ᤔᤡᤁᤠ 5 - LIFOTNT

ᤒᤣᤌᤗᤧᤜᤧᤔᤗᤠᤶ ᤁᤧᤍᤠᤒᤠ ᤕᤢᤰᤛᤠᤒᤠ

¹ ᤌᤰᤛᤢᤒᤠ ᤁᤧᤃᤵᤐᤠ ᤕᤧᤰᤕᤰᤁᤣ. ᤁᤧᤎᤰᤛᤢᤒᤠ ᤋᤢᤖᤠᤜᤠ᤹ ᤛᤢᤵᤛᤧᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤁᤒᤪᤡᤱ ᤀᤠᤶᤃᤒᤧᤀᤠᤱ ᤀᤠᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤕᤢᤰᤛᤠᤒᤧᤴ ᤁᤢᤏᤧᤍᤧᤱᤒᤥ ᤋᤰᤁᤠ᤺ᤳᤋᤡᤸᤗᤧ ᤔᤧᤜᤡᤵᤋᤢᤖᤥ॥

² “ᤁᤖ ᤒᤣᤌᤗᤧᤜᤧᤔ ᤀᤣᤐᤪᤠᤋᤠᤀᤣ. ᤂᤧᤏᤧ᤹ ᤕᤜᤢᤍᤠ ᤌᤠ᤺ᤰᤜᤠ᤹ᤀᤥ ᤆᤢᤰᤛᤠ ᤁᤧᤈᤥ᤺ᤰᤛᤠᤱ. ᤂᤧᤏᤧ᤹ᤗᤠᤶ ᤀᤠᤗᤠᤃᤡ ᤔᤏᤠᤎᤡᤰ ᤗ᤺ᤴᤗᤥ. ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤕᤢᤰᤛᤠᤒᤠ ᤐᤥᤱᤗᤥ. ᤂᤢᤏᤧ᤹ ᤁᤢᤜᤣ᤺ᤰᤛᤡᤱᤔᤠᤱᤃ ᤀᤢᤴᤇᤥ᤺ᤴᤒᤠ ᤕᤧᤶᤔᤠᤱᤎᤥ. ᤀᤢᤏᤠᤜᤢᤖᤡᤒᤠ ᤕᤧᤶᤔᤠᤱᤎᤥᤀᤣ ᤘᤠ᤹ᤖᤥ॥”

³ ᤁᤸᤗᤧᤆᤥᤃᤢᤸᤗᤧ ᤛᤠᤃᤵᤔᤠ ᤛᤠᤘᤠ᤺ᤴᤍᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤛᤠᤔᤧᤃᤳᤏᤧᤴᤗ ᤌᤠᤖᤡᤰ ᤀᤡᤛᤪᤠᤀᤡᤗᤧᤴ ᤔᤧᤏᤠ᤹ᤖᤢᤖᤥ ᤜᤧᤰᤁᤩᤠᤱ ᤁᤢᤶᤓᤢ᤹ ᤁᤢᤴᤛᤠ᤹ᤜᤠ᤹ ᤀᤡᤛᤪᤠᤀᤡᤗᤡᤜᤠ᤹ᤏᤢ ᤋᤱᤛᤧ ᤔᤧᤍᤠᤖᤥ॥

⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤥ ᤏᤢ ᤕᤜᤘᤣ ᤍᤠᤱᤒᤠ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤁᤢᤔᤡᤱᤅᤥ ᤂᤢᤏᤧ᤹ ᤕᤧᤵᤗᤥ॥ ᤜᤧᤰᤁᤩᤠᤱ ᤁᤢᤔᤧᤸᤗᤢᤰᤜᤠ᤹ ᤁᤔᤢᤛᤡ ᤀᤥᤔᤧᤳᤋᤢᤛᤡᤖᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤕᤠᤀᤥ ᤌᤠᤖᤡᤰᤁᤣ ᤂᤢᤏᤧ᤹ ᤐᤕᤶ ᤕᤶᤒᤠ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤘᤠ᤹ᤖᤥ॥

⁵ ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤢ᤹ᤔᤠᤍᤠᤔᤠᤖᤧ ᤁᤢᤒᤢᤱ ᤐᤥᤱᤗᤥ॥ ᤀᤠᤸᤗ ᤀᤛ᤻ᤛᤢᤖᤡᤜᤠ᤹ᤖᤧ ᤀᤠᤏᤡ᤹ ᤗᤠᤈᤣᤴ ᤔᤧᤗᤡᤛᤢ ᤔᤧᤍᤠᤖᤢᤸᤗᤧ ᤜᤧᤰᤁᤩᤠᤱ ᤀᤠᤏᤡ᤹ ᤌᤣ᤺ᤰᤛᤡᤱᤔᤠ ᤜᤠᤱᤕᤰᤜᤠ᤹ ᤔᤧᤗᤢ᤺ᤴᤍᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤏᤢᤛᤡ ᤔᤧᤸᤗᤢᤰᤁᤶᤒᤠᤜᤠ᤹ ᤀᤡᤃᤪ ᤕᤧᤳᤇᤡ ᤗᤠᤶᤗᤥᤒᤠᤜᤠ᤹ ᤀᤠᤏᤡ᤹ ᤀᤠᤓᤥ᤺ᤰᤂᤢᤶᤛᤡᤶᤗᤥ॥

ᤛᤧᤴᤗᤵ ᤏᤢ ᤂᤢᤶᤍᤡᤱ

⁶ ᤂᤧᤴ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤀᤛ᤻ᤛᤢᤖ ᤗᤠᤈᤣᤴ ᤋᤠᤓᤣ᤺ᤸᤗᤧ ᤕᤢᤰ ᤔᤧᤈᤥᤃᤢᤖᤥ ᤏᤡᤔᤪᤥᤍ ᤗᤠᤈᤣᤴ ᤑᤡ᤺ᤱᤔᤏᤠᤒᤠ ᤋᤠᤓᤣ᤺ᤸᤗᤧ ᤔᤧᤕᤢᤰᤋᤢᤖᤥ॥ ᤀᤛ᤻ᤛᤢᤖᤡᤜᤠ᤹ ᤀᤠᤏᤡ᤹ ᤗᤠᤈᤣ᤹ᤀᤥ ᤌᤱ ᤆᤥ᤺ᤰᤛᤧ ᤔᤧᤓᤧᤴᤏᤡᤸᤗᤧ ᤜᤧᤰᤁᤩᤠᤱ ᤀᤠᤏᤡ᤹ ᤀᤡ᤺ᤴᤍᤥᤜᤠ᤹ ᤂᤧᤱᤜᤠ᤹ᤖᤧ ᤔᤧᤍᤥ᤹ᤖᤢᤸᤗᤧ ᤀᤠᤏᤡ᤹ ᤕᤢᤰᤛᤠᤒᤧᤸᤗᤧ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤋᤠᤱᤀᤠᤛᤧ᤺ᤵᤗᤥ॥

⁷ ᤕᤠᤁᤢᤒᤖᤧ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤁᤢᤔᤏᤠᤜᤠ᤹ᤃ ᤕᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤎᤠᤒᤠ ᤛᤣ᤺ᤰᤘᤠ ᤏᤢ ᤕᤠ᤺ᤴᤜᤠ᤹ᤀᤥ ᤁᤧᤎᤠᤒᤠ ᤘᤜᤡᤳ ᤜᤧᤰᤁᤣ ᤔᤧᤗ᤹ᤖᤥ. ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤀᤡᤃᤪ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤠᤱ ᤔᤧᤴᤜᤠᤱᤄᤢᤛᤡᤴᤗᤥ॥

⁸ ᤕᤠᤁᤢᤒᤖᤧ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤁᤢᤔᤏᤠᤜᤠ᤹ᤃ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤘᤠ᤹ᤖᤥ. ᤋᤠᤶᤓᤢᤱᤅᤥᤒᤠ ᤌᤰᤛᤠᤜᤠ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤂᤡᤖᤡᤱᤒᤠ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤗᤢᤶᤔᤥ ᤁᤧᤘᤠ᤹ᤒᤠ ᤂᤡᤖᤡᤱᤒᤠ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤂᤧᤸᤗᤧ ᤀᤢ᤺ᤰᤂᤢ ᤌᤧᤔᤢᤛᤡᤖ ᤑᤢᤕᤢᤛᤡᤖ ᤗᤠᤱᤄᤣ᤺ᤰᤗᤥ. ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤛᤧᤶᤔᤠ ᤔᤧᤛᤢᤰᤋᤢᤛᤡᤴᤗᤥ॥

⁹ ᤂᤡᤏᤡ᤹ ᤏᤡᤱᤔᤡᤜᤠ᤹ ᤏᤠ᤺ᤶᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤜᤢᤰᤁᤡᤸᤗᤧ ᤁᤧᤛᤠ᤺ᤵᤛᤢᤶᤛᤡᤶᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤏᤡᤱᤔᤡᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤀᤠᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤀᤴᤜᤠ᤹ ᤏᤢ ᤀᤴᤗᤠᤎᤠᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱᤅᤠᤱ ᤕᤢᤔᤪᤧᤰ ᤔᤧᤰᤂᤢᤱᤛᤡᤱᤗᤥ.

¹¹ ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤕᤧᤰᤕᤰᤜᤠ᤹ ᤗᤢ᤺ᤴᤍᤢᤱᤍᤣᤛᤢᤱᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤜᤠᤱᤕᤰᤜᤠ᤹ ᤕᤴᤇᤢᤱ ᤐᤡᤏᤡᤱᤗᤥ॥

¹² ᤂᤡᤏᤡ᤹ ᤛᤠᤶᤔᤠᤱ ᤔᤢᤖᤠᤔᤧᤵᤔᤠ ᤔᤢ᤺ᤴᤎᤢᤶᤜᤠ᤹ ᤏᤢᤵᤛᤢᤱᤗᤥ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤛᤠᤶ ᤁᤧᤶᤔᤢ᤺ᤳᤋᤢᤶᤔᤡᤴᤗᤥ॥

¹³ ᤂᤡᤏᤡ᤹ ᤗᤢᤶᤔᤥᤗᤠᤶ ᤗᤰᤔᤏᤠᤒᤠ ᤏᤠᤘᤠᤀᤡᤳᤗᤠᤜᤠ᤹ ᤏᤢ ᤛᤣᤛᤣ ᤗᤢᤱᤜᤠ᤹ ᤀᤠᤱᤃᤠ᤹ ᤂᤠᤵᤐᤢᤌᤩ᤺ᤱ ᤕ᤺ᤵᤛᤢᤱ ᤐᤡᤏᤡᤱᤗᤥ॥ ᤂᤡᤏᤡ᤹ ᤀᤠᤒᤠᤅᤣ ᤜᤢᤰᤁᤡᤸᤗᤧ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ ᤋᤃᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤧᤘᤠ ᤁᤧᤴᤈᤥᤃᤡᤴᤗᤥ॥

¹⁴ ᤂᤡᤏᤡ᤹ ᤗᤢᤶᤔᤥᤗᤠᤶ ᤀᤛᤣᤖᤠ ᤔᤠᤱ ᤏᤠᤘᤠᤀᤡᤳᤗᤠᤜᤠ᤹ ᤀᤠᤱᤃᤠ᤹ ᤀᤠ᤺ᤰᤂᤢᤱᤅᤠᤱ ᤗᤠᤵᤑᤢᤛᤢᤱ ᤐᤡᤏᤡᤱᤗᤥ. ᤜᤧᤰᤁᤩᤠᤱ ᤂᤡᤏᤡ᤹ ᤕᤧᤰᤕᤰᤜᤠ᤹ ᤗᤢ᤺ᤴᤍᤢᤱ ᤐᤡᤏᤡᤱᤗᤥ॥

¹⁵ ᤀᤠᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤛᤢᤘᤠᤱᤜᤠ᤹ᤀᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥”