ᤔᤡᤁᤠ 2 - LIFOTNT

ᤔᤏᤠ ᤏᤡᤱᤛᤣᤰ ᤏᤢ ᤔᤠᤱ ᤏᤡᤱᤛᤣᤰ

¹ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤗᤠᤶ ᤁᤧᤃᤥ᤺ᤵᤐᤠᤜᤠ᤹ᤃ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ. ᤂᤧᤱᤜᤠ᤹ ᤀᤡᤵᤏᤠᤀᤥ ᤔᤧᤏᤧᤛᤡᤱᤅᤠᤱ ᤋᤠᤵᤑᤧ᤺ᤶᤒᤠ ᤆᤧᤶᤓᤴ ᤆᤥ᤺ᤰᤔᤠ ᤔᤧᤀᤡ᤺ᤳᤋᤢᤖᤥ᥄ ᤋᤠᤏᤠᤶ ᤂᤠᤀᤥ᤺ᤳᤏᤢ ᤔᤣ᤺ᤴᤏᤣ ᤂᤧᤱᤜᤠ᤹ᤖᤧ ᤂᤧᤴ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢ ᤔᤧᤍᤣᤛᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤂᤧᤱᤜᤠ᤹ᤖᤧ ᤔᤢᤰᤛᤠᤶ ᤔᤧᤃᤳᤋᤢᤖᤥ॥

² ᤂᤧᤱᤜᤠ᤹ᤖᤧ ᤀᤡᤰᤋᤠᤵᤜᤠ᤹ ᤔᤡᤰᤔᤧᤃᤣ᤺ᤳᤋᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤀᤡᤰᤋᤠᤵᤜᤠ᤹ ᤔᤧᤏᤠᤵᤋᤢᤛᤡᤖᤥ. ᤂᤧᤒᤩᤠᤱ ᤜᤡᤶᤜᤠ᤹ᤀᤥ ᤂᤢᤴᤇᤡ᤹ ᤔᤡᤰᤗᤠ᤺ᤳᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤜᤡᤶᤜᤠ᤹ ᤜᤢᤰᤁᤠᤵ ᤔᤧᤈᤥᤃᤢᤖᤥ॥ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ ᤏᤢ ᤗᤰᤂᤥᤔᤠᤜᤠ᤹ ᤔᤧᤕᤢᤰᤋᤢᤀᤠᤱ ᤂᤢᤴᤇᤡ᤹ ᤔᤧᤔᤧᤳᤇᤡᤱᤗᤥ॥

³ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖᤥ. “ᤀᤠᤱᤃᤠ᤹ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤰᤋᤱᤒᤠ ᤔᤧᤰᤔᤠᤛᤡᤔᤠ ᤏᤡᤱᤛᤣᤰ ᤆᤥᤃᤢᤱᤗ ᤘᤠ᤹ᤀᤠᤖᤥ. ᤂᤧᤴ ᤗᤠᤶᤒᤠ ᤂᤡᤏᤡ᤹ ᤜᤡᤱᤔᤠ ᤁᤧᤴᤇᤢᤰᤋᤡᤴᤗᤥ॥ ᤂᤡᤏᤡ᤹ ᤀᤠᤱᤍᤡᤱᤅᤠᤱ ᤗᤠᤱᤄᤣ᤺ᤰᤔᤠ ᤁᤧᤴᤕᤠ᤺ᤴᤍᤢᤶᤔᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤳᤇᤠ ᤕᤧᤳᤋᤢᤰᤂᤣᤒᤠ ᤕᤧᤶ ᤐᤥᤱᤗᤥ॥

⁴ ᤂᤧᤴ ᤕᤧᤴᤏᤥ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤕᤣ᤺ᤳᤋᤡᤖᤥ. ᤂᤧᤱᤜᤠ᤹ᤖᤧ ᤔᤧᤖᤡᤱ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖ ᤗᤠᤛᤠᤰ ᤁᤧᤶᤔᤧᤳᤋᤡᤖᤥ— ‘ᤀᤠᤏᤡᤃᤧᤃ ᤛᤠ᤹ᤖᤡᤰᤁᤣ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤡᤃᤧᤖᤥ᥄ ᤀᤠᤏᤡᤃᤣ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤴ ᤐ᤺ᤰᤂᤧᤀᤠᤱ ᤏᤧᤖᤥ॥ ᤂᤢᤏᤧ᤹ ᤂᤧᤴ ᤕᤠᤱᤛᤠᤁᤢᤴᤎᤣᤴ ᤀᤠᤏᤡᤃᤣ ᤏᤠᤵᤋᤡᤃᤧᤖᤥ. ᤂᤢᤏᤧ᤹ ᤀᤠᤏᤡ᤹ ᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤀᤡᤱᤗᤧᤰᤁᤥ ᤁᤧᤎᤠᤒᤠᤜᤠ᤹ ᤑ᤺ᤰᤂᤢ ᤐᤡᤖᤢᤛᤡᤖᤥ॥’”

⁵ ᤁᤸᤗᤧᤆᤥᤃᤢᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤱᤈᤢᤶᤓᤥᤀᤥ ᤋ᤹ᤕᤠ᤺ᤴᤛᤥᤴ ᤁᤧᤃᤧᤒᤠᤀᤠᤱ ᤗᤠᤈᤣ᤹ᤛᤡᤱᤒᤢᤱ ᤁᤧᤓ᤺ᤱᤒᤠ ᤁᤧᤒᤡᤒᤠ ᤂᤡᤏᤡ᤹ ᤗᤢᤶᤔᤥ ᤜᤠ᤺ᤳᤋᤠᤱ ᤁᤧᤱᤃᤳᤋᤢᤶᤔᤡᤴᤗᤥ॥

ᤛᤧᤰᤂᤠᤒᤠ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹

⁶ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖᤥ. “ᤂᤡᤏᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ॥ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠᤖᤧᤶᤔᤡᤴᤏᤧ᤹ᤀᤥ. ᤛᤡᤖᤡᤱᤔᤔᤥ ᤀᤠᤏᤡᤃᤣ ᤔᤧᤎᤩᤧ᤹ᤀᤡᤃᤧᤴᤗᤥ॥”

⁷ ᤕᤠᤁᤢᤒᤖᤧ ᤁᤢᤜᤡᤶᤛᤕᤱᤛᤣ. ᤌᤣ ᤀᤰᤂᤣᤀᤣ ᤐᤠ᤺ᤵᤔᤠ ᤐᤥᤱᤒᤠᤒᤡ᥅ “ᤌᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤁᤢᤕᤠ᤺ᤰᤗᤧ᤹ᤖᤧᤀᤠᤱ ᤘᤠ᤹ᤒᤡ᥅ ᤌᤣ ᤂᤢᤏᤧ᤹ ᤛᤧᤰᤂᤠ᤺ᤸᤗᤧ ᤀᤰᤋᤱᤒᤠ ᤆᤥᤃᤢᤒᤡ᥅” “ᤌᤣ ᤁᤢᤍᤥ᤺ᤵᤔᤠ ᤗᤠᤶᤔᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤀᤠᤒᤠ᤺ᤴᤈᤠ᤺ᤰᤁᤡᤸᤗᤧ ᤔᤧᤏᤢ᤹ᤔᤧᤍᤠᤖ ᤔᤧᤈᤥᤃᤢᤴᤇᤡᤴᤒᤡ᥅

⁸ ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤏᤡᤱᤔᤡᤜᤠ᤹ ᤜᤧᤰᤋᤱᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤏᤡᤱᤘᤠ᤹ᤀᤣ ᤔᤧᤸᤗᤥᤀᤣ ᤂᤡᤏᤡ᤹ ᤐᤣᤛᤠᤱᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤔᤏᤠᤜᤠ᤹ᤗᤠᤶ ᤂᤡᤏᤡ᤹ ᤌᤱᤅᤥᤗᤠᤶ ᤁᤧᤏᤢ᤺ᤱᤒᤠ ᤔᤏᤠᤜᤠ᤹ ᤜᤧᤰᤁᤣ ᤁᤢᤔᤧᤸᤗᤢᤱ ᤁᤧᤄᤡ᤺ᤰᤐᤠ ᤛᤢᤱᤄᤣᤰᤘᤠᤴ ᤁᤧᤏᤠᤵᤋᤢᤶ ᤁᤧᤍᤣ᤹ᤖᤢᤶᤛᤡᤶᤗᤥ॥

⁹ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠᤜᤠ᤹ ᤂᤢᤴᤇᤡ᤹ ᤛᤢᤰᤂᤣᤘᤠ ᤜᤡᤶᤜᤠ᤹ᤀᤥᤗᤠᤶ ᤁᤧᤗ᤺ᤳᤋᤢᤶ ᤁᤧᤍᤣᤛᤢᤶᤛᤡᤶᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ᤗᤠᤶ ᤀᤠᤔᤢ᤹ᤀᤡᤛᤠᤶᤔᤡᤴ ᤛᤍᤠᤍᤡᤱᤗᤧ ᤗᤠᤃᤡ ᤁᤧᤏᤠᤵᤋᤢᤶ ᤁᤧᤍᤣ᤹ᤖᤢᤶᤛᤡᤶᤗᤥ॥

¹⁰ ᤂᤡᤏᤡ᤹ ᤐᤥᤃᤧᤶᤔᤧ᤹ᤀᤠᤱ ᤐᤣᤃᤧᤶᤄᤧᤖᤧᤶᤔᤧ᤹ᤀᤥ᥄ ᤁᤴ ᤂᤡᤏᤡ᤹ ᤏᤠ᤺ᤶᤛᤡᤱᤔᤠᤍᤧᤴ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤁᤴ ᤕᤠᤶᤃᤧᤛᤡᤱᤒᤠ ᤁᤧᤈᤥᤃᤢᤶᤔᤠᤱ ᤏᤧᤖᤥ. ᤆᤥ᤺ᤰᤔᤠ ᤛᤢᤰᤔᤧᤴᤍᤧᤳᤋᤣ ᤌᤠᤖᤡᤰ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤀᤠᤱ ᤏᤧᤖᤥ॥

¹¹ “ᤔᤧᤴᤘᤠ᤹ᤔᤏᤠ ᤁᤧᤒᤠ᤺ᤵᤐᤠ ᤏᤢ ᤀᤡᤱᤗᤧᤰᤐᤠ ᤔᤏᤠ᤺ᤸᤗᤧ ‘ᤂᤧᤏᤧ᤹ ᤁᤧᤗᤠᤃᤡ ᤕᤖᤡᤰ ᤛᤣᤈᤱᤘᤠ ᤏᤢ ᤌᤡ ᤘᤠ᤹ᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤱ᤹’ ᤗ᤹ᤏᤧᤓᤃᤪ. ᤂᤢᤏᤧ᤹ᤃ ᤁᤴ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤁᤢᤍᤥ᤺ᤵᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤐᤥᤱᤗᤥ᥄

ᤕᤠᤶᤔᤥ ᤌᤥᤒᤥ ᤐᤥᤱᤔᤠ ᤏᤡᤱᤛᤠᤱ

¹² ᤕᤠᤁᤢᤒᤀᤣ. ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤡᤏᤡ᤹ ᤁᤧᤖᤧᤰ ᤛᤢᤶᤏᤡᤱᤗᤥ. ᤀᤡᤛᤪᤠᤀᤡᤗᤒᤠ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠᤜᤠ᤹ ᤀᤠᤱᤃᤠ᤹ ᤁᤢᤈᤧᤰᤁᤣ ᤛᤢᤵᤛᤢᤱᤛᤡᤱᤗᤥ॥ ᤂᤧᤱᤜᤠ᤹ ᤔᤧᤸᤗᤢᤰ ᤕᤧᤵᤏᤠᤀᤥ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤜᤧᤰᤁᤩᤠᤱ ᤆᤠᤖᤠᤶᤔᤠᤍᤧᤴᤏᤥ ᤌᤰᤛᤠᤗᤢᤵ ᤜᤧᤰᤁᤣ ᤀᤠᤱᤃᤠ᤹ ᤌᤡᤰᤔᤧᤳᤌᤡᤰ ᤑᤢᤰᤂᤢᤱᤛᤡᤱᤗᤥ. ᤂᤧᤴ ᤋᤧᤴᤏᤥ ᤔᤏᤠᤜᤠ᤹ ᤆᤡᤀᤧᤳ ᤆᤡᤀᤧᤳ ᤔᤧᤀᤧᤳᤇᤡᤱᤗ ᤔᤧᤈᤢᤶᤗᤥ॥

¹³ ᤗᤠᤶ ᤁᤧᤜᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤐᤣ᤺ᤰᤗᤥ. ᤂᤧᤱᤜᤠ᤹ᤖᤧ ᤗᤠᤶᤎᤣ᤺ᤳᤋᤡᤴ ᤔᤧᤕᤛᤢᤀᤠᤱ ᤗᤠ᤺ᤰᤁᤠᤳ ᤔᤧᤗᤴ ᤔᤧᤒᤣ᤺ᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤅᤡᤴ ᤂᤢᤴᤇᤡ᤹ ᤋᤃᤡ ᤐᤣ᤺ᤰᤗᤥ. ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤋᤃᤡ ᤐᤣ᤺ᤰᤗᤥ॥”