ᤔᤗᤠᤁᤡ 3 - LIFOTNT

¹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤥᤔᤧᤳᤋᤠᤶᤔᤧ᤹. ᤀᤠᤒᤠᤅᤣ ᤀᤠᤱᤃᤠ᤹ ᤀᤠᤀᤡᤱᤄᤱ ᤁᤧᤛᤠᤒᤧᤴ ᤐᤠᤱᤄᤢᤱ᤹. ᤜᤧᤰᤁᤩᤠᤱ ᤂᤧᤸᤗᤧ ᤀᤠᤱᤃᤠ᤹ ᤀᤠᤍᤃᤡ ᤀᤠᤍᤃᤡ ᤗᤠᤶ ᤕᤠᤖᤡᤵ ᤆᤥᤃᤢᤖᤥ॥ ᤂᤧᤴ ᤕᤧᤶᤔᤥ ᤂᤧᤏᤡ᤹ ᤁᤧᤃᤥ᤺ᤳᤋᤢᤶᤒᤠ ᤍᤠᤱᤒᤧᤴ ᤜᤰᤆᤄᤳ ᤀᤠᤒᤠᤅᤣ ᤁᤢᤜᤡᤶᤔᤥ ᤋᤠᤖᤥ. ᤂᤧᤏᤡ᤹ ᤛᤡᤖᤠ᤹ᤃᤧᤎᤠᤱᤒᤠ ᤔᤠᤱᤜᤢᤵᤐᤡᤸᤗᤧᤴ ᤀᤡᤱᤃᤧᤛᤠᤒᤧᤴ ᤋᤠᤖᤥ॥”

² ᤁᤖ ᤂᤢᤏᤧ᤹ ᤁᤢᤍᤠᤔᤠ ᤕᤧᤴᤏᤡᤴ ᤜᤠ᤺ᤳᤗᤧ ᤌᤶᤔᤠ ᤛᤢᤰᤋᤢᤒᤣ᥅ ᤂᤢᤏᤧ᤹ ᤏᤡᤎᤠ᤺ᤶᤛᤡᤱᤅᤡᤸᤗᤧ ᤜᤠ᤺ᤳᤗᤧ ᤕᤧᤵᤐᤠᤱ ᤀᤥᤔᤧᤵᤔᤠ ᤛᤢᤰᤋᤢᤒᤣ᥅ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤛᤠᤶᤔᤩᤠᤱ ᤁᤧᤎᤰᤐᤠᤸᤗᤧ ᤛᤠᤶᤔᤩᤠᤱᤅᤡᤴ ᤕᤥ᤺ᤶᤔᤠᤖᤧ ᤗᤠᤃᤡ ᤔᤡᤴ ᤔᤢ᤺ᤳᤋᤢᤒᤠ ᤔᤡᤖᤠ᤺ᤰ ᤁᤢᤀᤡᤛᤡᤰ ᤗ᤹ ᤜᤧᤰᤁᤩᤠᤱ ᤆᤠᤱ ᤘᤠᤃᤧᤜᤵᤐᤠᤸᤗᤧ ᤁᤢᤛᤠᤃᤢᤴ ᤜᤧᤰᤁᤣ ᤗ᤹ᤖᤥ॥

³ ᤂᤢᤏᤧ᤹ᤃ ᤕᤢᤵᤐᤠ ᤁᤧᤕᤥ᤺ᤶᤒᤠ ᤏᤢ ᤛᤣᤛᤣ ᤆᤥ᤺ᤰᤔᤠᤖᤧ ᤗᤠᤃᤡ ᤕᤢᤵᤐᤠ ᤘᤠᤃᤧᤜᤵᤐᤠ ᤜᤧᤰᤁᤣ ᤐᤥᤱᤅᤠᤱ ᤕᤢᤱᤛᤡᤱ॥ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤕᤥ᤺ᤶᤔᤏᤠᤒᤠ ᤁᤢᤀᤡᤛᤡᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤢᤳᤌᤥ ᤆᤥᤃᤢᤛᤡ᤹॥ ᤂᤶᤓᤧᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤕᤠᤶᤔᤥᤀᤠᤱ ᤂᤧᤱᤜᤠ᤹ᤖᤧ ᤛᤢᤳᤌᤥ ᤜᤢᤰᤛᤥᤕᤠᤱ ᤔᤧᤍᤠᤖᤢ᤹॥

⁴ ᤂᤧᤴ ᤕᤧᤴᤏᤠᤱᤎᤥ ᤕᤜᤢᤍᤠ ᤗᤠᤈᤣ᤹ ᤏᤢ ᤕᤖᤢᤛᤗᤧᤔ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤜᤢᤰᤛᤥᤕᤠᤱᤜᤠ᤹. ᤋᤃᤡ ᤁᤢᤀᤡᤛᤡ᤺ᤰᤁᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤠ᤺ᤰᤔᤠ ᤁᤧᤗᤠ᤹ᤒᤠ ᤐᤥᤱ॥

⁵ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤁᤖ ᤜᤧᤰᤁᤣ ᤐᤥᤱᤔᤠᤏᤢ᤺ᤸᤗᤧ ᤋᤃᤡ ᤀᤠᤱᤃᤠ᤹ ᤂᤠᤛᤧᤴ ᤗᤥ᤺ᤴᤇᤧ ᤂᤧᤏᤡ᤹ ᤐᤣᤛᤠᤱ ᤋᤠᤀᤠ॥ ᤛᤠᤶᤔᤠᤱᤆᤩᤠ᤺ᤱ ᤔᤢᤖᤠ ᤁᤧᤔᤧᤵᤐᤠ ᤔᤏᤠᤜᤠ᤹. ᤀᤡᤵᤏᤠ ᤗᤥ᤺ᤶᤓᤣᤳ ᤁᤧᤒᤥ᤺ᤵᤐᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤀᤡᤱᤗᤧᤰᤁᤣ ᤋᤥ᤺ᤴᤍᤡ ᤁᤧᤒᤡᤒᤠᤜᤠ᤹. ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤶᤕᤠᤰ ᤏᤢᤖᤡᤰ ᤔᤧᤶᤒᤡᤔᤏᤠᤜᤠ᤹ ᤁᤢᤕᤧᤶᤒᤠ ᤁᤧᤛᤡᤔᤠ ᤔᤧᤴᤇᤢᤔᤠᤜᤠ᤹ ᤏᤢ ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹ ᤏᤡᤱᤘᤠ᤹ ᤋᤠᤍᤠ ᤁᤧᤈᤥ᤺ᤰᤐᤠ ᤏᤢ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠᤜᤠ᤹ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤧᤵᤔᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤔᤧᤸᤗᤥ᤺ᤶᤔᤏᤠ ᤔᤧᤶᤒᤡᤔᤏᤠᤒᤠᤜᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤏᤢ ᤔᤧᤱᤃᤡᤔᤏᤠᤒᤠ ᤁᤴ ᤁᤧᤖᤧᤰ ᤔᤏᤠᤜᤠ᤹ ᤀᤠᤱᤃᤠ᤹ ᤜᤰᤆᤄᤳ ᤀᤠᤵᤋᤡᤰ ᤁᤢ᤺ᤳᤋᤢᤱᤛᤡᤱ᤹॥”

ᤌᤡᤒᤥᤱᤗᤰ ᤋᤥ᤺ᤶᤔᤠ ᤐᤥᤱ

⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤀᤠᤓᤧᤸᤗᤧᤀᤠᤱ ᤔᤡᤰᤛᤣᤴ ᤔᤧᤗᤧᤱᤛᤡᤱᤅᤠᤴ᤹॥ ᤁᤸᤗᤧᤆᤥᤃᤢᤸᤗᤧ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤛᤣ ᤂᤧᤏᤡ᤹ ᤔᤧᤶᤔᤧᤰᤁᤣ ᤁᤧᤘᤕᤡ॥

⁷ ᤂᤧᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤔᤠᤱᤎᤥᤀᤣ ᤂᤧᤏᤡ᤹ ᤀᤠᤱᤃᤠ᤹ ᤆᤥᤃᤢᤱᤒᤠ ᤀᤢᤘᤠᤜᤠ᤹ ᤂᤧᤶᤔᤠ ᤁᤧᤴᤍᤧᤴᤍᤡᤴᤏᤠᤱ ᤁᤧᤏᤢ᤺ᤰᤂᤡ ᤁᤧᤒᤣᤃᤡᤀᤠᤱ ᤁᤧᤘᤕᤡ ᤜᤧᤰᤁᤩᤠᤱ ᤂᤧᤴ ᤛᤠᤶᤕᤥᤌᤡᤶᤜᤠ᤹ ᤔᤧᤴᤀᤡ᤺ᤳᤋᤣ ᤔᤧᤴᤏᤠ᤺ᤳᤋᤣ ᤁᤧᤘᤕᤡ॥ ᤂᤧᤏᤡ᤹ ᤀᤠᤱᤃᤠ᤹ ᤗᤧᤵᤔᤠᤱ ᤏᤢ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤡ᤹ ᤗᤧᤵᤔᤠᤱ ᤏᤢ᤺ᤱᤅᤠ᤹॥ “ᤁᤖ ᤂᤧᤏᤡ᤹ ᤕᤠᤵᤔᤡ ᤐᤠᤴ ᤛᤧ᤺ᤴᤃᤧᤗᤠᤵᤋᤡ᤹. ‘ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤏᤢ᤺ᤰᤂᤡᤃᤧᤒᤣ᥅’

⁸ “ᤌᤣ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤡᤱᤔᤧᤗᤧᤰᤋᤢᤒᤡ᥅ ᤜᤧᤰᤁᤣᤛᤠᤱ ᤂᤧᤏᤡ᤹ ᤀᤠᤱᤃᤠ᤹ ᤀᤡᤱᤀᤠᤃ᤻ᤗᤧᤰ॥ “ᤁᤖ ᤂᤧᤏᤡ᤹ ᤕᤠᤵᤔᤡ ᤐᤠᤴ ᤛᤧ᤺ᤴᤃᤧᤍᤥᤛᤡ. ‘ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤣ ᤀᤡᤱᤗᤧᤰᤁᤠᤛᤡᤃᤧᤒᤣ᥅’ “ᤌᤡᤒᤥᤱᤗᤰ ᤋᤥ᤺ᤶᤔᤠ ᤏᤢ ᤜᤢᤰᤛᤥᤕᤠᤱᤅᤥ ᤂᤧᤏᤡ᤹ ᤀᤠᤱᤃᤠ᤹ ᤀᤡᤱᤀᤠᤃ᤻ᤗᤧᤰ॥”

⁹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤏᤡ᤹ ᤁᤧᤖᤧᤰ ᤛᤶᤎᤠᤱ ᤔᤠᤱᤍᤣ ᤛᤠᤱᤃᤪᤠ ᤌᤩᤧᤀᤠᤱ ᤘᤠ᤹ ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤁᤧᤖᤧᤰ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ ᤕᤠᤵᤔᤡ ᤀᤡᤱᤃᤧᤗᤧᤰᤋᤡᤀᤠᤱ ᤘᤠ᤹॥

¹⁰ ᤀᤠᤱᤃᤠ᤹ ᤀᤠᤜᤡᤶᤔᤥ ᤆᤠᤔᤠ ᤌᤢᤱᤔᤠ ᤘᤠ᤹ᤖ ᤑᤠ᤹ᤀᤠᤱ ᤁᤧᤖᤧᤰ ᤌᤡᤒᤥᤱᤗᤰᤁᤡᤴ ᤆᤠᤎᤠ᤺ᤱᤅᤥ ᤋᤠᤖᤠᤶᤔᤧ᤹॥ ᤁᤴ ᤐᤠ᤺ᤴᤏᤥ ᤀᤠᤱᤃᤠ᤹ ᤀᤠᤛᤠ᤹ᤖᤧᤀᤠᤱ ᤀᤥᤀᤠᤔᤧᤳᤋᤧ ᤀᤠᤛᤠ᤹ᤖᤧ᤹. ᤀᤠᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤗᤠᤶᤎᤣ᤺ᤳᤜᤠ᤹ ᤜᤴᤍᤢᤱᤅᤠᤱ ᤁᤢᤕᤠᤱᤔᤠᤖᤧᤀᤠᤱ ᤔᤧᤜᤳᤋᤢᤴᤗ ᤌᤠᤖᤡᤰ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤂᤧᤏᤡ᤹ ᤗᤠᤃᤡ ᤛ᤺ᤰᤛᤢᤱ ᤌᤠᤛᤢᤱᤒᤡ ᤔᤧᤎᤠᤀᤠᤴᤒᤡ॥

¹¹ ᤂᤧᤏᤡ᤹ ᤆᤠ ᤀᤡᤰᤋᤠᤵᤜᤠ᤹ ᤁᤧᤈᤠᤒᤠᤀᤠᤱ ᤁᤧᤔᤧᤱᤒᤠ ᤏᤡ᤺ᤱᤄᤢᤰᤘᤠᤜᤠ᤹ ᤀᤠᤱᤃᤠ᤹ ᤔᤧᤰᤂᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤏᤡ᤹ ᤀᤡᤰᤋᤠᤵᤐᤥ ᤁᤧᤕᤢᤱᤒᤠ ᤐᤢᤖᤢᤵᤗᤢᤵᤛᤣ᤺ᤸᤗᤧ ᤁᤢᤒᤢᤱᤅᤥ ᤁᤧᤒᤵᤐᤠ ᤁᤢᤈᤠ᤹ᤜᤠ᤹ ᤔᤧᤴᤍᤢᤶᤔᤣ ᤔᤰᤔᤧᤎᤠᤏᤧᤴ॥

¹² ᤜᤧᤰᤁᤩᤠᤱᤎᤥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤏᤡ᤹ ᤔᤢ᤹ᤀᤡᤛᤠᤒᤠᤏᤧᤏᤡᤱ ᤁᤧᤶᤔᤧᤳᤋᤡ᤹. ᤌᤣᤀᤠᤱᤓᤧᤸᤗᤧ ᤂᤧᤏᤡ᤹ ᤗᤠᤈᤣᤴ ᤗᤳᤇᤠ ᤛᤠ᤹ᤖᤡᤰᤁᤣ ᤛᤡᤰᤁᤧᤛᤶᤒᤠ ᤗᤠᤈᤣ᤹ ᤐᤥᤱᤗᤥ॥”

ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤏᤢ᤹ᤒᤠ ᤆᤥᤰ

¹³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤏᤡ᤹ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤌ᤺ᤳᤔᤧᤴᤍᤧᤵᤔᤏᤠᤒᤠ ᤁᤧᤛᤠᤰᤐᤠ ᤐᤠᤴ ᤁᤧᤒᤠ᤺ᤳᤋᤢᤶᤔᤠᤱ ᤘᤠ᤹॥ “ᤜᤧᤰᤁᤣᤛᤠᤱ ᤂᤧᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤐᤠᤴ ᤛᤧ᤺ᤴᤃᤧᤍᤥᤛᤡ. ‘ᤀᤠᤏᤡᤃᤣ ᤌᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤐᤠᤴ ᤐᤠ᤺ᤳᤋᤢᤶᤒᤧᤀᤠᤱ ᤘᤠ᤹ᤒᤣ᥅’

¹⁴ “ᤂᤧᤏᤡ᤹ ᤁᤧᤒᤠ᤺ᤳᤋᤢᤶᤔᤠᤱ ᤘᤠ᤹ ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤆᤥ᤺ᤰᤔᤠ ᤁᤢᤛᤢᤶᤔᤧᤍᤖᤢᤴ॥ ᤂᤢᤏᤧ᤹ ᤁᤢᤀᤡᤱᤈᤠᤱᤅᤡᤴ ᤏᤠ᤺ᤵᤔᤠ ᤋᤡᤶᤔᤠ ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤔᤧᤖᤡᤱ ᤁᤧᤎᤰᤐᤠ ᤁᤢᤀᤡᤛᤡᤰ ᤗᤠᤱᤄᤣ᤺ᤰᤔᤠᤸᤗᤧ ᤀᤠᤏᤡ᤹ ᤌᤣ ᤀᤠᤄᤥᤛᤢᤶᤔᤠᤱᤒᤣ᥅

¹⁵ ᤁᤖ ᤀᤠᤸᤗᤃ ᤕᤶᤒᤠ ᤁᤧᤗᤧᤱᤛᤡᤱᤒᤠᤜᤠ᤹ᤀᤣ ᤔᤢ᤹ᤀᤡᤛᤠᤒᤠ ᤀᤠᤔᤧᤳᤋᤢᤶᤛᤡᤶ॥ ᤛᤧᤰᤂᤠᤛᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤀᤣ ᤔᤧᤏᤢ᤹ᤔᤧᤍᤠᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤏᤡᤱᤘᤠ᤹ ᤁᤧᤛᤠ᤹ᤒᤠ ᤔᤏᤠᤜᤠ᤹ ᤂᤢᤶᤍᤡᤱᤅᤥ ᤔᤧᤴᤎᤠᤀᤣ ᤔᤧᤄᤧᤳᤇᤡᤱ ᤔᤧᤄᤧᤳ॥’”

¹⁶ ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤴᤏᤢ ᤁᤧᤃᤡᤒᤠᤜᤠ᤹ ᤋᤠ᤹ᤔᤧᤈᤧᤰᤂᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤢ॥ ᤕᤜᤘᤣ ᤍᤠᤱᤒᤧᤴᤏᤢ ᤁᤧᤃᤡᤒᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤀᤡᤱᤎᤠᤱ ᤁᤧᤒᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤛᤥᤰ ᤁᤡᤵᤔᤏᤠᤒᤠ ᤛᤠᤵᤗᤠᤌ᤺ᤱᤔᤥ ᤂᤢᤏᤧ᤹ ᤁᤢᤍᤃᤡᤀᤣ ᤔᤧᤛᤠᤵᤋᤢ॥

¹⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤂᤠᤛᤧᤴ ᤆᤥᤃᤢᤱᤅᤡᤸᤗᤧ ᤕᤠ᤺ᤶᤔᤠ. ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤕᤠᤱᤛᤠ ᤁᤢᤴᤎᤣ ᤔᤧᤒᤥᤱ॥ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤛᤠᤜᤠ᤹ ᤐᤠ᤺ᤸᤗᤧ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠ ᤜᤧᤰᤁᤣ ᤀᤠᤱᤃᤠ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱ॥

¹⁸ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤏᤢ ᤁᤢᤛᤧᤘᤠ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹ ᤁᤧᤛᤧᤶᤒᤠ ᤔᤡᤰᤛᤣ᤺ᤴᤏᤡᤴ ᤂᤧᤏᤡ᤹ ᤕᤠᤶᤔᤥ ᤁᤧᤏᤡᤛᤢᤶᤗᤥ॥”