ᤔᤳᤋᤡ 18 - LIFOTNTᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ( ᤔᤷᤁᤢ ᥏:᥉᥉-᥉᥍ ; ᤗᤢᤁᤠ ᥏:᥊᥌-᥊᥎ ) 1 ᤂᤧᤴ ᤕᤧᤶᤔᤥ ᤜᤢ᤹ᤛᤠᤶᤒᤠᤜᤠ᤹ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤍᤠᤱᤒᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤴ ᤜᤠ᤺ᤵᤐᤣ᥅” 2 ᤕᤧᤛᤢᤖᤧ ᤂᤧᤵᤔᤥ ᤜᤡᤴᤈᤠ᤹ᤎᤡᤰ ᤀᤢ᤺ᤳᤋᤢᤀᤠᤱ ᤂᤢᤏᤡ᤹ ᤗᤢᤶᤔᤥ ᤕᤧᤵᤛᤢᤖ 3 ᤔᤧᤳᤋᤢᤛᤡ. “ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤡᤱᤘᤠ᤹ᤀᤡᤴ ᤁᤧᤗᤧᤰᤂᤢᤶᤔᤠᤱ ᤁᤴ ᤜᤡᤴᤈᤠ᤹ᤀᤡᤴ ᤁᤢᤀᤡᤛᤡᤰ ᤂᤡᤏᤡ᤹ ᤁᤧᤶᤒᤥ᤺ᤰᤂᤡᤴᤏᤧ ᤑᤠ᤹ᤃᤪ ᤀᤠᤵᤑᤠᤸᤗᤧᤀᤠᤱ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤗᤠ᤺ᤵᤔᤠ ᤁᤧᤴᤇᤢᤰᤋᤡᤴᤗᤥ. 4 ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤀᤠᤵᤑᤣᤰ ᤆᤢᤱᤈᤡᤃᤧᤴ ᤏ᤺ᤶᤛᤡᤱᤅᤠᤱ ᤁᤴ ᤜᤡᤴᤈᤠ᤹ᤀᤡᤴ ᤜᤧᤰᤁᤣ ᤐᤥᤱ ᤂᤧᤴᤏᤣ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤕᤶᤒᤠ ᤐᤥᤱᤗᤥ॥ 5 ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤱᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤶᤍᤠ᤺ᤰᤁᤠᤖᤥ॥ 6 ᤁᤖ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤏᤛᤠᤴ ᤁᤧᤈᤥ᤺ᤰᤐᤠ ᤆᤢᤰᤛᤠ ᤜᤡᤴᤈᤠ᤹ᤌᤡᤰ ᤗᤠᤕᤥ ᤆᤥ᤺ᤰᤔᤠ ᤐᤠᤱᤄᤢ᤹. ᤂᤧᤸᤗᤧ ᤁᤢᤏᤡ᤺ᤱᤔᤥ ᤗᤢᤶᤛᤢᤶᤔᤡᤴ ᤀᤡᤄᤣ᤺ᤱᤔᤠᤀᤠᤱ ᤘᤖᤰᤁᤥ ᤗᤠᤵᤑᤢᤔᤠᤸᤗᤧᤀᤣ ᤏᤢᤒᤠ ᤐᤥᤱᤗᤥ॥ 7 “ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ. ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠ ᤐᤠ᤺ᤴᤜᤠ᤹ ᤁᤵᤔᤥ ᤕᤖᤡᤰ ᤘᤠ᤹ᤖᤥ॥ ᤀᤰᤋᤱᤒᤠ ᤐᤠ᤺ᤴᤜᤠ᤹ᤃ ᤋᤠ᤺ᤀᤣᤖᤥ. ᤁᤖ ᤘᤣ᤹ᤜᤠ᤹ ᤗᤠᤕᤥᤀᤥ ᤁᤧᤎᤠᤒᤠ ᤔᤏᤠ᤺ᤱᤃ ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ 8 ᤂᤧᤏᤧ᤹ ᤁᤧᤗᤠᤱ ᤁᤧᤜᤢᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤂᤰᤋᤧ᤹ᤀᤠᤱ ᤗᤠᤵᤑᤢᤛᤧ᤹॥ ᤗᤠᤱ-ᤜᤢᤰ ᤏᤧᤵᤔᤠᤱᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠ ᤔᤡ ᤁᤧᤍᤡ᤺ᤵᤐᤠ ᤂᤧᤔᤠᤕᤱᤛᤱᤅᤥ ᤐᤣ᤺ᤰᤔᤠᤏᤢ᤺ᤸᤗᤧ ᤗᤠᤱᤎᤡᤰ ᤏᤢ ᤜᤢᤰᤌᤡᤰ ᤔᤣ᤺ᤴᤏᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥ 9 ᤂᤧᤏᤧ᤹ ᤁᤧᤔᤡᤰᤁᤡᤸᤗᤧ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤏᤧ ᤑᤠ᤹ᤃᤪ ᤕᤃᤧᤗ᤺ᤳᤋᤧ᤹ᤀᤠᤱ ᤗᤠᤵᤑᤢᤛᤧ᤹ᤀᤥ॥ ᤏᤧᤳᤇᤡ ᤔᤡᤰᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤴᤇᤡ᤺ᤶᤏᤠ ᤂᤧᤔᤠᤕᤱᤛᤱᤒᤠ ᤔᤡᤀᤥ ᤐᤣ᤺ᤰᤔᤠᤏᤢ᤺ᤸᤗᤧ ᤔᤡᤰᤌᤡᤰᤏᤢ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤔᤠᤀᤣ ᤏᤢᤒᤠᤖᤥ॥” 10 “ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ. ᤁᤴ ᤆᤢᤰᤐᤠ ᤆᤢᤰᤐᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤈᤥᤃᤧᤶᤛᤡᤶᤔᤡᤴᤏᤧ᤹ᤀᤥ॥ ᤀᤡᤱᤃᤠ᤹ ᤛᤧᤰᤂᤠ ᤐᤠᤴ ᤔᤧᤳᤏᤡᤱ. ᤁᤱᤜᤠ᤹ ᤁᤶᤒᤪᤠᤱ ᤁᤧᤔᤧᤵᤐᤠ ᤂᤢᤏᤡ᤹ ᤔᤠᤱᤗᤠᤀᤡᤱᤒᤠᤜᤠ᤹ ᤛᤍᤠᤍᤡᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤍᤃᤡ ᤔᤧᤘᤠ᤹ᤖᤥ॥ 11 (ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤁᤧᤔᤠᤒᤠᤜᤠ᤹ ᤋᤠᤱᤛᤧ᤺ᤵᤛᤧ ᤋᤩᤠᤱᤒᤠᤖᤥ॥)” ᤁᤧᤔᤠᤒᤠ ᤔᤧᤸᤗᤢᤰ 12 “ᤀᤠᤸᤗ. ᤁᤡᤵᤌᤡᤰ (᥇᥆᥆) ᤔᤧᤸᤗᤢᤰ ᤁᤧᤃᤵᤐᤠᤸᤗᤧ ᤁᤢᤔᤧᤸᤗᤢᤰᤌᤡᤰ ᤔᤠ᤺ᤸᤗᤧ ᤌᤣ ᤆᤥᤃᤢ᤹᥅ ᤂᤧᤸᤗᤧ ᤂᤧᤴ ᤑᤠᤱ-ᤑᤠᤱ (᥏᥏) ᤔᤧᤸᤗᤢᤰᤜᤠ᤹ ᤆᤠᤖᤠᤶᤔᤠᤍᤧᤴᤏᤥ ᤗᤧᤖᤢᤎᤛᤡᤀᤠᤱ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤸᤗᤧ ᤁᤢᤃᤥ᤺ᤳᤇᤧ ᤔᤧᤒᤣ᤺ᤰᤁᤡᤴᤒᤡ᥅ 13 ᤂᤧᤸᤗᤧ ᤂᤧᤴ ᤁᤧᤔᤠᤒᤠ ᤔᤧᤸᤗᤢᤰᤁᤡᤴ ᤂᤥᤛᤢᤸᤗᤧ ᤛᤧᤰᤂᤠᤀᤣ ᤂᤧᤴ ᤔᤧᤶᤔᤠᤀᤣ ᤑᤠᤱ-ᤑᤠᤱ ᤔᤧᤸᤗᤢᤰᤜᤠ᤹ ᤁᤳᤋᤢᤛᤡᤒᤠᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤛ᤺ᤳᤗᤥ॥ 14 ᤜᤧᤰᤁᤣᤗ᤹ᤖᤡᤰᤁᤣ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠ ᤂᤡᤏᤡ᤹ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤀᤠᤱ ᤁᤴ ᤆᤢᤰᤐᤠᤜᤠ᤹ᤀᤥ ᤌᤡᤰᤁᤠᤱ ᤔᤧᤔᤠ᤺ᤏᤧᤴᤗ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ ᤘᤠ᤹ᤖᤥ॥ ᤗᤠᤕᤥ ᤁᤧᤈᤥ᤺ᤰᤐᤠ ᤏᤢᤛᤠ᤹ᤀᤡᤴ ᤋᤥ᤺ᤶᤔᤠ ( ᤗᤢᤁᤠ ᥇᥍:᥉ ) 15 “ᤏᤛᤠᤏᤡᤒᤠᤎᤡᤰᤗᤧ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤗᤠᤕᤥ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤏᤧ᤹ᤖᤰ ᤂᤧᤸᤗᤥ ᤐᤣᤃᤧ᤹ᤀᤠᤱ ᤁᤢᤗᤠᤕᤥᤴ ᤀᤥᤛᤣ᤺ᤴᤎᤠᤰᤋᤧ᤹ᤀᤥ॥ ᤂᤧᤸᤗᤧ ᤁᤧᤒᤠ᤺ᤴᤏᤡᤴ ᤂᤧᤵᤛᤢᤏᤧ ᤑᤠ᤹ᤃᤪ ᤂᤧᤴ ᤏᤛᤠᤏᤡᤒᤠᤸᤗᤧ ᤁᤢᤏᤡᤱᤘᤠ᤹ ᤁᤧᤍᤥ᤺ᤴᤍᤢᤖᤥ॥ 16 ᤁᤖ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤴᤏᤧ ᤑᤠ᤹ᤃᤪ ᤂᤧᤏᤧ᤹ᤏᤢ ᤘᤣ᤹ ᤌᤡᤰᤐᤠ ᤀᤡᤃᤪ ᤏᤧᤵᤑᤢ ᤋᤣ᤹ᤖᤧᤛᤧ᤹ᤀᤠᤱ ᤕᤠᤶᤔᤥ ᤐᤣᤃᤧ᤹. ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ. ‘ᤏᤧᤵᤑᤢ ᤀᤡᤃᤪ ᤛᤢᤶᤛᤡ ᤋᤥ᤺ᤴᤍᤡᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧᤴ ᤏᤡ᤺ᤴᤎᤥ ᤆᤥ᤺ᤰᤔᤠ ᤐᤥᤱᤗᤥ॥’ 17 ᤂᤧᤸᤗᤧ ᤀᤠᤸᤗᤛᤠᤱ ᤂᤧᤱᤜᤠ᤹ ᤂᤧᤶᤔᤠ ᤏᤠ᤹ᤖᤢᤛᤡᤏᤧ ᤑᤠ᤹ᤃᤪ ᤛᤣᤛᤣᤜᤢᤵᤗᤰᤁᤥ ᤁᤴ ᤐᤠ᤺ᤴᤏᤡᤴ ᤋᤠᤖᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤛᤣᤛᤣᤜᤢᤵᤗᤰᤁᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴᤏᤠᤱ ᤏᤠ᤹ᤖᤢᤏᤧ ᤑᤠ᤹ᤃᤪ ᤂᤧᤱᤃ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤢ ᤀᤣ᤺ᤱᤕᤠᤱ ᤁᤧᤓᤥᤱᤒᤠ ᤋᤠᤵᤑᤧ᤺ᤶᤒᤠ ᤔᤏᤠ ᤁᤢᤀᤡᤛᤡᤰ ᤀᤡ᤺ᤳᤋᤧᤶᤔᤧ᤹ᤀᤥ॥ 18 ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤁᤧᤄᤣ᤺ᤰᤂᤢᤶᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥᤀᤠᤱ ᤀᤡᤄᤣ᤺ᤱᤗᤥ. ᤜᤧᤰᤁᤣᤗ᤹ᤖᤡᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤗᤧᤖᤢᤶᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤧᤳᤗᤥ॥ 19 ᤕᤠᤶᤔᤥ ᤀᤡᤱᤃᤠ᤹ ᤀᤰᤂᤣᤀᤠᤱ ᤔᤧᤳᤏᤡᤱ. ᤂᤡᤏᤡ᤹ᤀᤥ ᤏᤧᤵᤑᤢ ᤔᤏᤠᤜᤠ᤹ ᤏᤡᤱᤘᤠ᤹ᤒᤥ ᤌᤡᤰᤜᤢᤵ ᤁᤧᤒᤥᤱᤛᤡᤏᤧ ᤑᤠ᤹ᤃᤪ ᤌᤣ ᤁᤧᤏᤠ᤺ᤰᤛᤢᤛᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤴ ᤁᤧᤈᤥ᤺ᤰᤛᤡ ᤁᤧᤒᤡᤛᤡ᤹ᤖᤥ॥ 20 ᤌᤣᤀᤠᤱᤓᤧᤸᤗᤧ ᤏᤧᤵᤑᤢ ᤀᤡᤃᤪ ᤛᤢᤶᤓᤢ ᤔᤏᤠᤜᤠ᤹ ᤀᤡᤱᤃᤠ᤹ ᤀᤠᤔᤡᤱᤅᤥ ᤔᤧᤈᤢᤶᤔᤡᤸᤗᤧ. ᤀᤡᤱᤃᤠ᤹ ᤂᤢᤏᤡ᤹ ᤗᤢᤶᤔᤥ ᤘᤠ᤹ᤀᤠᤖᤥ॥” ᤗᤧᤵᤔᤡ ᤔᤧᤶᤒᤡ᤺ᤔᤏᤠᤒᤠ ᤛᤣᤘᤠᤖᤥᤒᤠᤸᤗᤧᤴ ᤂᤧᤍᤠ᤹ ( ᤗᤢᤁᤠ ᥇᥍:᥊ ) 21 ᤜᤧᤰᤁᤩᤠᤱ ᤐᤋᤪᤢᤛᤧᤴ ᤕᤧᤛᤢᤖᤥ ᤑᤧᤖᤧᤀᤠᤱ ᤛᤣ᤺ᤴᤍᤥᤛᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤀᤠᤍᤰᤗᤧᤱᤅᤥ ᤗᤠᤕᤥ ᤁᤧᤈᤥ᤺ᤰᤐᤠᤖ ᤁᤧᤏᤧᤒᤠᤴ ᤀᤠᤰᤂᤧᤴᤗᤧᤱ ᤗᤧᤵᤔᤡ ᤐᤡᤖᤢᤱᤒᤠᤒᤣ᥅ ᤏᤢᤛᤡᤗᤧᤱ ᤌᤠᤖᤡᤰᤐᤡ᥅” 22 ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤢᤛᤡ (᥍) ᤗᤧᤱᤖᤰ ᤔᤣ᤺ᤴ. ᤁᤖ ᤏᤢᤒᤥᤱ (᥍᥆) ᤗᤧᤅᤠᤱ ᤏᤢᤛᤡ (᥍) ᤌᤠᤖᤡᤰ ᤗᤧᤵᤔᤡ ᤁᤧᤒᤡᤖᤢᤖ ᤐᤥᤱᤗᤥ॥ 23 “ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤗᤳᤇᤠ ᤜᤠᤱᤎᤡᤰᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤔᤧᤍᤣ᤹ᤖᤢᤒᤠ ᤛᤠᤶᤔᤩᤠᤱ ᤕᤠᤱᤀᤡᤳᤇᤡᤴ ᤑᤥᤱᤔᤠ ᤕᤠ᤺ᤶᤒᤰ ᤆᤥᤃᤢᤒᤠᤴᤏᤢ ᤋᤱᤔᤠ ᤛᤢᤰᤋᤧᤳᤗᤥ॥ 24 ᤂᤧᤴ ᤜᤠᤱᤅᤡᤸᤗᤧ ᤛᤡᤱᤏᤠᤳᤋᤡᤴ ᤑᤥᤱᤔᤠ ᤜᤣ᤺ᤰᤋᤢᤸᤗᤧ ᤌᤡᤒᤥᤱ ᤜᤧᤴᤇᤡᤱ (᥇᥆.᥆᥆᥆) ᤛᤠᤶᤔᤩᤠᤱ ᤕᤠᤱᤀᤡᤳᤇᤡ ᤛᤡᤱᤏᤠᤳ ᤑᤥᤱᤔᤠ ᤁᤧᤒᤥᤱᤒᤠ ᤔᤏᤠᤴ ᤂᤢᤏᤧ᤹ᤀᤥ ᤔᤧᤍᤠᤖᤢ॥ 25 ᤂᤧᤸᤗᤧ ᤂᤧᤴ ᤛᤠᤶᤔᤩᤠᤱ ᤕᤠᤱᤀᤡᤳᤇᤡᤴ ᤜᤢᤱᤔᤠ ᤔᤧᤛᤢᤰᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤔᤧᤸᤗᤡᤱᤃᤧᤴ ᤁᤢᤔᤣᤳ. ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤛᤱᤄᤧᤶᤔᤧ᤹ᤀᤠᤱ ᤑᤥᤱᤔᤠ ᤁᤧᤒᤥᤱᤒᤠ ᤕᤠᤱᤅᤡᤴ ᤑᤥ᤺ᤰᤂᤧᤶᤔᤧ᤹ ᤗ᤹ᤖᤡᤰ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤐᤡᤖᤢᤛᤡᤖᤥ॥ 26 ᤁᤖ ᤂᤧᤴ ᤛᤧᤘᤠᤖᤥᤒᤠᤴ ᤜᤠᤱᤅᤡᤸᤗᤧ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤐᤣᤗᤡ ᤑᤠᤰᤋᤢ. ‘ᤀᤠᤍᤠᤱᤒᤣ. ᤀᤡᤱᤃᤠ᤹ ᤏᤠᤛᤡ ᤌ᤺ᤳᤋᤠᤱᤅᤧ᤹ᤀᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤜᤠᤱᤄᤠᤱᤅᤧ᤹ᤀᤥ᥄ ᤀᤡᤱᤃᤠ᤹ ᤁᤧᤕᤠᤱᤅᤡᤴ ᤁᤧᤖᤧᤰ ᤜᤢᤅᤢᤱ ᤐᤡᤏᤧᤖᤥ॥’ 27 ᤜᤠᤱᤅᤡᤸᤗᤧ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤀᤠᤱ ᤁᤧᤖᤧᤰ ᤜᤢᤱᤔᤠ ᤁᤧᤒᤥᤱᤒᤠ ᤕᤠᤱᤅᤡᤴ ᤗᤧᤵᤔᤡ ᤐᤡᤖᤢᤀᤠᤱ ᤐᤠᤱᤄᤢᤍᤣᤛᤢᤖᤥ॥ 28 ᤜᤧᤰᤁᤩᤠᤱ ᤂᤧᤴ ᤛᤧᤘᤠᤖᤥᤒᤠᤴ ᤗᤠ᤺ᤰᤁᤠᤳ ᤗ᤺ᤴᤍᤧᤸᤗᤧ ᤁᤡᤵᤌᤡᤰ ᤕᤢᤵᤐᤠ ᤕᤠᤱᤀᤡᤳᤇᤡ ᤁᤢᤛᤡᤱᤏᤠᤳ ᤁᤧᤒᤵᤐᤠ ᤁᤢᤴᤈᤢᤶ ᤛᤧᤘᤠᤖᤥᤒᤠᤴ ᤋᤢᤔᤢ॥ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤴ ᤁᤢᤴᤈᤢᤶ ᤛᤧᤘᤠᤖᤥᤒᤠᤴ ᤑᤳᤋᤢᤖ ᤁᤢᤛᤡᤳᤗᤠ᤺ᤴ ᤕ᤹ᤖᤢᤀᤠᤱ ᤀᤰᤂᤣ ᤔᤧᤳᤋᤢ. ‘ᤀᤡᤱᤃᤠ᤹ᤀᤥᤏᤢ ᤁᤧᤍᤣ᤹ᤖᤢᤒᤠ ᤛᤡᤱᤏᤠᤳᤋᤡᤴ ᤀᤠᤸᤗᤥᤛᤠ ᤜᤢᤅᤧ᤹॥’ 29 ᤂᤧᤸᤗᤧ ᤌᤢᤱᤒᤥᤜᤈ᤹ ᤕᤢᤱᤛᤡᤱᤅᤠᤱ ᤐᤣᤗᤡ ᤑᤠᤰᤋᤢᤖ ᤔᤧᤳᤋᤢ. ‘ᤆᤢᤶᤔᤣ. ᤀᤡᤱᤃᤠ᤹ ᤏᤠᤛᤡ ᤌ᤺ᤳᤋᤠᤱᤅᤧ᤹ᤀᤠᤱ ᤁᤢᤓᤠ ᤕᤧᤶ ᤌᤠᤖᤡᤰ ᤜᤠᤱᤄᤠᤱᤅᤧ᤹ᤀᤥ᥄ ᤀᤡᤱᤃᤠ᤹ ᤁᤧᤕᤠᤱᤅᤡᤴ ᤁᤧᤖᤧᤰ ᤜᤢᤅᤢᤱᤗᤥ॥’ 30 ᤁᤖ ᤂᤧᤸᤗᤧ ᤔᤧᤍᤧᤴᤍᤧᤴᤏᤠᤱ ᤂᤧᤴ ᤜᤢᤱᤔᤠ ᤁᤧᤒᤥᤱᤒᤠ ᤕᤠᤱᤅᤡᤴ ᤔᤧᤴᤜᤢᤱᤅᤣ ᤌᤠᤖᤡᤰ ᤐᤢᤱᤗᤠᤜᤡᤶᤔᤥ ᤕᤠᤰᤗ ᤑᤠ᤹ᤀᤠᤱ ᤛᤠᤰᤔᤠ ᤐᤠᤱᤄᤢᤛᤡᤖᤥ॥ 31 ᤘᤣ᤹ ᤛᤧᤘᤠᤖᤥᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤋᤢᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣᤀᤠᤱ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤜᤠᤱᤅᤡᤴ ᤔᤧᤈᤧᤰᤋᤢ॥ 32 ᤜᤠᤱᤅᤡᤸᤗᤧᤀᤠᤱ ᤂᤧᤴ ᤋᤃᤡᤛᤔᤠ ᤛᤧᤘᤠᤖᤥᤒᤠᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. ‘ᤂᤧᤏᤧ᤹ᤃ ᤋᤠᤰᤁᤧᤓᤧ᤹ᤒᤠ ᤛᤣᤘᤠᤖᤥᤒᤠᤏᤧᤖᤥ᥄ ᤂᤧᤏᤧ᤹ ᤐᤣᤗᤡ ᤁᤧᤓᤠᤰᤋᤠᤱᤒᤠᤸᤗᤧ ᤁᤧᤖᤧᤰ ᤁᤧᤛᤡᤱᤏᤠᤳᤋᤡᤴ ᤗᤧᤵᤔᤡ ᤐᤡᤏᤧᤀᤠᤱ ᤘᤕᤠᤱᤗᤥ॥ 33 ᤁᤖ ᤂᤧᤏᤧ᤹ ᤗᤢᤱᤔᤠ᤹ ᤋᤢᤰᤏᤧᤒᤠ ᤁᤢᤀᤡᤛᤡ᤺ᤰᤁᤣ ᤂᤧᤏᤧ᤹ᤀᤠᤱ ᤁᤧᤴᤈᤢᤶ ᤛᤧᤘᤠᤖᤥᤒᤠᤴ ᤗᤢᤱᤔᤠ᤹ ᤋᤢᤰᤔᤠ ᤔᤧᤒᤥᤱᤏᤧᤶᤒᤡ᥅’ 34 ᤜᤧᤰᤁᤩᤠᤱ ᤜᤠᤱᤅᤡᤸᤗᤧ ᤛᤠ᤹ᤖᤡᤰ ᤁᤢᤛᤡᤰᤁᤡᤴ ᤐᤥᤃᤧᤀᤠᤱ ᤂᤧᤴ ᤛᤧᤘᤠᤖᤥᤒᤠᤴ ᤛᤡᤱᤏᤠᤳᤋᤡᤴ ᤔᤧᤴᤜᤢᤱᤅᤣ ᤌᤠᤖᤡᤰ ᤋᤢᤰᤂᤣ ᤔᤧᤈᤠ᤺ᤳᤋᤢᤖ ᤑᤠ᤹ᤀᤠᤱ ᤐᤢᤱᤗᤠᤎᤠᤒᤠᤸᤗᤥ ᤜᤢᤰᤛᤢᤵᤋᤢᤖᤥ॥” 35 ᤕᤧᤛᤢᤖᤧ ᤁᤢᤏᤢᤵᤔᤥ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤗᤠᤕᤥ ᤁᤧᤈᤥ᤺ᤰᤐᤠᤜᤠ᤹ ᤛᤡᤰᤗᤢᤱᤔᤥᤏᤢᤀᤣ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤀᤠᤶᤒᤠᤖᤧᤀᤠᤱ ᤒᤠ ᤜᤧᤰᤁᤣᤀᤣ ᤁᤧᤔᤧᤳᤋᤡ᤹ᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.