ᤔᤡᤁᤠ 4 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠ

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤁᤧᤕᤢᤱᤒᤠ ᤁᤥ᤺ᤰᤔᤠᤱᤃ ᤁᤧᤍᤠᤒᤠ ᤕᤧᤴᤜᤠ᤹ᤀᤥ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ᤏᤢ᤺ᤸᤗᤧ ᤁᤣ᤺ᤶᤒᤠ ᤐᤥᤱᤅᤠᤱ ᤕᤢᤱᤛᤡᤱᤗᤥ. ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ᤏᤢ᤺ᤸᤗᤧ ᤆᤴᤈᤶᤒᤠ ᤐᤥᤱᤗᤥ. ᤂᤶᤓᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤵᤔᤥ ᤔᤧᤗᤢᤶᤛᤡᤱ ᤔᤧᤍᤠᤖᤥ॥

² ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤍᤠᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤋᤩᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤴ ᤗᤡᤅᤢᤶᤗᤥ. ᤜᤧᤰᤁᤩᤠᤱ ᤕᤠᤁᤢᤒᤖᤧ ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥ ᤐᤣᤃᤡᤖᤥ॥ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤀᤠᤏᤡ᤹ ᤀᤠᤜᤢ᤹ᤖᤥ. ᤜᤧᤰᤁᤣᤗ᤹ᤖᤡᤰ ᤀᤠᤏᤡ᤹ ᤂᤢᤏᤧ᤹ ᤁᤢᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤀᤠᤛᤢᤰᤗᤖᤥ॥” ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤛᤡᤕᤥᤏᤗᤠᤶ ᤋᤠᤖᤥ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤕᤖᤢᤛᤗᤧᤔᤗᤠᤶ ᤗ᤺ᤴᤗᤥ॥

³ ᤂᤢᤏᤧ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤢᤖᤥ. ᤜᤧᤰᤁᤩᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠ ᤌᤠᤖᤡᤰᤐᤠ ᤁᤧᤎᤢᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤂᤧᤔᤠ᤹ ᤐᤠ᤺ᤴᤜᤠ᤹ ᤁᤢᤏᤢᤵᤔᤠ ᤂᤠᤛᤧᤴ ᤏᤡ᤺ᤴᤎᤥ ᤆᤥᤃᤢ ᤐᤡᤖᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣᤜᤠ᤹ ᤔᤧᤎᤃᤢᤀᤠᤱ ᤆᤢᤃᤧᤱ ᤔᤧᤈᤥᤃᤢᤖᤥ ᤂᤢᤴᤇᤡ᤹ ᤗᤠ᤺ᤰᤜᤠ᤹ ᤔᤧᤓᤧ᤺ᤳᤇᤢᤀᤠᤱ ᤁᤢᤈᤠ ᤛᤡᤵᤔᤠ ᤁᤠᤳᤆᤩᤠ ᤔᤧᤎᤃᤢᤖᤥ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤠᤓᤣ ᤔᤧᤴᤕᤠᤱᤛᤡᤱᤅᤡᤴᤗᤥ. ᤂᤧᤱᤜᤠ᤹ᤖᤧ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤌᤱ ᤆᤥ᤺ᤰᤔᤠ ᤔᤧᤴᤜᤢ᤹ᤛᤡᤱᤅᤡᤴᤗᤥ॥

⁴ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤆᤧᤸᤗᤧᤰᤛᤣ᤺ᤸᤗᤧ ᤁᤢᤒᤢᤱᤅᤥ ᤜᤧᤰᤁᤩᤠᤱ ᤂᤢᤴᤇᤡ᤹ ᤐ᤺ᤳᤇᤣ᤹ ᤐᤢᤱ ᤛᤡᤃᤠᤱ ᤔᤧᤕᤢᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤳᤋᤡᤸᤗᤧᤀᤠᤱ ᤕᤱᤔᤠ ᤔᤧᤛᤧᤖᤢᤛᤡᤴᤗᤥ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤛᤠᤒᤠ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥

⁵ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤠᤱᤜᤠ᤹ ᤔᤧᤏᤠ᤺ᤳᤋᤢ ᤔᤧᤍᤡᤶᤍᤢᤛᤡᤛᤠᤱ. ᤀᤠᤏᤡᤃᤧᤃ ᤀᤠᤓᤧᤸᤗᤧᤛᤠᤱ ᤕᤜᤘᤣ ᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤀᤠᤏᤡᤃᤣ ᤀᤡ᤺ᤳᤋᤢᤶᤒᤧ ᤏᤠ᤺ᤳᤋᤢᤶᤒᤧᤖᤥ॥

ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤗᤠᤈᤣ᤹ᤗᤠᤶ ᤀᤡᤛᤪᤠᤀᤡᤗᤡᤜᤠ᤹ ᤔᤧᤏᤢ᤺ᤱ

⁶ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤁᤢᤗᤠᤱ ᤁᤧᤛᤰᤐᤠᤜᤠ᤹ ᤛᤢᤵᤛᤢᤱᤛᤡᤱᤗᤥ. ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤏᤢ ᤔᤧᤖᤡᤱᤅᤥ ᤌᤠᤛᤢᤱᤛᤡᤱᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤕᤠᤶᤔᤥ ᤑᤢᤰᤂᤢᤱᤛᤡᤱᤗᤥ॥

⁷ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤗᤠᤱᤛᤰᤐᤠᤜᤠ᤹ ᤏᤢ ᤔᤠ᤺ᤱᤄᤠ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤛᤡᤒᤠᤜᤠ᤹ ᤔᤢᤰᤁᤧᤃᤢᤒᤠ ᤛᤢᤘᤠᤱ ᤆᤥᤃᤢᤱᤛᤡᤱᤗᤥ॥ ᤂᤧᤴ ᤕᤧᤴᤏᤠᤱᤎᤥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤡᤕᤥᤏ ᤁᤥ᤺ᤰᤔᤠᤀᤥ ᤛᤍᤠᤍᤡᤱ ᤜᤠᤱᤕᤢᤰ ᤆᤥᤃᤢᤖᤥ॥

⁸ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠ. ᤕᤖᤢᤛᤗᤧ᤺ᤶᤔᤣ. ᤂᤧᤏᤧ᤹ᤗᤠᤶ ᤕᤠᤶᤔᤥ ᤌᤡᤰᤗᤧᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤀᤥᤔᤧᤳᤋᤢᤛᤡᤖᤥ॥ ᤋᤃᤡᤒᤠ ᤜᤠᤱᤈᤢᤶᤔᤡᤴ ᤂᤧᤏᤧ᤹ ᤕᤠᤶᤔᤥ ᤁᤧᤶᤏᤢ᤺ᤰ ᤁᤧᤶᤒᤡᤖᤥ. ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤥ ᤜᤠᤱ ᤋᤠᤰᤑᤠ᤺ᤴ ᤕᤠᤶᤔᤥ ᤋᤠᤖᤥ॥

⁹ “ᤀᤠᤸᤗ ᤂᤧᤏᤧ᤹ ᤌᤣᤀᤠᤱ ᤁᤧᤓᤡ᤺ᤰᤗ ᤁᤧᤜᤠ᤺ᤵᤐᤠᤒᤣ᥅ ᤌᤣ ᤂᤧᤏᤧ᤹ ᤜᤠᤱ ᤁᤧᤱᤃᤳᤋᤢᤶᤒᤡ᥅ ᤌᤣ ᤂᤧᤏᤧ᤹ ᤁᤧᤛᤢᤈᤠᤍᤠᤱᤒᤧᤴ ᤔᤧᤃᤧᤒᤡ᥅ ᤂᤧᤸᤗᤧᤆᤥᤃᤢᤸᤗᤧ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤂᤧᤏᤧ᤹ ᤛᤠᤃᤵᤔᤠ ᤋᤢᤱᤅᤡᤸᤗᤧ ᤁᤧᤍᤧᤶᤛᤧᤀᤠᤱ ᤘᤠ᤹ᤒᤡ᥅

¹⁰ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛᤠᤃᤵᤔᤠ ᤋᤢᤱᤅᤡᤸᤗᤧ ᤋᤖᤢᤔᤠ ᤔᤧᤴᤇᤢᤔᤠᤴ ᤜᤧᤰᤁᤣ ᤂᤧᤏᤧ᤹ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤗ ᤋᤢᤰᤔᤧᤸᤗᤧ ᤁᤧᤓᤡ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤴ ᤕᤧᤰᤕᤰᤁᤡᤴ ᤗᤧᤵᤔᤠᤀᤣ ᤐᤥᤱᤗᤥ ᤜᤧᤰᤁᤩᤠᤱ ᤋᤠᤵᤔᤧᤖᤠᤍᤧᤴᤏᤥ ᤕᤢᤱᤔᤠ ᤐᤥᤱᤗᤥ॥ ᤀᤠᤸᤗ ᤂᤧᤏᤧ᤹ ᤒᤣᤒᤡᤗᤥᤏ ᤐᤣ᤺ᤰᤔᤠ ᤐᤥᤱᤗᤥ. ᤁᤖ ᤂᤧᤏᤧ᤹ ᤂᤧᤵᤔᤥ ᤋᤠᤱᤁᤧᤶᤛᤧ᤺ᤵᤗᤥ॥ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤔᤥᤀᤣ ᤂᤧᤏᤧ᤹ ᤁᤧᤎᤧ᤹ᤖᤥ॥

¹¹ “ᤁᤖ ᤀᤠᤸᤗ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤕᤖᤢᤛᤗᤧ᤺ᤶᤔᤡᤴ ᤔᤧᤈᤡ᤺ᤴᤍᤢᤖᤖᤥ. ᤜᤧᤰᤁᤩᤠᤱ ᤀᤠᤱᤍᤡᤱ ᤁᤧᤗ᤹ᤒᤠ ᤔᤡᤰᤁᤡᤸᤗᤧ ᤛᤡᤕᤥᤏᤧᤴ ᤀᤥᤔᤧᤳᤋᤢᤶᤗᤥ॥’

¹² ᤁᤖ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤡᤱᤘᤠᤴ ᤔᤧᤴᤏᤡᤛᤢᤴᤗᤥ. ᤂᤧᤱᤜᤠ᤹ᤖᤧ ᤂᤢᤏᤧ᤹ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ. ᤆᤠᤎᤠᤶᤔᤠᤍᤧᤴᤏᤥ ᤆᤠᤎ᤺ᤱᤜᤠ᤹ ᤑᤢᤱᤔᤏᤠᤒᤠ ᤁᤢᤀᤡᤛᤡᤰ ᤂᤢᤏᤧ᤹ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡ ᤑᤠ᤹ᤀᤠᤱ ᤛᤢᤵᤛᤢᤛᤡᤖᤥ॥

¹³ ‘ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤐᤥᤃᤧ᤹ᤀᤠᤱ ᤆᤠᤎᤠᤵᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤑᤧᤴᤈᤣ᤹ ᤋᤠᤱᤜᤠ᤹ ᤐᤡᤏᤧᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤠᤛᤠ ᤗᤠᤱᤋᤥ᤹ᤓᤣᤳ ᤐᤡᤏᤧᤖᤥ. ᤜᤧᤰᤁᤩᤠᤱ ᤆᤠᤎᤠᤶᤔᤏᤠᤒᤠ ᤜᤧᤰᤁᤣ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤧᤎᤠᤵᤛᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤔᤧᤛᤢᤵᤛᤢᤒᤠ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤕᤜᤘᤣ ᤍᤠᤱᤒᤠᤀᤥ ᤁᤧᤍᤥ᤺ᤴᤍᤢᤖᤥ॥’”