᤧ᤹ ᤀᤥᤔᤪᤡᤖᤧ ᤁᤢᤎᤡᤶᤜᤠ᤹ ᤏᤢ ᤀᤠᤜᤠᤒᤖᤧ ᤁᤧᤖᤧᤰ ᤁᤢᤕᤠ᤺ᤶᤒᤰᤜᤠ᤹ ᤂᤧᤏᤧ᤹ ᤁᤧᤀᤡ᤺ᤳᤋᤢ ᤁᤧᤏᤠ᤺ᤳᤋᤢᤀᤠᤱ ᤁᤧᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤌᤡᤶᤜᤠ᤹ ᤂᤧᤏᤧ᤹ ᤁᤧᤍᤡᤶᤍᤢ ᤁᤧᤏᤠ᤺ᤳᤋᤢᤀᤠᤱ ᤁᤧᤘᤠ᤹ᤖᤥ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤔᤧᤱᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤆᤥᤃᤢᤱᤛᤡᤱᤗᤥ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤵᤐᤠᤴ ᤂᤧᤏᤧ᤹ ᤏᤠᤛᤡᤌ᤺ᤵᤔᤠ ᤁᤧᤒᤥᤱᤒᤠ ᤐᤥᤱᤗᤥ॥”