ᤔᤳᤋᤡ 3 - LIFOTNT

ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ

¹ ᤂᤧᤴ ᤕᤧᤶᤔᤥ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤔᤧᤵᤔᤏᤠᤒᤠ ᤔᤏᤠᤴ ᤕᤜᤢᤍᤡᤕᤠ ᤌᤢᤶᤔᤥᤒᤠ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤀᤡᤱᤓᤴ ᤆᤥᤃᤢᤖ ᤋᤩᤧ.

² “ᤂᤡᤏᤡ᤹ ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ॥”

³ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ. “ᤂᤢᤏᤧ᤹ ᤀᤣ᤺ᤰᤛᤠᤍᤧᤴᤏᤥ ᤀᤰᤂᤣᤗ᤹ᤖᤡᤰ ᤁᤧᤀ᤺ᤰᤐᤠ ᤀᤡᤰᤗᤠᤖᤥ. ‘ᤍᤠᤱᤒᤠᤸᤗᤧ ᤁᤢᤔᤠᤖᤠᤶᤔᤡᤴ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤠᤱ ᤁᤢᤗᤠᤶᤜᤠ᤹ ᤋᤥ᤺ᤴᤍᤥᤴ ᤆᤥᤃᤧᤶᤔᤧ᤹᥄’”

⁴ ᤀᤠᤸᤗ ᤕᤢᤜᤢᤴᤏᤠ᤺ᤸᤗᤧ ᤀᤢᤔᤣᤖᤧ ᤁᤢᤔᤢᤖᤡᤰᤗᤠᤶ ᤌᤠᤰᤔᤏᤠᤒᤠ ᤋᤣ᤺ᤳᤋᤡᤴ ᤆᤠᤰᤂᤢᤀᤠᤱ ᤛᤧᤜᤥᤒᤠ ᤑ᤹ᤀᤡ ᤕᤢᤵᤛᤢᤖᤥ॥ ᤂᤢᤏᤧ᤹ ᤁᤢᤈᤠᤔᤠᤱᤃ ᤏᤡ᤺ᤱᤄᤢᤰᤘᤠ ᤏᤢ ᤋᤠᤶᤓᤢᤱ ᤛᤰᤘᤠᤄᤢ ᤘᤕᤧᤖᤥ॥

⁵ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤏᤢ ᤕᤜᤢᤍᤡᤕᤠ ᤌᤢᤶ ᤜᤧᤰᤁᤩᤠᤱ ᤕᤷᤍᤏ ᤕᤱᤄᤱ ᤂᤡᤖᤡᤒᤠ ᤁᤧᤖᤧᤰ ᤌᤢᤶᤜᤠ᤹ᤀᤥᤗᤠᤶ ᤔᤏᤠᤜᤠ᤹ ᤁᤢᤍᤢᤶᤛᤧ

⁶ ᤔᤧᤍᤩᤧᤀᤠᤱ ᤀᤡᤱᤃᤠ᤹ ᤗᤠᤕᤥᤒᤠᤀᤠᤖᤥ ᤔᤧᤒᤠ᤺ᤳᤋᤢᤖ ᤕᤷᤍᤏ ᤕᤱᤄᤱᤅᤥ ᤂᤢᤏᤧ᤹ᤗᤠᤶ ᤒᤵᤋᤡᤛ᤻ᤔᤠ ᤔᤧᤒᤥ᤺ᤰᤂᤧᤖᤥ॥

⁷ ᤁᤖ ᤕᤖᤡᤰ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤒᤵᤋᤡᤛ᤻ᤔᤠ ᤐᤥᤱᤛᤧ ᤂᤢᤏᤧ᤹ᤀᤥ ᤔᤧᤍᤩᤧᤖ ᤔᤧᤒᤳᤇᤧᤒᤠ ᤏᤡᤛᤢᤛᤡᤀᤠᤱ ᤀᤰᤂᤣ ᤔᤧᤳᤋᤢᤛᤡᤖ ᤑᤧ᤺ᤰᤋᤢᤛᤡ. “ᤀᤛᤣ᤺ᤰᤛᤠᤛᤣ. ᤂᤡᤏᤡ᤹ ᤁᤴ ᤁᤧᤍᤠᤒᤠᤖ ᤁᤧᤒᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤂᤧᤳᤇᤡᤱᤅᤧᤶᤔᤧ᤹ ᤑᤠ᤹ᤀᤠᤱ ᤜᤠ᤺ᤳᤗᤧ ᤁᤧᤔᤧᤳᤋᤡᤒᤣ᥅

⁸ ᤗᤠᤕᤥᤗᤠᤶ ᤁᤧᤜᤡᤴᤍᤡᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤛᤧ ᤏᤢᤒᤠ ᤕᤠ᤺ᤶᤒᤰ ᤆᤥᤃᤧᤶᤔᤧ᤹ᤀᤥ॥

⁹ ᤀᤠᤏᤡᤃᤧᤃ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠᤛᤡᤃᤧ. ᤂᤧᤸᤗᤧᤆᤥᤃᤢᤸᤗᤧ ᤂᤢᤶᤍᤡᤱᤗᤠᤶ ᤂᤧᤳᤇᤡᤱᤔᤠ ᤛᤢᤰᤋᤡᤃᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤃ ᤁᤴ ᤗᤢᤱᤜᤠ᤹ᤀᤠᤱ ᤀᤒᤪᤠᤜᤠᤔᤖᤧ ᤁᤢᤛ᤻ᤛᤠ ᤆᤥ᤺ᤰᤔᤠ ᤛᤢᤰᤋᤢᤛᤡ᤹ᤖᤥ॥

¹⁰ ᤀᤠᤸᤗᤥᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴᤏᤡᤸᤗᤧ ᤋ᤺ᤴᤍᤡᤱᤃ ᤛᤡᤱᤒᤢᤱᤔᤥ ᤂᤠ ᤆᤢᤰᤔᤠ ᤀᤡ᤺ᤳᤋᤧᤀᤠᤱ ᤘᤠ᤹॥ ᤏᤢᤒᤠ ᤛᤡᤱᤛᤣ᤹ ᤔᤧᤴᤎᤥᤰᤔᤏᤠᤒᤠ ᤛᤡᤱᤒᤢᤱᤜᤠ᤹ ᤁᤧᤖᤧᤰ ᤋᤠᤱᤔᤠᤀᤠᤱ ᤔᤡᤀᤥ ᤗᤠᤵᤑᤢᤔᤠ ᤐᤥᤱᤗᤥ॥

¹¹ “ᤗᤠᤕᤥᤗᤠᤶ ᤁᤧᤜᤡᤴᤍᤡᤀᤠᤱ ᤀᤡᤱᤃᤠ᤹ᤃ ᤆᤫᤠ᤺ᤳᤋᤡᤸᤗᤧ ᤒᤵᤋᤡᤛ᤻ᤔᤠ ᤐᤡᤏᤡᤱᤗᤥ. ᤁᤖ ᤀᤠᤀᤣᤃᤠᤱ ᤁᤧᤍᤠᤒᤧᤱᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤔᤢᤰᤛᤠᤶᤛᤠᤒᤠ ᤆᤥᤰᤗᤥ॥ ᤂᤢᤏᤧ᤹ ᤁᤢᤗᤠᤱᤛᤢ᤺ᤵᤜᤠ᤹ ᤀᤡᤱᤃᤠ᤹ ᤕᤥᤰ ᤁᤢᤀᤡᤛᤡᤰ ᤐᤱᤔᤠᤀᤠᤱ ᤔᤧᤗᤠ᤹ᤀᤠᤴᤗᤥ॥ ᤂᤢᤏᤧ᤹ ᤛᤣᤛᤣᤔᤠᤱ ᤏᤢ ᤔᤡ᤺ᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤖᤡ᤹ᤖᤥ॥

¹² ᤁᤢᤓ᤹ᤀᤣ᤺ᤳᤋᤡᤸᤗᤧ ᤛᤡᤴ ᤀᤠ᤺ᤶᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤕᤠᤖᤡᤵ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤋᤢᤃᤢᤖ ᤛᤢᤵᤛᤢᤀᤠᤱ ᤛᤡᤴ ᤆᤠᤎᤥᤰᤗᤠᤀᤥ ᤆᤡᤰᤂᤢ᤹ ᤜᤧᤰᤁᤩᤠᤱ ᤁᤢᤜᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠᤒᤠ ᤔᤡᤀᤥ ᤜᤠ᤺ᤴᤍᤢᤍᤣᤛᤢ᤹ᤖᤥ॥”

ᤕᤢᤜᤢᤴᤏᤠ᤺ᤸᤗᤧ ᤕᤧᤛᤢᤴ ᤒᤵᤋᤡᤛ᤻ᤔᤠ ᤐᤡᤖᤢ᤹

¹³ ᤂᤧᤴ ᤕᤧᤶᤔᤥ ᤕᤧᤛᤢᤴ ᤃᤠᤗᤡᤗ ᤌᤢᤶᤔᤥᤗᤠᤶ ᤕᤷᤍᤏ ᤕᤱᤄᤱᤅᤥ ᤒᤵᤋᤡᤛ᤻ᤔᤠ ᤐᤥᤱᤛᤧ ᤕᤢᤜᤢᤴᤏᤠᤖᤥ ᤋᤩᤧᤖᤥ.

¹⁴ ᤁᤖ ᤕᤢᤜᤢᤴᤏᤠᤖᤧ ᤀᤳᤋᤢᤖ ᤂᤢᤏᤧ᤹ ᤀᤰᤂᤣ ᤔᤧᤳᤋᤢ. “ᤀᤡᤱᤃᤠ᤹ᤏᤧ ᤂᤧᤏᤧ᤹ᤏᤢ ᤒᤵᤋᤡᤛ᤻ᤔᤠ ᤐᤥᤱᤔᤠ ᤁᤧᤒᤥᤱᤒᤠ. ᤀᤠᤰᤂᤣᤗ᤹ᤖᤡᤰ ᤂᤧᤏᤧ᤹ ᤀᤡᤱᤃᤠ᤹ᤀᤥ ᤁᤧᤍᤩᤧᤒᤠᤒᤣ᥅”

¹⁵ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤠᤸᤗᤥᤖᤧ ᤗᤠᤃᤡ ᤀᤰᤂᤣᤀᤣ ᤐᤥᤱᤗᤖᤥ. ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤖᤧᤰ ᤏᤡᤱᤘᤠ᤹ ᤆᤥᤃᤢᤒᤠ ᤐᤠ᤺ᤴᤏᤡᤴ ᤁᤧᤳᤗᤖᤥ॥” ᤜᤧᤰᤁᤩᤠᤱ ᤕᤢᤜᤢᤴᤏᤠᤴ ᤋᤧᤴᤍᤧᤀᤠᤱ ᤂᤢᤏᤧ᤹ ᤒᤵᤋᤡᤛ᤻ᤔᤠ ᤐᤡᤖᤢᤖᤥ॥

¹⁶ ᤕᤧᤛᤢᤴ ᤒᤵᤋᤡᤛ᤻ᤔᤠ ᤐᤥ᤺ᤰᤂᤧᤀᤠᤱ ᤆᤫᤠ᤺ᤳᤋᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤋᤠᤱᤛᤠᤰᤐᤧᤴ ᤜᤖᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤐᤢᤳᤋᤢ᤺ᤰᤁᤣ ᤜᤧᤰᤁᤣ ᤂᤢᤏᤧ᤹ ᤁᤢᤛᤶᤍᤠᤱ ᤕᤧᤖ ᤐᤳᤇᤧᤒᤠ ᤏᤡᤛᤢᤖᤥ॥

¹⁷ ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤀᤰᤂᤣᤗ᤹ᤖᤡᤰ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠᤖᤥ. ᤀᤡᤱᤃᤠ᤹ ᤂᤢᤏᤧ᤹ᤏᤢ ᤛᤠ᤹ᤖᤡᤰ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥”