ᤔᤳᤋᤡ 21 - LIFOTNT

ᤕᤧᤛᤢᤴ ᤕᤖᤢᤛᤗᤧᤶᤔᤥ ᤗᤠᤳ

¹ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤖᤢᤛᤗᤧᤔ ᤏᤡ᤺ᤳᤋᤠᤱᤒᤠ ᤈᤤᤋᤢᤏ ᤁᤥ᤺ᤰᤔᤠᤸᤗᤧ ᤁᤢᤒᤣᤛᤠᤱᤒᤠ ᤒᤧᤌᤑᤠᤃᤣ ᤐᤠᤱᤓᤣ᤹ ᤏᤡ᤺ᤳᤋᤠᤱ ᤔᤧᤃᤧᤖᤧ. ᤜᤧᤰᤁᤩᤠᤱ ᤕᤧᤛᤢᤖᤧ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤖ ᤐᤠᤱᤄᤢᤛᤡ.

² “ᤂᤡᤴᤇᤡ᤹ ᤋᤃᤠᤱᤒᤠ ᤐᤠᤱᤓᤣ᤹ᤀᤥ ᤐᤣᤛᤧ᤹. ᤂᤧᤵᤔᤥ ᤁᤧᤗᤠ᤺ᤳᤇᤡᤸᤗᤧᤛᤠ ᤀᤡᤔᤧᤄᤣ᤺ᤰᤂᤢᤔᤠ ᤀᤍᤱᤔᤠ᤺ᤸᤗᤧ ᤁᤢᤒᤣᤛᤠᤱ ᤁᤢᤛ᤻ᤛᤠᤴ ᤕᤧᤵᤐᤠ ᤁᤧᤍᤢᤶᤛᤢ᤹॥ ᤂᤧᤴ ᤗᤧᤖᤧᤳᤇᤧ᤹ᤀᤠᤱ ᤀᤡᤱᤃᤠ᤹ᤀᤥ ᤋᤠᤖᤧᤳᤇᤧ᤹ᤀᤥ॥

³ ᤔᤏᤠᤜᤠ᤹ᤖᤧ ᤌᤣᤀᤠᤱ ᤁᤴ ᤀᤍᤱᤛᤠᤴ ᤁᤧᤗᤧᤳᤇᤢᤒᤠᤒᤣ ᤑᤠ᤹ᤀᤠᤱ ᤛᤣ᤺ᤴᤃᤧᤶᤗᤠᤵᤛᤡᤏᤧ ᤑᤠ᤹ᤃᤪ ᤁᤱᤜᤠ᤹ ᤀᤠᤏᤡᤃᤣ ᤍᤠᤱᤒᤧᤴ ᤆᤠᤜᤠᤒᤠ ᤆᤥᤃᤧᤀᤠᤱ ᤘᤠ᤹. ᤜᤠᤖᤠᤀᤣ ᤂᤢᤏᤧ᤹ ᤕᤠᤱᤏᤠ ᤏᤢ᤺ᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤋᤧᤇᤧ᤹ᤀᤥ॥”

⁴ ᤁᤱᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤒᤠᤴ ᤁᤧᤳᤗ ᤑᤠ᤹ᤀᤠᤱ ᤐᤥ᤺ᤰᤂᤧᤒᤠᤖᤥ—

⁵ “ᤕᤖᤢᤛᤗᤧᤔᤛᤔᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ᤂᤡᤏᤡ᤹ ᤐᤕᤶ ᤜᤠᤱᤅᤡᤴ ᤂᤡᤏᤡ᤹ᤀᤥ ᤋᤠᤖ ᤐᤳ. ᤂᤢᤏᤧ᤹ᤃ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤅᤠᤱ ᤀᤍᤱᤛᤠᤴ ᤕᤢᤰᤋᤢᤀᤠᤱ ᤋᤠ᤺. ᤂᤢᤏᤧ᤹ᤃ ᤀᤍᤱᤛᤠ᤺ᤴᤏᤣ ᤕᤢᤰᤋᤢᤀᤠᤱ ᤋᤠᤖ ᤐᤳᤗᤥ॥”

⁶ ᤂᤧᤴ ᤏᤧᤵᤑᤢ ᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤆᤥᤃᤧᤳᤇᤢ॥

⁷ ᤂᤧᤱᤜᤠ᤹ᤖᤧ ᤀᤍᤱᤛᤠᤴ ᤏᤢ ᤀᤍᤱᤔᤠᤴ ᤋᤠᤖᤧᤳᤇᤢᤀᤠᤱ ᤂᤧᤱᤜᤠ᤹ ᤛᤶᤍᤠᤱ ᤂᤢᤏᤡ᤹ ᤋᤣᤳᤜᤠ᤹ ᤔᤧᤏᤧᤛ᤻ᤛᤢ ᤜᤧᤰᤁᤩᤠᤱ ᤕᤧᤛᤢᤖᤧ ᤀᤍᤱᤛᤠᤴ ᤕᤢᤰᤋᤢᤖᤥ॥

⁸ ᤜᤧᤰᤁᤩᤠᤱ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤕᤧᤛᤢᤖᤧ ᤁᤢᤍᤃᤡ ᤁᤢᤍᤃᤡ ᤗᤠᤶᤔᤥ ᤂᤢᤏᤡ᤹ ᤋᤣᤳᤜᤠ᤹ ᤔᤧᤓᤧᤛᤢ. ᤜᤧᤰᤁᤩᤠᤱ ᤘᤣ᤹ᤜᤠ᤹ᤖᤧ ᤆᤢᤈᤢᤰᤛᤠ ᤛᤡᤱ ᤐᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤶᤔᤥ ᤔᤧᤓᤧᤛᤢᤖ ᤂᤢᤏᤧ᤹ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢᤖᤥ॥

⁹ ᤂᤢᤏᤧ᤹ ᤁᤢᤍᤃᤡ ᤏᤢ ᤁᤢᤀᤣᤃᤠᤱ ᤁᤧᤒᤵᤐᤠ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤀ᤺ᤰᤋᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤸᤗᤧ ᤁᤢᤏᤠᤖᤠ ᤐᤥᤖᤖᤥ᥄ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤁᤧᤍᤠᤒᤠᤴ ᤔᤢ᤹ᤀᤡᤛᤠᤒᤠ ᤐᤥᤱᤗᤖᤥ᥄ ᤛᤠᤱᤃᤪᤠᤶᤐᤣᤍᤠᤱᤅᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤐᤥᤖᤖᤥ᥄”

¹⁰ ᤕᤧᤛᤢᤴ ᤕᤖᤢᤛᤗᤧᤔ ᤕᤧᤰᤕᤰᤁᤥ ᤗᤠᤛᤧᤸᤗᤧ ᤕᤶᤒᤠ ᤜᤕᤱ ᤁᤡᤸᤗᤡᤱ ᤐᤥ᤺ᤰᤂᤧᤀᤠᤱ ᤔᤏᤠᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤛᤣ᤺ᤴᤗᤠᤵᤔᤠ ᤔᤧᤜᤣ᤺ᤰᤋᤢ. “ᤁᤱᤃ ᤜᤠ᤺ᤳᤏᤡᤒᤣ᥅”

¹¹ ᤔᤏᤠᤗᤢᤶᤔᤥᤗᤠᤶ ᤁᤢᤓᤠᤖᤧ ᤏᤥᤃᤵ ᤔᤧᤒᤡᤖᤢᤛᤡ. “ᤁᤱᤃ ᤃᤠᤗᤡᤗᤛᤔᤠ ᤏᤠᤛᤖᤋᤗᤠᤶ ᤁᤧᤍᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤧᤛᤢᤖᤥ॥”

ᤕᤧᤛᤢᤴ ᤔᤠᤱᤜᤡᤶᤔᤥ ᤐᤣᤰ

¹² ᤕᤧᤛᤢᤴ ᤔᤠᤱᤜᤡᤶᤔᤥ ᤐᤣᤀᤠᤱ ᤂᤧᤵᤔᤥ ᤆᤡᤃᤰᤘᤠ ᤁᤧᤛᤱᤒᤠ ᤁᤧᤀᤡᤱᤒᤠᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤜᤣ᤺ᤰᤋᤢᤛᤡ॥ ᤕᤠᤱ ᤁᤧᤗᤧᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤗᤧᤰᤔᤠ ᤛᤠᤵᤏᤧᤳᤋᤡᤴ ᤏᤢ ᤐᤢᤳᤋᤢ᤺ᤰᤁᤣ ᤁᤧᤛᤱᤒᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤏᤠᤴ ᤗᤧᤰᤂᤢᤒᤡᤖᤢᤛᤡᤖᤥ॥

¹³ ᤕᤧᤛᤢᤖᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. ‘ᤀᤡᤱᤃᤠ᤹ ᤀᤠᤜᤡᤶᤔᤡᤱᤃ ᤋᤢᤘᤠ ᤆᤥ᤺ᤰᤔᤠ ᤜᤡᤶ ᤐᤥᤱ.’ ᤁᤖ ᤂᤡᤏᤡ᤹ᤃ ᤑᤠ᤺ᤴᤍᤠᤜᤠ᤹ ᤆᤡᤱᤛᤡᤱᤔᤠ ᤋᤧᤴ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ᥄”

¹⁴ ᤕᤧᤛᤢᤴ ᤔᤠᤱᤜᤡᤶᤔᤥ ᤘᤕᤧᤸᤗᤧ ᤔᤡᤰᤑ᤺ᤶᤒᤠᤜᤠ᤹ ᤏᤢ ᤗᤠᤱᤛᤰᤐᤠᤜᤠ᤹ ᤔᤧᤍᤩᤧ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤏᤢᤛᤢᤛᤡᤖᤥ॥

¹⁵ ᤁᤖ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤆᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤔᤧᤏᤡᤛᤢ ᤜᤧᤰᤁᤩᤠᤱ ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧᤀᤠᤱ ᤔᤠᤱᤜᤡᤶᤔᤥ ᤍᤠᤀᤢᤍᤖᤧ ᤁᤢᤛ᤻ᤛᤠ᤺ᤸᤗᤧ ᤁᤢᤏᤠᤖᤠ ᤐᤥᤖ ᤗ᤹ᤖᤡᤰ ᤔᤧᤀ᤺ᤰᤋᤧᤒᤠ ᤔᤧᤄᤧᤵᤛᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤐᤥᤃᤧᤖᤥ॥

¹⁶ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤁᤴᤜᤠ᤹ᤖᤧ ᤌᤣ ᤔᤧᤒᤠ᤺ᤳᤋᤢᤖ ᤔᤧᤒᤳ ᤁᤧᤱᤄᤧᤵᤛᤢᤴᤒᤡ᥅” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤵᤛᤢᤱᤒᤣ. ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤁᤧᤒᤵᤐᤧᤴ ᤂᤡᤏᤡ᤹ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ “‘ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤏᤢ ᤏᤢᤃᤧᤎᤢᤱᤒᤠᤜᤠ᤹ᤗᤠᤶ ᤂᤢᤏᤧ᤹ ᤁᤧᤏᤠᤖᤠ ᤑᤥᤔᤠ ᤐᤠᤱᤄᤢᤛᤡ॥’”

¹⁷ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤰᤕᤰᤗᤠᤶ ᤒᤣᤌᤠᤏᤡ ᤐᤠᤱᤈᤢᤶᤔᤥ ᤐᤣᤀᤠᤱ ᤕᤠᤱᤎᤥ᤺ᤰᤋᤧᤖᤥ॥

ᤕᤧᤛᤢᤴ ᤏᤢ ᤐ᤺ᤳᤇᤣ᤹ᤒᤢᤱᤔᤠ

¹⁸ ᤁᤢᤍᤠ᤺ᤴᤍᤡᤰ ᤋᤠᤏᤠᤶᤛᤠ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤕᤧᤰᤕᤰᤁᤥ ᤏᤢ᤺ᤰᤂᤧᤀᤠᤱ ᤐᤣᤖ ᤐᤳᤇᤧᤸᤗᤧ ᤁᤢᤛᤧᤳᤗᤠ᤺ᤰᤋᤧ॥

¹⁹ ᤗᤠᤶᤔᤡᤸᤗᤧ ᤁᤢᤒᤣᤛᤠᤱ ᤐ᤺ᤳᤇᤣ᤹ᤒᤢᤱᤔᤠᤴ ᤏᤡᤛᤢᤀᤠᤱ ᤁᤢᤒᤣᤛᤠᤱ ᤐᤣ. ᤜᤧᤰᤁᤩᤠᤱ ᤀᤥᤔᤧᤳᤋᤢᤸᤗᤧ ᤁᤢᤓᤧᤰᤘᤠᤖᤰ ᤐᤳᤇᤧ ᤁᤖ ᤁᤢᤈᤠ᤹ ᤔᤧᤒᤳᤇᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤔᤧᤳᤋᤢ. “ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤁᤧᤈᤠ᤹ ᤔᤧᤎᤥ᤺ᤰᤏᤧᤴᤗᤖᤥ॥” ᤜᤧᤰᤁᤩᤠᤱ ᤂᤧᤴ ᤐ᤺ᤳᤇᤣ᤹ᤒᤢᤱᤔᤠᤴ ᤂᤡᤔᤥ ᤀᤡᤗᤧᤔᤧ ᤛᤩᤧᤖᤥ॥

²⁰ ᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤒᤠᤖᤧ. “ᤀᤠᤰᤂᤧᤴ ᤜᤠᤖᤠᤏᤧ ᤁᤴ ᤐ᤺ᤳᤇᤣ᤹ᤒᤢᤱᤔᤠᤴ ᤀᤡᤗᤧᤔᤧ ᤛᤩᤧᤒᤠᤒᤣ᥄”

²¹ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤆᤵᤆᤡ ᤔᤧᤴᤈᤥ᤺ᤰᤁᤣ ᤏᤛᤠᤴ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤁᤴ ᤐ᤺ᤳᤇᤣ᤹ᤒᤢᤱᤔᤠᤴ ᤀᤡᤱᤃᤠ᤹ ᤆᤥᤃᤢᤱᤒᤠ ᤁᤢᤀᤡᤛᤡᤰ ᤂᤡᤏᤡ᤹ᤀᤠᤱ ᤆᤥ᤺ᤰᤔᤠ ᤁᤧᤛᤢᤰᤋᤢᤶ. ᤜᤧᤰᤁᤩᤠᤱ ᤂᤧᤶᤔᤩᤠᤰᤗᤰ ᤔᤣ᤺ᤴ. ᤁᤖ ‘ᤁᤴ ᤁᤥ᤺ᤰᤔᤠᤴ ᤜᤠ᤹ᤕᤠᤰ ᤀᤠᤃᤧ᤹ᤀᤠᤱ ᤘᤠᤜᤱᤅᤥ ᤗᤠᤵᤑᤢᤛᤡᤱᤅᤧ᤹’ ᤁᤧᤔᤧᤳᤋᤢᤶᤔᤡᤸᤗᤧ ᤂᤧᤴ ᤁᤧᤳᤗᤥ॥

²² ᤂᤡᤏᤡ᤹ ᤋᤢᤘᤠᤀᤥ ᤁᤧᤏᤠ᤺ᤰᤋᤢᤶᤒᤠ ᤐᤠ᤺ᤴᤏᤡᤴ ᤂᤥᤛᤢᤶᤒᤧ᤹ ᤑᤠ᤹ᤀᤠᤱ ᤏᤛᤠᤴ ᤁᤧᤈᤥᤃᤢᤶᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤄᤥᤛᤢᤶᤗᤥ॥”

ᤕᤧᤛᤢᤖᤧ ᤁᤢᤕᤢᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤣ᤺ᤴᤍᤥ

²³ ᤕᤧᤛᤢᤴ ᤔᤠᤱᤜᤡᤶᤔᤥ ᤁᤧᤖᤧᤀᤠᤱ ᤔᤏᤠᤜᤠ᤹ ᤏᤡᤛᤠᤶ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤘᤣ᤹ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧᤀᤠᤱ ᤂᤢᤏᤧ᤹ ᤛᤣ᤺ᤴᤔᤧᤍᤥᤛᤢ. “ᤂᤧᤏᤧ᤹ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤖ ᤁᤧᤘᤠ᤹᥅ ᤁᤴ ᤕᤢᤰᤁᤡᤴ ᤜᤠ᤺ᤳᤗᤧ ᤁᤧᤒᤡᤖᤧ᥅”

²⁴ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ᤀᤠᤱ ᤗᤳᤇᤠ ᤛᤣ᤺ᤴᤗᤠᤵᤌᤡᤰ ᤛᤣ᤺ᤴᤍᤥᤏᤡᤱᤗᤥ॥ ᤀᤡᤱᤃᤠ᤹ ᤕᤠᤵᤔᤡ ᤏᤥᤃᤵ ᤁᤧᤒᤡᤖᤡ᤹ᤏᤧ ᤑᤠ᤹ᤃᤪ ᤀᤡᤱᤃᤠ᤹ᤀᤠᤱ ᤌᤧᤔᤠ ᤕᤢᤰᤁᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤱ ᤂᤧᤴ ᤔᤧᤳᤏᤡᤱᤗᤥ॥

²⁵ ᤕᤢᤜᤢᤴᤏᤠᤖᤧ ᤒᤵᤋᤡᤛ᤻ᤔᤠ ᤐᤡᤔᤠ ᤁᤢᤕᤢᤰᤁᤡᤴ ᤀᤠᤳᤋᤥᤗᤠᤶ ᤋᤩᤧᤒᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤋᤩᤧᤒᤠᤒᤡ. ᤀᤡ ᤔᤏᤠᤗᤠᤶᤒᤡ᥅” ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤐᤠᤴ ᤔᤧᤎᤰᤋᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤀᤠᤸᤗ ᤀᤠᤏᤡ᤹ ‘ᤏᤡᤱᤘᤠ᤹ᤑᤢᤔᤠᤱᤗᤠᤶ’ ᤀᤠᤔᤧᤳᤋᤢᤶᤏᤧ ᤑᤠ᤹ᤃᤪ. ᤌᤣᤀᤠᤱ ᤏᤛᤠᤴ ᤁᤧᤴᤈᤥᤃᤢᤶᤔᤡᤴ ᤑᤠ᤹ᤀᤠᤱ ᤛᤣ᤺ᤴᤀᤠᤗᤠᤵ॥

²⁶ ᤁᤖ ‘ᤔᤏᤠᤜᤠ᤹ᤗᤠᤶ’ ᤀᤠᤒᤠ᤺ᤳᤋᤢᤶᤏᤧ ᤑᤠ᤹ᤃᤪ ᤔᤏᤠᤜᤠ᤹ ᤀᤠᤏᤡ᤹ ᤋᤰᤗᤧᤱᤘᤠᤀᤥ ᤔᤧᤒᤥ᤺ᤰᤐᤡ ᤑᤠ᤹ᤀᤠᤱ ᤀᤠᤃᤡᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤕᤢᤜᤢᤴᤏᤠᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤠ᤹ᤖᤥ॥”

²⁷ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤔᤧᤔᤧᤳᤋᤢ. “ᤀᤠᤏᤡᤃᤣ ᤔᤧᤏᤡᤛᤢᤶᤒᤧᤴᤗᤥ॥” ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤜᤧᤰᤁᤣᤏᤧ ᤑᤠ᤹ᤃᤪ ᤌᤧᤔᤠ ᤕᤢᤰᤁᤡᤸᤗᤧ ᤀᤰᤋᤱᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢᤱ ᤂᤧᤴ ᤀᤡᤱᤃᤠ᤹ᤀᤠᤱ ᤔᤧᤔᤧᤳᤏᤡᤱᤅᤡᤴᤗᤥ॥”

ᤏᤧᤵᤑᤢ ᤛᤠᤜᤠ᤹ᤖᤧᤴ ᤂᤧᤍᤠ᤹

²⁸ ᤕᤠᤶᤔᤥ ᤕᤧᤛᤢᤖᤧ ᤂᤧᤴ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤂᤧᤍᤠ᤹ᤎᤡᤰ ᤔᤧᤳᤏᤡᤱ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤌᤣ ᤁᤧᤀᤡ᤺ᤳᤋᤢᤶ ᤀᤠᤔᤧᤳᤋᤧᤶᤔᤧ᤹ᤀᤥ॥ ᤗᤳᤇᤠ ᤔᤏᤠᤎᤡᤰ ᤘᤕᤧ. ᤂᤧᤸᤗᤧ ᤏᤧᤵᤑᤢ ᤁᤢᤛ᤻ᤛᤠ ᤕᤧᤶᤒᤡᤳᤇᤠ᤹ᤜᤠ᤹ ᤘᤕᤧᤳᤇᤡ॥ ᤂᤧᤴ ᤔᤏᤠᤴ ᤁᤢᤛ᤻ᤛᤠ ᤋᤢᤶᤒᤠᤸᤗᤥ ᤐᤣᤀᤠᤱ ᤔᤧᤳᤋᤢ. ‘ᤀᤠᤛ᤻ᤛᤠᤀᤣ. ᤐᤣᤃᤧ᤹ᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥ ᤕᤠ᤺ᤶᤒᤰ ᤆᤥᤃᤧ᤹ᤀᤥ॥’

²⁹ ᤂᤧᤴ ᤁᤢᤛ᤻ᤛᤠ᤺ᤸᤗᤧ ᤋᤃᤡᤃ ‘ᤔᤧᤈᤥ᤺ᤰᤁᤠᤴᤗᤥ’ ᤔᤧᤳᤋᤢ. ᤁᤖ ᤕᤠᤱᤛᤡ ᤁᤢᤏᤡᤱᤘᤠ᤹ ᤏᤢ᤺ᤰᤂᤧ. ᤜᤧᤰᤁᤩᤠᤱ ᤐᤣᤀᤠᤱ ᤕᤠ᤺ᤶᤒᤰ ᤆᤥᤃᤢᤖᤥ॥

³⁰ ᤜᤧᤰᤁᤩᤠᤱ ᤁᤢᤶᤒᤠᤴ ᤁᤢᤛ᤻ᤛᤠ ᤑᤥ᤹ᤒᤠᤸᤗᤥ ᤐᤣᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤳᤋᤢ॥ ᤂᤧᤴ ᤁᤢᤛ᤻ᤛᤠ ᤑᤥ᤹ᤒᤠᤸᤗᤧᤀᤠᤱ. ‘ᤐᤥᤱ ᤀᤠᤍᤠᤱᤒᤣ. ᤐᤣ᤺ᤰᤁᤠᤖᤥ’ ᤔᤧᤳᤋᤢ. ᤁᤖ ᤂᤧᤴ ᤕᤠ᤺ᤶᤒᤰᤁᤥ ᤔᤧᤒᤣᤏᤧᤴᤗᤥ॥

³¹ ᤀᤠᤸᤗ ᤂᤧᤴ ᤏᤧᤵᤑᤢᤀᤥ ᤀᤠᤳᤋᤡᤸᤗᤧ ᤂᤢᤴᤇᤡ᤹ ᤐᤠ᤺ᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤆᤥᤃᤧᤳᤇᤢᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤋᤢᤶᤒᤠᤸᤗᤧᤖᤥ॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤁᤧᤳᤏᤡᤔᤠᤜᤠ᤹ ᤂᤡᤏᤡ᤹ᤏᤢ᤺ᤸᤗᤧᤀᤠᤱ ᤋᤃᤡ ᤔᤧᤗᤠ᤺ᤳᤗᤥ॥

³² ᤌᤣᤀᤠᤱᤓᤧᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤂᤡᤏᤡ᤹ ᤛᤠᤶᤕᤥᤏᤡᤔᤠ ᤗᤠᤶ ᤀᤥᤛᤣ᤺ᤴᤎᤠᤰᤛᤧ ᤋᤩᤧᤒᤠᤖᤥ. ᤜᤧᤰᤁᤣᤛᤠᤱ ᤂᤢᤏᤧ᤹ ᤛᤶᤍᤠᤱ ᤂᤡᤏᤡ᤹ ᤏᤛᤠᤴ ᤁᤧᤴᤈᤥᤃᤢᤶᤔᤡᤴᤗᤥ॥ ᤁᤖ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤁᤧᤳᤏᤡᤔᤠᤜᤠ᤹ᤖᤧ ᤂᤢᤏᤧ᤹ ᤏᤛᤠᤴ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤴ ᤁᤧᤏᤡᤛᤢᤶᤛᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤏᤠᤱ ᤂᤢᤏᤧ᤹ ᤏᤛᤠ᤺ᤴᤏᤠᤱ ᤁᤧᤴᤈᤥᤃᤢᤶᤔᤡᤴᤗᤥ॥”

ᤁᤢᤓᤪᤧ᤺ᤱ ᤀᤡᤰᤔ᤺ᤒᤠᤜᤠ᤹ᤖᤧᤴ ᤂᤧᤍᤠ᤹

³³ ᤕᤧᤛᤢᤖᤧ ᤕᤠᤶᤔᤥ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤘᤣ᤹ᤛᤔᤠ ᤂᤧᤍᤠ᤹ᤎᤡᤰ ᤂᤧᤵᤛᤧᤶᤔᤧ᤹ᤀᤥ॥ ᤌᤡᤰᤗᤧᤱ ᤕᤶᤒᤠ ᤗᤠᤈᤣ᤹ᤍᤠᤱᤒᤠᤎᤡᤰ ᤘᤕᤧ. ᤂᤧᤸᤗᤧ ᤗᤳᤇᤠ ᤀᤡᤰᤁᤥ ᤆᤧᤸᤗᤧᤰᤛᤣ᤹ ᤗᤣ᤺ᤳᤋᤢᤀᤠᤱ ᤁᤢᤄᤡᤖᤡ ᤗᤢᤱᤎᤠᤰ ᤛᤧᤳᤋᤢᤖ ᤑᤠᤅᤢ. ᤜᤧᤰᤁᤩᤠᤱ ᤁᤢᤗᤢᤶᤔᤥ ᤗᤢᤶᤒᤠᤳ ᤋᤕᤢᤀᤠᤱ ᤂᤧᤵᤔᤥ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠ ᤋᤧᤴᤎᤡᤰ ᤆᤥᤃᤢ॥ ᤀᤡᤰ ᤁᤥᤔᤠ ᤕᤠᤰᤛᤠᤎᤡᤰᤁᤠᤱ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥᤔᤠᤖᤧ ᤗᤠᤃᤡ ᤀᤡᤰᤔᤛᤠᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤗᤠᤶᤍᤡᤰ ᤆᤥ᤺ᤰᤛᤧ ᤐᤣᤖᤥ॥

³⁴ ᤆᤧᤸᤗᤧᤰᤛᤣ᤹ ᤋᤢᤵᤔᤠ ᤕᤧᤶ ᤋᤩᤧ᤺ᤸᤗᤧ ᤁᤢᤗᤰ ᤗᤠᤛᤧ ᤁᤢᤛᤧᤘᤠᤖᤥᤒᤠᤜᤠ᤹ ᤀᤡᤰᤔ᤺ᤒᤠᤜᤠ᤹ᤖᤥ ᤐᤠᤱᤄᤢᤛᤡᤖᤥ॥

³⁵ ᤂᤧᤴ ᤀᤡᤰᤔᤒᤠᤜᤠ᤹ᤖᤧ ᤁᤢᤛᤧᤘᤠᤖᤥᤒᤠᤜᤠ᤹ ᤔᤧᤍᤧᤶᤛᤢᤛᤡ ᤜᤧᤰᤁᤩᤠᤱ ᤌᤡᤰᤛᤡᤃᤣᤰᤐᤠᤴ ᤔᤧᤜᤡᤵᤋᤢ. ᤏᤡᤛᤡᤃᤣᤰᤐᤠᤴ ᤔᤧᤛᤧᤖᤢᤀᤠᤱ ᤛᤢᤶᤛᤡᤃᤣᤰᤐᤠᤴ ᤗᤢᤱᤅᤡᤸᤗᤧ ᤔᤧᤒ᤺ᤳᤋᤢ ᤔᤧᤛᤧᤖᤢᤖᤥ॥

³⁶ ᤜᤧᤰᤁᤩᤠᤱ ᤂᤧᤸᤗᤧ ᤋᤃᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤁᤢᤛᤧᤘᤠᤖᤥᤒᤠᤜᤠ᤹ ᤐᤠᤱᤄᤢᤛᤡ. ᤁᤖ ᤂᤧᤴ ᤀᤡᤰᤔᤒᤠᤜᤠ᤹ᤖᤧ ᤂᤧᤱᤜᤠ᤹ᤀᤠᤱ ᤒᤠ ᤜᤧᤰᤁᤣᤀᤣ ᤔᤧᤔᤧᤳᤋᤢᤛᤡ॥

³⁷ “ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤴ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤸᤗᤧ ᤀᤠᤸᤗ ᤁᤴ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛ᤻ᤛᤠᤴ ᤐᤠᤱᤄᤢᤱᤅᤡᤸᤗᤧᤃ ᤛᤧᤰᤂᤠᤛᤠᤱ ᤁᤢᤏᤠ ᤔᤧᤛᤠ᤹ᤖᤢᤒᤡᤗᤠ ᤑᤠ᤹ᤀᤠᤱ ᤀᤡᤋᤢᤀᤠᤱ ᤁᤢᤛ᤻ᤛᤠᤴ ᤐᤠᤱᤄᤢ॥

³⁸ “ᤁᤖ ᤂᤧᤱᤜᤠ᤹ᤖᤧ ᤁᤢᤛ᤻ᤛᤠᤴ ᤔᤧᤏᤡᤛᤢᤀᤠᤱ ᤀᤰᤂᤣ ᤔᤧᤔᤧᤳᤇᤡᤱ. ‘ᤁᤱᤃ ᤁᤢᤶᤒᤠᤖᤧ ᤁᤢᤗᤰ ᤁᤧᤄᤥᤒᤠᤖᤥ. ᤁᤴ ᤛᤧᤖᤢᤶᤔᤠᤱ ᤁᤢᤗᤠᤈᤣ᤹ ᤛᤡᤱᤒᤢᤱᤜᤠ᤹ ᤀᤠᤏᤡ᤹ ᤜᤢᤰᤁᤠᤵᤐᤠᤛᤡᤖᤥ॥’

³⁹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤍᤧᤶᤛᤢᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤥᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤀᤠᤱ ᤔᤧᤛᤧᤖᤢᤖᤥ॥”

⁴⁰ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤸᤗ ᤆᤧᤸᤗᤧᤰᤛᤣ᤹ ᤀᤡᤰᤁᤧᤸᤗᤧ ᤁᤢᤴᤍᤠᤱᤒᤠᤴ ᤋᤠᤀᤠᤱ ᤂᤧᤴ ᤀᤡᤰᤔᤒᤠᤜᤠ᤹ ᤀᤠᤰᤂᤣ ᤔᤧᤳᤋᤢᤛᤡ᤹ᤒᤣ᥅”

⁴¹ ᤂᤧᤴ ᤋᤢᤶᤕᤰᤕᤠᤒᤠᤜᤠ᤹ ᤏᤢ ᤕᤜᤢᤍᤡ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤧ᤹ ᤏᤥᤃᤵ ᤔᤧᤒᤡᤖᤢ. “ᤂᤢᤏᤧ᤹ ᤋᤠᤀᤠᤱ ᤂᤧᤴ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤛᤧᤰᤂᤠᤛᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤛᤡᤖ ᤛᤧᤖᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤀᤡᤰᤁᤡᤴ ᤁᤢᤓᤪᤧ᤺ᤱ ᤗᤰ ᤂᤥᤔᤠᤖᤧ ᤗᤠᤃᤡ ᤘᤣ᤹ ᤀᤡᤰᤔᤒᤠᤜᤠ᤹ ᤐᤡᤖᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤆᤧᤸᤗᤧᤰᤛᤣ᤹ ᤋᤢᤶᤔᤡᤸᤗᤧ ᤁᤢᤗᤰᤁᤡᤴ ᤔᤧᤒᤡᤖᤢ᤹ᤖᤥ॥”

⁴² ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ “‘ᤗᤢᤱᤃᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤖᤢᤒᤠ ᤗᤢᤱᤅᤡᤴ ᤁᤧᤖᤧᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤁᤢᤶᤔᤠᤗᤢᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤁᤱᤃ ᤕᤜᤘᤣ ᤍᤠᤱᤒᤠᤸᤗᤧᤀᤣ ᤆᤥᤃᤢᤒᤠᤖᤥ. ᤜᤧᤰᤁᤩᤠᤱ ᤁᤴ ᤀᤠᤏᤡ᤹ ᤏᤡᤔᤥ ᤏᤡᤱᤘᤠ᤹ ᤁᤧᤔᤠᤒᤠ ᤆᤥᤰᤗᤥ॥’

⁴³ ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤔᤧᤳᤏᤡᤱ. ᤂᤡᤏᤡ᤹ᤀᤥᤗᤠᤶ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤏᤠᤵᤐᤠᤱ ᤂᤧᤴᤏᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤐᤡᤖᤢᤛᤡᤖᤥ॥

⁴⁴ ‘ᤀᤠᤳᤋᤡᤴᤜᤠ᤹ ᤂᤧᤴ ᤗᤢᤱ ᤛᤶᤍᤠᤱ ᤔᤰᤔᤧᤎᤠ᤹᤺. ᤂᤧᤱᤜᤠ᤹ ᤔᤧᤓᤰ ᤔᤧᤛᤡᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ ᤛᤶᤍᤠᤱ ᤂᤧᤴ ᤗᤢᤱᤅᤡᤴ ᤔᤰᤌᤠ᤹᤺. ᤂᤧᤱᤜᤠ᤹ ᤔᤧᤓᤧᤰ ᤔᤧᤛᤡᤖᤥ॥’”

⁴⁵ ᤜᤧᤰᤁᤩᤠᤱ ᤂᤧᤵᤔᤥ ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ᤖᤧ ᤁᤴ ᤂᤧᤍᤠ᤹ᤀᤡᤴ ᤔᤧᤄᤧᤵᤛᤢᤀᤠᤱ ᤁᤱᤃ ᤀᤠᤏᤡᤃᤣ ᤕᤠ᤺ᤶᤒᤣᤀᤥᤀᤣ ᤕᤧᤛᤢᤖᤧ ᤐᤠ᤺ᤳᤋᤢᤖ ᤐᤳ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥

⁴⁶ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤋᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ. ᤁᤖ ᤔᤏᤠᤜᤠ᤹ ᤔᤧᤃᤡᤖᤢᤛᤡ ᤌᤣᤀᤠᤱᤓᤧᤸᤗᤧ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤀᤠᤱ ᤔᤧᤘᤕᤧᤖᤥ॥