ᤔᤳᤋᤡ 17 - LIFOTNT

ᤕᤧᤛᤢᤖᤧ ᤁᤢᤏᤠᤀᤡᤒᤣᤰ ᤗᤧᤱᤛᤡᤱ

¹ ᤜᤧᤰᤁᤣ ᤔᤧᤳᤋᤢᤛᤡᤒᤠ ᤋᤢᤰᤛᤡ (᥌) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤠᤁᤢᤒ ᤏᤢ ᤁᤢᤴᤛᤠ᤹ ᤕᤢᤜᤢᤴᤏᤠ᤺ᤴᤗᤰ ᤂᤢᤏᤧ᤹ᤏᤢ ᤌᤥ ᤁᤣ᤺ᤶᤒᤠ ᤁᤥ᤺ᤰᤔᤠᤀᤥ ᤋᤣ᤹ᤖᤢᤛᤡ॥

² ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤔᤧᤒᤳᤇᤧᤸᤗᤧᤀᤣ ᤕᤧᤛᤢᤖᤧ ᤁᤢᤏᤠᤀᤡᤒᤣᤰ ᤗᤧᤱᤛᤡᤱᤗ ᤐᤣ. ᤜᤧᤰᤁᤩᤠᤱ ᤁᤢᤏᤠᤖᤠᤴ ᤏᤠᤶᤔᤡᤴ ᤁᤢᤀᤡᤛᤡᤰ ᤗᤧᤰᤋᤧ ᤜᤧᤰᤁᤩᤠᤱ ᤁᤢᤍᤣ᤺ᤳᤋᤡᤴᤏᤠᤱ ᤔᤡᤰᤁᤡᤴ ᤆᤧᤔᤢᤖ ᤀᤥ᤺ᤳᤋᤧᤖᤥ॥

³ ᤜᤰᤆᤄᤳ ᤂᤧᤵᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤥᤛᤠᤴ ᤏᤢ ᤀᤣᤗᤡᤕᤠᤴᤏᤠᤱ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢᤴ ᤏᤢ ᤋᤠ᤹ᤈᤧᤰᤂᤧᤳᤇᤡ॥

⁴ ᤐᤋᤪᤢᤛᤖᤧ ᤕᤧᤛᤢᤴ ᤔᤧᤳᤋᤢ. “ᤍᤠᤱᤒᤣ. ᤀᤠᤏᤡ᤹ ᤁᤵᤔᤥᤀᤣ ᤘᤠ᤹ᤔᤠ ᤏᤢᤒᤠ ᤐᤥᤱᤗᤥ॥ ᤂᤧᤏᤧ᤹ ᤏᤡᤱᤘᤠ᤹ ᤁᤧᤈᤥᤃᤢᤏᤧ ᤑᤠ᤹ᤃᤪ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤱ. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰᤌᤡᤰ ᤆᤥᤃᤢᤱᤗᤥ॥”

⁵ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤀᤣ ᤑ ᤗ᤹ᤖᤡᤰ ᤁᤧᤀᤥ᤺ᤵᤐᤠ ᤂᤠᤵᤔᤡ᤺ᤳᤋᤡᤸᤗᤧ ᤆᤡᤍᤧᤵ ᤋᤧᤵᤋᤢᤛᤡᤀᤠᤱ ᤂᤠᤵᤔᤡ᤺ᤳᤋᤥᤗᤠᤶ ᤀᤰᤋᤱᤒᤠ ᤀᤡᤰᤗᤠ ᤔᤧᤄᤧᤵᤛᤢ. “ᤁᤴ ᤀᤠᤔᤡ᤺ᤶ ᤀᤠᤛ᤻ᤛᤠᤖᤥ. ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”

⁶ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤔᤧᤄᤧᤵᤛᤢᤸᤗᤧ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤂᤠᤶᤔᤥ ᤛᤠᤶᤒᤥᤴ ᤜᤒᤳ ᤔᤧᤓᤴᤇᤡᤱᤗᤥ॥

⁷ ᤁᤖ ᤕᤧᤛᤢᤴ ᤂᤧᤵᤔᤥ ᤋᤩᤧᤀᤠᤱ ᤂᤧᤱᤜᤠ᤹ ᤛᤢᤛ᤻ᤛᤢᤛᤡᤖ ᤔᤧᤳᤋᤢᤛᤡ. “ᤐᤥᤃᤧᤶᤔᤧ᤹. ᤔᤧᤃᤡᤛᤧᤶᤔᤡᤴᤏᤧ᤹ᤀᤥ॥”

⁸ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤸᤗᤧ ᤂᤧᤵᤔᤥ ᤕᤧᤛᤢᤴ ᤗᤰ ᤘᤕᤧ ᤁᤖ ᤘᤣ᤹ ᤜᤠ᤺ᤳᤋᤠᤱ ᤜᤥ᤺ᤵᤋᤧᤖᤥ॥

⁹ ᤂᤧᤱᤜᤠ᤹ ᤁᤥ᤺ᤰᤔᤠᤗᤠᤶ ᤕᤥ ᤔᤧᤎᤩᤧᤖ ᤔᤧᤒᤳᤇᤧᤸᤗᤧ ᤕᤧᤛᤢᤖᤧ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤴᤜᤡᤱᤅᤣ ᤌᤠᤖᤡᤰ ᤁᤴ ᤁᤧᤏᤡᤛᤢᤶᤒᤠ ᤐᤠ᤺ᤴᤜᤠ᤹ ᤀᤠᤳᤋᤡᤴᤏᤠᤱ ᤔᤧᤈᤧᤰᤋᤧᤶᤔᤡᤴᤏᤧ᤹ᤀᤥ॥”

¹⁰ ᤂᤧᤱᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤧᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤀᤣᤗᤡᤕᤠ᤺ᤱᤃ ᤕᤢᤔᤠᤀᤣ ᤐᤥᤱ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠᤒᤣ᥅”

¹¹ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤧᤰᤂᤠᤀᤣᤖᤥ. ᤀᤣᤗᤡᤕᤠ᤺ᤱᤃ ᤕᤢ᤹᤺ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤖᤧ ᤁᤢᤍᤠᤔᤠᤴ ᤁᤧᤖᤧᤰ ᤕᤠᤖᤡᤵ ᤆᤥᤃᤢ᤹ᤖᤥ॥

¹² ᤁᤖ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤣᤗᤡᤕᤠᤴ ᤋᤩᤧ ᤆᤢᤖᤧᤀᤠᤱ ᤘᤠ᤹. ᤁᤖ ᤔᤏᤠᤜᤠ᤹ᤖᤧ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤏᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤡᤱᤘᤠ᤹ ᤌᤠᤵᤌᤠᤵ ᤔᤧᤔᤧᤳᤋᤢᤀᤠᤱ ᤔᤧᤘᤠ᤹ᤖᤥ॥ ᤜᤧᤰᤁᤣᤗ᤹ᤖᤡᤰ ᤔᤧᤴᤇᤠᤶᤛᤠ᤺ᤴᤏᤠᤱ ᤂᤢᤏᤡ᤹ ᤜᤢᤰᤁᤥ ᤌᤠᤀᤠᤱ ᤋᤢᤰᤂᤣ ᤆᤠᤖᤥ॥”

¹³ ᤜᤧᤰᤁᤩᤠᤱᤗᤰ ᤕᤧᤛᤢᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤳᤋᤢᤛᤡᤒᤠ ᤑᤠ᤹ᤀᤠᤱ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ॥

ᤔᤠᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠ

¹⁴ ᤜᤧᤰᤁᤩᤠᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤶᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤒᤠ ᤋᤧᤴᤏᤥ ᤔᤧᤃᤧᤖᤧᤸᤗᤧ ᤂᤧᤵᤔᤥ ᤔᤏᤠᤎᤡᤰ ᤕᤧᤛᤢᤖᤥ ᤋᤩᤧᤀᤠᤱ ᤁᤢᤍᤃᤡ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ

¹⁵ ᤐᤠ᤺ᤳᤋᤢ. “ᤀᤠᤍᤠᤱᤒᤣ. ᤀᤠᤛ᤻ᤛᤠᤴ ᤗᤢᤱᤔᤠ᤹ ᤋᤢᤰᤋᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤂᤧᤴᤏᤡᤴ ᤌᤵᤔᤠᤔᤔᤧᤸᤗᤧ ᤕᤠᤱᤄᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠᤖᤥ॥ ᤀᤧᤳᤗᤧᤱ ᤂᤧᤴ ᤆᤫᤠ᤺ᤳᤋᤥ ᤏᤢ ᤔᤡᤀᤥ ᤌᤠᤖᤥ॥

¹⁶ ᤂᤧᤴ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤥ ᤔᤧᤘᤣ᤺ᤴᤍᤢᤖ ᤑᤠ᤹ᤀᤠᤱ ᤋᤠᤖᤢᤱ. ᤁᤖ ᤂᤧᤱᤜᤠ᤹ᤖᤧ ᤘᤣ᤺ᤶᤔᤠ ᤔᤧᤴᤇᤢᤰᤋᤢᤴᤗᤥ॥”

¹⁷ ᤕᤧᤛᤢᤖᤧ ᤔᤧᤳᤋᤢᤛᤡ. “ᤏᤛᤠᤴ ᤁᤧᤜᤥᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤒᤠᤒᤣ᥅ ᤀᤠᤵᤑᤠᤸᤗᤧ ᤌᤠᤖᤡᤰ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”

¹⁸ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤑᤧ᤺ᤰᤋᤢᤀᤠᤱ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤖᤥ॥ ᤒᤠ ᤂᤧᤴ ᤕᤧᤶᤔᤥᤀᤣ ᤂᤧᤴ ᤆᤢᤰᤐᤧᤴ ᤘᤣ᤺ᤳᤋᤧᤖᤥ॥

¹⁹ ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤛᤫᤠ᤺ᤳᤋᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤌᤣᤀᤠᤱ ᤀᤠᤏᤡᤃᤣ ᤂᤧᤴ ᤑᤧᤴᤛᤠᤶᤔᤡᤴ ᤏᤠ᤺ᤵᤔᤠ ᤗ᤺ᤵᤔᤠ ᤔᤧᤛᤢᤰᤋᤢᤶᤒᤧᤴᤒᤠᤒᤣ᥅”

²⁰ ᤕᤧᤛᤢᤖᤧ ᤔᤧᤳᤋᤢᤛᤡ. “ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤛᤠ᤺ᤴᤏᤡᤴ ᤛᤢ᤺ᤴᤗᤥ॥ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤂᤡᤏᤡ᤹ ᤏᤛᤠ᤺ᤴᤏᤡᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤎᤡᤰ ᤕᤠ᤺ᤳᤇᤠᤱ ᤁᤴ ᤁᤥ᤺ᤰᤔᤠᤴ ‘ᤂᤧᤵᤔᤥᤗᤠᤶ ᤂᤧᤳᤇᤡᤱᤅᤧ᤹’ ᤁᤧᤔᤧᤳᤋᤢᤶᤔᤡᤸᤗᤧ. ᤂᤧᤴ ᤂᤧᤳᤇᤡᤱ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤂᤡᤏᤡ᤹ᤗᤠᤶᤒᤠ ᤐᤥᤱᤔᤠ ᤔᤧᤴᤇᤢᤰᤔᤏᤠ ᤌᤣᤀᤠᤱ ᤜᤥᤵᤗᤥ॥”

²¹ ((ᤁᤖ ᤀᤰᤋᤱᤒᤠ ᤑᤧᤴᤛᤠᤶᤔᤡᤱᤃ ᤋᤢᤘᤠ ᤏᤢ ᤆᤠᤏᤧᤳ ᤔᤣ᤺ᤴᤏᤣ ᤗ᤺ᤵᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥))

ᤕᤧᤛᤢᤖᤧ ᤕᤠᤶᤔᤥ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

²² ᤜᤧᤰᤁᤩᤠᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤃᤠᤗᤡᤗ ᤌᤢᤶᤔᤥ ᤔᤧᤍᤩᤧᤸᤗᤧ ᤂᤢᤏᤧ᤹ ᤀᤰᤂᤣ ᤔᤧᤳᤋᤢᤛᤡ. “ᤀᤠᤸᤗ ᤔᤧᤴᤇᤠᤶᤛᤠᤴ ᤀᤡᤱᤔᤧᤗᤧᤰᤋᤢ᤹ᤀᤠᤱ ᤔᤏᤠᤜᤠ᤹ᤖᤥ ᤜᤢᤰᤔᤧᤛᤢᤵᤋᤢ᤹.

²³ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤛᤧᤖᤢ᤹. ᤁᤖ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤗᤥ॥” ᤁᤴ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤥᤶ ᤐᤢ᤹ᤖᤧᤖᤥ॥

ᤕᤧᤛᤢᤖᤧ ᤔᤠᤱᤜᤡᤶ ᤀᤣ᤺ᤱᤕᤠᤱ ᤜᤢᤅᤢ᤹

²⁴ ᤕᤠᤱᤛᤡ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤐᤷᤏᤜᤢᤶᤔᤥ ᤔᤧᤍᤩᤧ. ᤜᤧᤰᤁᤩᤠᤱ ᤔᤠᤱᤜᤡᤶ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ᤀᤠᤱ ᤐᤋᤪᤢᤛᤖᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤁᤧᤛᤡᤰᤛᤠᤶᤒᤠᤸᤗᤧ ᤔᤠᤱᤜᤡᤶ ᤀᤣ᤺ᤱᤕᤠᤱ ᤔᤧᤜᤢᤅᤢᤴᤒᤡ᥅”

²⁵ ᤂᤧᤸᤗᤧ ᤏᤥᤃᤵ ᤐᤡᤖᤢ. “ᤌᤣᤀᤠᤱ ᤔᤧᤜᤢᤅᤢᤴᤒᤣ᥅ ᤜᤢᤅᤢ᤹ᤖᤥ॥” ᤜᤧᤰᤁᤩᤠᤱ ᤐᤋᤪᤢᤛᤧᤴ ᤜᤡᤶᤔᤥ ᤗᤠᤛᤧᤏᤠᤔᤧ᤺ᤴᤏᤧ ᤕᤧᤛᤢᤖᤧ ᤛᤣ᤺ᤴᤍᤥᤛᤢ. “ᤛᤡᤔᤥᤏᤣ. ᤌᤣ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤣ᥅ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ᤖᤧ ᤀᤣ᤺ᤱᤕᤠᤱ ᤀᤠᤳᤋᤡᤸᤗᤥᤗᤠᤶ ᤔᤧᤓᤥ᤺ᤰᤂᤢᤒᤣ᥅ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤗᤠᤶᤒᤠ ᤔᤧᤓᤥ᤺ᤰᤂᤢᤒᤡ. ᤀᤡ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤒᤡ᥅”

²⁶ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤘᤣ᤹ ᤗᤠᤈᤣ᤹ᤒᤠ ᤔᤏᤠᤗᤠᤶ ᤔᤧᤓᤥ᤺ᤰᤂᤢᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤜᤧᤰᤁᤣᤏᤧ ᤑᤠ᤹ᤃᤪ ᤂᤢᤏᤡ᤹ ᤀᤠᤒᤠᤅᤣ ᤔᤏᤠᤜᤠ᤹ᤖᤧ ᤜᤢᤱᤔᤠ ᤔᤧᤒᤥᤱᤏᤧᤸᤗᤥ॥

²⁷ ᤜᤧᤰᤁᤣᤛᤠᤱ ᤀᤠᤏᤡ᤹ᤏᤢ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤡᤰ ᤔᤧᤒᤥ᤺ᤰᤏᤧᤴᤗ ᤑᤠ᤹ᤀᤠᤱ ᤃᤠᤗᤡᤗ ᤘᤖᤰᤁᤥ ᤐᤣᤃᤧ᤹ᤀᤠᤱ ᤂᤣ᤺ᤱ ᤋᤣᤛᤧ᤹ᤀᤥ॥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤧᤍᤧᤶᤛᤢᤒᤠ ᤅᤠ᤺ᤸᤗᤧ ᤁᤢᤔᤢᤖᤠᤀᤥ ᤕᤠᤱᤀᤡᤳᤇᤡᤎᤡᤰ ᤁᤧᤄᤥᤛᤢ᤹ᤖᤥ॥ ᤂᤧᤴ ᤋᤣ᤹ᤖᤧ᤹ᤀᤠᤱ ᤀᤠᤴᤇᤡ᤹ ᤔᤠᤱᤜᤡᤶ ᤀᤣ᤺ᤱᤕᤠᤱᤅᤡᤴ ᤜᤢᤅᤧ᤹ᤀᤥ॥”