ᤔᤗᤠᤁᤡ 4 - LIFOTNT

ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴ

¹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤥᤔᤧᤳᤋᤧᤶᤔᤧ᤹. ᤂᤧᤴ ᤂᤠᤛᤧᤴ ᤗᤥ᤺ᤶᤔᤠ ᤕᤧᤴᤏᤡᤴ ᤔᤡᤎᤢᤱ ᤔᤡᤖᤠ᤺ᤰ ᤁᤢᤀᤡᤛᤡᤰ ᤋᤠᤖ ᤐᤳ॥ ᤕᤶᤒᤠ ᤁᤧᤗᤧᤱᤛᤡᤱᤒᤠ ᤔᤏᤠᤜᤠ᤹ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤕᤠ᤹ᤗᤠᤱ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡ᤹॥ ᤔᤡ᤺ᤸᤗᤧ ᤛᤡᤱᤒᤥᤖᤠ᤺ᤰᤁᤧᤴ ᤏᤢ ᤁᤢᤛᤠ᤺ᤵᤐᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤛᤡ᤹॥

² ᤁᤖ ᤀᤠᤱᤃᤠ᤹ᤏᤢ ᤁᤧᤃᤡᤒᤠ ᤜᤧᤰᤁᤩᤠᤱ ᤀᤠᤔᤡᤱᤅᤧᤴ ᤔᤡᤱᤛᤥ ᤀᤡᤱᤎᤠᤱ ᤁᤧᤒᤡᤒᤠ ᤛᤶᤎᤠᤱᤃ ᤏᤠᤶᤔᤡᤴ ᤑᤡᤖᤡᤖᤡᤏᤠ ᤗᤡᤱᤒᤠ ᤁᤢᤀᤡᤛᤡᤰ ᤛᤠᤶᤕᤥᤏᤡᤔᤠᤸᤗᤧ ᤋᤢᤰᤔᤠ ᤗᤠ᤺ᤰᤔᤠᤗᤠᤶ ᤘᤣ᤺ᤵᤔᤠ ᤏᤢ ᤏᤢ᤹ᤔᤠᤍᤠᤔᤧᤴ ᤋᤠᤖᤢᤀᤠᤱ ᤋᤠ᤹᤺॥ ᤜᤧᤰᤁᤩᤠᤱ ᤐᤡᤳᤌᤠ᤺ᤱᤅᤥ ᤁᤧᤕᤧᤵᤐᤠ ᤐᤡᤳᤛᤠ᤺ᤳᤋᤧᤴ ᤗᤧᤵᤔᤧᤸᤗᤧ ᤆᤠᤖᤠᤶᤔᤠᤍᤧᤴᤏᤥ ᤐᤡᤳᤆᤠᤰ ᤐᤡᤳᤆᤠᤰ ᤐᤡᤴᤗ ᤗᤠ᤺ᤰᤁᤠᤳ ᤐᤣ᤺ᤰᤐᤠ ᤁᤢᤀᤡᤛᤡᤰ ᤂᤧᤏᤡ᤹ᤀᤠᤱ ᤗᤠ᤺ᤰᤁᤠᤳ ᤁᤧᤗ᤺ᤴᤍᤡᤖᤥ॥

³ ᤂᤶᤓᤩᤠᤱ ᤑᤧᤴᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤂᤧᤏᤡ᤹ ᤗᤠᤱᤅᤡᤸᤗᤧ ᤁᤧᤍᤥ᤹ᤖᤢᤶᤛᤡᤶ᤹॥ ᤀᤠᤱᤃᤠ᤹ ᤂᤧᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤱᤒᤠ ᤕᤧᤴᤏᤥ. ᤂᤧᤱᤜᤠ᤹ ᤂᤧᤏᤡ᤹ ᤗᤠᤱᤍᤠᤵᤐᤣ᤹ ᤛᤡᤃᤠᤱ ᤂᤠᤵᤐᤢᤌᤩ᤺ᤱ ᤔᤧᤒᤥᤱᤗᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁴ “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤔᤥᤛᤠ᤺ᤸᤗᤧ ᤁᤢᤛᤠᤶᤕᤥ ᤌᤡᤶᤔᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹. ᤂᤧᤴ ᤛᤠᤶᤕᤥ ᤂᤠᤛᤧᤴᤜᤠ᤹ ᤏᤢ ᤛᤠᤶᤕᤥᤌᤡᤶ ᤀᤡᤱᤈᤠᤱᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤱᤃᤠ᤹ ᤜᤥᤖᤣᤒ ᤁᤥ᤺ᤰᤔᤠᤀᤥ ᤔᤥᤛᤠᤴ ᤐᤡᤖᤢᤱᤅᤠᤱ ᤘᤕᤧ॥

⁵ “ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤕᤶᤒᤠ ᤏᤢ ᤁᤡᤵᤔᤠ ᤁᤧᤄᤢᤒᤠ ᤁᤢᤕᤧᤴᤏᤡᤴ ᤋᤠᤔᤠᤏᤢ᤺ᤸᤗᤧ ᤋᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤀᤠᤱᤃᤠ᤹ ᤐᤠᤱᤄᤢᤱ ᤕᤢᤛᤢᤱᤗᤥ॥

⁶ ᤂᤧᤸᤗᤧ ᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤛᤠᤜᤠ᤹ ᤗᤧᤵᤔᤠᤱ ᤜᤧᤰᤁᤩᤠᤱ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤜᤠ᤹ ᤗᤧᤵᤔᤠᤱ ᤜᤡᤛᤢ ᤐᤡᤖᤢᤛᤡ. ᤔᤣ᤺ᤴᤏᤧᤓᤃᤪ ᤀᤠᤱᤃᤠ᤹ ᤕᤢᤀᤠᤀᤠᤱ ᤗᤠᤈᤣᤴ ᤗᤳᤇᤠ ᤔᤠᤱᤍᤣ ᤛᤠᤱᤃᤪᤠ ᤔᤧᤳᤋᤢᤱᤅᤠᤱ ᤔᤧᤰᤂᤢᤱᤗᤥ॥”