ᤔᤳᤋᤡ 27 - LIFOTNT

ᤕᤜᤢᤍᤠᤴ ᤑᤥ᤺ᤴᤇᤡᤱ ᤛᤡ᤹᤺

¹ ᤁᤢᤏᤠᤶᤍᤠ᤺ᤵᤔᤠ ᤂᤠᤀᤥ᤺ᤳᤋᤧᤖ ᤐᤳᤇᤧᤸᤗᤧᤛᤠ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤀᤠᤰᤂᤣᤗ᤹ᤖᤡᤰ ᤕᤧᤛᤢᤖᤧ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤂᤥᤛᤢᤖ ᤕᤠ᤺ᤶᤔᤠᤒᤣ ᤑᤠ᤹ᤀᤠᤱ ᤏᤡᤱᤛᤣᤰ ᤔᤧᤈᤥᤃᤢᤖᤥ॥

² ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤀᤡᤔᤧᤄᤣ᤺ᤰᤂᤢ ᤜᤧᤰᤁᤩᤠᤱ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤥ ᤔᤧᤍᤣ᤹ᤖᤢᤖᤥ॥

³ ᤜᤧᤰᤁᤩᤠᤱ ᤂᤢᤏᤧ᤹ ᤀᤡᤱᤃᤧᤗᤧᤰᤐᤠ ᤕᤜᤢᤍᤠ᤺ᤸᤗᤧ ᤕᤧᤛᤢᤴ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤛᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤗᤥᤖᤧ. ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤛᤢᤶᤒᤥᤱ ᤕᤢᤵᤐᤠ ᤕᤠᤱᤅᤡᤴ ᤋᤣ᤹ᤖᤢᤀᤠᤱ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤏᤢ᤺ᤰᤋᤢ ᤐᤡᤖᤢᤛᤡ.

⁴ “ᤀᤡᤱᤃᤠ᤹ᤃ ᤗᤠᤕᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ. ᤌᤣᤀᤠᤱᤓᤧᤸᤗᤧ ᤀᤠᤵᤑᤠᤸᤗᤧᤀᤠᤱ ᤑᤧᤴ ᤕᤠ᤺ᤶᤒᤰ ᤔᤧᤴᤈᤥ᤺ᤰᤁᤣ ᤁᤧᤘᤠ᤹ᤒᤠ ᤔᤏᤠᤴ ᤀᤡᤱᤗᤧᤰᤋᤢᤱᤗᤥ॥” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤌᤣᤀᤠᤱ ᤆᤥᤃᤢᤶᤒᤧᤒᤠ ᤜᤥᤵᤗᤥ॥ ᤂᤧᤱᤃ ᤂᤧᤏᤧ᤹ ᤀᤠᤒᤠᤅᤣ ᤁᤧᤈᤥᤃᤢᤒᤠᤖᤥ॥”

⁵ ᤂᤧᤴ ᤂᤧᤵᤛᤢᤀᤠᤱ ᤕᤜᤢᤍᤠ᤺ᤸᤗᤧ ᤂᤧᤴ ᤕᤢᤵᤐᤠ ᤕᤠᤱᤅᤡᤴ ᤔᤠᤱᤜᤡᤶᤔᤥ ᤗᤠᤵᤑᤢᤛᤢᤎ. ᤜᤧᤰᤁᤩᤠᤱ ᤗ᤺ᤴᤍᤧ ᤐᤣᤀᤠᤱ ᤀᤠᤒᤠᤅᤣ ᤑᤥ᤺ᤴᤇᤡᤱ ᤛᤩᤧᤖᤥ॥

⁶ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤕᤢᤵᤐᤠ ᤕᤠᤱᤅᤡᤴ ᤔᤧᤄᤵᤛᤢᤀᤠᤱ ᤔᤧᤒᤠ᤺ᤳᤋᤢ. “ᤁᤱᤃ ᤔᤏᤠ ᤛᤧᤳᤇᤧ ᤐᤡᤔᤏᤠᤒᤠ ᤕᤠᤱᤗᤥ. ᤜᤧᤰᤁᤣ᤺ᤸᤗᤧ ᤔᤠᤱᤜᤡᤶ ᤕᤠᤱᤓᤢᤱᤔᤠᤀᤥ ᤁᤣ᤺ᤵᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤶᤒᤡᤏᤧᤴᤗᤥ॥”

⁷ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤁᤥ᤺ᤶᤓᤗᤣᤖᤧ ᤁᤢᤀᤡᤰᤋᤠᤵᤐᤡᤴ ᤋᤠᤰᤁᤴᤏᤡᤒᤠᤜᤠ᤹ ᤔᤧᤛᤡ᤺ᤸᤗᤧ ᤗᤢᤵᤔᤠᤛᤡ ᤑᤠ᤹ᤀᤠᤱ ᤀᤡᤱᤔᤠ ᤏᤡ᤺ᤴᤎᤥ ᤔᤧᤈᤥᤃᤢ॥

⁸ ᤂᤧᤸᤗᤧᤆᤥᤃᤢᤸᤗᤧ ᤀᤠᤀᤡᤴ ᤌᤠᤖᤡᤰᤛᤠᤱ ᤂᤧᤴ ᤀᤡᤰᤋᤠᤵᤐᤡᤴ ᤔᤠᤰᤂᤡ᤹ᤖᤧ ᤀᤡᤱᤔᤏᤠᤒᤠ ᤀᤡᤰᤋᤠᤵ ᤗ᤹ᤖᤡᤰ ᤔᤧᤔᤧᤳᤋᤢᤖᤥ॥

⁹ ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤷᤔᤡᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ— “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤔᤧᤜᤧᤴᤍᤢᤒᤠ ᤁᤢᤔᤧᤸᤗᤢᤱ ᤛᤢᤶᤒᤥᤱ ᤕᤢᤵᤐᤠᤕᤠᤱ ᤔᤧᤍᤠ᤺ᤰᤋᤢᤖᤥ.

¹⁰ ᤜᤧᤰᤁᤩᤠᤱ ᤍᤠᤱᤒᤧᤸᤗᤧ ᤀᤥ᤺ᤴᤎᤠᤰᤋᤠᤱᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤁᤥ᤺ᤶᤓᤗᤣᤖᤧ ᤁᤢᤀᤡᤰᤋᤠᤵᤐᤡᤴ ᤔᤧᤀᤡᤅᤢᤖᤥ॥”

ᤕᤧᤛᤢᤴ ᤐᤡᤗᤠᤋᤛᤖᤧ ᤁᤢᤍᤃᤡ

¹¹ ᤀᤠᤸᤗ ᤕᤧᤛᤢᤴ ᤖᤥᤔᤡ ᤛᤢᤜᤠᤱᤃᤧᤶᤒᤠ ᤐᤡᤗᤠᤋᤛᤖᤧ ᤁᤢᤍᤃᤡ ᤕᤧᤒᤧᤸᤗᤧ ᤛᤢᤜᤠᤱᤃᤧᤶᤒᤧᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤛᤧᤰᤂᤠ ᤂᤧᤏᤧ᤹ ᤕᤜᤢᤍᤡ ᤜᤠᤱᤏᤧᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤱᤃ ᤂᤧᤏᤧ᤹ᤀᤣ ᤁᤧᤒᤠ᤺ᤳᤋᤢᤖ ᤁᤧᤒᤳᤗᤥ॥”

¹² ᤁᤖ ᤕᤧᤛᤢᤖᤧ ᤁᤢᤍᤰᤗᤧᤱᤘᤠᤀᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤸᤗᤧ ᤂᤢᤏᤧ᤹ ᤔᤧᤶᤒᤠ᤺ᤳᤋᤣ ᤕᤧᤒᤧᤖᤥ॥

¹³ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤁᤧᤶᤃᤢ᤺ᤳᤋᤧᤒᤠ ᤀᤠᤵᤋᤡᤰᤁᤡᤴ ᤁᤧᤱᤄᤧᤵᤛᤢᤴᤒᤡ᥅”

¹⁴ ᤁᤖ ᤕᤧᤛᤢᤴ ᤐᤠ᤺ᤴᤎᤡᤰᤁᤠᤱ ᤔᤧᤶᤒᤠ᤺ᤳᤋᤣ ᤕᤧᤒᤧ. ᤜᤧᤰᤁᤣ᤺ᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤖᤥ॥

¹⁵ ᤀᤠᤸᤗ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤥ ᤗᤳᤇᤠ ᤛᤠᤰᤐᤠ ᤁᤧᤎᤠᤒᤠ ᤔᤏᤠᤴ ᤔᤏᤠᤜᤠ᤹ᤖᤧ ᤗᤧᤖᤧ ᤀᤠᤒᤡᤖᤧ᤹ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢᤸᤗᤧ ᤛᤢᤜᤠᤱᤃᤧᤶᤒᤠᤸᤗᤧ ᤗᤧᤵᤔᤠ ᤌᤡᤶ ᤁᤳᤋᤢᤖᤥ॥

¹⁶ ᤂᤧᤴ ᤕᤧᤶᤔᤥ ᤒᤖᤒ᤻ᤒᤠᤛ ᤔᤧᤵᤔᤏᤠᤒᤠ ᤁᤧᤀᤡᤱᤒᤠ ᤁᤢ᤹ᤀᤡᤃᤧᤓᤧ᤹ᤒᤠᤴ ᤐᤢᤱᤗᤠᤜᤡᤶᤔᤥ ᤛᤠᤰᤋᤧᤀᤠᤱ ᤘᤕᤧ॥

¹⁷ ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤳᤋᤡᤴ ᤗᤧᤖᤢᤱ ᤐᤡᤏᤡᤱ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤔᤠᤱ ᤁᤧᤘᤕᤡ᤹ᤒᤣ᥅ ᤒᤖᤒ᤻ᤒᤠᤛᤧᤴ ᤒᤡ ᤀᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠ ᤕᤧᤛᤢᤴ ᤗᤧᤖᤢᤱ ᤐᤡᤏᤡᤱᤒᤠᤒᤡ᥅”

¹⁸ ᤌᤣᤀᤠᤱᤓᤧᤸᤗᤧ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤕᤧᤛᤢᤴ ᤏᤠᤔᤧᤜᤧᤳᤋᤢᤀᤠᤱ ᤂᤢᤏᤧ᤹ᤀᤥ ᤜᤢᤰᤔᤧᤛᤢᤵᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤘᤕᤧ॥

¹⁹ ᤐᤡᤗᤠᤋᤛᤧᤴ ᤂᤠᤛᤧᤴ ᤕᤢᤰᤏᤠᤀᤥ ᤕᤢᤅᤧᤸᤗᤧᤀᤣ ᤔᤧᤸᤗᤡᤱᤃᤧᤴ ᤁᤢᤔᤣ᤺ᤳᤋᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤀᤡᤱᤄᤱ ᤜᤠᤰᤋᤢ. “ᤂᤧᤴ ᤛᤠᤶᤕᤥᤒᤠ ᤔᤏᤠᤴ ᤌᤣᤀᤠᤱ ᤔᤧᤔᤧᤳᤋᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤴᤍᤧ ᤛᤧᤴᤍᤡᤰ ᤂᤧᤴ ᤔᤏᤠ᤺ᤸᤗᤧ ᤆᤥᤃᤢᤸᤗᤧ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤛᤧᤵᤔᤠᤱ ᤔᤠᤰᤋᤢᤱᤗᤥ॥”

²⁰ ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤒᤖᤒ᤻ᤒᤠᤛᤧᤴ ᤗᤧᤵᤔᤠ ᤐᤠᤱᤔᤠ ᤜᤧᤰᤁᤩᤠᤱ ᤕᤧᤛᤢᤴ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤐᤠᤱᤔᤠ ᤐᤥᤱ ᤗ᤹ᤖᤡᤰ ᤔᤏᤠᤜᤠ᤹ ᤔᤧᤜᤢᤛᤢᤛᤡᤖᤥ॥

²¹ ᤛᤢᤜᤠᤱᤃᤧᤶᤒᤠᤸᤗᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤂᤧᤴ ᤏᤧᤵᤑᤢᤀᤥ ᤀᤠᤳᤋᤡᤴ ᤗᤧᤖᤢᤱ ᤐᤡᤏᤡᤱ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤒᤣ᥅” ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤒᤖᤒ᤻ᤒᤠᤛᤧᤴ ᤗᤧᤖᤧ᤹ᤀᤥ॥”

²² ᤐᤡᤗᤠᤋᤛᤖᤧ ᤛᤣ᤺ᤴᤍᤥᤛᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ ᤔᤧᤵᤔᤏᤠᤒᤠ ᤕᤧᤛᤢᤴ ᤌᤣ ᤔᤧᤳᤋᤢᤱᤒᤠᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹ᤀᤥ᥄”

²³ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤌᤣᤀᤠᤱᤒᤣ᥅ ᤂᤧᤸᤗᤧ ᤌᤣ ᤕᤠ᤺ᤶᤒᤰ ᤑᤣ᤺ᤴᤍᤢᤀᤠᤱ ᤘᤠ᤹ᤒᤣ᥅” ᤁᤖ ᤂᤧᤱᤜᤠ᤹ ᤀᤠᤸᤗᤛᤠᤱ ᤛᤠ᤹ᤖᤡᤰ ᤔᤧᤀ᤺ᤰᤋᤧ. “ᤂᤧᤴ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤴᤍᤧ᤹ᤀᤥ᥄”

²⁴ ᤀᤠᤸᤗ ᤐᤡᤗᤠᤋᤛᤖᤧ ᤌᤣᤀᤠᤱ ᤆᤥ᤺ᤰᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤏᤢ ᤕᤠᤶᤔᤥ ᤜᤕᤱᤁᤡᤸᤗᤡᤱ ᤁᤧᤒᤥᤱᤒᤠ ᤏᤡᤛᤢᤀᤠᤱ ᤁᤴ ᤐᤠ᤺ᤴᤏᤥ ᤂᤢᤏᤧ᤹ ᤁᤢᤜᤢᤰ ᤜᤥᤵ ᤗ᤹ᤖᤡᤰ ᤀᤥᤛᤣ᤺ᤴᤎᤠᤰᤛᤧ ᤁᤢᤜᤢᤰᤜᤠ᤹ ᤘᤠᤜᤵᤋᤢᤖ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤕᤠ᤺ᤶᤒᤰ ᤔᤧᤴᤓᤣ᤺ᤴᤏᤣ ᤁᤧᤘᤠ᤹ᤒᤠ ᤔᤏᤠ᤺ᤸᤗᤧ ᤁᤢᤛᤡᤔᤧᤴᤏᤥ ᤀᤡᤱᤃᤠ᤹ ᤀᤠᤗᤰ ᤜᤥᤵᤗᤥ॥ ᤀᤰᤂᤣ ᤁᤧᤈᤥ᤺ᤰᤐᤠᤜᤠ᤹ᤃ ᤒᤠ ᤂᤡᤏᤡ᤹ᤏᤡᤱᤗᤥ᥄”

²⁵ ᤜᤧᤰᤁᤣ᤺ᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤔᤧᤳᤋᤢ. “ᤁᤴ ᤐᤠ᤺ᤴᤏᤡᤸᤗᤧᤴ ᤀᤠᤵᤋᤡᤰᤁᤡᤴ ᤀᤠᤏᤡᤃᤣ ᤏᤢ ᤀᤠᤏᤡᤃᤣ ᤔᤢ᤹ᤀᤡᤍᤠᤱᤛᤠ ᤛᤶᤍᤠᤱ ᤌᤠᤖᤖᤥ᥄”

²⁶ ᤜᤧᤰᤁᤩᤠᤱ ᤐᤡᤗᤠᤋᤛᤖᤧ ᤒᤖᤒ᤻ᤒᤠᤛᤧᤴ ᤗᤧᤖᤢ ᤐᤡᤖᤢᤛᤡ. ᤁᤖ ᤕᤧᤛᤢᤴ ᤋᤧ᤺ᤶᤓᤢᤰ ᤕᤠᤰᤔᤠ ᤐᤠᤱᤄᤢᤛᤡᤀᤠᤱ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤑᤥ᤺ᤶᤔᤠ ᤑᤠ᤹ᤀᤠᤱ ᤖᤥᤔᤡ ᤌᤰᤛᤢᤒᤠᤜᤠ᤹ ᤜᤢᤰᤛᤢᤵᤋᤢᤛᤡᤖᤥ॥

²⁷ ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠᤸᤗᤧ ᤁᤢᤎᤰᤛᤢᤒᤠᤜᤠ᤹ᤖᤧ ᤕᤧᤛᤢᤴ ᤂᤢᤏᤡ᤹ ᤋᤢᤖᤠᤕᤰᤁᤥ ᤔᤧᤍᤣ᤹ᤖᤢᤀᤠᤱ ᤂᤧᤵᤔᤥ ᤋᤢᤖᤠᤒᤠ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤁᤢᤄᤡᤖᤡ ᤔᤧᤈᤢᤵᤛᤧ॥

²⁸ ᤂᤧᤱᤜᤠ᤹ᤖᤧ ᤁᤢᤍᤣ᤺ᤳᤋᤡᤴ ᤔᤧᤓᤧᤴᤍᤢ ᤔᤧᤒᤡᤖᤢᤀᤠᤱ ᤐᤖᤠᤴᤗᤠ ᤜᤠᤱᤍᤣ᤺ᤳᤋᤡᤴ ᤔᤧᤈᤠᤰᤋᤢ॥

²⁹ ᤜᤧᤰᤁᤩᤠᤱ ᤋᤡᤱᤃᤪᤣᤰᤁᤡᤸᤗᤧᤴ ᤋᤡᤆ᤺ ᤔᤧᤓᤕᤢᤀᤠᤱ ᤁᤢᤎᤧᤃᤣ᤺ᤰᤐᤥ ᤔᤧᤄᤢ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤋᤰᤁᤠ᤺ᤳᤋᤡᤴ ᤁᤢᤈᤢᤵᤛᤠᤱ ᤜᤢᤰᤁᤥ ᤔᤧᤓᤳᤇᤢᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤔᤧᤕᤢᤱᤛᤡᤱᤗ ᤀᤰᤂᤣᤗ᤹ᤖᤡᤰ ᤁᤡᤏᤠ᤺ᤴᤍᤡ ᤔᤧᤒᤡᤖᤢ. “ᤕᤜᤢᤍᤡ ᤜᤠᤱᤅᤣ. ᤋᤡᤕᤠᤜᤠ᥄”

³⁰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤌᤩᤧᤳ ᤔᤧᤎᤥ᤺ᤰᤋᤢᤀᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤎᤧᤃᤣ᤺ᤰᤐᤥ ᤀᤧᤳᤗᤧᤱ ᤔᤧᤄᤠᤰᤂᤢ॥

³¹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤕᤧᤛᤢᤴ ᤁᤡᤏᤠ᤺ᤴᤍᤡ ᤔᤧᤒᤡᤖᤢ ᤔᤧᤛᤢᤖᤢᤀᤠᤱ ᤂᤧᤴ ᤜᤠᤱᤍᤣ᤺ᤳᤋᤡᤴ ᤔᤧᤓᤧᤴᤍᤢᤀᤠᤱ ᤁᤢᤍᤣ᤺ᤳᤋᤡᤴ ᤔᤧᤈᤠᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤔᤧᤍᤣ᤹ᤖᤢᤖᤥ॥

ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤕᤧᤛᤢᤴ

³² ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤛᤠᤀᤡᤖᤣᤏᤡ ᤕᤧᤰᤕᤰᤗᤠᤶ ᤁᤧᤍᤠᤒᤠ ᤛᤡᤔᤥᤏ ᤔᤧᤵᤔᤏᤠᤒᤠ ᤔᤏᤠᤴ ᤔᤧᤍᤢᤔᤢᤀᤠᤱ ᤕᤧᤛᤢᤖᤧ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤛᤠᤰᤁᤧᤸᤗᤧᤰ ᤐᤱᤔᤠ ᤔᤧᤒᤠᤱᤄᤢ॥

³³ ᤂᤧᤱᤜᤠ᤹ ᤃᤗᤃᤌᤠ ᤔᤧᤵᤔᤏᤠᤒᤠ ᤁᤥ᤺ᤰᤔᤠᤀᤥ ᤔᤧᤃᤧᤖᤧ (ᤃᤗᤃᤌᤠ ᤑᤠ᤹ᤀᤡᤱᤃ ᤔᤡᤰᤂᤥ᤺ᤰᤐᤠ ᤐᤥᤱᤗᤥ)॥

³⁴ ᤂᤧᤵᤔᤥ ᤂᤧᤱᤜᤠ᤹ᤖᤧ ᤕᤧᤛᤢᤴ ᤁᤧᤄᤡ᤺ᤰᤐᤠ ᤛᤡᤍᤠ᤹ ᤑᤢᤵᤔᤏᤠᤒᤠ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤎᤢᤱᤄᤢ. ᤁᤖ ᤕᤧᤛᤢᤖᤧ ᤂᤧᤴ ᤛᤠ᤹ᤖᤢᤀᤠᤱ ᤌᤢᤱᤔᤠ ᤔᤧᤍᤧᤴᤍᤧᤴ॥

³⁵ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤛᤶᤍᤠᤱ ᤔᤧᤓᤥ᤺ᤴᤍᤢᤀᤠᤱ ᤁᤢᤍᤣ᤺ᤳᤜᤠ᤹ ᤜᤠ᤺ᤳᤇᤡᤱᤔᤠ ᤑᤠ᤹ᤀᤠᤱ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢᤖᤥ॥

³⁶ ᤂᤧᤱᤜᤠ᤹ᤖᤧ ᤂᤧᤵᤔᤥ ᤛᤡᤗᤠᤶᤛᤠᤰᤔᤠ ᤛᤡᤱᤅᤡᤸᤗᤧ ᤁᤢᤒᤢᤱᤔᤥ ᤔᤧᤕᤢᤅᤧᤖ ᤂᤢᤏᤧ᤹ ᤔᤧᤃᤥᤛᤢᤖᤥ॥

³⁷ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤎᤧᤃᤣᤰ ᤛᤶᤍᤠᤱ ᤁᤢᤀᤠᤵᤋᤡᤰ ᤛᤰᤁᤡᤴ ᤔᤧᤄᤡᤵᤛᤢᤀᤠᤱ ᤐᤳᤇᤧ. ᤂᤧᤵᤔᤥ “ᤁᤱᤃ ᤕᤜᤢᤍᤡᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤕᤧᤛᤢᤖᤥ” ᤗ᤹ᤖᤡᤰ ᤔᤧᤛᤠᤵᤋᤢᤀᤠᤱ ᤐᤳᤇᤧ॥

³⁸ ᤂᤢᤏᤧ᤹ᤏᤢᤀᤣ ᤁᤢᤓᤧᤴᤇᤠᤱ ᤏᤢ ᤁᤢᤈᤢᤵᤛᤠᤱᤒᤠ ᤛᤡᤗᤠᤶᤛᤠᤰᤔᤠ ᤛᤡᤱᤜᤠ᤹ ᤛᤶᤍᤠᤱ ᤏᤧᤵᤑᤢ ᤑᤠ᤺ᤴᤍᤠᤜᤠ᤹ ᤌᤰᤛᤢᤒᤠᤜᤠ᤹ᤖᤧ ᤔᤧᤓᤥ᤺ᤴᤍᤢᤛᤡᤖᤥ॥

³⁹ ᤂᤧᤵᤔᤥᤗᤠᤶ ᤗᤠᤱᤃᤧᤄᤣ᤺ᤰᤐᤠ ᤔᤏᤠᤜᤠ᤹ᤖᤧᤀᤠᤱ ᤂᤢᤏᤡ᤹ ᤌᤧᤃᤣ᤺ᤰᤐᤧᤴ ᤔᤧᤜᤡᤰᤂᤢᤖ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ.

⁴⁰ “ᤂᤧᤏᤧ᤹ ᤔᤠᤱᤜᤡᤶᤔᤡᤴ ᤁᤧᤕ᤺ᤒᤠᤀᤠᤱ ᤛᤢᤶᤕᤧᤴᤏᤥ ᤁᤧᤈᤥ᤺ᤰᤐᤣ. ᤂᤧᤏᤧ᤹ ᤏᤡᤱᤘᤠ᤹ᤑᤢᤛᤠᤏᤧ ᤑᤠ᤹ᤃᤪ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤩᤧ᤹ᤀᤠᤱ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤅᤧ᤹ᤀᤥ॥”

⁴¹ ᤜᤧᤰᤁᤣᤗ᤹ᤖᤡᤰᤁᤣ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤔᤧᤒᤡᤖᤢ॥

⁴² ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤂᤧᤸᤗᤧᤃ ᤘᤣ᤹ᤜᤠ᤹ ᤋᤠᤱᤛᤧ᤺ᤵᤋᤢᤛᤡ. ᤁᤖ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤛᤢᤰᤋᤧᤴᤗᤥ॥ ᤂᤢᤏᤧ᤹ᤃ ᤀᤡᤛᤪᤠᤀᤡᤗᤛᤔᤠ ᤜᤠᤱᤔᤢ᥄ ᤜᤠᤖᤠ᤹ ᤂᤢᤏᤧ᤹ ᤛᤡᤗᤠᤶᤛᤠᤰᤔᤠ ᤛᤡᤱᤅᤥᤗᤠᤶ ᤕᤥ ᤌᤠᤖ. ᤜᤧᤰᤁᤩᤠᤱ ᤀᤠᤏᤡᤃᤣ ᤂᤢᤏᤧ᤹ ᤏᤛᤠᤴ ᤆᤥᤃᤢᤶᤒᤧ᤹ᤖᤥ॥

⁴³ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤆᤥᤃᤢ᤹॥ ᤜᤠᤖᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤡᤱᤘᤠ᤹ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤴ ᤂᤧᤵᤔᤥᤗᤠᤶ ᤀᤠᤸᤗᤥ ᤛᤧ᤺ᤵᤋᤢᤖᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧᤃ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤛᤠᤀᤠ ᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤕᤧᤖᤥ॥”

⁴⁴ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤔᤧᤓᤥ᤺ᤴᤍᤢᤛᤡᤒᤠ ᤑᤠ᤺ᤴᤍᤠᤜᤠ᤹ᤖᤧᤀᤠᤱ ᤂᤢᤏᤧ᤹ ᤁᤡᤏᤠ᤺ᤴᤍᤡ ᤐᤡᤖᤧᤳᤇᤢᤖᤥ॥

ᤕᤧᤛᤢᤖᤧ ᤁᤢᤛᤰᤔᤠ ᤐᤣᤰ

⁴⁵ ᤜᤧᤰᤁᤩᤠᤱ ᤗᤧᤴᤍᤡᤰ ᤁᤢᤔᤢᤰ ᤌᤡᤰ-ᤏᤧᤳᤋᤠᤱᤎᤥ ᤁᤢᤔᤢᤰ ᤛᤢᤶᤛᤡ ᤌᤠᤖᤡᤰ ᤂᤠᤍᤠᤶᤔᤠᤸᤗᤧ ᤂᤧᤴ ᤗᤠᤈᤣ᤹ᤀᤡᤴ ᤛᤡᤍᤧᤵ ᤋᤧᤵᤋᤢᤖᤥ॥

⁴⁶ ᤁᤢᤔᤢᤰ ᤛᤢᤶᤛᤡ ᤔᤢᤰᤋᤧᤖ ᤐᤳᤇᤧᤸᤗᤧ ᤕᤧᤛᤢᤴ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤀᤣᤗᤡ. ᤀᤣᤗᤡ ᤗᤠᤔᤠ ᤛᤒᤂᤌᤠᤏᤡ᥅” (ᤂᤧᤴ ᤑᤠ᤹ᤀᤡᤱᤃ “ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤀᤠᤏᤡᤱᤘᤠ᤹ᤑᤢᤔᤠᤱᤅᤣ. ᤌᤣᤀᤠᤱ ᤁᤧᤗᤧᤖᤠᤱ ᤁᤧᤍᤣᤛᤠᤱᤒᤣ᥅” ᤐᤥᤱᤗᤥ॥)

⁴⁷ ᤂᤧᤵᤔᤥ ᤁᤧᤕᤧᤵᤐᤠ ᤁᤢᤓᤠᤖᤧ ᤂᤧᤴ ᤔᤧᤄᤧᤵᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤀᤢ᤺ᤳᤋᤢᤖ ᤐᤳᤗᤥ॥”

⁴⁸ ᤂᤧᤱᤜᤠ᤹ᤀᤥ ᤗᤳᤇᤠ ᤔᤏᤠᤎᤡᤰ ᤂᤡᤔᤥ ᤗᤥ᤺ᤰᤋᤧᤖ ᤐᤣᤀᤠᤱ ᤂᤡᤃᤠᤰᤔᤠ᤺ᤴ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ ᤌᤡᤀᤥ ᤏᤡ᤺ᤵᤛᤢ ᤜᤧᤰᤁᤩᤠᤱ ᤋᤰᤁᤠ᤺ᤳᤋᤡᤸᤗᤧ ᤁᤢᤛᤶᤔᤥ ᤑᤳᤇᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤐᤡ᤺ᤳᤋᤢ ᤌᤢᤅᤢᤖ ᤑᤠ᤹ᤀᤠᤱ ᤁᤢᤔᤢᤖᤠᤀᤥ ᤌᤢᤵᤋᤢ ᤐᤡᤖᤢᤖᤥ॥

⁴⁹ ᤁᤢᤓᤠᤖᤧ ᤔᤧᤒᤠ᤺ᤳᤋᤢ. “ᤛᤵᤑᤠᤖᤥ. ᤀᤣᤗᤡᤕᤠᤴ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤕᤢ᤺ᤀᤠᤱ ᤂᤧᤴ ᤋᤠᤱᤛᤧ᤺ᤵᤋᤢ᤹ᤒᤡ ᤔᤣ᤺ᤶᤒᤡ ᤀᤥᤔᤧᤳᤋᤢᤶᤗᤥ॥”

⁵⁰ ᤜᤧᤰᤁᤩᤠᤱ ᤕᤧᤛᤢᤴ ᤕᤠᤶᤔᤥ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. ᤜᤧᤰᤁᤩᤠᤱ ᤁᤢᤛᤰᤔᤠ ᤐᤣᤀᤠᤱ ᤛᤩᤧᤖᤥ॥

⁵¹ ᤒᤠ ᤂᤧᤴ ᤕᤧᤶᤔᤥ ᤔᤠᤱᤜᤡᤶᤔᤥᤒᤠ ᤑᤥ᤺ᤴᤍᤠᤴ ᤌᤥᤗᤠᤶ ᤕᤥ ᤁᤢᤒᤢᤱᤔᤥ ᤌᤠᤖᤡᤰ ᤂᤧᤸᤗᤧᤰ ᤋᤧ᤺ᤰᤂᤧ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤛᤠ᤹ᤖᤡᤰ ᤌᤢᤖᤢᤵᤗᤢᤵ ᤕᤰᤂᤧ. ᤐᤕᤶ ᤗᤢᤱᤜᤠ᤹ ᤐ᤺ᤰᤂᤧ.

⁵² ᤀᤡ᤺ᤵᤐᤢᤱᤜᤠ᤹ ᤔᤧᤜᤖᤧᤀᤠᤱ ᤀᤢᤴᤇᤣ᤺ᤴ ᤁᤧᤛᤡᤒᤠᤀᤠᤱ ᤁᤧᤘᤠ᤹ᤒᤠ ᤕᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤏᤧᤳᤋᤡᤃᤧᤴ ᤜᤡᤱᤔᤴᤏᤥ ᤁᤢᤜᤡᤱᤘᤧᤳ ᤔᤧᤒᤥ᤺ᤰᤂᤧᤀᤠᤱ ᤔᤧᤒᤥᤃᤧᤖᤥ॥

⁵³ ᤂᤧᤱᤜᤠ᤹ ᤀᤡ᤺ᤵᤐᤢᤱᤜᤠ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧ ᤜᤧᤰᤁᤩᤠᤱ ᤕᤧᤛᤢᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤕᤠᤱᤛᤡ ᤂᤧᤱᤜᤠ᤹ ᤛᤣᤛᤣ ᤕᤧᤰᤕᤰᤁᤥ ᤔᤧᤒᤣᤀᤠᤱ ᤕᤖᤡᤰ ᤔᤏᤠᤜᤠ᤹ᤖᤥ ᤏᤡᤔᤧᤎᤠᤒᤧᤖᤥ॥

⁵⁴ ᤂᤧᤵᤔᤥ ᤖᤥᤔᤡ ᤌᤰᤋᤢᤶᤒᤠᤴ ᤏᤢ ᤘᤣ᤹ᤜᤠ᤹ᤖᤧ ᤕᤧᤛᤢᤴ ᤔᤧᤃᤥᤛᤢᤖ ᤔᤧᤕᤢᤅᤧ॥ ᤂᤧᤱᤜᤠ᤹ᤖᤧ ᤗᤢᤵᤗᤡ ᤌᤠᤅᤧᤒᤠ ᤏᤢ ᤂᤧᤵᤔᤥ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤔᤧᤏᤡᤛᤢᤀᤠᤱ ᤛᤠ᤹ᤖᤡᤰ ᤔᤧᤃᤡᤛᤧᤖ ᤔᤧᤀ᤺ᤰᤋᤧ. “ᤛᤧᤰᤂᤠᤛᤠᤱ ᤁᤴ ᤔᤏᤠᤴ ᤏᤡᤱᤘᤠ᤹ᤑᤢᤛᤠᤀᤣ ᤘᤕᤧᤖᤧᤳᤇ॥”

⁵⁵ ᤂᤧᤵᤔᤥ ᤕᤖᤡᤰ ᤔᤧᤴᤇᤢᤔᤠᤜᤠ᤹ ᤔᤠ᤺ᤱᤄᤠᤗᤠᤶ ᤀᤥᤔᤀᤡ ᤔᤧᤕᤧᤒᤧ॥ ᤂᤧᤱᤜᤠ᤹ᤖᤧᤃ ᤕᤧᤛᤢᤴ ᤃᤠᤗᤡᤗᤗᤠᤶᤔᤣ ᤁᤢᤛᤧᤘᤠ ᤆᤥ᤺ᤰᤛᤧ ᤔᤧᤍᤡᤶᤍᤢᤖ ᤔᤧᤍᤩᤧᤀᤠᤱ ᤔᤧᤘᤕᤧᤖᤥ॥

⁵⁶ ᤂᤧᤵᤔᤥ ᤁᤧᤘᤠ᤹ᤔᤠᤜᤠ᤹ᤀᤥ ᤔᤖᤡᤕᤔ ᤔᤃ᤻ᤍᤗᤡᤏᤡ. ᤕᤠᤁᤢᤒ ᤏᤢ ᤕᤢᤛᤢᤑᤖᤧ ᤁᤢᤶᤔᤠ ᤔᤖᤡᤕᤔ. ᤜᤧᤰᤁᤩᤠᤱ ᤈᤒ᤻ᤍᤡᤕᤠᤖᤧ ᤁᤢᤔᤣᤳ (ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤁᤢᤶᤔᤠ) ᤔᤧᤘᤕᤧᤖᤥ॥

ᤕᤧᤛᤢᤴ ᤀᤡ᤺ᤵᤐᤢᤱᤅᤥ ᤔᤧᤏᤧᤛ᤻ᤛᤢ᤹

⁵⁷ ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤐᤥ᤺ᤰᤂᤧᤖ ᤐᤳᤇᤧᤸᤗᤧ ᤀᤠᤖᤡᤔᤠᤌᤡᤕᤠ ᤐᤠᤱᤈᤢᤶᤒᤠ ᤕᤢᤛᤢᤑ ᤔᤧᤵᤔᤏᤠᤒᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤏᤠᤴ ᤋᤩᤧ॥ ᤂᤢᤏᤧ᤹ᤀᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥

⁵⁸ ᤂᤧᤴ ᤐᤡᤗᤠᤋᤛᤖᤥ ᤐᤣᤀᤠᤱ ᤕᤧᤛᤢᤖᤧ ᤁᤢᤎᤰᤁᤡᤴ ᤏᤠ᤺ᤰᤋᤢ. ᤜᤧᤰᤁᤩᤠᤱ ᤐᤡᤗᤠᤋᤛᤖᤧᤀᤠᤱ ᤂᤧᤴ ᤔᤧᤒᤡᤖᤢᤖ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡᤖᤥ॥

⁵⁹ ᤕᤧᤛᤢᤖᤧ ᤁᤢᤎᤰᤁᤡᤴ ᤕᤢᤛᤢᤑᤖᤧ ᤋᤣ᤹ᤖᤢᤀᤠᤱ ᤏᤢᤒᤠ ᤆᤣᤍᤣ᤺ᤳᤋᤡᤸᤗᤧ ᤁᤡᤳᤋᤢ.

⁶⁰ ᤜᤧᤰᤁᤩᤠᤱ ᤀᤠᤒᤠᤅᤣ ᤁᤢᤗᤠᤃᤡ ᤗᤢᤱᤅᤥ ᤂᤥ᤺ᤶᤔᤏᤠᤒᤠ ᤁᤢᤛᤱ ᤀᤡ᤺ᤵᤐᤢᤱᤅᤥ ᤏᤧᤛ᤻ᤛᤢᤖᤥ॥ ᤜᤧᤰᤁᤩᤠᤱ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤢᤱᤅᤡᤸᤗᤧ ᤌᤣ᤺ᤰᤋᤢᤎ᤺ᤀᤠᤱ ᤏᤢ᤺ᤰᤂᤧ ᤐᤣᤖᤥ॥

⁶¹ ᤔᤖᤡᤕᤔ ᤔᤃ᤻ᤍᤗᤡᤏᤡ᤺ᤴ ᤏᤢ ᤘᤣ᤹ᤛᤔᤠ ᤔᤖᤡᤕᤶᤔᤡᤸᤗᤧ ᤂᤧᤴ ᤏᤡ᤺ᤳᤋᤠᤱᤏᤢᤀᤣ ᤀᤥᤔᤧᤳᤋᤧᤳᤇᤢᤖ ᤕᤢᤅᤧᤳᤇᤡ॥

⁶² ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤐᤡᤗᤠᤋᤛᤖᤥ ᤔᤧᤒᤣᤀᤠᤱ

⁶³ ᤀᤰᤂᤣ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤴ ᤀᤡᤱᤗᤧᤰᤐᤧᤴ ᤁᤢᤜᤡᤱᤘᤧᤳ ᤘᤕᤧᤸᤗᤧ ‘ᤀᤡᤱᤃᤠ᤹ ᤛᤡᤀᤠᤒᤠ ᤛᤢᤶᤕᤧᤴᤏᤥ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤅᤠᤖᤥ’ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤀᤡ᤺ᤵᤔᤏᤠᤖᤥ॥

⁶⁴ ᤂᤧᤸᤗᤧᤆᤥᤃᤢᤸᤗᤧ ᤀᤠᤍᤠᤱᤒᤠᤖᤧ ᤛᤢᤶᤕᤧᤴ ᤌᤠᤖᤡᤰ ᤛᤡᤱᤛᤡᤱᤅᤠᤱ ᤁᤢ᤺ᤀᤡᤵᤐᤢᤱᤅᤡᤴ ᤁᤥᤔᤠ ᤐᤠᤱᤄᤧᤛᤧ᤹ᤀᤥ॥ ᤔᤣ᤺ᤴᤏᤣ ᤑᤠ᤹ᤃᤪ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤧᤴᤍᤡᤰ ᤔᤧᤍᤠᤀᤠᤱ ᤁᤢᤎᤰᤁᤡᤴ ᤔᤧᤄᤢ᤺ᤳᤋᤢ ᤔᤧᤍᤣ᤹ᤖᤢ᤹. ᤜᤧᤰᤁᤩᤠᤱ ‘ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤘᤠ᤹’ ᤗ᤹ᤖᤡᤰ ᤔᤏᤠᤜᤠ᤹ ᤔᤧᤔᤧᤳᤋᤢᤛᤡ᤹ᤖᤥ॥ ᤁᤴ ᤐᤠ᤺ᤴᤏᤡᤱᤃ ᤋᤃᤡᤛᤔᤠ ᤀᤡᤱᤗᤧᤰᤁᤡᤴᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥᤱᤗᤥ॥”

⁶⁵ ᤜᤧᤰᤁᤣ᤺ᤸᤗᤧ ᤐᤡᤗᤠᤋᤛᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡ᤺ᤵᤐᤢᤱ ᤁᤧᤃᤥᤒᤠ ᤌᤰᤛᤢᤒᤠᤜᤠ᤹ ᤋᤣ᤹ᤖᤧᤶᤛᤡᤶᤔᤧ᤹ᤀᤠᤱ ᤂᤡᤏᤡ᤹ ᤛᤢᤰᤛᤢᤰ ᤂᤧᤴ ᤀᤡ᤺ᤵᤐᤢᤱᤅᤡᤴ ᤁᤥᤛᤧᤶᤔᤧ᤹॥”

⁶⁶ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤧᤒᤣᤀᤠᤱ ᤀᤡ᤺ᤵᤐᤢᤱᤅᤡᤸᤗᤧ ᤁᤢᤔᤢᤖᤠᤀᤥᤒᤠ ᤗᤢᤱᤅᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤀᤠᤱ ᤔᤏᤠᤜᤠ᤹ᤖᤧ ᤔᤧᤴᤜᤴᤍᤢᤴᤗ ᤑᤠ᤹ᤀᤠᤱ ᤌᤰᤛᤢᤒᤠᤜᤠ᤹ ᤂᤧᤵᤔᤥ ᤁᤥᤔᤠ ᤔᤧᤒᤠᤱᤄᤢᤛᤡᤖᤥ॥