ᤔᤗᤠᤁᤡ 1 - LIFOTNT

¹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤗᤠᤁᤡᤗᤠᤶᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤅᤢᤒᤠ ᤁᤢᤒᤠ᤺ᤴᤈᤠᤰᤁᤡᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ—

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹

² ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤂᤧᤏᤡ᤹ ᤗᤢᤱᤔᤠ᤹ ᤋᤢᤰᤏᤡᤱᤅᤠᤱ ᤘᤠ᤹ᤀᤠ॥” ᤁᤖ ᤂᤧᤏᤡ᤹ ᤁᤧᤗ᤹ᤖᤡ. “ᤀᤠᤰᤂᤣᤗ᤹ᤖᤡᤰ ᤀᤠᤍᤠᤱᤒᤠᤖᤧ ᤀᤠᤏᤡᤃᤣ ᤕᤠᤵᤔᤡ ᤗᤢᤱᤔᤠ᤹ ᤁᤧᤍᤢᤰᤋᤧᤀᤠᤱ ᤘᤠ᤹ᤒᤣ᥅” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤌᤣ ᤀᤣᤛᤠᤒᤧᤴ ᤕᤠᤁᤢᤒᤖᤧ ᤁᤢᤶᤓᤢ᤹ ᤔᤧᤘᤕᤧᤏᤧᤶᤒᤡ᥅ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤕᤠᤁᤢᤒᤧᤴ ᤗᤢᤱᤔᤠ᤹ ᤋᤢᤰᤋᤢᤱ॥

³ ᤁᤖ ᤀᤣᤛᤠᤒᤧᤴ ᤏᤠ᤹ᤖᤢᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤃᤥ᤺ᤰᤔᤠ ᤑᤠᤱᤈᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤔᤧᤴᤏᤢ᤹ᤔᤏᤠᤒᤠ ᤆᤥᤃᤢᤱ ᤐᤡᤖᤢᤱᤅᤠᤱ ᤂᤧᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤁᤢᤗᤰ ᤗᤠᤈᤣᤴ ᤛᤩᤠᤗᤠᤜᤠ᤹ ᤔᤧᤕᤠᤰᤗ ᤑᤠ᤹ᤀᤠᤱ ᤗᤧᤖᤢᤱ ᤐᤡᤖᤢᤱᤛᤡᤱ॥”

⁴ ᤀᤣᤛᤠᤒᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤀᤧᤍᤥᤔ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤀᤣᤍᤥᤔᤡᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤡᤗᤠ. “ᤀᤠᤏᤡᤃᤣ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧ᤹᤺. ᤜᤧᤰᤁᤣᤛᤠᤱ ᤁᤧᤎᤢᤵᤐᤠ ᤁᤧᤕᤶᤒᤠ ᤀᤠᤏᤡᤃᤣ ᤕᤧᤰᤕᤰᤜᤠ᤹ ᤕᤠᤶᤔᤥ ᤆᤥᤃᤢᤶᤒᤧ॥” ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤂᤧᤴᤜᤠ᤹ᤖᤧ ᤆᤥ᤺ᤰᤔᤠᤃ ᤔᤧᤈᤥᤃᤢᤖ. ᤁᤖ ᤀᤠᤱᤃᤠ᤹ ᤕᤴᤇᤢᤱ ᤐᤡᤖᤢᤱᤛᤡᤱ᤹॥ ᤂᤧᤴᤜᤠ᤹ᤖᤧ ᤂᤢᤏᤡ᤹ ᤗᤠᤈᤣᤴ ᤁᤢᤀᤡᤃᤧᤓᤧᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤛᤡᤱᤒᤢᤱ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤳ. ᤜᤧᤰᤁᤩᤠᤱ ᤂᤧ᤹ᤕᤥᤒᤠ ᤔᤏᤠᤜᤠ᤹ᤏᤢ ᤕᤜᤘᤣ ᤍᤠᤱᤒᤧᤴ ᤀᤠᤓᤧᤸᤗᤧᤛᤠᤱ ᤜᤠᤱᤃᤧᤴ ᤛᤡᤰᤆᤠ ᤗᤥᤖᤥ॥

⁵ ᤁᤴ ᤂᤧᤏᤡ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤠᤒᤠᤅᤣ ᤂᤧᤏᤡ᤹ ᤔᤡᤰᤁᤡᤸᤗᤧ ᤁᤧᤏᤡᤛᤢᤶᤔᤠᤱ ᤁᤧᤒᤠ᤺ᤳᤋᤢᤶ᤹. ‘ᤀᤡᤛᤪᤠᤀᤡᤗ ᤗᤠᤈᤣ᤹ᤒᤠ ᤀᤡ᤺ᤴᤍᤥ ᤗᤠ᤺ᤰᤁᤠᤳᤋᤠᤱ ᤕᤜᤘᤣ ᤍᤠᤱᤒᤧᤴ ᤐᤕᤶ ᤕᤶᤒᤠ ᤆᤥᤰᤗᤥ॥’”

ᤕᤠᤶᤗᤧ ᤔᤧᤴᤍᤠ᤺ᤰᤔᤏᤠᤒᤠ ᤛᤡᤍᤢᤱᤈᤓᤠ

⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ᤹. “ᤗᤳᤇᤠ ᤕᤧᤶᤒᤡᤳᤇᤠᤛᤠ᤺ᤸᤗᤧ ᤁᤢᤶᤒᤠ ᤀᤡᤱᤎᤠᤱ ᤐᤡᤖᤢ᤹. ᤜᤧᤰᤁᤩᤠᤱ ᤛᤧᤘᤠᤖᤥᤒᤧᤸᤗᤧ ᤁᤢᤴᤍᤠᤱᤒᤧᤴ ᤀᤡᤱᤎᤠᤱ ᤐᤡᤖᤢ᤹॥ ᤀᤠᤱᤃᤠ᤹ ᤂᤧᤏᤡ᤹ ᤐᤠᤏᤢᤍᤡᤱ ᤐᤠᤀᤠ. ᤂᤧᤏᤡ᤹ ᤀᤠᤱᤃᤠ᤹ ᤌᤣᤀᤠᤱ ᤕᤠᤵᤔᤡ ᤀᤡᤱᤎᤠᤱ ᤁᤧᤶᤒᤡᤖᤡᤶᤒᤠᤒᤣ᥅ ᤀᤠᤱᤃᤠ᤹ ᤂᤧᤏᤡ᤹ ᤍᤠᤱᤒᤠᤀᤠ. ᤂᤧᤏᤡ᤹ ᤀᤠᤱᤃᤠ᤹ ᤌᤣᤀᤠᤱ ᤕᤠᤵᤔᤡ ᤁᤢᤏᤠᤃᤧᤴᤇᤠ᤹ᤖᤡᤶᤒᤠᤒᤣ᥅ “ᤂᤧᤏᤡ᤹ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤶ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤀᤠᤱᤃᤠ᤹ ᤕᤠᤵᤔᤡ ᤛᤧ᤺ᤴᤃᤧᤍᤥᤛᤡ᤹. ‘ᤀᤠᤰᤂᤣᤗ᤹ᤖᤡᤰ ᤀᤠᤏᤡᤃᤣ ᤂᤧᤏᤧ᤹ ᤁᤧᤔᤡᤱᤅᤡᤴ ᤏᤠᤔᤧᤴᤇᤠ᤹ ᤔᤧᤳᤋᤢᤶᤒᤧᤀᤠᤱ ᤘᤕᤡᤃᤧᤒᤣ᥅’

⁷ “ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤃᤡ ᤗᤧᤳᤋᤡ ᤔᤧᤍᤥᤴᤍᤢᤒᤠ ᤋᤧᤴᤏᤥ ᤂᤧᤏᤡ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤁᤧᤍᤥᤴᤍᤢᤶ᤹॥ “ᤁᤖ ᤂᤧᤏᤡ᤹ ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤕᤠᤵᤔᤡ ᤛᤧ᤺ᤴᤃᤧᤍᤥᤛᤡ. ‘ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤆᤡ᤺ᤴᤏᤠᤛᤡᤃᤧᤒᤣ᥅’” ᤁᤖ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹. “ᤀᤠᤱᤃᤠ᤹ ᤁᤢᤏᤠᤔᤧᤴᤇᤠ᤹ ᤕᤠᤵᤔᤡ ᤁᤧᤔᤧᤳᤋᤡᤀᤠᤱ ᤕᤠᤵᤔᤡ ᤁᤧᤈᤡ᤺ᤴᤍᤡ॥

⁸ ᤔᤡᤰᤑ᤺ᤶᤒᤠ ᤌᤰᤛᤠᤜᤠ᤹ ᤂᤧᤏᤡ᤹ ᤘᤕᤠᤃᤧᤴ ᤛᤡᤱᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤛᤡᤶᤔᤡᤸᤗᤧ ᤌᤣ ᤂᤧᤴ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤒᤥᤱᤏᤧᤶᤒᤡ᥅ ᤁᤢᤗᤠᤱ ᤁᤧᤛᤰᤐᤠ ᤏᤢ ᤁᤧᤍᤢᤰᤐᤠ ᤁᤧᤕ᤹ᤒᤠ ᤌᤰᤛᤠᤜᤠ᤹ ᤂᤧᤏᤡ᤹ ᤛᤡᤱᤍᤢᤱᤈᤓᤠ ᤋᤥ᤺ᤶᤔᤠᤛᤡ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤣ᤺ᤶᤒᤡ᥅ ᤜᤧᤰᤋᤱᤒᤠ ᤌᤰᤛᤠᤜᤠ᤹ ᤂᤧᤏᤡ᤹ ᤛᤢᤜᤠᤱᤃᤧᤶᤒᤠᤜᤠ᤹ ᤁᤧᤍᤥ᤺ᤴᤍᤢᤶ ᤁᤧᤒᤡᤖᤢᤶᤛᤡᤶᤔᤧᤸᤗᤧ ᤌᤣ ᤂᤧᤱᤜᤠ᤹ ᤂᤧᤏᤡ᤹ᤏᤢ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤒᤡ᥅ ᤌᤣ ᤂᤧᤱᤜᤠ᤹ᤖᤧ ᤜᤧᤰᤋᤱᤒᤠ ᤌᤰᤛᤠᤜᤠ᤹ ᤔᤧᤍᤠ᤺ᤰᤋᤢᤛᤡᤒᤡ᥅” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁹ “‘ᤀᤠᤏᤡᤃᤣ ᤗᤢᤱᤔᤠ᤹ ᤀᤠᤍᤢᤰᤋᤧ᤹’ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤐᤣᤗᤡ ᤑᤠᤰᤋᤧᤶᤔᤧ᤹॥ ᤂᤧᤏᤡ᤹ ᤜᤢᤰᤁᤡᤸᤗᤧ ᤀᤰᤋᤱᤒᤠᤀᤣ ᤜᤢᤰᤛᤥᤕᤠᤱ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤌᤣ ᤂᤢᤏᤧ᤹ ᤁᤧᤍᤠ᤺ᤰᤋᤡᤒᤡ᥅” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁰ “ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤥ ᤗᤧᤳᤋᤡ ᤔᤧᤍᤥᤴᤍᤢᤒᤠᤍᤧᤴᤏᤥ ᤂᤧᤏᤡ᤹ ᤌᤣᤏᤠᤎᤣ ᤔᤡ ᤔᤧᤴᤜᤠ᤺ᤶᤔᤠᤖᤧ ᤗᤠᤃᤡ ᤂᤧᤏᤡ᤹ᤀᤥ ᤁᤢᤓᤠᤖᤧ ᤔᤠᤱᤜᤡᤶᤔᤥᤒᤠ ᤗᤠᤶᤎᤣ᤺ᤳᤜᤠ᤹ ᤁᤧᤛᤢᤒᤢᤶᤔᤡᤸᤗᤧ ᤏᤢ᤹ᤔᤧᤴ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤡ᤹ᤏᤢ ᤀᤠᤏᤡᤱᤘᤠ᤹ ᤋᤢᤃᤧᤀᤠᤱ ᤘᤠ᤹. ᤂᤧᤏᤡ᤹ ᤜᤢᤰᤁᤡᤸᤗᤧ ᤁᤧᤍᤥ᤺ᤴᤍᤢᤶᤒᤠ ᤜᤢᤰᤛᤥᤕᤠᤱᤅᤡᤴ ᤀᤠᤱᤃᤠ᤹ ᤔᤧᤍᤠ᤺ᤰᤁᤠᤴ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹¹ “ᤏᤠᤶᤃᤧᤳ ᤐᤡᤛᤠᤱ ᤏᤢ ᤏᤠᤶᤎᤠ ᤐᤡᤛᤠᤱ ᤌᤠᤖᤡᤰ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤐᤕᤶ ᤕᤶᤒᤠ ᤐᤥᤱ᤹॥ ᤁᤧᤖᤧᤰ ᤋᤧᤴᤜᤠ᤹ᤀᤥ ᤀᤠᤱᤃᤠ᤹ ᤀᤠᤔᤡᤱᤅᤥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤛᤢᤰᤐᤠ ᤔᤧᤜᤠ᤺ᤴᤍᤢ᤹ ᤜᤧᤰᤁᤩᤠᤱ ᤛᤢᤳᤌᤥ ᤜᤢᤰᤛᤥᤕᤠᤱ ᤔᤧᤍᤠᤖᤢ᤹. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹² “ᤁᤖ ᤂᤧᤏᤡ᤹ᤃ ‘ᤕᤜᤘᤣ ᤍᤠᤱᤒᤠᤀᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤆᤡ᤺ᤴᤈᤡᤴ ᤁᤧᤄᤢᤒᤠ ᤆᤥᤰ.’ ᤜᤧᤰᤁᤩᤠᤱ ‘ᤂᤧ᤹ᤕᤥ ᤁᤧᤏᤧᤒᤠ ᤂᤧᤴ ᤆᤠᤔᤠ ᤌᤢᤱᤔᤠᤜᤠ᤹ ᤆᤡ᤺ᤴᤈᤡᤴ ᤁᤧᤄᤢᤒᤠ ᤆᤥᤰ’ ᤁᤧᤗ᤹ᤖᤡᤀᤠᤱ ᤀᤠᤱᤃᤠ᤹ ᤀᤠᤔᤡᤱᤅᤡᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢᤶ॥

¹³ ᤜᤧᤰᤁᤩᤠᤱ ᤂᤧᤏᤡ᤹ ᤀᤰᤂᤣᤀᤠᤱ ᤁᤧᤒᤠ᤺ᤳᤋᤢᤶ᤹. ‘ᤁᤱᤃ ᤀᤠᤰᤋᤱᤒᤠ ᤀᤠᤏᤠᤏᤠᤒᤠ ᤕᤠ᤺ᤶᤒᤰᤏᤡᤒᤣ. ᤁᤧᤗ᤹ᤖᤡᤀᤠᤱ ᤂᤧᤏᤡ᤹ ᤏᤠ᤺ᤴ ᤁᤧᤃᤡ᤺ᤴᤍᤢᤶ᤹’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ‘ᤁᤧᤃᤠ᤺ᤶᤒᤠ. ᤁᤢᤗᤠᤱ ᤁᤧᤛᤰᤐᤠ ᤏᤢ ᤁᤧᤍᤢᤰᤐᤠ ᤌᤰᤛᤠᤐᤢᤛᤠᤜᤠ᤹ ᤛᤡᤍᤢᤱᤈᤓᤠ ᤜᤧᤰᤁᤣ ᤁᤧᤍᤥ᤺ᤴᤍᤢᤶᤛᤡᤶ. ᤌᤣ ᤂᤧᤏᤡ᤹ ᤜᤢᤰᤗᤠᤶᤒᤠ ᤁᤧᤍᤥ᤺ᤴᤍᤢᤶᤒᤠ ᤀᤰᤋᤱᤒᤠ ᤜᤢᤰᤛᤥᤕᤠᤱᤜᤠ᤹ ᤀᤠᤱᤃᤠ᤹ ᤋᤠ᤺ᤰᤋᤢᤱᤒᤠᤒᤡ᥅’ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁴ “ᤁᤖ ᤀᤰᤂᤣᤗ᤹ᤖᤡᤰ ᤀᤡᤱᤗᤧᤰ ᤁᤧᤈᤥᤰᤐᤧᤴ ᤛᤠᤱᤃᤪᤠ ᤔᤠᤱᤍᤣ ᤌᤠᤖ. ᤂᤧᤴ ᤔᤏᤠ᤺ᤸᤗᤧ ᤀᤠᤒᤠᤅᤣ ᤁᤢᤎᤰᤛᤠ ᤗᤢᤵᤐᤥᤒᤠ ᤋᤠ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤁᤢᤶᤒᤠᤒᤠ ᤌᤰᤛᤠᤴ ᤋᤥ᤺ᤶᤔᤠᤖᤧ ᤗᤠᤃᤡ ᤔᤠᤱᤜᤢᤵ ᤆᤥᤃᤢ᤹. ᤁᤖ ᤁᤧᤃᤠ᤺ᤶᤒᤠ ᤌᤰᤛᤠᤴ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤴᤍᤢ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤕᤶ ᤕᤶᤒᤠ ᤜᤠᤱᤀᤠ. ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤱᤃᤠ᤹ᤏᤢ ᤔᤧᤃᤡᤀᤠᤱ ᤔᤡᤱᤛᤥ ᤀᤡᤱᤎᤠᤱ ᤔᤧᤒᤡᤀᤠᤖᤥ.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥