ᤔᤳᤋᤡ 28 - LIFOTNT

ᤕᤧᤛᤢᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱ

¹ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤍᤠ᤺ᤴᤍᤡᤰᤔᤥ. ᤋᤧᤏᤧᤒᤠ ᤕᤧᤴᤏᤥ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧ ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤏᤢ ᤘᤣ᤹ᤛᤔᤠ ᤔᤖᤡᤕᤶᤔᤡᤴ ᤕᤧᤛᤢᤴ ᤔᤧᤏᤧᤛ᤻ᤛᤢᤒᤠ ᤀᤡ᤺ᤵᤐᤢᤱᤅᤡᤴ ᤀᤥᤔᤧᤳᤇᤧ ᤐᤣᤛᤡᤖᤥ॥

² ᤜᤰᤆᤄᤳ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤗᤢᤵᤗᤡ ᤌᤠᤅᤧ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤎᤡᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤥ ᤌᤩᤧᤀᤠᤱ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤁᤧᤕᤧᤵᤐᤠ ᤂᤧᤴ ᤕᤶᤒᤠ ᤗᤢᤱᤅᤡᤴ ᤌᤡᤰᤗᤧᤵᤔᤠᤱ ᤀᤡᤛᤢᤀᤠᤱ ᤂᤧᤴ ᤛᤶᤍᤠᤱ ᤕᤢᤱᤛᤡᤱᤗᤥ॥

³ ᤂᤧᤸᤗᤧ ᤁᤢᤏᤠᤖᤠᤴ ᤛᤠ᤺ᤶᤓᤣ ᤁᤢᤀᤡᤛᤡᤰ ᤗᤧᤰᤋᤧ. ᤜᤧᤰᤁᤩᤠᤱ ᤁᤢᤍᤣ᤺ᤳᤜᤠ᤹ ᤏᤠ᤺ᤱ ᤁᤢᤀᤡᤛᤡᤰ ᤑ ᤗ᤹ᤖᤧᤖᤥ॥

⁴ ᤂᤧᤴ ᤀᤡ᤺ᤵᤐᤢᤱ ᤁᤧᤃᤥᤒᤠ ᤌᤰᤛᤢᤒᤠᤜᤠ᤹ ᤁᤡᤔᤠᤸᤗᤧ ᤔᤧᤕᤰᤂᤧᤖ ᤜᤷᤃᤢᤵ ᤔᤧᤈᤥ᤺ᤴᤍᤧᤀᤠᤱ ᤁᤢᤛᤡᤘᤧᤳ ᤔᤏᤠ ᤁᤢᤀᤡᤛᤡᤰ ᤔᤧᤒᤥ᤺ᤰᤂᤧᤖᤥ॥

⁵ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤔᤧᤳᤋᤢᤛᤡ. “ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤂᤡᤴᤇᤡ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤒᤠ ᤕᤧᤛᤢᤴ ᤁᤧᤃᤥ᤺ᤳᤇᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥

⁶ ᤂᤢᤏᤧ᤹ᤃ ᤁᤵᤔᤥ ᤜᤥᤵᤗᤥ. ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤑᤧᤖᤧᤳᤇᤧ᤹ᤀᤠᤱ ᤁᤢᤎᤰᤁᤡᤴ ᤏᤧᤛ᤻ᤛᤧᤒᤠ ᤋᤧᤴᤏᤡᤴ ᤀᤥᤔᤧᤳᤋᤧᤳᤇᤧᤏᤠ॥

⁷ ᤜᤧᤰᤁᤩᤠᤱ ᤜᤠᤖᤠ ᤐᤣᤃᤧᤳᤇᤧ᤹ᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤧᤇᤧ᤹ᤀᤥ. ‘ᤂᤢᤏᤧ᤹ᤃ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗᤀᤥ ᤐᤣ᤺ᤰᤗ ᤐᤳᤗᤥ॥ ᤂᤢᤏᤧ᤹ ᤂᤧᤵᤔᤥᤀᤣ ᤂᤡᤏᤡ᤹ ᤁᤧᤍᤢᤔᤢᤶᤗᤥ॥’ ᤀᤥᤔᤧᤳᤋᤧᤳᤇᤧ᤹ᤀᤥ. ᤁᤴ ᤐᤠ᤺ᤴᤏᤡᤴ ᤂᤡᤴᤇᤡ᤹ ᤔᤧᤳᤏᤧᤳᤇᤡᤱᤅᤠᤱ ᤘᤠ᤹ᤀᤠᤖᤥ॥”

⁸ ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤴᤇᤢᤔᤠᤜᤠ᤹ ᤁᤡ᤺ᤛᤧᤳᤇᤡᤛᤠᤱ ᤀᤥᤔᤢᤗ᤹ᤖᤧᤳᤇᤡᤖ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤂᤧᤴ ᤐᤠ᤺ᤴᤏᤡᤴ ᤔᤧᤳᤇᤧ ᤀᤡ᤺ᤵᤐᤢᤱᤗᤠᤶ ᤆᤠᤳᤋᤧᤳᤇᤡᤖ ᤐᤣᤛᤡᤖᤥ॥

⁹ ᤜᤰᤆᤄᤳ ᤕᤧᤛᤢᤖᤧ ᤂᤧᤱᤜᤠ᤹ ᤋᤢᤔᤢᤛᤡᤀᤠᤱ “ᤛᤧᤘᤠᤖᤥ” ᤔᤧᤳᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤕᤧᤛᤢᤖᤥ ᤋᤩᤧᤳᤇᤡᤀᤠᤱ ᤁᤢᤗᤠᤱᤜᤠ᤹ ᤋᤧᤶᤛᤧᤳᤇᤢᤖ ᤛᤧᤘᤠ ᤆᤥᤃᤧᤳᤇᤢ॥

¹⁰ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤴᤇᤡ᤹ ᤔᤧᤃᤡᤛᤧᤳᤇᤧᤴᤏᤧ᤹ᤀᤥ. ᤐᤣᤃᤧᤳᤇᤧ᤹ᤀᤠᤱ ᤀᤠᤴᤛᤠ᤹ᤛᤡ ᤃᤠᤗᤡᤗᤀᤥ ᤁᤧᤒᤣᤃᤡᤔᤢ ᤔᤧᤳᤋᤧᤇᤧᤛᤧ᤹ᤀᤥ. ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤂᤧᤳᤌᤥᤀᤣ ᤔᤧᤍᤢᤶᤔᤠ᤹ᤖᤥ॥”

ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ ᤀᤡᤱᤄᤱ

¹¹ ᤂᤧᤴ ᤔᤧᤴᤇᤢᤔᤠᤜᤠ᤹ ᤕᤧᤰᤕᤰᤁᤥ ᤏᤢ᤺ᤰᤂᤧᤳᤇᤡ ᤐᤣᤛᤧᤳᤇᤡᤸᤗᤧ ᤁᤢᤓᤠ ᤌᤰᤛᤢᤒᤠᤜᤠ᤹ ᤔᤧᤒᤣᤀᤠᤱ ᤐᤥ᤺ᤰᤂᤧᤒᤠ ᤁᤧᤖᤧᤰ ᤜᤡᤴᤍᤥᤰᤁᤡᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤔᤧᤈᤧᤰᤋᤢᤛᤡᤖᤥ॥

¹² ᤜᤧᤰᤁᤣ᤺ᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤀᤡᤱᤔᤧᤍᤱᤄᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤌᤰᤛᤢᤒᤠᤜᤠ᤹ ᤕᤖᤡᤰ ᤕᤠᤱ ᤔᤧᤒᤡᤖᤢᤛᤡᤖ

¹³ ᤀᤰᤂᤣ ᤔᤧᤔᤧᤳᤋᤢᤛᤡ. “ᤀᤠᤏᤡᤃᤣ ᤛᤧᤴᤍᤡᤰ ᤀᤡᤵᤛᤡᤃᤧᤀᤠᤱ ᤏᤧᤛ᤻ᤛᤡᤃᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤁᤢᤎᤰᤁᤡᤴ ᤔᤧᤄᤢ᤺ᤳᤋᤢᤀᤠᤱ ᤔᤧᤍᤣ᤹ᤖᤢᤖᤥ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤗ ᤐᤥᤱᤗᤥ॥

¹⁴ ᤁᤴ ᤐᤠ᤺ᤴᤏᤡᤴ ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤵᤛᤢᤏᤧ ᤑᤠ᤹ᤃᤪ ᤂᤢᤏᤧ᤹ ᤁᤢᤏᤡᤱᤘᤠ᤹ ᤋᤠᤛᤢᤶᤒᤧᤀᤠᤱ ᤂᤡᤏᤡ᤹ ᤏᤠᤱᤅᤠᤛᤡᤃᤧ᤹ᤖᤥ॥”

¹⁵ ᤜᤧᤰᤁᤣ᤺ᤸᤗᤧ ᤌᤰᤛᤢᤒᤠᤜᤠ᤹ᤖᤧ ᤕᤖᤡᤰ ᤕᤠᤱ ᤔᤧᤍᤠ᤺ᤰᤋᤢᤀᤠᤱ ᤂᤧᤱᤜᤠ᤹ ᤔᤧᤔᤧᤳᤋᤢᤛᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤐᤠ᤺ᤴᤏᤡᤱᤃ ᤛᤧᤖᤧᤀᤠᤱ ᤀᤠᤀᤡᤴ ᤌᤠᤖᤡᤰᤛᤠᤱ ᤕᤜᤢᤍᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤖᤥ॥

ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤕᤶ ᤀᤡᤱᤈᤠᤱ

¹⁶ ᤜᤧᤰᤁᤩᤠᤱ ᤌᤡᤰᤌᤡᤰ (᥇᥇) ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤧ ᤐᤣᤃᤧᤶᤔᤧ᤹ᤀᤥ ᤗ᤹ᤖᤡᤰ ᤔᤧᤳᤋᤢᤛᤡᤒᤠ ᤃᤠᤗᤡᤗᤀᤥᤒᤠ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥

¹⁷ ᤂᤧᤱᤜᤠ᤹ᤖᤧ ᤂᤧᤵᤔᤥ ᤕᤧᤛᤢᤴ ᤔᤧᤏᤡᤛᤢᤀᤠᤱ ᤛᤧᤘᤠ ᤔᤧᤈᤥᤃᤢ. ᤁᤖ ᤁᤢᤓᤠᤖᤧᤃ ᤆᤵᤆᤡ ᤔᤧᤈᤥᤃᤢᤖᤥ॥

¹⁸ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤱᤜᤠ᤹ᤀᤥ ᤋᤩᤧᤀᤠᤱ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤕᤢᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤡᤖᤠᤱᤅᤠᤱ ᤘᤠ᤹ᤖᤥ॥

¹⁹ ᤂᤧᤸᤗᤧᤆᤥᤃᤢᤸᤗᤧ ᤐᤣᤃᤧᤶᤔᤧ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤢ᤹ᤛᤠᤶᤒᤠ ᤆᤥᤃᤧᤶᤛᤡᤶᤔᤧ᤹ᤀᤥ॥ ᤐᤠᤏᤢᤍᤡᤱ ᤐᤠ. ᤀᤠᤒᤢᤍᤡᤱ ᤛᤠ. ᤜᤧᤰᤁᤩᤠᤱ ᤛᤣᤛᤣᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤒᤵᤋᤡᤛ᤻ᤔᤠ ᤐᤡᤖᤧᤶᤛᤡᤶᤔᤧ᤹ᤀᤥ॥

²⁰ ᤀᤡᤱᤃᤠ᤹ ᤀᤡᤱᤈᤠᤱ ᤐᤡᤏᤡᤱᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤜᤢ᤹ᤖᤧᤶᤛᤡᤶᤔᤧ᤹ᤀᤥ॥ ᤀᤥᤔᤧᤳᤋᤧᤶᤔᤧ᤹ᤀᤥ. ᤀᤡᤱᤃᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥ ᤌᤠᤖᤡᤰᤁᤣ ᤂᤡᤏᤡ᤹ᤏᤢ ᤛᤍᤠᤍᤡᤱ ᤘᤠ᤹ᤀᤠᤖᤥ॥”