ᤗᤢᤁᤠ 9 - LIFOTNT

ᤕᤧᤛᤢᤖᤧ ᥇᥈ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤡᤱᤓᤴ ᤛᤧᤛᤧ ᤐᤠᤱᤄᤢᤛᤡ᤹

¹ ᤀᤠᤸᤗ ᤕᤧᤛᤢᤖᤧ ᤌᤡᤰᤏᤧᤳ (᥇᥈) ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤢᤒᤣᤛᤠᤱ ᤀᤢ᤺ᤳᤋᤢᤛᤡᤀᤠᤱ ᤁᤧᤖᤧᤰ ᤑᤧᤴᤛᤠᤶᤜᤠ᤹ ᤏᤠ᤺ᤵᤔᤠ ᤗ᤺ᤵᤔᤠ ᤏᤢ ᤁᤧᤍᤢᤰᤐᤠᤜᤠ᤹ ᤘᤣ᤺ᤶᤔᤠ ᤔᤢᤰᤛᤠᤶ ᤏᤢ ᤕᤢᤰ ᤐᤡᤖᤢᤛᤡᤀᤠᤱ

² ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤢᤏᤠᤀᤡᤱ ᤛᤧᤛᤧ ᤏᤢ ᤁᤧᤍᤢᤰᤐᤠᤜᤠ᤹ ᤘᤣ᤺ᤴᤇᤧ ᤐᤠᤱᤄᤢᤍᤣᤛᤢᤛᤡᤖᤥ॥

³ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤁᤧᤒᤣᤃᤡᤸᤗᤧ ᤋᤰᤁᤠᤳ. ᤛᤢ᤺ᤰᤘᤠ. ᤆᤠᤔᤠ ᤆᤠ. ᤕᤠᤱ. ᤜᤧᤰᤁᤩᤠᤱ ᤘᤣ᤹ ᤗᤧᤰᤛᤡᤱᤔᤠ ᤆᤠᤱ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ॥

⁴ ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤁᤧᤶᤒᤡᤖᤡ᤹. ᤂᤧᤴ ᤐᤠᤱᤈᤢᤶᤔᤡᤴ ᤔᤧᤸᤗᤧᤳᤋᤣ ᤌᤠᤖᤡᤰ ᤂᤧᤴ ᤜᤡᤶᤔᤥᤀᤣ ᤕᤠ᤺ᤰᤋᤧᤶᤔᤧ᤹.

⁵ ᤁᤖ ᤔᤏᤠᤜᤠ᤹ᤖᤧ ᤂᤡᤏᤡ᤹ ᤗᤠᤶᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴᤏᤧ ᤑᤠ᤹ᤃᤪ ᤂᤧᤴ ᤐᤠᤱᤈᤢᤶᤔᤡᤴ ᤁᤧᤗᤧᤖᤢᤶᤔᤡᤸᤗᤧ ᤂᤡᤏᤡ᤹ ᤗᤠᤱᤅᤥ ᤁᤧᤄᤡᤵᤐᤠ ᤂᤠᤶᤜᤡ᤺ᤰᤁᤡᤴ ᤌᤠᤵᤛᤧᤶ ᤌᤩᤧᤶᤔᤧ᤹॥ ᤁᤱᤃ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤁᤧᤒᤥᤱᤒᤠ ᤔᤡᤰᤛᤣ᤺ᤴᤗᤥ॥”

⁶ ᤜᤧᤰᤁᤩᤠᤱ ᤂᤧᤱᤜᤠ᤹ ᤐᤠᤱᤓᤣ᤹ ᤐᤠᤱᤓᤣ᤹ᤀᤥ ᤔᤧᤒᤣᤀᤠᤱ ᤛᤢᤏᤠᤀᤡᤱ ᤔᤧᤛᤧᤛᤢᤀᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤔᤧᤘᤣ᤺ᤴᤍᤢᤛᤡᤖᤥ॥

⁷ ᤀᤠᤸᤗ ᤃᤠᤗᤡᤗ ᤌᤢᤶᤔᤥᤒᤠ ᤛᤢᤜᤠᤱᤃᤧᤶᤒᤠ ᤜᤧᤖᤥᤍ ᤀᤣᤴᤋᤡᤐᤠᤛᤖᤧ ᤁᤴ ᤁᤧᤖᤧᤰ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤂᤧᤵᤛᤢᤀᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤔᤕᤧ. ᤌᤣᤀᤠᤱᤓᤧᤸᤗᤧ ᤁᤢᤓᤠᤖᤧ “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ᤖᤥ” ᤔᤧᤒᤠ᤺ᤳᤋᤢ॥

⁸ ᤘᤣ᤹ᤜᤠ᤹ᤖᤧ “ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤕᤠᤶᤔᤥ ᤗ᤺ᤴᤍᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ ᤔᤏᤠᤜᤠ᤹ᤖᤧ “ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤎᤡᤰ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢᤖᤥ॥

⁹ ᤜᤧᤰᤁᤣ᤺ᤸᤗᤧ ᤜᤧᤖᤥᤍᤖᤧ ᤐᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤱᤃ ᤁᤢᤏᤡ᤺ᤱᤔᤠᤴ ᤂᤰ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ. ᤁᤖ ᤀᤠᤰᤂᤣᤗ᤹ᤖᤡᤰ ᤕᤠᤶᤔᤥ ᤜᤡᤅᤧᤒᤣ᥅ ᤀᤡᤱᤃᤠ᤹ ᤁᤴ ᤌᤣ᤺ᤴᤏᤧ ᤂᤧᤵᤛᤢᤱᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥

ᤕᤧᤛᤢᤖᤧ ᥋.᥆᥆᥆ ᤔᤏᤠᤜᤠ᤹ ᤆᤠ ᤆᤠ᤺ᤳᤋᤢᤛᤡ᤹

¹⁰ ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤕᤧᤛᤢᤴ ᤔᤧᤈᤧᤰᤋᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤒᤧᤌᤛᤣᤍᤠ ᤐᤠᤱᤈᤢᤶ ᤗᤧᤵᤔᤠᤱ ᤛᤫᤠ᤺ᤳᤋᤠᤱ ᤋᤣ᤹ᤖᤢᤛᤡᤀᤠᤱ ᤐᤣ.

¹¹ ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤏᤡᤱᤘᤠ᤹ ᤔᤧᤄᤥᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤀᤣᤃᤠᤱ ᤔᤧᤎᤠᤛᤡᤱ॥ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠᤶᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤒᤠ ᤐᤠ᤺ᤴᤜᤠ᤹ ᤆᤧᤰᤋᤢᤛᤡ. ᤜᤧᤰᤁᤩᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡ॥

¹² ᤜᤧᤰᤁᤩᤠᤱ ᤏᤠᤶᤎᤩᤧᤖ ᤐᤳᤇᤧᤸᤗᤧ ᤌᤡᤰᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤁᤴ ᤔᤏᤠᤜᤠ᤹ ᤐᤠᤱᤄᤧᤍᤣᤛᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤴ ᤂᤡᤖᤡᤒᤠ ᤐᤠᤱᤈᤢᤶᤔᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤎᤥ᤺ᤰᤔᤠᤖᤧᤴ ᤋᤱᤃᤠᤶ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤣ᤺ᤰᤛᤠᤍᤧᤴᤏᤥ ᤀᤠᤘᤠ᤹ᤖᤥ॥”

¹³ ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ॥” ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤧᤃ ᤅᤠᤛᤡ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤖᤰ ᤁᤳᤋᤢᤶᤒᤧᤖᤥ॥ ᤘᤣ᤹ ᤌᤣᤀᤠᤱ ᤜᤥᤵ॥ ᤘᤣ᤹ ᤂᤖᤧ᤺ᤱ ᤔᤧᤴᤀᤡᤱᤅᤣ ᤁᤴ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”

¹⁴ (ᤂᤧᤵᤔᤥ ᤜᤧᤴᤇᤡᤱ ᤅᤠᤛᤡ ᤕᤠᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ ᤔᤧᤘᤕᤧᤖᤥ॥) ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤅᤠᤃᤡᤵᤖᤧᤴ ᤗᤢᤵᤐᤥ ᤌᤧ᤺ᤰᤐᤧᤳᤋᤠᤱ ᤕᤢᤱᤔᤠ ᤐᤠᤱᤄᤧᤶᤛᤡᤶᤔᤧ᤹॥”

¹⁵ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤒᤠ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ ᤔᤧᤕᤢᤰᤂᤢᤛᤡ॥

¹⁶ ᤕᤧᤛᤢᤖᤧ ᤅᤠᤛᤡ ᤂᤖᤧ᤺ᤱᤜᤠ᤹ ᤏᤢ ᤏᤧᤳᤇᤡ ᤅᤠᤜᤠ᤹ ᤐᤰᤂᤢᤀᤠᤱ ᤌᤥ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤖ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤧᤴ ᤂᤖᤧ᤺ᤱᤜᤠ᤹ ᤏᤢ ᤅᤠᤜᤠ᤹ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤐᤡᤖᤢᤛᤡ॥

¹⁷ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤔᤧᤏᤴᤇᤢᤒᤠ ᤁᤢᤈᤡᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ ᤏᤀᤡᤔᤠ ᤕᤥᤖᤧᤖᤥ॥

ᤕᤧᤛᤢᤴ ᤜᤠ᤺ᤵᤐᤣ᥅

¹⁸ ᤌᤡᤰᤕᤧᤴ ᤕᤧᤛᤢᤴ ᤀᤣ᤺ᤰᤛᤠᤍᤧᤴᤏᤥ ᤋᤢᤘᤠ ᤆᤥ᤺ᤰᤏᤢ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧ॥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹ᤒᤣ᥅”

¹⁹ ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤂᤧᤏᤧ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤏᤢ ᤘᤣ᤹ᤜᤠ᤹ᤖᤧᤃ ᤀᤣᤗᤡᤕᤠ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥ ᤁᤢᤓᤠᤖᤧᤃ ᤀᤢᤴᤇᤥ᤺ᤴᤒᤠ ᤘᤣ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤎᤡᤰ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥”

²⁰ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅” ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ᤹ᤖᤥ॥”

ᤕᤧᤛᤢᤖᤧ ᤀᤠᤒᤠᤅᤣ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

²¹ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡ॥

²² ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤕᤖᤡᤰ ᤋᤢᤰᤂᤣᤜᤠ᤹ ᤋᤢᤶᤔᤠ ᤐᤥᤱ॥ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ. ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤀᤠ॥ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤔᤧᤛᤧᤳᤋᤠᤀᤠᤱ ᤛᤢᤶᤕᤧᤴ ᤀᤣᤃᤠᤱ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠᤖᤥ॥”

²³ ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤌᤡᤰᤕᤠ᤺ᤴᤎᤰ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥

²⁴ ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥᤛᤢ᤹ᤖᤥ॥

²⁵ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤛᤠᤱ ᤁᤢᤜᤡᤱᤔᤴᤏᤡᤴ ᤔᤠ᤺ᤛᤢᤏᤧ ᤑᤠ᤹ᤃᤪ ᤏᤢᤒᤠ ᤐᤥᤱᤒᤡ᥅

²⁶ ᤀᤠᤳᤋᤡᤴ ᤔᤏᤠᤴ ᤀᤡᤱᤃᤠ᤹ᤏᤢ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴᤏᤢ ᤛᤡᤖᤡᤱ ᤔ᤹᤺. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤠᤔᤡᤔᤡᤍᤡᤱᤏᤢ. ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤏᤢ ᤜᤧᤰᤁᤩᤠᤱ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤏᤢ ᤕᤢᤀᤠᤸᤗᤧ ᤂᤧᤴᤏᤡᤴ ᤀᤠᤔᤏᤠ ᤐᤠ᤺ᤵᤔᤠ ᤛᤡᤖᤡᤱ ᤔᤀᤠᤖᤥ॥

²⁷ ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤕᤢᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”

ᤕᤧᤛᤢᤖᤧ ᤁᤢᤎᤰᤁᤡᤴ ᤗᤧᤱᤛᤡᤱ

²⁸ ᤂᤧᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤒᤠ ᤕᤧᤳᤇᤡ (᥎) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤢᤜᤢᤴᤏᤠ ᤏᤢ ᤕᤠᤁᤢᤒᤧᤴ ᤋᤣ᤹ᤖᤢᤛᤡᤀᤠᤱ ᤁᤥ᤺ᤰᤔᤠᤀᤥ ᤌᤥ ᤋᤢᤘᤠ ᤆᤥ᤺ᤰᤛᤧ ᤐᤣ॥

²⁹ ᤂᤢᤏᤧ᤹ ᤋᤢᤘᤠ ᤆᤥ᤺ᤰᤏᤢ ᤐᤳᤇᤧᤸᤗᤧ ᤁᤢᤏᤠᤖᤠᤴ ᤗᤧᤰᤛᤡᤱᤗ ᤐᤣᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤔᤡᤰ ᤁᤧᤈᤧᤶᤒᤠ ᤑᤃᤧᤗ᤹ᤒᤠ ᤐᤥ᤺ᤰᤂᤧᤖ ᤗᤧᤰᤋᤧᤖᤥ॥

^30-31 ᤜᤧᤰᤁᤩᤠᤱ ᤂᤧᤵᤔᤥ ᤏᤧᤵᤑᤢ ᤔᤏᤠᤜᤠ᤹ ᤛᤠᤱᤃᤪᤠᤶᤃᤧᤴ ᤀᤥ᤺ᤳᤋᤡᤒᤠ ᤔᤡᤔᤡᤍᤡᤱᤅᤥ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢᤴ ᤏᤢ ᤋᤠ᤹ᤈᤧᤰᤂᤧᤳᤇᤡ॥ ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠᤴ ᤏᤢ ᤔᤥᤛᤠᤴ ᤘᤕᤧᤳᤇᤡᤖᤥ॥ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤛᤡᤔᤧᤴ ᤏᤢ ᤕᤖᤢᤛᤗᤧᤶᤔᤥ ᤆᤥ᤺ᤰᤔᤠ ᤛᤢ᤺ᤵᤔᤠ ᤀᤡ᤺ᤳᤋᤧᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤔᤧᤈᤧᤰᤂᤧ॥

³² ᤐᤋᤪᤢᤛ ᤏᤢ ᤁᤢᤴᤈᤢᤶᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ. ᤁᤖ ᤂᤧᤱᤜᤠ᤹ ᤋᤠᤍᤠᤵ ᤗ᤹ᤖᤡᤰ ᤔᤧᤛᤥᤖᤧᤸᤗᤧ ᤕᤧᤛᤢᤖᤧ ᤁᤢᤔᤡᤔᤡᤍᤡᤱᤅᤡᤴ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤕᤧᤒᤧᤳᤇᤡᤒᤠ ᤔᤧᤏᤡᤛᤢ॥

³³ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢᤴ ᤐᤰᤌᤩᤧᤛᤢᤀᤠᤱ ᤐᤣᤛᤡᤖ ᤐᤳᤇᤧᤳᤇᤡᤸᤗᤧ ᤐᤋᤪᤢᤛᤖᤧ ᤕᤧᤛᤢᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢᤒᤠ ᤐᤥᤱᤗᤥ॥ ᤀᤠᤏᤡᤃᤣ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧ᤹. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰᤌᤡᤰ ᤆᤥᤃᤢᤶᤒᤧ᤹ᤖᤥ᥄” (ᤁᤖ ᤂᤢᤏᤧ᤹ ᤌᤣ᤺ᤴ ᤐᤠ᤺ᤳᤋᤢᤱᤒᤣ ᤑᤠ᤹ᤀᤠᤱ ᤌᤣᤀᤠᤱ ᤁᤢᤏᤡᤱᤘᤠ᤹ ᤔᤧᤕᤠᤃᤧᤴ॥)

³⁴ ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤂᤧᤵᤔᤥ ᤂᤠᤵᤔᤡ᤺ᤳᤋᤡᤸᤗᤧ ᤂᤧᤱᤜᤠ᤹ ᤋᤧᤵᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

³⁵ ᤂᤠᤵᤔᤡ᤺ᤳᤋᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤛ᤻ᤛᤠᤖᤥ. ᤂᤢᤏᤧ᤹ᤀᤣ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ᥄ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”

³⁶ ᤂᤧᤴ ᤀᤡᤰᤗᤠᤴ ᤐᤠᤖᤧ ᤆᤢᤖᤧᤀᤠᤱ ᤂᤧᤵᤔᤥ ᤕᤧᤛᤢᤴ ᤗᤰ ᤔᤧᤏᤡᤛᤢᤖᤥ॥ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤕᤢᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤳᤋᤢᤴᤇᤡᤴᤗᤥ॥

ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤀᤅᤧ᤺ᤰᤘᤠᤴ

³⁷ ᤁᤢᤍᤠ᤺ᤴᤍᤡᤰᤔᤠ ᤕᤧᤛᤢᤴ ᤏᤢ ᤂᤧᤴ ᤜᤢ᤹ᤛᤠᤶᤒᤠᤜᤠ᤹ ᤁᤥ᤺ᤰᤔᤠᤀᤥᤏᤢ ᤕᤥ ᤔᤧᤎᤩᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤍᤢᤔᤢᤛᤡᤖᤥ॥

³⁸ ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤁᤢᤛ᤻ᤛᤠ ᤆᤢᤰᤐᤧᤴ ᤑᤧᤳᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠᤴ ᤀᤥᤔᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤗᤳᤌᤡᤰᤗᤰ ᤀᤠᤛ᤻ᤛᤠᤖᤥ॥

³⁹ ᤀᤧᤳᤗᤧᤱ ᤑᤧᤴᤛᤠᤶᤔᤡᤸᤗᤧ ᤑᤳᤋᤢ. ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤛᤸᤗᤡᤰ ᤛᤴᤇᤡᤱᤗᤥ॥ ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤁᤢᤎᤩᤠ᤺ᤳ ᤗ᤺ᤳᤋᤢᤖᤥ॥ ᤑᤧᤴᤛᤠᤶᤔᤡᤸᤗᤧ ᤛᤵᤑᤠ ᤛᤵᤑᤠᤖᤰ ᤗᤧᤖᤢᤀᤠᤱ ᤂᤢᤏᤧ᤹ᤃ ᤔᤧᤱᤔᤠ ᤀᤡᤋᤢᤀᤠᤱ ᤘᤠ᤹ᤖᤥ॥

⁴⁰ ᤀᤡᤱᤃᤠ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤁᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”

⁴¹ ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤛᤠᤴ ᤁᤧᤜᤥᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤀᤠᤱ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”

⁴² ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤕᤧᤛᤢᤴ ᤗᤧᤵᤔᤠᤱ ᤐᤣᤖ ᤐᤳᤇᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤀᤠᤱ ᤐᤡᤷᤎᤠᤵ ᤌᤠᤵᤛᤢ. ᤁᤖ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤘᤣ᤺ᤴᤍᤢᤀᤠᤱ ᤁᤢᤶᤒᤠ ᤐᤡᤖᤢᤖᤥ॥

⁴³ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤔᤧᤏᤡᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ.

ᤕᤧᤛᤢᤖᤧ ᤁᤢᤛᤡᤔᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤐᤠ᤺ᤳᤋᤢ᤹

⁴⁴ “ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ-ᤀᤠᤸᤗ ᤔᤧᤴᤇᤠᤶᤛᤠᤴ ᤀᤡᤱᤔᤧᤗᤧᤰᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤖᤥ॥”

⁴⁵ ᤁᤖ ᤕᤧᤛᤢᤖᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤐᤠ᤺ᤴᤏᤡᤴ ᤂᤢᤏᤡ᤹ᤀᤥᤗᤠᤶ ᤔᤠ᤹ᤖᤧᤀᤠᤱ ᤘᤕᤧ॥ ᤂᤧᤱᤜᤠ᤹ᤖᤧ ᤕᤠᤶᤔᤥ ᤛᤣ᤺ᤴᤍᤥᤔᤠᤀᤠᤱ ᤔᤧᤃᤡᤛᤧᤖᤥ॥

ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤵᤐᤣ᥅

⁴⁶ ᤜᤧᤰᤁᤩᤠᤱ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤠᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠ ᤜᤠ᤺ᤵᤐᤣ ᤑᤠ᤹ᤀᤠᤱ ᤐᤠᤴ ᤔᤧᤎᤰᤋᤧ॥

⁴⁷ ᤁᤖ ᤕᤧᤛᤢᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤏᤡᤛᤢᤀᤠᤱ ᤆᤢᤰᤐᤠ ᤜᤡᤴᤈᤠ᤹ᤎᤡᤰ ᤑᤧᤳᤋᤢᤀᤠᤱ ᤂᤢᤏᤡ᤹ ᤋᤃᤡ ᤕᤧᤵᤛᤢᤖᤥ॥

⁴⁸ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤠᤔᤡᤱᤅᤥ ᤀᤰᤋᤱᤒᤠ ᤆᤢᤰᤛᤠ ᤜᤡᤴᤈᤠ᤹ᤀᤡᤴ ᤗᤠᤶᤍᤠ᤺ᤰᤋᤢ᤹. ᤂᤧᤸᤗᤧ ᤀᤡᤱᤃᤠ᤹ ᤗᤠᤶᤍᤠ᤺ᤰᤁᤠᤖᤥ॥ ᤀᤡᤱᤃᤠ᤹ ᤕᤠᤵᤔᤡ ᤗᤠᤱᤃᤧᤍᤠ᤺ᤰᤐᤠᤸᤗᤧ ᤀᤡᤱᤃᤠ᤹ ᤕᤠᤵᤔᤡ ᤁᤧᤒᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤠᤱ ᤗᤠᤶᤍᤠ᤺ᤰᤋᤢ᤹॥ ᤀᤠᤳᤋᤡᤴ ᤂᤡᤏᤡ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤆᤢᤰᤛᤠ ᤆᤥᤰ. ᤂᤧᤴᤏᤣ ᤁᤧᤖᤧᤰᤏᤢ᤺ᤸᤗᤧ ᤕᤶᤒᤠᤖᤥ॥”

⁴⁹ ᤜᤧᤰᤁᤩᤠᤱ ᤕᤢᤜᤢᤴᤏᤠ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤀᤠᤏᤡᤃᤣ ᤗᤳᤇᤠ ᤔᤏᤠᤎᤡᤰᤗᤧ ᤂᤧᤏᤧ᤹ ᤁᤧᤔᤡᤱᤅᤥ ᤑᤧᤴᤛᤠᤶᤜᤠ᤹ ᤏᤠ᤺ᤳᤋᤢ ᤗ᤺ᤳᤋᤢᤛᤡᤖ ᤐᤳᤇᤧᤒᤠ ᤏᤡᤛᤢᤶᤒᤧᤀᤠᤱ ᤀᤠᤏᤡᤃᤣ ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤒᤠᤱᤄᤢᤶᤒᤧᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤏᤡᤃᤧᤏᤢ ᤌᤡᤰᤜᤢᤵᤐᤥ ᤔᤧᤘᤠ᤹ᤏᤧᤴᤗᤥ॥”

⁵⁰ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤂᤧᤴ ᤜᤧᤰᤁᤣ ᤆᤥ᤺ᤰᤔᤠ ᤔᤧᤛᤠᤰᤋᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤜᤠᤳ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤜᤥᤵ. ᤂᤧᤴ ᤂᤡᤏᤡ᤹ ᤗᤧᤵᤔᤠᤱ ᤘᤠ᤹ᤖᤥ॥”

ᤛᤠᤔᤖᤡᤜᤠ᤹ᤖᤧ ᤕᤧᤛᤢᤴ ᤔᤧᤏᤠ᤹ᤖᤢ

⁵¹ ᤜᤧᤰᤁᤩᤠᤱ ᤂᤢᤏᤧ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤒᤣ᤺ᤰᤔᤠ ᤕᤧᤶ ᤋᤩᤧᤖ ᤐᤳᤇᤧᤒᤠᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ॥

⁵² ᤂᤢᤏᤧ᤹ ᤀᤡᤱᤛᤠᤒᤠᤜᤠ᤹ ᤋᤃᤡ ᤐᤠᤱᤄᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤀᤠᤱ ᤛᤠᤔᤖᤡᤜᤠ᤹ᤖᤧ ᤂᤢᤏᤡ᤹ ᤐᤠᤱᤓᤣ᤹ᤀᤥ ᤆᤠᤔᤠ ᤌᤢᤱᤔᤠ ᤏᤢ ᤛᤧᤴᤍᤡᤰ ᤕᤠᤱᤎᤥ᤺ᤰᤛᤧ ᤔᤧᤒᤣ.

⁵³ ᤁᤖ ᤛᤠᤔᤖᤡᤜᤠ᤹ᤖᤧ ᤂᤢᤏᤧ᤹ ᤗᤠᤶᤍᤠ᤺ᤰᤔᤠ ᤔᤧᤶᤒᤡᤖᤢᤴ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤕᤖᤢᤛᤗᤧᤔ ᤗᤧᤵᤔᤠᤱ ᤐᤣᤖ ᤐᤳᤇᤧ॥

⁵⁴ ᤜᤧᤰᤁᤣ᤺ᤸᤗᤧ ᤂᤧᤴ ᤏᤡᤛᤧᤳᤇᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤕᤠᤁᤢᤒ ᤏᤢ ᤕᤢᤜᤢᤴᤏᤠᤖᤧ ᤕᤧᤛᤢᤴ ᤛᤣ᤺ᤴᤍᤥᤛᤧᤳᤇᤢ. “ᤀᤠᤍᤠᤱᤒᤣ. ᤀᤠᤏᤡᤃᤣ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤠ᤺ᤛᤢᤶᤒᤧᤀᤠᤱ ᤁᤴ ᤐᤠᤱᤓᤣ᤹ᤀᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤶᤒᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤧᤈᤥᤃᤢᤒᤡ᥅”

⁵⁵ ᤁᤖ ᤕᤧᤛᤢᤖᤧ ᤜᤡᤛᤡᤱᤅᤠᤱ ᤑᤧ᤺ᤰᤋᤢᤛᤡ॥

⁵⁶ ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤘᤣ᤹ᤛᤔᤠ ᤐᤠᤱᤓᤣ᤹ᤀᤥ ᤔᤧᤒᤣᤖᤥ॥

ᤕᤧᤛᤢᤴ ᤏᤠ᤺ᤵᤔᤠᤸᤗᤧ ᤁᤢᤔᤧᤸᤗᤢᤱ

⁵⁷ ᤜᤧᤰᤁᤩᤠᤱ ᤗᤠᤶᤔᤥ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤗᤠᤱᤔᤧᤄᤣᤃᤧᤖ ᤔᤧᤒᤳᤇᤧᤸᤗᤧ ᤔᤏᤠᤎᤡᤰ ᤋᤩᤧᤀᤠᤱ ᤂᤢᤏᤧ᤹ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤂᤧᤏᤧ᤹ ᤀᤠᤳᤋᤡ ᤁᤧᤒᤣ᤺ᤰᤛᤠᤱ ᤂᤧᤏᤧ᤹ᤏᤢ ᤐᤣ᤺ᤰᤁᤠᤖᤥ॥”

⁵⁸ ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤁᤡᤍᤡ᤺ᤵᤐᤠᤜᤠ᤹ᤖᤧ ᤗᤢᤱᤄᤢᤖᤡ ᤔᤧᤃᤳᤋᤢ᤹. ᤐᤢᤛᤠᤜᤠ᤹ᤖᤧ ᤜᤠᤵ ᤔᤧᤃᤳᤋᤢ᤹. ᤁᤖ ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧᤃ ᤌᤧᤃᤣᤰ ᤏᤧᤔᤠ ᤋᤧᤴᤏᤠᤱ ᤔᤧᤃᤳᤋᤠᤴᤗᤥ॥

⁵⁹ “ᤜᤧᤰᤁᤩᤠᤱ ᤕᤧᤛᤢᤖᤧ ᤘᤣ᤹ᤛᤔᤠ ᤔᤏᤠᤴ ᤔᤧᤳᤋᤢ. ‘ᤀᤡᤱᤃᤠ᤹ ᤋᤡᤶᤍᤠᤱᤅᤧ᤹ᤀᤥ॥’” ᤁᤖ ᤂᤧᤴ ᤔᤏᤠ᤺ᤸᤗᤧ ᤏᤥᤃᤵ ᤐᤡᤖᤢ. “ᤀᤠᤍᤠᤱᤒᤣ. ᤋᤃᤡ ᤀᤡᤱᤃᤠ᤹ ᤐᤣ᤺ᤰᤁᤠ ᤜᤧᤰᤁᤩᤠᤱ ᤐᤠᤏᤢᤍᤡᤱ ᤀᤠᤶᤒᤠᤴ ᤀᤡ᤺ᤵᤐᤢᤱᤅᤥ ᤆᤡᤱᤔᤠ ᤐᤠᤱᤄᤠᤱᤅᤧ᤹ᤀᤥ॥”

⁶⁰ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤜᤠᤖᤠ᤹ ᤆᤣᤜᤠ᤹ᤖᤧ ᤂᤢᤏᤡ᤹ ᤆᤣᤜᤠ᤹ ᤀᤡ᤺ᤵᤐᤢᤱᤅᤥ ᤔᤧᤈᤡᤰᤂᤢᤛᤡᤖ. ᤁᤖ ᤂᤧᤏᤧ᤹ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤓᤴ ᤛᤧᤛᤧ᤹ᤀᤥ॥”

⁶¹ ᤜᤧᤰᤁᤩᤠᤱ ᤘᤣ᤹ᤛᤔᤠ ᤔᤏᤠᤴ ᤋᤩᤧᤀᤠᤱ ᤕᤧᤛᤢᤴ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤡᤱᤃᤠ᤹ ᤂᤧᤏᤧ᤹ ᤏᤠ᤺ᤳᤏᤧ᤹ᤖᤥ. ᤁᤖ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤀᤡᤱᤃᤠ᤹ ᤀᤠᤜᤡᤶᤛᤕᤱᤜᤠ᤹ᤏᤢ ᤛᤧᤶᤔᤢ᤹ᤀᤡ ᤆᤥ᤺ᤰᤛᤧ ᤐᤠᤱᤄᤠᤱᤅᤧ᤹ᤀᤥ॥”

⁶² ᤁᤖ ᤕᤧᤛᤢᤖᤧ ᤂᤧᤴ ᤏᤥᤃᤵ ᤐᤡᤖᤢ. “ᤜᤠ᤺ᤳᤗᤧ ᤁᤢᤜᤢᤰᤁᤡᤴ ᤁᤧᤰᤆᤢᤀᤥ ᤑᤳᤇᤢᤀᤠᤱ ᤀᤣᤃᤠᤱ ᤀᤥᤔᤧᤳᤋᤢ. ᤂᤧᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤗᤠ᤹ᤖᤢᤴᤗᤥ॥”