ᤔᤳᤋᤡ 16 - LIFOTNT

ᤛᤠᤱᤃᤪᤠᤶᤐᤣᤍᤠᤱᤒᤠ ᤔᤡᤰᤛᤣᤴ

¹ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ ᤔᤧᤍᤩᤧᤀᤠᤱ “ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤁᤧᤕᤧᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤕᤠᤵᤔᤡ ᤀᤥᤛᤣ᤺ᤴᤀᤠᤎᤠᤰᤋᤧ᤹” ᤔᤧᤔᤧᤳᤋᤢᤖ ᤕᤧᤛᤢᤖᤧ ᤁᤢᤏᤡᤱᤘᤠ᤹ ᤔᤧᤛᤠ᤹ᤖᤢ॥

² ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤕᤢ᤺ᤴᤇᤡᤰ ᤋᤠᤱᤛᤠᤰᤐᤧᤴ ᤜᤧ᤺ᤳ ᤗ᤹ᤀᤡᤸᤗᤧ ᤋᤠ᤺ᤴᤍᤡᤰ ᤏᤠᤶᤛᤧ᤺ᤰᤔᤠ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥

³ ᤜᤧᤰᤁᤩᤠᤱ ᤋᤠᤏᤠᤶ ᤋᤠᤱᤛᤠᤰᤐᤧᤴ ᤔᤢᤍ᤺ᤵᤐᤡᤸᤗᤧ ᤀᤠᤀᤡᤴ ᤘᤠᤜᤡᤳ ᤌᤠ᤺ᤛᤢ᤹. ᤛᤢᤖᤡᤳ ᤁᤣᤈᤱᤅᤡᤴ ᤜᤢ᤹᤺ ᤗ᤹ᤖᤡᤰ ᤁᤧᤒᤠ᤺ᤳᤋᤢᤶ॥ ᤀᤰᤂᤣᤗ᤹ᤖᤡᤰ ᤋᤠᤱᤛᤠᤰᤐᤧᤴ ᤀᤥᤃᤧᤔᤧᤳᤋᤢᤶᤔᤠᤱ ᤘᤠᤕᤧᤶᤔᤡᤴ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤆᤥᤰ ᤑᤠ᤹ᤀᤠᤱ ᤁᤧᤛᤧᤴᤍᤢᤶᤔᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤁᤴ ᤕᤧᤶᤔᤥ ᤁᤧᤍᤠᤒᤠ ᤔᤡᤰᤛᤣ᤺ᤴᤜᤠ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤠᤒᤣ᥅

⁴ ᤁᤴ ᤕᤧᤶᤔᤥᤒᤠ ᤁᤢᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣᤴ ᤌᤣᤀᤠᤱ ᤔᤧᤱᤄᤥᤛᤢᤴᤗᤥ॥” ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤐᤰᤌᤛᤡᤀᤠᤱ ᤂᤧᤵᤔᤥᤗᤠᤶ ᤌᤠᤛᤡᤱᤗᤥ॥

ᤑᤖᤡᤛᤡ ᤏᤢ ᤛᤍᤢᤁᤡᤜᤠ᤹ᤖᤧᤴ ᤂᤧᤛ᤻ᤛᤢᤱ

⁵ ᤕᤠᤱᤛᤡ ᤜᤢ᤹ᤛᤠᤶᤒᤠᤜᤠ᤹ ᤘᤖᤰᤁᤡᤸᤗᤧ ᤏᤠᤎᤠ᤺ᤶᤒᤡ ᤔᤧᤃᤧᤖᤧᤸᤗᤧ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤕᤠᤱᤛᤡᤱᤔᤠ ᤏᤡᤱᤘᤠ᤹ ᤔᤧᤓᤣ᤺ᤳᤇᤢᤒᤠᤴ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥

⁶ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ᤀᤥ॥”

⁷ ᤂᤧᤱᤜᤠ᤹ᤖᤧ ᤂᤖᤧ᤺ᤱᤅᤡᤴ ᤀᤠᤶᤓᤧᤳᤋᤢᤶᤔᤡᤴᤏᤠᤱ ᤀᤠᤏᤡ᤹ ᤀᤰᤂᤣ ᤀᤠᤔᤧᤳᤋᤧᤒᤠᤖᤥ ᤑᤠ᤹ᤀᤠᤱ ᤂᤢᤏᤡ᤹ ᤗᤢᤶᤔᤥ ᤐᤠᤴ ᤔᤧᤎᤰᤋᤧᤖᤥ॥

⁸ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ᤏᤡᤱᤘᤠ᤹ᤀᤥᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤢᤀᤠᤱ ᤔᤧᤳᤋᤢᤛᤡ. “ᤏᤛᤠᤴ ᤁᤧᤛᤢ᤺ᤶᤒᤠᤛᤣ. ᤂᤡᤏᤡ᤹ ᤗᤢᤶᤔᤥ ᤂᤖᤧ᤺ᤱ ᤜᤥᤵ ᤑᤠ᤹ᤀᤠᤱ ᤌᤣᤀᤠᤱ ᤐᤠᤴ ᤁᤧᤎᤰᤋᤡᤒᤠᤒᤣ᥅

⁹ ᤂᤡᤏᤡ᤹ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤜᤧᤴᤇᤡᤱ ᤅᤠᤛᤡ (᥋.᥆᥆᥆) ᤔᤏᤠᤜᤠ᤹ᤖᤧ ᤅᤠᤛᤡ ᤂᤖᤧ᤺ᤱ ᤔᤧᤈᤀᤠᤱ ᤁᤢᤈᤡ ᤁᤧᤏᤶᤒᤠᤴ ᤁᤧᤛᤢᤵᤛᤢᤶᤔᤡᤸᤗᤧ ᤀᤠᤰᤂᤧᤴ ᤏᤀᤡᤔᤠ ᤕᤥᤖᤧ. ᤂᤧᤴ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅

¹⁰ ᤕᤠᤶᤔᤥ ᤜᤧᤴᤇᤡᤱ ᤗᤡᤛᤡ (᥊.᥆᥆᥆) ᤔᤏᤠᤜᤠ᤹ᤖᤧ ᤏᤢᤛᤡ ᤂᤖᤧ᤺ᤱ ᤔᤧᤈ ᤜᤧᤰᤁᤩᤠᤱ ᤀᤠᤰᤂᤧᤶᤔᤩᤠᤰ ᤁᤢᤈᤡ ᤁᤧᤏᤶᤒᤠᤜᤠ᤹ ᤂᤡᤏᤡ᤹ ᤁᤧᤛᤢᤵᤛᤢᤶ. ᤂᤧᤴᤏᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤢᤶᤒᤡ᥅

¹¹ ᤂᤖᤧ᤺ᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤃᤠ᤹ ᤔᤧᤳᤏᤡᤱᤒᤠ ᤔᤣ᤺ᤴ ᤑᤠ᤹ᤀᤠᤱ ᤀᤠᤸᤗᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤑᤠ᤹ᤀᤠᤱᤏᤧ ᤜᤧᤰᤁᤣ ᤔᤧᤳᤏᤡᤱᤒᤠᤖᤥ॥”

¹² ᤜᤧᤰᤁᤩᤠᤱᤗᤰ ᤂᤧᤱᤜᤠ᤹ᤖᤧ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤗᤠᤶ ᤛᤡᤱᤛᤡᤱ ᤗ᤹ᤖᤧᤶᤔᤧ᤹ ᤔᤧᤳᤋᤢᤛᤡᤒᤠ ᤔᤣ᤺ᤴ. ᤁᤖ ᤑᤖᤡᤛᤡᤜᤠ᤹ ᤏᤢ ᤛᤍᤢᤁᤡᤜᤠ᤹ᤖᤧ ᤂᤢᤏᤡ᤹ ᤏᤡᤛᤠᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢᤒᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

ᤐᤋᤪᤢᤛᤖᤧ ᤕᤧᤛᤢᤴ ᤂᤪᤡᤛ᤻ᤋ ᤀᤡᤱᤓᤥᤛᤢ᤹

¹³ ᤕᤧᤛᤢᤴ ᤛᤡᤈᤖᤡᤕᤠ ᤑᤡᤗᤡᤵᤐᤡ ᤌᤢᤶᤔᤥ ᤋᤩᤧ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤔᤏᤠᤜᤠ᤹ᤖᤧ ᤔᤧᤴᤇᤠᤶᤛᤠᤴ ᤜᤠᤳ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤒᤣ᥅”

¹⁴ ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ. ᤘᤣ᤹ᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ᤜᤠ᤹ᤖᤧᤃ ᤕᤷᤔᤡᤕᤠ ᤔᤣ᤺ᤴᤇᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤀᤥ ᤗᤳᤇᤠᤏᤧᤖᤥ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢ᤹ᤖᤥ॥”

¹⁵ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅”

¹⁶ ᤛᤡᤔᤥᤏ ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋ. ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠᤏᤧᤖᤥ॥”

¹⁷ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤕᤥᤏᤠᤖᤧ ᤁᤢᤛ᤻ᤛᤠ ᤛᤡᤔᤥᤏᤣ. ᤂᤧᤏᤧ᤹ᤃ ᤔᤢ᤹ᤀᤡᤛᤠᤒᤠᤏᤧᤖᤥ ᤌᤣᤀᤠᤱᤓᤧᤸᤗᤧ ᤁᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤥᤛᤣ᤺ᤴᤍᤠᤱ ᤁᤧᤶᤈᤥᤃᤧᤒᤠ ᤔᤣ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤂᤧᤏᤧ᤹ ᤀᤥᤛᤣ᤺ᤴᤍᤠᤱ ᤁᤧᤈᤥᤃᤧᤒᤠᤖᤥ॥

¹⁸ “ᤛᤧᤰᤂᤠ ᤐᤠᤴ ᤂᤧᤏᤧ᤹ ᤔᤧᤳᤏᤧ᤹. ᤂᤧᤏᤧ᤹ ᤐᤋᤪᤢᤛᤏᤧᤖᤥ (ᤐᤋᤪᤢᤛ ᤑᤠ᤹ᤀᤡᤴ ᤗᤢᤱᤗᤥ). ᤜᤧᤰᤁᤩᤠᤱ ᤁᤴ ᤐᤕᤶ ᤕᤶᤒᤠ ᤗᤢᤱᤛᤶᤍᤠᤱ ᤀᤡᤱᤃᤠ᤹ ᤀᤠᤛᤣᤛᤣᤜᤢᤵᤗᤰᤁᤡᤴ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤁᤴ ᤀᤠᤛᤣᤛᤣᤜᤢᤵᤗᤰᤁᤡᤴ ᤛᤡᤔᤧᤸᤗᤧᤴ ᤔᤢᤰᤛᤠᤶᤔᤡᤸᤗᤧ ᤏᤠ᤺ᤶᤔᤠ ᤔᤧᤛᤢᤰᤋᤢᤴᤗᤥ॥

¹⁹ ᤂᤧᤏᤧ᤹ᤃ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤋᤡᤔᤡᤰᤜᤠ᤹ ᤐᤡᤏᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤁᤧᤄᤣ᤺ᤰᤂᤢᤶᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥᤀᤠᤱ ᤀᤡᤄᤣ᤺ᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤗᤧᤖᤢᤶᤒᤠᤴ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤧᤳᤗᤥ॥”

²⁰ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤠᤱᤒᤠ ᤂᤪᤡᤛ᤻ᤋᤀᤠ ᤑᤠ᤹ᤀᤠᤱ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤈᤧᤰᤋᤧᤶᤛᤡᤶᤔᤧᤴᤏᤧ᤹ᤀᤥ ᤗ᤹ᤖᤡᤰ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡᤖᤥ॥

ᤕᤧᤛᤢᤖᤧ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

²¹ ᤂᤧᤴ ᤕᤧᤶᤔᤠᤱᤎᤥ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ ᤕᤖᤢᤛᤗᤧᤶᤔᤥ ᤐᤣ᤺ᤰᤔᤠᤀᤣ ᤐᤥᤱ. ᤜᤧᤰᤁᤩᤠᤱ ᤂᤧᤵᤔᤥ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤀᤥᤗᤠᤶ ᤕᤖᤡᤰ ᤐᤠ᤺ᤴᤏᤥ ᤋᤢᤰᤂᤣ ᤆᤠᤔᤠᤀᤣ ᤐᤥᤱ ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤔᤠᤀᤣ ᤐᤥᤱᤅᤠᤱ ᤕᤠᤶᤔᤥ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠ ᤐᤥᤱ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤆᤧᤰᤔᤠ ᤜᤣ᤺ᤰᤋᤢᤛᤡᤖᤥ॥

²² ᤁᤖ ᤐᤋᤪᤢᤛᤖᤧ ᤂᤢᤏᤧ᤹ ᤌᤡᤰᤗᤧᤵᤔᤠᤱ ᤋᤣ᤹ᤖᤢᤀᤠᤱ ᤑᤧ᤺ᤰᤋᤢ. “ᤀᤠᤍᤠᤱᤒᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤥᤱᤔᤠ ᤔᤧᤒᤠᤱᤄᤢᤴᤗᤥ. ᤀᤰᤋᤱᤒᤠ ᤐᤠ᤺ᤱᤃ ᤂᤧᤏᤧ᤹ᤏᤢ ᤀᤠᤵᤑᤠᤸᤗᤧᤀᤠᤱ ᤔᤧᤒᤥᤱᤏᤧᤸᤗᤥ॥”

²³ ᤕᤧᤛᤢᤴ ᤐᤋᤪᤢᤛ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤔᤧᤳᤋᤢ. “ᤔᤠᤑᤧᤴᤛᤠᤶᤔᤣ. ᤂᤧᤏᤧ᤹ ᤀᤡᤱᤃᤠ᤹ᤗᤠᤶ ᤔᤠ᤺ᤱᤄᤠ ᤐᤣᤃᤧ᤹᥄ ᤂᤧᤏᤧ᤹ ᤁᤧᤄᤀᤠᤖᤥ॥ ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱ ᤁᤢᤀᤡᤛᤡᤰ ᤔᤣ᤺ᤴ. ᤁᤖ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡ᤺ᤰᤗᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹ᤖᤥ॥”

²⁴ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤁᤢᤛᤡᤗᤠᤶᤛᤠᤰᤔᤠ ᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥

²⁵ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢ᤹ᤖᤥ॥

²⁶ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤀᤠᤱ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤔᤠᤛᤢᤸᤗᤧ ᤏᤢᤒᤠ ᤐᤥᤱᤒᤡ᥅ ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤔᤧᤴᤏᤢᤵᤔᤏᤠᤒᤠ ᤁᤢᤜᤡᤱᤔᤴᤏᤡᤴ ᤕᤠᤱᤏᤠ ᤂᤥᤔᤠᤖᤧ ᤗᤠᤃᤡ ᤌᤣ᤺ᤸᤗᤧᤀᤠᤱ ᤗᤧᤰᤔᤠ ᤔᤧᤛᤢᤰᤋᤢᤴᤗᤥ॥

²⁷ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤅᤥ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢ᤺ᤀᤠᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤴ ᤗᤠ᤹ᤖᤢᤒᤠ ᤌᤢᤶᤄᤥᤴ ᤐᤡᤖᤢᤱᤛᤡᤱᤗᤥ॥

²⁸ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤀᤡᤱᤃᤠ᤹ ᤔᤧᤴᤇᤠᤶᤛᤠᤴ ᤀᤠᤜᤠᤱᤈᤢᤶᤔᤥ ᤜᤠᤱ ᤆᤥ᤺ᤰᤛᤧ ᤕᤢ᤺ᤀᤠᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤁᤵᤔᤥ ᤁᤧᤕᤧᤵᤐᤠᤜᤠ᤹ᤀᤥ ᤁᤢᤓᤠᤃ ᤔᤧᤴᤇᤡᤏᤧᤴᤗᤥ॥”