ᤔᤳᤋᤡ 15 - LIFOTNT

ᤛᤠᤶᤕᤥᤌᤡᤶ ᤀᤡ᤺ᤵᤔᤠ ᤏᤠ᤺ᤵᤔᤠ

¹ ᤜᤧᤰᤁᤩᤠᤱ ᤁᤢᤓᤠ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤕᤖᤢᤛᤗᤧᤔ ᤕᤧᤰᤕᤰᤗᤠᤶ ᤔᤧᤍᤩᤧᤀᤠᤱ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ.

² “ᤌᤣᤀᤠᤱ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤠᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴᤒᤠᤒᤣ᥅ ᤂᤧᤱᤜᤠ᤹ᤖᤧ ᤆᤠᤔᤠᤏᤢ᤺ᤸᤗᤧ ᤋᤃᤡ ᤆᤥ᤺ᤰᤌᤡᤶ ᤁᤢᤀᤡᤛᤡᤰ ᤜᤢᤰ ᤘᤠᤔᤧᤴᤜᤵᤋᤢᤴᤗᤥ॥”

³ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ᤀᤠᤱ ᤐᤠᤎᤧᤒᤠᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤌᤣᤀᤠᤱ ᤁᤧᤓᤣ᤺ᤴᤍᤢᤶᤒᤠᤒᤣ᥅

⁴ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ‘ᤁᤧᤶᤒᤠ ᤁᤧᤶᤔᤠᤛᤡ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤧᤛᤧ᤹’ ᤜᤧᤰᤁᤩᤠᤱ ‘ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤛᤠᤱᤃᤪᤠ ᤔᤧᤳᤋᤢᤛᤡ᤹. ᤂᤧᤱᤃ ᤛᤧᤵᤔᤠᤀᤣ ᤐᤥᤱᤗᤥ॥’

⁵ ᤁᤖ ᤀᤠᤳᤋᤡᤸᤗᤧ ᤁᤢᤶᤒᤠ ᤁᤢᤶᤔᤠᤛᤡ ᤀᤡᤱᤃᤠ᤹ᤗᤠᤶ ᤂᤡᤴᤇᤡ᤹ ᤂᤥᤔᤠ ᤁᤧᤒᤥᤱᤒᤠ ᤁᤢᤓᤠ᤹ᤀᤡᤴ. ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤡᤖᤢᤱ ᤛᤢᤖᤢᤱᤅᤠᤱ ᤘᤠ᤹ ᤗ᤹ᤖᤡᤰ ᤐᤠ᤺ᤳᤋᤢ᤹.

⁶ ᤂᤧᤸᤗᤧ ᤀᤠᤒᤠᤅᤣ ᤁᤢᤶᤒᤠ ᤁᤢᤶᤔᤠᤛᤡ ᤁᤢᤓᤠ᤹ ᤐᤡᤔᤠᤛᤡᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤐᤡᤔᤠᤛᤡ ᤔᤧᤒᤥᤱᤏᤧᤴ ᤗ᤹ᤖᤡᤰ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤵᤑᤣᤰ ᤂᤡᤏᤡ᤹ ᤆᤥ᤺ᤰᤌᤡᤶᤔᤡᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤌᤣᤏᤠ-ᤎᤣᤒᤠ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹ᤖᤥ॥

⁷ ᤂᤡᤏᤡ᤹ ᤏᤡᤱᤘᤠ᤹ ᤁᤧᤈᤡ᤺ᤵᤐᤠᤛᤣ. ᤂᤡᤏᤡ᤹ ᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤛᤠᤵᤋᤢᤒᤠᤱᤃ ᤛᤧᤰᤂᤠᤀᤣ ᤗᤠ᤹ᤖᤢᤖᤥ.

⁸ “‘ᤁᤴ ᤔᤏᤠᤜᤠ᤹ᤖᤧᤃ ᤂᤢᤏᤡ᤹ ᤔᤢᤖᤠ᤺ᤸᤗᤧᤖᤰ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ. ᤁᤖ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤀᤡᤱᤃᤠ᤹ ᤗᤧᤵᤔᤠᤱ ᤜᤥᤵᤗᤥ.

⁹ ᤁᤱᤜᤠ᤹ᤖᤧ ᤜᤏᤧᤀᤣ ᤛᤧᤘᤠ ᤔᤧᤈᤥ᤺ᤰᤁᤠ. ᤁᤖ ᤔᤧᤜᤢ᤹ᤖᤢᤛᤡᤒᤠ ᤏᤡᤛᤠᤶᤔᤡᤱᤃ ᤔᤧᤴᤇᤠᤶ ᤕᤠᤵᤔᤡᤖᤧ ᤀᤠᤵᤑᤣᤰ ᤔᤧᤈᤥᤃᤢᤒᤠ ᤌᤡᤶᤖᤰᤗᤥ॥’”

ᤀᤠᤛᤢᤳᤌᤥ ᤐᤠ᤺ᤴᤜᤠ᤹

¹⁰ ᤕᤧᤛᤢᤖᤧ ᤔᤏᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥

¹¹ ᤔᤏᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤠ ᤆᤠ᤺ᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤔᤧᤈᤥᤃᤢᤴ. ᤁᤖ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤐᤠ᤺ᤴᤏᤡᤸᤗᤧ ᤂᤢᤏᤧ᤹ ᤀᤠᤛᤢᤳᤌᤥ ᤆᤥᤃᤢᤖᤥ॥”

¹² ᤜᤧᤰᤁᤩᤠᤱ ᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤸᤗᤧ ᤑᤖᤡᤛᤡᤜᤠ᤹ ᤗᤰᤋᤢᤛᤡᤒᤠ ᤏᤡᤱᤘᤠ᤹ ᤁᤧᤄᤥᤛᤢᤒᤡ᥅”

¹³ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤐᤠᤏᤢᤍᤡᤱ ᤀᤠᤶᤒᤠᤖᤧ ᤔᤧᤗᤣ᤺ᤳᤋᤢᤴᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹ ᤂᤢᤏᤡ᤹ ᤛᤠ᤺ᤵᤐᤥᤏᤢᤀᤣ ᤔᤧᤀᤠ᤺ᤰᤂᤢ᤹ᤖᤥ.

¹⁴ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤧᤶᤔᤡᤴᤏᤧ᤹ᤀᤥ॥ ᤂᤧᤱᤜᤠ᤹ᤃ ᤔᤡᤰᤑ᤺ᤶᤒᤠ ᤗᤠᤶᤗᤥᤒᤠᤛᤡᤖᤥ॥ ᤔᤡᤰᤑ᤺ᤶᤒᤠᤸᤗᤧ ᤔᤡᤰᤑ᤺ᤶᤒᤧᤴ ᤗᤠᤶᤗᤥᤛᤢᤏᤧ ᤑᤠ᤹ᤃᤪ ᤏᤧᤵᤔᤠᤱ ᤗᤢᤶᤒᤠ᤺ᤳᤋᤥ ᤁᤧᤱᤛᤡ ᤗᤠ᤺ᤳᤇᤡ᤹ᤖᤥ॥”

¹⁵ ᤐᤋᤪᤢᤛᤖᤧ ᤔᤧᤳᤋᤢ. “ᤁᤴ ᤂᤧᤍᤠ᤹ᤀᤥ ᤁᤧᤔᤧᤳᤋᤢᤛᤡᤒᤠ ᤐᤠ᤺ᤴᤏᤡᤸᤗᤧ ᤁᤢᤒᤣᤴ ᤕᤠᤵᤔᤡ ᤀᤠᤈᤧᤰᤋᤧ᤹ᤀᤥ॥”

¹⁶ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤠᤸᤗᤛᤠᤱ ᤂᤡᤏᤡ᤹ ᤏᤡᤱᤘᤠ᤹ ᤐᤠ᤺ᤰᤐᤡ᥅

¹⁷ ᤔᤢᤖᤠᤀᤥᤗᤠᤶ ᤁᤧᤗᤠ᤺ᤵᤐᤧᤱᤃ ᤛᤠᤵᤐᤥ᤺ᤰᤁᤥ ᤐᤣ᤺ᤰᤁᤠᤱ ᤗᤠ᤺ᤰᤁᤠᤳ ᤗ᤺ᤴᤒᤣ᤺ᤰ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅

¹⁸ ᤁᤖ ᤔᤏᤠ ᤔᤢᤖᤠᤀᤥᤗᤠᤶ ᤗᤠ᤺ᤰᤁᤠᤳ ᤁᤧᤗ᤺ᤶᤒᤠ ᤐᤠ᤺ᤴᤏᤡᤱᤃ ᤛᤡᤰᤗᤢᤱᤔᤠᤗᤠᤶ ᤗ᤺ᤴᤗᤥ॥ ᤂᤧᤸᤗᤧᤀᤣ ᤔᤏᤠ᤺ᤱᤃ ᤀᤠᤛᤢᤳᤌᤥ ᤆᤥᤃᤢᤖᤥ.

¹⁹ ᤌᤣᤀᤠᤱᤓᤧᤸᤗᤧ ᤑᤧᤴᤏᤡᤱᤘᤠ᤹ ᤀᤡ᤺ᤵᤔᤠ. ᤔᤏᤠᤛᤧᤵᤔᤠ. ᤆᤠᤖᤠᤶᤔᤠ ᤕᤠ᤺ᤶᤒᤰ. ᤕᤠᤶᤒᤥ᤺ᤵᤔᤠ. ᤂᤢ᤺ᤶᤔᤠ. ᤑᤥᤋᤩᤠᤒᤠ ᤋᤥ᤺ᤴᤍᤡ ᤐᤡᤔᤠ. ᤔᤠᤱᤆᤧ᤹ᤕᤠ ᤐᤠ᤺ᤴᤜᤠ᤹ ᤏᤡᤱᤘᤠ᤹ᤒᤥᤗᤠᤶ ᤗ᤺ᤴᤗᤥ॥

²⁰ ᤁᤴ ᤐᤠ᤺ᤴᤜᤠ᤹ᤖᤧᤃ ᤔᤏᤠᤴ ᤀᤠᤛᤢᤳᤌᤥ ᤆᤥᤃᤢᤖᤥ॥ ᤁᤖ ᤜᤢᤰ ᤘᤠᤔᤧᤴᤜᤵᤐᤣ ᤆ᤺ᤸᤗᤧ ᤂᤧᤴ ᤀᤠᤛᤢᤳᤌᤥ ᤔᤧᤒᤥᤱᤅᤡᤴᤗᤥ॥”

ᤁᤏᤠᤏᤡ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤏᤛᤠᤴ

²¹ ᤜᤧᤰᤁᤩᤠᤱ ᤕᤧᤛᤢᤴ ᤃᤠᤗᤡᤗᤗᤠᤶ ᤀᤡᤛᤪᤠᤀᤡᤗ ᤗᤠᤁᤠᤳᤐᤠ ᤋᤠᤕᤖ ᤏᤢ ᤛᤡᤍᤥᤏ ᤕᤧᤰᤕᤰ ᤂᤡᤖᤡᤒᤠ ᤌᤢᤶᤜᤠ᤹ᤀᤥ ᤐᤣ॥

²² ᤂᤧᤵᤔᤥᤒᤠ ᤁᤏᤠᤏᤡ ᤛᤢᤘᤠᤱᤛᤔᤠ ᤔᤧᤴᤇᤢᤔᤠ᤹ᤎᤡᤰ ᤂᤢᤏᤧ᤹ᤀᤥ ᤋᤩᤧᤀᤠᤱ ᤀᤰᤂᤣ ᤔᤧᤳᤋᤢᤖ ᤐᤣᤗᤡ ᤑᤠᤰᤋᤢ. “ᤍᤠᤀᤢᤍᤖᤧ ᤁᤢᤛ᤻ᤛᤠ ᤀᤠᤍᤠᤱᤒᤣ. ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤥ᥄ ᤀᤠᤛ᤻ᤛᤠ ᤆᤢᤰᤔᤧᤴ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤀᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢ᤹ᤖᤥ॥”

²³ ᤁᤖ ᤕᤧᤛᤢᤖᤧ ᤂᤧᤴ ᤌᤣᤀᤠᤱ ᤏᤥᤃᤵ ᤔᤧᤒᤡᤖᤢᤴ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤖ ᤂᤢᤏᤧ᤹ᤏᤢ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤐᤠᤱᤄᤧᤍᤣᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤧᤳᤗᤧᤱ ᤐᤣᤗᤡ ᤑᤠᤰᤋᤢᤀᤠᤱ ᤀᤠᤏᤡᤃᤣ ᤏᤡᤱᤎᤧᤴᤍᤢᤖᤥ॥”

²⁴ ᤜᤧᤰᤁᤣ᤺ᤸᤗᤧ ᤂᤧᤴ ᤔᤧᤳᤋᤢ. “ᤀᤡᤱᤃᤠ᤹ᤃ ᤀᤡᤛᤪᤠᤀᤡᤗᤛᤔᤠ ᤁᤧᤔᤠᤒᤠ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡᤖᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤠᤱᤒᤠᤖᤥ॥”

²⁵ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤌᤢᤱᤒᤥᤜᤈ᤹ ᤕᤢᤱᤛᤡᤱᤗ ᤀᤰᤂᤣ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤁᤢᤓᤠ᤹ ᤐᤡᤖᤠᤱᤅᤧ᤹ᤀᤥ॥”

²⁶ ᤕᤧᤛᤢᤖᤧ ᤔᤧᤳᤋᤢ. “ᤜᤡᤴᤈᤠ᤹ᤒᤡᤳᤇᤠᤜᤠ᤹ᤖᤧ ᤂᤢᤏᤡ᤹ ᤂᤖᤧ᤺ᤱᤅᤡᤴ ᤏᤠᤵᤔᤠᤛᤡᤀᤠᤱ ᤁᤥ᤺ᤳᤆᤥᤜᤠ᤹ ᤐᤡᤔᤠᤛᤡ ᤏᤢᤒᤠ ᤔᤣ᤺ᤴᤗᤥ॥”

²⁷ ᤂᤧᤸᤗᤧ ᤔᤧᤳᤋᤢ. “ᤛᤧᤰᤂᤠᤀᤣᤖᤥ ᤀᤠᤍᤠᤱᤒᤣ. ᤁᤖ ᤁᤥ᤺ᤳᤆᤥᤜᤠ᤹ᤖᤧᤀᤠᤱ ᤂᤢᤏᤡ᤹ ᤍᤠᤱᤒᤠᤸᤗᤧ ᤆᤠᤔᤠᤍᤧᤴᤏᤥᤗᤠᤶ ᤔᤰᤁᤧᤎᤠ᤺ᤒᤠ ᤁᤢᤈᤡᤜᤠ᤹ ᤔᤧᤈᤖᤥ॥”

²⁸ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤛᤧᤰᤂᤠᤀᤣ ᤕᤶᤒᤠ ᤏᤛᤠᤴ ᤁᤧᤃᤵᤔᤠ ᤔᤧᤴᤇᤢᤔᤠ᤹ᤏᤧᤴᤏᤧᤖᤥ᥄ ᤂᤧᤏᤧ᤹ ᤁᤧᤏᤠ᤺ᤰᤋᤢᤒᤧᤴ ᤁᤧᤄᤥᤛᤢ᤹ᤖᤥ॥” ᤜᤧᤰᤁᤩᤠᤱ ᤒᤠ ᤂᤧᤴ ᤕᤧᤶᤔᤥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤁᤢᤛ᤻ᤛᤠ ᤆᤢᤰᤔᤧᤴ ᤏᤢ᤺ᤖᤧᤖᤥ॥

ᤕᤧᤛᤢᤖᤧ ᤜᤧᤴᤇᤡᤱ ᤗᤡᤛᤡ ᤆᤠᤈᤠ᤺ᤳᤋᤢᤛᤡ᤹

²⁹ ᤕᤧᤛᤢᤴ ᤂᤧᤴ ᤋᤧᤴᤏᤥᤗᤠᤶ ᤃᤠᤗᤡᤗ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤐᤥ᤺ᤰᤂᤧᤖ ᤏᤢ᤺ᤰᤂᤧ ᤐᤣ. ᤜᤧᤰᤁᤩᤠᤱ ᤁᤥ᤺ᤰᤔᤠᤀᤥ ᤌᤥ ᤐᤣᤀᤠᤱ ᤂᤧᤵᤔᤥ ᤕᤢᤱᤛᤡᤱᤗᤥ॥

³⁰ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤗᤠᤱᤛᤰᤐᤠᤜᤠ᤹. ᤔᤡᤰᤑ᤺ᤶᤒᤠᤜᤠ᤹. ᤗᤠᤱᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹. ᤂᤢᤏᤡ᤹ ᤐᤠᤴ ᤔᤧᤴᤗ᤺ᤶᤔᤏᤠᤒᤠᤜᤠ᤹ ᤏᤢ ᤘᤣ᤹ ᤕᤖᤡᤰ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤍᤠᤖᤢᤛᤡᤀᤠᤱ ᤁᤢᤗᤠᤱᤒᤢᤱᤔᤥ ᤔᤧᤕᤢᤰᤂᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤧᤛᤢᤖᤧ ᤏᤢᤛᤢᤛᤡᤖᤥ॥

³¹ ᤂᤧᤴ ᤔᤏᤠᤜᤠ᤹ᤖᤧ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠᤜᤠ᤹ ᤔᤧᤒᤠᤖᤧᤒᤠ. ᤗᤠᤱᤜᤢᤰ ᤑᤧᤳᤁᤧᤗᤠ᤹ᤒᤠᤜᤠ᤹ ᤔᤧᤏᤢᤖᤧᤒᤠ. ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣᤃᤧᤒᤠ ᤏᤢ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡᤔᤠ ᤔᤧᤛᤢᤰᤋᤢᤒᤠ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤡᤛᤪᤠᤀᤡᤗᤛᤔᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤠᤖᤠ ᤔᤧᤓᤥᤛᤢᤖᤥ॥

³² ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤴ ᤔᤏᤠᤜᤠ᤹ ᤀᤠᤗᤢᤱᤔᤠ᤹ ᤔᤧᤍᤢᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤛᤢᤶᤕᤧᤴᤏᤠᤱᤎᤥ ᤀᤡᤱᤃᤠ᤹ᤏᤢᤀᤣ ᤔᤧᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤆᤠᤔᤠ ᤌᤢᤱᤔᤠ ᤌᤣᤀᤠᤱ ᤔᤧᤱᤃᤳᤋᤢᤴᤗᤥ॥ ᤂᤧᤱᤜᤠ᤹ ᤒᤠᤜᤧᤰᤁᤣ ᤛᤠᤰᤔᤧᤴᤈᤠ ᤐᤠᤱᤔᤠᤛᤡ ᤀᤠᤏᤡᤱᤘᤠ᤹ ᤜᤥᤵᤗᤥ. ᤔᤣ᤺ᤴᤏᤣ ᤑᤠ᤹ᤃᤪ ᤔᤧᤒᤣ᤺ᤰᤗ ᤔᤧᤒᤳᤋᤡᤸᤗᤧᤛᤠ ᤛᤠᤰᤗᤠᤶᤒᤳᤋᤢᤛᤡᤖᤥ॥”

³³ ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤀᤰᤋᤱᤒᤠ ᤀᤣ᤺ᤰᤛᤠᤍᤧᤴᤏᤥ ᤁᤶᤔᤩᤠᤰ ᤕᤖᤡᤰ ᤔᤏᤠᤜᤠ᤹ ᤆᤠ᤺ᤵᤔᤠᤛᤡᤖᤧ ᤗᤠᤃᤡ ᤂᤖᤧ᤺ᤱᤅᤡᤴ ᤀᤠᤳᤋᤠᤴᤏᤢ ᤂᤥᤔᤠ ᤛᤢᤰᤋᤧᤵᤐᤠᤒᤣ᥅”

³⁴ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤠᤰᤂᤧᤶᤔᤩᤠᤰ ᤂᤖᤧ᤺ᤱ ᤁᤧᤃᤳᤋᤢᤶᤒᤣ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤏᤢᤛᤡ ᤂᤖᤧ᤺ᤱ ᤏᤢ ᤆᤢᤈᤢᤰᤛᤠ ᤁᤢᤓᤠ ᤅᤠᤖᤰ ᤁᤳᤋᤢᤶᤒᤧᤖᤥ॥”

³⁵ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤂᤠᤶᤒᤠᤱᤅᤥ ᤕᤢᤱ ᤐᤠᤱᤄᤢᤛᤡ॥

³⁶ ᤂᤧᤴ ᤏᤢᤛᤡ ᤂᤖᤧ᤺ᤱᤅᤡᤴ ᤏᤢ ᤅᤠᤴ ᤂᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤖ ᤂᤧ᤺ᤰᤂᤢ. ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤐᤡᤖᤢᤛᤡᤀᤠᤱ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖᤥ॥

³⁷ ᤜᤧᤰᤁᤩᤠᤱ ᤂᤧᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤠᤄᤠ ᤔᤧᤈ॥ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤢᤈᤡ ᤁᤧᤏᤶᤒᤧᤴ ᤔᤧᤛᤢᤵᤛᤢᤸᤗᤧ ᤏᤢᤛᤡ ᤏᤀᤡᤔᤠ ᤕᤥᤖᤧᤖᤥ॥

³⁸ ᤂᤧᤴ ᤁᤧᤈᤠᤒᤠᤜᤠ᤹ᤀᤥᤃ ᤔᤧᤴᤇᤢᤔᤠᤜᤠ᤹ ᤏᤢ ᤜᤡᤴᤈᤠ᤹ᤒᤡᤳᤇᤠᤜᤠ᤹ ᤔᤧᤴᤏᤡ᤺ᤳᤇᤡᤱᤅᤣ ᤕᤧᤶᤒᤡᤳᤇᤠ᤹ᤜᤠ᤹ᤖᤰ ᤜᤧᤴᤇᤡᤱ ᤗᤡᤛᤡ ᤕᤠᤖᤡᤰ ᤔᤧᤘᤕᤧᤖᤥ॥

³⁹ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤐᤠᤱᤄᤢᤍᤣᤛᤢᤛᤡ. ᤜᤧᤰᤁᤩᤠᤱ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤔᤃᤠᤍᤠᤏ ᤐᤠᤱᤈᤢᤶ ᤂᤡᤖᤡᤒᤠ ᤋᤧᤴᤏᤥ ᤐᤣᤖᤥ॥