ᤔᤳᤋᤡ 7 - LIFOTNT

ᤘᤣ᤹ᤜᤠ᤹ ᤐᤠ᤺ᤴᤎᤡᤰᤔᤠᤛᤡ ᤔᤣ᤺ᤴ

¹ ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤔᤏᤠᤜᤠ᤹ ᤐᤠᤴ ᤔᤧᤎᤡᤰᤋᤧᤶᤛᤡᤶᤔᤧᤴᤏᤧ᤹. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠᤴ ᤁᤧᤴᤎᤡᤰᤋᤡᤴᤗᤥ॥

² ᤘᤣ᤹ᤜᤠ᤹ ᤐᤠᤴ ᤁᤧᤎᤡᤰᤋᤢᤶᤛᤡᤶᤒᤠ ᤜᤧᤰᤁᤣᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤐᤠᤴ ᤁᤧᤎᤡᤰᤋᤡ᤹ᤖᤥ॥ ᤀᤠᤰᤂᤣᤗ᤹ᤖᤡᤰ ᤘᤣ᤹ᤜᤠ᤹ ᤁᤧᤔᤧᤳᤋᤢᤶᤛᤡᤶ. ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ᤀᤠᤱ ᤁᤧᤔᤧᤳᤋᤡ᤹ᤖᤥ॥

³ “ᤀᤠᤒᤠᤅᤣ ᤔᤡᤰᤁᤥ ᤛᤡᤱᤄᤱ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤖᤧ ᤁᤢᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤁᤧᤏᤡᤛᤢᤒᤣ᥅

⁴ ᤀᤠᤒᤠᤅᤣ ᤔᤡᤰᤁᤥ ᤛᤡᤱᤄᤱ ᤔᤧᤴᤏᤡ᤺ᤔᤏᤠᤒᤠᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤧᤴᤛᤠ᤹ᤀᤡᤴ ᤁᤧᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤗ᤺ᤳᤋᤢᤱ ᤐᤡᤏᤧ ᤑᤠ᤹ᤀᤠᤱ ᤔᤧᤵᤔᤠ ᤁᤧᤛᤢᤰᤋᤢᤒᤣ᥅

⁵ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤀᤣ. ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤠᤒᤠᤅᤣ ᤁᤧᤔᤡᤰᤁᤥᤒᤠ ᤛᤡᤱᤄᤱᤅᤡᤴ ᤗ᤺ᤳᤋᤧᤍᤣᤛᤧ᤹ᤀᤥ. ᤜᤧᤰᤁᤩᤠᤱᤗᤰ ᤁᤧᤴᤛᤠ᤹ᤖᤧ ᤁᤢᤔᤡᤰᤁᤥᤒᤠ ᤛᤠᤵᤛᤣ᤺ᤰᤁᤡᤴ ᤏᤢᤖᤡᤰ ᤁᤧᤏᤡᤛᤢᤀᤠᤱ ᤗ᤺ᤵᤔᤠ ᤁᤧᤛᤢᤰᤋᤢ᤹ᤖᤥ॥

⁶ “ᤛᤣᤛᤣ ᤆᤡᤃᤰᤘᤠᤴ ᤂᤩᤠᤒᤠᤜᤠ᤹ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤜᤠ᤹ ᤜᤡᤸᤗᤡᤰ ᤔᤧᤜᤡᤛᤡᤱ ᤜᤧᤰᤁᤩᤠᤱ ᤁᤧᤶᤓᤳᤋᤡ᤹ᤀᤠᤱ ᤁᤧᤶᤜᤠ᤹ᤖᤡᤖᤥ॥ ᤜᤧᤰᤁᤩᤠᤱ ᤑᤠᤰᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤋᤧᤰᤛᤣ᤺ᤰᤁᤡᤴ ᤔᤧᤛᤧᤛᤧᤶᤔᤡᤴᤏᤧ᤹ᤀᤥ. ᤂᤧᤱᤜᤠ᤹ᤖᤧ ᤔᤧᤍᤥ᤹ᤖᤢ ᤔᤧᤗᤠ᤺ᤰᤋᤢ᤹ᤖᤥ॥”

ᤏᤠ᤺ᤰᤔᤠ. ᤁᤥ᤺ᤵᤔᤠ. ᤂᤰᤂᤰ ᤔᤧᤵᤔᤠ

⁷ “ᤏᤠ᤺ᤰᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤒᤡᤖᤡ᤹॥ ᤁᤥ᤺ᤳᤋᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤄᤥᤛᤢᤶ॥ ᤗᤠᤶᤎᤣ᤺ᤵᤐᤥ ᤐᤣᤃᤧᤶᤔᤧ᤹ᤀᤠᤱ ᤂᤰᤂᤰ ᤔᤧᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤃᤡ ᤜᤴᤗᤥ॥

⁸ ᤌᤣᤀᤠᤱᤓᤧᤸᤗᤧ ᤁᤧᤏᤠ᤺ᤰᤐᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤖᤢᤛᤡ᤹. ᤁᤧᤃᤥ᤺ᤵᤐᤠᤜᤠ᤹ᤖᤧ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤗᤠᤶᤎᤣ᤺ᤵᤐᤥ ᤁᤧᤒᤣ᤺ᤰᤐᤠᤀᤠᤱ ᤂᤰᤂᤰ ᤁᤧᤔᤧᤵᤐᤠᤜᤠ᤹ ᤂᤢᤏᤧ᤹ ᤗᤠᤶᤎᤣ᤺ᤵᤐᤧᤴ ᤜᤴᤍᤢ ᤐᤡᤖᤢᤛᤡ᤹ᤖᤥ॥

⁹ ᤀᤠᤳᤋᤡᤸᤗᤧ ᤁᤢᤛ᤻ᤛᤠᤴ ᤁᤢᤈᤠ ᤏᤠ᤺ᤰᤁᤡᤸᤗᤧ ᤗᤢᤱᤅᤡᤴ ᤐᤡᤖᤢᤒᤣ᥅

¹⁰ ᤀᤡᤃᤪ ᤅᤠᤛᤠᤴ ᤏᤠ᤺ᤰᤋᤢᤸᤗᤧ ᤀᤛᤣ᤺ᤰᤐᤧᤴ ᤐᤡᤖᤢᤒᤣ᥅

¹¹ ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤧ᤹ᤒᤠ ᤁᤧᤈᤥᤃᤡᤛᤠᤱ ᤂᤡᤏᤡ᤹ ᤛᤠᤜᤠ᤹ᤖᤧ ᤔᤧᤏᤠ᤺ᤰᤋᤢᤸᤗᤧ ᤏᤢᤒᤠ ᤐᤠ᤺ᤴᤜᤠ᤹ ᤐᤡᤔᤠ ᤁᤧᤗᤧᤛ᤻ᤛᤢᤶᤏᤧ ᤑᤠ᤹ᤃᤪ. ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤡᤏᤡ᤹ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤐᤠ᤺ᤸᤗᤧ ᤂᤢᤏᤧ᤹ ᤁᤧᤏᤠ᤺ᤰᤐᤠᤜᤠ᤹ ᤏᤢᤒᤠ ᤐᤠ᤺ᤴᤜᤠ᤹ ᤐᤡᤖᤢᤛᤡ᤹ᤖᤥ॥”

ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤌᤡᤶ

¹² “ᤁᤧᤖᤧᤰ ᤐᤠ᤺ᤴᤏᤥ ᤔᤏᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤂᤡᤏᤡ᤹ ᤁᤧᤶᤔᤧᤳᤋᤡ ᤁᤧᤶᤀᤡ᤺ᤳᤋᤡᤒᤠ ᤏᤡᤱᤘᤠ᤹ ᤁᤧᤈᤥᤃᤢᤶ. ᤜᤧᤰᤁᤣᤗ᤹ᤖᤡᤰᤁᤣ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ ᤀᤡ᤺ᤳᤋᤧᤶᤛᤡᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤌᤡᤶᤔᤥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤥ॥”

ᤆᤡᤓᤡ᤺ᤵᤑᤡ᤺ᤵᤐᤠ ᤗᤠᤶ

¹³ “ᤆᤡᤓᤡ᤺ᤵᤑᤡ᤺ᤵᤐᤠ ᤗᤠ᤺ᤵᤔᤠᤍᤧᤴᤏᤥᤗᤠᤶ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤗᤠᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤶᤒᤠ ᤗᤠ᤺ᤵᤔᤠᤍᤧᤴ ᤏᤢ ᤋᤠᤶᤍᤠᤶᤒᤠ ᤗᤠᤶᤔᤡᤸᤗᤧᤃ ᤔᤧᤰᤔᤠᤀᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴᤗᤠᤶᤒᤠ ᤕᤖᤡᤰ ᤔᤏᤠᤜᤠ᤹ ᤔᤧᤗᤠ᤺ᤳᤗᤥ॥

¹⁴ ᤁᤖ ᤆᤢᤰᤛᤠ ᤗᤠ᤺ᤵᤔᤠᤍᤧᤴ ᤏᤢ ᤆᤡᤓᤡ᤺ᤵᤑᤡ᤺ᤵᤐᤠ ᤗᤠᤶᤔᤡᤸᤗᤧᤃ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤁᤧᤍᤣ᤹ᤖᤡ᤹ᤖᤥ॥ ᤂᤧᤴ ᤁᤧᤄᤥᤒᤠᤜᤠ᤹ᤃ ᤔᤡᤛᤠᤰᤗᤰ ᤔᤧᤒᤥᤱᤗᤥ॥”

ᤛᤡᤱᤒᤢᤱ ᤏᤢ ᤛᤡᤱᤛᤣ᤹

¹⁵ “ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤏᤢ ᤛᤡᤱᤛᤡᤱ ᤕᤧᤰᤕᤧᤰ ᤗ᤹ᤖᤧᤶᤔᤧ᤹ᤀᤥ. ᤂᤧᤱᤜᤠ᤹ᤃ ᤗᤠ᤺ᤰᤁᤠᤳᤗᤠᤶ ᤔᤧᤸᤗᤢᤰ ᤁᤢᤀᤡᤛᤡᤰ ᤔᤧᤗᤧᤱᤛᤡᤱᤅᤠᤱ ᤂᤡᤏᤡ᤹ᤀᤥ ᤔᤧᤍᤠᤖᤥ. ᤁᤖ ᤛᤡᤃᤠᤱᤃ ᤂᤧᤱᤜᤠ᤹ ᤁᤡᤵᤔᤠ ᤁᤧᤄᤢᤒᤠ ᤐᤖᤠᤒᤠᤛᤡᤖᤥ॥

¹⁶ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤂᤧᤱᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤋᤡᤱᤃᤪᤣᤰ ᤐᤥ᤺ᤰᤗᤠᤀᤥᤗᤠᤶ ᤆᤧᤸᤗᤧᤰᤛᤣ᤹ ᤏᤢ ᤛᤡᤎᤪᤠ᤺ᤰᤐᤥᤗᤠᤶ ᤐ᤺ᤳᤇᤣ᤹ᤀᤡᤴ ᤔᤧᤴᤍᤢᤒᤢᤴᤗᤥ॥

¹⁷ ᤜᤧᤰᤁᤣᤗ᤹ᤖᤡᤰᤁᤣ ᤁᤧᤖᤧᤰ ᤏᤢᤒᤠ ᤛᤡᤱᤒᤢᤱᤅᤥ ᤏᤢᤒᤠᤀᤣ ᤛᤡᤱᤛᤣ᤹ᤀᤡᤴ ᤌᤥ᤺ᤰᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠᤀᤣ ᤛᤡᤱᤛᤣ᤹ᤀᤡᤴ ᤌᤥ᤺ᤰᤗᤥ॥

¹⁸ ᤜᤧᤰᤁᤩᤠᤱ ᤏᤢᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠ ᤛᤡᤱᤛᤣ᤹ᤀᤡᤴ ᤔᤧᤎᤥ᤺ᤰᤏᤧᤴᤗᤥ. ᤜᤧᤰᤁᤩᤠᤱ ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤏᤢᤒᤠ ᤛᤡᤱᤛᤣ᤹ᤀᤡᤴ ᤔᤧᤎᤥ᤺ᤰᤏᤧᤴᤗᤥ॥

¹⁹ ᤜᤧᤰᤁᤣᤗ᤹ᤖᤡᤰ ᤏᤢᤒᤠ ᤛᤡᤱᤛᤣ᤹ ᤔᤧᤴᤎᤥ᤺ᤰᤔᤏᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥᤱᤗᤥ॥

²⁰ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰᤁᤥᤗᤠᤶ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤛᤡᤶᤗᤥ॥”

ᤛᤧᤰᤂᤠᤒᤠ ᤜᤢ᤹ᤛᤠᤶᤒᤠᤜᤠ᤹

²¹ ᤀᤠᤸᤗ “‘ᤀᤠᤍᤠᤱᤒᤣ. ᤀᤠᤍᤠᤱᤒᤣ’. ᤗ᤹ᤖᤡᤰ ᤕᤠᤵᤔᤡ ᤁᤧᤔᤧᤵᤐᤠᤜᤠ᤹ ᤁᤧᤖᤧᤰ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤔᤧᤴᤗᤠ᤺ᤳᤏᤧᤴᤗᤥ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠᤜᤠ᤹ᤖᤰ ᤔᤧᤗᤠ᤺ᤳᤗᤥ॥

²² ᤂᤠᤛᤧᤴ ᤕᤧᤴᤏᤥ ᤕᤖᤡᤰ ᤔᤏᤠᤜᤠ᤹ ᤔᤧᤍᤠᤀᤠᤱ ᤀᤰᤂᤣ ᤔᤧᤔᤧᤳᤋᤠᤖᤥ. ‘ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤡᤃᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤶ ᤗ᤺ᤳᤋᤢᤶᤛᤡᤶᤒᤧᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤶᤒᤧᤖᤥ॥’

²³ ᤁᤖ ᤂᤧᤴ ᤕᤧᤶᤔᤥ ᤂᤧᤱᤜᤠ᤹ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ᤃ ᤀᤠᤵᤑᤠᤸᤗᤧᤀᤠᤱ ᤁᤢᤛᤡᤱ ᤏᤡ᤺ᤳᤏᤡᤱᤒᤠ ᤜᤥᤵᤗᤥ॥ ᤂᤡᤏᤡ᤹ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤴᤈᤥ᤺ᤰᤁᤣ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤣ. ᤁᤵᤔᤥᤗᤠᤶ ᤐᤣᤃᤧᤶᤔᤧ᤹᥄’”

ᤏᤧᤳᤇᤡ ᤐᤖᤡᤰᤗᤧᤴ ᤜᤡᤶᤐᤠᤱᤕᤰ

²⁴ ᤀᤠᤸᤗ “ᤂᤧᤸᤗᤧᤆᤥᤃᤢᤸᤗᤧ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰ ᤁᤧᤄᤧᤶᤒᤠᤀᤠᤱ ᤜᤧᤰᤁᤣ ᤁᤧᤈᤥ᤺ᤰᤐᤧᤱᤃ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤜᤡᤶᤐᤠᤱᤕᤰ ᤁᤧᤏᤧᤒᤠᤀᤠᤱ ᤜᤡᤶ ᤁᤧᤈᤥ᤺ᤰᤐᤠ ᤛᤡᤰᤁᤢᤶᤒᤠ ᤔᤏᤠ ᤁᤢᤀᤡᤛᤡᤰ ᤆᤥᤰᤗᤥ॥

²⁵ ᤜᤧᤰᤁᤩᤠᤱ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤩᤧᤀᤠᤱ. ᤕᤱᤄᤱᤅᤡᤴ ᤁᤢᤰᤂᤧ ᤕᤧ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤜᤢᤖᤧᤀᤠᤱ ᤂᤧᤴ ᤜᤡᤶᤔᤡᤴ ᤜᤡᤵᤋᤢᤛᤠᤱ ᤔᤧᤈᤥ᤺ᤴᤍᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤜᤡᤶᤔᤡᤸᤗᤧᤴ ᤜᤡᤶᤐᤠᤱᤕᤰᤁᤡᤱᤃ ᤐᤕᤶ ᤕᤶᤒᤠ ᤗᤢᤱ ᤛᤶᤍᤠᤱ ᤏᤧᤛ᤻ᤛᤧᤖᤥ॥

²⁶ ᤁᤖ ᤐᤣᤗᤡᤃᤧᤴ ᤀᤠᤒᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤜᤧᤰᤁᤣ ᤔᤧᤴᤈᤥ᤺ᤰᤔᤏᤠᤒᤠᤱᤃ ᤕᤧ᤺ᤱᤄᤠᤀᤥ ᤜᤡᤶᤐᤠᤱᤕᤰ ᤁᤧᤏᤧᤒᤠᤀᤠᤱ ᤜᤡᤶ ᤁᤧᤈᤥ᤺ᤰᤐᤠ ᤀᤍᤱ ᤔᤏᤠ ᤁᤢᤀᤡᤛᤡᤰ ᤆᤥᤰᤗᤥ॥

²⁷ ᤐᤠᤱᤃᤧᤴᤍᤡᤱ ᤘᤠᤜᤡᤳ ᤌᤩᤧᤀᤠᤱ. ᤕᤱᤄᤱᤅᤡᤴ ᤁᤢᤰᤂᤧ ᤕᤧ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤛᤢᤖᤡᤳ ᤁᤣᤈᤱ ᤜᤢ᤺ᤖᤧᤀᤠᤱ ᤂᤧᤴ ᤜᤡᤶᤔᤡᤴ ᤜᤡᤵᤋᤢᤸᤗᤧ ᤕᤖᤧᤒᤣᤖᤥ॥”

²⁸ ᤕᤧᤛᤢᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢ. ᤜᤧᤰᤁᤩᤠᤱ ᤁᤢᤏᤡᤛᤠᤶ ᤁᤧᤄᤧᤶᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖᤥ.

²⁹ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤁᤢᤀᤡᤛᤡᤰ ᤔᤣ᤺ᤴ. ᤁᤖ ᤕᤢᤰ ᤁᤧᤃᤵᤐᤠ ᤁᤢᤀᤡᤛᤡᤰ ᤜᤢ᤹ᤖᤢᤛᤡᤖᤥ॥