ᤔᤳᤋᤡ 13 - LIFOTNT

ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤠᤸᤗᤧᤴ ᤂᤧᤍᤠ᤹

¹ ᤒᤠ ᤂᤧᤴ ᤕᤧᤴᤏᤥ ᤕᤧᤛᤢᤴ ᤜᤡᤶᤔᤥᤗᤠᤶ ᤐᤣᤀᤠᤱ ᤃᤠᤗᤡᤗ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤕᤢᤱᤛᤡᤱᤗᤥ॥

² ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ ᤔᤧᤈᤢᤵᤛᤧ. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤕᤢᤱᤛᤡᤱ. ᤁᤖ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤘᤖᤰᤁᤡᤸᤗᤧ ᤁᤢᤕᤠᤀᤥ ᤔᤧᤕᤧᤒᤧ॥

³ ᤜᤧᤰᤁᤩᤠᤱ ᤕᤧᤛᤢᤖᤧ ᤀᤰᤂᤣᤗ᤹ᤖᤡᤰ ᤕᤖᤡᤰ ᤐᤠ᤺ᤴᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡ. “ᤗᤳᤇᤠ ᤕᤠ᤺ᤴᤁᤧᤔᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥

⁴ ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤈᤔᤧᤍᤣᤛᤢᤖᤥ॥

^5-6 ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤧᤖᤧᤰᤁᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ ᤗᤡᤱᤔᤠᤃ ᤗᤡᤅᤧ. ᤁᤖ ᤕᤖᤡᤰ ᤂᤠᤶ ᤔᤧᤏᤧᤛ᤻ᤛᤧᤴᤏᤠᤱ ᤁᤢᤛᤠ᤺ᤵᤐᤡᤴ ᤂᤠᤶ ᤛᤡᤃᤠᤱᤎᤠᤖᤡᤰ ᤔᤧᤗᤠᤛᤧᤴᤒᤠᤸᤗᤧ ᤆᤥᤃᤢᤸᤗᤧ ᤁᤢᤍᤠ᤺ᤴᤍᤡᤰᤔᤠ ᤏᤠᤶ ᤛᤧᤖᤧᤸᤗᤧ ᤏᤠᤶᤔᤡᤸᤗᤧ ᤛᤧ᤺ᤰᤋᤢᤀᤠᤱ ᤁᤧᤖᤧᤰ ᤜᤣᤖᤧᤒᤣᤖᤥ॥

⁷ ᤁᤢᤓᤠ ᤕᤠ᤹ᤖᤡ᤺ᤶᤒᤠᤱᤃ ᤋᤡᤱᤃᤪᤣᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠ ᤋᤧᤴᤏᤥ ᤆᤢᤰᤋᤧᤀᤠᤱ ᤛᤥᤛᤥᤖᤡᤰ ᤗᤡᤅᤧᤸᤗᤧ ᤋᤡᤱᤃᤪᤣᤰᤐᤠᤸᤗᤧ ᤂᤧᤴ ᤛᤢ᤺ᤵᤋᤢ ᤛᤧᤖᤢᤖᤥ॥

⁸ ᤁᤢᤓᤠ ᤕᤠ᤹ᤖᤡ᤺ᤶᤒᤧᤱᤃ ᤏᤢᤒᤠ ᤂᤠᤶᤔᤥ ᤆᤢᤰᤋᤧᤖᤥ॥ ᤂᤧᤱᤜᤠ᤹ᤀᤥ ᤁᤡᤵᤌᤡᤰᤗᤧᤱ (᥇᥆᥆). ᤋᤢᤰᤐᤥᤱ ᤗᤧᤱ (᥌᥆) ᤏᤢ ᤛᤢᤶᤒᤥᤱ ᤗᤧᤱ (᥉᥆) ᤌᤠᤖᤡᤰ ᤁᤢᤈᤠ᤹ ᤐᤳᤇᤧᤖᤥ॥

⁹ ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”

¹⁰ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤀᤠᤍᤠᤱᤒᤣ. ᤌᤣᤀᤠᤱ ᤁᤴᤜᤠ᤹ᤏᤢ ᤂᤧᤍᤠ᤹ᤀᤥᤖᤰ ᤁᤧᤒᤠ᤺ᤵᤐᤠᤒᤣ᥅”

¹¹ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤌᤣᤀᤠᤱᤓᤧᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤂᤧᤱᤜᤠ᤹ᤖᤧᤃ ᤔᤧᤱᤄᤥᤀᤣ ᤔᤧᤘᤠ᤹ᤖᤥ॥

¹² ᤕᤖᤡᤰ ᤁᤧᤃᤵᤐᤠᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤂᤥᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧᤴ ᤕᤖᤡᤰ ᤐᤥᤱᤗᤥ॥ ᤁᤖ ᤜᤠ᤺ᤳᤗᤧ ᤔᤧᤃᤳᤋᤢᤴ. ᤂᤧᤸᤗᤧ ᤁᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢ᤹ᤖᤥ॥

¹³ ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤱᤜᤠ᤹ᤏᤢ ᤂᤧᤍᤠ᤹ᤀᤥ ᤐᤠ᤺ᤳᤋᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡᤛᤢᤴᤗᤥ. ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

¹⁴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤴ ᤔᤏᤠᤜᤠ᤹ᤀᤥ ᤁᤧᤖᤧᤒᤠᤖᤥ— “‘ᤂᤡᤏᤡ᤹ ᤁᤧᤄᤧᤵᤛᤢᤶᤛᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴ. ᤀᤥᤃᤧᤔᤧᤳᤋᤢᤶᤛᤠᤱ ᤁᤧᤴᤏᤡᤛᤢᤶᤔᤡᤴᤗᤥ॥

¹⁵ ᤌᤣᤀᤠᤱᤓᤧᤸᤗᤧ ᤁᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤂᤠᤛᤡᤱᤅᤡᤴ ᤁᤧᤎᤢᤱᤒᤠ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤌᤠᤰᤋᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤡ᤹ ᤔᤡᤰᤁᤡᤴ ᤀᤡᤶ ᤔᤧᤔᤧᤳᤋᤢᤀᤠᤱ ᤘᤠ᤹॥ ᤔᤣ᤺ᤴᤏᤣ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤧᤰᤂᤥ᤹ᤒᤠᤸᤗᤧ ᤔᤧᤄᤧᤵᤛᤢᤒᤠ ᤏᤢ ᤔᤡᤰᤁᤡᤸᤗᤧ ᤔᤧᤏᤡᤛᤢᤒᤠᤔᤧᤴ. ᤜᤧᤰᤁᤩᤠᤱ ᤂᤢᤏᤡ᤹ ᤛᤡᤰᤗᤢᤱᤔᤠᤀᤥ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤠᤱ ᤀᤡᤱᤃᤠ᤹ ᤗᤧᤵᤔᤠᤱ ᤔᤧᤏᤢ᤺ᤰᤂᤧᤒᤠᤔᤧᤴ. ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤱᤜᤠ᤹ ᤘᤣ᤺ᤴᤍᤢᤱᤛᤡᤱᤔᤧᤴ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤖᤥ॥’

¹⁶ “ᤁᤖ ᤂᤡᤏᤡ᤹ᤃ ᤔᤢ᤹ᤀᤡᤛᤠᤒᤠᤏᤡᤱᤗᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤔᤡᤰᤁᤡᤸᤗᤧ ᤏᤡᤛᤢ᤹. ᤜᤧᤰᤁᤩᤠᤱ ᤏᤧᤰᤂᤥ᤹ᤒᤠᤸᤗᤧ ᤂᤧᤵᤛᤢ᤹ᤖᤥ॥

¹⁷ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤕᤖᤡᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤜᤠ᤹ ᤏᤡᤔᤠ ᤏᤢ ᤂᤧᤶᤔᤠ ᤛᤠ᤹ᤖᤡᤰ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤘᤕᤧ. ᤁᤖ ᤏᤡᤔᤠ ᤏᤢ ᤂᤧᤶᤔᤠ ᤔᤧᤱᤄᤥᤛᤢᤴᤗᤥ॥”

ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤁᤢᤒᤣ

¹⁸ “ᤀᤠᤸᤗ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤸᤗᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤂᤧᤵᤛᤧᤶᤔᤧ᤹ᤀᤥ

¹⁹ ᤀᤠᤳᤋᤡᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤐᤠ᤺ᤴᤏᤡᤴ ᤂᤧᤵᤛᤢᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤢᤴ. ᤂᤧᤴ ᤔᤏᤠ᤺ᤱᤃ ᤗᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠ ᤁᤢᤀᤡᤛᤡᤰ ᤆᤥᤰ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤸᤗᤧ ᤁᤢᤏᤡᤱᤘᤠ᤹ᤀᤥ ᤁᤧᤕᤠᤰᤐᤠ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢᤖᤥ॥

²⁰ ᤗᤢᤱᤄᤧᤖᤧᤰᤁᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠ ᤔᤏᤠ ᤁᤢᤀᤡᤛᤡᤰ ᤆᤥᤰ.

²¹ ᤁᤖ ᤋᤠᤱᤒᤠ ᤁᤢᤛ᤻ᤛᤠ᤺ᤵ ᤁᤧᤒᤵᤐᤠ ᤁᤢᤒᤢᤱᤔᤠᤴ ᤜᤧᤰᤁᤣ ᤂᤧᤸᤗᤧ ᤛᤵᤑᤠᤖᤰ ᤌᤖᤢᤖᤥ॥ ᤜᤧᤰᤁᤩᤠᤱ ᤐᤠ᤺ᤴᤈᤠᤰᤁᤡᤴ ᤏᤛᤠᤴ ᤆᤥᤃᤢᤒᤠᤸᤗᤧ ᤁᤧᤛᤠᤰᤐᤠ ᤐᤠᤴ ᤏᤢ ᤋᤢᤰᤂᤣᤴ ᤋᤠᤏᤢᤔᤧ᤺ᤴᤏᤣ ᤜᤠᤖᤠᤀᤣ ᤏᤛᤠ᤺ᤴᤏᤡᤴ ᤗᤧᤖᤢᤍᤣᤛᤢ᤹ᤖᤥ॥

²² ᤋᤡᤱᤃᤪᤣᤰᤐᤠᤸᤗᤧ ᤁᤢᤛᤣ᤹ ᤁᤧᤏᤧᤒᤠᤍᤧᤴᤏᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠ ᤁᤢᤀᤡᤛᤡᤰ ᤆᤥᤰ. ᤁᤖ ᤂᤧᤸᤗᤧ ᤁᤴ ᤜᤡᤱᤔᤴᤏᤥᤒᤠ ᤌᤣ᤺ᤴ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤠᤰᤂᤣᤀᤠᤱ ᤐᤥᤱᤔᤠ ᤁᤧᤗ᤹ᤒᤠ ᤏᤡᤱᤘᤠ᤹ᤀᤡᤸᤗᤧ ᤐᤠ᤺ᤴᤈᤠᤰᤁᤡᤴ ᤛᤢ᤺ᤵᤋᤢᤍᤣᤛᤢ᤹. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ ᤔᤧᤓᤳᤇᤢᤴᤗᤥ॥

²³ ᤜᤧᤰᤁᤩᤠᤱ ᤏᤢᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤧᤱᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤢᤛᤡᤱ ᤁᤧᤏᤡ᤺ᤵᤐᤠ ᤔᤏᤠ ᤁᤢᤀᤡᤛᤡᤰ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤡᤵᤌᤡᤰ. ᤋᤢᤰᤐᤥᤱ ᤏᤢ ᤛᤢᤶᤒᤥᤱ ᤗᤧᤱ ᤌᤠᤖᤡᤰ ᤁᤢᤈᤠ᤹ ᤑᤳᤇᤢᤖᤥ॥”

ᤔᤠᤛᤡ ᤏᤢ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹

²⁴ ᤕᤧᤛᤢᤖᤧ ᤘᤣ᤹ᤛᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥᤰᤗᤥ—ᤗᤳᤇᤠ ᤔᤏᤠᤎᤡᤰᤗᤧ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢᤒᤠ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢ.

²⁵ ᤁᤖ ᤛᤧᤴᤍᤡᤰ ᤁᤧᤖᤧᤰ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧᤸᤗᤧ ᤁᤢᤏᤡᤱᤔᤡᤴ ᤋᤩᤧᤀᤠᤱ ᤂᤧᤴ ᤔᤠᤛᤡ ᤗᤧᤵᤔᤏᤠᤒᤠᤀᤥ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠᤴ ᤗᤧᤵᤋᤢᤎᤀᤠᤱ ᤐᤣᤖᤥ॥

²⁶ ᤜᤧᤰᤁᤩᤠᤱ ᤔᤠᤛᤡᤴ ᤁᤢᤈᤠ᤹ ᤌᤥ᤺ᤰᤔᤠ ᤜᤣ᤺ᤰᤋᤧᤸᤗᤧ ᤔᤠᤗᤧ᤺ᤴᤍᤥᤜᤠ᤹ᤀᤠᤱ ᤏᤡ᤺ᤎᤠᤒᤧᤖᤥ॥

²⁷ ᤜᤧᤰᤁᤩᤠᤱ ᤛᤧᤘᤠᤖᤥᤒᤠᤜᤠ᤹ ᤗᤠᤈᤣ᤹ ᤍᤠᤱᤒᤠᤸᤗᤥ ᤔᤧᤍᤩᤧᤀᤠᤱ ᤛᤣ᤺ᤴᤔᤧᤍᤥᤛᤢ. ‘ᤀᤠᤍᤠᤱᤒᤣ. ᤂᤧᤏᤧ᤹ᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤔᤠᤛᤡ ᤕᤠ᤹ᤖᤡ᤺ᤶᤒᤠᤖᤰ ᤁᤧᤗᤧᤵᤋᤢᤀᤠᤱ ᤏᤧᤛ᤻ᤛᤧ ᤔᤣ᤺ᤶᤒᤡ. ᤁᤖ ᤀᤠᤰᤂᤣᤀᤠᤱ ᤔᤠᤗᤧ᤺ᤴᤍᤥ᤺ᤴᤏᤠᤱ ᤗᤡᤅᤧᤒᤣ᥅’

²⁸ “ᤂᤢᤏᤧ᤹ ᤏᤥᤃᤵ ᤐᤡᤖᤢᤛᤡ. ‘ᤂᤧᤱᤃ ᤏᤡᤱᤔᤡ᤺ᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥’ “ᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤧ᤹ ᤕᤠᤶᤔᤥ ᤛᤣ᤺ᤴᤔᤧᤍᤥᤛᤢ. ‘ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤢᤶᤍᤣᤛᤢᤶᤒᤧ ᤗ᤹ᤖᤡᤰ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤡ᥅’

²⁹ “ᤗᤠᤈᤣ᤹ ᤍᤠᤱᤒᤠᤸᤗᤧ ᤔᤧᤳᤋᤢᤛᤡ. ‘ᤜᤧᤰᤁᤣ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤠᤗᤧ᤺ᤴᤍᤥ᤺ᤴ ᤁᤧᤀᤠ᤺ᤰᤂᤢᤶᤔᤡᤸᤗᤧ ᤔᤠᤛᤡ᤺ᤴᤏᤠᤱ ᤁᤧᤀᤠ᤺ᤰᤂᤢᤶ ᤁᤧᤛᤧᤖᤢᤶᤗᤥ॥

³⁰ ᤆᤠᤛᤢᤶᤔᤠ ᤕᤧᤶ ᤌᤠᤖᤡᤰ ᤏᤧᤵᤔᤠᤱ ᤛᤥᤛᤥᤖᤡᤰ ᤐᤥᤛᤡᤖ॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤥ ᤆᤠᤃᤧᤛᤢᤶᤒᤠᤜᤠ᤹ ᤁᤧᤖᤧᤰᤏᤢ ᤋᤃᤡ ᤔᤠᤗᤧ᤺ᤴᤍᤥᤜᤠ᤹ ᤀᤠ᤺ᤰᤂᤧᤶᤔᤧ᤹ᤀᤠᤱ ᤀᤡᤓᤢᤳᤋᤧᤶᤔᤧ᤹ ᤜᤧᤰᤁᤩᤠᤱ ᤔᤡᤀᤥ ᤗᤠᤵᤑᤢ᤺ᤛᤧᤶᤔᤧ᤹ ᤜᤧᤰᤁᤩᤠᤱ ᤔᤠᤛᤡᤴ ᤛᤢᤵᤛᤧᤶᤔᤧ᤹ᤀᤠᤱ ᤆᤠᤕᤠᤱᤔᤠᤀᤥ ᤕᤠ᤺ᤰᤋᤧᤶᤔᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤱᤛᤡᤱᤗᤥ॥’”

ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤖᤧᤴ ᤂᤧᤍᤠ᤹

³¹ ᤜᤧᤰᤁᤩᤠᤱ ᤕᤧᤛᤢᤖᤧ ᤕᤠᤶᤔᤥ ᤘᤣ᤹ ᤂᤧᤍᤠ᤹ᤎᤡᤰ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤁᤢᤀᤡᤛᤡᤰ ᤆᤥᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕ᤺ᤱᤃᤣ᤹ ᤕᤠ᤹ᤖᤡ᤺ᤶᤒᤠᤴ ᤋᤣ᤹ᤖᤢᤀᤠᤱ ᤀᤡᤰᤋᤠᤵᤐᤥ ᤗᤧᤵᤋᤢ॥

³² ᤁᤧᤖᤧᤰ ᤕᤠ᤹ᤖᤡ᤺ᤶᤒᤠᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥ᤺ᤰᤛᤠᤱ ᤂᤧᤴ ᤐᤥᤀᤠᤱ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥᤒᤠ ᤘᤣ᤹ ᤏᤢᤎᤡᤛᤠᤰᤆᤡ᤹ᤏᤢ᤺ᤸᤗᤧ ᤕᤶᤒᤠ ᤁᤢᤒᤢᤱ ᤐᤥᤱᤗᤥ॥ ᤜᤧᤰᤁᤩᤠᤱ ᤐᤢᤛᤠᤜᤠ᤹ ᤔᤧᤍᤠᤀᤠᤱ ᤁᤢᤒᤥᤖᤠᤰᤁᤥ ᤜᤠᤵ ᤔᤧᤈᤥᤃᤢᤖᤥ॥”

³³ ᤕᤧᤛᤢᤖᤧ ᤀᤠᤸᤗᤛᤠᤱ ᤘᤣ᤹ᤛᤔᤠ ᤂᤧᤍᤠ᤹ᤀᤡᤴ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤑᤧ᤹ᤖᤢᤶᤔᤥ ᤕᤠᤰᤔᤏᤠᤒᤠ ᤂᤖᤧ᤺ᤱ ᤁᤧᤓᤱᤒᤠ ᤛᤡᤍᤠ᤹ᤀᤡᤴ ᤜᤧᤰᤋᤱᤒᤠ ᤆᤥᤰᤗᤥ॥ ᤌᤡᤰ ᤔᤧᤴᤇᤢᤔᤠ᤹ᤀᤡᤸᤗᤧ ᤂᤵᤐᤩᤠᤀᤥ ᤕᤖᤡᤰ ᤑᤧ᤹ᤖᤢᤶᤔᤥ ᤔᤡᤛᤠᤰ ᤛᤡᤍᤠ᤹ᤀᤡᤴ ᤕᤠᤰᤋᤢ. ᤜᤧᤰᤁᤩᤠᤱ ᤛ᤹ᤖᤢ ᤕᤢᤰᤂᤢᤀᤠᤱ ᤔᤧᤴᤕᤢᤵᤐᤣ ᤌᤠᤖᤡᤰ ᤛᤢ᤺ᤵᤋᤢ ᤕᤢᤰᤂᤢᤖᤥ॥”

³⁴ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤛᤢᤖᤧ ᤔᤏᤠᤜᤠ᤹ ᤂᤧᤍᤠ᤹ᤀᤥ ᤔᤧᤳᤋᤢᤛᤡᤖᤥ. ᤛᤧᤰᤂᤠ᤺ᤸᤗᤧ ᤂᤢᤏᤧ᤹ ᤐᤠᤖᤧᤸᤗᤧ ᤂᤧᤍᤠ᤹ᤀᤥᤖᤰ ᤐᤠᤖᤧ॥

³⁵ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤒᤠᤴ ᤁᤧᤖᤧᤒᤠᤖᤥ— “ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥᤒᤠ ᤛᤡᤒᤡ᤹ ᤐᤠ᤺ᤴᤜᤠ᤹ ᤐᤠ᤺ᤳᤋᤢᤱᤗᤥ॥”

ᤔᤠᤛᤡ ᤏᤢ ᤔᤠᤗᤧ᤺ᤴᤍᤥ ᤂᤧᤍᤠ᤹ᤀᤡᤸᤗᤧ ᤁᤢᤒᤣ

³⁶ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ ᤗᤧᤖᤢᤎᤛᤡᤀᤠᤱ ᤕᤧᤛᤢᤴ ᤜᤡᤶᤔᤥ ᤐᤣ॥ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤢᤏᤧ᤹ᤀᤥ ᤔᤧᤍᤩᤧᤀᤠᤱ “ᤐᤩᤠᤱᤛᤡᤀᤥᤒᤠ ᤔᤠᤗᤧ᤺ᤴᤍᤥᤖᤧᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤐᤥᤀᤠᤎᤰᤋᤧ᤹” ᤑᤠ᤹ᤀᤠᤱ ᤔᤧᤔᤧᤳᤋᤢ॥

³⁷ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤏᤢᤒᤠ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠᤱᤃ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤀᤠᤖᤥ॥

³⁸ ᤐᤩᤠᤱᤛᤡᤃᤧᤴ ᤀᤡ᤺ᤰᤋᤠᤵᤐᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴᤗᤥ. ᤜᤧᤰᤁᤩᤠᤱ ᤂᤧᤴ ᤏᤢᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤔᤏᤠᤛᤡᤖᤥ॥ ᤔᤠᤗᤧ᤺ᤴᤍᤥᤜᤠ᤹ᤃ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤏᤠᤛᤡᤖᤥ.

³⁹ ᤜᤧᤰᤁᤩᤠᤱ ᤔᤠᤗᤧ᤺ᤴᤍᤥ ᤕᤠ᤹ᤖᤡ᤺ᤶᤒᤠ ᤁᤧᤗᤧᤵᤐᤠ ᤏᤡᤱᤔᤡ᤺ᤱᤃ ᤔᤠᤑᤧᤴᤛᤠᤶᤔᤡᤴᤗᤥ॥ ᤆᤠᤛᤢᤶᤔᤠ ᤕᤧᤶᤔᤡᤱᤃ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴᤗᤥ. ᤜᤧᤰᤁᤩᤠᤱ ᤆᤠᤃᤧᤛᤢᤶᤒᤠᤜᤠ᤹ᤃ ᤔᤠᤱᤗᤠᤀᤡᤱᤒᤠᤛᤡᤖᤥ॥”

⁴⁰ “ᤜᤧᤰᤁᤩᤠᤱ ᤂᤧᤴ ᤔᤠᤗᤧ᤺ᤴᤍᤥᤜᤠ᤹ ᤔᤧᤛᤢᤵᤛᤢᤀᤠᤱ ᤔᤡᤀᤥ ᤗᤠᤵᤔᤧᤓᤢᤛᤢᤒᤠ ᤁᤢᤀᤡᤛᤡ᤺ᤰᤁᤣ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤠᤴ ᤐᤥᤱᤗᤥ॥

⁴¹ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤀᤠᤔᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤱᤛᤡᤱ ᤜᤧᤰᤁᤩᤠᤱ ᤁᤧᤖᤧᤰ ᤗᤠᤕᤥ ᤆᤥ᤺ᤰᤔᤠ ᤁᤧᤒᤠᤱᤒᤠᤜᤠ᤹ ᤏᤢ ᤑᤧᤴ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤀᤠᤜᤠᤱᤈᤢᤶᤔᤥᤗᤠᤶ ᤔᤧᤛᤢᤵᤛᤢᤛᤡ᤹ᤀᤠᤱ

⁴² ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥

⁴³ ᤜᤧᤰᤁᤩᤠᤱ ᤛᤠᤶᤕᤥᤒᤠᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ᤑᤢᤐᤠ᤺ᤸᤗᤧ ᤁᤢᤜᤠᤱᤈᤢᤶᤔᤥ ᤏᤠᤶ ᤁᤢᤀᤡᤛᤡᤰ ᤔᤧᤗᤧᤰᤗᤥ॥ ᤏᤢ᤺ᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”

ᤕᤠᤱᤓᤢᤖᤧᤴ ᤂᤧᤍᤠ᤹

⁴⁴ ᤕᤠᤶᤔᤥ “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤥ ᤆᤡᤱᤔᤏᤠᤒᤠ ᤕᤖᤡᤰ ᤕᤠᤱᤓᤢ᤺ᤴ ᤁᤢᤀᤡᤛᤡᤰ ᤆᤥᤰᤗᤥ॥ ᤔᤏᤠᤎᤡᤰᤗᤧ ᤂᤧᤴ ᤕᤠᤱᤓᤢ᤺ᤴ ᤂᤥᤛᤢᤀᤠᤱ ᤕᤠᤶᤔᤥ ᤆᤡᤰᤂᤢᤖᤥ. ᤜᤧᤰᤁᤩᤠᤱ ᤂᤧᤴ ᤛ᤺ᤳᤗ ᤐᤣ᤺ᤰᤁᤠᤱ ᤂᤢᤏᤧ᤹ ᤁᤳᤋᤢᤒᤠ ᤁᤧᤖᤧᤰ ᤆᤡᤃᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤐᤡᤴ ᤀᤡᤅᤢᤖᤥ॥”

ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤸᤗᤧᤴ ᤂᤧᤍᤠ᤹

⁴⁵ “ᤕᤠᤶᤔᤥ ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤱᤃ ᤀᤰᤋᤱᤒᤠ ᤆᤥᤰ—ᤗᤳᤇᤠ ᤏᤢᤒ᤻ ᤏᤢᤒᤠ ᤋᤧᤰᤛᤣ᤺ᤰ ᤁᤧᤃᤥ᤺ᤵᤐᤠ ᤗᤧᤱᤜᤱᤒᤠᤸᤗᤧ

⁴⁶ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤋᤧᤰᤛᤣ᤺ᤰᤁᤡᤴ ᤂᤥᤛᤢ. ᤜᤧᤰᤁᤩᤠᤱ ᤐᤣᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤧᤖᤧᤰ ᤁᤢᤈᤡᤃᤰᤘᤠᤜᤠ᤹ ᤛᤱᤄᤢᤀᤠᤱ ᤂᤧᤴ ᤋᤧᤰᤛᤣ᤺ᤰᤁᤡᤴ ᤀᤡᤅᤢᤖᤥ॥”

ᤕᤥ᤺ᤱᤅᤡᤸᤗᤧᤴ ᤂᤧᤍᤠ᤹

⁴⁷ “ᤕᤠᤶᤔᤥ. ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤡᤴ ᤕᤶᤒᤠ ᤕᤥ᤺ᤱ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤧᤴ ᤕᤥ᤺ᤱᤅᤡᤴ ᤘᤖᤰᤁᤥ ᤔᤧᤗᤧᤵᤋᤢᤸᤗᤧ ᤂᤧᤵᤔᤥ ᤁᤧᤖᤧᤰ ᤐᤖᤡᤰᤗᤧᤴ ᤅᤠᤜᤠ᤹ ᤔᤧᤎᤠᤖᤥ॥

⁴⁸ ᤜᤧᤰᤁᤩᤠᤱ ᤂᤧᤴ ᤕᤥ᤺ᤱᤅᤥ ᤁᤢᤗᤧᤶ ᤅᤠᤜᤠ᤹ ᤔᤧᤎᤠᤀᤠᤱ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ᤖᤧ ᤗᤠ᤺ᤰᤁᤠᤳ ᤔᤧᤀᤢ᤺ᤰᤂᤢ ᤔᤧᤗ᤺ᤳᤋᤢ. ᤜᤧᤰᤁᤩᤠᤱ ᤔᤧᤕᤢᤱᤛᤡᤱᤅᤠᤱ ᤏᤢᤒᤠ ᤅᤠᤜᤠ᤹ ᤅᤠ ᤕᤠᤱᤔᤠᤀᤥ ᤔᤧᤕᤠᤰᤋᤢᤛᤡ. ᤁᤖ ᤋᤠᤵᤑᤧ᤺ᤶᤒᤠ ᤅᤠᤜᤠ᤹ ᤕᤠᤶᤔᤥ ᤆᤫᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥

⁴⁹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤏᤢᤵᤔᤥᤀᤠᤱ ᤒᤠ ᤜᤧᤰᤁᤣᤀᤣ ᤐᤥᤱᤗᤥ॥ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤍᤠᤀᤠᤱ ᤛᤠᤶᤕᤥᤒᤠᤜᤠ᤹ᤀᤥᤗᤠᤶ ᤑᤥᤋᤩᤠᤒᤠ ᤔᤏᤠᤜᤠ᤹ ᤘᤣ᤹ ᤔᤧᤛᤧᤴᤍᤢᤛᤡ᤹ᤀᤠᤱ

⁵⁰ ᤂᤧᤱᤜᤠ᤹ ᤕᤶᤒᤠ ᤔᤡᤜᤠᤵᤐᤥ ᤗᤠᤵᤔᤧᤓᤢᤛᤢᤛᤡ᤹ᤖᤥ॥ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤋᤢᤰᤂᤣ᤺ᤸᤗᤧ ᤜᤠ᤺ᤵᤔᤠᤴ ᤏᤢ ᤜᤠᤒᤥ᤹ ᤕᤧ᤺ᤱᤔᤠᤴ ᤐᤥᤱᤗᤥ॥”

⁵¹ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤒᤡ᥅” ᤂᤧᤱᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤀᤠᤏᤡᤃᤣ ᤁᤢᤛᤡᤱ ᤏᤡ᤺ᤳᤋᤢᤶᤒᤧᤖᤥ᥄”

⁵² ᤂᤢᤏᤧ᤹ ᤔᤧᤳᤋᤢᤛᤡ. “ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤈᤢᤶᤔᤥ ᤜᤢ᤹ᤛᤠᤶᤒᤠ ᤁᤧᤒᤥᤱᤒᤠ ᤁᤧᤖᤧᤰ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤃ ᤜᤡᤶᤍᤠᤱᤒᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤴᤍᤥ᤺ᤰᤗᤠᤶ ᤁᤢᤛᤱ ᤏᤢ ᤁᤧᤕ᤺ᤵᤐᤠ ᤁᤧᤕᤧᤰᤐᤠ ᤀᤡᤔᤧᤸᤗᤢᤱᤒᤠ ᤆᤡᤃᤰᤘᤠᤜᤠ᤹ ᤔᤧᤗ᤺ᤳᤋᤢᤛᤡ᤹ᤖᤥ॥”

ᤏᤠᤛᤖᤋᤀᤥ ᤕᤧᤛᤢᤴ ᤔᤧᤏᤠ᤹ᤖᤢ

⁵³ ᤕᤧᤛᤢᤖᤧ ᤁᤴ ᤂᤧᤍᤠ᤹ᤜᤠ᤹ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤧᤵᤔᤥᤗᤠᤶ ᤐᤣᤀᤠᤱ

⁵⁴ ᤀᤠᤒᤠᤅᤣ ᤁᤢᤒᤠᤱᤓᤣ᤹ᤀᤥ ᤋᤩᤧᤖᤥ॥ ᤂᤧᤵᤔᤥᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤔᤏᤠᤜᤠ᤹ ᤜᤢ᤹ᤔᤠ ᤜᤣ᤺ᤰᤋᤢᤛᤡᤸᤗᤧ ᤔᤏᤠᤜᤠ᤹ᤖᤧ ᤁᤢᤏᤡᤛᤠᤶᤔᤡᤴ ᤔᤧᤄᤧᤵᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤁᤴ ᤔᤏᤠ᤺ᤸᤗᤧ ᤀᤰᤋᤱᤒᤠ ᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤢᤰᤛᤠᤶ ᤀᤠᤳᤋᤥᤗᤠᤶ ᤂᤥᤛᤢᤒᤣ᥅

⁵⁵ ᤔᤧ᤺ᤶᤒᤧ. ᤁᤱᤃ ᤛᤡᤱ ᤁᤧᤃᤠᤶᤒᤠᤸᤗᤧ ᤁᤢᤛ᤻ᤛᤠᤴ ᤔᤣ᤺ᤶᤒᤡ᥅ ᤁᤸᤗᤧ ᤁᤢᤶᤔᤠᤖᤧ ᤁᤢᤔᤡᤱ ᤔᤖᤡᤕᤔ ᤜᤧᤰᤁᤩᤠᤱ ᤁᤢᤴᤛᤠ᤹ᤛᤡᤃ ᤕᤠᤁᤢᤒ. ᤕᤢᤛᤢᤑ. ᤛᤡᤔᤥᤏ ᤏᤢ ᤕᤜᤢᤍᤠᤛᤡ ᤔᤧ᤺ᤴᤇᤡᤒᤡ᥅

⁵⁶ ᤂᤧᤸᤗᤧ ᤁᤢᤴᤛᤠ᤹ ᤔᤧᤴᤇᤢᤔᤠᤜᤠ᤹ ᤀᤠᤏᤡ᤹ᤏᤢᤀᤣᤛᤧ ᤔᤧᤘᤠ᤹ᤒᤠ॥ ᤜᤧᤰᤁᤣ᤺ᤸᤗᤧ ᤁᤴ ᤔᤏᤠ᤺ᤸᤗᤧ ᤀᤠᤳᤋᤥᤗᤠᤶ ᤁᤴ ᤐᤠ᤺ᤴᤜᤠ᤹ ᤂᤥᤛᤢᤒᤣ᥅”

⁵⁷ ᤜᤧᤰᤁᤣ ᤔᤧᤒᤠ᤺ᤳᤋᤢᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤏᤠᤔᤧᤴᤇᤠ᤹ᤖᤢᤴᤗᤥ॥ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤱᤃ ᤁᤧᤖᤧᤰ ᤋᤧᤴᤏᤥ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤖᤢ. ᤁᤖ ᤀᤠᤵᤑᤣᤰ ᤁᤢᤜᤡᤶᤔᤥ ᤏᤢ ᤁᤢᤒᤠᤱᤓᤣ᤹ᤀᤥᤖᤰ ᤀᤡᤱᤎᤠᤱ ᤔᤧᤶᤒᤡᤖᤢᤴᤗᤥ॥”

⁵⁸ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤛᤠᤴ ᤜᤥ᤺ᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤕᤖᤡᤰ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤴᤗᤥ॥