ᤔᤳᤋᤡ 12 - LIFOTNT

ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧ ᤁᤢᤴᤍᤠᤱᤒᤠ

¹ ᤌᤡᤰᤗᤧᤱ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤐᤩᤠᤱᤛᤡᤃᤧᤴ ᤀᤡᤰᤋᤠᤵᤗᤢᤶᤔᤥᤏᤢ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤀᤠᤱ ᤛᤡᤍᤠᤵᤔᤠᤜᤠ᤹ ᤔᤧᤍᤢᤒᤢᤀᤠᤱ ᤔᤧᤏᤢᤃᤢᤖ ᤆᤠᤔᤠ ᤔᤧᤜᤣ᤺ᤰᤋᤢᤖᤥ॥

² ᤁᤢᤓᤠ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤕᤧᤛᤢᤴ ᤔᤧᤔᤧᤳᤋᤢ. “ᤀᤥᤔᤧᤳᤋᤧ᤹. ᤏᤠ᤺ᤶᤛᤡᤱ ᤕᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤁᤧᤜᤢ᤹ᤛᤠᤶᤒᤠᤜᤠ᤹ᤖᤧᤃ ᤔᤧᤈᤥᤃᤢᤱᤃ᥄”

³ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤧ᤺ᤶᤒᤧ᥄ ᤍᤠᤀᤢᤍ ᤜᤠᤱᤅᤡᤴ ᤏᤢ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤛᤧᤳᤗᤠ᤺ᤰᤋᤧᤸᤗᤧ ᤔᤧᤈᤥᤃᤢᤒᤠ ᤐᤠ᤺ᤴᤏᤡᤴ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅

⁴ ᤍᤠᤀᤢᤍ ᤜᤠᤱᤅᤡᤴ ᤏᤡᤱᤘᤠ᤹ᤑᤢ ᤛᤠ᤺ᤱᤃᤠᤜᤡᤶᤔᤥ ᤗᤠᤛᤧᤀᤠᤱ ᤂᤢᤏᤧ᤹ ᤏᤢ ᤁᤢᤴᤈᤢᤶᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤥ᤺ᤶᤔᤏᤠᤒᤠ ᤛᤣᤛᤣ ᤂᤖᤧ᤺ᤱᤅᤡᤴ ᤔᤧᤈᤖᤥ॥ ᤂᤧᤱᤃ ᤛᤠᤶᤕᤥᤌᤡᤶ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤖᤰ ᤆᤠᤔᤠ ᤁᤧᤏᤢ᤹ᤒᤠ ᤘᤕᤧ. ᤁᤖ ᤘᤣ᤹ᤜᤠ᤹ᤖᤧ ᤆᤠᤔᤠ ᤔᤧᤴᤏᤢ᤹ᤔᤏᤠᤒᤠ ᤘᤕᤧᤖᤥ॥

⁵ ᤕᤠᤶᤔᤥ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ ᤛᤠᤶᤕᤥᤌᤡᤶᤔᤡᤸᤗᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ ᤐᤠ᤺ᤳᤋᤢᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤠᤱ ᤏᤠ᤺ᤶᤛᤡᤱ ᤕᤧᤴᤏᤥ ᤔᤠᤱᤜᤡᤶᤔᤥ ᤕᤠ᤺ᤶᤒᤰ ᤔᤧᤈᤥᤃᤢ. ᤁᤖᤛᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤒᤥ᤺ᤰᤂᤧᤖᤥ॥

⁶ ᤀᤡᤱᤃᤠ᤹ ᤛᤧᤰᤂᤠ ᤔᤧᤳᤏᤡᤱ. ᤔᤠᤱᤜᤡᤶᤔᤡᤴᤏᤢ᤺ᤸᤗᤧᤀᤠᤱ ᤕᤶᤒᤠᤴ ᤁᤵᤔᤥ ᤘᤠ᤹ᤖᤥ॥

⁷ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤱᤃᤠ᤹ ᤛᤡᤍᤢᤱᤈᤓᤠᤴ ᤆᤠᤜᤠᤒᤠ ᤔᤧᤈᤥᤰᤁᤠᤴ ᤁᤖ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤏᤡᤱᤘᤠ᤹ ᤆᤥᤃᤢᤱ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤧᤏᤡᤛᤢᤶᤔᤠᤱ ᤁᤧᤘᤕᤡᤸᤗᤧᤃ ᤑᤥᤋᤩᤠ ᤔᤣ᤺ᤴᤏᤣᤒᤠ ᤔᤏᤠᤜᤠ᤹ ᤀᤠᤵᤋᤡᤰ ᤁᤧᤴᤃᤢ᤺ᤳᤋᤢᤶᤛᤡᤶᤔᤧᤴᤒᤠ ᤘᤕᤧᤔᤧᤴ॥

⁸ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤱᤃ ᤏᤠ᤺ᤶᤛᤡᤱ ᤕᤧᤴᤏᤡᤸᤗᤧᤴᤏᤠᤱ ᤁᤢᤴᤍᤠᤱᤒᤠᤀᤠᤖᤥ॥”

⁹ ᤕᤧᤛᤢᤴ ᤂᤧᤵᤔᤥᤗᤠᤶ ᤐᤣᤀᤠᤱ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥ ᤗᤠᤛᤧ॥

¹⁰ ᤂᤧᤵᤔᤥ ᤁᤢᤜᤢᤰ ᤁᤧᤛᤶᤒᤠ ᤔᤏᤠᤎᤡᤰ ᤘᤕᤧ॥ ᤜᤧᤰᤁᤩᤠᤱ ᤂᤧᤵᤔᤥ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤕᤧᤛᤢᤴ ᤀᤠᤵᤋᤡᤰ ᤁᤢ᤺ᤵᤔᤠ ᤑᤠ᤹ᤀᤠᤱ ᤔᤧᤛᤢᤃᤢᤖ ᤔᤧᤘᤕᤧᤀᤠᤱ ᤛᤣ᤺ᤴᤔᤧᤍᤥᤛᤢ. “ᤏᤠ᤺ᤶᤛᤡᤱ ᤕᤧᤴᤏᤥ ᤔᤏᤠᤜᤠ᤹ ᤘᤣ᤺ᤶᤔᤠᤛᤡ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤒᤡ ᤔᤣ᤺ᤶᤒᤡ᥅”

¹¹ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤂᤡᤏᤡ᤹ ᤔᤧᤸᤗᤢᤰᤁᤡᤴ ᤏᤠ᤺ᤶᤛᤡᤱ ᤕᤧᤴᤏᤥ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤔᤰᤌᤠ᤺ᤸᤗᤧ ᤁᤧᤴᤀᤢ᤺ᤰᤂᤢᤶ ᤁᤧᤴᤗ᤺ᤳᤋᤢᤶᤔᤡᤴᤒᤡ᥅

¹² ᤔᤧᤴᤇᤠᤶ ᤕᤠᤵᤔᤡ᤺ᤱᤃ ᤔᤧᤸᤗᤢᤰᤁᤡᤴᤏᤢ᤺ᤸᤗᤧ ᤀᤡᤔᤧᤸᤗᤢᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅ ᤏᤠ᤺ᤶᤛᤡᤱ ᤕᤧᤴᤏᤥ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤒᤡ᤹ᤖᤥ॥”

¹³ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤴ ᤔᤧᤳᤋᤢ. “ᤁᤧᤜᤢᤰᤁᤡᤴ ᤛᤴᤇᤧ᤹॥” ᤂᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢᤸᤗᤧ ᤂᤡᤔᤥ ᤘᤣ᤺ᤳᤋᤧᤀᤠᤱ ᤘᤣ᤹ᤛᤔᤠ ᤁᤢᤜᤢᤰᤁᤡᤴ ᤜᤧᤰᤁᤣᤀᤣ ᤏᤢᤒᤠ ᤐᤥ᤺ᤰᤂᤧᤖᤥ॥

¹⁴ ᤁᤖ ᤑᤖᤡᤛᤡᤜᤠ᤹ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤕᤧᤛᤢᤴ ᤀᤠᤰᤂᤣᤀᤠᤱ ᤛᤧᤵᤔᤠᤒᤣ ᤑᤠ᤹ᤀᤠᤱ ᤐᤠ᤺ᤴᤔᤧᤍᤱᤄᤢᤖᤥ॥

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤒᤠ ᤛᤧᤘᤠᤖᤥᤒᤠ

¹⁵ ᤕᤧᤛᤢᤖᤧ ᤂᤧᤴ ᤆᤧᤶᤓᤴ ᤔᤧᤈᤥᤃᤢᤒᤠᤴ ᤏᤡᤱᤘᤠ᤹ ᤂᤥᤛᤢᤀᤠᤱ ᤂᤢᤏᤧ᤹ ᤂᤧᤵᤔᤥᤗᤠᤶ ᤐᤣᤖᤥ॥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢ ᤜᤧᤰᤁᤩᤠᤱ ᤂᤧᤴ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤁᤧᤖᤧᤰ ᤘᤣ᤺ᤴᤍᤢᤛᤡ.

¹⁶ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤴᤗ ᤑᤠ᤹ᤀᤠᤱ ᤁᤧᤛᤠᤰᤐᤠ ᤀᤡᤱᤈᤠᤱ ᤐᤡᤖᤢᤛᤡ॥

¹⁷ ᤁᤱᤃ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤒᤠᤴ ᤁᤧᤖᤧᤒᤠᤖᤥ—

¹⁸ “ᤀᤡᤱᤃᤠ᤹ ᤛᤣᤃᤢᤱᤒᤠ ᤏᤢ ᤗᤢᤱᤔᤠ᤹ ᤋᤢᤰᤋᤢᤱᤒᤠ ᤀᤠᤛᤣᤘᤠᤖᤥᤒᤠᤴ ᤁᤵᤔᤥ ᤘᤠ᤹ᤖᤥ॥ ᤂᤢᤏᤧ᤹ᤏᤢ ᤀᤡᤱᤃᤠ᤹ ᤛ᤺ᤳᤋᤠᤱᤅᤠᤱ ᤘᤠ᤹ᤀᤠᤖᤥ॥ ᤁᤢᤛᤶᤍᤠᤱ ᤀᤠᤛᤣᤛᤣᤔᤠᤱᤅᤡᤴ ᤏᤧᤛ᤻ᤛᤢᤱᤐᤡᤖᤢᤱ ᤜᤧᤰᤁᤩᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤂᤠᤛᤧᤴᤖᤧᤴ ᤀᤡᤱᤓᤴ ᤆᤥᤃᤢᤛᤡ᤹ᤖᤥ॥

¹⁹ ᤂᤢᤏᤧ᤹ᤃ ᤔᤧᤄᤣᤏᤧᤴ ᤔᤧᤀ᤺ᤰᤏᤧᤴ ᤜᤧᤰᤁᤩᤠᤱ ᤗᤠᤶᤗᤠᤶᤔᤥ ᤂᤢᤏᤧ᤹ ᤐᤠ᤺ᤵᤐᤠᤀᤠᤱ ᤂᤧᤶᤔᤧᤍᤧᤳᤏᤧᤴᤗᤥ॥

²⁰ ᤂᤠᤛᤧᤴᤏᤡᤴ ᤁᤢᤗᤡᤱᤍᤥ ᤔᤧᤱᤃᤧᤳᤋᤣ ᤌᤠᤖᤡᤰ ᤂᤢᤏᤧ᤹ᤃ ᤘᤠ᤺ᤴᤈᤥᤈᤥᤒᤠ ᤌᤡᤱᤏᤧ᤺ᤳᤋᤡᤴᤏᤠᤱ ᤔᤧᤛᤧᤰᤂᤢᤴ. ᤜᤧᤰᤁᤩᤠᤱ ᤛᤡᤍᤥ᤹ᤍᤥ᤹ᤒᤠ ᤛᤣᤔᤡᤴᤏᤠᤱ ᤔᤧᤛᤧᤖᤢᤴᤗᤥ॥

²¹ ᤂᤢᤏᤧ᤹ ᤁᤢᤔᤡᤱᤅᤥ ᤁᤧᤖᤧᤰ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤡᤱᤛᤠᤱ ᤔᤧᤈᤥᤃᤢ᤹ᤖᤥ॥”

ᤂᤧᤔᤠ᤹ ᤁᤧᤒᤥ᤺ᤰᤐᤠ ᤜᤡᤶᤔᤡᤸᤗᤧ ᤔᤧᤍᤰᤋᤢᤴ

²² ᤂᤧᤱᤜᤠ᤹ᤖᤧ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠᤸᤗᤧ ᤆᤥᤃᤢᤸᤗᤧ ᤔᤡᤰᤑ᤺ᤶᤒᤠ ᤏᤢ ᤐᤠ᤺ᤵᤔᤠ ᤔᤧᤴᤇᤢᤰᤔᤏᤠᤒᤠ ᤔᤏᤠᤎᤡᤰ ᤕᤧᤛᤢᤖᤥ ᤔᤧᤍᤠᤖᤢ. ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤺ᤴᤍᤢᤀᤠᤱ ᤂᤧᤴ ᤐᤠ᤺ᤵᤔᤠ ᤏᤢ ᤂᤠᤏᤡᤔᤠ ᤁᤧᤛᤢᤰᤐᤠ ᤐᤥ᤺ᤰᤂᤧᤖᤥ॥

²³ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤖ ᤔᤧᤒᤠ᤺ᤳᤋᤢ. “ᤁᤱᤃ ᤁᤧᤍᤠᤒᤠᤖ ᤁᤧᤒᤵᤐᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤛ᤻ᤛᤠ ᤛᤧᤴᤗᤵ ᤁᤧᤒᤡᤒᤠ ᤜᤠᤱᤅᤡᤴ ᤔᤣ᤺ᤶᤒᤡ᥅”

²⁴ ᤁᤖ ᤑᤖᤡᤛᤡᤜᤠ᤹ᤖᤧ ᤂᤧᤴ ᤔᤧᤄᤧᤵᤛᤢᤸᤗᤧ ᤀᤰᤂᤣ ᤔᤧᤒᤠ᤺ᤳᤋᤢ. “ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤒᤠᤗᤈᤡᤒᤢᤗᤖᤧ ᤁᤢᤔᤢᤰᤛᤠᤶᤗᤠᤶᤗᤰ ᤁᤴ ᤔᤏᤠ᤺ᤸᤗᤧ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤒᤠᤖᤥ॥”

²⁵ ᤕᤧᤛᤢᤖᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡᤛᤢᤀᤠᤱ ᤀᤰᤂᤣ ᤔᤧᤳᤋᤢᤛᤡ. “ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤁᤧᤖᤧᤰ ᤜᤠᤱᤈᤢᤶᤜᤠ᤹ ᤔᤧᤔᤧᤰᤗᤥ॥ ᤜᤧᤰᤁᤩᤠᤱ ᤀᤠᤵᤑᤣᤰ ᤗᤢᤶᤔᤥ ᤁᤧᤄᤣᤒᤠ ᤁᤧᤎᤰᤐᤠᤀᤠᤱ ᤁᤧᤛᤧᤶᤒᤠ ᤕᤧᤰᤕᤰ ᤏᤢ ᤜᤡᤶᤛᤕᤱᤜᤠ᤹ᤖᤧ ᤔᤧᤴᤎ᤺ᤳᤋᤢᤴᤗᤥ॥

²⁶ ᤔᤠᤑᤧᤴᤛᤠᤶᤔᤡᤸᤗᤧ ᤀᤠᤵᤑᤣᤰ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤛᤡᤀᤠᤱ ᤀᤠᤒᤠᤅᤣ ᤁᤢᤜᤠᤱᤈᤢᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥ᤺ᤰᤏᤧ ᤑᤠ᤹ᤃᤪ ᤀᤠᤰᤂᤣᤀᤠᤱ ᤁᤢᤜᤠᤱᤈᤢᤶᤔᤡᤸᤗᤧ ᤌᤖᤢᤒᤣ᥅

²⁷ ᤜᤧᤰᤁᤩᤠᤱ ᤒᤠᤗᤈᤡᤒᤢᤗ ᤔᤠᤑᤧᤴᤛᤠᤶᤔᤡᤸᤗᤧ ᤁᤢᤔᤢᤰᤛᤠᤶᤗᤠᤶ ᤀᤡᤱᤃᤠ᤹ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤏᤧ ᤑᤠ᤹ᤃᤪ ᤂᤡᤏᤡ᤹ ᤔᤏᤠᤜᤠ᤹ᤖᤧ ᤀᤠᤳᤋᤡᤴ ᤔᤢᤰᤛᤠᤶᤗᤠᤶ ᤑᤧᤴᤛᤠᤶᤜᤠ᤹ ᤔᤧᤏᤠ᤺ᤳᤋᤢ ᤔᤧᤗ᤺ᤳᤋᤢᤛᤡᤒᤣ᥅ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤁᤡᤸᤗᤧᤀᤣ ᤂᤡᤏᤡ᤹ ᤐᤡᤷᤒᤣ᤺ᤶᤒᤥ ᤁᤧᤎᤩᤧ᤹ᤀᤡᤀᤠᤱ ᤁᤧᤘᤕᤡ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤶᤎᤠᤰᤗᤥ॥

²⁸ ᤁᤖ ᤀᤡᤱᤃᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣᤔᤠᤱᤗᤠᤶ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢᤱ ᤗ᤺ᤳᤋᤢᤱᤛᤡᤱᤗᤥ. ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤂᤡᤏᤡ᤹ ᤗᤢᤶᤔᤥ ᤋᤩᤧ ᤆᤢᤖᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥”

²⁹ “ᤕᤠᤶᤔᤥ ᤂᤧᤵᤛᤧᤶᤔᤧ᤹ᤀᤥ. ᤁᤧᤎᤢᤶᤒᤠ ᤔᤏᤠ᤺ᤸᤗᤧ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤂᤧᤸᤗᤧ ᤁᤢᤈᤡᤃ᤺ᤰᤘᤠᤜᤠ᤹ ᤏᤠᤵᤔᤠᤍᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤁᤧᤎᤢᤶᤒᤠ ᤔᤏᤠᤴ ᤀᤡᤄᤣ᤺ᤱᤔᤠᤀᤣ ᤐᤥᤱᤗᤥ॥ ᤜᤧᤰᤁᤩᤠᤱᤗᤰ ᤁᤢᤜᤡᤶᤔᤥ ᤗᤠ᤺ᤵᤔᤠᤀᤠᤱ ᤆᤡᤃᤰᤘᤠᤜᤠ᤹ ᤗ᤺ᤵᤔᤠᤍᤣ᤹ᤔᤠ ᤛᤢᤰᤋᤧᤳᤗᤥ॥”

³⁰ “ᤀᤠᤳᤋᤡᤴ ᤀᤡᤱᤃᤠ᤹ᤏᤢ ᤌᤡᤰᤜᤢᤵᤐᤥ ᤜᤥᤵ ᤂᤧᤴ ᤀᤠᤍᤰᤗᤧᤱᤘᤠᤀᤥ ᤘᤠ᤹. ᤜᤠ᤺ᤳᤗᤧ ᤀᤡᤱᤃᤠ᤹ᤏᤢ ᤔᤧᤛᤢᤵᤛᤢᤴ ᤂᤧᤸᤗᤧ ᤛᤧᤛᤢᤖᤥ॥”

³¹ “ᤂᤧᤸᤗᤧᤆᤥᤃᤢᤸᤗᤧ ᤀᤡᤱᤃᤠ᤹ ᤂᤡᤏᤡ᤹ ᤔᤧᤳᤏᤡᤱ. ᤔᤧᤴᤇᤠᤶ ᤕᤠᤵᤔᤡᤖᤧ ᤆᤥ᤺ᤰᤔᤏᤠᤒᤠ ᤁᤧᤖᤧᤰ ᤗᤠᤕᤥ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤂᤥᤔᤠ ᤛᤢᤰᤋᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤵᤔᤏᤠᤒᤠ ᤔᤠᤱᤆᤧ᤹ᤕᤠ ᤐᤠ᤺ᤴᤏᤡᤸᤗᤧᤴ ᤗᤧᤵᤔᤡ ᤀᤠᤵᤑᤠᤸᤗᤧᤀᤠᤱ ᤂᤥᤔᤧᤍᤧᤳᤏᤧᤴᤗᤥ॥

³² ᤀᤠᤳᤋᤡᤴ ᤔᤏᤠ᤺ᤸᤗᤧ ᤔᤧᤴᤇᤠᤶᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤠ᤺ᤳᤋᤢ᤹. ᤂᤧᤸᤗᤧ ᤗᤧᤵᤔᤡ ᤂᤥᤛᤢ᤹. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤧᤒᤠ᤺ᤵᤐᤠᤸᤗᤧ ᤁᤴ ᤕᤧᤶᤔᤥ ᤜᤧᤰᤁᤩᤠᤱ ᤁᤧᤍᤠᤒᤠ ᤕᤧᤶᤔᤥᤀᤠᤱ ᤗᤧᤵᤔᤡ ᤔᤧᤄᤥᤛᤢᤴᤗᤥ॥”

³³ “ᤏᤢᤒᤠ ᤛᤡᤱᤒᤢᤱᤅᤥ ᤏᤢᤒᤠᤀᤣ ᤛᤡᤱᤛᤣ᤹ ᤌᤥ᤺ᤰᤗᤥ. ᤋᤠᤵᤑᤧ᤺ᤶᤒᤠ ᤛᤡᤱᤒᤢᤱᤅᤥ ᤋᤠᤵᤑᤧ᤺ᤶᤒᤠᤀᤣ ᤛᤡᤱᤛᤣ᤹ ᤌᤥ᤺ᤰᤗᤥ॥ ᤛᤡᤱᤒᤢᤱᤔᤠᤱᤃ ᤛᤡᤱᤛᤣ᤹ᤗᤠᤶᤔᤣ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥

³⁴ ᤀᤛᤣ᤺ᤰᤐᤠᤛᤣ. ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤁᤧᤈᤥᤃᤡ᤹. ᤜᤧᤰᤁᤣ᤺ᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤢᤒᤠ ᤐᤠᤴ ᤐᤠ᤺ᤵᤔᤠ ᤁᤧᤛᤢᤰᤋᤡᤒᤣ᥅ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤐᤠ᤺ᤴᤜᤠ᤹ᤀᤣ ᤔᤢᤖᤠ᤺ᤸᤗᤧ ᤐᤠ᤺ᤳᤋᤢ᤹ᤖᤥ॥

³⁵ ᤏᤢᤒᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤏᤢᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤐᤠ᤺ᤳᤋᤢ᤹ᤖᤥ. ᤜᤧᤰᤁᤩᤠᤱ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤏᤠ᤺ᤸᤗᤧ ᤁᤢᤏᤡᤱᤘᤠ᤹ᤒᤥ ᤁᤧᤕᤠᤰᤐᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ᤗᤠᤶᤔᤣ ᤐᤠ᤺ᤳᤋᤢ᤹ᤖᤥ॥

³⁶ ᤀᤡᤱᤃᤠ᤹ ᤔᤧᤳᤏᤡᤱ. ᤂᤠᤛᤧᤴ ᤕᤧᤴᤏᤥ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤜᤏᤧᤒᤠ ᤐᤠ᤺ᤴᤛᤢᤳᤗᤠᤜᤠ᤹ᤖᤧᤴ ᤆᤡᤍᤱ ᤐᤡᤔᤠ ᤐᤥᤱᤗᤥ॥

³⁷ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤐᤠᤴ ᤛᤢᤳᤗᤠᤜᤠ᤹ᤖᤧᤀᤣ ᤂᤡᤏᤡ᤹ ᤛᤠᤶᤕᤥᤒᤠ ᤀᤡᤃᤪ ᤗᤠᤕᤥᤒᤠ ᤁᤧᤒᤥ᤺ᤰᤂᤡ᤹ᤖᤥ॥”

ᤕᤥᤏᤠᤖᤧ ᤁᤢᤔᤡᤰᤛᤣᤴ

³⁸ ᤜᤧᤰᤁᤩᤠᤱ ᤁᤢᤓᤠ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ ᤏᤢ ᤑᤖᤡᤛᤡᤜᤠ᤹ ᤔᤧᤍᤱᤛᤡᤱ ᤜᤧᤰᤁᤩᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤎᤡᤰ ᤀᤠᤏᤡᤃᤣ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤶᤒᤧᤀᤠᤱ ᤘᤠ᤹ᤖᤥ॥”

³⁹ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤁᤴ ᤕᤧᤶᤔᤥᤒᤠ ᤁᤢ᤹ᤀᤡᤃᤧᤓᤧ᤹ᤒᤠ ᤏᤢ ᤗᤠᤕᤥᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤁᤧᤔᤠᤒᤠ ᤔᤡᤰᤛᤣ᤺ᤴᤜᤠ᤹ ᤀᤥᤔᤧᤵᤔᤠ ᤔᤧᤃᤥ᤺ᤳᤋᤢ᤹. ᤁᤖ ᤂᤧᤱᤜᤠ᤹ᤖᤧᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤥᤏᤠᤖᤧ ᤁᤢᤔᤡᤰᤛᤣ᤺ᤴᤏᤠᤱᤎᤥ ᤘᤣ᤹ ᤔᤡᤰᤛᤣᤴ ᤌᤣᤀᤠᤱ ᤀᤥᤔᤧᤵᤔᤠ ᤔᤧᤱᤄᤥᤛᤢᤴᤗᤥ॥

⁴⁰ ᤌᤣᤀᤠᤱᤓᤧᤸᤗᤧ ᤕᤥᤏᤠ᤺ᤱᤃ ᤕᤶᤒᤠ ᤅᤠ᤺ᤸᤗᤧ ᤗᤖᤢᤀᤠᤱ ᤁᤢᤛᤠᤵᤐᤥ᤺ᤰᤐᤥ ᤛᤧᤴᤍᤡᤰ ᤗᤧᤴᤍᤡᤰ ᤛᤢᤶᤕᤧᤴ ᤌᤠᤖᤡᤰ ᤕᤠᤃᤧ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠ ᤛᤡᤃᤠᤱ ᤛᤢᤶᤛᤧᤴ ᤏᤢ ᤛᤢᤶᤕᤧᤴ ᤌᤠᤖᤡᤰ ᤕᤠ᤺ᤰᤁᤠᤖᤥ॥

⁴¹ ᤏᤡᤏᤒᤣ ᤕᤧᤰᤕᤰᤛᤔᤠ ᤔᤏᤠᤜᤠ᤹ ᤁᤥᤕᤧᤶᤒᤠ ᤔᤏᤠᤜᤠ᤹ᤏᤢ ᤂᤠᤛᤧᤴ ᤕᤧᤴᤏᤥ ᤔᤧᤕᤧᤵᤐᤠᤱ ᤁᤱᤜᤠ᤹ ᤀᤠᤵᤋᤡᤰ ᤔᤧᤃᤢ᤺ᤳᤋᤢᤛᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤕᤥᤏᤠᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤥ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤀᤠᤱ ᤂᤢᤏᤡ᤹ ᤗᤠᤕᤥᤗᤠᤶ ᤔᤧᤜᤡᤴᤍᤧᤖᤥ. ᤁᤖ ᤁᤵᤔᤥᤃ ᤕᤥᤏᤠᤴᤏᤢ᤺ᤸᤗᤧᤀᤠᤱ ᤕᤶᤒᤠᤎᤡᤰ ᤘᤠ᤹ᤛᤠᤱ ᤂᤡᤏᤡ᤹ ᤗᤠᤕᤥᤗᤠᤶ ᤁᤧᤴᤜᤡᤴᤍᤡᤴᤗᤥ॥

⁴² ᤗᤠᤱᤃᤧᤳ ᤐᤡᤛᤠᤱᤒᤠ ᤛᤡᤘᤠ ᤗᤠᤈᤣ᤹ᤛᤔᤠ ᤜᤠᤱᤔᤠᤴ ᤂᤠᤛᤧᤴ ᤕᤧᤴᤏᤥ ᤕᤧᤶᤛᤡᤱᤅᤠᤱ ᤁᤴ ᤕᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤐᤥ᤺ᤰᤁᤠᤱ ᤐᤠ᤺ᤴᤎᤡᤰᤋᤢᤛᤡ᤹ᤖᤥ॥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤛᤥᤗᤥᤔᤏ ᤜᤠᤱᤅᤡᤸᤗᤧᤴ ᤛᤡᤰᤁᤢᤶᤍᤡᤱ ᤏᤡᤱᤘᤠᤴ ᤂᤧᤶᤛᤧ ᤛᤠ᤹ᤖᤡᤰ ᤔᤠ᤺ᤱᤄᤠᤒᤠ ᤗᤠᤈᤣ᤹ᤗᤠᤶ ᤋᤩᤧᤀᤠᤱ ᤘᤕᤧᤖᤥ॥ ᤁᤵᤔᤥ ᤛᤥᤗᤥᤔᤏ ᤜᤠᤱᤅᤡᤴᤏᤢ᤺ᤸᤗᤧ ᤕᤶᤒᤠᤴ ᤘᤠ᤹ᤛᤠᤱ ᤁᤧᤴᤄᤧᤵᤛᤢᤶᤔᤡᤴᤗᤥ॥”

ᤑᤧᤴᤛᤠᤶᤔᤡᤴ ᤕᤠᤶᤔᤥ ᤏᤢ᤺ᤱ ᤋᤠ᤹᤺

⁴³ “ᤑᤧᤴᤛᤠᤶᤔᤡᤴ ᤔᤏᤠᤀᤥᤗᤠᤶ ᤗ᤺ᤴ ᤐᤣ᤺ᤰᤁᤡᤸᤗᤧ ᤏᤠ᤺ᤶᤛᤡᤱ ᤋᤧᤴ ᤁᤥ᤺ᤳᤇᤧ ᤛᤧᤱᤛᤧᤱᤒᤠ ᤋᤧᤴ ᤜᤧᤱᤄᤠᤳᤋᤡ ᤐᤣ᤺ᤰᤗᤥ. ᤁᤖ ᤂᤧᤸᤗᤧ ᤀᤠᤳᤋᤠᤴᤏᤠᤱ ᤔᤧᤄᤥᤛᤢᤴᤏᤠᤱ

⁴⁴ ᤀᤰᤂᤣ ᤔᤧᤳᤇᤡᤱᤗᤥ. ‘ᤀᤡᤱᤃᤠ᤹ ᤗᤧᤖᤢᤱᤒᤠ ᤔᤏᤠ᤺ᤸᤗᤥᤀᤣ ᤏᤢ᤺ᤱᤅᤠ ᤐᤣ᤺ᤰᤁᤠᤖᤥ॥’ ᤜᤧᤰᤁᤩᤠᤱ ᤂᤧᤴ ᤂᤧᤵᤔᤥ ᤏᤢ᤺ᤱ ᤋᤠ᤺ᤸᤗᤧ ᤋᤃᤡ ᤕᤠᤃᤧᤒᤠ ᤋᤧᤴᤏᤡᤴ ᤁᤢᤄᤠᤗᤧᤶ. ᤔᤧᤍᤢᤃᤢᤒᤠ ᤏᤢ ᤏᤢᤒᤠ ᤔᤧᤈᤥᤃᤢᤒᤠ ᤏᤡᤛᤢ᤹॥

⁴⁵ ᤜᤧᤰᤁᤩᤠᤱ ᤂᤧᤴ ᤐᤣ᤺ᤰᤁᤠᤱ ᤀᤠᤵᤑᤣᤰᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤁᤢ᤹ᤀᤡ ᤁᤧᤓᤧ᤹ᤒᤠ ᤘᤣ᤹ ᤏᤢᤛᤡ ᤑᤧᤴᤛᤠᤶᤜᤠ᤹ ᤋᤠᤖᤢᤛᤡᤀᤠᤱ ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤠᤱ ᤔᤧᤕᤢᤱᤛᤡᤱᤗᤥ॥ ᤂᤧᤴ ᤔᤏᤠ᤺ᤸᤗᤧ ᤁᤢᤕᤠᤰᤏᤠᤶᤔᤡᤴ ᤋᤃᤡᤒᤠᤏᤢ᤺ᤸᤗᤧᤀᤠᤱ ᤋᤠᤵᤑᤧ᤺ᤶᤒᤠ ᤐᤥᤱᤗᤥ॥ ᤁᤴ ᤕᤧᤶᤔᤥᤒᤠ ᤁᤢ᤹ᤀᤡ ᤁᤧᤓᤧ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠᤰᤏᤠᤶᤔᤡᤴᤏᤠᤱ ᤒᤠ ᤜᤧᤰᤋᤱᤒᤠᤀᤣ ᤐᤥᤱᤗᤥ॥”

ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ

⁴⁶ ᤕᤧᤛᤢᤴ ᤔᤏᤠᤜᤠ᤹ᤏᤢ ᤐᤠᤖᤧᤖ ᤕᤠᤃᤧᤸᤗᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤂᤢᤏᤧ᤹ᤏᤢ ᤋᤠ᤹ᤈᤧᤱᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤗᤠ᤺ᤰᤁᤠᤳ ᤔᤧᤕᤧᤒᤧᤖᤥ॥

⁴⁷ ᤔᤏᤠᤎᤡᤰ ᤐᤣᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤂᤧᤏᤧ᤹ᤏᤢ ᤋᤠ᤹ᤈᤧᤱᤔᤠ ᤑᤠ᤹ᤀᤠᤱ ᤗᤠ᤺ᤰᤁᤠᤳ ᤁᤧᤶᤜᤠᤱᤗ ᤔᤧᤕᤧᤵᤗᤥ॥”

⁴⁸ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤜᤠ᤺ᤳᤇᤡᤒᤣ᥅”

⁴⁹ ᤁᤢᤜᤢ᤹ᤛᤠᤶᤒᤠᤜᤠ᤹ ᤛᤥ᤺ᤰᤋᤢᤛᤡᤖ ᤂᤧᤴ ᤔᤏᤠᤴ ᤔᤧᤳᤋᤢ. “ᤀᤥᤔᤧᤳᤋᤧᤛᤧ᤹. ᤁᤵᤔᤥ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡ ᤔᤧᤕᤢᤱᤗᤥ॥

⁵⁰ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴᤜᤠ᤹ᤖᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤀᤠᤶᤒᤠᤖᤧ ᤁᤢᤏᤡᤱᤘᤠ᤹ ᤜᤧᤰᤁᤣ ᤔᤧᤈᤥᤃᤢ᤹. ᤂᤧᤱᤜᤠ᤹ᤀᤣ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”