ᤗᤢᤁᤠ 7 - LIFOTNT

ᤌᤰᤋᤢᤶᤒᤠᤸᤗᤧ ᤁᤢᤏᤛᤠᤴ

¹ ᤜᤧᤰᤁᤩᤠᤱ ᤕᤧᤛᤢᤖᤧ ᤔᤏᤠᤜᤠ᤹ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤳᤋᤢ ᤛᤢᤖᤢᤛᤡᤀᤠᤱ ᤂᤢᤏᤧ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥ ᤗᤠᤛᤧ॥

² ᤂᤧᤵᤔᤥᤒᤠ ᤖᤥᤔᤡ ᤌᤰᤋᤢᤶᤒᤠᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤁᤢᤏᤡᤱᤘᤠ᤹ᤀᤡᤖᤧ ᤂᤥ᤺ᤵᤋᤢᤒᤠ ᤁᤢᤕᤥ᤺ᤰᤐᤧᤴ ᤋᤢᤃᤧᤀᤠᤱ ᤛᤡᤔᤠᤗᤡᤱᤎᤥᤀᤥ ᤁᤧᤖᤧᤀᤠᤱ ᤏᤧᤛ᤻ᤛᤧᤖᤥ॥

³ ᤂᤧᤴ ᤌᤰᤋᤢᤶᤒᤠᤸᤗᤧ ᤕᤧᤛᤢᤴ ᤐᤠᤱᤈᤢᤶᤔᤥ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤜᤠᤖᤠ᤹ ᤑᤧᤴᤏᤠᤱ ᤁᤢᤕᤥ᤺ᤰᤐᤧᤴ ᤘᤣ᤺ᤴᤍᤢᤖ ᤑᤠ᤹ᤀᤠᤱ ᤕᤜᤢᤍᤡ ᤋᤢᤶᤗᤠᤶᤗᤥᤒᤠᤜᤠ᤹ ᤕᤧᤛᤢᤖᤧ ᤁᤢᤗᤠᤛᤧ ᤐᤠᤱᤄᤢᤛᤡᤖᤥ॥

⁴ ᤂᤧᤱᤜᤠ᤹ᤀᤠᤱ ᤕᤧᤛᤢᤖᤥ ᤔᤧᤍᤩᤧᤀᤠᤱ ᤀᤰᤂᤣ ᤔᤧᤔᤧᤳᤋᤢᤖ ᤐᤣᤗᤡ ᤔᤧᤓᤠᤰᤋᤢ. “ᤀᤠᤍᤠᤱᤒᤣ. ᤂᤧᤴ ᤌᤰᤋᤢᤶᤒᤧᤴ ᤂᤧᤏᤧ᤹ᤗᤠᤶ ᤁᤢᤓᤠ᤹ ᤂᤥᤔᤠ ᤗᤠ᤹ᤖᤢᤖᤥ.

⁵ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤀᤠᤏᤡ᤹ ᤕᤜᤢᤍᤡ ᤛᤢᤘᤠᤱᤜᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰ॥ ᤜᤧᤰᤁᤩᤠᤱ ᤀᤠᤏᤡ᤹ ᤗᤠᤃᤡ ᤕᤜᤢᤍᤡ ᤆᤢᤶᤗᤢᤱᤜᤡᤶᤎᤡᤰ ᤀᤠᤈᤥᤃᤧ ᤀᤠᤒᤡᤖᤧᤀᤠᤱ ᤘᤠ᤹ᤖᤥ॥”

⁶ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤱᤜᤠ᤹ᤏᤢ ᤌᤠᤛᤡᤱ॥ ᤂᤧᤱᤜᤠ᤹ ᤂᤧᤴ ᤌᤰᤋᤢᤶᤒᤠᤸᤗᤧ ᤁᤢᤜᤡᤶᤔᤥ ᤁᤧᤵᤔᤠᤏᤢ᤺ᤸᤗᤧ ᤋᤃᤡ ᤂᤧᤴ ᤌᤰᤋᤢᤶᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤁᤢᤴᤈᤢᤶᤜᤠ᤹ ᤐᤠᤱᤄᤢᤛᤡ. “ᤀᤠᤍᤠᤱᤒᤣ. ᤋᤢᤰᤂᤣ ᤔᤧᤈᤧᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤂᤧᤏᤧ᤹ ᤀᤠᤜᤡᤶᤔᤥ ᤗᤠᤶᤍᤠ᤺ᤰᤔᤠ ᤔᤧᤗᤠ᤹ᤀᤠᤴᤗᤥ॥

⁷ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤏᤧ᤹ᤀᤥ ᤋᤠᤔᤠ ᤔᤧᤗᤠ᤹ᤀᤠᤴᤗᤥ॥ ᤂᤧᤏᤧ᤹ ᤐᤠᤴ ᤛᤢᤳᤗᤠᤎᤡᤰᤗᤰ ᤁᤧᤒᤠ᤺ᤳᤋᤢᤛᤠᤱ ᤀᤠᤕᤥ᤺ᤰᤐᤧᤴ ᤘᤣ᤺ᤳᤗᤥ॥

⁸ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ᤀᤠᤱ ᤀᤠᤎᤢᤱᤎᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤁᤧᤘᤠ᤹ᤒᤠ ᤔᤏᤠᤀᤠᤖᤥ. ᤜᤧᤰᤁᤩᤠᤱ ᤀᤡᤱᤃᤠ᤹ᤀᤠᤱ ᤀᤠᤕᤢᤰᤁᤥ ᤌᤰᤛᤢᤒᤠᤜᤠ᤹ ᤔᤧᤘᤠ᤹ᤖᤥ॥ ᤀᤡᤱᤃᤠ᤹ ᤌᤰᤛᤢᤒᤠᤎᤡᤰᤁᤡᤴ ‘ᤐᤣᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤐᤣᤰ. ᤜᤧᤰᤁᤩᤠᤱ ᤘᤣ᤹ ᤌᤰᤛᤢᤒᤠᤴ ‘ᤑᤧᤖᤧ᤹’ ᤔᤧᤳᤋᤢᤱᤅᤡᤸᤗᤧ ᤑᤧᤴ॥ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤕᤥ᤺ᤰᤐᤧᤴ ‘ᤁᤴ ᤆᤥᤃᤧ᤹’ ᤔᤧᤳᤋᤢᤱᤅᤡᤸᤗᤧ ᤆᤥᤃᤢ᤹ᤖᤥ॥”

⁹ ᤕᤧᤛᤢᤖᤧ ᤁᤴ ᤂᤧᤵᤛᤢᤀᤠᤱ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤂᤡᤖᤡ ᤜᤡᤛᤡᤱᤅᤠᤱ ᤂᤢᤏᤧ᤹ ᤁᤧᤍᤡᤶᤒᤠᤜᤠ᤹ ᤔᤧᤳᤋᤢᤛᤡ. “ᤀᤰᤋᤱᤒᤠ ᤕᤶᤒᤠ ᤏᤛᤠᤴ ᤁᤧᤃᤵᤐᤠ ᤔᤏᤠ᤺ᤱᤃ ᤀᤡᤛᤪᤠᤀᤡᤗᤀᤥᤀᤠᤱ ᤀᤡᤱᤃᤠ᤹ ᤔᤧᤱᤄᤥᤀᤣ ᤘᤠ᤹ᤀᤠᤖᤥ᥄

¹⁰ “ᤜᤧᤰᤁᤩᤠᤱ ᤌᤰᤋᤢᤶᤒᤠᤸᤗᤧ ᤐᤠᤱᤄᤢᤛᤡᤒᤠ ᤔᤏᤠᤜᤠ᤹ ᤔᤧᤏᤢ᤺ᤰᤂᤧᤀᤠᤱ ᤜᤡᤶᤔᤥ ᤔᤧᤃᤧᤖᤧᤸᤗᤧ ᤂᤧᤴ ᤕᤥ᤺ᤰᤐᤧᤴ ᤘᤣ᤺ᤳᤋᤧᤀᤠᤱ ᤕᤢᤅᤧᤒᤠ ᤔᤧᤍᤢᤔᤢᤖᤥ॥”

ᤔᤣᤔᤣᤍᤢᤔᤠᤸᤗᤧ ᤁᤢᤛ᤻ᤛᤠᤴ ᤁᤢᤜᤡᤱᤘᤧᤳ ᤐᤥᤱ

¹¹ ᤜᤧᤰᤁᤩᤠᤱ ᤁᤢᤓᤠ ᤕᤧᤴ ᤀᤣᤃᤠᤱ ᤕᤧᤛᤢᤴ ᤏᤠᤀᤡᤏ ᤐᤠᤱᤈᤢᤶᤔᤥ ᤐᤣ॥ ᤂᤢᤏᤧ᤹ᤏᤢᤀᤣ ᤁᤢᤜᤢ᤹ᤛᤠᤶᤒᤠᤜᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ᤀᤠᤱ ᤔᤧᤒᤣᤖᤥ॥

¹² ᤂᤢᤏᤧ᤹ ᤐᤠᤱᤈᤢᤶᤔᤥᤒᤠ ᤕᤶᤒᤠ ᤋᤠ᤺ᤰᤜᤴᤏᤥ ᤁᤧᤖᤧᤸᤗᤧ ᤔᤣᤔᤣᤍᤢᤔᤠᤎᤡᤰᤗᤧ ᤗᤳᤇᤠᤖᤰ ᤁᤧᤘᤠ᤹ᤒᤠ ᤁᤢᤛ᤻ᤛᤠ ᤕᤧᤶᤒᤡᤳᤇᤠ᤹ᤀᤡᤴ ᤛᤩᤧᤀᤠᤱ ᤁᤢᤈᤣᤎᤠ᤺ᤵᤐᤡᤴ ᤐᤠᤱᤈᤢᤶᤔᤥᤒᤠ ᤔᤏᤠᤜᤠ᤹ᤖᤧ ᤔᤧᤓᤧᤳᤋᤢᤖ ᤔᤧᤒᤳᤇᤧᤒᤠ ᤋᤢᤔᤢ॥ ᤂᤧᤴ ᤔᤣᤔᤣᤍᤢᤔᤠᤴᤏᤢ ᤕᤖᤡᤰ ᤔᤏᤠᤜᤠ᤹ ᤔᤧᤘᤕᤧᤖᤥ॥

¹³ ᤕᤧᤛᤢᤖᤧ ᤂᤧᤴ ᤔᤣᤔᤣᤍᤢᤔᤠᤴ ᤀᤥᤔᤧᤳᤋᤢᤸᤗᤧ ᤁᤢᤗᤢᤱᤔᤠ᤹ ᤛᤡᤕᤥᤏ ᤕᤥ᤺ᤴᤍᤧᤀᤠᤱ ᤂᤧᤏᤧ᤹ ᤔᤧᤜᤠᤒᤧᤴᤏᤧ᤹ᤀᤥ ᤔᤧᤳᤋᤢᤖ ᤀᤠ᤺ᤴᤇᤡᤱᤔᤠ ᤐᤡᤖᤢᤖᤥ॥

¹⁴ ᤜᤧᤰᤁᤩᤠᤱ ᤐᤣᤀᤠᤱ ᤆᤣᤎᤠ᤺ᤵᤐᤡᤴ ᤛᤢᤛᤢᤸᤗᤧ ᤂᤧᤴ ᤆᤣᤎᤠᤵ ᤁᤧᤒᤱᤒᤠᤜᤠ᤹ ᤔᤧᤕᤧᤶᤛᤡᤱ॥ ᤕᤧᤛᤢᤖᤧ ᤔᤧᤳᤋᤢ. “ᤗᤠᤈᤣ. ᤐᤥᤃᤧ᤹ᤀᤥ॥”

¹⁵ ᤜᤧᤰᤁᤩᤠᤱ ᤂᤧᤴ ᤁᤧᤛᤡᤒᤠ ᤌᤠᤱᤒᤧᤴᤏᤡᤴᤏᤠᤱ ᤐᤥᤃᤧᤀᤠᤱ ᤐᤠ᤺ᤵᤔᤠ ᤜᤣ᤺ᤰᤋᤧ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤁᤢᤶᤔᤠ ᤜᤢᤰᤛᤢᤵᤋᤢᤖᤥ॥

¹⁶ ᤜᤧᤰᤁᤩᤠᤱ ᤔᤏᤠᤜᤠ᤹ ᤁᤧᤖᤧᤰ ᤔᤧᤃᤡᤛᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ. “ᤀᤠᤏᤡ᤹ ᤗᤢᤶᤔᤥᤀᤠᤱ ᤕᤶᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤘᤠ᤹ᤖᤥ॥” ᤜᤧᤰᤁᤩᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤢᤔᤏᤠᤜᤠ᤹ ᤁᤢᤓᤠ᤹ ᤐᤡᤛᤧ ᤏᤢ ᤁᤶᤒᤪᤠᤱ ᤔᤧᤳᤇᤧ ᤕᤧᤖᤥ॥”

¹⁷ “ᤜᤧᤰᤁᤩᤠᤱ ᤁᤴ ᤜᤡᤴᤍᤥᤰᤁᤡᤴ ᤁᤧᤖᤧᤰ ᤐᤡᤛᤠᤱ ᤕᤜᤢᤍᤡᤕᤠ ᤏᤢ ᤂᤧᤴ ᤂᤡᤖᤡᤒᤠ ᤌᤢᤶᤔᤥ ᤛᤧᤖᤧᤖᤥ॥”

ᤕᤧᤛᤢ ᤏᤢ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ

¹⁸ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤥᤗᤠᤶ ᤁᤴ ᤐᤠ᤺ᤴᤏᤡᤴ ᤂᤧᤵᤛᤢ॥

¹⁹ ᤜᤧᤰᤁᤩᤠᤱ ᤏᤧᤵᤑᤢ ᤁᤢᤜᤢ᤹ᤛᤠᤶᤒᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤍᤠᤱᤒᤠᤸᤗᤥ ᤁᤴ ᤀᤡᤱᤄᤱᤅᤡᤴ ᤜᤠᤅᤢᤍᤣᤛᤢ “ᤀᤠᤸᤗ ᤁᤧᤍᤠᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ᥅ ᤀᤡ ᤀᤠᤏᤡᤃᤣ ᤘᤣ᤹ᤛᤔᤠ ᤜᤠᤱᤄᤢᤶᤒᤧᤒᤠᤒᤡ᥅”

²⁰ ᤜᤧᤰᤁᤩᤠᤱ ᤂᤧᤴ ᤀᤡᤱᤛᤠᤒᤠᤜᤠ᤹ᤀᤠᤱ ᤕᤧᤛᤢᤖᤥ ᤐᤣᤛᤧᤳᤇᤡᤀᤠᤱ ᤔᤧᤳᤋᤧᤇᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤕᤠᤵᤔᤡ ᤐᤠᤱᤄᤧᤳᤇᤡᤃᤧᤀᤠᤱ ᤘᤠ᤹ᤛᤡᤃᤧᤖᤥ. ‘ᤀᤠᤸᤗ ᤁᤧᤍᤠᤒᤠ ᤂᤪᤡᤛ᤻ᤋᤧᤴ ᤒᤠ ᤂᤧᤏᤧ᤹ᤀᤣᤒᤡ. ᤀᤡ ᤀᤠᤏᤡᤃᤣ ᤘᤣ᤹ᤛᤔᤠ ᤜᤠᤱᤄᤢᤶᤒᤧᤒᤠᤒᤡ᥅’”

²¹ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤕᤧᤶᤔᤥ ᤕᤧᤛᤢᤖᤧ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤏᤢ ᤑᤧᤴᤛᤠᤶᤔᤡᤸᤗᤧ ᤋᤖᤢᤛᤡᤒᤠᤜᤠ᤹ ᤏᤢᤛᤢᤛᤡ ᤜᤧᤰᤁᤩᤠᤱ ᤕᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤀᤠᤱ ᤂᤠᤏᤡᤔᤠ ᤁᤧᤛᤢᤰᤐᤠ ᤆᤥᤃᤢᤛᤡᤖᤥ॥

²² ᤜᤧᤰᤁᤩᤠᤱ ᤕᤧᤛᤢᤖᤧ ᤕᤢᤜᤢᤴᤏᤠᤗᤠᤶ ᤁᤧᤍᤠᤒᤠᤜᤠ᤹ ᤔᤧᤳᤋᤢᤛᤡ. “ᤐᤣᤛᤧᤳᤇᤧ᤹ᤀᤠᤱ ᤁᤴ ᤁᤧᤏᤡᤛᤧᤳᤇᤢ. ᤁᤧᤄᤧᤵᤛᤧᤳᤇᤢᤒᤠ ᤐᤠ᤺ᤴᤏᤡᤴ ᤕᤢᤜᤢᤴᤏᤠᤴ ᤔᤧᤳᤋᤧᤇᤧ᤹—ᤀᤰᤂᤣᤗ᤹ᤖᤡᤰ ᤔᤡᤰᤑ᤺ᤶᤒᤠᤜᤠ᤹ᤖᤧ ᤏᤡᤔᤠ ᤔᤧᤛᤢᤰᤋᤢ᤹. ᤜᤧᤰᤁᤩᤠᤱ ᤗᤠᤱᤛᤰᤐᤠᤜᤠ᤹ ᤗᤠᤱᤔᤧᤄᤣᤰ. ᤗᤥᤃᤣ᤹ᤖᤧ ᤋᤖᤢᤛᤡᤒᤠᤜᤠ᤹ ᤔᤧᤘᤣ᤺ᤳ. ᤜᤧᤰᤁᤩᤠᤱ ᤏᤠᤎᤧᤰᤁᤪᤧᤱᤜᤠ᤹ᤖᤧ ᤔᤧᤄᤧᤵᤛᤢ. ᤁᤧᤛᤡᤒᤠᤜᤠ᤹ ᤕᤠᤶᤔᤥ ᤔᤧᤜᤡᤱ. ᤜᤧᤰᤁᤩᤠᤱ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤔᤧᤄᤧᤵᤛᤢ᤹ᤖᤥ॥

²³ ᤜᤧᤰᤁᤩᤠᤱ ᤀᤡᤱᤃᤠ᤹ᤏᤢ ᤁᤢᤏᤡᤱᤘᤠ᤹ ᤔᤧᤴᤍᤢᤰᤔᤏᤠᤒᤠᤀᤠᤱ ᤕᤠᤵᤔᤡ ᤆᤵᤆᤡ ᤔᤧᤴᤈᤥ᤺ᤰᤔᤏᤠᤒᤠᤴ ᤔᤢ᤹ᤀᤡᤛᤠᤒᤠᤖᤥ॥”

²⁴ ᤜᤧᤰᤁᤩᤠᤱ ᤕᤢᤜᤢᤴᤏᤠᤖᤧ ᤁᤢᤀᤡᤱᤛᤠᤒᤠᤜᤠ᤹ ᤐᤣᤛᤧᤳᤇᤡᤀᤠᤱ ᤕᤧᤛᤢᤖᤧ ᤂᤧᤴ ᤔᤏᤠᤜᤠ᤹ ᤕᤢᤜᤢᤴᤏᤠᤖᤧ ᤁᤢᤔᤧᤴᤏᤥ ᤔᤧᤳᤋᤢᤛᤡ. “ᤂᤡᤏᤡ᤹ ᤀᤣ᤺ᤰᤛᤠᤍᤧᤴᤏᤥ ᤌᤧᤔᤠ ᤀᤥᤔᤧᤳᤇᤧ ᤁᤧᤒᤣᤃᤡᤒᤠ᥅ ᤛᤢᤖᤡᤳᤔᤠᤸᤗᤧ ᤘᤠ᤺ᤴᤍᤢᤒᤠ ᤌᤡᤱᤏᤧ᤺ᤳᤋᤧᤴᤒᤡ᥅”

²⁵ ᤏᤢᤒᤠ ᤆᤠᤱ ᤋᤣᤳ ᤁᤧᤈᤠᤱᤒᤠ ᤔᤏᤠᤴ ᤀᤥᤔᤧᤳᤇᤧ ᤗᤠ᤺ᤰᤁᤠᤳ ᤁᤧᤒᤣᤃᤡᤒᤡ᥅ ᤜᤧᤰᤋᤱᤒᤠᤜᤠ᤹ ᤏᤢ ᤜᤠᤱᤜᤠᤱ ᤗ᤹ᤖᤡᤰ ᤁᤧᤕᤢᤱᤒᤠᤜᤠ᤹ᤃ ᤜᤠᤱᤜᤡᤶᤔᤥᤖᤰ ᤔᤧᤘᤠ᤹ᤖᤥ॥

²⁶ ᤌᤧᤔᤠ ᤀᤥᤔᤧᤳᤇᤧ ᤁᤧᤒᤡᤃᤡᤒᤠ᥅ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴᤒᤡ᥅ ᤛᤧᤰᤂᤠ᤺ᤸᤗᤧ ᤀᤡᤱᤃᤠ᤹ ᤔᤧᤳᤏᤡᤱ. ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴᤏᤢ᤺ᤸᤗᤧ ᤕᤶᤒᤠ ᤔᤏᤠᤴ ᤁᤧᤏᤡᤛᤢᤶᤗᤥ॥

²⁷ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤸᤗᤧ ᤁᤢᤔᤧᤴᤏᤥ. ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤀᤠᤀᤡᤱᤛᤠᤒᤧᤴ ᤁᤧᤗᤠᤃᤡ ᤗᤠᤶ ᤕᤠᤖᤡᤵ ᤆᤥ᤺ᤰᤛᤧ ᤂᤧᤏᤧ᤹ᤏᤢ᤺ᤸᤗᤧ ᤋᤃᤡ ᤐᤠᤱᤄᤢᤱᤗᤥ॥

²⁸ ᤜᤧᤰᤁᤩᤠᤱ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤗᤢᤶᤔᤥ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤜᤠ᤺ᤳᤋᤠᤱ ᤜᤥᤵᤗᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤥ ᤁᤠᤰᤏᤢ ᤆᤢᤰᤐᤧᤴ ᤕᤢᤜᤢᤴᤏᤠ᤺ᤴᤏᤢ᤺ᤸᤗᤧ ᤕᤶᤒᤠ ᤆᤥᤰ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥”

²⁹ ᤀᤰᤂᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ᤖᤧ ᤜᤧᤰᤁᤩᤠᤱ ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ᤖᤧᤀᤠᤱ ᤕᤧᤛᤢᤖᤧ ᤁᤢᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤶᤔᤡᤴ ᤏᤢᤒᤠ ᤑᤠ᤹ᤀᤠᤱ ᤋᤧᤴᤍᤡᤱ ᤔᤧᤈᤥᤃᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤈᤥ᤺ᤰᤛᤡᤱᤅᤠᤱ ᤔᤧᤘᤕᤧᤖᤥ॥

³⁰ ᤁᤖ ᤑᤖᤡᤛᤡᤜᤠ᤹ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣ᤺ᤰᤁᤡᤴ ᤔᤧᤏᤠ᤹ᤖᤢ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤢᤜᤢᤴᤏᤠᤗᤠᤶ ᤒᤵᤋᤡᤛ᤻ᤔᤠ ᤔᤧᤴᤈᤥ᤺ᤰᤛᤡᤱᤅᤡᤴᤗᤥ॥

³¹ ᤕᤧᤛᤢᤖᤧ ᤕᤠᤶᤔᤥ ᤐᤠ᤺ᤳᤋᤢ. “ᤀᤠᤸᤗ ᤁᤴ ᤕᤧᤶᤔᤥᤒᤠ ᤔᤏᤠᤜᤠ᤹ ᤀᤠᤰᤋᤱᤒᤠ ᤔᤧᤈᤥᤰ ᤑᤠ᤹ᤀᤠᤱ ᤌᤧᤔᤠ᤺ᤴᤏᤢ ᤋᤱᤄᤢᤱᤛᤡᤱᤒᤠᤒᤣ᥅

³² ᤂᤧᤱᤜᤠ᤹ᤃ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤜᤡᤴᤈᤠ᤹ᤒᤡᤳᤇᤠ ᤁᤢᤀᤡᤛᤡᤰ ᤔᤧᤈᤥᤰᤗᤥ॥ “ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤔᤧᤳᤇᤡᤱ. ‘ᤀᤠᤏᤡᤃᤣ ᤔᤢᤑᤪᤠᤔᤠ ᤜᤡᤵᤔᤏᤠ. ᤁᤖ ᤂᤡᤏᤡ᤹ ᤁᤧᤴᤗᤠ᤺ᤰᤂᤡᤴ॥ ᤀᤠᤏᤡᤃᤣ ᤔᤧᤖᤡᤱ ᤌᤰᤔᤏᤠ. ᤁᤖ ᤂᤡᤏᤡ᤹ ᤁᤧᤴᤜᤠᤒᤡᤴ॥’

³³ “ᤌᤣᤀᤠᤱᤓᤧᤸᤗᤧ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠᤴ ᤋ᤺ᤰᤏᤧᤳᤋᤥ ᤕᤢᤅᤧᤖ ᤋᤩᤧ. ᤁᤖ ‘ᤂᤧᤸᤗᤧ ᤑᤧᤴᤛᤠᤶ ᤁᤳᤋᤢ᤹’ ᤁᤧᤔᤧᤳᤋᤢᤶᤗᤥ॥

³⁴ ᤔᤧᤴᤇᤠᤶᤛᤠᤴ ᤆᤖ ᤌᤢᤅᤢᤖ ᤋᤩᤧ. ᤜᤧᤰᤁᤩᤠᤱ ‘ᤂᤧᤴ ᤋ᤺ᤰᤌᤧ᤺ᤰᤁᤧᤜᤠ᤹. ᤌᤡ᤺ᤔᤛᤠᤱᤜᤠ᤹. ᤀᤣ᤺ᤱᤕᤠᤱ ᤁᤧᤓᤥᤱᤒᤠᤜᤠ᤹ ᤏᤢ ᤗᤠᤕᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤣ᤺ᤱᤒᤠᤖᤥ’ ᤁᤧᤔᤧᤳᤋᤢᤶᤗᤥ॥

³⁵ ᤏᤡᤱᤘᤠ᤹ᤑᤢ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ ᤋᤧᤴᤍᤡᤱ ᤁᤧᤈᤥ᤺ᤰᤐᤠᤀᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤜᤠ᤹ᤖᤧ ᤂᤧᤴ ᤏᤡᤛ᤻ᤛᤣ ᤆᤥᤰ ᤑᤠ᤹ᤀᤠᤱ ᤀᤥᤛᤣ᤺ᤴᤀᤠᤶᤎᤠᤰᤗᤥ॥”

ᤗᤠᤕᤥᤔᤠ ᤔᤧᤴᤇᤢᤔᤠ᤺ᤸᤗᤧ ᤗᤧᤵᤔᤡ ᤂᤥᤛᤢ᤹

³⁶ ᤑᤖᤡᤛᤡᤎᤡᤰᤗᤧ ᤕᤧᤛᤢᤴ ᤕᤢ᤺ᤴᤇᤡᤰ ᤆᤠᤈᤠᤛᤧ ᤀᤢ᤺ᤳᤋᤢ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤡᤶᤔᤥ ᤐᤣᤀᤠᤱ ᤆᤠᤈᤠᤛᤧ ᤕᤢᤱᤛᤡᤱᤗᤥ॥

³⁷ ᤂᤧᤴ ᤐᤠᤱᤈᤢᤶᤔᤥ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠ᤹ᤎᤡᤰ ᤘᤕᤧ॥ ᤂᤧᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤕᤧᤛᤢᤴ ᤑᤖᤡᤛᤡ᤺ᤸᤗᤧ ᤁᤢᤜᤡᤶᤔᤥ ᤆᤠᤈᤠᤛᤧ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤂᤧᤵᤛᤢᤀᤠᤱ ᤂᤧᤸᤗᤧ ᤀᤡᤔᤧᤸᤗᤢᤱᤒᤠ ᤐᤷᤕᤠᤔᤠᤎᤡᤰ ᤁᤢᤗᤧ᤺ᤶ ᤑᤢᤱᤏᤠᤶ ᤕᤠᤱᤛᤡᤅᤧᤀᤠᤱ

³⁸ ᤕᤧᤛᤢᤖᤧ ᤁᤢᤀᤣᤃᤠᤱ ᤗᤧᤵᤔᤠᤱ ᤋᤩᤧᤀᤠᤱ ᤜᤠᤒᤧᤖ ᤕᤧᤛᤢᤖᤧ ᤁᤢᤗᤠᤱᤅᤥ ᤁᤢᤔᤡᤰᤘᤠ᤺ᤸᤗᤧ ᤘᤠᤖᤰᤂᤢᤖᤥ॥ ᤜᤧᤰᤁᤩᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤜᤣᤛᤢᤖ ᤁᤢᤗᤠᤱᤅᤡᤴ ᤆᤢᤵ ᤔᤧᤳᤋᤢᤀᤠᤱ ᤂᤧᤴ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤢᤖᤥ॥

³⁹ ᤜᤧᤰᤁᤣ᤺ᤸᤗᤧ ᤂᤧᤴ ᤑᤖᤡᤛᤡ᤺ᤸᤗᤧ ᤏᤡᤛᤢᤀᤠᤱ ᤏᤡᤱᤘᤠ᤹ ᤀᤡ᤺ᤳᤇᤡᤱ. “ᤁᤴ ᤔᤏᤠᤴ ᤛᤧᤰᤂᤠᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤘᤕᤧᤸᤗᤧᤃ ᤂᤢᤏᤧ᤹ ᤁᤧᤛᤢᤔᤠ ᤔᤧᤴᤇᤢᤔᤠ᤹ᤀᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤒᤠᤔᤧᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤧᤰᤂᤠᤀᤣ ᤗᤠᤕᤥ ᤁᤧᤈᤥ᤺ᤰᤔᤠᤀᤣᤖᤥ॥”

⁴⁰ ᤕᤧᤛᤢᤖᤧ ᤂᤧᤴ ᤑᤖᤡᤛᤡᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ᤏᤢ ᤗᤳᤇᤠ ᤐᤠ᤺ᤴᤎᤡᤰ ᤐᤠ᤺ᤵᤔᤠ ᤁᤳᤋᤢᤱᤗᤥ॥” ᤛᤡᤔᤥᤏᤖᤧᤀᤠᤱ ᤏᤥᤃᤵ ᤐᤡᤖᤢ. “ᤛᤡᤰᤛᤠᤶᤒᤣ. ᤔᤧᤳᤋᤠᤱᤅᤧ᤹ᤀᤥ॥”

⁴¹ ᤕᤧᤛᤢᤖᤧ ᤔᤧᤳᤋᤢ. “ᤌᤡᤰ ᤋᤧᤴᤏᤥ ᤏᤧᤵᤑᤢ ᤔᤏᤠᤜᤠ᤹ ᤘᤕᤧᤳᤇᤡ॥ ᤂᤧᤱᤜᤠ᤹ᤖᤧ ᤛᤡᤱᤏᤠᤳ ᤕᤠᤱ ᤁᤧᤃᤧᤒᤠᤸᤗᤥᤗᤠᤶ ᤗᤳᤇᤠᤖᤧ ᤅᤠᤃᤡᤵ (᥋᥆) ᤕᤢᤵᤐᤠᤕᤠᤱ ᤏᤢ ᤘᤣ᤹ᤛᤔᤠᤸᤗᤧ ᤁᤢᤃᤡᤵ ᤅᤠᤛᤡ (᥋᥆᥆) ᤕᤢᤵᤐᤠᤕᤠᤱ ᤋᤣ᤹ᤖᤧᤳᤇᤢᤀᤠᤱ ᤘᤕᤧᤳᤇᤡ॥

⁴² ᤁᤖ ᤂᤧᤴ ᤏᤧᤵᤔᤠᤱᤗᤧ ᤜᤢᤱᤔᤠ ᤔᤧᤴᤇᤢᤰᤁᤣ ᤘᤕᤧᤳᤇᤡ॥ ᤂᤧᤴ ᤛᤡᤱᤏᤠᤳ ᤕᤠᤱ ᤁᤧᤃᤧᤒᤠᤸᤗᤧ ᤏᤧᤵᤔᤠᤱᤗᤧ ᤂᤢᤴᤇᤡ᤹ ᤛᤡᤱᤏᤠᤳᤋᤡᤴ ᤗᤧᤖᤢ ᤐᤡᤖᤢᤛᤡ॥ ᤜᤧᤰᤁᤣ᤺ᤸᤗᤧ ᤀᤠᤳᤋᤡᤸᤗᤧ ᤂᤧᤴ ᤛᤡᤱᤏᤠᤳ ᤕᤠᤱ ᤗᤧᤵᤔᤡ ᤁᤧᤒᤡᤒᤠᤴ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠ᥅”

⁴³ ᤛᤡᤔᤥᤏᤖᤧ ᤏᤥᤃᤵ ᤐᤡᤖᤢ. “ᤀᤡᤱᤃᤠ᤹ ᤀᤠᤏᤡᤱᤘᤠ᤹ᤀᤥ ᤂᤧᤴ ᤕᤖᤡᤰ ᤛᤡᤱᤏᤠᤳ ᤗᤧᤵᤔᤡ ᤁᤧᤄᤥᤒᤠᤸᤗᤧ ᤕᤖᤡᤰ ᤗᤢᤱᤔᤠ᤹ ᤋᤢᤰᤋᤢᤒᤡᤗᤠᤖᤥ॥” ᤕᤧᤛᤢᤖᤧ ᤔᤧᤳᤋᤢ. “ᤂᤧᤏᤧ᤹ ᤛᤧᤰᤂᤠᤀᤣ ᤁᤧᤒᤠ᤺ᤳᤋᤢᤖᤥ॥”

⁴⁴ ᤜᤧᤰᤁᤩᤠᤱ ᤕᤧᤛᤢᤴ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤡᤔᤥᤴᤏᤡᤴ ᤔᤧᤳᤋᤢ. “ᤛᤡᤔᤥᤏᤣ. ᤀᤡᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ ᤋᤩᤠᤱᤅᤡᤸᤗᤧ ᤗᤠᤱ ᤘᤠᤜᤵᤔᤠ ᤆᤫᤠ᤺ᤳ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤡᤴ ᤁᤢᤔᤡᤰᤘᤠ᤺ᤸᤗᤧ ᤘᤠᤜᤵᤋᤢᤀᤠᤱ ᤁᤢᤎᤧᤃᤣ᤺ᤰᤀᤡ᤺ᤸᤗᤧ ᤋᤢᤃᤢᤀᤠᤱ ᤘᤠ᤹ᤖᤥ॥

⁴⁵ ᤂᤧᤏᤧ᤹ ᤀᤡᤱᤃᤠ᤹ ᤆᤢᤵ ᤁᤧᤔᤧᤳᤋᤠᤱᤗ ᤛᤧᤘᤠ ᤁᤧᤶᤔᤧᤳᤋᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤡᤱᤃᤠ᤹ ᤋᤩᤠᤱᤅᤠᤱᤎᤥᤀᤣ ᤀᤠᤗᤠᤱᤅᤥ ᤆᤢᤵ ᤔᤧᤳᤋᤢᤖ ᤘᤠ᤹ᤖᤥ॥

⁴⁶ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤎ᤻ᤃᤣᤰᤀᤥ ᤏᤡ᤺ᤱᤃᤣ᤹ ᤁᤧᤴᤜᤢ᤺ᤳᤋᤠᤱᤅᤡᤴ ᤁᤧᤶᤒᤡᤖᤠᤱᤅᤡᤴ. ᤁᤖ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤀᤠᤗᤠᤱᤅᤥ ᤑᤢᤱᤏᤠᤶᤔᤡᤴ ᤜᤢ᤺ᤳᤋᤠᤱ ᤐᤡᤖᤠᤱᤅᤠᤱ ᤘᤠ᤹ᤖᤥ॥

⁴⁷ ᤁᤴ ᤔᤧᤴᤇᤢᤔᤠ᤹ᤀᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤠᤱᤒᤠᤸᤗᤧ ᤕᤖᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤛᤢ᤹ ᤁᤧᤗ᤹ᤒᤠ ᤀᤥᤛᤣ᤺ᤴᤀᤠᤎᤠᤰᤗᤥ॥ ᤂᤧᤴ ᤆᤢ᤺ᤳᤇᤡᤰ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥᤒᤠᤸᤗᤧ ᤛᤢ᤺ᤸᤗᤡᤰᤗᤰ ᤗᤢᤱᤔᤠ᤹ ᤋᤢᤰᤋᤢᤛᤡ᤹ ᤑᤠ᤹ᤀᤠᤱ ᤔᤧᤳᤏᤧ᤹ᤖᤥ॥”

⁴⁸ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤗᤠᤕᤥᤗᤠᤶ ᤗᤧᤵᤔᤡ ᤁᤧᤄᤥᤛᤢᤀᤠᤱ ᤁᤧᤘᤠ᤹ᤖᤥ॥”

⁴⁹ ᤜᤧᤰᤁᤣ᤺ᤸᤗᤧ ᤂᤢᤏᤧ᤹ᤏᤢ ᤆᤠ ᤁᤧᤈᤠᤒᤠᤖ ᤁᤧᤕᤢᤱᤒᤠ ᤘᤣ᤹ ᤔᤏᤠᤜᤠ᤹ ᤗᤠᤕᤥᤗᤠᤶ ᤗᤧᤵᤔᤡ ᤁᤧᤒᤡᤒᤠ ᤁᤴ ᤕᤠᤵᤔᤡᤴ ᤜᤠ᤺ᤵᤐᤣ ᤑᤠ᤹ᤀᤠᤱ ᤔᤧᤔᤧᤳᤇᤡᤱᤗᤥ॥

⁵⁰ ᤁᤖ ᤕᤧᤛᤢᤖᤧ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤏᤛᤠ᤺ᤴᤏᤡᤸᤗᤧ ᤋᤠᤱᤃᤧᤛᤧ᤺ᤵᤋᤧᤀᤠᤱ ᤁᤧᤘᤠ᤹ᤖᤥ॥ ᤛᤏᤠᤖᤢᤱᤏᤢ ᤐᤣᤃᤧ᤹ᤀᤥ॥”