ᤗᤢᤁᤠ 8 - LIFOTNT

ᤕᤧᤛᤢᤴ ᤁᤢᤓᤠ᤹ ᤁᤧᤒᤡᤔᤠ ᤔᤧᤴᤇᤢᤔᤠᤜᤠ᤹

¹ ᤂᤧᤴ ᤀᤣᤃᤠᤱ ᤕᤧᤛᤢᤴ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤢᤏᤠᤀᤡᤱ ᤛᤧᤛᤢᤖ ᤕᤧᤰᤕᤰ ᤏᤢ ᤐᤠᤱᤓᤣ᤹ᤜᤠ᤹ᤀᤥ ᤗᤠᤶᤍᤡᤰ ᤆᤥᤃᤧ॥ ᤂᤢᤏᤧ᤹ᤏᤢ ᤌᤡᤰ-ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤘᤕᤧ.

² ᤜᤧᤰᤁᤩᤠᤱ ᤑᤧᤴᤛᤠᤶᤜᤠ᤹ ᤏᤢ ᤋᤢᤰᤔᤠ ᤕ᤹ᤔᤠᤗᤠᤶ ᤘᤣ᤺ᤴᤍᤢᤛᤡᤔᤠ ᤁᤢᤓᤠ ᤔᤧᤴᤇᤢᤔᤠᤜᤠ᤹ᤀᤠᤱ ᤔᤧᤘᤕᤧ॥ ᤂᤧᤱᤜᤠ᤹ᤀᤥ ᤕᤧᤛᤢᤖᤧ ᤔᤃ᤻ᤍᤗᤡᤏᤡ ᤔᤧᤵᤔᤏᤠᤔᤠ ᤔᤖᤡᤕᤔᤀᤥᤗᤠᤶ ᤏᤢᤛᤡ ᤑᤧᤴᤛᤠᤶᤜᤠ᤹ ᤗ᤺ᤳᤋᤢᤛᤡᤀᤠᤱ ᤘᤕᤧ॥

³ ᤜᤧᤰᤁᤩᤠᤱ ᤜᤧᤖᤥᤍᤖᤧ ᤁᤢᤄᤠᤖᤠᤳ ᤁᤧᤕᤢᤱᤒᤠ ᤆᤢᤈᤠᤛᤖᤧ ᤁᤢᤔᤣᤳ ᤕᤥᤀᤠᤴᤏᤠ. ᤛᤢᤈᤏᤠ. ᤏᤢ ᤕᤖᤡᤰ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤛᤠᤁᤢᤴᤎᤣ᤺ᤸᤗᤧ ᤕᤧᤛᤢᤴ ᤏᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤁᤢᤓᤠ᤹ ᤔᤧᤒᤡᤖᤢᤛᤡᤖᤥ॥

ᤕᤠ᤹ᤖᤡ᤺ᤶᤒᤠ ᤁᤧᤜᤣ᤹ᤒᤠᤸᤗᤧᤴ ᤂᤧᤍᤠ᤹

⁴ ᤌᤡᤰᤕᤧᤴ ᤕᤖᤡᤰ ᤕᤧᤰᤕᤰᤁᤥᤗᤠᤶ ᤕᤖᤡᤰ ᤔᤏᤠᤜᤠ᤹ ᤕᤧᤛᤢᤀᤥ ᤔᤧᤍᤩᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤂᤧᤍᤠ᤹ᤀᤡᤴ ᤔᤧᤳᤋᤢᤛᤡ

⁵ “ᤗᤳᤇᤠ ᤕᤠ᤺ᤴᤁᤧᤔᤒᤠᤎᤡᤰ ᤕᤠ᤹ᤖᤡ᤺ᤶᤒᤠ ᤗᤧᤵᤛᤧ ᤐᤣᤖᤥ॥ ᤂᤧᤸᤗᤧ ᤕᤠ᤹ᤖᤡ᤺ᤶᤒᤧᤴ ᤗᤧᤵᤋᤢᤸᤗᤧ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤠᤶᤔᤥ ᤔᤰᤌᤩᤧᤀᤠᤱ ᤔᤏᤠᤜᤠ᤹ᤖᤧ ᤔᤧᤍᤥ᤹ᤖᤢ. ᤜᤧᤰᤁᤩᤠᤱ ᤐᤢᤜᤠ᤹ ᤔᤧᤍᤩᤧᤀᤠᤱ ᤔᤧᤄᤵᤛᤢ ᤔᤧᤈᤖᤥ॥

⁶ ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤗᤢᤱᤄᤠᤖᤠᤰᤁᤥ ᤆᤢᤰᤋᤧ. ᤜᤧᤰᤁᤩᤠᤱ ᤂᤧᤴ ᤗᤡᤱᤔᤠᤃ ᤗᤡᤅᤧ. ᤁᤖ ᤏᤠᤶᤔᤡᤸᤗᤧ ᤜᤣᤖᤧᤒᤣ. ᤌᤣᤀᤠᤱᤓᤧᤸᤗᤧ ᤁᤧᤛᤣ᤺ᤶᤒᤠ ᤂᤠᤶ ᤔᤧᤏᤧᤛ᤻ᤛᤧᤴᤗᤥ॥

⁷ ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤋᤡᤱᤃᤪᤣᤰ ᤁᤧᤗᤡᤱᤒᤠ ᤂᤠᤶᤔᤥ ᤆᤢᤰᤋᤧ. ᤋᤡᤱᤃᤪᤣᤰᤁᤡᤴ ᤏᤢ ᤕᤠ᤹ᤖᤡ᤺ᤶᤒᤠᤴ ᤛᤥᤛᤥᤖᤡᤰ ᤗᤡᤅᤧ. ᤁᤖ ᤋᤡᤱᤃᤪᤣᤰᤜᤠ᤹ᤖᤧ ᤂᤧᤴ ᤛᤢ᤺ᤵᤋᤢ ᤛᤧᤖᤢᤖᤥ॥

⁸ ᤜᤧᤰᤁᤩᤠᤱ ᤁᤢᤓᤠ ᤕᤠ᤹ᤖᤡ᤺ᤶᤒᤧᤴ ᤏᤢᤒᤠ ᤂᤠᤶᤔᤥ ᤆᤢᤰᤋᤧᤀᤠᤱ ᤗᤡᤅᤧ. ᤜᤧᤰᤁᤩᤠᤱ ᤁᤢᤈᤠ᤹ᤀᤡ ᤁᤢᤈᤠ᤹ ᤌᤥ᤺ᤰᤋᤧ॥ ᤂᤧᤴ ᤕᤠ᤹ᤖᤡ᤺ᤶᤒᤠᤸᤗᤧ ᤁᤡᤵᤌᤡᤰ ᤗᤧᤱᤅᤠᤱᤎᤥ ᤁᤢᤈᤠ᤹ ᤌᤥ᤺ᤰᤋᤧᤖᤥ॥” ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤧᤶᤔᤠ ᤏᤧᤰᤂᤥ᤹ ᤁᤧᤃᤵᤐᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤢᤖᤡᤰ ᤂᤧᤵᤛᤧᤶᤔᤧ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ᥄”

ᤂᤧᤍᤠ᤹ᤀᤡᤸᤗᤧ ᤁᤢᤒᤣ

⁹ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤕᤧᤛᤢᤴ ᤛᤣ᤺ᤴᤔᤧᤍᤥᤛᤢ. “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤌᤧᤔᤠᤒᤣ᥅”

¹⁰ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤸᤗᤧᤴ ᤛᤡᤃᤠᤱᤒᤠ ᤐᤠ᤺ᤴᤜᤠ᤹ ᤂᤡᤏᤡ᤹ᤖᤰ ᤁᤢᤛᤡᤱ ᤏᤡ᤺ᤵᤔᤠ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ. ᤁᤖ ᤘᤣ᤹ ᤔᤏᤠᤜᤠ᤹ᤏᤢ ᤀᤡᤱᤃᤠ᤹ ᤂᤧᤍᤠ᤹ᤀᤥᤖᤰ ᤐᤠ᤺ᤳᤋᤠᤖᤥ॥ ᤜᤧᤰᤁᤣ᤺ᤸᤗᤧ “‘ᤁᤱᤜᤠ᤹ᤖᤧ ᤀᤥᤔᤧᤔᤧᤳᤋᤢᤛᤠᤱ ᤔᤧᤴᤏᤡᤛᤢᤴ. ᤔᤧᤄᤧᤵᤛᤢᤛᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥’

¹¹ “ᤁᤴ ᤂᤧᤍᤠ᤹ᤀᤡᤸᤗᤧ ᤁᤢᤒᤣᤴ ᤀᤰᤋᤱᤒᤠ ᤆᤥᤰ—ᤕᤠ᤹ᤖᤡ᤺ᤶᤒᤠ ᤑᤠ᤹ᤀᤡᤴ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴᤗᤥ॥

¹² ᤜᤧᤰᤁᤩᤠᤱ ᤗᤠᤶᤔᤥ ᤔᤰᤁᤧᤎᤠ᤺ᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤛᤡᤖᤥ॥ ᤔᤠᤑᤧᤴᤛᤠᤶᤔᤡᤴ ᤋᤠᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤥᤗᤠᤶ ᤐᤠ᤺ᤴᤈᤠᤰᤁᤡᤴ ᤗ᤺ᤳᤋᤢ ᤋᤣ᤹ᤖᤢ॥ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤏᤛᤠᤴ ᤆᤥ᤺ᤰᤔᤠ ᤔᤧᤱᤄᤥᤛᤢᤴᤏᤠᤱ ᤛᤧᤴᤗᤵ ᤂᤥᤔᤠ ᤔᤧᤴᤇᤢᤰᤋᤢᤴᤗᤥ॥

¹³ ᤜᤧᤰᤁᤩᤠᤱ ᤗᤢᤱᤄᤠᤖᤠᤰᤁᤥ ᤔᤰᤁᤧᤎᤠᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰᤁᤡᤴ ᤁᤧᤄᤧᤶᤒᤠᤀᤠᤱ ᤁᤧᤛ᤺ᤵᤐᤠᤖ ᤁᤧᤍᤠ᤺ᤰᤐᤠᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢ ᤔᤧᤃᤳᤋᤢᤒᤠᤴ ᤋᤢᤰᤂᤣ ᤗᤠᤰᤂᤣ ᤋᤠ᤺ᤸᤗᤧ ᤔᤧᤗᤧᤖᤢ ᤔᤧᤍᤣᤛᤢ. ᤌᤣᤀᤠᤱᤓᤧᤸᤗᤧ ᤐᤠ᤺ᤴᤈᤠᤰᤁᤡᤴ ᤂᤢᤏᤡ᤹ ᤗᤢᤱᤔᤠ᤹ ᤛᤡᤃᤠᤱ ᤔᤧᤱᤃᤧᤳᤋᤣ ᤘᤕᤧᤖᤥ॥

¹⁴ ᤜᤧᤰᤁᤩᤠᤱ ᤋᤡᤱᤃᤪᤣᤰ ᤁᤧᤗᤡᤱᤒᤠ ᤂᤠᤶᤔᤥ ᤁᤧᤈᤢᤰᤐᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤐᤠ᤺ᤴᤈᤠᤰ ᤁᤧᤄᤧᤶᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰ. ᤁᤖ ᤏᤡᤱᤛᤠᤶ. ᤕᤠᤱᤛᤠᤁᤢᤴᤎᤣ ᤏᤢ ᤁᤴ ᤜᤡᤱᤔᤴᤒᤠ ᤕᤠᤶᤍᤠᤍᤠᤒᤠ ᤐᤠ᤺ᤴᤏᤡᤸᤗᤧ ᤂᤧᤱᤜᤠ᤹ ᤛᤢ᤺ᤵᤋᤢᤛᤡᤀᤠᤱ ᤂᤧᤱᤜᤠ᤹ᤖᤧ ᤁᤢᤈᤠ᤹ ᤑᤶᤔᤠ ᤔᤧᤴᤇᤢᤰᤋᤢᤴᤗᤥ॥

¹⁵ ᤁᤖ ᤏᤢᤒᤠ ᤂᤠᤶᤔᤥ ᤔᤰᤁᤧᤎᤠᤒᤠ ᤕᤠ᤹ᤖᤡ᤺ᤶᤒᤠᤜᤠ᤹ᤃ ᤏᤢᤒᤠ ᤏᤢ ᤛᤣᤛᤣ ᤏᤡᤱᤘᤠ᤹ ᤁᤧᤃᤵᤐᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰ॥ ᤂᤧᤱᤜᤠ᤹ᤖᤧ ᤐᤠ᤺ᤴᤈᤠᤰᤁᤡᤴ ᤔᤧᤄᤧᤵᤛᤢᤖ ᤏᤡᤱᤘᤠ᤹ᤀᤥ ᤔᤧᤕᤢᤰᤂᤢ ᤜᤧᤰᤁᤩᤠᤱ ᤏᤠᤛᤡ ᤔᤧᤎ᤺ᤳᤋᤢᤀᤠᤱ ᤁᤢᤈᤠ᤹ ᤔᤧᤓᤳᤇᤢᤖᤥ॥”

ᤂᤵᤐᤩᤠ ᤛᤡᤃᤠᤱᤒᤠ ᤛᤣᤔᤡ

¹⁶ “ᤜᤠ᤺ᤳᤗᤧᤀᤠᤱ ᤛᤣᤔᤡᤴ ᤜᤠ᤺ᤴᤍᤢᤀᤠᤱ ᤂᤵᤐᤩᤠ ᤛᤡᤃᤠᤱ ᤔᤧᤕᤢᤰᤂᤢᤴ ᤜᤧᤰᤁᤩᤠᤱ ᤏᤧᤳᤏᤠ ᤛᤡᤃᤠᤱᤅᤠᤱ ᤔᤧᤕᤢᤰᤂᤢᤴ. ᤁᤖ ᤁᤧᤍᤠᤒᤠᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤌᤥ ᤆᤶᤈᤶᤒᤠ ᤋᤧᤴᤏᤥ ᤕᤢᤰᤂᤢ᤹॥

¹⁷ “ᤀᤠᤸᤗ ᤔᤧᤴᤎᤠ᤺ᤵᤔᤏᤠᤒᤠ ᤁᤠᤰ ᤆᤡᤃᤰᤘᤠᤜᤠ᤹ ᤀᤥ᤺ᤳᤋᤡᤀᤥ ᤏᤡᤔᤧᤎᤠᤵ ᤜᤧᤰᤁᤩᤠᤱ ᤛᤡᤒᤡ᤹ᤒᤠ ᤐᤠ᤺ᤴᤜᤠ᤹ ᤁᤧᤖᤧᤰ ᤁᤢᤛᤡᤱ ᤏᤡ᤺ᤳᤋᤧᤳᤗᤥ॥

¹⁸ “ᤜᤧᤰᤁᤣ᤺ᤸᤗᤧ ᤁᤧᤄᤧᤵᤛᤢᤶᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤀᤥ ᤏᤢᤖᤡᤰᤁᤠᤱ ᤕᤢᤰᤂᤧᤶᤔᤧ᤹ᤀᤥ॥ ᤀᤡᤱᤃᤠ᤹ ᤀᤠᤏᤡᤛᤠᤶᤔᤡᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤜᤠ᤹ᤖᤧᤃ ᤀᤠᤸᤗᤛᤠᤱ ᤕᤖᤡᤰ ᤁᤢᤛᤡᤱ ᤏᤡ᤺ᤵᤔᤠᤴ ᤔᤧᤄᤥᤛᤢᤖᤥ. ᤁᤖ ᤀᤠᤏᤡᤛᤠᤶᤔᤡᤴ ᤔᤧᤱᤄᤧᤶᤔᤏᤠᤒᤠᤜᤠ᤹ᤖᤧ ᤁᤳᤋᤢᤶᤒᤧ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢᤒᤠᤴᤏᤠᤱ ᤔᤧᤏᤠᤵᤋᤢᤛᤡᤖᤥ॥”

¹⁹ ᤀᤠᤸᤗ ᤕᤧᤛᤢᤖᤧ ᤁᤢᤶᤔᤠ ᤏᤢ ᤁᤢᤴᤛᤠ᤹ᤛᤡ ᤁᤢᤍᤢᤶᤛᤧ ᤔᤧᤍᤩᤧᤀᤠᤱ ᤔᤧᤘᤕᤧ. ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤁᤢᤒᤣᤛᤠᤱ ᤐᤣ᤺ᤰᤔᤠ ᤔᤧᤴᤇᤢᤰᤋᤧᤴᤗᤥ॥

²⁰ ᤜᤧᤰᤁᤣ᤺ᤸᤗᤧ ᤗᤳᤇᤠ ᤔᤏᤠᤎᤡᤰᤗᤧ ᤁᤧᤶᤔᤠ ᤏᤢ ᤁᤧᤴᤛᤠ᤹ᤛᤡ ᤁᤧᤍᤢᤶᤛᤧ ᤔᤧᤍᤩᤧᤀᤠᤱ ᤗᤠ᤺ᤰᤁᤠᤳ ᤁᤧᤶᤜᤠᤱᤗ ᤔᤧᤕᤧᤵᤗᤥ ᤗ᤹ᤖᤡᤰ ᤕᤧᤛᤢᤴ ᤔᤧᤳᤋᤢ॥

²¹ ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢᤛᤡ. “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰ ᤁᤧᤄᤧᤶᤒᤠᤜᤠ᤹ ᤜᤧᤰᤁᤩᤠᤱ ᤂᤧᤴ ᤁᤢᤀᤡᤛᤡᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤀᤡᤱᤃᤠ᤹ ᤀᤠᤶᤔᤠ ᤏᤢ ᤀᤠᤴᤛᤠ᤹ᤛᤡᤖᤥ॥”

ᤕᤧᤛᤢᤖᤧ ᤛᤢᤖᤡᤳ ᤁᤣᤈᤱᤅᤡᤴ ᤆᤡᤈᤡ ᤕᤧᤶᤕᤧᤶ ᤆᤥᤃᤢ᤹

²² ᤌᤡᤰᤕᤧᤴ ᤕᤧᤛᤢᤴ ᤁᤢᤜᤢ᤹ᤛᤠᤶᤒᤠᤜᤠ᤹ᤏᤢ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤐᤡᤃᤡ ᤔᤧᤳᤋᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤎᤠᤛᤡᤱᤗᤥ॥

²³ ᤂᤧᤱᤜᤠ᤹ ᤔᤧᤒᤣᤖ ᤔᤧᤒᤳᤇᤧᤸᤗᤧ ᤕᤧᤛᤢᤴ ᤀᤡᤵᤛᤧ॥ ᤜᤰᤆᤄᤳ ᤘᤖᤰᤁᤥ ᤕᤶᤒᤠ ᤛᤢᤖᤡᤳ ᤁᤣᤈᤱ ᤜᤢᤔᤠ ᤜᤣ᤺ᤰᤋᤧᤀᤠᤱ ᤘᤠᤓᤧᤸᤗᤧᤱᤅᤡᤴ ᤂ᤺ᤱᤒᤣᤀᤥ ᤗᤠᤛᤧᤀᤠᤱ ᤂᤠ ᤂ᤺ᤱᤒᤣᤴᤏᤧ ᤋᤡᤶᤛᤧᤀᤠᤱ ᤁᤧᤛᤠᤰᤐᤥ ᤔᤧᤎᤩᤧᤖᤥ॥

²⁴ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤒᤣᤀᤠᤱ ᤕᤧᤛᤢᤴ ᤔᤧᤓᤥ᤺ᤰᤂᤢᤖ ᤀᤰᤂᤣ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤜᤢᤶᤔᤠ ᤛᤡᤔᤠ ᤀᤡᤋᤡᤃᤧᤖᤥ॥” ᤜᤧᤰᤁᤩᤠᤱ ᤕᤧᤛᤢᤴ ᤐᤥᤃᤧᤀᤠᤱ ᤂᤧᤴ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤴ ᤑᤧ᤺ᤰᤋᤢ॥ ᤜᤧᤰᤁᤩᤠᤱ ᤛᤢᤖᤡᤳ ᤁᤣᤈᤱᤅᤡᤴ ᤜᤢᤔᤠ ᤆᤰᤌᤠᤛᤢ ᤜᤧᤰᤁᤩᤠᤱ ᤘᤠᤓᤧᤸᤗᤧᤱᤅᤡᤴᤏᤠᤱ ᤆᤡᤈᤡ ᤕᤧᤶᤕᤧᤶ ᤗ᤹ᤖᤧᤖᤥ॥

²⁵ ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠ᤺ᤴᤏᤡᤴ ᤀᤠᤳᤋᤥ ᤘᤠ᤹ᤒᤣ᥅” ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤃᤡᤛᤧᤖ ᤂᤢᤏᤡ᤹ ᤕᤱᤔᤠ ᤁᤧᤖᤧᤀᤠᤱ ᤏᤡᤱᤘᤠ᤹ ᤔᤕᤧᤖ ᤀᤰᤂᤣ ᤔᤧᤔᤧᤳᤇᤡᤱ. “ᤔᤣ᤺ᤴ ᤁᤱᤃ ᤀᤠᤰᤋᤱᤒᤠ ᤔᤏᤠᤏᤧᤒᤣ᥅ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤢᤛᤡᤸᤗᤧ ᤛᤢᤖᤡᤳ ᤁᤣᤈᤱᤅᤡᤴ ᤏᤢ ᤘᤠᤓᤧᤸᤗᤧᤱᤅᤡᤸᤗᤧᤀᤠᤱ ᤂᤧᤵᤛᤢᤱᤃ᥄”

ᤕᤧᤛᤢᤖᤧ ᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤔᤏᤠᤴ ᤘᤣ᤺ᤴᤍᤢ᤹

²⁶ ᤜᤧᤰᤁᤩᤠᤱ ᤂᤧᤱᤜᤠ᤹ ᤃᤠᤗᤡᤗ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱᤒᤠ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥ ᤔᤧᤃᤧᤖᤧ॥

²⁷ ᤂᤧᤱᤜᤠ᤹ ᤂᤧᤵᤔᤥ ᤔᤧᤃᤧᤖᤧᤀᤠᤱ ᤕᤧᤛᤢᤴ ᤂ᤺ᤱᤒᤣᤀᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤏᤢᤔᤧ᤺ᤴᤏᤣ ᤐᤠᤱᤈᤢᤶᤗᤠᤶ ᤁᤧᤓᤧᤶᤒᤠ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤔᤏᤠᤎᤡᤰ ᤂᤧᤵᤔᤥ ᤋᤢᤔᤢ॥ ᤂᤧᤴ ᤔᤏᤠᤴ ᤕᤖᤡᤰ ᤕᤧᤶᤔᤠᤱᤎᤥ ᤜᤡᤶᤔᤥ ᤔᤧᤴᤘᤠ᤹ᤀᤣ ᤋᤣᤳᤑᤢᤱᤅᤠᤱ ᤔᤧᤴᤈᤠᤱᤅᤣ ᤀᤡ᤺ᤵᤐᤢᤱᤍᤧᤴᤜᤠ᤹ᤀᤥᤖᤰ ᤘᤕᤧᤃᤳᤋᤧᤖᤥ॥

²⁸ ᤂᤧᤸᤗᤧ ᤕᤧᤛᤢᤴ ᤏᤡᤛᤢᤀᤠᤱ ᤑᤡᤖᤡᤰ ᤑᤡᤖᤡᤰ ᤑᤡ᤺ᤰᤋᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤌᤠᤶᤛᤡᤱᤗ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤀᤠᤱ ᤀᤰᤂᤣ ᤔᤧᤳᤋᤢ. “ᤁᤧᤖᤧᤰᤏᤢ᤺ᤸᤗᤧ ᤐᤕᤶ ᤕᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠ ᤕᤧᤛᤢᤀᤣ. ᤂᤧᤏᤧ᤹ ᤀᤡᤱᤃᤠ᤹ᤏᤢ ᤌᤣ ᤁᤧᤃᤥ᤺ᤳᤋᤢᤒᤠᤒᤣ᥅ ᤀᤡᤱᤃᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤱᤅᤡᤴᤏᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥”

²⁹ ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤔᤏᤠᤀᤥᤗᤠᤶ ᤀᤠᤴᤍᤣ᤺ᤴᤇᤠ ᤗᤠ᤺ᤰᤁᤠᤳ ᤗ᤺ᤴᤍᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤀᤠᤱ ᤘᤕᤧ॥ ᤂᤧᤴ ᤔᤏᤠᤴ ᤕᤖᤡᤰᤗᤧᤱ ᤂᤧᤴ ᤑᤧᤴᤛᤠᤶᤔᤡᤸᤗᤧ ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤘᤕᤧ॥ ᤔᤏᤠᤜᤠ᤹ᤖᤧ ᤕᤖᤡᤰᤗᤧᤱ ᤁᤢᤜᤢᤰ ᤁᤢᤗᤠᤱᤅᤥ ᤀᤡᤔᤧᤄᤣ᤺ᤰᤂᤢᤀᤠᤱ ᤁᤧᤒᤵᤐᤠ ᤑᤧᤴᤈᤣ᤹ ᤌᤰᤁᤪᤱᤜᤠ᤹ ᤑᤢ᤹ᤖᤢᤀᤠᤱ ᤑᤧᤴᤛᤠᤶᤜᤠ᤹ᤖᤧ ᤀᤣ᤺ᤰᤛᤠᤍᤧᤴᤏᤥ ᤛᤠᤰᤁᤧᤸᤗᤧᤰ ᤔᤧᤍᤣ᤹ᤖᤢᤀᤠᤱ ᤘᤕᤧᤖᤥ॥

³⁰ ᤕᤧᤛᤢᤖᤧ ᤂᤧᤴ ᤛᤣ᤺ᤴᤍᤥᤛᤢ. “ᤁᤧᤔᤡᤱ ᤌᤧᤔᤠᤒᤣ᥅” ᤂᤧᤸᤗᤧ ᤀᤠᤔᤡᤱ ᤋᤢᤖᤠᤖᤥ ᤗ᤹ᤖᤡᤰ ᤏᤥᤃᤵ ᤐᤡᤖᤢ॥ ᤌᤣᤀᤠᤱᤓᤧᤸᤗᤧ ᤕᤖᤡᤰ ᤑᤧᤴᤛᤠᤶᤜᤠ᤹ ᤂᤧᤴ ᤔᤏᤠᤀᤥ ᤔᤧᤗᤠᤛᤧᤀᤠᤱ ᤔᤧᤘᤕᤧᤖᤥ॥

³¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤁᤢᤍᤪᤥ᤺ᤶ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥ ᤕᤠᤵᤔᤡ ᤀᤠᤶᤒᤠᤱᤄᤧᤴᤏᤧ᤹ ᤑᤠ᤹ᤀᤠᤱ ᤂᤢᤏᤧ᤹ ᤐᤣᤗᤡ ᤔᤧᤓᤠᤰᤋᤢᤖᤧ ᤔᤧᤓᤠᤰᤋᤢ॥

³² ᤀᤠᤸᤗ ᤂᤧᤴ ᤁᤥ᤺ᤰᤔᤠᤀᤥ ᤕᤖᤡᤰ ᤑᤠᤰᤜᤠ᤹ ᤆᤠᤔᤧᤖᤠᤔᤧᤖ ᤔᤧᤕᤧᤒᤧ॥ ᤜᤧᤰᤁᤣ᤺ᤸᤗᤧ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤀᤠᤏᤡᤃᤣ ᤂᤧᤴ ᤑᤠᤰᤜᤠ᤹ᤀᤥ ᤗᤠ᤺ᤵᤔᤠ ᤀᤠᤒᤠᤱᤄᤧ᤹ ᤗ᤹ᤖᤡᤰ ᤕᤧᤛᤢᤴ ᤐᤣᤗᤡ ᤔᤧᤓᤠᤰᤋᤢ॥ ᤜᤧᤰᤁᤩᤠᤱ ᤕᤧᤛᤢᤖᤧᤀᤠᤱ ᤗᤠ᤺ᤵᤔᤠ ᤐᤠᤱᤄᤢᤛᤡᤀᤠᤱ

³³ ᤂᤧᤴ ᤔᤏᤠᤀᤥᤗᤠᤶ ᤔᤧᤗ᤺ᤴᤍᤧ ᤔᤧᤒᤣᤀᤠᤱ ᤂᤧᤱᤜᤠ᤹ ᤑᤠᤰᤜᤠ᤹ᤀᤥ ᤔᤧᤗᤠᤛᤧ॥ ᤜᤧᤰᤁᤩᤠᤱ ᤂᤧᤴ ᤑᤠᤰᤜᤠ᤹ ᤛᤱᤔᤠᤱᤅᤣ ᤛᤱᤔᤠᤱ ᤔᤧᤗᤥ᤺ᤰᤋᤧᤖ ᤕᤠᤰᤐᤧᤀᤥᤏᤢ ᤔᤰᤔᤧᤎᤩᤧᤀᤠᤱ ᤘᤖᤰᤁᤥ ᤔᤧᤜᤢᤔᤧ ᤔᤧᤛᤩᤧᤖᤥ॥

³⁴ ᤜᤧᤰᤁᤩᤠᤱ ᤑᤠᤰ ᤁᤧᤃᤶᤒᤠᤜᤠ᤹ᤖᤧ ᤁᤴ ᤐᤥ᤺ᤰᤂᤧᤒᤠ ᤐᤠ᤺ᤴᤏᤡᤴ ᤔᤧᤏᤡᤛᤢᤀᤠᤱ ᤂᤡᤔᤥ ᤔᤧᤗᤥ᤺ᤰᤋᤧᤖ ᤔᤧᤒᤣᤀᤠᤱ ᤐᤠᤱᤈᤢᤶᤔᤥ ᤏᤢ ᤂᤧᤴ ᤂᤡᤖᤡᤒᤠ ᤐᤠᤱᤓᤣ᤹ᤜᤠ᤹ᤀᤥ ᤁᤴ ᤀᤡᤱᤄᤱᤅᤡᤴ ᤔᤧᤛᤧᤛᤢᤖᤥ॥

³⁵ ᤜᤧᤰᤁᤩᤠᤱ ᤔᤏᤠᤜᤠ᤹ ᤌᤧᤔᤠᤏᤡ ᤐᤥ᤺ᤰᤂᤧᤒᤣ ᤑᤠ᤹ᤀᤠᤱ ᤀᤥᤔᤧᤳᤇᤧ ᤂᤧᤵᤔᤥ ᤔᤧᤍᤩᤧ॥ ᤂᤧᤱᤜᤠ᤹ᤖᤧ ᤔᤠᤑᤧᤴᤛᤠᤶᤔᤡᤸᤗᤧ ᤋᤖᤢᤒᤠ ᤔᤏᤠᤴ ᤏᤢᤖᤧᤀᤠᤱ ᤋᤣᤳ ᤆᤠᤰᤛᤡᤱᤅᤠᤱ ᤁᤢᤏᤡᤱᤘᤠ᤹ ᤛᤣᤖᤧᤀᤠᤱ ᤕᤧᤛᤢᤖᤧ ᤁᤢᤗᤠᤱᤈᤰᤐᤥ ᤕᤢᤅᤧᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤁᤧᤖᤧᤰ ᤔᤧᤃᤡᤛᤧ॥

³⁶ ᤜᤧᤰᤁᤩᤠᤱ ᤂᤧᤴ ᤜᤡᤴᤍᤥᤰ ᤁᤧᤏᤡᤒᤠᤜᤠ᤹ᤖᤧ ᤂᤧᤵᤔᤥ ᤁᤧᤍᤠᤒᤠ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤋᤃᤡ ᤑᤧᤴᤛᤠᤶᤔᤡᤸᤗᤧ ᤕᤠᤱᤄᤢᤒᤠ ᤁᤴ ᤔᤏᤠᤴ ᤘᤣ᤺ᤳᤋᤧᤒᤣ ᤑᤠ᤹ᤀᤠᤱ ᤔᤧᤈᤧᤰᤋᤢᤛᤡ॥

³⁷ ᤜᤧᤰᤁᤣ᤺ᤸᤗᤧ ᤃᤣᤖᤠᤛᤣᤏᤛ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤕᤧᤛᤢᤴ ᤁᤵᤔᤥᤗᤠᤶ ᤐᤣᤃᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤔᤧᤓᤠᤰᤋᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤀᤠᤱ ᤔᤧᤘᤕᤧ॥ ᤜᤧᤰᤁᤣ᤺ᤸᤗᤧ ᤕᤧᤛᤢᤴ ᤐᤣ᤺ᤰᤔᤠ ᤑᤠ᤹ᤀᤠᤱ ᤂ᤺ᤱᤒᤣᤀᤥ ᤗᤠᤛᤧᤖᤥ॥

³⁸ ᤑᤧᤴᤛᤠᤶᤜᤠ᤹ᤖᤧ ᤔᤧᤗᤧᤖᤢᤒᤠ ᤂᤧᤴ ᤔᤏᤠᤴ ᤂᤧ᤹ᤕᤥ ᤋᤩᤧᤀᤠᤱ ᤕᤧᤛᤢᤴ ᤀᤠᤍᤠᤱᤒᤣ. ᤀᤡᤱᤃᤠ᤹ᤀᤠᤱ ᤂᤧᤏᤧ᤹ᤏᤢᤀᤣ ᤋᤣ᤹ᤖᤠᤱᤅᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ. ᤁᤖ ᤕᤧᤛᤢᤖᤧ ᤀᤰᤂᤣ ᤔᤧᤳᤋᤢᤖ ᤏᤢ᤺ᤰᤋᤢᤍᤣᤛᤢ.

³⁹ “ᤂᤧᤏᤧ᤹ ᤁᤧᤜᤡᤶᤔᤥ ᤐᤣᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤗᤠᤃᤡ ᤆᤥᤃᤢ ᤁᤧᤒᤡᤖᤧᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤡᤱᤄᤱ ᤛᤧᤛᤧ᤹ᤀᤥ॥” ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤐᤣᤀᤠᤱ ᤕᤧᤛᤢᤖᤧ ᤂᤢᤏᤧ᤹ ᤁᤢᤗᤠᤃᤡ ᤆᤥᤃᤢᤒᤠ ᤁᤠᤰ ᤐᤠ᤺ᤴᤏᤡᤴ ᤁᤠᤰ ᤐᤠᤱᤈᤢᤶᤔᤥ ᤛᤧᤛᤢᤖᤥ॥

ᤁᤧᤛᤡᤔᤠ ᤆᤢᤰᤔᤧᤴ ᤏᤢ ᤁᤧᤍᤢᤰᤔᤠ ᤔᤧᤴᤇᤢᤔᤠ᤹ᤀᤡᤴ

⁴⁰ ᤜᤧᤰᤁᤩᤠᤱ ᤕᤧᤛᤢᤴ ᤕᤠᤶᤔᤥ ᤘᤖᤰᤁᤡᤸᤗᤧ ᤏᤠᤜᤠᤱᤍᤠᤱ ᤁᤧᤖᤧᤸᤗᤧ ᤂᤧᤵᤔᤥ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤗᤠᤶᤍᤠ᤺ᤰᤔᤠ ᤔᤧᤒᤡᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤜᤠᤱᤄᤢᤖ ᤔᤧᤕᤢᤅᤧᤖᤥ॥

⁴¹ ᤜᤧᤰᤁᤩᤠᤱ ᤕᤠᤀᤡᤖᤛ ᤔᤡᤱ ᤁᤧᤘᤠ᤺ᤵᤐᤠ ᤔᤏᤠᤎᤡᤰ ᤂᤧᤵᤔᤥ ᤋᤩᤧ॥ ᤂᤢᤏᤧ᤹ ᤐᤠᤱᤋᤡᤒᤠ ᤕᤜᤢᤍᤡ ᤆᤢᤶᤗᤢᤱᤜᤡᤶᤔᤥᤒᤠ ᤛᤢᤜᤠᤱᤕᤢᤰᤐᤠ ᤘᤕᤧ॥ ᤂᤧᤸᤗᤧ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗ ᤀᤠᤜᤡᤶᤔᤥ ᤑᤧᤖᤧ᤹ᤀᤥ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢ.

⁴² ᤌᤣᤀᤠᤱᤓᤧᤸᤗᤧ ᤋᤱᤒᤣ ᤌᤡᤰ-ᤏᤧᤳ (᥇᥈) ᤁᤧᤃᤧᤵᤔᤠ ᤌᤡᤰᤗᤰ ᤁᤢᤛ᤻ᤛᤠ ᤔᤧᤴᤇᤢᤔᤠ᤹ᤀᤡᤴ ᤛᤡᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤴᤏᤢᤀᤣ ᤌᤠᤛᤡᤱ॥ ᤜᤧᤰᤁᤩᤠᤱ ᤐᤣᤖ ᤐᤳᤇᤧᤸᤗᤧ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤆᤡᤒᤢ᤺ᤳ ᤔᤧᤒᤢ᤺ᤳᤋᤢᤖᤥ॥

⁴³ ᤂᤧᤵᤔᤥ ᤋᤱᤒᤣ ᤌᤡᤰ-ᤏᤧᤳᤋᤠᤱᤎᤥ (᥇᥈) ᤀᤠᤳᤋᤡᤸᤗᤧᤀᤠᤱ ᤘᤣ᤺ᤶᤔᤠ ᤔᤧᤴᤇᤢᤰᤋᤢᤶᤔᤠ ᤔᤠᤰᤂᤡ᤹ ᤘᤕᤢᤔᤠᤸᤗᤧ ᤋᤖᤢᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧᤖᤥ॥

⁴⁴ ᤂᤧᤴ ᤕᤧᤛᤢᤖᤧ ᤁᤢᤀᤣᤃᤠᤱ ᤋᤩᤧᤀᤠᤱ ᤁᤢᤍᤣ᤺ᤳᤋᤡᤸᤗᤧ ᤁᤢᤕᤠᤴ ᤛᤢᤛᤢᤏᤢᤔᤧ᤺ᤴᤏᤣ ᤔᤠᤰᤂᤡ᤹ ᤘᤕᤢ᤺ᤔᤠᤴ ᤆᤡᤒᤧᤖᤥ॥

⁴⁵ ᤕᤧᤛᤢᤖᤧ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤗᤧ ᤛᤢᤛᤠᤱᤒᤣ᥅” ᤜᤧᤰᤁᤩᤠᤱ ᤁᤧᤖᤧᤰᤗᤧ ᤀᤡᤱᤃᤠ᤹ ᤔᤣ᤺ᤴ ᤗ᤹ᤖᤡᤰ ᤔᤧᤒᤠ᤺ᤳᤋᤢᤀᤠᤱ ᤐᤋᤪᤢᤛᤖᤧ ᤔᤧᤳᤋᤢ. “ᤀᤠᤍᤠᤱᤒᤣ. ᤀᤰᤂᤣᤗ᤹ᤖᤡᤰ ᤁᤧᤖᤧᤰ ᤐᤡᤛᤠᤱᤗᤠᤶ ᤔᤏᤠᤜᤠ᤹ᤖᤧ ᤆᤡᤓᤡ᤺ᤳ ᤁᤧᤶᤓᤡ᤺ᤳᤋᤧᤀᤠᤱ ᤁᤧᤶᤀᤣ᤺ᤵᤗ ᤔᤧᤒᤳᤗᤥ॥”

⁴⁶ ᤁᤖ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤜᤠ᤺ᤳᤗᤧᤀᤡᤃ ᤛᤢᤛᤠᤱᤗᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤎᤰᤁᤥᤏᤢ ᤔᤢᤰᤛᤠᤶ ᤗ᤺ᤴᤍᤧᤒᤠ ᤏᤡᤱᤘᤠ᤹ ᤂᤥᤛᤢᤱᤗᤥ॥”

⁴⁷ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧᤀᤠᤱ ᤀᤡᤱᤃᤠ᤹ ᤆᤡᤱᤛᤡᤱᤔᤠ ᤔᤧᤛᤢᤰᤁᤠᤴ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥᤛᤢᤀᤠᤱ ᤁᤢᤃᤡᤔᤠᤸᤗᤧ ᤕᤰᤂᤧᤖ ᤕᤧᤛᤢᤖᤧ ᤁᤢᤗᤠᤱᤈᤰᤁᤥ ᤜᤒᤳ ᤑᤴᤇᤡᤱᤗᤥ॥ ᤂᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤃᤡᤀᤣ ᤂᤢᤏᤧ᤹ ᤛᤢᤛᤢᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤡᤔᤥ ᤘᤣ᤺ᤳᤋᤧᤒᤠ ᤐᤠ᤺ᤴᤏᤡᤴ ᤕᤧᤛᤢᤴ ᤆᤧᤰᤋᤢᤖᤥ॥

⁴⁸ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤔᤠᤔᤢᤀᤣ. ᤂᤧᤏᤧ᤹ ᤏᤛᤠᤴ ᤁᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤁᤧᤘᤣ᤺ᤳᤋᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗ ᤏᤢᤖᤡᤰᤁᤠᤱ ᤐᤣᤃᤧ᤹ᤀᤥ॥”

⁴⁹ ᤀᤰᤂᤣᤗ᤹ᤖᤡᤰ ᤐᤠᤖᤧᤖ ᤐᤳᤇᤧᤸᤗᤧ ᤂᤧᤴ ᤗᤠᤶᤗᤥᤒᤠ ᤕᤠᤀᤡᤖᤛᤖᤧ ᤁᤢᤜᤡᤶᤔᤥᤗᤠᤶ ᤔᤏᤠᤎᤡᤰ ᤋᤩᤧᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤁᤧᤛ᤻ᤛᤠ᤺ᤱᤃ ᤛᤩᤧᤖᤥ. ᤀᤠᤸᤗ ᤛᤡᤰᤛᤠᤶᤒᤧᤴ ᤋᤢᤰᤂᤣ ᤆᤠ᤺ᤳᤋᤢᤶ ᤔᤣ᤺ᤴᤗᤥ॥”

⁵⁰ ᤁᤖ ᤕᤧᤛᤢᤖᤧ ᤂᤧᤴ ᤂᤧᤵᤛᤢᤀᤠᤱ ᤕᤠᤀᤡᤖᤛᤧᤴ ᤔᤧᤳᤋᤢ. “ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤏᤛᤠ᤺ᤴᤗᤰ ᤆᤥᤃᤧ᤹॥ ᤂᤢᤏᤧ᤹ ᤘᤣ᤺ᤳᤗᤥ॥”

⁵¹ ᤜᤧᤰᤁᤩᤠᤱ ᤕᤧᤛᤢᤴ ᤕᤠᤀᤡᤖᤛᤖᤧ ᤁᤢᤜᤡᤶᤔᤥ ᤁᤧᤖᤧᤀᤠᤱ ᤐᤋᤪᤢᤛ. ᤕᤠᤁᤢᤒ ᤏᤢ ᤕᤢᤜᤢᤴᤏᤠᤴ ᤜᤧᤰᤁᤩᤠᤱ ᤂᤧᤴ ᤆᤢᤰᤔᤠᤸᤗᤧ ᤁᤢᤶᤒᤠ ᤁᤢᤶᤔᤠᤛᤡᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤏᤠᤱ ᤂᤧᤴ ᤆᤢᤰᤔᤧᤴ ᤏᤧᤛ᤻ᤛᤧᤒᤠ ᤋᤧᤴᤏᤥ ᤐᤣ᤺ᤰᤔᤠ ᤔᤧᤒᤠᤱᤄᤢᤴᤛᤡᤴ॥

⁵² ᤂᤧᤵᤔᤥ ᤔᤏᤠᤜᤠ᤹ ᤔᤧᤜᤠᤒᤧᤖ. ᤔᤧᤖᤡᤱ ᤌᤰᤏᤢ ᤔᤧᤕᤢᤅᤧ॥ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤔᤧᤜᤠᤒᤧᤶᤔᤡᤴᤏᤧ᤹. ᤂᤢᤏᤧ᤹ ᤔᤧᤴᤇᤡ᤹ᤀᤣ ᤘᤠ᤹. ᤀᤡᤵᤛᤧᤀᤠᤱᤗᤰ ᤏᤧᤖᤥ॥”

⁵³ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤖᤧ ᤕᤧᤛᤢᤴ ᤔᤧᤀᤣ᤺ᤳᤋᤢ. ᤌᤣᤀᤠᤱᤓᤧᤸᤗᤧ ᤂᤧᤴ ᤆᤢᤰᤔᤧᤴ ᤛᤩᤧᤒᤠ ᤔᤧᤏᤡᤛᤢᤀᤠᤱ ᤔᤧᤘᤕᤧ॥

⁵⁴ ᤕᤧᤛᤢᤖᤧ ᤂᤧᤴ ᤆᤢᤰᤔᤧᤴ ᤁᤢᤜᤢᤰᤁᤥ ᤋᤧᤶᤛᤢᤀᤠᤱ “ᤔᤠᤔᤢᤀᤣ. ᤐᤥᤃᤧ᤹ᤀᤥ” ᤔᤧᤳᤋᤢ॥

⁵⁵ ᤂᤡᤔᤥ ᤛᤠ᤺ᤱᤃᤢᤃᤧᤴ ᤁᤢᤛᤰᤔᤠ ᤏᤢ᤺ᤰᤂᤧ ᤋᤩᤧᤀᤠᤱ ᤔᤢᤳᤌᤪᤡᤰ ᤐᤥᤃᤧᤀᤠᤱ ᤕᤢᤱᤛᤡᤱ॥ ᤕᤧᤛᤢᤖᤧ ᤂᤧᤱᤜᤠ᤹ “ᤂᤧᤴ ᤌᤧᤔᤠᤀᤡ ᤆᤠᤔᤠ ᤐᤡᤖᤧᤶᤔᤧ᤹” ᤔᤧᤳᤋᤢᤛᤡ॥

⁵⁶ ᤁᤢᤶᤒᤠ ᤁᤢᤶᤔᤠᤛᤡᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤔᤕᤧ. ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤜᤠ᤺ᤳᤋᤠᤱ ᤔᤧᤔᤧᤳᤋᤧᤶᤔᤡᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠᤱ ᤐᤡᤖᤢᤛᤡᤖᤥ॥