ᤔᤡᤁᤠ 3 - LIFOTNT

ᤗᤠᤶᤗᤥᤒᤠᤜᤠ᤹ ᤐᤠ᤺ᤴ ᤔᤧᤔᤧᤳᤋᤢᤛᤡ

¹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱᤗᤥ. “ᤕᤠᤁᤢᤒᤖᤧ ᤁᤢᤗᤠᤶᤗᤥᤒᤠᤛᤣ. ᤀᤡᤛᤪᤠᤀᤡᤗᤡ ᤜᤡᤶᤛᤕᤱᤒᤠ ᤕᤢᤰᤛᤠᤒᤠᤛᤣ. ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ. ᤌᤣ ᤂᤠᤛᤧᤴᤏᤡᤴ ᤂᤡᤏᤡ᤹ ᤗᤧᤔᤠ ᤔᤧᤒᤥᤱᤏᤧᤴᤏᤠᤱᤒᤡ᥅

² ᤂᤡᤏᤡ᤹ᤃ ᤏᤢᤒᤠ ᤐᤠ᤺ᤴᤏᤡᤴ ᤁᤧᤈᤡ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤂᤡᤏᤡ᤹ ᤛᤡᤖᤠ᤹ᤌᤠᤱᤗᤥ. ᤂᤡᤏᤡ᤹ᤃ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤥᤖᤡᤰᤐᤠᤴ ᤁᤧᤎᤡᤰᤋᤢᤶᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤗᤠᤶ ᤏᤧᤰᤛᤠᤴ ᤁᤧᤎᤧ᤺ᤰᤂᤢᤶᤗᤥ॥

³ ᤂᤡᤏᤡ᤹ᤃ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤛᤠᤴ ᤁᤧᤈᤠᤶᤗᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤥᤖᤡᤰᤐᤠᤴ ᤁᤧᤎᤡᤰᤋᤢᤶᤗᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤧᤵᤐᤠᤴ ᤑᤸᤗᤠᤰ ᤑᤸᤗᤠᤰ ᤁᤧᤀᤧᤰᤂᤢᤶᤗᤥ ᤂᤶᤓᤩᤠᤱ ᤂᤵᤐᤩᤠᤀᤥ ᤌᤧᤰᤔᤠ ᤏᤢ ᤑᤛᤡᤀᤥ ᤌᤥ᤺ᤰᤔᤠ ᤛᤠᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤁᤢᤈᤰᤋᤠ ᤁᤢᤗᤧᤶᤍᤠ ᤁᤧᤈᤥᤃᤢᤶᤛᤡᤶᤗᤥ॥

⁴ ᤂᤧᤒᤩᤠᤱ ᤂᤡᤏᤡ᤹ ᤁᤢᤓᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤁᤧᤓᤠᤰᤋᤢᤶᤗᤥ. ᤁᤖ ᤂᤢᤏᤧ᤹ ᤂᤡᤏᤡ᤹ ᤏᤢᤃᤵ ᤁᤧᤶᤒᤡᤖᤡᤴᤗᤥ॥ ᤂᤡᤏᤡ᤹ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤕᤧᤶᤔᤥ ᤂᤢᤏᤧ᤹ ᤁᤢᤏᤠᤖᤠᤴ ᤂᤡᤏᤡ᤹ᤗᤠᤶ ᤆᤡᤰᤂᤢᤖᤥ॥”

⁵ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤋᤠᤵᤑᤧ᤺ᤶᤒᤠ ᤗᤠᤶᤔᤥ ᤗᤠᤱᤄᤣ᤺ᤰᤔᤠ ᤁᤧᤒᤠᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤢᤓᤠᤖᤧ ᤆᤠᤔᤠ ᤐᤡᤖᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤛᤏᤠᤖᤢᤱ ᤏᤢ᤹ᤔᤠᤍᤠᤔᤠ ᤀᤢᤘᤠ ᤔᤧᤈᤥᤃᤢᤖᤥ. ᤂᤧᤸᤗᤧ ᤂᤧᤱᤜᤠ᤹ ᤆᤠᤔᤠ ᤔᤧᤒᤡᤖᤢᤛᤡᤴᤏᤧᤓᤃᤪ. ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤒᤥᤱᤗᤥ॥

⁶ ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤥ ᤛᤢᤑᤥ ᤔᤣ᤺ᤴᤏᤣᤒᤠ ᤛᤧᤴᤍᤡᤰ ᤋᤠᤖᤥ. ᤂᤠᤔᤠᤰᤔᤠ ᤐᤥᤱ᤹. ᤁᤖ ᤂᤡᤏᤡ᤹ ᤌᤢᤶᤕᤠ ᤀᤡᤔᤠ ᤁᤧᤱᤄᤥᤛᤢᤶᤔᤡᤴᤗᤥ॥ ᤔᤠᤱᤏᤡᤱᤘᤠ᤹ᤐᤠ᤺ᤏ ᤁᤧᤒᤠ᤺ᤵᤐᤠᤜᤠ᤹ᤖᤧ ᤗᤠᤃᤡ ᤏᤠᤶᤎᤠᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤃᤡ ᤗᤧᤴᤍᤡᤰ ᤂᤠᤎᤠᤶᤗᤥ॥

⁷ ᤛᤢᤑᤥ ᤁᤧᤏᤡᤒᤠᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤜᤧᤰᤁᤩᤠᤱ ᤌᤢᤶᤕᤠ ᤁᤧᤀᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤛᤠᤶᤎᤠᤖᤥ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤔᤢᤖᤠᤴ ᤔᤧᤍᤧᤵᤋᤢᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤂᤧᤱᤜᤠ᤹ᤖᤧ ᤏᤢᤃᤵ ᤔᤧᤱᤄᤥᤛᤢᤴᤗᤥ॥”

⁸ ᤁᤖ ᤀᤠᤱᤃᤠ᤹ᤃ ᤕᤠᤁᤢᤒᤧᤴ ᤁᤢᤓᤧᤴ ᤕᤠ᤺ᤶᤒᤰᤁᤡᤴ ᤔᤧᤵᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤁᤢᤗᤠᤕᤥᤴ ᤆᤧᤰᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤗᤠᤶ ᤔᤢᤰᤛᤠᤶ. ᤂᤠᤛᤧᤴ ᤏᤢ ᤔᤢᤰᤁᤡᤸᤗᤧ ᤀᤠᤱᤃᤠ᤹ ᤁᤢᤎᤡᤶ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

⁹ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤒᤠ ᤗᤠᤶᤗᤥᤒᤠᤛᤣ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤖᤧ ᤁᤢᤜᤡᤶᤛᤕᤱᤒᤠ ᤕᤢᤰᤛᤠᤒᤠᤛᤣ. ᤂᤡᤏᤡ᤹ ᤁᤴ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ. ᤂᤡᤏᤡ᤹ᤃ. ᤂᤠᤛᤧᤴᤏᤡᤴ ᤐᤈᤡᤳ ᤁᤧᤈᤡ᤺ᤳᤋᤢᤶᤗᤥ ᤜᤧᤰᤁᤩᤠᤱ ᤁᤧᤖᤧᤰ ᤁᤢᤍᤥ᤺ᤵᤔᤠ ᤐᤠ᤺ᤴᤜᤠ᤹ ᤐᤡᤷᤒᤣ᤺ᤶᤒᤠ ᤁᤧᤈᤥᤃᤢᤶᤗᤥ.

¹⁰ ᤂᤡᤏᤡ᤹ ᤔᤠᤰᤂᤡ᤹ ᤁᤧᤛᤧᤛᤢᤶᤔᤠᤱ ᤛᤡᤕᤥᤏᤧᤴ ᤁᤧᤈᤥᤃᤢᤶᤗᤥ. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰᤗᤠᤶ ᤕᤖᤢᤛᤗᤧ᤺ᤶᤔᤡᤴ ᤁᤧᤈᤥᤃᤢᤶᤗᤥ॥

¹¹ ᤂᤧᤵᤔᤥᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤛᤢᤖᤢᤳ ᤕᤠᤱᤗᤧ ᤗᤠᤃᤡ ᤂᤠᤛᤧᤴ ᤔᤧᤗᤥ᤺ᤴᤍᤢᤖᤥ. ᤂᤧᤵᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤠᤶᤕᤠᤰᤗᤧ ᤗᤠᤃᤡ ᤔᤧᤜᤢ᤹ᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤕᤠᤱᤗᤧ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ॥ ᤜᤧᤰᤁᤩᤠᤱᤛᤠᤱ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤔᤧᤄᤧ᤺ᤶᤛᤡᤱᤗᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. “ᤌᤧᤔᤠ ᤕᤜᤘᤣ ᤍᤠᤱᤒᤧᤴ ᤀᤠᤏᤡ᤹ ᤗᤢᤶᤔᤥ ᤔᤧᤘᤠ᤹ᤏᤧᤴᤏᤠᤱᤒᤡ᥅ ᤀᤠᤏᤡ᤹ᤀᤥ ᤌᤧᤔᤠᤀᤠᤱ ᤋᤠᤵᤑᤧ᤺ᤶᤒᤠ ᤐᤠᤴ ᤔᤧᤒᤥᤱᤏᤧᤴ ᤔᤧᤍᤠᤏᤧᤴᤗᤥ॥”

¹² ᤁᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧᤀᤣ ᤛᤡᤕᤥᤏᤧᤴ ᤀᤡᤰᤋᤠᤵ ᤌᤥᤱᤔᤏᤠᤒᤠ ᤜᤧᤰᤁᤣ ᤔᤧᤍᤥ᤺ᤰᤂᤢᤖᤥ. ᤕᤖᤢᤛᤗᤧ᤺ᤶᤔᤡᤱᤃ ᤗᤢᤱᤜᤠ᤹ ᤁᤧᤗᤢᤶᤛᤡᤱᤒᤠ ᤐᤥᤱᤗᤥ. ᤔᤠᤱᤜᤡᤶ ᤁᤧᤕᤢᤱᤒᤠ ᤁᤥ᤺ᤰᤔᤠᤴ ᤐᤥ᤺ᤰᤗᤠ ᤁᤧᤳᤋᤠᤱ ᤀᤢ᤺ᤰᤐᤧᤳ ᤋᤠᤶᤓᤢᤱ ᤐᤥᤱᤗᤥ॥