ᤔᤳᤋᤡ 24 - LIFOTNT

ᤁᤢᤏᤢᤵᤔᤠ ᤕᤧᤴᤏᤡᤸᤗᤧᤴ ᤔᤡᤰᤛᤣ᤺ᤴᤜᤠ᤹

¹ ᤕᤧᤛᤢᤴ ᤔᤠᤱᤜᤡᤶᤔᤥᤗᤠᤶ ᤐᤣᤖ ᤐᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤔᤠᤱᤜᤡᤶᤔᤡᤸᤗᤧᤴ ᤏᤢ᤺ᤒ᤻ᤏᤢᤒᤠ ᤜᤡᤶᤜᤠ᤹ ᤂᤢᤏᤧ᤹ ᤀᤥᤛᤣ᤺ᤴᤎᤠᤰᤔᤠ ᤑᤠ᤹ᤀᤠᤱ ᤁᤢᤒᤣᤛᤠᤱ ᤔᤧᤍᤩᤧ॥

² ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤁᤴ ᤁᤧᤏᤡᤛᤢᤶᤒᤠ ᤜᤡᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤛᤧᤰᤂᤠ ᤐᤠᤴ ᤔᤧᤳᤏᤡᤱ. ᤌᤡᤰ ᤗᤢᤱᤛᤶᤍᤠᤱ ᤘᤣ᤹ ᤗᤢᤱᤎᤡᤰᤁᤠᤱ ᤔᤧᤴᤏᤧᤀᤣ ᤌᤠᤖᤡᤰ ᤁᤱᤜᤠ᤹ ᤁᤧᤖᤧᤰ ᤔᤧᤕ ᤔᤧᤒᤣ᤺ᤰᤗᤥ॥”

³ ᤕᤠᤱᤛᤡ ᤕᤧᤛᤢᤴ ᤈᤤᤋᤢᤏ ᤁᤥ᤺ᤰᤔᤠᤀᤥ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤛᤫᤠ᤺ᤳᤋᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ. ᤁᤴ ᤐᤠ᤺ᤴᤜᤠ᤹ ᤀᤠᤵᤑᤠᤸᤗᤧ ᤐᤥᤱᤒᤠᤒᤣ᥅ ᤂᤧᤏᤧ᤹ ᤁᤧᤕᤢᤔᤠ ᤕᤧᤶᤔᤡᤴ ᤏᤢ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤧᤶᤔᤡᤸᤗᤧ ᤁᤢᤏᤢᤵᤔᤠ ᤔᤡᤰᤛᤣ᤺ᤴᤏᤡᤴ ᤀᤠᤔᤧᤳᤋᤧ᤹ᤀᤥ॥”

⁴ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤀᤠᤳᤋᤡᤸᤗᤧᤀᤠᤱ ᤂᤡᤏᤡ᤹ ᤀᤡᤱᤃᤧᤴᤗᤧᤰᤋᤡᤴᤗᤖᤥ.

⁵ ᤌᤣᤀᤠᤱᤓᤧᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤀᤡᤱᤃᤠ᤹ᤀᤣᤖᤥ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤍᤠᤖᤥ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥

⁶ ᤂᤡᤏᤡ᤹ᤃ ᤌᤱ ᤏᤢ ᤌᤱᤜᤠ᤹ᤖᤧᤴ ᤜᤕᤱ ᤁᤡᤸᤗᤡᤱᤜᤠ᤹ ᤁᤧᤄᤧᤵᤛᤢᤶ. ᤁᤖ ᤂᤡᤏᤡ᤹ ᤏᤡᤱᤘᤠ᤹ ᤔᤧᤔᤕᤧᤶᤔᤡᤴᤏᤧ᤹ᤀᤥ॥ ᤁᤱᤜᤠ᤹ᤃ ᤐᤥᤱᤔᤠᤀᤣ ᤐᤥᤱ. ᤁᤖ ᤒᤠ ᤂᤧᤴ ᤕᤧᤶᤔᤥᤀᤣᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤔᤧᤍᤠᤏᤧᤴᤗᤥ॥

⁷ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤗᤠᤈᤣ᤹ᤜᤠ᤹ ᤗᤢᤶᤔᤥ ᤌᤱ ᤐᤥᤱ. ᤕᤖᤡᤰ ᤋᤧᤴᤏᤥ ᤕᤶᤒᤠ ᤛᤠᤰ ᤐᤥᤰ ᤜᤧᤰᤁᤩᤠᤱ ᤗᤢᤵᤗᤡ ᤌᤠᤱᤗᤥ॥

⁸ ᤁᤱᤃ ᤁᤧᤍᤠᤒᤠᤖ ᤁᤧᤒᤵᤐᤠ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤜᤠ᤹ᤖᤧ ᤁᤢᤜᤣ᤺ᤰᤛᤡᤱᤔᤠᤖᤰᤗᤥ॥

⁹ “ᤜᤧᤰᤁᤩᤠᤱ ᤂᤡᤏᤡ᤹ᤃ ᤔᤏᤠᤜᤠ᤹ᤖᤧ ᤁᤧᤶᤍᤧᤶᤛᤡᤀᤠᤱ ᤋᤢᤰᤂᤣ ᤁᤧᤶᤈᤠ᤺ᤳᤋᤡ᤹. ᤜᤧᤰᤁᤩᤠᤱ ᤁᤧᤶᤛᤧᤖᤡ᤹ᤖᤥ॥ ᤂᤡᤏᤡ᤹ ᤕᤠᤵᤔᤡ ᤏᤛᤠᤴ ᤁᤧᤈᤥᤃᤡᤒᤠᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤧᤶᤈᤡ᤺ᤳᤋᤡ᤹ᤖᤥ॥

¹⁰ ᤂᤧᤴ ᤕᤧᤶᤔᤥ ᤕᤖᤡᤰ ᤔᤏᤠᤜᤠ᤹ ᤏᤛᤠ᤺ᤴᤗᤠᤶ ᤔᤧᤏᤢ᤺ᤱᤅᤠᤱ ᤀᤡᤱᤔᤧᤗᤧᤰᤛᤡᤱᤅᤠᤱ ᤔᤧᤈᤡ᤺ᤳᤇᤡᤱᤗᤥ॥

¹¹ ᤜᤧᤰᤁᤣᤗ᤹ᤖᤡᤰ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗᤴ ᤔᤧᤍᤠᤀᤠᤱ ᤕᤖᤡᤰ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥

¹² ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤐᤥᤖ ᤐᤣ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤛᤧᤰᤂᤠ ᤏᤡᤱᤘᤠ᤹ᤀᤥᤏᤢ ᤗᤢᤱᤔᤠ᤹ ᤋᤢᤰᤛᤡᤱᤔᤠ ᤔᤧᤗᤧᤖᤢᤖᤥ॥

¹³ ᤁᤖ ᤀᤠᤳᤋᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤌᤖᤢ᤹. ᤂᤧᤸᤗᤧᤀᤣ ᤛᤧᤴᤗᤵ ᤂᤥᤛᤢ᤹ᤖᤥ॥

¹⁴ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤗᤧᤴ ᤁᤴ ᤛᤢᤏᤠᤀᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤂᤠᤖᤠᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤋᤥ᤺ᤴᤍᤡ ᤜᤧᤰᤁᤣ ᤀᤡᤱᤓᤥᤖᤥ. ᤜᤧᤰᤁᤩᤠᤱ ᤁᤢᤏᤢᤵᤔᤠᤴ ᤋᤠᤖᤥ॥

ᤁᤡᤵᤔᤠ ᤁᤧᤄᤢᤒᤠ ᤕᤧᤶ

¹⁵ “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤍᤠᤏᤡᤀᤧᤗᤖᤧ ᤐᤠ᤺ᤳᤋᤢᤒᤠ ᤛᤡᤰᤁᤧᤗᤧ᤺ᤱᤒᤠᤴ ᤔᤠᤱᤜᤡᤶᤔᤥᤒᤠ ᤛᤣᤛᤣᤍᤧᤴᤏᤥ ᤕᤧᤵᤐᤠ ᤁᤧᤏᤡᤛᤢᤶᤗᤥ॥” (ᤁᤧᤏᤡ᤺ᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤖᤥ᥄)

¹⁶ “ᤂᤧᤴ ᤕᤧᤶᤔᤥ ᤕᤜᤢᤍᤡᤕᤠᤒᤠ ᤔᤏᤠᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤜᤧᤱᤄᤠᤳᤋᤡ ᤔᤧᤄᤧᤳᤇᤡᤱ ᤔᤧᤒᤣ᤺ᤰᤗᤖᤥ॥

¹⁷ ᤂᤧᤴ ᤕᤧᤶᤔᤥ ᤜᤡᤶ ᤛᤶᤍᤠᤱ ᤁᤧᤘᤠ᤹ᤒᤠ ᤔᤏᤠᤴ ᤆᤡᤃᤰᤘᤠ ᤗᤠᤛᤧ ᤜᤡᤶᤛᤡᤃᤠᤱ ᤔᤧᤗᤠ᤺ᤳᤏᤧᤴᤗ॥

¹⁸ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤁᤧᤘᤠ᤹ᤒᤠᤴ ᤁᤢᤛᤢᤱᤄᤣ᤺ᤰᤘᤠ ᤗᤠᤛᤧ ᤁᤢᤜᤡᤶᤔᤥ ᤔᤧᤏᤢ᤺ᤱᤏᤧᤴ ᤔᤧᤒᤣ᤺ᤰᤏᤧᤴᤗᤖᤥ॥

¹⁹ ᤁᤴ ᤕᤧᤶᤔᤡᤱᤃ ᤔᤧᤴᤇᤢᤰᤔᤠ ᤏᤢ ᤛᤠᤘᤠᤔᤠᤜᤠ᤹ᤖᤧ ᤗᤠᤃᤡ ᤀᤠᤰᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤅᤡ᥄

²⁰ ᤆᤢᤱᤘᤠ᤺ᤶᤔᤠ ᤕᤧᤶᤔᤥ ᤏᤢ ᤏᤠ᤺ᤶᤛᤡᤱ ᤕᤧᤴᤏᤥ ᤂᤡᤏᤡ᤹ ᤂᤧᤳᤇᤡᤱᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤋᤢᤘᤠ ᤆᤥᤃᤧᤶᤔᤧ᤹ᤀᤥ॥

²¹ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤀᤰᤋᤱᤒᤠ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤴ ᤋᤠ᤺ᤖᤥ॥ ᤀᤰᤋᤱᤒᤠ ᤋᤢᤰᤂᤣ᤺ᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤔᤧᤶᤒᤥᤱᤅᤣ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤧᤒᤥᤱᤏᤧᤸᤗᤥ॥

²² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤔᤧᤈᤥᤃᤢᤴᤏᤡᤸᤗᤧᤃ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤜᤡᤱᤔᤠ ᤔᤧᤴᤇᤢᤰᤋᤧᤴᤒᤠᤖᤥ॥ ᤁᤖ ᤂᤢᤏᤧ᤹ ᤛᤣᤃᤢᤛᤡᤒᤠᤜᤠ᤹ ᤔᤧᤜᤡᤱᤗ ᤑᤠ᤹ᤀᤠᤱ ᤂᤧᤴ ᤕᤧᤴᤜᤠ᤹ ᤋᤠᤱᤛᤠ ᤐᤥ᤺ᤰᤂᤧᤒᤠᤖᤥ॥

²³ “ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤁᤵᤔᤥ ᤘᤠ᤹’ ᤀᤡᤃᤪ ‘ᤂᤢᤏᤧ᤹ ᤂᤧᤵᤔᤥ ᤘᤠ᤹’ ᤗ᤹ᤖᤡᤰ ᤔᤧᤒᤠ᤺ᤳᤋᤢᤖ ᤔᤧᤍᤠ᤺ᤸᤗᤧ ᤏᤛᤠᤴ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥

²⁴ ᤌᤣᤀᤠᤱᤓᤧᤸᤗᤧ ᤀᤡᤱᤗᤧᤰᤐᤠ ᤂᤪᤡᤛ᤻ᤋᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤗᤴ ᤔᤧᤍᤠᤀᤠᤱ ᤐᤕᤶ ᤕᤶᤒᤠ ᤔᤡᤰᤛᤣᤴ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤜᤠ᤹ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤂᤢᤏᤡ᤹ ᤛᤢᤰᤛᤢᤰ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥

²⁵ ᤀᤥᤔᤧᤳᤋᤧᤶᤔᤧ᤹. ᤁᤴ ᤐᤠ᤺ᤴᤜᤠ᤹ ᤐᤥᤱᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤔᤧᤳᤏᤡᤱᤅᤠᤱ ᤘᤠ᤹ᤀᤠᤖᤥ॥

²⁶ “ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ‘ᤀᤥᤔᤧᤳᤋᤧᤶᤔᤧ᤹. ᤂᤪᤡᤛ᤻ᤋᤧᤱᤃ ᤕᤧ᤺ᤱᤄᤠᤍᤧᤴᤏᤥ ᤘᤠ᤹’ ᤁᤧᤶᤔᤧᤳᤋᤡᤃᤪ. ᤀᤥᤔᤧᤳᤇᤧ ᤂᤧᤵᤔᤥ ᤔᤧᤒᤣᤃᤧᤶᤔᤡᤴᤏᤧ᤹ᤀᤥ. ᤀᤡᤃᤪ ‘ᤀᤥᤔᤧᤳᤋᤧᤶᤔᤧ᤹. ᤂᤢᤏᤧ᤹ ᤁᤵᤔᤥ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤘᤠ᤹’ ᤁᤧᤶᤔᤧᤳᤋᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤏᤛᤠᤴ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ॥

²⁷ ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤱᤃ ᤛᤠ᤺ᤶᤓᤣ ᤗᤧᤰᤁᤡᤸᤗᤧ ᤁᤧᤖᤧᤰ ᤋᤠᤱᤛᤠᤰᤐᤧᤴ ᤌᤥ᤹ᤖᤢᤒᤠ ᤁᤢᤀᤡᤛᤡ᤺ᤰᤁᤣ ᤐᤥᤱᤗᤥ॥

²⁸ ᤀᤠᤳᤋᤥ ᤛᤠᤃᤡ᤺ᤰᤁᤧᤴ ᤏᤧ᤹. ᤂᤧᤵᤔᤥᤀᤣ ᤁᤡᤍᤠᤒᤠᤜᤠ᤹ᤀᤠᤱ ᤔᤧᤈᤢᤶᤗᤥ॥”

ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ

²⁹ “ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤴ ᤀᤣᤃᤠᤱ ᤂᤡᤔᤥ “‘ᤏᤠᤶᤔᤡᤴ ᤂᤠᤔᤠᤰᤗᤥ. ᤗᤠᤒᤠᤸᤗᤧ ᤀᤥ᤺ᤳᤋᤡ ᤔᤧᤒᤡᤖᤢᤴᤗᤥ. ᤋᤠᤱᤛᤠᤰᤐᤥᤒᤠ ᤂᤣ᤺ᤶᤛᤡᤰᤐᤠᤜᤠ᤹ ᤔᤰᤔᤧᤎᤠᤖᤥ. ᤜᤧᤰᤁᤩᤠᤱ ᤋᤠᤱᤛᤠᤰᤐᤥᤒᤠ ᤔᤢᤰᤛᤠᤶᤜᤠ᤹ ᤔᤧᤕᤱᤗᤥ॥’

³⁰ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤋᤠᤱᤛᤠᤰᤐᤥ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤸᤗᤧᤴ ᤔᤡᤰᤛᤣ᤺ᤴᤏᤡᤴ ᤌᤠ᤺ᤵᤐᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤖᤡᤱ ᤔᤧᤎᤰᤗᤥ॥ ᤂᤧᤱᤜᤠ᤹ᤖᤧ ᤔᤧᤴᤇᤠᤶᤛᤠᤴ ᤋᤠᤱᤛᤠᤰᤐᤥ ᤔᤢᤰᤛᤠᤶ ᤜᤧᤰᤁᤩᤠᤱ ᤐᤕᤶ ᤔᤡᤔᤡᤍᤡᤱᤅᤡᤴᤏᤢ ᤂᤠᤵᤔᤡ᤺ᤳᤋᤥ ᤕᤢ᤺ᤖ ᤐᤵᤐᤠ ᤔᤧᤏᤡᤛᤢ᤹ᤖᤥ॥

³¹ ᤜᤧᤰᤁᤩᤠᤱ ᤂᤢᤏᤧ᤹ ᤛᤣᤃᤢᤛᤡᤒᤠ ᤔᤏᤠᤜᤠ᤹ ᤛᤢᤶᤛᤧ ᤁᤧᤖᤧᤰ ᤐᤡᤛᤠᤱᤗᤠᤶ ᤋᤠᤱᤛᤠᤰᤐᤠᤸᤗᤧ ᤂᤥ᤺ᤵᤋᤢᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤋᤠ᤺ᤰᤋᤢᤒᤠᤀᤥ ᤌᤢᤳᤋᤢᤖᤡ᤺ᤵᤐᤠᤸᤗᤧᤴ ᤐᤕᤶ ᤀᤡᤰᤗᤠᤏᤢ ᤁᤢᤔᤠᤱᤗᤠᤀᤡᤱᤒᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤠᤱᤄᤢ ᤕᤢᤛᤢᤛᤡ᤹ᤖᤥ॥

ᤐ᤺ᤳᤇᤣ᤹ᤒᤢᤱᤔᤠᤸᤗᤧ ᤁᤢᤒᤡ

³² “ᤀᤠᤸᤗ ᤐ᤺ᤳᤇᤣ᤹ᤒᤢᤱᤔᤥᤗᤠᤶ ᤁᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ. ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ᤗᤠᤶᤒᤠ ᤁᤢᤛᤱ ᤁᤢᤏ᤺ᤰᤜᤠ᤹ ᤗ᤺ᤶᤔᤠ ᤜᤣ᤺ᤰᤁᤡᤸᤗᤧ ᤜᤠᤱᤘᤠ᤺ᤶᤔᤠ ᤕᤧᤶᤔᤡᤴ ᤏᤡ᤺ᤳᤋᤠᤱ ᤋᤩᤧᤖᤥ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ॥

³³ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤳᤗ ᤐᤣ᤺ᤰᤐᤠ ᤁᤧᤏᤡᤛᤢᤶᤔᤡᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢ᤺ᤔᤠᤴ ᤏᤡ᤺ᤳᤋᤠᤱᤅᤣ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥

³⁴ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤴ ᤔᤧᤴᤇᤠᤶ ᤌᤠ᤺ᤰᤜᤠ᤹ ᤔᤧᤴᤇᤡᤏᤧᤴ॥

³⁵ ᤋᤠᤱᤛᤠᤰᤐᤧᤴ ᤏᤢ ᤂᤠᤶᤒᤣ᤺ᤰᤔᤠᤴ ᤗᤧᤰᤁᤠᤱ ᤐᤣᤰ. ᤁᤖ ᤀᤡᤱᤃᤠ᤹ ᤀᤠᤒᤠ᤺ᤴᤈᤠᤰᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤗᤧᤰᤏᤧᤴ ᤔᤧᤒᤣ᤺ᤰᤏᤧᤴᤗᤥ॥

ᤕᤧᤛᤢᤖᤧ ᤁᤢᤕᤢᤔᤠᤀᤥ ᤕᤠᤖᤡᤵ ᤘᤠ᤹ᤔᤠᤴ

³⁶ “ᤀᤠᤸᤗ ᤂᤧᤴ ᤕᤧᤶ ᤏᤢ ᤕᤧᤴᤜᤠ᤹ ᤀᤠᤵᤑᤠᤸᤗᤧ ᤐᤥᤱ ᤑᤠ᤹ᤀᤠᤱ ᤀᤠᤳᤋᤡᤸᤗᤧᤀᤠᤱ ᤔᤧᤏᤡᤛᤢᤴ॥ ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤠᤱᤗᤠᤀᤡᤱᤒᤠ ᤏᤢ ᤏᤡᤱᤘᤠ᤹ᤑᤢᤛᤠ᤺ᤸᤗᤧᤀᤠᤱ ᤔᤧᤏᤡᤛᤢᤴᤗᤥ. ᤁᤖ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤖᤰ ᤏᤡᤛᤢ᤹ᤖᤥ॥

³⁷ “ᤜᤧᤰᤁᤩᤠᤱ ᤔᤧᤴᤇᤠᤶᤛᤠᤴ ᤏᤢ᤺ᤱ ᤕᤢ᤺ᤸᤗᤧ ᤏᤢᤜᤠᤖᤧ ᤁᤢᤕᤧᤶ ᤜᤧᤰᤁᤣᤀᤣ ᤐᤥᤱᤗᤥ॥

³⁸ ᤏᤢᤜᤴ ᤘᤠᤗᤠᤎᤠᤀᤥ ᤗᤠᤛᤧᤒᤠ ᤕᤧᤶᤔᤥ ᤌᤠᤖᤡᤰᤁᤣ ᤔᤏᤠᤜᤠ᤹ ᤔᤧᤈᤖ ᤔᤧᤎᤢᤅᤢᤖ ᤜᤧᤰᤁᤩᤠᤱ ᤔᤣ᤺ᤰᤂᤡᤶ ᤔᤧᤈᤥᤃᤢᤖ ᤔᤧᤘᤕᤧ॥

³⁹ ᤜᤧᤰᤁᤩᤠᤱ ᤘᤠᤍᤥ᤺ᤰᤔᤠ ᤌᤠᤅᤧᤀᤠᤱ ᤏᤡ᤺ᤶᤔᤠ ᤛᤡᤔᤠᤏᤢ᤺ᤸᤗᤧ ᤋᤃᤡ ᤌᤣ ᤐᤥᤱ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤌᤣᤀᤠᤱ ᤏᤡᤱᤘᤠ᤹ ᤔᤧᤱᤃᤳᤋᤢᤴᤗᤥ॥ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤕᤢᤔᤠᤴᤏᤠᤱ ᤐᤥᤱᤗᤥ॥

⁴⁰ ᤂᤧᤴ ᤕᤧᤶᤔᤥ ᤏᤧᤵᤑᤢ ᤔᤏᤠᤜᤠ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥ᤺ᤰᤛᤢᤖ ᤕᤠᤰᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠ ᤘᤠ᤹ ᤗᤠ᤺ᤳᤗᤥ॥

⁴¹ ᤜᤧᤰᤁᤩᤠᤱ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ ᤗᤢᤱᤛᤢᤶᤔᤥ ᤕᤠ᤹ᤕᤢ᤺ᤳᤏᤢ ᤕᤢᤱᤛᤡᤸᤗᤧ ᤌᤡᤰᤁᤡᤴ ᤋᤣ᤹. ᤘᤣ᤹ᤛᤔᤠ ᤕᤢᤱ ᤗᤠ᤺ᤳᤗᤥ॥

⁴² ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤐᤥ᤺ᤰᤂᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤍᤠᤱᤒᤠᤴ ᤀᤠᤵᤑᤠᤸᤗᤧ ᤕᤢᤒᤣ ᤁᤧᤗ᤹ᤒᤠᤴ ᤂᤡᤏᤡ᤹ ᤏᤡᤱᤘᤠ᤹ ᤁᤧᤱᤃᤳᤋᤢᤶᤔᤡᤴᤗᤥ॥

⁴³ ᤜᤡᤶᤍᤠᤱᤒᤠᤸᤗᤧ ᤂᤢ᤺ᤴᤍᤪᤡᤰᤐᤧᤴ ᤀᤠᤳᤋᤡᤴ ᤕᤧᤶᤔᤥ ᤋᤠ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥᤛᤢᤏᤧ ᤑᤠ᤹ᤃᤪ ᤂᤧᤸᤗᤧ ᤔᤧᤴᤀᤡᤶᤔᤣ ᤜᤡᤶᤔᤡᤴ ᤁᤥᤛᤢᤀᤠᤱ ᤂᤧᤴ ᤂᤢ᤺ᤴᤍᤪᤡᤰᤐᤧᤴ ᤂᤢ᤺ᤵᤔᤠ ᤔᤧᤒᤠᤱᤄᤢᤴ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥

⁴⁴ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ᤀᤠᤱ ᤀᤠᤵᤑᤠᤸᤗᤧᤛᤠᤱ ᤕᤠᤖᤡᤵ ᤘᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶᤛᤠᤴ ᤕᤢ ᤑᤠ᤹ᤀᤠᤱ ᤔᤧᤴᤀᤡ᤺ᤳᤋᤣ ᤁᤧᤘᤕᤡᤸᤗᤧ ᤂᤢᤏᤧ᤹ ᤕᤢᤖᤥ॥

ᤏᤛᤠ᤺ᤴᤛᤠᤒᤠ ᤏᤢ ᤋᤠᤵᤑᤧ᤺ᤶᤒᤠ ᤛᤧᤘᤠᤖᤥᤒᤠᤜᤠ᤹

⁴⁵ “ᤀᤠᤳᤋᤡᤴ ᤛᤧᤘᤠᤖᤥᤒᤠᤴ ᤏᤛᤠ᤺ᤴᤛᤠᤒᤠ ᤏᤢ ᤛᤡᤰᤁᤢᤶᤛᤠᤒᤠ ᤆᤥᤰ. ᤂᤧᤴᤏᤡᤴ ᤜᤡᤶᤍᤠᤱᤒᤠᤸᤗᤧ ᤁᤢᤜᤡᤶᤎᤠ᤺ᤱᤜᤠ᤹ ᤀᤥᤔᤧᤵᤔᤠ ᤕᤢᤰ ᤐᤡᤖᤢᤀᤠᤱ ᤂᤧᤸᤗᤧ ᤘᤣ᤹ ᤛᤧᤘᤠᤖᤥᤒᤠᤜᤠ᤹ ᤕᤧᤶᤕᤧᤶᤔᤥ ᤆᤠᤔᤠ ᤌᤢᤱᤔᤠ ᤐᤡᤖᤢᤛᤡ᤹ᤖᤥ॥

⁴⁶ ᤂᤧᤴ ᤜᤡᤶᤍᤠᤱᤒᤠᤴ ᤏᤢ᤺ᤱ ᤋᤠ᤺ᤸᤗᤧ ᤂᤧᤴ ᤛᤧᤘᤠᤖᤥᤒᤠᤸᤗᤧ ᤒᤠ ᤜᤧᤰᤁᤣᤀᤣ ᤆᤥᤃᤢᤖ ᤘᤠ᤹ᤒᤠ ᤋᤢᤔᤢᤏᤧ ᤑᤠ᤹ᤃᤪ ᤂᤧᤴ ᤌᤢᤶᤄᤥ ᤐᤡᤖᤢ᤹ᤖᤥ॥

⁴⁷ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤧᤴ ᤜᤡᤶᤍᤠᤱᤒᤠᤸᤗᤧ ᤂᤧᤴ ᤛᤧᤘᤠᤖᤥᤒᤠᤴ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣ ᤛᤶᤍᤠᤱ ᤕᤢᤰ ᤐᤡᤖᤢ᤹ᤖᤥ॥

⁴⁸ ᤁᤖ ᤂᤧᤴ ᤋᤠᤰᤁᤧᤓᤧ᤹ᤒᤠ ᤛᤧᤘᤠᤖᤥᤒᤠᤸᤗᤧ ᤁᤢᤏᤡᤱᤘᤠ᤹ᤒᤥ ᤀᤠᤴᤍᤠᤱᤒᤠᤴ ‘ᤜᤠᤖᤠ ᤔᤧᤍᤠᤏᤧᤴ’ ᤗ᤹.

⁴⁹ ᤜᤧᤰᤁᤩᤠᤱ ᤁᤢᤴᤈᤢᤶ ᤛᤧᤘᤠᤖᤥᤒᤠᤜᤠ᤹ ᤜᤡᤵᤋᤢᤛᤡᤀᤠᤱ ᤌᤡ᤺ᤔᤛᤠᤱᤜᤠ᤹ᤏᤢ ᤆᤠᤔᤠ ᤌᤢᤱᤔᤠ ᤜᤣ᤺ᤰᤋᤢ᤹ᤏᤧ ᤑᤠ᤹ᤃᤪ

⁵⁰ ᤂᤧᤸᤗᤧ ᤁᤢᤴᤍᤠᤱᤒᤠᤴ ᤋᤠ ᤗ᤹ᤖᤡᤰ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤴᤒᤠ ᤕᤧᤶᤔᤥ ᤁᤢᤴᤍᤠᤱᤒᤠᤴ ᤋᤠ᤺ᤖᤥ॥

⁵¹ ᤜᤧᤰᤁᤩᤠᤱ ᤁᤢᤴᤍᤠᤱᤒᤠᤸᤗᤧ ᤂᤧᤴ ᤛᤠ᤹ᤖᤡᤰ ᤋᤧ᤺ᤶᤓᤢᤰ ᤕᤠᤰᤋᤢᤀᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠᤜᤠ᤹ᤏᤢ ᤛᤥᤖᤡᤰ ᤂᤢᤶᤍᤡᤱ ᤐᤡᤖᤢ᤹ᤖᤥ॥ ᤂᤧᤵᤔᤥᤃ ᤜᤠ᤺ᤵᤔᤠᤴ ᤏᤢ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥”