ᤔᤳᤋᤡ 26 - LIFOTNT

ᤕᤧᤛᤢᤴ ᤛᤧᤵᤔᤠ ᤆᤧᤶᤓᤴ

¹ ᤕᤧᤛᤢᤖᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ.

² “ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤋᤠᤔᤠ ᤏᤡᤕᤧᤴᤗᤰ ᤘᤠ᤹ᤒᤠᤃ ᤂᤡᤏᤡ᤹ ᤁᤧᤏᤡᤛᤢᤶᤔᤣᤖᤥ. ᤜᤧᤰᤁᤩᤠᤱ ᤔᤧᤴᤇᤠᤶᤛᤠᤴ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤇᤧ ᤜᤢᤰᤔᤧᤛᤢᤵᤋᤢ᤹ᤖᤥ॥”

³ ᤂᤧᤴ ᤕᤧᤶᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤜᤡᤶᤔᤥ ᤔᤧᤈᤢᤵᤛᤧ॥ ᤂᤧᤸᤗᤧ ᤁᤢᤔᤡᤱᤃ ᤁᤤᤕᤠᤑᤠᤛ ᤘᤕᤧ॥

⁴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤀᤠᤰᤂᤣᤗ᤹ᤖᤡᤰ ᤛᤫᤠ᤺ᤳᤋᤠᤱ ᤋᤧᤶᤔᤠᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤆᤧᤶᤓᤴ ᤔᤧᤈᤥᤃᤢᤖᤥ॥

⁵ ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤁᤴ ᤋᤱᤏᤠᤶᤔᤥᤃ ᤀᤠᤏᤡ᤹ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤁᤴ ᤔᤏᤠᤜᤠ᤹ᤖᤧ ᤜᤕᤱᤁᤡᤸᤗᤡᤱ ᤔᤧᤈᤥᤃᤢ᤹ᤖᤥ॥”

⁶ ᤂᤧᤴ ᤕᤧᤶᤔᤥ ᤕᤧᤛᤢᤴ ᤒᤣᤌᤠᤏᤡ ᤐᤠᤱᤓᤣ᤹ᤀᤥ ᤗᤥᤃᤣ᤹ ᤋᤢᤰᤔᤠᤗᤠᤶ ᤁᤧᤘᤣ᤺ᤵᤐᤠ ᤛᤡᤔᤥᤏᤖᤧ ᤁᤢᤜᤡᤶᤔᤥ ᤘᤕᤧᤖᤥ॥

⁷ ᤜᤧᤰᤁᤩᤠᤱ ᤆᤠᤈᤠᤏᤢ ᤕᤢᤅᤧᤸᤗᤧ ᤔᤧᤴᤇᤢᤔᤠ᤹ᤎᤡᤰ ᤀᤡᤔᤧᤸᤗᤢᤱᤒᤠ ᤑᤢᤱᤏᤠᤶ ᤁᤧᤕᤠᤰᤐᤠ ᤗᤧᤶᤓᤠᤗᤢᤱ ᤐᤷᤕᤠᤔᤠᤏᤢ ᤋᤩᤧᤀᤠᤱ ᤕᤧᤛᤢᤖᤧ ᤁᤢᤎᤧᤃᤣ᤺ᤰᤐᤥ ᤜᤢᤰᤂᤢᤖᤥ॥

⁸ ᤂᤧᤴ ᤔᤧᤏᤡᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. “ᤌᤣᤀᤠᤱ ᤁᤴ ᤑᤢᤱᤏᤠᤶᤔᤡᤴ ᤆᤠᤛᤥ᤺ᤰᤂᤢᤒᤠᤒᤣ᥅

⁹ ᤁᤱᤃ ᤕᤖᤡᤰ ᤕᤠᤱᤅᤥ ᤛᤱᤔᤠᤀᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ ᤐᤡ᤺ᤶᤏᤠᤛᤡᤸᤗᤧ ᤐᤥ᤺ᤰᤂᤧᤒᤠᤖᤥ॥”

¹⁰ ᤕᤧᤛᤢᤖᤧ ᤁᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱ ᤁᤴ ᤔᤧᤴᤇᤢᤔᤠ᤹ᤀᤡᤴ ᤋᤢᤰᤂᤣ ᤁᤧᤈᤠ᤺ᤳᤋᤢᤶᤒᤠᤒᤣ᥅ ᤂᤧᤸᤗᤧᤃ ᤀᤠᤗᤠᤃᤡ ᤏᤢᤒᤠ ᤆᤥᤃᤢᤀᤠᤱ ᤘᤠ᤹ᤖᤥ॥

¹¹ ᤕᤠᤱᤃᤧᤛᤠ᤹ᤒᤠᤜᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤖᤥ॥ ᤁᤖ ᤀᤡᤱᤃᤠ᤹ᤃ ᤛᤍᤠᤍᤡᤱ ᤂᤡᤏᤡ᤹ᤏᤢ ᤔᤧᤘᤠ᤹ᤀᤠᤴᤗᤥ॥

¹² ᤂᤧᤸᤗᤧ ᤏᤠᤛᤡᤱᤃᤧᤴ ᤀᤠᤎᤰᤁᤥ ᤑᤢᤱᤏᤠᤶᤔᤡᤴ ᤜᤢᤰᤂᤢᤀᤠᤱ ᤀᤠᤗᤢᤵᤔᤠᤸᤗᤧᤴ ᤕᤠᤖᤡᤵ ᤆᤥᤃᤢᤀᤠᤱ ᤘᤠ᤹ᤖᤥ॥

¹³ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤳᤋᤡᤛᤠᤱ ᤛᤢᤏᤠᤀᤡᤱ ᤀᤡᤱᤓᤥ᤺ᤸᤗᤧ. ᤂᤧᤵᤔᤥ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤆᤥᤃᤢᤒᤠ ᤁᤢᤕᤠ᤺ᤶᤒᤰᤁᤡᤴ ᤔᤏᤠᤜᤠ᤹ᤖᤧ ᤔᤧᤈᤧᤰᤂᤢᤀᤠᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖᤥ॥”

¹⁴ ᤜᤧᤰᤁᤩᤠᤱ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤕᤜᤢᤍᤠ ᤀᤡᤛ᤻ᤁᤖᤡᤕᤥᤋ ᤔᤧᤵᤔᤏᤠᤒᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤥ ᤐᤣᤀᤠᤱ

¹⁵ ᤔᤧᤳᤋᤛᤡ. “ᤕᤧᤛᤢᤴ ᤁᤧᤍᤧᤶᤛᤢᤶᤗ ᤑᤠ᤹ᤀᤠᤱ ᤂᤡᤏᤡ᤹ ᤜᤢᤰᤁᤥ ᤌᤠ᤺ᤛᤢᤱ ᤐᤡᤏᤡᤱᤅᤡᤸᤗᤧ ᤀᤡᤱᤃᤠ᤹ ᤌᤣ ᤕᤠᤵᤔᤡ ᤀᤠᤃᤧᤒᤡᤖᤡᤒᤣ᥅” ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤛᤢᤶᤒᤥᤱ (᥉᥆) ᤕᤢᤵᤐᤠᤕᤠᤱ ᤂᤧᤴ ᤔᤧᤒᤡᤖᤢᤖᤥ॥

¹⁶ ᤂᤧᤴ ᤕᤧᤶᤔᤠᤱᤎᤥ ᤕᤜᤢᤍᤠ᤺ᤸᤗᤧ ᤕᤧᤛᤢᤴ ᤀᤡᤱᤗᤧᤰᤔᤠ ᤑᤠ᤹ᤀᤠᤱ ᤛᤢᤕᤧᤶ ᤁᤥ᤺ᤵᤔᤠ ᤜᤣ᤺ᤰᤋᤢᤖᤥ॥

ᤕᤧᤛᤢᤖᤧ ᤋᤱᤏᤠᤶᤔᤥ ᤁᤢᤏᤢᤵᤔᤠ ᤆᤠ ᤆ᤹᤺

¹⁷ ᤀᤠᤸᤗ ᤛᤡᤍᤠ᤹ ᤔᤧᤴᤓ᤺ᤴᤏᤣᤒᤠ ᤂᤖᤧ᤺ᤱ ᤆᤠᤔᤠ ᤋᤱᤏᤠᤶᤔᤡᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠ ᤀᤠᤳᤋᤥ ᤕᤠᤖᤡᤵ ᤆᤥ᤺ᤰᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤀᤠᤱ ᤘᤠ᤹ᤒᤣ᥅”

¹⁸ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤕᤧᤰᤕᤰᤁᤥ ᤐᤣᤃᤧᤶᤔᤧ᤹. ᤂᤧᤵᤔᤥ ᤗᤳᤇᤠ ᤔᤏᤠᤎᤡᤰ ᤁᤧᤍᤢᤔᤢᤶ॥ ᤂᤧᤴ ᤀᤰᤂᤣ ᤔᤧᤳᤋᤧᤶᤔᤧ᤹. ‘ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤠ᤹. ᤀᤡᤱᤃᤠ᤹ ᤀᤠᤕᤧᤶᤔᤡᤴ ᤏᤡ᤺ᤳᤋᤠᤱᤅᤣ ᤋᤩᤧᤀᤠᤱ ᤘᤠ᤹ᤖᤥ. ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤀᤠᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤛᤛᤠᤱᤛᤪᤥᤳ ᤆᤥᤃᤢᤶᤒᤧ᤹ᤖᤥ॥’”

¹⁹ ᤜᤧᤰᤁᤣ᤺ᤸᤗᤧ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡ᤺ᤰᤁᤣ ᤕᤜᤢᤍᤡ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤖᤧᤴ ᤆᤠᤔᤠ ᤌᤢᤱᤔᤠᤴ ᤕᤠᤖᤡᤵ ᤆᤥᤃᤧᤳᤇᤢ॥

²⁰ ᤜᤧᤰᤁᤩᤠᤱ ᤕᤢ᤺ᤴᤇᤡᤰ ᤕᤧᤛᤢᤴ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤛᤥᤖᤡᤰ ᤆᤠᤔᤠ ᤋᤧᤴᤏᤥ ᤕᤢᤱᤛᤡᤱ॥

²¹ ᤜᤧᤰᤁᤩᤠᤱ ᤔᤧᤈᤖ ᤔᤧᤕᤢᤅᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤌᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥”

²² ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤏᤡᤱᤛᤠᤶᤔᤥ ᤔᤧᤎᤩᤧᤀᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤛᤣ᤺ᤴᤍᤥᤔᤠ ᤔᤧᤜᤣ᤺ᤰᤋᤢ. “ᤍᤠᤱᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠᤴ ᤀᤡᤱᤃᤠ᤹ᤒᤡ᥅”

²³ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤀᤠᤸᤗᤥ ᤀᤡᤱᤃᤠ᤹ᤏᤢ ᤛᤥᤖᤡᤰ ᤁᤧᤈᤠᤒᤠᤖ ᤁᤧᤕᤢᤱᤒᤠᤎᤡᤰᤁᤡᤸᤗᤧ ᤀᤡᤱᤃᤠ᤹ ᤀᤡᤱᤗᤧᤰᤁᤠᤖᤥ॥

²⁴ ᤔᤧᤴᤇᤠᤶᤛᤠ᤺ᤱᤃ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤒᤠ ᤁᤢᤀᤡᤛᤡ᤺ᤰᤁᤣ ᤛᤡᤔᤠᤀᤣ ᤐᤥᤱᤗᤥ॥ ᤁᤖ ᤔᤧᤴᤇᤠᤶᤛᤠᤴ ᤀᤡᤱᤃᤧᤗᤧᤰᤐᤧᤱᤃ ᤆᤡ᤺ᤳᤋᤧᤛᤩᤧᤖᤥ᥄ ᤂᤧᤱᤃ ᤛᤠᤔᤧᤘᤠ᤺ᤴᤇᤡᤱᤅᤡᤴᤏᤡᤸᤗᤧ ᤏᤢᤖᤧᤒᤠᤖᤥ॥”

²⁵ ᤜᤧᤰᤁᤩᤠᤱ ᤛᤧᤰᤂᤠᤀᤥ ᤂᤢᤏᤧ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤕᤜᤢᤍᤠ᤺ᤸᤗᤧᤀᤠᤱ ᤛᤣ᤺ᤴᤍᤥᤛᤢ. “ᤛᤡᤰᤛᤠᤶᤒᤣ. ᤁᤧᤒᤠ᤺ᤳᤋᤢᤒᤠ ᤔᤏᤠᤴ ᤀᤡᤱᤃᤠ᤹ᤀᤣᤒᤡ᥅” ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ ᤀᤠᤒᤠᤅᤣ ᤁᤧᤒᤠ᤺ᤳᤋᤢᤖᤥ॥”

²⁶ ᤂᤧᤱᤜᤠ᤹ᤖᤧ ᤔᤧᤈᤖ ᤔᤧᤕᤢᤅᤧᤸᤗᤧ ᤕᤧᤛᤢᤖᤧ ᤂᤖᤧ᤺ᤱᤅᤡᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤁᤴ ᤋᤠ᤺ᤰᤋᤧᤶᤔᤧ᤹ᤀᤠᤱ ᤆᤧᤶᤔᤧ᤹ᤀᤥ. ᤁᤱᤃ ᤏᤠᤛᤡᤱᤃᤧᤴ ᤀᤠᤎᤰᤗᤥ॥”

²⁷ ᤜᤧᤰᤁᤩᤠᤱ ᤆᤸᤗᤱᤏᤠ ᤂᤥᤷᤕᤠᤴ ᤐᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤡᤖᤢᤛᤡ. “ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤌᤢᤅᤧᤶᤔᤧ᤹ᤀᤥ॥

²⁸ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤆᤥ᤺ᤰᤔᤏᤠᤒᤠ ᤁᤢᤛᤱ ᤔᤠᤱᤜᤢᤵᤗᤧᤴ ᤀᤠᤔᤠᤰᤂᤡ᤹ᤖᤥ॥ ᤁᤴ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤴ ᤗᤧᤵᤔᤡ ᤐᤥᤱᤗ ᤑᤠ᤹ᤀᤠᤱ ᤘᤠᤍᤣ᤺ᤴᤗᤥ॥

²⁹ ᤀᤡᤱᤃᤠ᤹ ᤔᤧᤳᤏᤡᤱ. ᤀᤠᤀᤡᤴᤏᤠᤱᤎᤥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤜᤠᤱᤈᤢᤶᤔᤥ ᤂᤡᤏᤡ᤹ᤏᤢ ᤁᤢᤛᤱ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤴᤎᤢᤱᤅᤣ ᤌᤠᤖᤡᤰ ᤕᤠᤶᤔᤥ ᤆᤧᤸᤗᤧᤰᤛᤣ᤹ ᤌᤡᤴ ᤔᤧᤎᤢᤱᤅᤠᤴᤗᤥ॥”

³⁰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤠᤱᤛᤧᤘᤠ ᤛᤠᤶᤗᤥ ᤛᤠᤶᤔᤧᤗᤥᤖᤧᤀᤠᤱ ᤈᤤᤋᤢᤏ ᤁᤥ᤺ᤰᤔᤠᤀᤥ ᤔᤧᤒᤣᤖᤥ॥

ᤐᤋᤪᤢᤛᤖᤧ ᤏᤠ᤹ᤖᤢᤒᤠ

³¹ ᤂᤧᤵᤔᤥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤀᤡᤴ ᤛᤧᤴᤍᤡᤰᤛᤠ ᤂᤡᤏᤡ᤹ ᤁᤧᤖᤧᤰᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤗᤧᤖᤡ᤹ᤀᤠᤱ ᤁᤧᤒᤣᤃᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “‘ᤀᤡᤱᤃᤠ᤹ ᤔᤧᤸᤗᤢᤰᤁᤶᤒᤠᤴ ᤜᤡᤵᤋᤢᤱ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤸᤗᤢᤰᤜᤠ᤹ ᤁᤧᤖᤧᤰ ᤐᤡᤛᤠᤱ ᤔᤧᤛᤧᤖᤥ॥’

³² ᤁᤖ ᤀᤡᤱᤃᤠ᤹ ᤁᤢᤛᤡᤘᤧᤳᤗᤠᤶ ᤁᤢᤜᤡᤱᤘᤧᤳ ᤐᤥᤱᤅᤠᤀᤠᤱ ᤂᤡᤏᤡ᤹ᤏᤢ᤺ᤸᤗᤧ ᤋᤃᤡ ᤃᤠᤗᤡᤗ ᤌᤢᤶᤔᤥ ᤐᤣ᤺ᤰᤁᤠᤖᤥ॥”

³³ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤁᤧᤖᤧᤰᤗᤧ ᤂᤧᤏᤧ᤹ ᤁᤧᤶᤗᤧᤳ ᤁᤧᤶᤎᤠᤛᤠᤱ ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤳᤏᤧᤴᤗᤥ॥”

³⁴ ᤕᤧᤛᤢᤖᤧ ᤔᤧᤳᤋᤢ. “ᤐᤋᤪᤢᤛᤣ. ᤛᤧᤰᤂᤠᤀᤣ ᤔᤧᤳᤏᤧ᤹. ᤀᤠᤰᤂᤥ ᤛᤧᤴᤍᤡᤰ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤢᤏᤧ᤹ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴ ᤁᤧᤒᤠ᤺ᤳᤋᤢᤖ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠᤖᤥ॥”

³⁵ ᤁᤖ ᤐᤋᤪᤢᤛᤖᤧ ᤜᤠᤍᤡᤱ ᤌᤰᤋᤧᤖ ᤔᤧᤳᤋᤢ. “ᤔᤣ᤺ᤴᤗᤥ. ᤀᤡᤱᤃᤠ᤹ᤃ ᤂᤧᤏᤧ᤹ᤏᤢ ᤛᤡᤔᤠ ᤐᤥᤱᤛᤠᤱ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤏᤧᤴᤗᤥ॥” ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤒᤠ᤺ᤳᤋᤢᤖᤥ॥

ᤃᤧᤋᤛᤔᤏᤡᤀᤥ ᤕᤧᤛᤢᤴ ᤋᤢᤘᤠ ᤆᤥᤰ

³⁶ ᤜᤧᤰᤁᤩᤠᤱ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤃᤧᤋᤛᤔᤏᤡ ᤔᤧᤵᤔᤏᤠᤒᤠ ᤈᤤᤋᤢᤏ ᤛᤡᤱᤗᤠᤀᤥ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤂᤧᤵᤔᤥ ᤋᤢᤘᤠ ᤆᤥᤃᤢᤱᤅᤡᤸᤗᤧ ᤂᤡᤏᤡ᤹ ᤁᤵᤔᤥ ᤕᤢᤅᤧᤶᤔᤧ᤹ᤀᤥ॥”

³⁷ ᤕᤧᤛᤢᤖᤧ ᤐᤋᤪᤢᤛᤧᤴ ᤏᤢ ᤈᤒ᤻ᤍᤡᤕᤠᤖᤧ ᤏᤧᤵᤑᤢ ᤁᤢᤛ᤻ᤛᤠᤜᤠ᤹ ᤂᤢᤏᤧ᤹ᤏᤢ ᤋᤣ᤹ᤖᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤛᤠ᤹ᤖᤡᤰ ᤔᤡᤱᤘᤠᤖᤧ ᤁᤢᤎᤡᤶᤏᤢ ᤏᤡᤱᤛᤠᤶᤔᤥ ᤌᤩᤧᤖᤥ॥

³⁸ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤡᤱᤃᤠ᤹ᤃ ᤔᤡᤱᤘᤠᤖᤧ ᤕᤥ᤺ᤴᤍᤠᤱᤅᤠᤱ ᤛᤡᤔᤠᤗᤡᤱᤎᤥ ᤌᤠᤖᤡᤰ ᤁᤧᤖᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤵᤔᤥ ᤆᤠᤱᤈᤠᤱᤅᤠᤱ ᤕᤢᤅᤧᤶᤔᤧ᤹ᤖ ᤕᤠᤵᤔᤡ ᤆᤢᤶ ᤀᤠᤔᤧᤳᤋᤧᤶᤔᤧ᤹ᤀᤥ॥”

³⁹ ᤂᤢᤏᤧ᤹ ᤕᤠᤶᤔᤥ ᤔᤡᤛᤠᤰ ᤏᤠᤏᤠᤰ ᤐᤣᤀᤠᤱ ᤂᤠᤶᤔᤥ ᤛᤠᤶᤒᤥᤴ ᤑᤴᤇᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤋᤢᤘᤠ ᤆᤥᤃᤧᤖᤥ. “ᤐᤠᤏᤢᤍᤡᤱ ᤀᤠᤶᤒᤣ. ᤐᤥᤱᤔᤠ ᤛᤢᤰᤏᤧ ᤑᤠ᤹ᤃᤪ. ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠᤴ ᤀᤡᤱᤃᤠ᤹ᤀᤥᤗᤠᤶ ᤂᤧᤳᤋᤧᤍᤣᤛᤧ᤹ᤀᤥ॥ ᤜᤧᤰᤁᤣᤛᤠᤱ ᤀᤠᤏᤡᤱᤘᤠ᤹ ᤜᤧᤰᤁᤣᤃ ᤔᤣ᤺ᤴ. ᤁᤖ ᤁᤧᤏᤡᤱᤘᤠ᤹ ᤜᤧᤰᤁᤣᤀᤣ ᤐᤥᤱᤗᤖᤥ॥”

⁴⁰ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ॥ ᤕᤧᤛᤢᤖᤧ ᤐᤋᤪᤢᤛᤧᤴ ᤔᤧᤳᤋᤢ. “ᤂᤡᤏᤡ᤹ ᤁᤢᤔᤢᤰᤌᤡᤰᤁᤠᤱ ᤀᤡᤱᤃᤠ᤹ᤏᤢ ᤆᤠᤱᤈᤠᤱᤅᤠᤱ ᤕᤢᤱᤔᤠ ᤁᤧᤴᤇᤢᤰᤋᤡᤴᤒᤡ᥅

⁴¹ ᤜᤱᤛᤠ᤹ᤔᤠᤀᤥ ᤔᤧᤎᤩᤧ᤹ᤀᤡᤃᤧᤴᤗ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤠᤱᤈᤠᤱᤅᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥ ᤂᤡᤏᤡ᤹ ᤏᤡᤱᤘᤠ᤹ᤀᤡᤸᤗᤧ ᤏᤢᤖᤡᤰᤁᤠᤱ ᤆᤥ᤺ᤰᤔᤠ ᤁᤧᤃᤥ᤺ᤳᤋᤢᤶ. ᤁᤖ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤱᤃ ᤔᤧᤎᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ ᤁᤧᤴᤇᤢᤰᤋᤢᤶᤔᤡᤸᤗᤥ॥”

⁴² ᤂᤢᤏᤧ᤹ ᤕᤠᤶᤔᤥ ᤐᤣᤀᤠᤱ ᤋᤢᤘᤠ ᤆᤥᤃᤢ. “ᤐᤠᤏᤢᤍᤡᤱ ᤀᤠᤶᤒᤦ. ᤀᤡᤱᤃᤠ᤹ ᤁᤴ ᤀᤡᤏᤥᤃᤧᤴ ᤋᤢᤰᤂᤣᤖᤧᤴ ᤂᤥᤷᤕᤠᤴ ᤔᤧᤴᤎᤢᤱᤅᤣ ᤔᤧᤒᤥᤱᤅᤡᤴᤏᤧ ᤑᤠ᤹ᤃᤪ ᤂᤧᤏᤧ᤹ ᤁᤧᤏᤡᤱᤘᤠ᤹ ᤁᤢᤀᤡᤛᤡ᤺ᤰᤁᤣ ᤐᤥᤱᤗᤖᤥ॥”

⁴³ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤸᤗᤧ ᤕᤠᤶᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤒᤠ ᤋᤢᤔᤢᤛᤡ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤡᤰᤕᤢ᤺ᤔᤠᤸᤗᤧ ᤛᤠ᤹ᤖᤡᤰ ᤋᤖᤢᤛᤡᤀᤠᤱ ᤔᤧᤘᤕᤧ॥

⁴⁴ ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤗᤧᤖᤢᤎᤛᤡᤀᤠᤱ ᤕᤠᤶᤔᤥ ᤋᤢᤘᤠ ᤆᤥ᤺ᤰᤛᤧ ᤐᤣᤀᤠᤱ ᤋᤃᤡ ᤜᤧᤰᤁᤣ ᤋᤢᤘᤠ ᤆᤥᤃᤢ॥

⁴⁵ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ᤺ᤰᤂᤧ ᤑᤧᤖᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤠᤸᤗᤛᤠᤱ ᤁᤧᤏᤠᤛᤡᤱᤅᤡᤀᤠᤱ ᤁᤧᤀᤡᤵᤛᤡᤀᤠᤱ ᤁᤧᤏᤧᤛ᤻ᤛᤡᤒᤡ᥅ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤌᤠᤔᤠ ᤕᤧᤶᤔᤡᤴ ᤋᤩᤧᤖᤥ॥

⁴⁶ ᤐᤥᤃᤧᤶᤔᤧ᤹. ᤁᤵᤔᤥᤗᤠᤶ ᤐᤡᤃᤡ᥄ ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤐᤧᤴ ᤂᤠ ᤑᤧᤴᤗ ᤐᤳᤗᤥ᥄”

ᤕᤧᤛᤢᤴ ᤔᤧᤍᤧᤶᤛᤢ᤹

⁴⁷ ᤕᤧᤛᤢᤴ ᤜᤧᤰᤁᤣᤗ᤹ᤖᤡᤰ ᤐᤠᤖᤧᤖ ᤐᤳᤇᤧᤸᤗᤧ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥᤒᤠ ᤕᤜᤢᤍᤠ ᤔᤧᤵᤔᤏᤠᤒᤧᤴ ᤂᤧᤵᤔᤥ ᤁᤧᤖᤧ ᤋᤩᤧ॥ ᤂᤢᤏᤧ᤹ᤏᤢ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤠᤱᤄᤢᤛᤡᤒᤠ ᤋᤠᤓᤣ ᤏᤢ ᤋᤰᤁᤠᤳ ᤁᤧᤃᤵᤐᤠ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤘᤕᤧ॥

⁴⁸ ᤀᤠᤸᤗ ᤕᤧᤛᤢᤴ ᤀᤡᤱᤃᤧᤗᤧᤰᤐᤧᤸᤗᤧ ᤀᤠᤳᤋᤡᤴ ᤔᤏᤠᤴ ᤀᤡᤱᤃᤠ᤹ ᤆᤢᤵ ᤔᤧᤳᤋᤢᤱ. ᤂᤧᤴ ᤋᤧᤶᤛᤧᤶᤔᤧ᤹ ᤗ᤹ᤖᤡᤰ ᤔᤡᤰᤛᤣᤴ ᤐᤡᤖᤢᤛᤡᤀᤠᤱ ᤘᤕᤧ॥

⁴⁹ ᤂᤡᤔᤥ ᤕᤜᤢᤍᤠᤴ ᤕᤧᤛᤢᤖᤥ ᤐᤣᤀᤠᤱ “ᤀᤠᤛᤣᤘᤠᤖᤥ. ᤛᤡᤰᤛᤠᤶᤒᤣ” ᤔᤧᤳᤋᤢᤖ ᤆᤢᤵ ᤔᤧᤳᤋᤢ॥

⁵⁰ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤆᤢᤶᤔᤣ. ᤂᤧᤏᤧ᤹ ᤌᤣ ᤆᤥ᤺ᤰᤛᤧ ᤁᤧᤍᤩᤧᤒᤠ ᤂᤧᤴ ᤜᤠᤖᤠ ᤆᤥᤃᤧ᤹ᤀᤥ॥” ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ᤖᤧ ᤕᤧᤛᤢᤴ ᤜᤢᤰ ᤔᤧᤕᤠᤰᤋᤢᤀᤠᤱ ᤔᤧᤍᤧᤶᤛᤢᤖᤥ॥

⁵¹ ᤁᤴ ᤏᤡᤛᤢᤀᤠᤱ ᤕᤧᤛᤢᤴ ᤏᤢ ᤁᤧᤘᤠ᤹ᤒᤠᤜᤠ᤹ᤀᤥ ᤌᤡᤰᤗᤧ ᤋᤠᤓᤣᤴ ᤋᤖᤵ ᤑᤡ᤺ᤰᤂᤢᤀᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤧᤛᤧᤘᤠᤖᤥᤒᤠᤴ ᤆᤧᤵᤋᤢᤸᤗᤧ ᤁᤢᤏᤧᤰᤂᤥ᤹ᤒᤠᤴ ᤐᤧᤳᤋᤢ ᤌᤠᤛᤢᤖᤥ॥

⁵² ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤁᤧᤍᤠᤓᤣ᤺ᤴ ᤑᤧᤛᤡ᤺ᤵᤐᤥ ᤕᤠᤰᤋᤧ᤹. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤋᤠᤓᤣᤴ ᤀᤥᤃᤵ ᤆᤥᤃᤢ᤹. ᤂᤧᤴ ᤋᤠᤓᤣᤗᤠᤶᤔᤣ ᤛᤡ᤹᤺॥

⁵³ ᤀᤡᤱᤃᤠ᤹ ᤐᤠᤏᤢᤍᤡᤱ ᤀᤠᤶᤒᤠᤴ ᤏᤠ᤺ᤰᤋᤢᤱᤅᤡᤸᤗᤧ ᤔᤠᤱᤗᤠᤀᤡᤱᤒᤠᤜᤠ᤹ᤖᤧᤴ ᤌᤡᤰ-ᤏᤧᤳ ᤋᤢᤖᤠᤏᤢ᤺ᤸᤗᤧ ᤕᤖᤡᤰ ᤀᤡᤱᤃᤠ᤹ ᤕᤠᤵᤔᤡ ᤋᤠᤱᤛᤧ᤺ᤵᤛᤧ ᤂᤡᤔᤥ ᤔᤧᤒᤠᤱᤄᤢᤴᤛᤡᤴᤒᤡ᥅

⁵⁴ ᤁᤖ ᤜᤧᤰᤁᤣᤗ᤹ᤖᤡᤰ ᤏᤠ᤺ᤰᤋᤢᤱᤅᤡᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤥᤱᤔᤠᤀᤣ ᤐᤥᤱ ᤗ᤹ᤖᤡᤰ ᤛᤠᤵᤋᤧᤒᤠᤴ ᤀᤠᤰᤂᤣᤀᤠᤱ ᤁᤧᤵᤐᤠᤒᤣ᥅”

⁵⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤍᤧᤶᤛᤧ ᤁᤧᤍᤠᤒᤠ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤜᤠᤱᤒᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤒᤡ᥅ ᤌᤣᤀᤠᤱ ᤀᤡᤱᤃᤠ᤹ ᤀᤠᤍᤧᤶᤛᤧ ᤋᤠᤓᤣᤏᤢ ᤋᤰᤁᤠ᤺ᤳᤏᤢ ᤁᤧᤍᤩᤧ᤹ᤀᤡᤒᤣ᥅ ᤀᤡᤱᤃᤠ᤹ᤃ ᤌᤡᤰᤕᤠ᤺ᤴᤎᤰᤛᤠ ᤔᤠᤱᤜᤡᤶ ᤗᤰᤂᤢᤶᤔᤥ ᤏᤡᤛᤠᤶ ᤜᤢ᤹ᤀᤡᤛᤧ ᤘᤕᤠᤱᤒᤠ ᤜᤧᤰᤁᤣᤛᤠᤱ ᤕᤠᤵᤔᤡ ᤁᤧᤴᤍᤧᤶᤛᤡᤴ॥

⁵⁶ ᤁᤖ ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤛᤠᤵᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ॥” ᤜᤧᤰᤁᤩᤠᤱ ᤁᤧᤖᤧᤰ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤐᤰᤔᤧᤎᤀᤠᤱ ᤔᤧᤄᤧᤳᤇᤡᤱ ᤔᤧᤒᤣᤖᤥ॥

ᤕᤧᤛᤢᤴ ᤕᤧᤈᤢᤶᤓᤥ ᤋᤃᤡ ᤔᤧᤕᤧᤵᤛᤢ᤹

⁵⁷ ᤜᤧᤰᤁᤩᤠᤱ ᤕᤧᤛᤢᤴ ᤁᤧᤍᤧᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠ ᤁᤤᤕᤠᤑᤠᤛᤖᤧ ᤁᤢᤜᤡᤶᤔᤥ ᤔᤧᤍᤣ᤹ᤖᤢ॥ ᤂᤧᤵᤔᤥ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤈᤢᤵᤛᤧᤀᤠᤱ ᤔᤧᤘᤕᤧᤖᤥ॥

⁵⁸ ᤁᤖ ᤐᤋᤪᤢᤛᤖᤧᤃ ᤕᤧᤛᤢᤴ ᤏᤢ ᤂᤧᤴ ᤔᤏᤠᤜᤠ᤹ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤗᤰᤂᤢᤶᤔᤥ ᤌᤠᤖᤡᤰ ᤔᤠ᤺ᤱᤄᤠᤗᤠᤶ ᤋᤡᤶᤍᤢᤛᤡᤖᤥ॥ ᤜᤧᤰᤁᤩᤠᤱ ᤀᤠᤸᤗ ᤕᤧᤛᤢᤴ ᤌᤣ ᤔᤧᤔᤧᤳᤋᤢᤀᤡᤗᤠ ᤗ᤹ᤖᤡᤰ ᤀᤥᤔᤧᤳᤇᤧ ᤛᤡᤃᤠᤱ ᤗᤠᤛᤧᤀᤠᤱ ᤛᤧᤘᤠᤖᤥᤒᤠᤜᤠ᤹ᤏᤢ ᤕᤢᤱᤛᤡᤱᤗᤥ॥

⁵⁹ ᤀᤠᤸᤗ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤕᤧᤈᤢᤶᤓᤥᤖᤧᤴ ᤁᤧᤖᤧᤰ ᤐᤠᤛᤡᤱᤐᤠᤍᤠᤱᤗᤠᤜᤠ᤹ᤖᤧ ᤕᤧᤛᤢᤴ ᤛᤡᤔᤧᤸᤗᤧᤴ ᤂᤢᤶᤍᤡᤱ ᤐᤡᤔᤠ ᤑᤠ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥᤒᤠ ᤀᤠᤵᤋᤡᤰᤜᤠ᤹ ᤔᤧᤃᤥ᤺ᤳᤋᤢ॥

⁶⁰ ᤂᤧᤵᤔᤥ ᤕᤖᤡᤰ ᤑᤥᤋᤩᤠᤒᤠ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤜᤠ᤹ ᤔᤧᤗ᤺ᤴᤍᤧ. ᤁᤖ ᤂᤧᤱᤜᤠ᤹ᤖᤧ ᤌᤣᤀᤠᤱ ᤋᤛᤡ ᤔᤧᤱᤄᤥᤛᤢᤴ॥ ᤁᤢᤏᤢᤵᤔᤥ ᤏᤧᤵᤑᤢ ᤔᤏᤠ ᤗ᤺ᤴᤍᤧᤳᤇᤡᤀᤠᤱ

⁶¹ ᤐᤠ᤺ᤳᤋᤧᤳᤇᤢ. “ᤁᤴ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤡᤴ ᤕ᤺ᤔᤠ ᤛᤢᤰᤋᤢᤱ. ᤜᤧᤰᤁᤩᤠᤱ ᤛᤢᤶᤕᤧᤴᤏᤥ ᤕᤠᤶᤔᤥ ᤆᤥ᤺ᤰᤔᤠ ᤛᤢᤰᤋᤢᤱᤗᤥ ᤗ᤹ᤖᤡᤰ ᤐᤠ᤺ᤳᤋᤢᤖᤥ॥”

⁶² ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤴ ᤐᤥᤃᤧᤀᤠᤱ ᤕᤧᤛᤢᤴ ᤛᤣ᤺ᤴᤍᤥᤛᤢ. “ᤁᤴ ᤔᤏᤠᤜᤠ᤹ᤖᤧ ᤁᤧᤍᤰᤗᤧᤱᤘᤠᤀᤥ ᤐᤡᤖᤧᤳᤇᤢᤒᤠ ᤋᤥ᤺ᤴᤍᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤂᤧᤏᤧ᤹ ᤏᤥᤃᤵ ᤁᤧᤶᤒᤡᤖᤢᤴᤇᤡᤴᤒᤠᤒᤣ᥅”

⁶³ ᤁᤖ ᤕᤧᤛᤢᤴ ᤔᤧᤶᤒᤠ᤺ᤳᤋᤣ ᤕᤧᤒᤧ॥ ᤜᤧᤰᤁᤣ᤺ᤸᤗᤧ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤔᤧᤳᤋᤢ. “ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤅᤥ ᤂᤧᤏᤧ᤹ ᤀᤡᤱᤈᤠᤱ ᤐᤡᤏᤧ. ᤛᤧᤰᤂᤠᤀᤣ ᤀᤠᤔᤧᤳᤋᤧ᤹. ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤏᤡᤱᤘᤠ᤹ᤑᤢᤛᤠᤏᤧᤒᤡ᥅”

⁶⁴ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤂᤧᤏᤧ᤹ ᤀᤠᤒᤠᤅᤣ ᤜᤧᤰᤁᤣ ᤁᤧᤒᤠ᤺ᤳᤋᤢ᤹ᤖᤥ॥ ᤁᤖ ᤀᤡᤱᤃᤠ᤹ ᤔᤧᤳᤏᤡᤱ. ᤋᤠ᤺ᤴᤍᤡ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤕᤢᤱᤅᤠ᤹ᤒᤠ ᤏᤢ ᤛᤠᤱᤃᤪᤠᤶᤐᤣᤍᤠᤱᤅᤥᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤀᤠᤒᤠ ᤁᤧᤏᤡᤛᤢᤶᤗᤥ॥”

⁶⁵ ᤜᤧᤰᤁᤩᤠᤱ ᤔᤠᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤢᤛᤠᤰᤁᤧᤴ ᤀᤥᤛᤣ᤺ᤴᤎᤠᤰᤋᤢᤛᤡᤖ ᤀᤠᤒᤠᤅᤣ ᤁᤢᤍᤣ᤺ᤳᤋᤡᤴ ᤌᤧ᤺ᤰᤂᤢᤀᤠᤱ ᤀᤰᤂᤣ ᤐᤠ᤺ᤳᤋᤢ. “ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤐᤠ᤺ᤳᤋᤢᤖᤥ᥄ ᤀᤠᤸᤗ ᤀᤠᤏᤡ᤹ ᤘᤣ᤹ ᤋᤥ᤺ᤴᤍᤡᤜᤠ᤹ ᤌᤣᤀᤠᤱ ᤆᤠᤜᤠᤒᤠ ᤀᤠᤈᤥᤃᤧᤒᤣ᥅ ᤁᤸᤗᤧᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱ ᤆᤧ᤹ᤕᤠᤐᤠᤴ ᤐᤠ᤺ᤳᤋᤢᤒᤠᤴ ᤂᤡᤏᤡ᤹ ᤁᤧᤄᤧᤵᤛᤢᤶᤗᤥ॥

⁶⁶ ᤁᤴ ᤐᤠ᤺ᤴᤏᤥ ᤂᤡᤏᤡ᤹ ᤌᤣ ᤁᤧᤒᤠ᤺ᤳᤋᤢᤶ᥅” ᤂᤢᤏᤧ᤹ ᤛᤡᤔᤠᤀᤣ ᤐᤥᤱ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ॥

⁶⁷ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤧᤛᤢᤴ ᤁᤢᤏᤠᤖᤠᤀᤥ ᤌᤧᤳ ᤔᤧᤎᤥ᤺ᤰᤋᤢᤖ ᤜᤢᤰᤐᤢᤳᤋᤡᤸᤗᤧ ᤔᤧᤗᤰᤋᤢ॥ ᤜᤧᤰᤁᤩᤠᤱ ᤁᤢᤓᤠᤖᤧᤃ ᤁᤢᤏᤧᤍᤧᤱᤒᤠᤴ ᤔᤧᤗᤧᤰᤂᤢᤀᤠᤱ

⁶⁸ ᤀᤰᤂᤣ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤣ. ᤗ ᤀᤠᤸᤗ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹᥄ ᤂᤧᤏᤧ᤹ ᤜᤠ᤺ᤳᤗᤧ ᤁᤧᤜᤡᤵᤋᤧ᥅”

⁶⁹ ᤀᤠᤸᤗ ᤐᤋᤪᤢᤛᤧᤴ ᤗᤠ᤺ᤰᤁᤠᤳ ᤗᤰᤂᤢᤶᤔᤥ ᤕᤢᤅᤧᤸᤗᤧ ᤂᤧᤵᤔᤥ ᤛᤣᤘᤠᤖᤥᤔᤠ ᤆᤢᤰᤔᤠᤎᤡᤰ ᤑᤧᤖᤧᤀᤠᤱ ᤔᤧᤳᤋᤢ. “ᤂᤧᤏᤧ᤹ᤀᤠᤱ ᤃᤠᤗᤡᤗᤛᤔᤠ ᤕᤧᤛᤢ᤺ᤴᤏᤢᤀᤣ ᤁᤧᤘᤕᤧᤖᤥ॥”

⁷⁰ ᤁᤖ ᤐᤋᤪᤢᤛᤖᤧ ᤁᤧᤖᤧᤰᤗᤧ ᤂᤢᤏᤡ᤹ ᤋᤃᤡ ᤂᤧᤴ ᤐᤠ᤺ᤴᤏᤡᤴ ᤏᤠ᤹ᤖᤢᤖ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤵᤐᤧᤴᤗᤥ᥄”

⁷¹ ᤜᤧᤰᤁᤩᤠᤱ ᤂᤢᤏᤧ᤹ ᤗᤰᤂᤢᤶᤔᤥᤗᤠᤶ ᤋᤠ᤺ᤰᤜᤴ ᤗᤧᤵᤔᤠᤱ ᤐᤣ॥ ᤂᤧᤵᤔᤥ ᤘᤣ᤹ᤛᤔᤠ ᤛᤣᤘᤠᤖᤥᤔᤠ ᤆᤢᤰᤔᤧᤸᤗᤧ ᤂᤢᤏᤧ᤹ ᤏᤡᤛᤢᤀᤠᤱ ᤘᤣ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤴᤏᤠᤱ ᤏᤠᤛᤖᤋᤛᤔᤠ ᤕᤧᤛᤢ᤺ᤴᤏᤢᤀᤣ ᤘᤕᤧᤖᤥ॥”

⁷² ᤐᤋᤪᤢᤛᤖᤧ ᤔᤠᤱᤜᤧᤰᤛᤡᤱᤗ ᤕᤠᤶᤔᤥ ᤂᤧᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤏᤠ᤹ᤖᤢ. “ᤛᤧᤰᤂᤠᤛᤠᤱ ᤀᤡᤱᤃᤠ᤹ᤃ ᤁᤴ ᤔᤏᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤗᤥ᥄”

⁷³ ᤛᤵᤑᤠᤀᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤔᤏᤠᤜᤠ᤹ ᤐᤋᤪᤢᤛᤖᤥ ᤔᤧᤒᤣᤀᤠᤱ ᤔᤧᤔᤧᤳᤋᤢ. “ᤛᤧᤰᤂᤠᤛᤠᤱ ᤂᤢᤏᤧ᤹ ᤁᤢᤜᤢ᤹ᤛᤠᤶᤒᤠᤜᤠ᤹ᤀᤥ ᤂᤧᤏᤧ᤹ᤀᤠᤱ ᤗᤳᤌᤡᤰᤏᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤒᤠᤴ ᤀᤡᤰᤗᤠᤴ ᤃᤠᤗᤡᤗᤛᤔᤠ ᤁᤢᤀᤡᤛᤡᤰ ᤆᤥᤰᤗᤥ॥”

⁷⁴ ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤕᤠᤶᤔᤥ ᤔᤠᤱᤜᤧᤰᤛᤡᤱᤗ ᤐᤠ᤺ᤳᤋᤢ. “ᤛᤧᤰᤂᤠᤛᤠᤱ ᤁᤴ ᤔᤏᤠᤴ ᤀᤡᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱᤅᤠᤱ ᤘᤠ᤹ᤀᤠᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤡ᤺ᤀᤠᤖ॥” ᤜᤧᤰᤁᤣ ᤐᤠ᤺ᤳᤋᤢᤏᤠᤔᤧ᤺ᤴᤏᤣ ᤀᤡᤱᤘᤠᤴ ᤁᤠᤛᤧᤖᤥ॥

⁷⁵ ᤜᤧᤰᤁᤣ᤺ᤸᤗᤧ ᤐᤋᤪᤢᤛᤖᤧ ᤂᤡᤔᤥ ᤕᤧᤛᤢᤖᤧ ᤀᤡᤱᤘᤠ ᤁᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤛᤢᤶᤗᤧᤱ ᤁᤧᤏᤠ᤹ᤀᤠ ᤗ᤹ᤖᤡᤰ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤏᤡᤱᤘᤠ᤹ ᤛᤢᤶᤗ᤹ᤖᤧ॥ ᤜᤧᤰᤁᤩᤠᤱ ᤐᤋᤪᤢᤛᤧᤴ ᤗᤰᤂᤢᤶᤔᤥᤏᤢ ᤗ᤺ᤴᤍᤧ ᤐᤣᤀᤠᤱ ᤀᤢ᤺ᤰᤁᤠᤱ ᤀᤢ᤺ᤰ ᤜᤠᤒᤧᤖᤥ॥